‘ಮನಿಸ್’ ಮ್ಹಣ್ತಾನಾ ಎಕಾ ಭಲಾಯ್ಕೆವಂತ್ ವೆಕ್ತಿಚೆಂ ಚಿತ್ರಣ್ ಆಮ್ಚ್ಯಾ ಮತಿ ಪಡ್ದ್ಯಾರ್ ಖಂಚ್ತಾ. ಕುಡಿಚೆ ಭಾಯ್ಲ್ಯಾ ವಾ ಭಿತರ್‍ಲ್ಯಾ ಸರ್ವ್ ವಿಸ್ವ್ಯಾಂಪಯ್ಕಿ ಖಂಯ್ಚ್ಯಾಯ್ ಎಕಾ ವಿಸ್ವ್ಯಾಚಿ ಸಾರ್ಕಿ ವಾಡಾವಳ್ ನಾ ಜಾಲ್ಯಾರ್/ಅಪೂರ್ಣ್ ಮ್ಹಣ್ ದಿಸ್ಲ್ಯಾರ್ ಆನಿ ಮಾನಸಿಕ್ ವಾಡವಳೆಂತ್ ವೇಗ್ ನಾತ್ಲ್ಯಾ ವೆಕ್ತಿಂಕ್ ಸಾಮಾನ್ಯ್ ಜಾವ್ನ್ ಅಪಾಂಗ್ ವಾ ವಿಕಲ್‌ಚೇತನ್ ವೆಕ್ತಿ ಮ್ಹಣ್ ಒಳ್ಕೊಂಚೆಂ ಆಸ್ತಾ. ಪುಣ್ ದೈಹಿಕ್ ಆನಿ ಮಾನಸಿಕ್ ರಿತಿನ್ ವಾಡಾವಳ್ ಜಾಲ್ಲೆಬರಿಚ್ ತಿ ವೆಕ್ತಿ ಜಾಯ್ತೆಪಾವ್ಟಿಂ ಆಪ್ಲೆಂ ಅಪಾಂಗ್‌ಪಣ್ ಪಂಥಾಹ್ವಾನ್ ಜಾವ್ನ್ ಘೆವ್ನ್ ಸ್ವೀಕಾರ್ ಕರ್‍ತಾ ತರ್ ತಸಲ್ಯಾಂಕ್ ಸಮಾಜೆನ್ ವಿಶೇಸ್ ಪರಿಗಣನ್ ದಿಂವ್ಚೆಂ ಆಸ್ತಾ. ಪುಣ್ ಪ್ರಾಯೆಕ್ ಪಾಂವ್ಚ್ಯಾ ಪಯ್ಲೆಂ ತರ್ ಹ್ಯಾ ಪರಿಗಣನಾಕ್ ಎಕೆ ರಿತಿಚ್ಯೆ ಜತನೆಕ್ ಸರಿ ಕರಿಜೆ ಪಡ್ತಾ. ಪಾಟ್ಲ್ಯಾ ಥೊಡ್ಯಾ ದಶಕಾಂಥಾವ್ನ್ ಭಲಾಯ್ಕೆಶೆತ್ ಜಾಗತಿಕ್ ಮಟ್ಟಾರ್ ಹ್ಯಾ ಅಪಾಂಗ್/ವಿಕಲ್‌ಚೇತನ್ ಭುರ್ಗ್ಯಾಂವಿಶಿಂ ವಿಶೇಸ್ ವಿಚಾರ್ ಸಾದಾರ್ ಕರ್‍ತೇ ಆಸಾ. ವಿಶೇಸ್ ಹುಸ್ಕೊ ದಾಕಯ್ತೇ ಆಸಾ.

ಜಾಗತಿಕ್ ಭಲಾಯ್ಕೆ ಸಂಸ್ಥ್ಯಾಚ್ಯಾ (WHO) ಪ್ರಕಾರ್ ಸಂಸಾರಾಚ್ಯಾ ಒಟ್ಟುಕ್ ಜಣಾಸಂಖ್ಯಾಂತ್ 15 ಠಕ್ಕೆ ಲೋಕ್ ಅಪಾಂಗ್‌ಪಣಾನ್ ಜಿಯೆತಾ. ಹ್ಯಾ ಪಯ್ಕಿ 80 ಠಕ್ಕೆ ಅಪಾಂಗ್ ಲೋಕ್ ಆರ್ಥಿಕ್ ರಿತಿನ್ ದುಬ್ಳೆ ಮ್ಹಣ್ ಲೆಕ್ಲ್ಯಾ ದೆಶಾಂನಿ ದಿಸೊನ್ ಯೆತಾ. ಭಾರತಾಂತ್ ಯೆಂವ್ಚೆಂ ತರ್ ಹಾಂಗಾಚ್ಯಾ ಒಟ್ಟುಕ್ ಜಣಾಸಂಖ್ಯಾಂತ್ 2.2 ಠಕ್ಕೆ ಲೋಕ್ ಕುಡಿಚ್ಯಾ ವಾ ಮಾನಸಿಕ್ ಅಪಾಂಗ್‌ಪಣಾನ್ ಜಿಯೆತಾ. ವ್ಹಡ್ ಮಟ್ಟಾಚೊ ಜಣಾಸಂಖೊ ಆಸ್ಚ್ಯಾ ಹಾಂಗಾ ಅಪಾಂಗ್ ಆಸ್ಚ್ಯಾ ವೆಕ್ತಿಂಚೆಂ ವರ್ಗೀಕರಣ್ ಕರ್‍ಚೆಂಚ್ ವ್ಹಡ್ ತ್ರಾಸಾಚಿ ಗಜಾಲ್ ಮ್ಹಣ್ ಸರ್ಕಾರಾಂನಿ ಆನಿ ಹಾಂಗಾಚ್ಯಾ ಭಲಾಯ್ಕೆ ಇಲಾಖ್ಯಾಂನಿ ಜಾಯ್ತೆಪಾವ್ಟಿಂ ಆಪ್ಲೆಂ ಅಸಾಹಯಕ್ಪಣ್ ದಾಕಯ್ಲಿಲ್ಲೆಂ ಆಸಾ. ಅಪಾಂಗ್ ಲೊಕಾವಿಶಿಂ ಏಕೀಕೃತ್ ವಿವರ್ ಆರಾಂವ್ಚ್ಯಾ ಉದ್ದೇಶಾನ್ ಆನಿ ತಾಂಕಾಂ ಆಧಾರ್ ಜಾಂವ್ಚ್ಯಾಕ್ ಮ್ಹಣ್ 2016 ಇಸ್ವೆಂತ್ ಭಾರತ್ ಸರ್ಕಾರಾನ್ ಪಾರ್ಲಿಮೆಂಟಾಂತ್ Rights of People with Disabilities Act(RPwD) ಮ್ಹಳ್ಳಿ ಅಡ್ತಿಗ್ ಜ್ಯಾರಿಯೆಕ್ ಹಾಡ್‌ಲ್ಲಿ. ಹ್ಯಾ ಏಕ್ಟಾ ಪರ್ಮಾಣೆಂ ಕುಡಿ ಆನಿ ಮಾನಸಿಕ್ ಮ್ಹಣೊನ್ 21 ರಿತಿಂಚ್ಯಾ ಅಪಾಂಗ್‌ಪಣಾಂಕ್ ಸರ್ಕಾರಾನ್ ಅಧಿಕೃತ್ ಮ್ಹಣ್ ಅಂಗೀಕಾರ್ ದಿಲ್ಲೊ ಆಸಾ. ಹಾಂತುಂ ಎಸಿಡ್ ಆಕ್ರಮಣಾಂಕ್ ಲಾಗೊನ್ ಕುಡಿಚೆ ವಿಸ್ವೆ ಹೊಗ್ಡಾವ್ನ್ ಘೆತ್ಲಲ್ಯಾಂಕೀ ಕುಡ್ಸಿಲ್ಲೆಂ ಆಸಾ.

RPwD ಅಡ್ತಿಗ್ ಜ್ಯಾರಿಯೆಕ್ ಯೆತಾನಾ ಭಾರತಾಂತ್ 0-6 ವರ್‍ಸಾಂ ಪ್ರಾಯೆಭಿತರ್‍ಲ್ಯಾ ಅಪಾಂಗ್ ಭುರ್ಗ್ಯಾಂಚೊ ಸಂಖೊ 20.42 ಮ್ಹಣ್ ದಾಖಲೀಕರಣ್ ಜಾಲ್ಲೆಂ. ಹ್ಯಾ ಪಯ್ಕಿ 71 ಠಕ್ಕೆ, ಮ್ಹಣ್ಜೆ 14.52 ಲಾಖ್ ಭುರ್ಗಿಂ ಗ್ರಾಮೀಣ್ ಸುವಾತೆಂತ್ ವಸ್ತಿ ಕರ್‍ಚ್ಯಾ ವ್ಹಡಿಲಾಂ ಸಾಂಗಾತಾ ಆಸ್‌ಲ್ಲಿಂ ಮ್ಹಣ್ ಕಳೊನ್ ಆಯಿಲ್ಲೆಂ. ತೆದಾಳಾ ಚಲ್‌ಲ್ಲ್ಯಾ ಸಮೀಕ್ಶೆಂನಿ ಶ್ಹೆರಾನಿಂ 5.9 ಲಾಖ್ ಭುರ್ಗಿಂ ಅಪಾಂಗ್‌ಪಣಾನ್ ಜಿಯೆತಾತ್ ಮ್ಹಣ್ ಲೇಕ್ ಧರ್‌ಲ್ಲೆಂ. ಹ್ಯಾ ಪಯ್ಕಿ 1.49 ಭುರ್ಗ್ಯಾಂಕ್ ಎಕಾವರ್ನಿ ಚಡ್ ವಿಸ್ವಾಂಚೆಂ ಊಣ್‌ಪಣ್ ಆಸಾ ಮ್ಹಣ್ ದಾಖಲ್ ಜಾಲ್ಲೆಂ. ವಂಶ್ ಪಾರಂಪರ್ಯಾಕ್ ಲಾಗೊನ್ ಜಿನೊಸಾಂತ್ ಆಸ್ಚೆ ವೆತ್ತ್ಯಾಸ್(genetic abnormalities), ಗರ್ಬಾಂತ್ ಆಸ್ತಾನಾ ಗರ್ಬಾ ಭೊಂವಾರಿಂ ಜಾಂವ್ಚೆ ಶಾರೀರಿಕ್ ಸಮಸ್ಸೆ ಹೆಂ ಸರ್ವ್  ಭುರ್ಗಿಂ ಜಲ್ಮಾತಾನಾಂತ್ ಅಪಾಂಗ್ ಜಾಂವ್ಕ್ ಕಾರಣ್ ಜಾತಾ ಮ್ಹಣ್ ವಯ್ಜಕೀಯ್ ಶಾಸ್ತಿರ್ ಸಾಂಗ್ತಾ. ಪರಿಸರಾಂತ್ಲ್ಯಾ ವೈರಸಾಂಕ್, ವಿಕಿರಣಾಂಕ್ ಆನಿ ಆವ್ಘಡಾಂಕ್ ಲಾಗೊನ್, ಭುಗ್ಯಾಂಥಂಯ್ ಜಲ್ಮಾ ಉಪ್ರಾಂತ್ ಅಂಗ್ ವಿಕಲತಾ ಉಬ್ಜೊಂಚಿ ಆಸ್ತಾ. ಹ್ಯಾ ಭಾಯ್ರ್ ಭುರ್ಗ್ಯಾಂಥಂಯ್ ದಿಸೊನ್ ಯೆಂವ್ಚಿ ಅತೀ ಚುರುಕತಾಯ್ (Hyper Active), ಕಠೀಣ್ ಹಟ್, ಕಠೀಣ್ ಆಳ್ಸಾಯೆಕೀ ‘ವಿಶೇಸ್ ಕ್ಶಮತಾ ಆಟಾಪ್ಚಿಂ ಭುಗಿಂ’ ಮ್ಹಣ್ ಲೆಕ್ಚೆಂ ಆಸಾ.

ಏಕ್ ಕಾಳ್ ಆಸ್‌ಲ್ಲೊ. ಹಳ್ಳ್ಯಾಂನಿ ಆಸ್ಪತ್ರ್ಯಾಂಚಿ ಸೆವಾ ನಾತ್‌ಲ್ಲಿ. ಗರ್ಬೆಸ್ತ್ ಸ್ತ್ರೀಯಾಂಕ್ ಜಾಯ್ ತೆಂ ಪೌಶ್ಟಿಕ್ ಖಾಣ್ ಮೆಳನಾತ್ಲೆಂ ಆನಿ ಸಾಂಗಾತಾ ಘರಾಂನಿಚ್ ತಾಂಚೊ ಬಾಂಳ್ತೆರ್ ಜಾತಾಲೊ ಜಾಲ್ಲ್ಯಾನ್ ಭುರ್ಗೆಂ ಆನಿ ಆವಯ್ ವಯ್ರ್ ವೈರಸ್ ಎಟ್ಯಾಕ್ ಜಾತಾಲೆಂ. ಹಾಚೊ ಪರಿಣಾಮ್ ಜಾವ್ನ್ ಭುರ್ಗಿಂ ವಿವಿಧ್ ರಿತಿಂಚ್ಯಾ ಅಪಾಂಗ್‌ಪಣಾಕ್ ಬಲಿ ಜಾತಾಲಿಂ. ಪುಣ್ ಆಜ್ ತಿ ಪರಿಗತ್ ಬದಲ್ಲ್ಯಾ. ಗರ್ಬ್ ಆಸಾ ಮ್ಹಣ್ ಕಳ್‌ಲ್ಲ್ಯಾ ದೀಸ್ ಥಾವ್ನ್ ಆಸ್ಪತ್ರೆಕ್ ವಚೊನ್ ಭಲಾಯ್ಕೆ ತಪಾಸ್ಣಿ ಕರ್‍ಚಿ ಸವಯ್ ಸ್ತ್ರೀಯಾಂನಿ ಆಪ್ಣಾಯ್ಲ್ಯಾ. ಉತ್ತರ್ ಭಾರತಾಚ್ಯಾ ಕಾಂಯ್ ಥೊಡ್ಯಾ ರಾಜ್ಯಾಂನಿ, ಆದಿವಾಸಿ ಸುವಾತ್ಯಾಂನಿ ಆಜೂನ್ ಸ್ತ್ರೀಯೊ ಘರಾಂತ್ ಬಾಳಾಂತ್ ಜಾತಾತ್ ಸೊಡ್ಲ್ಯಾರ್ ಉರ್‌ಲ್ಲ್ಯಾ ಸುವಾತ್ಯಾಂನಿ ಪ್ರಸೂತ್‌ಪಣಾವೆಳಾರ್ ಗೈನಕೋಲೊಜಿಸ್ಟ್ ಸಾಂಗಾತಾ ಆಸೊಂಕ್ ಜಾಯ್ ಮ್ಹಳ್ಳೆಂ ಚಿಂತಪ್ ಬಳ್ ಜಾಲಾಂ. ಭುರ್ಗ್ಯಾಂಚ್ಯಾ ಅಪಾಂಗ್‌ಪಣಾವಿಶಿಂ ಚಿಂತ್ಚಿಂ ಆನಿ ತಾಂಚ್ಯಾ ಬರೆಪಣಾಖಾತಿರ್ ವಾವ್ರ್ ಕರ್‍ಚಿಂ ಹಜಾರೊಂ ಸಂಘಟನಾಂ ಸಂಸಾರ್‌ಭರ್ ಆಸಾತ್. ಭುರ್ಗ್ಯಾಂಕ್ ಯೆಂವ್ಚೆಂ ಥೊಡೆ ತಾಪ್ (ಟೈಫೋಯ್ಡ್, ಪೋಲಿಯೊ…) ತಾಂಚ್ಯಾ ಆಂತರಿಕ್ ಆನಿ ಬಾಹ್ಯ್ ವಿಸ್ವ್ಯಾಂಕ್ ಬಾದಕ್ ಕರ್‍ತಾತ್ ಆನಿ ತಾಂಕಾಂ ಶಾಶ್ವಿತ್ ಅಪಾಂಗ್ ಕರ್‍ನ್ ಬದ್ಲಿತಾತ್. ಪುಣ್ ಪ್ರಸ್ತುತ್ ಗಜಾಲೆಂತ್ ಜಿನೊಸಾಂತ್ ವಿಕಲ್‌ಚೇತನ್ ಜಾವ್ನ್ ಬದ್ಲೊಂಚೆವರ್ನಿ ಹಿಂಸೆಕ್ ಲಾಗೊನ್ ಅಪಾಂಗ್ ಜಾಂವ್ಚ್ಯಾ ಭುರ್ಗ್ಯಾಂಚಿ ಪರಿಗತ್ ಬೊವ್ ದುಕಿಭರಿತ್ ಆಸಾ ಮ್ಹಣ್ UNICEF ಸಂಸ್ಥ್ಯಾಚೊ ಎಕ್ಸಿಕ್ಯೂಟಿವ್ ಡೈರೆಕ್ಟರ್ ಹೆನ್ರಿಟ್ ಫೋರ್ ಆಪ್ಲಿ ಖಂತ್ ಉಚಾರ್‍ತಾ.

ಝುಜ್-ಕಾಟ್ಕಾಯ್ ಭುರ್ಗ್ಯಾಂಕ್ ಅಪಾಂಗ್ ಕರ್‍ತಾ?: ‘ಸೇವ್ ದಿ ಚಿಲ್ಡ್ರನ್’ ಮ್ಹಳ್ಳ್ಯಾ  ಅಂತರಾಶ್ಟ್ರೀಯ್  ಸಂಘಟನಾಚ್ಯೆ ವರ್ದೆಪ್ರಕಾರ್ ಸಂಸಾರಾಂತ್ 449 ಲಾಖ್ ಭುಗಿಂ ಝುಜ್, ಹಿಂಸಾ ಚಲ್ಚ್ಯಾ ಪ್ರದೇಶಾಂನಿ ಜಿಯೆತಾತ್. ಕಾಟ್ಕಾಯ್ ಆನಿ ಝುಜಾಕ್ ಲಾಗೊನ್ ಎಕಾ ವರ್‍ಸಾ ಆಟ್ ಹಜಾರ್ ಭುರ್ಗ್ಯಾಂಚಿ ಹತ್ತ್ಯಾ ಚಲ್ತಾ ವಾ ತಿಂ ಅಪಾಂಗ್ ಜಾವ್ನ್ ಬದಲ್ತಾತ್. ಅಫ್ಘಾನಿಸ್ಥಾನ್ ಥಾವ್ನ್ ಯೆಮನ್ ಪರ್ಯಾಂತ್ ಆನಿ ಸಿರಿಯಾ ಥಾವ್ನ್ ಬಡ್ಗಾ ಇಥಿಯೋಪಿಯಾ ಪರ್ಯಾಂತ್ ಆಕಾಂತ್‌ವಾದ್, ಕೋಮುವಾದ್, ಸಮುದಾಯ್ ಆನಿ ದೇಶೀಯ್ ವಾದ್ ನಾಂವಾನ್ ನಿರಂತರ್ ಹಿಂಸಾ ಚಲ್ತೇ ಆಸ್ತಾ. ಹ್ಯೆ ಹಿಂಸೆಕ್ ಲಾಗೊನ್ ಹರ್‍ಯೆಕಾ ವರ್‍ಸಾ ಹಜಾರೊಂ ಭುರ್ಗಿಂ ಅಪಾಂಗ್ ಜಾವ್ನ್ ಬದಲ್ತಾತ್. ಹ್ಯಾ ಪ್ರದೇಶಾಂನಿ ಆಸ್ಚಿಂ ಭುರ್ಗಿಂ ಮಾನಸಿಕ್ ಆನಿ ದೈಹಿಕ್ ಜಾವ್ನ್ ಚಿಂತಿನಾತ್ಲ್ಯೆ ಭಾಶೆನ್ ಅಸ್ಕತ್ ಜಾತಾತ್.

2020 ಇಸ್ವೆಂತ್ UN ಸಂಸ್ಥ್ಯಾನ್ ಭುರ್ಗ್ಯಾಂವಯ್ರ್ ಜಾಂವ್ಚೆ ಜುಲುಮ್ ಆನಿ ತಾಂಕಾಂ ಅಪಾಂಗ್‌ಪಣಾಕ್ ಲೊಟ್‌ಲ್ಲ್ಯಾ ೨೬,೪೨೫ ಘಡಿತಾಂವಿಶಿಂ  ಸವಿಸ್ತಾರ್ ತರ್ಕ್ ಚಲಯ್ಲೆಂ ಆಸಾ. ಬೊಂಬ್, ರೈಫಲಾಂ, ಗ್ರೆನೇಡಾಂ ತಸಲ್ಯಾ ಹಾತೆರಾಂಚ್ಯಾ ಸ್ಪೋಟನಾಕ್ ಲಾಗೊನ್ ಹಜಾರೊಂ ಭುರ್ಗ್ಯಾಂನಿ ಆಪ್ಲೆ ಹಾತ್, ಪಾಂಯ್ ಹೊಗ್ಡಾಯಿಲ್ಲೆ ಆಸಾತ್. ಕಿತ್ಲಿಶಿಂಗೀ ಭುರ್ಗಿಂ ದೊಳ್ಯಾಂನಿ ದೀಶ್ಟ್ ಆನಿ ಕಾನಾಂನಿ ಆಯ್ಕೊಂಚಿ ಸಕತ್ ಹೊಗ್ಡಾವ್ನ್ ಘೆಂವ್ಕ್ ಪಾವ್ತಾತ್.  ಹ್ಯಾ ಭಾಯ್ರ್ ಆಕ್ರಮಣ್ ಚಲ್ಚ್ಯಾ ಸುವಾತ್ಯಾಂನಿ ಪೌಶ್ಟಿಕ್ ಖಾಣಾಂಚೊ ತತ್ವಾರ್ ಆಸ್ತಾ ಜಾಲ್ಲ್ಯಾನ್ ಘರಾಭಿತರ್ ಆಸ್ಚಿಂ ಭುರ್ಗಿಂಯ್ ಸವ್ಕಾಸ್ ಏಕ್ ನಾ ಎಕೆ ರಿತಿಚ್ಯಾ ಕುಡಿಚ್ಯಾ ಅಪಾಂಗ್‌ಪಣಾಕ್ ಆಪ್ಣಾವ್ನ್ ಘೆಂವ್ಕ್ ಪಾವ್ತಾತ್.

ನಾಗಸಾಕಿ ಅನಿ ಹಿರೋಶಿಮಾ ವಯ್ರ್ ಅಣುಬೊಂಬ್ ಪ್ರಯೋಗ್ ಕೆಲ್ಲ್ಯಾ ಉಪ್ರಾಂತ್ ಸಂತತೆಚ್ಯೆ ಸಂತತೆಪರ್ಯಾಂತ್ ಜಲ್ಮೊನ್ ಆಯಿಲ್ಲಿಂ ಭುರ್ಗಿಂ ಕಶೆಂ ಅಪಾಂಗ್‌ಪಣಾಕ್ ಬಲಿ ಜಾಲಿಂ ಮ್ಹಳ್ಳೆಂ ಇಸ್ಕೊಲಾಂತ್ ಶಿಕನಾತ್ಲೆ ಕೊಣೀ ಆಸ್ಚೆನಾಂತ್. ಪಯ್ಲ್ಯಾ ಆನಿ ದುಸ್ರ್ಯಾ ಮ್ಹಾಝುಜಾ ನಂತರ್ ಜಾಗತಿಕ್ ರಾಶ್ಟ್ರಾಂನಿ ಸಾಂಗಾತಾ ಯೇವ್ನ್ ‘ಫುಡೆಂ ಸಂಪೂರ್ಣ್ ಝುಜ್ ನಾಕಾ’ ಮ್ಹಳ್ಳೊ ಠರಾವ್ ಘೆತ್‌ಲ್ಲ್ಯಾ ಪಾಟ್ಲ್ಯಾನ್ ಕುಡಿಚೆ ವಿಸ್ವೆ ಹೊಗ್ಡಾವ್ನ್ ಘೆತ್‌ಲ್ಲ್ಯಾ ಹಜಾರೊಂ ಭುರ್ಗ್ಯಾಂಚೆಂ ಚಿತ್ರಣ್/ಕಾರಣ್ ಆಸ್‌ಲ್ಲೆಂ ಮ್ಹಣ್ ಖ್ಯಾತ್ ಮಿಲಿಟರಿ ಇತಿಹಾಸ್‌ಕಾರ್ ಮೈಕಲ್ ಕೆ ಜೋನ್ ಹಾಣೆಂ ಆಪ್ಲ್ಯಾ ‘ದಿ ರಿಟ್ರೀಟ್’ (The Retreat) ಮ್ಹಳ್ಳ್ಯಾ ಬುಕಾಂತ್ ಉಲ್ಲೇಖ್ ಕೆಲ್ಲೊ ಆಸಾ.

ಶ್ರೀಲಂಕಾಂತ್ ಐಖಿಖಿ‌ಇ ಚ್ಯಾ ಕಾಳಾರ್ ಸರ್ಕಾರಿ ಸಯ್ನಾಮದೆಂ ಆನಿ ತಮಿಳ್ ಸಯ್ನಾಮದೆಂ ಜಾಲ್ಲ್ಯಾ ಝುಜಾವೆಳಾರ್ ಜಾಫ್ನಾ ಮ್ಹಳ್ಳ್ಯಾ ಪ್ರದೇಶಾಂತ್ ಆಪ್ಲ್ಯೆ ಕುಡಿಚೆ ವಿಸ್ವೆ ಹೊಗ್ಡಾವ್ನ್ ಘೆತ್‌ಲ್ಲ್ಯಾ ಸಾತ್ ಹಜಾರ್ ಭುಗ್ಯಾಂಚೆಂ ಲೇಕ್ ಆಜೂನ್ ಜಾಗತಿಕ್ ಮನ್ಶಾಂ ಹಕ್ಕಾಂಚಿಂ ಸಂಘಟನಾಂ ಆಪ್ಲ್ಯಾ ಕಾಳ್ಜಾಂತ್ ಘೆವ್ನ್ ಚಲ್ತಾತ್ ಆನಿ ಭುರ್ಗ್ಯಾಂಕ್ ಝುಜಾಥಾವ್ನ್ ಬಚಾವ್ ಕರಾ ಮ್ಹಣ್ ಪರಾತುನ್ ಆಸಾತ್. ತ್ಯಾ ನಂತರ್ ತಾಲಿಬಾನ್ ಸಯ್ನಾನ್ ಅಫ್ಘಾನಿಸ್ಥಾನಾಂತ್ ಜ್ಯಾರಿಯೆಕ್ ಹಾಡ್‌ಲ್ಲಿ ಹಿಂಸಾ ಹಜಾರೊಂ ಭುರ್ಗ್ಯಾಂಕ್ ಶಾಶ್ವತ್ ಅಪಾಂಗ್ ಕರುಂಕ್ ಪಾವ್‌ಲ್ಲೆಂ ವಿಸ್ರೊನ್ ಸೊಡ್ಚೆತಸಲೆಂ ನ್ಹಯ್. 2001ಇಸ್ವೆಂತ್ ಅಮೆರಿಕಾನ್ ಅಫ್ಘಾನಾಚ್ಯಾ ತಾಲಿಬಾನ್ ಸರ್ಕಾರಾಕ್ ಧೆಸ್ವಾಟಾಯ್ತಾನಾ ಪ್ರತಿರೋಧ್ ಜಾವ್ನ್ ತಾಲಿಬಾನ್ ಆಕಾಂತ್‌ವಾದಿಂನಿ ವ್ಹಡ್ ಮಟ್ಟಾಚೆರ್ ಪ್ರತ್ಯಾಕ್ರಮಣ್ ಕೆಲ್ಲೆಂ. ಬೆಜಾರಾಯೆಚಿ ಗಜಾಲ್ ಮ್ಹಳ್ಯಾರ್ ಹಜಾರೊಂ ಭುರ್ಗ್ಯಾಂಕ್ ತಾಣಿಂ ಆಪ್ಲೆಂ ಕವಚ್ (Human Shield) ಜಾವ್ನ್ ಬದ್ಲಿಲ್ಲೆಂ. ಕಿತ್ಲೆಶೆಗೀ ದೀಸ್ ಭುರ್ಗ್ಯಾಂಕ್ ಸಾರ್ಕೆಂ ಖಾಣ್-ಉದಕ್ ದೀನಾಸ್ತಾಂ ತೆ ಆಪ್ಲ್ಯಾ ವಾಹನಾಂನಿ ಘೆವ್ನ್ ಭೊಂವ್‌ಲ್ಲೆ. ಚೆಡ್ವಾಂ ಭುರ್ಗ್ಯಾಂವಯ್ರ್ ವ್ಹಡ್ ಮಟ್ಟಾರ್ ಅತ್ತ್ಯಾಚಾರ್‌ಯೀ ಕೆಲ್ಲೊ. ಆಖ್ರೇಕ್ ಶಾಶ್ವತ್ ಜಾವ್ನ್ ಅಪ್ಘಾನಾಚ್ಯಾ ದೊಂಗ್ರಾಳ್ ಪ್ರದೇಶಾಂನಿ ಲಿಪೊಂಕ್ ವೆಚ್ಯಾ ಪಯ್ಲೆಂ ತಾಣಿಂ ಸಾಂಗಾತಾ ಆಸ್‌ಲ್ಲ್ಯಾ ಭುರ್ಗ್ಯಾಂಚೆ ಹಾತ್ ಆನಿ ಪಾಂಯ್ ಅಪಾಂಗ್ ಕರ್‍ನ್ ಸೊಡ್‌ಲ್ಲೆ. ಹ್ಯಾ ಭುರ್ಗ್ಯಾಂನಿ ವ್ಹಡ್ ಜಾತಾನಾ ತಾಲಿಬಾನಾವಯ್ರ್ ಖಂಯ್ಚ್ಯೇಯ್ ರಿತಿಚ್ಯಾ ಫಾರಿಕ್ಪಣಾಕ್ ದೆಂವೊಂಕ್ ನ್ಹಜೊ ಮ್ಹಳ್ಳ್ಯಾ ಉದ್ದೇಶಾನ್ ಆಕಾಂತ್‌ವಾದಿಂನಿ ಅಶೆಂ ಕೆಲ್ಲೆಂ ಮ್ಹಣ್ ಉಪ್ರಾಂತ್ಲ್ಯಾ ದಿಸಾಂನಿ ಕಳೊನ್ ಆಯಿಲ್ಲೆಂ.

ಇರಾಕ್ ಝುಜಾವೆಳಾರೀ ಭುರ್ಗ್ಯಾಂನಿ ಅಪಾಂಗ್‌ಪಣಾಕ್ ವೆಂಗ್ಚೆಂ ಆಡಾಂವ್ಕ್ ಖಂಯ್ಚ್ಯಾಯ್ ಸರ್ಕಾರಾಂಕ್ ಸಾಧ್ ಜಾಂವ್ಕ್ ನಾ. ಸದ್ದಾಮ್ ಹುಸೇನಾಕ್ ಅಧಿಕಾರಾಥಾವ್ನ್ ಭಾಯ್ರ್ ಧಾಂವ್ಡಾಯ್ಲ್ಯಾ ಉಪ್ರಾಂತ್ ಇರಾಕಾಚ್ಯಾ ಗ್ರಾಮೀಣ್ ಪ್ರದೇಶಾಂನಿ ವಿಶೇಸ್ ರಿತಿಚೆಂ ಸಮುದಾಯಿಕ್ ಘರ್ಶಣ್ ಚಲ್‌ಲ್ಲೆಂ. ಹ್ಯಾ ಘರ್ಶಣಾಕ್ ಕುರ್ದಿಶ್ ಜನಾಂಗಾಚ್ಯಾ ಭುರ್ಗ್ಯಾಂನಿ ವ್ಹಡ್ ಮಟ್ಟಾರ್ ಜೀವ್ ಹೊಗ್ಡಾಯ್ಜೆ ಪಡ್‌ಲ್ಲೊ. ಹಜಾರೊಂ ಭುರ್ಗಿಂ ಅಪಾಂಗ್ ಜಾಲ್ಲಿಂ. ಜಾಯ್ತಿಂ ಪಿಡೇಸ್ತ್ ಜಾಲ್ಲಿಂ. ಪಾಕಿಸ್ಥಾನ್ ಆನಿ ಅಫ್ಘಾನ್ ಗಡಿ ಪ್ರದೇಶಾಂನಿ ಆಸ್ಚ್ಯಾ ಬಲೂಚ್ ಜನಾಂಗಾಚ್ಯಾ ಭುರ್ಗ್ಯಾಂಚಿ ಪರಿಗತ್‌ಯೀ ಕಾಂಯ್ ವೆಗ್ಳಿ ನಾ. ಆನಿ ಆತಾಂ ಇಸ್ರಾಯೆಲ್ ಆನಿ ಹಮಾಸ್ ಮದೆಂ ಚಲ್ಚೆಂ ಝುಜ್ ಆನಿ ಥಂಯ್ ಥಾವ್ನ್ ಯೆಂವ್ಚ್ಯೊ ತಸ್ವೀರ್‍ಯೊ ಝುಜ್, ಕಾಟ್ಕಾಯ್ ಕಶೆಂ ಭುರ್ಗ್ಯಾಂಕ್ ಅಪಾಂಗ್ ಕರ್‍ತಾ ಮ್ಹಣ್ಚ್ಯಾಕ್ ಜಿವ್ಯೊ ರುಜ್ವಾತಿ ದಿತಾತ್.

ಹ್ಯೂಮನ್ ಟ್ರಾಫಿಕ್ ಆನಿ ಭುರ್ಗ್ಯಾಂಚೆಂ ಅಪಾಂಗ್‌ಪಣ್

 ಎಕಾ ಜಾಗ್ಯಾಥಾವ್ನ್ (ರಾಜ್ಯ್/ದೇಶ್) ಆನ್ಯೆಕಾ ಜಾಗ್ಯಾಕ್ ಮನ್ಶಾಂಕ್ ಚೊರಿಯಾಂ ಸಾಗ್ಸುಂಚ್ಯಾಕ್ Human Trafficking ಮ್ಹಣ್ ಒಳ್ಕತಾತ್. ಅಶೆಂ ಅಂತರಾಶ್ಟ್ರೀಯ್ ಮಟ್ಟಾರ್ ಹರ್‍ಯೆಕಾ ವರ್‍ಸಾ ಲಾಖೊಂ ಮನ್ಶಾಂಚಿ ಯೆರಾದರಿ ಜಾತಾ. ಆದಿಂ ಆಫ್ರಿಕಾ ಆನಿ ಆರ್ಥಿಕ್ ರಿತಿಥಾವ್ನ್ ಬೊವ್ ದುಬ್ಳಿಂ ಆಸ್ಚ್ಯಾ ರಾಶ್ಟ್ರಾಂಥಾವ್ನ್ ಗುಲಾಮ್ ಮ್ಹಳ್ಳ್ಯಾ ಬಿಲ್ಲ್ಯಾಖಾಲ್ ಮನ್ಶಾಂಚಿ ಯೆರಾದರಿ ಜಾತಾಲಿ. ಪುಣ್ ಜಾಗತಿಕ್ ಮನ್ಶಾ ಸಂಘಟನಾಂಚ್ಯಾ ನಿರಂತರ್ ಪ್ರೇತನಾಂಕ್ ಲಾಗೊನ್ ಆನಿ ಲೊಕಾಥಂಯ್ ಉಬ್ಜಲ್ಲ್ಯಾ ಪ್ರಗತಿಪರ್ ಚಿಂತ್ಪಾನ್ ಹ್ಯಾ ಗುಲಾಮ್‌ಗಿರಿಚಿ ಯೆರಾದರಿ ಉಣಿ ಜಾಲಿ. ತ್ಯಾ ನಂತರ್ ಹ್ಯೂಮನ್ ಟ್ರಾಫಿಕಿಂಗ್ ಮಾಫಿಯಾನ್ ಗುಲಾಮ್‌ಗಿರೆಚಿ ನವಿ ರೀತ್ ಸುರ್ವಾತ್ ಕೆಲಿ. ಭುರ್ಗ್ಯಾಂಕ್ ಚೊರಿಯಾಂ ವ್ಹರ್‍ಚೆಂ ಆನಿ ತಾಂಕಾಂ ಬಳಾತ್ಕಾರಾನ್ ಅಪಾಂಗ್ ಕರ್‍ನ್ ತಾಂಚೆಥಾವ್ನ್ ಭಿಕ್ ಮಾಗೊಂಕ್ ಲಾಂವ್ಚೊ ತಾಂಚೊ ಅಂತಿಮ್ ಶೆವೊಟ್ ಜಾವ್ನಾಸ್‌ಲ್ಲೊ.

ಸೊಮಾಲಿಯಾ, ಉಗಾಂಡ, ನೈರೋಬಿ, ಕೆನ್ಯಾ, ಬಾಂಗ್ಲಾದೇಶ್, ಭಾರತ್ ಅಸಲ್ಯಾ ರಾಶ್ಟ್ರಾಂನಿ ಭುರ್ಗ್ಯಾಂಕ್ ಅಪಾಂಗ್ ಕರ್‍ನ್ ಭಿಕ್ ಮಾಗೊಂಕ್ ಲಾಂವ್ಚೆ ವ್ಹಡ್ ಮಾಫಿಯಾ ಆಸಾತ್. ಹ್ಯಾ ಭಾಯ್ರ್ ಚೊರ್‌ಲ್ಲ್ಯಾ ಭುರ್ಗ್ಯಾಂಕ್ ಅಪಾಂಗ್ ಕರ್‍ನ್ ಡ್ರಗ್ಸ್ ಸಾಗ್ಸುಂಕ್, ಗಾಂಜಾ, ಚರಸ್ ತಸಲ್ಯಾ ಮಾದಕ್ ವಸ್ತು ಜಾಂವ್ಚ್ಯಾ ತೊಟಾಂನಿ ವಾವ್ರ್ ಕರುಂಕ್ ಆನಿ ಮಾಫಿಯಾಚೆ ಖಬ್ರಿ ಜಾವ್ನ್ ಉಪಯೋಗ್ ಕರ್‍ಚೆಂ ಚಾಲು ಆಸಾ. International Labour Organization(ILO) ಪರ್ಮಾಣೆಂ ಹರ್ ವರ್‍ಸಾ 10,000 ಭುರ್ಗಿಂ ಮನ್ಶಾ ಸಾಗ್ಸಾಣೆದಾರಾಂಚ್ಯಾ ಹಾತಿಂ ಪಾವ್ತಾತ್ ಆನಿ ವ್ಹಡ್ ವಾಂಟ್ಯಾನ್ ಅಪಾಂಗ್‌ಪಣಾಕ್ ವೊಳಗ್ ಜಾತಾತ್.

ಪ್ರಸ್ತುತ್ ಹವೊ ಭುರ್ಗ್ಯಾಂಕ್ physically challenged children ಮ್ಹಳ್ಳ್ಯಾ ವರ್ಗಾಕ್ ಮೆಳಯ್ತಾ: ದುಬ್ಳಿಕಾಯ್, ಝುಜ್ ಆನಿ ಸಮಾಜೆಕ್ ವಾಂದೆ ಹಾಡ್ಚೆ ಮಾಫಿಯಾ ಭುರ್ಗ್ಯಾಂಚ್ಯಾ ಅಪಾಂಗ್‌ಪಣಾಕ್ ಕಿತ್ಲೆ ಕಾರಣ್ ಜಾತಾತ್‌ಗೀ ತಿತ್ಲ್ಯಾಚ್ ಮಟ್ಟಾರ್ ಪ್ರಸ್ತುತ್ ದಿಸೊನ್ ಯೆಂವ್ಚೆಂ ಗ್ಲೋಬಲ್ ವಾಮಿಂಗ್ (Global Warming) ಭುರ್ಗ್ಯಾಂಚ್ಯೆ ಭಲಾಯ್ಕೆಥಂಯ್ ವಾಯ್ಟ್ ಪರಿಣಾಮ್ ಘಾಲ್ತಾ ಮ್ಹಣ್ ಪರಿಸರ್‌ವಾದಿ ಸಾಂಗ್ತಾತ್. ಪ್ರಸ್ತುತ್ ಪರಿಸರಾಂತ್ ಭರ್‍ಸೊನ್ ಆಸ್ಚೆಂ ವಿಕಾಳ್ ಕಾರ್ಬನ್ ಡೈ ಓಕ್ಸೈಡ್ ತಸಲಿಂ ರಾಸಾಯನಿಕಾಂ, ಓಝೋನ್ ಪಡ್ದೊ ಪಾತಳ್ ಜಾವ್ನ್ ಥಂಯ್ ಯೆಂವ್ಚಿಂ ವಿಕಾಳ್ ಕಿರ್‍ಣಾಂ, ಮ್ಹೆಳೆಂ ಉದಕ್ ಹೆಂ ಸರ್ವ್ ಗರ್ಬಾಭಿತರ್ ಆಸ್‌ಲ್ಲ್ಯಾ ಆನಿ ಜಲ್ಮೊನ್ ಭುಂಯ್ ಪಡ್‌ಲ್ಲ್ಯಾ ಭುರ್ಗ್ಯಾಂಚೆರ್ ಗಂಭೀರ್ ಮ್ಹಣ್ಚೆತಸಲೆ ಪರಿಣಾಮ್ ಘಾಲುಂಕ್ ಪಾವ್ತಾತ್ ಮ್ಹಣ್ ಸಾನ್‌ಡಿಯಾಗೋಂತ್ ಚಲ್‌ಲ್ಲ್ಯಾ Americal College of Physicians Internal Medicine Meeting ಮ್ಹಳ್ಳ್ಯಾ ಭಲಾಯ್ಕೆ ಸಮ್ಮೇಳಾಂತ್ ಜಮ್ಲಲ್ಯಾಂನಿ ಆಕಾಂತ್ ವೆಕ್ತ್ ಕೆಲ್ಲೊ.

ಕಿತೆಂಚ್ ಖಬರ್ ನಾಸ್ತಾಂ ಜಾಂವ್ಚ್ಯೊ ಭುಂಯ್‌ಕಾಂಪ್ಣ್ಯೊ, ಆವ್ರ್, ದುಕೊಳ್ ಹ್ಯಾ ಸರ್ವಾಂಚೊ ಆಣ್ವೊ ಪರಿಣಾಮ್ ಭುರ್ಗ್ಯಾಂಚೆರ್ ಪಡ್ತಾ ಆನಿ ಹ್ಯಾ ವರ್ವಿಂ ಹಜಾರೊಂ ಭುರ್ಗಿಂ ಏಕ್ ನಾ ಎಕೆ ರಿತಿಚ್ಯಾ ಅಪಾಂಗ್‌ಪಣಾಕ್ ವೊಳಗ್ ಜಾತಾತ್. ಆದ್ಲ್ಯಾ ವರ್‍ಸಾ ಹಿಮಾಚಲ್ ಪ್ರದೇಶಾಚ್ಯಾ ದೊಂಗ್ರಾಳ್ ಪ್ರದೇಶಾಂನಿ ವೊತ್‌ಲ್ಲ್ಯಾ ಪಾವ್ಸಾನ್ ಕೆಲ್ಲಿ ಜಖ್ಮಿ ಹಾಕಾ ಸೂಕ್ತ್ ದಾಖ್ಲೊ ಜಾವ್ನ್ ಘೆವ್ಯೆತ್. ಹ್ಯಾಚ್ ಅಕ್ಟೋಬರ್ ಮ್ಹಯ್ನ್ಯಾಚ್ಯಾ ದುಸ್ರ್ಯಾ ಹಫ್ತ್ಯಾಂತ್ ಅಪ್ಘಾನಿಸ್ತಾನಾಂತ್ ಜಾಲ್ಲ್ಯೆ ಭುಂಯ್‌ಕಾಂಪ್ಣೆಚ್ಯೊ ತಸ್ವೀರ್‍ಯೊ ಸಂಸಾರ್‌ಭರ್ ಪಾವ್‌ಲ್ಲ್ಯಾ ಆನಿ ಹಾಂತುಂ ಘಾಯೆಲ್ಲ್ಯಾ ಭುರ್ಗ್ಯಾಂನಿ ರಸ್ತ್ಯಾ ದೆಗೆಂನಿ, ಆಪ್ಲ್ಯಾ ಫುಟ್ಲಲ್ಯಾ ಘರಾಂಮುಕಾರ್ ಆಸ್ಚ್ಯೊ ತಸ್ವೀರ್‍ಯೊ ಚಡ್ ವೈರಲ್ ಜಾಲ್ಲ್ಯೊ. ಹ್ಯಾ ಘಾಯೆಲ್ಲ್ಯಾ ಭುರ್ಗ್ಯಾಂಕ್ ಸೂಕ್ತ್ ಚಿಕಿತ್ಸಾ ಮೆಳ್ತಾಗೀ ನಾ ಮ್ಹಳ್ಳಿ ಖಾತ್ರಿ ನಾ. ಹೆ ಘಾಯ್ ಕ್ರಮೇಣ್ ಭುಗ್ಯಾಂಥಂಯ್ ಎಕೆ ರಿತಿಚ್ಯಾ ಅಪಾಂಗ್‌ಪಣಾಕ್ ಕಾರಣ್ ಜಾತಾತ್ ಮ್ಹಣ್ ಥಂಯ್ಸರ್ ಪಾವ್‌ಲ್ಲ್ಯಾ UNICEFಅಧಿಕಾರಿಂನಿ ಮಾದ್ಯಮಾಂ ಮುಕಾರ್ ಉಚಾರ್‌ಲ್ಲೆಂ ಆಸಾ.

Physically disabled Society ಮ್ಹಳ್ಳೆಂ ಪರಿಕಲ್ಪನ್ ಕಿತ್ಲೆಂ ಸಾರ್ಕೆಂ

 Physically Challenged  ಭುರ್ಗಿಂ ಮ್ಹಣ್ತಾನಾ ಕುಡಿಚೊ ಏಕ್ ವಿಸ್ವೊ ಊಣ್ ಆಸ್ಚ್ಯಾ ಭುರ್ಗ್ಯಾಂಚೆಂ ಚಿತ್ರಣ್ ಆಮ್ಚ್ಯಾ ಮತಿಪಡ್ದ್ಯಾಚೆರ್ ಯೆಂವ್ಚೆಂ ಸಹಜ್. ಪುಣ್ ಹೆಂ ಅಪಾಂಗ್‌ಪಣ್ ಜಾಯ್ತ್ಯಾ ದಿಸನಾತ್ಲ್ಯಾ ಸಂಗ್ತಿಂನಿ ಲಿಪೊನ್ ಆಸ್ತಾ. ಶಾಶ್ವತ್ ಅಪಾಂಗ್‌ಪಣ್ ತರ್ ತಾಂಕಾಂ ತೆಂ ಏಕ್ ಪಂಥಾಹ್ವಾನ್ ಜಾವ್ನ್ ಸ್ವೀಕಾರ್ ಕರ್‍ನ್ ಸಮಾಜೆಂತ್ ಹೆರಾಂಬರಿ ಜಿಯೆಶೆಂ ಶಿಕೊಂವ್ಕ್ ಜಾಯ್. ಸಮಾಜೆಂತ್ ದಿಸ್ತೆಂ ಆನಿ ನಾದಿಸ್ತೆಂ ಅಪಾಂಗ್‌ಪಣ್ ಆಪ್ಣಾಯಿಲ್ಲ್ಯಾ ಭುರ್ಗ್ಯಾಂಕ್ ಸಮ್ಜೊನ್ ಘೆಂವ್ಕ್ ಜಾಯ್. ಕುಡಿನ್ ಸರ್ವ್ ಸಾರ್ಕೆಂ ಆಸ್ಚ್ಯಾ ಭುರ್ಗ್ಯಾಂಥಂಯ್ ಅಪಾಂಗ್ ಭುರ್ಗ್ಯಾಂವಿಶಿಂ ಕೇವಲ್ ಸಿಂತಿಮೆಂತಾಂ ಉಬ್ಜೊಂವ್ಚ್ಯಾ ಬದ್ಲಾಕ್ ತಾಂಕಾಂ ಸಮಾನ್ ಜಾವ್ನ್ ಸ್ವೀಕಾರ್ ಕರುಂಕ್ ಶಿಕೊಂವ್ಕ್ ಜಾಯ್. ಜಲ್ಮಾನ್ ಅಪಾಂಗ್ ಜಾಂವ್ಚೆಂ ಸೊಡ್ನ್ ಜಲ್ಮಲ್ಯಾ ಉಪ್ರಾಂತ್ ಭುರ್ಗ್ಯಾಂನಿ ಕುಡಿಚೆ ವಿಸ್ವೆ ಹೊಗ್ಡಾವ್ನ್ ಘೆಂವ್ಚೆಂ, ಮಾನಸಿಕ್ ಜಾವ್ನ್ ಅಪಾಂಗ್ ಜಾಂವ್ಚೆಂ ಆಡಾಂವ್ಕ್ ಜಾಯ್.

ಭುರ್ಗ್ಯಾಂಥಂಯ್ ದಿಸೊನ್ ಯೆಂವ್ಚೆಂ ಅಪಾಂಗ್‌ಪಣ್ ಏಕ್ ಶಿರಾಪ್ ಮ್ಹಣ್ ಲೆಕ್ಚೊ ಏಕ್ ಕಾಳ್ ಆಸ್‌ಲ್ಲೊ. ಶಿಕಪ್ ಆನಿ ವಯ್ಜಕೀಯ್ ಶೆತಾಂತ್ಲ್ಯೆ ಪ್ರಗತೆನ್ ಹ್ಯಾ ಚಿಂತ್ಪಾಕ್ ಬೊವ್ ಸವ್ಕಾಸ್ ತರೀ ಸಮಾಜೆಥಾವ್ನ್ ಹುಮ್ಟುನ್ ಉಡಯಿಲ್ಲೆಂ. ಪುಣ್ ತಾಚ್ಯಾಕೀ ದೊಡ್ತ್ಯಾ ಮಾಪಾನ್ ಭುರ್ಗ್ಯಾಂಕ್ ಜಲ್ಮಾ ಉಪ್ರಾಂತ್ ಅಪಾಂಗ್ ಕರ್‍ಚೆಂ ಚಾಲು ಆಸಾ. ಸಮಾಜೆನ್ ಹ್ಯಾ ವಿಶಿಂ ಜಾಗ್ರುತ್ ಜಾಂವ್ಕ್ ಜಾಯ್. ಮನ್ಶಾಂಚ್ಯಾ ಕ್ರೂರ್‌ಪಣಾಕ್ ಲಾಗೊನ್ ಭುರ್ಗ್ಯಾಂನಿ ಅಂಗ್‌ಹೀನ್ ಜಾಂವ್ಚೆಂ ಆಡಾಂವ್ಕ್ ಜಾಯ್. ನಾ ತರ್ ಫುಡ್ಲ್ಯಾ ದಿಸಾಂನಿ ಸಗ್ಳಿ ಸಮಾಜ್‌ಚ್ Phಥಿsiಛಿಚಿಟಟಥಿ ಜisಚಿbಟeಜ Soಛಿieಣಥಿ ಜಾವ್ನ್ ಬದ್ಲೊಂಚ್ಯಾಂತ್ ದುಬಾವ್ ನಾ. ವಿಶ್ವ್ ಸಂಸ್ಥ್ಯಾನ್ ಆನಿ ಜಾಗತಿಕ್ ಭಲಾಯ್ಕೆ ಸಂಘಟನಾಂನಿ ಯೆದೊಳ್‌ಚ್ ಅಸಲ್ಯೆ ಎಕಾ ಭಿರಾಂತೆಚೆಂ ಪರಿಕಲ್ಪನ್ ಸಂಸಾರಾಮುಕಾರ್ ದವರ್‍ನ್ ಜಾಲಾಂ. ಹೆಂ ಆಡಾಂವ್ಚಿ ಸಂಪೂರ್ಣ್ ಜವಾಬ್ದಾರಿ ಸಮಾಜೆವಯ್ರ್ ಆಸಾ.

✍️ –ಸ್ಟ್ಯಾನಿ ಬೆಳಾ