ಆವಯ್ಚ್ಯಾ ಮರ್‍ಣಾ ಉಪ್ರಾಂತ್ ಪರ್ಗಾಂವಾಂತ್ ವಸ್ತಿ ಕರ್‍ಚ್ಯಾ ಪುತಾಕ್ ಬಾಪಾಯ್ಚಿ ಖಂತ್ ಧೊಸುಂಕ್ ಲಾಗ್ಲಿ. ರಾಂದುನ್ ವಾಡುಂಕ್ ಕಾಮಾಚಿ ಆಸ್ಲ್ಯಾರೀ ಬಾಪಾಯ್ಚ್ಯಾ ಹರ್ ಗರ್ಜಾಂಕ್ ಎಕ್‌ಚ್ ವಾಟ್ ತಾಕಾ ದಿಸ್ಲಿ ತಿ ಜಾವ್ನಾಸಾ ಬಾಪಾಯ್ಕ್ ವೇಳ್ ಪಾಶಾರ್ ಕರುಂಕ್ ಏಕ್ ಸ್ಮಾರ್ಟ್‌ಫೊನ್ ಘೆವ್ನ್ ದಿಂವ್ಚೆಂ. ಹ್ಯೆ ದಿಶೆನ್ ವಸ್ತು ಮೊಲಾಂವ್ಕ್ ಪ್ಲಿಪ್ ಕಾರ್ಟ್, ಅಮೆಜಾನ್, ಜೆವಣ್ ಓರ್ಡರ್ ಕರುಂಕ್ ಜೊಮೊಟೊ, ಸ್ವಿಗ್ಗೀ, ದುಡು ಫಾರಿಕ್ ಕರುಂಕ್ ಗೂಗಲ್ ಪೇ, ಫೋನ್ ಪೇ, ಫಿಲ್ಮಾ ಮನೋರಂಜನಾಂಕ್ ನೆಟ್‌ಫ್ಲಿಕ್ಸ್ ಅಮೆಜೊನ್ ಪ್ರೈಯ್ಮ್ ಡಾವ್ನ್‌ಲೋಡ್ ಕರ್‍ನ್ ತಾಚೊ ವಾಪಾರ್ ಕಸೊ ಕರ್‍ಚೊ ಸಾಂಗೊನ್ ತೊ ಚಲ್ತಚ್ ರಾವ್ಲೊ.

ಆವಯ್ ಆಸ್ತಾನಾ ಹಫ್ತ್ಯಾಕ್ ಏಕ್ ಪಾವ್ಟಿಂ ಲ್ಯಾಂಡ್‌ಲಾಯ್ನಿರ್ ಕೊಲ್ ಕರ್‍ನ್ ಉಲೊಂವ್ಚಿ ಪುತಾಚಿ ಸವಯ್. ಆತಾಂ ವೀಡಿಯೋ ಕೊಲ್ ಕರ್‍ನ್ ಉಲೊಂವ್ಚೆಂ ಸದಾಂಚೆಂ ಜಾಲೆಂ. ಆಪ್ಣೆಂ ಸ್ಮಾರ್ಟ್‌ಫೊನ್ ದಿಲ್ಲ್ಯಾನ್ ಬಾಪಯ್ ವೇಳ್ ಪಾಶಾರ್ ಕರ್‍ತಾಲೊ, ಸದಾಂ ಮಾರ್ಕೆಟಿಕ್ ವೆಚೆಂ ಆತಾಂ ಆಸ್ಚೆಂನಾ, ತಾಕಾ ಜಾಯ್ ಜಾಲ್ಲೆಂ ಹಾತಾ ತಾಳ್ವಾತಾಥಾವ್ನ್ ಓರ್ಡರ್ ಕರ್‍ತಾಲೊ. ಕಿತೆಂಯ್ ಕರುಂದಿ ಬಾಪಾಯ್ನ್ ಖುಶೆನ್ ಆಪ್ಲ್ಯೆ ಜಿಣಿಯೆ ಸಾಂಜೆರ್ ಬರ್‍ಯಾನ್ ದೀಸ್ ಸಾರ್‍ಲ್ಯಾರ್ ಪುರೊ ಮ್ಹಳ್ಳಿ ಪುತಾಚಿ ಆಶಾ ಆನಿ ಖುಶಿ.

ಅಶೆಂ ಪರತ್ ಗಾಂವಾಕ್ ರಜೆರ್ ಆಯಿಲ್ಲ್ಯಾ ಪುತಾಕ್, ತಾಣೆಂ ಚಿಂತ್‌ಲ್ಲೆಂ ಉಲ್ಟೆ ಜಾಲ್ಲೆಂ ಪಳೆತಾನಾ ಬಾಪಾಯ್ಚೆರ್ ಶಿಣ್ ಆಯ್ಲೊ. ಬಾಪಯ್ ಸದಾಂ ಸಕಾಳಿಂ ಏಕ್ ಪೊತೆಂ ಘೆವ್ನ್ ಗೆಲ್ಯಾರ್ ಪಾಟಿಂ ಘರಾ ದನ್ಪಾರಾ ಆದೇಸಾಕ್ ಯೆಂವ್ಚೆಂ ಪಳೆವ್ನ್ ಪೂತ್ ಉಸ್ಮೊಡ್ಲೊ. “ಪಳೆಂ ಪುತಾಂ ಹೆಂ ಫೊನ್ ಘಶ್ಟುನ್ ಜರ್ ಹಾಂವೆಂ ವೊರ್ವಿ ಹಾಡ್‌ಲ್ಲಿ ತರ್, ಹಾಂವ್ ಎದೊಳ್‌ಚ್ ಮರೊನ್ ವೆತೊಂ. ಸದಾಂ ಮ್ಹಜ್ಯಾ ಬೆಂಕಾಚ್ಯಾ ಕಾಮಾಕ್, ಬಸ್ಸಾರ್ ಪಯ್ಣಾರ್, ಮಾರ್ಕೆಟಿಂತ್ ರಾಂದ್ವಯ್ ಮೊಲಾಕ್ ಘೆತಾನಾ, ಹೊಟೆಲಾಂತ್ ಚಾ ಪಿಯೆತಾನಾ ತಶೆಂ ಪಾಟಿಂ ಘರಾ ಯೆಂವ್ಚೆಪರ್ಯಾಂತ್ ಹಾಂವ್ ಕಿತ್ಲ್ಯಾ ಜಣಾಂಕ್ ಮೆಳ್ತಾಂ, ಉಲಯ್ತಾಂ, ಕಿತ್ಲ್ಯಾ ಜಣಾಂಚ್ಯಾ ಗರ್ಜಾಂಕ್ ಪಾವ್ತಾಂ, ಕಿತ್ಲೆಶೆ ಜಣ್ ಮ್ಹಾಕಾ ಪಾವ್ತಾತ್ ತೆಂ ತುಕಾ ಕಳಿತ್ ನಾ. ಜರ್ ಕಳಿತ್ ಜಾಯ್ಜೆ ತರ್ ಫಾಲ್ಯಾಂ ಮ್ಹಜೆಸಂಗಿ ಯೆ.” ಅಶೆಂ ಪುತಾನ್ ದಿಲ್ಲೆಂ ಸ್ಮಾರ್ಟ್‌ಫೊನ್ ತಾಕಾಚ್ ಪಾಟಿಂ ದಿಲೆಂ.

ಹಿ ಕಾಣಿ ನ್ಹಯ್, ಪ್ರಸ್ತುತ್ ಜಿಣಿಯೆಚಿ ಹಕೀಗತ್. ಸಗ್ಳೊ ಸಂಸಾರ್ ಹಾತಾಚ್ಯಾ ತಾಳ್ವಾತಾರ್ ಆಸ್ತಾನಾ ಸಂಸಾರ್ ಲ್ಹಾನ್ ದಿಸ್ತಾ ಮಾತ್ರ್ ನ್ಹಯ್, ಮನ್ಶಾ ಸಂಬಂದ್ ಮಟ್ವೊ ಜಾಲಾ. ಕುಟ್ಮಾಂಮದೆಂ ಮೊಬಾಯ್ಲಾಕ್ ಲಾಗೊನ್ ಮೊನೊ ದೆಂವ್ಸಾರ್ ಮನ್ಶಾಮದೆಂ ಘುಸ್ಲಾ. ಬೊಟಾಂನಿ ಪೊಶೆಂವ್ಚೆ ನೋಟ್ (ದುಡು) ಉಣೆ ಜಾವ್ನ್, ಪ್ಯಾಸ್ಟಿಕ್ ದುಡು (ಕ್ರೆಡಿಟ್/ಡೆಬಿಟ್) ಒನ್‌ಲಾಯ್ನಿರ್ ಬದ್ಲಿ ಕರ್‍ಚ್ಯಾ ದಿಸನಾತ್ಲ್ಯಾ ದುಡ್ವಾಥಾವ್ನ್ ಜಾಯ್ತೊ ಫಾರಕ್ ಆಸಾ. ಎಕಾಂವ್ಟಾಂತ್ ಆನಿ ಹಾತಾಂತ್ ದುಡು ಆಸ್ಲ್ಯಾರ್ ಖರ್ಚ್ ಕರ್‍ಚಿ ವಾಟ್ ವೆವೆಗ್ಳಿ ಆಸಾ. ತಶೆಂ ಜಾಲ್ಯಾನ್ ಆಮ್ಚ್ಯಾ ವ್ಯಾಲೆಟಾಂತ್ ದುಡು ಉಣೆಂ, ಕಾರ್ಡಾಂ ಚಡ್ ಜಾಲ್ಯಾಂತ್. 

ಆಜ್ ಆಮಿ ಶೊಪಿಂಗ್ ಕರ್‍ಯಾಂ ಮ್ಹಳ್ಳ್ಯಾ ದುಡು ವಾಟಾಂವ್ಚ್ಯಾ ಫೆಸ್ತಾಕ್ ವೇಳ್‌ಕಾಳ್, ದೀಸ್‌ರಾತಿಚೊ ಫರಾಕ್ ನಾ. ಜಳ್ಮಳ್ಚ್ಯಾ ದಿವ್ಯಾಂನಿ, ಮಿಣ್‌ಮಿಣ್ಚ್ಯಾ ವಿಸ್ತಾರ್ ಶೊಪಿಂಗ್ ಮೊಲಾಂತ್, ಥಂಯ್ಸರ್ ಶಿಸ್ತೆನ್ ಮಾಂಡುನ್ ದವರ್‍ನ್ ಸಜಾವಟ್ ಕೆಲ್ಲ್ಯಾ ಹೈಪರ್ ಮಾರ್ಕೆಟಿಂತ್ ಕಿತ್ಲೆಂ ಭೊಂವ್ಲ್ಯಾರೀ ಪಾಂಯ್ ವೊಳನಾಂತ್, ವೇಳ್ ಗೆಲ್ಲೊ ಕಳನಾ. ಏಕ್ ವಸ್ತ್ ಹಾಡುಂಕ್ ಗೆಲ್ಲೊ ಪಾಟಿಂ ಯೆತಾನಾ ಧಾ ವೀಸ್ ವಸ್ತು ಪೊತ್ಯಾಂತ್ ಘೆವ್ನ್ ಯೆತಾ. ಕ್ಯಾಶ್ ಕಾಂವ್ಟಾರಾಂತ್ ಥಾವ್ನ್ ಭರೊನ್ ವೊಮ್ತೊಂಚಿ ಟ್ರೋಲಿ ಲೊಟುನ್ ಹಾಡುನ್ ಕಾರಾಚ್ಯೆ ಡಿಕ್ಕೆಂತ್ ದಾಸ್ತಾನ್ ಕರ್‍ಚ್ಯಾಂತ್ ಆಸ್ಚಿ ಉರ್ಬಾ, ಹೆರಾಂನಿ ಪಳೆತಾನಾ ಜಾಂವ್ಚೊ ಅವೆಕ್ತ್ ಸಂತೊಸ್, ಲೊಕಾ ದಿಶ್ಟಿಕ್ ಮೊಸ್ರಾನ್ ಭರುಂಕ್ ಜಾಯ್ ಮ್ಹಳ್ಳೆಂ ಚಿಂತಪ್. ಆಸ್‌ಲ್ಲೆಂ, ನಾತ್‌ಲ್ಲೆಂ, ಗರ್ಜೆಚೆಂ, ಮರ್ಜೆಚೆಂ, ಆಸ್ಲ್ಯಾರೀ ಚಡಿತ್ ಆರಾವ್ನ್, ಘರ್‍ಚ್ಯಾ ಡಬ್ಬಲ್‌ಡೊರಾಚ್ಯಾ ಫ್ರಿಜ್ಜಾಂತ್ ಪುಂಜಾಂವ್ಚೆಂ ಏಕ್ ಥರಾಚೆಂ ಶೋ ಜಾವ್ನ್ ಗೆಲಾಂ. ಆಸ್ಚೊ ಜಾಗೊ ಭರ್‍ಪೂರ್ ವಾಪಾರ್ ಕರ್‍ಚೆಪರ್ಯಾಂತ್ ಸಗ್ಳಿ ವೊರ್ವಿ, ಸಾಮಾನ್ ಘರಾಂತ್ ದಾಸ್ತಾನ್ ಕರ್‍ಚೆಂ. ಅಸಲೆಂ ಜಾದೂ ವಾ ಮಾಯಾ ಹ್ಯಾ ಬಾಜಾರಾಂತ್, ಶೋಪಿಂಗಾಂತ್ ಆಸಾ ಮ್ಹಣ್ಚ್ಯಾಂತ್ ದೋನ್ ಉತ್ರಾಂ ನಾಂತ್.

ಪುಣ್ ಅಸಲ್ಯಾ ಶೊಪಿಂಗಾಂತ್ ಜಾಂವ್ಚೊ ಗೊಟಾಳೊ, ಮೋಸ್, ಚೊರ್ಪಾಣಾ ದೊಳ್ಯಾ ದಿಶ್ಟಿಕ್ ಮಾತ್ರ್ ನ್ಹಯ್ ಮ್ಹನಾಂಕ್ ಗಯ್ರೆ ಕರ್ತಾ. ೫೦% ಸೇಲ್, ಡಿಸ್ಕಾಂವ್ಟ್, ಒಫರ್, ಎಕ್ ಘೆತ್ಲ್ಯಾರ್ ಆನ್ಯೆಕ್ ಫ್ರೀ, ಫಕತ್ ಶೆಂಬರ್/ಹಜಾರ್ ರುಪ್ಯಾಕ್ ಫೆಸ್ಟಿವಲ್ ಒಫರ್, ೯೯೯ ಮ್ಹಳ್ಳಿ ಧರ್ ವಾಚುನ್ ಹಜಾರ್ ರುಪಯ್ ಯೆಟುನ್ ಯೆಂವ್ಚ್ಯಾ ಹ್ಯಾ ಮಾಯಾ ಬಾಜಾರಾಚ್ಯಾ ಜಾಳಿಂತ್ ಶಿರ್ಕಾಲ್ಲೆಂ ಕಳಿತ್ ಜಾಯ್ನಾ. ತ್ಯಾ ತೆಗಿದ್ ನವೆಂ ವರಸ್, ಕ್ರಿಸ್ಮಸ್, ದೀಪಾವಳಿ, ವೆಲೆಂಟಿನ್ ಡೇ, ಮದರ್ಸ್ ಡೇ, ಪ್ರತ್ಯೆಕ್ ಆಚರಣಾಕ್ ಅಮ್ಕೊಚ್ ದೀಸ್ ಆಚರಣ್ ಮ್ಹಣ್ ಮಾಂಡೊ ಕೊರ್‍ಪುನ್ ರೀಣಾರ್ ಪಡ್ಚೆಂಚ್ ಪ್ಯಾಶನ್ ಜಾವ್ನ್ ಗೆಲಾಂ.

ಮಿಲಾವಾಟ್, ಡೋಂಗಿ, ದಗಲ್ಬಾಜಿ ಜಾಯ್ರಾತಾಂತ್ ದಿಂವ್ಚ್ಯೆ ಫಟ್ಕಿರ್‍ಯೆ ಭಾಸಾವ್ಣೆಂತ್, ಇನಾಮಾಂಚ್ಯಾ ಪೆರ್ಗ್ಯಾಂತ್, ರಂಗಾಳ್ ಪೆಕೆಟಿಂನಿ, ಬೊಕ್ಸಾಂನಿ ಮೆಳ್ಚ್ಯಾ ವಸ್ತುಂಕ್ ಖರೆಂ ಮೋಲ್ ಲಿಪೊನ್ ವೆತಾ. ೧೦೦ ಗ್ರಾಮಾಚಿ ಚಿಪ್ಸ್ (ಪಾತೆಕಾಂ) ಪೆಕೆಟಿಂತ್ ಮೆಜುನ್ ಲೇಕಾಚೆಂ ಚಿಪ್ಸ್ ಆಸೊನ್ ಉಪ್ರಾಂತ್ಲೆಂ ವಾರೆಂ ಫುಂಕ್ಯಾಕ್. ಧಾಂವೊನ್ ಹಾಡ್ಚ್ಯಾ ಅರ್ಧೊ ವಾ ಕಾಲ್ದೊ ಕಿಲೊ ಪೆಕೆಟಿ, ಘರಾ ಹಾಡ್ನ್ ಪಳೆತಾನಾ ೨೦೦ ಆನಿ ೪೦೦ ಗ್ರಾಮ್ ಆಸ್ತಾ ತೆಂ ಕೊಣೀ ಗಣ್ಣೆಂ ಕೆಲ್ಲೆಂನಾ. ೯೯% ಕ್ರಿಮಿ ನಾಸ್ ಕರ್‍ಚೆ ಸಾಬು, ಮೆಲ್ಲ್ಯಾ ಕೆಸಾಂಕ್ ಸೊಭಿತ್ ಆನಿ ಶಾಬಿತ್ ಕರ್‍ಚೊ ಶಾಂಪೂ, ಕಾಳ್ಯಾಂಕ್ ಗೊರಿ ಕರ್‍ಚಿಂ ಕ್ರೀಮಾಂ, ಎಕ್ಸ್‌ಪಯರಿ ಜಾಲ್ಲಿ ತಾರೀಕ್ ಪರತ್ ನವಿ ತಾರೀಕ್ ಛಾಪುನ್ ವಿಕ್ಚೆಂ, ತಶೆಂಚ್ ಚಾ ಪಿಟ್ಯಾಂತ್ ರುಕಾಪಿಟೊ, ಮಿರಿಯಾಂತ್ ಪೊಪಾಯೆ ಬಿಯೊ, ತೇಲ್, ತೂಪ್ ಅಶೆಂ ರಾಂದ್ಪಾಕುಡಾಂತ್ಲ್ಯಾ ಹರ್ ವಸ್ತುಂನಿ ಮಿಲಾವಟ್ ಜಾತಾ ತೆಂ ಕೊಣಾಯ್ಕಿ ಕಳನಾ. ಎಕಾ ಥರಾಚೆಂ ಗಿಮಿಕ್ಸ್ ಮೊಲಾಕ್ ಘೆವ್ನ್ ಹಾಡ್ಚ್ಯಾ ವಸ್ತುಂನಿ ಪಳವ್ಯೆತಾ. ಪಯ್ಣಾರ್‍ಯಾಕ್ ಫಾಲಾಣ್ಯಾ ಗಾಂವಾಕ್ ಭೆಟ್ ದಿತಾನಾ ಪರ್ನೆಂ ಲಾಟುನ್ ದಿಂವ್ಚೆಂ, ಎಕಾಕ್ ದೊಡ್ತ್ಯಾನ್ ಮೋಲ್ ಚಡೊವ್ನ್ ವಿಕ್ಚೆಂ, ಜಡಾಯೆಂತ್ ಚಡುಣೆಂ, ಪಿಯೆಂವ್ಚೆಂ ಉದಕ್ ಮಿನರಲ್ ಮ್ಹಣ್ ಸಾದೆಂ ಉದಕ್ ಭರ್‍ನ್ ವಿಕ್ಚೆಂ ಹ್ಯೊ ಸರ್ವ್ ದೊಳ್ಯಾಕ್ ಆಡ್ ಜಾಂವ್ಚ್ಯೊ ಗಜಾಲಿ ಗ್ರಾಹಕ್ ದೊಳೆ ಧಾಂಪುನ್ ಘೆತಾ, ಖಾತಾ ಆನಿ ಪಿಯೆತಾ. ಕಾನೂನಾಚೆಂ ಭ್ಯೆಂ ಭಿರಾಂತ್ ನಾಸ್ತಾಂ ಸಗ್ಳ್ಯಾನಿ ಹೆಂ ಚಲೊನ್ ಆಸಾ.

ದೊಳ್ಯಾಂಕ್ ದಿಸ್ಚ್ಯಾ ಮೊಸಾಕ್ ಸಾಂಪ್ಡೊಂಚ್ಯಾಕೀ ಚಡಿತ್ ಥರಾನ್ ಒನ್‌ಲಾಯ್ನ್ ಮೊಸಾಕ್ ಬಲಿ ಜಾಂವ್ಚೆಂ ಬುದ್ವಂತ್ ಮನ್ಶಾಂನಿ. ಹ್ಯಾ ವಿಶಿಂ ಹಾಂಗಾಸರ್ ಜಾಗ್ವೊಣಿ ದಿಂವ್ಚಿ ಘಡಿತಾಂ ಲಿಖ್ಲ್ಯಾರ್ ಪಾನಾಂ ಪಾಂವ್ಚಿಂನಾಂತ್. ಹರ್‍ಯೇಕ್ ದಿಸಾ ಲಾಖಾಂನಿ ದುಡು ಹೊಗ್ಡಾಯಿಲ್ಲಿ ಖಬರ್ ವಾಚುನ್ ಪರತ್ ತ್ಯಾಚ್ ಫೊಂಡಾಂತ್ ಪಡ್ಚೆಂ ಚಡೊನ್ ಗೆಲಾಂ.

ಸಗ್ಳ್ಯಾ ಕುಟ್ಮಾಂಕ್ ಶೆತಾಂತ್ಲಿ ಪಿಕಾವಳ್ ಪೊಟಾ ಭುಕೆಕ್ ಪಾವ್ತಾನಾ, ರಾಂದ್ಪಾಕ್ ಜಾಯ್ ಜಾಲ್ಲಿ ವೊರ್ವಿ ಪೆಂಟೆಸಾಲಾಥಾವ್ನ್ ವಾ ಶ್ಹೆರಾಚ್ಯಾ ಮಾರ್ಕೆಟಿಂತ್ಲಿ ಹಫ್ತ್ಯಾಕ್ ಏಕ್ ಪಾವ್ಟಿಂ ಹಾಡ್ಚಿ ರಿವಾಜ್. ದಿಸಾಚ್ಯಾ ರಾಂದ್ಪಾಕ್ ಉಣೆಂ ಪಡ್ಲ್ಯಾರ್ ಸೆಜಾರಾಥಾವ್ನ್ ಉಸ್ಣೆಂ ಹಾಡ್ಚೆಂ, ಗಲ್ಲೆಂತ್ಲ್ಯಾ ಮಾಪ್ಳ್ಯಾಚ್ಯಾ, ಕೊಂಕ್ಣ್ಯಾಚ್ಯಾ ಆಂಗ್ಡಿಂಚೊ ಸಾಮಾನ್ ಚಿಲ್ಲರ್ ಸುಟೆ ದೀವ್ನ್ ಕಾಲ್ದೊ/ಅರ್ಧೊ ಕಿಲೊ ಪೆಪರಾಂನಿ ಬಾಂದುನ್ ದಿಲ್ಲೊ ಸಾಮಾನ್ ಹಾಡ್ಚೊ – ಅಶಿ ಜೀವನ್ ಶಯ್ಲಿ ಬದ್ಲೊನ್, ಜಾಗತೀಕಾರಣಾಚೊ ಪ್ರಭಾವ್ ಆನಿ ಗಲ್ಫಾಚೊ ದುಡು ಹಾತಾಕ್ ಪಾವ್ತಾನಾ, ವಸ್ತು ಸೊಭಿತ್ ಆನಿ ಆಕರ್ಶಿತ್ ಜಾವ್ನ್ ದುಬ್ಳಾಚ್ಯಾ ಹಾತಾಕ್ ಪರ್ಯಾಂತ್ ಹೊ ದುಡು ಸಲೀಸಾಯೆನ್ ಪಾವ್ಲೊ. ಸಗ್ಳೆಂ ಪಾಂಯಾಂ ಮುಳಾಂತ್ ಮೆಳ್ತಾನಾ ಪಿಡಾ ಚಡ್ಲ್ಯಾತ್, ಆಸ್ಪತ್ರ್ಯೊ ವಾಡ್ಲ್ಯಾತ್. 

ದಿಸಾಚೊ ಗ್ರಾಸ್ ಜೊಡ್ಚೊ ಭುಕ್ ಥಾಂಬೊಂವ್ಕ್, ಬರೆಂ ಜೆವಣ್ ಜೇಂವ್ಕ್ ಆನಿ ಭಲಾಯ್ಕೆಭರಿತ್ ಜಿಣಿ ಜಿಯೆಂವ್ಕ್. ಫಕತ್ ದುಡೊ ಕರ್‍ಚ್ಯೆ ಆಶೆನ್ ಪುಂಜಾವ್ನ್ ಜೊಡ್‌ಲ್ಲೆಂ ಖಾಂವ್ಕ್ ಜಾಯ್ನಾಸ್ತಾಂ ಸಾಂಡುನ್ ಗೆಲ್ಲೆ ಮನಿಸ್ ಕಿತ್ಲೆ. ಎಕೆ ಆಂಗ್ಡಿಂತ್ ಶೊಪಾಂತ್ ಗಿರಾಯ್ಕಿ ದುಡು ಯೆಟುನ್ ವಸ್ತು ಘೆತಾನಾ ಬರ್‍ಯಾ ಮನಾನ್, ಮನ್ಶಾಪಣಾಚ್ಯಾ ವರ್ತನಾನ್ ಹಾಸೊ ದೀವ್ನ್ ವ್ಯಾರ್ ಕರ್‍ಚೆಂ ಆತಾಂ ಜಾಯ್ತೆಂ ಉಣೆಂ ಜಾಲಾಂ. ಆಪ್ಣೆಂ ವಿಕ್ತೆಂ ದವರ್‌ಲ್ಲೆಂ ವಿಕುನ್ ಗೆಲ್ಯಾರ್ ಪುರೊ, ಹಾಂವ್ ಚಡಿತ್ ಕಾಸ್ ಜೊಡ್ಲ್ಯಾರ್ ಪುರೊ ಮ್ಹಳ್ಳ್ಯೆ ಮನೋಸ್ಥಿತೆಂತ್ ಮಾರ್ಕೆಟ್ ಚಲೊನ್ ಆಸಾ.

ಅನ್ಭೋಗ್ ಆನಿ ತಾತ್ವಿಕ್ ಜ್ಣಾನ್ ನಾಸ್ತಾಂ ಜಿಯೆಂವ್ಚ್ಯಾ ಹ್ಯಾ ಸಂಸಾರಾಂತ್ ಕೃತಕ್ ಜಾಣ್ವಾಯ್ ಆನಿ ಸಮಾಜಿಕ್ ಜಾಳಿಜಾಗ್ಯಾರ್ ಯೆಂವ್ಚ್ಯಾ ಫಟ್ಕಿರ್‍ಯಾ ಖಬ್ರಾಂಕ್ ಸತ್ ಮ್ಹಣ್ ಮಾನುನ್ ಜಿಯೆಂವ್ಚ್ಯೆ ಪ್ರಸ್ತುತ್ ಸಮಾಜೆಂತ್ ಮೋಸ್ ಕರ್‍ನ್ ದೀಸ್ ಸಾರ್‍ಚೆ ಮನಿಸ್ ಆಸ್ತಾ ಪರ್ಯಾಂತ್ ಹೊ ಮಾಯಾಜಾಳ್ ವಿಸ್ತಾರುನ್ ಆಸ್ತೊಲೊ.

✍️ –ವಿನ್ಸಿ ಪಿಂಟೊ, ಆಂಜೆಲೊರ್