ಸಂಕೇತ್ ಆಸ್ಚೆ ವಾಟ್ ದಾಕೊಂವ್ಕ್ ವಾ ಏಕ್ ವರ್ತಿ ಸಂಗತ್ ಸುಚಾಂವ್ಕ್. ಸಂಕೇತ್ ಆಪ್ಣಾವಿಶ್ಯಾಂತ್‌ಚ್ ಸಾಂಗನಾ, ಬಗಾರ್ ಹೆರ್ ಎಕಾ ವಿಶೇಸ್ ಸಂಗ್ತಿಚೆರ್ ಆಮ್ಚೆಂ ಗುಮಾನ್ ವೊಡ್ತಾ. ಕ್ರಿಸ್ತಾಂವ್ ಸಮಡ್ತಿಂತ್‌ಯೀ ವಿವಿಧ್ ಮಿಸ್ತೆರ್ ಸಮ್ಜೊಂಕ್ ಎಕೇಕ್ ಸಂಕೇತ್ ಆಸಾ. ತಾಂತುಂ ಬೆಂತಿಣ್‌ಯೀ ಏಕ್.

ಬೆಂತಿಣ್, ಆಧ್ಯಾತ್ಮಿಕ್ ಜಿವಿತಾಚೊ ಭಾಯ್ಲೊ ಘುರ್ತ್. ದೆವಾಲಾಗಿಂ ಲಾಗ್ಶಿಲೊ ಸಂಬಂದ್ ದವರ್‍ನ್ ಆಮ್ಕಾಂಚ್ ದೆವಾಕ್ ಸಮರ್ಪುನ್ ದೀಂವ್ಕ್ ಆಧಾರ್ ದಿತಾ. ಪವಿತ್ರ್ ಸ್ನಾನಾಚ್ಯಾ ಸಾಕ್ರಾಮೆಂತಾತ್ ಆಮಿ ಕ್ರೀಸ್ತಾಚೆಂ ನ್ಹೆಸಣ್ ನ್ಹೆಸ್ಲ್ಯಾಂವ್, ತಶೆಂಚ್ ಮರಿಯೆನ್ ದಿಲ್ಲೆಂ ನ್ಹೆಸಣ್ ಕ್ರೀಸ್ತಾಕ್ ಆಮ್ಕಾಂಚ್ ಸಂಪೂರ್ಣ್ ರಿತಿನ್ ಸಮರ್ಪುನ್ ದೀಂವ್ಕ್ ಆಧಾರ್ ದಿತಾ. ಲ್ಹಾನ್ವಿಕಾಯ್, ಸಾದೆಂಪಣ್, ಖಾಲ್ತೆಂಪಣ್, ವಿಧೇಯ್ಪಣ್ ತಸಲ್ಯಾ ಸಾದ್ಯಾ ಶೆಗುಣಾಂಕ್ ಮಾನ್ವೊನ್ ಸಬಾರಾಂನಿ ತಿಚೆಂ ಪ್ರೇರಣ್ ಜೊಡ್ಲಾಂ. ಮಾಗ್ಣೆಂ ಆನಿ ಧ್ಯಾನ್ ಹ್ಯಾ ದೋನ್ ಪಾಕಾಟ್ಯಾಂನಿ ಉಬೊನ್ ಆಜ್ ಕಾರ್ಮೆಲಿಂತಾಚೊ ವಾವ್ರ್ ಸಂಸಾರ್‌ಭರ್ ವಿಸ್ತಾರ್‍ಲಾ ತರ್ ಕಾರಣ್, ತಿಚ್ಯಾ ಶೆಗುಣಾಚೆಂ ಪ್ರೇರಣ್. ಕಾರ್ಮೆಲ್ ಮಾಯೆನ್ ಸರ್ವಾಂಕ್ ದಿಂವ್ಚೊ ಎಕ್‌ಚ್ ಸಂದೇಶ್ ‘ಶೆಗುಣ್ ನ್ಹೆಸ್, ಜಿಣಿ ಕರ್ ಕುರ್ಪೆಸ್ತ್’.

ಆಪ್ಣೆಂ ಜಿಯೆಲ್ಲೆಬರಿ ಭುರ್ಗ್ಯಾಂನಿಯ್ ಜಿಯೆಜೆ ಮ್ಹಳ್ಳ್ಯೆ ಆಶೆನ್ ಮರಿ ವೆಳಾಕಾಳಾಕ್ ಸರಿ ಜಾವ್ನ್ ಆಮ್ಕಾಂ ಆಪ್ಲೆಂ ಹಾಜಿರ್‌ಪಣ್ ದಾಕಯ್ತಾ ಆನಿ ಕಶ್ಟ್ ಸಂಕಶ್ಟ್ ಯೆತಾನಾ ಭರ್ವಸೊ ಸಾಂಡಿನಾಸ್ತಾಂ ರಾವೊಂಕ್ ‘ಬೆಂತಿಣ್’ ಏಕ್ ಭರ್ವಶಾಚಿ ಖುಣಾ ಕಶಿ ಆಮ್ಕಾಂ ದಿತಾ. ಸಕ್ಡಾಂಕ್ ಮರಿ ಹಾತ್ ದೀವ್ನ್ ಸಾಂಬಾಳ್ತಾ ಮ್ಹಣೊಂಕ್ ಹೆಂ ವರ್ತೆಂ ನಿದರ್ಶನ್. ತರ್ ಭದ್ರತೆಚಿ ನಿಶಾನಿ ಜಾವ್ನಾಸ್ಚಿ ಬೆಂತಿಣ್ ಗಳ್ಯಾ ಭೊಂವ್ತಿಂ ಆಸೊಂಕ್ ಜಾಯ್. ತಿ ನ್ಹೆಸ್ತಾನಾ ಶೆಗುಣಿ ಜಿವಿತ್ ಜಿಯೆಂವ್ಕ್ ಆನಿ ಶೆಗುಣಿ ಕುಟಮ್ ರುತಾ ಕರುಂಕ್ ತಿಚೆಥಾವ್ನ್ ಕುರ್ಪಾ ಜೋಡ್ನ್ ಘೆಂವ್ಕ್ ಜಾಯ್. ಕಶ್ಟಾಂ ಸಂಕಶ್ಟಾಂನಿ ಸಾಂಪಡ್ತಾನಾ ಜೆಜುಸರ್ಶಿಂ ವೆಚಿ ಸಾದಿ ವಾಟ್ ಮರಿಯೆನ್ ದಾಕಯ್ಲ್ಯಾ. ಬೆಂತಿಣಿಚ್ಯಾ ದೆವಾಸ್ಪಣಾ ಉದೆಶಿಂ ಮರಿಯೆಮುಕಾಂತ್ರ್ ಜೆಜುಚೊ ಲಾಗ್ಶಿಲ್ಯಾನ್ ಪಾಟ್ಲಾವ್ ಕರುಂಕ್ ಸರ್ವಾಂಕ್ ಆವ್ಕಾಸ್ ಲಾಬ್ಲಾ ಆಸ್ತಾಂ ಬೆಂತಿಣ್ ಗಳ್ಯಾಂತ್ ಅಜ್ಯಾಪಾಚಿ ವಸ್ತ್ ಜಾವ್ನ್ ಉರನಾಸ್ತಾಂ ಭದ್ರತೆಚಿ ನಿಶಾನಿ ಜಾಯ್ಜೆ. ಬೆಂತಿಣ್ ಮರಿಯೆಚೊ ಉಗ್ಡಾಸ್, ಮರಿಯೆಚಿ ಜಿಣಿ, ಸದಾಂಚ್ ಕಾಳ್ಜಾ-ಮನಾಂತ್ ಜಿವಾಳ್ ಉರೊಂಕ್ ಏಕ್ ಉಗ್ಡಾಸ್ ದಿಂವ್ಚೊ ಸಂಕೇತ್. ಹ್ಯಾ ಸರ್ವ್ ರಿತಿನ್ ಬೆಂತಿಣೆಪಾಟ್ಲೊ ಮಹತ್ವ್ ಆಮಿ ನಿಯಾಳ್ ಕರುಂಕ್ ಆನಿ ಸಮ್ಜೊಂಕ್ ಸಕ್ತಾಂವ್.

ರಾಜಕೀಯ್ ಥಳಾರ್ ಜಾಯ್ತೆ ಸಂಕೇತ್ ಆಸಾತ್. ಹರ್‍ಯೆಕಾ ಸಂಸ್ಥ್ಯಾಂತ್ ತಶೆಂಚ್ ಹರ್‍ಯೆಕೆ ಪಾಡ್ತಿಂತ್ ತಾಣಿಂ ವಾಪಾರ್‍ಚೊ ಸಂಕೇತ್ ತಾಂಚ್ಯೆ ಪಾಡ್ತಿಚೊ ಉದ್ದೇಶ್ ಆನಿ ಮಹತ್ವ್ ಕಳಿತ್ ಕರ್‍ತಾ. ಮೇ ೨೮ ತಾರಿಕೆರ್ ಪ್ರಧಾನಿ ನರೇಂದ್ರ ಮೋದಿನ್ 1200 ಕೊರಾಡಾಂಚೆಂ ನವೆಂ ಸಂಸದ್ ಭವನ್ ಉಗ್ತಾವಣ್ ಕೆಲೆಂ. ಸಂಸದ್ ಸಾಂದ್ಯಾಂಚೊ ಸಂಖೊ ಚಡ್ಚಿ ಸಾದ್ಯತಾ ಆಸ್‌ಲ್ಲ್ಯಾ ವರ್ವಿಂ ನವೆಂ ಸುಸಜ್ಜಿತ್ ಸಂಸದ್ ಭವನ್ ಅವಶ್ಯ್ ಆನಿ ಹೆಂ ಕೇವಲ್ ಕಟ್ವಣ್ ಮಾತ್ರ್ ನ್ಹಯ್ ಕೊರೊಡಾಂನಿ ಲೊಕಾಂಚಿ ಆಶಾ ಅತ್ರೆಗ್ ತಶೆಂಚ್ ಸಪಣ್ ಜಾರಿ ಕರ್‍ಚ್ಯಾಂತ್ ಹೊ ಜಾಗೊ ಪ್ರಮುಕ್ ಸ್ಥಾನ್ ಘೆತಾ. ತಶೆಂಚ್ ಆಮಿ ಸಕ್ಕಡ್ ಏಕ್ ಮ್ಹಣ್ ಸಾಂಗೊನ್ ಭಾರತಾಚ್ಯಾ ಸಂವಿಧಾನಾಚ್ಯಾ ಪ್ರಸ್ತಾವನಾಚಿಂ ಉತ್ರಾಂ ಉಲ್ಲೇಖ್ ಕೆಲಿಂ. ‘ಆಮಿ ಭಾರತಾಚೊ ಲೋಕ್ ಭಾರತಾಚೆಂ ಏಕ್ ಸಾರ್ವಭೌಮ್, ಸಮಾಜ್‌ವಾದಿ, ಧರ್ಮ್ ನಿರಾಪೇಕ್ಶ್, ಲೋಕ್‌ಶಾಹಿ, ಗಣರಾಜ್ಯ್ ಘಡೊವ್ಪಾಚೊ.’ ಪುಣ್ ತ್ಯಾ ದಿಸಾಚಿ ಉಗ್ತಾವಣೆಚಿ ರೀತ್ ಪಳಯ್ತಾನಾ ಆಮಿ ಖಂಯ್ಚ್ಯೆ ರಿತಿನ್ ಏಕ್ ಮ್ಹಳ್ಳೆಂ ಸವಾಲ್ ಸರ್ವಾಂಚ್ಯೆ ಮತಿಂತ್ ಧೊಸುಂಕ್ ಲಾಗ್ಲೆಂ.

ಪಾರ್ಲಿಮೆಂಟ್ 140 ಕೊರೊಡ್ ಲೊಕಾಕ್ ಪ್ರತಿನಿಧ್ವಿತ್ ಕರ್‍ಚೆಂ ಏಕ್ ವ್ಹಡ್ಲೆ ಘರ್. ಸಕ್ಕಡ್ ಧರ್ಮಾಚೊ ಲೋಕ್ ಹ್ಯಾ ಜಾಗ್ಯಾರ್ ಪ್ರತಿನಿಧ್ವಿತ್ ಕರ್‍ತಾ. ಅಸಲ್ಯಾ ಮ್ಹಾನ್ ಜಾಗ್ಯಾಕ್ ಭಿತರ್ ಸರ್‍ತಾನಾ ಪ್ರಧಾನ್ ಮಂತ್ರಿನ್ ಕೇವಲ್ ಹಿಂದೂ ಸ್ವಾಮಿಜಿಕ್ ಮಾತ್ರ್ ಆವ್ಕಾಸ್ ಕರ್‍ನ್ ದಿಲೊ. ಸುರ್ವೇರ್ ಬ್ರಿಟಿಶಾಂಥಾವ್ನ್ ಭಾರತಾಕ್ ಅಧಿಕಾರ್ ಹಾತಾಂತರ್ ಜಾಲ್ಲ್ಯಾಚೊ ಸಂಕೇತ್ ಜಾವ್ನ್ ‘ಸೆಂಗೋಲ್’ ವಾ ರಾಜ್‌ದಂಡ್ ವಾಪಾರ್‍ಲೆಂ. ಚೋಳಾ ವಶಾಂಚ್ಯಾ ಆಡಳ್ತ್ಯಾಂತ್ ಸೆಂಗೋಲ್ ಕರ್ತವ್ಯ್ ಪಥ್, ಸೇವಾ ಪಥ್ ಆನಿ ರಾಶ್ಟ್ರ್ ಪಥಾಚೊ ಸಂಕೇತ್. ಪ್ರಾಚೀನ್ ಭಾರತಾಂತ್ ‘ಸೆಂಗೋಲ್’ ರಾಯಾಂಚ್ಯೆ ದೈವಿಕ್ ಸಕ್ತೆಚೊ ಏಕ್ ಸಂಕೇತ್. ಹುದ್ದ್ಯಾರ್ ಆಸ್ಲ್ಯಾ ರಾಯಾನ್ ನವ್ಯಾ ರಾಯಾಕ್ ಹಾತಾಂತರ್ ಕರ್‍ತಾನಾ ‘ಸೆಂಗೋಲ್’ ವಾಪಾರ್‍ತಾಲೆ. ಎಕಾದಾವೆಳಾ ಪ್ರಜಾರಾಜಾಥಾವ್ನ್ ಸರ್ವಾಧಿಕಾರಾಕ್ ಬದ್ಲಾವಣ್ ಕೆಲ್ಯಾರ್ ಹಾಚೊ ಅರ್ಥ್ ಕಿತೆಂ ಜಾಯ್ತ್ ಮ್ಹಣ್ ಆಮಿ ಸಮ್ಜೊನ್ ಘೆವ್ಯೆತ್. ಪುಣ್ ಪ್ರಜಾಪ್ರಭುತ್ವ್ ರಾಶ್ಟ್ರಾಂತ್ ಸೆಂಗೋಲಾಚ್ಯೆ ಸೆರೆಮನಿಕ್ ಕಾಂಯ್ಚ್ ಅರ್ಥ್ ನಾ. ತಿತ್ಲೆಂ ಮಾತ್ರ್ ನ್ಹಯ್, ಹ್ಯಾ ಉಗ್ತಾವಣಾ ಸಂದರ್ಬಿಂ ಹೆರ್ ಕಾರ್ಯಾಕ್ರಮಾಂಪ್ರಾಸ್ ಚಡ್ ಹಿಂದೂ ರಿತಿ ರಿವಾಜ್ಯೊ ಮಾತ್ರ್ ಚಡಿತ್ ದಿಸೊನ್ ಆಯ್ಲ್ಯೊ. ಹೆಂ ಉಗ್ತಾವಣ್ ಕಾರ್ಯೆಂ ಏಕ್ ವೆಕ್ತಿಕೇಂದ್ರಿತ್ ಆಸ್ಲೆಂ. ಲೋಕ್‌ಸಭಾ ಸ್ಪೀಕರಾಚೆಂ ಏಕ್ ಲ್ಹಾನ್ ಭಾಶಣ್ ಸೊಡ್ಲ್ಯಾರ್ ಪ್ರಧಾನಿ ಮೋದಿಚ್ಯಾ ಬಾಶಣಾಕ್ ಪ್ರಮುಕ್ ಸ್ಥಾನ್ ದಿಲ್ಲೊ. ರಾಶ್ಟ್ರಪತಿ ಆನಿ ಉಪರಾಶ್ಟ್ರಪತಿಕ್ ಆಪೊವ್ಣೆಂ ನಾತ್‌ಲ್ಲೆವರ್ವಿಂ 21 ರಾಜಕೀಯ್ ಪಾಡ್ತಿಚ್ಯಾ ಸಾಂದ್ಯಾಂನಿ ವಿರೋಧ್ ದಾಕಯ್ಲೊ. ಪರ್ಜೆರಾಜಾಚ್ಯೆ ಹ್ಯೆ ಪವಿತ್ರ್ ರಿತಿಂತ್ ಏಕ್ ವೆಕ್ತಿ ಮಾತ್ರ್ ದೆಶಾಕ್ ಗರ್ಜೆಚೊ ಆನಿ ತಾಚೆವಿಣೆಂ ದೆಶಾಂತ್ ಕಿತೆಂಚ್ ಚಲನಾ ಮ್ಹಳ್ಳೆಂ ಜಾಯ್ತ್ಯಾ ಮುಕೆಲ್ಯಾಂಥಾವ್ನ್ ಆಯ್ಕೊಂಕ್ ಮೆಳ್ಳೆಂ.

ಕೊಂಗ್ರೆಸ್, ಬಿಜೆಪಿ ಆನಿ ಹೆರ್ ಪಾಡ್ತಿಂನಿ ಎಕಾ ಖರ್‍ಯಾ ಉದ್ಧೇಶಾನ್ ಸಂಕೇತಾಂ ವಾಪಾರ್‍ಲ್ಯಾಂತ್. ಪುಣ್ ತಾಣಿಂ ಘೆತ್‌ಲ್ಲ್ಯಾ ಸಂಕೇತಾಚೊ ಧ್ಯೇಯ್, ಮಹತ್ವ್ ಉಕ್ಲುನ್ ಧರ್‍ಚ್ಯಾಂತ್ ಆನಿ ಲೊಕಾಂಕ್ ಸಾಂಗಾತಾ ಹಾಡ್ಚ್ಯಾ ವಾವ್ರಾಂತ್ ಸಲ್ವಲ್ಲೆಬರಿ ದಿಸ್ತಾ. ವಾಪಾರ್‍ಚೊ ಸಂಕೇತ್ ಏಕ್ ತರ್, ಧ್ಯೇಯ್ ಬದ್ಲುನ್ ಯೆಂವ್ಚೆಂ ದಿಸೊನ್ ಯೆತಾ. ಆಪ್ಣಾಚ್ಯಾ ಸ್ವಾರ್ಥಾಕ್ ಲಾಗೊನ್ ಸಂಕೇತಾಂಚೊ ದುರುಪಯೋಗ್ ಜಾಲಾ. ಹ್ಯೆ ದಿಶೆನ್ ಆಮಿ ಮತ್ ಉಜ್ವಾಡೊಂಕ್ ಆಧಾರ್ ದಿಂವಿಂ ಲೇಖನಾಂ ಹ್ಯಾ ಅಂಕ್ಯಾಂತ್ ಫಾಯ್ಸ್ ಕೆಲ್ಯಾಂತ್.  ಹ್ಯಾ ಜುಲಾಯ್ ಮ್ಹಯ್ನ್ಯಾಂತ್ ಬೆಂತಿಣೆಚೊ ಸಂಕೇತ್ ಆನಿ ಮಹತ್ವ್ ಮತಿಂತ್ ದವರ್‍ಯಾಂ. ಬೆಂತಿಣ್ ಆಮ್ಕಾಂ ಭರ್ವಶಾಚಿ ಆನಿ ಜೆಜುಸರ್ಶಿಂ ಪಾವೊಂವ್ಚಿ ನಿಶಾನಿ ಜಾಂವ್ದಿ. ಕಾರ್ಮೆಲ್ ಮಾಯ್ ಬೆಂತಿಣ್ ನ್ಹೆಸ್ತಲ್ಯಾ ಹರ್‍ಯೆಕ್ಲ್ಯಾಚಿ ಪಾತ್ರೊನ್. ತುಮ್ಕಾಂ ಸಮೇಸ್ತಾಂಕ್ ಕಾರ್ಮೆಲ್ ಮಾಯೆಚ್ಯಾ ಫೆಸ್ತಾಚಿ ಪರ್ಬಿ ಪಾಟಯ್ತಾಂ.

✍️ – ಬಾಪ್ ಐವನ್ ಸೊಜ್, ಕಾರ್ಮೆಲಿತ್