ಭಾರತ್ ದೇಶ್ ಆಪ್ಲ್ಯಾ ಅಧಿಕ್ ಜಣಾಸಂಖ್ಯಾಖಾತಿರ್ ಸಗ್ಳ್ಯಾ ಸಂಸಾರಾಂತ್ ಒಳ್ಕಲಾ. ಹ್ಯಾ ಜಣ್‌ಸಂಖ್ಯಾಂತ್ ಅತ್ಯಧಿಕ್ ವಾಂಟೊ ತರ್ನಾಟ್ಯಾಂಚೊ ಆಸಾ. ದೆಕುನ್ ಸಂಸಾರಾಂತ್ ಚಡಿತ್ ತರ್ನಾಟೆ ಭರ್‌ಲ್ಲ್ಯಾ ದೆಶಾಂತ್ ಭಾರತ್ ಮುಕ್ಲ್ಯಾ ಸ್ಥಾನಾರ್ ರಾವ್ತಾ. ಭಾರತಾಂತ್ 35 ಪ್ರಾಯೆಭಿತರ್‍ಲೊ ಲೋಕ್ 66 ಪ್ರತಿಶತ್ ಆಸಾತ್. ಖಂಯ್ಚ್ಯಾ ದೆಶಾಂತ್ ತರ್ನ್ಯಾಟ್ಯಾಂಚೊ ಸಂಖೊ ಚಡಿತ್ ಆಸ್ತಾಗೀ ತೋ ದೇಶ್ ವೆಗಿಂಚ್ ಅಭಿವೃದ್ಧಿ ಜಾತಾ ಮ್ಹಣ್ತಾತ್ ಆರ್ಥಿಕ್ ತಜ್ಞ್. ಪುಣ್ ಏಕ್ ದೇಶ್ ಅಭಿವೃದ್ಧಿ ಜಾಯ್ಜೆ ತರ್ ತ್ಯಾ ದೆಶಾಂತ್ ಫಕತ್ ತರ್ನಾಟೆ ಆಸ್ಲ್ಯಾರ್ ಮಾತ್ರ್ ಪಾವನಾ. ತಾಕಾ ಸರಿ ಜಾಲ್ಲಿಂ ಕಾನೂನಾಂ ಆನಿ ಯೋಜನಾಂಚೆ ರಚಪ್ ಕರ್‍ಚೆಂಯ್ ಬೊವ್ ಗರ್ಜೆಚೆಂ ಕಾರ್ಯೆಂ. ಭಾರತಾಂತ್ ಮಾನವ್ ಸಂಪನ್ಮೂಳ್ ಅಧಿಕ್ ಆಸ್ಲ್ಯಾರೀ ತಾಚೊ ಉಪ್ಯೋಗ್ ಬರ್‍ಯಾನ್ ಕರ್‍ಚ್ಯಾಂತ್ ಉಣೆಂಪಣ್ ಜಾಲಾಂ. ಪ್ರಸ್ತುತ್ ದಿಸಾಂನಿ ಎಕಾ ಪಂಗ್ಡಾಚೆ ತರ್ನಾಟೆ ಕಾಮ್ ನಾಸ್ತಾನಾ ಬೆಕಾರ್ ಆಸಾತ್ ತರ್ ಆನಿ ಏಕ್ ಪಂಗ್ಡಾಚೆ ಯುವಜಣ್ ಚಡಿತ್ ಶಿಕಪ್ ಕೆಲ್ಯಾರೀ ಉಣ್ಯಾ ದರ್ಜೆಚೆಂ ಕಾಮ್ ಕರ್‍ನ್ ಆಸಾತ್. ತರ್ನಾಟ್ಯಾಂಚ್ಯಾ ಮನಾಂತ್ ಸ್ವ ಅಭಿವೃದ್ಧಿ ತಶೆಂಚ್ ದೆಶಾಚ್ಯೆ ಅಭಿವೃದ್ಧಿಖಾತಿರ್ ಮಾರ್ಗದರ್ಶನ್ ದಿಂವ್ಚ್ಯಾ ಬದ್ಲಾಕ್ ದೆಶಾಚ್ಯಾ ಕೊನ್ಶಾ-ಕೊನ್ಶಾಂತ್ ದಂದೊ ರಚುಂಕ್ ಕುಮೊಕ್ ದಿತಲ್ಯಾಂಚೊ ಸಂಖೊ ಚಡಿತ್. ಸಬಾರ್ ಯುವಜಣಾಂಕ್ ಖಂಯ್ಚೆಂ ಸಾರ್ಕೆಂ, ಖಂಯ್ಚೆಂ ಸಾರ್ಕೆಂ ನ್ಹಯ್ ಮ್ಹಣ್ಚಿ ಸಮ್ಜಣಿ ನಾಸ್ತಾನಾ ಆಂದ್ಳೆ ಜಾವ್ನ್ ಸಮಾಜೆಚಿ ಭಲಾಯ್ಕಿ ಪಾಡ್ ಕರ್‍ಚ್ಯಾ ಕಾಮಾಂತ್ ವಾಂಟೊ ಘೆವ್ನ್ ಆಸಾತ್. ದೆಶಾಂತ್ ಆಸ್ಚೊ ತರ್ನ್ಯಾಟ್ಯಾಂಚೊ ಜಮೊ ಖಂಯ್ಚ್ಯೆ ಕುಶಿನ್ ವಚೊನ್ ಆಸಾ, ತಾಂಚೆಥಂಯ್ ಎಕ್ವಟ್ ಹಾಡ್ಚೊ ಮನೋಭಾವ್ ಭರ್‍ಚೊ ಕಸೊ? ತರ್ನಾಟ್ಯಾಂಕ್ ಸಾರ್ಕ್ಯೆ ವಾಟೆಕ್ ಪಾವೊಂವ್ಕ್ ಮಾರ್ಗದರ್ಶನ್ ದೀವ್ನ್, ತಾಂಚ್ಯಾ ಮಾನವ್ ಸಂಪನ್ಮೂಳಾಚಿ ಉಪ್ಯೋಗ್ ಕರ್‍ಚಿ ಜವಾಬ್ದಾರಿ ಸರ್ಕಾರಾಚೆರ್ ಆಸ್ತಾ. ತರ್ ಭಾರತಾಂತ್ ತರ್ನಾಟ್ಯಾಂಚಿ ಅಭಿವೃದ್ದಿ ತಶೆಂಚ್ ತರ್ನಾಟ್ಯಾಂಮದೆಂ ಶಾಂತಿ ಸ್ಥಾಪಿತ್ ಕರುಂಕ್ ಸರ್ಕಾರಾನ್ ಕಸಲಿ ಮಾಂಡ್ಣಿ ರಚ್ಲ್ಯಾ?

ಭಾರತಾಂತ್ ಯುವಜಣಾಂಚ್ಯಾ ಅಭಿವೃದ್ಧಿಖಾತಿರ್ 1988 ಇಸ್ವೆಂತ್ National Youth Policy (NYP) ಯೋಜನ್ ಜ್ಯಾರಿಯೆಕ್ ಆಯ್ಲೆಂ. ಯುವಜಣಾಂಚ್ಯಾ ಸಬಲೀಕರಣಾ ಮುಕಾಂತ್ರ್ ದೆಶಾಂತ್ ಬದ್ಲಾವ್ ಹಾಡ್ಚೊ ಹಾಚೊ ಉದ್ದೇಶ್ ಜಾವ್ನಾಸ್‌ಲ್ಲ್ಲೊ. 2003ಇಸ್ವೆಚೆಂ NYP ಯೋಜನ್ ಸವಿಸ್ತಾರ್ ಜಾವ್ನಾಸ್ಲೆಂ. ಹಾಂತುಂ 13 ವರ್‍ಸಾಂ ಥಾವ್ನ್ 35 ವರ್‍ಸಾಂ ಭಿತರ್‍ಲ್ಯಾ ಲೊಕಾಂಕ್ ಯುವಜಣಾಂಚ್ಯಾ ವ್ಯಾಖಾನಾಂತ್ ಮೆಳಯ್ಲೆಂ. ತರ್ನಾಟ್ಯಾಂಕ್ ರಾಜಕೀಯ್, ಆರ್ಥಿಕ್, ತಾಂತ್ರಿಕ್ ಆನಿ ಸಮಾಜಿಕ್ ಥೆಂಕೊ ದಿಂವ್ಚೊ, ತಾಂಚೆಂ ಶಿಕಪ್, ಉದ್ಯೋಗ್, ತಾಲೆಂತ್, ಭಲಾಯ್ಕೆಕ್ ಗರ್ಜ್ ಆಸ್ಚೊ  ಸಹಕಾರ್ ದಿಂವ್ಚ್ಚೊ, ಗ್ರಾಮೀಣ್ ಯುವಜಣಾಂಕ್ ಆನಿ ಶಿಕಪ್ ನಾತ್‌ಲ್ಲ್ಯಾ ತಶೆಂಚ್ ಶಿಕಪ್ ಸೊಡ್‌ಲ್ಲ್ಯಾ ತರ್ನಾಟ್ಯಾಂಕ್ ಪ್ರಧಾನ್ ಜಾಗ್ಯಾಕ್ ಹಾಡುಂಕ್ ಕಾರ್ಯಯೋಜನ್ ತಯಾರ್ ಕರ್‍ಚೆಂ, ಅಪಾಂಗ್‌ಪಣ್ ಆಸ್ಚ್ಯಾ ತರ್ನಾಟ್ಯಾಂಕ್, ಅನಾಥ್ ಆನಿ ಭಿಕ್ ಮಾಗ್ಚ್ಯಾ ಯುವಜಣಾಂಚ್ಯಾ ವರ್ಗಾಕ್ ವಿಶೇಸ್ ಲಕ್ಶ್ ದಿಂವ್ಚೆಂ, ಸ್ತ್ರೀಯಾಂಚೆಚ್ಯೆ ಸಮಾನತೆಕ್ ಮಹತ್ವ್ ದಿಂವ್ಚೆಂ ಅಶೆಂ ದೆಶಾಂತ್ಲ್ಯಾ ಸಮೇಸ್ತ್ ಯುವಜಣಾಂಚ್ಯೆ ಅಭಿವೃದ್ಧಿಚೆರ್ ನದರ್ ದವರ್‍ನ್ ಯೋಜನ್ ಜ್ಯಾರಿ ಜಾಲ್ಲೆಂ. 2003 ಚ್ಯಾ NYP ಯೋಜನಾಂತ್ 2014 ಇಸ್ವೆಂತ್ ಥೊಡಿ ತಿದ್ವಣಿ ಕೆಲಿ. ಯುವಜಣಾಂಚ್ಯಾ ವ್ಯಾಖ್ಯಾನಾಂತ್ ಬದ್ಲಾವ್ ಹಾಡ್ನ್ 15 ವರ್‍ಸಾಂಥಾವ್ನ್ 29 ವರ್‍ಸಾಂ ಭಿತರ್‍ಲ್ಯಾ ಲೊಕಾಂಕ್ ‘ಯುವಜಣ್’ ಮ್ಹಣ್ ವ್ಯಾಖ್ಯಾನ್ ಕೆಲೆಂ. ಪುಣ್ 2014 ಇಸ್ವೆಂತ್ ಕೆಲ್ಲ್ಯೆ ತಿದ್ವಣೆಂತ್ ಚಡಿತ್ ಬದ್ಲಾವಣ್ ದಿಸೊನ್ ಯೇನಾ ಆನಿ ಯೋಜನಾಚಿ ಸಾರ್ಕಿ ಮಾಂಡಾವಳ್ ನಾತ್‌ಲ್ಲ್ಯಾ ನಿಮ್ತಿ 2014  ಚೆಂ NYP ಯಶಸ್ವಿ ಜಾಂವ್ಕ್ ನಾ.

2021 ಇಸ್ವೆಂತ್ ನವ್ಯಾ NYP ಯೋಜನಾಚಿ ಪ್ರತಿ ತಯಾರ್ ಜಾಲಿ. ಹಾಂತುಂ ವಿಶ್ವ್‌ಸಂಸ್ಥ್ಯಾಚಿಂ ಥೊಡಿಂ ಕಾರ್ಯಯೋಜನಾಂ ಅನುಸರಣ್ ಕರುಂಕ್ ಕಲಮಾಂ ಆಸಾತ್. ಹೆಂ NYP ಯೋಜನಾಚೆಂ ಪ್ರತಿ 2021 ಇಸ್ವೆಂತ್‌ಚ್ ತಯಾರ್ ಜಾವ್ನಾಸ್ಲ್ಯಾರೀ ಹೆಂ ಆಜ್ ಮ್ಹಣಸರ್ ಜ್ಯಾರಿಯೆಕ್ ಯೇಂವ್ಕ್ ನಾ. 2015 ಇಸ್ವೆಂತ್ ವಿಶ್ವ್‌ಸಂಸ್ಥ್ಯಾಚ್ಯಾ ಭದ್ರತಿ ಮಂಡಳೆನ್ ಯುವಜಣಾಂಮದೆಂ ಶಾಂತಿ ಆನಿ ಭದ್ರತಿ ಹಾಡುಂಕ್ ಯುವಜಣ್, ಶಾಂತಿ ಆನಿ ಭದ್ರತಿ ವಿಧೇಯಕ್ 2250 (YPS) ಮ್ಹಳ್ಳೆಂ ವಿಧೇಯಕ್ ಜ್ಯಾರಿಯೆಕ್ ಹಾಡ್ಲೆಂ. ಹ್ಯಾ ವಿಧೇಯಕಾ ಪರ್ಮಾಣೆಂ ವಿಶ್ವ್‌ಸಂಸ್ಥ್ಯಾಚ್ಯಾ ಸದಸ್ಯ್ ರಾಶ್ಟ್ರಾಂತ್ ಆಸ್ಚ್ಯಾ ತರ್ನಾಟ್ಯಾಂಕ್ ದೆಶಾಂತ್ ಶಾಂತಿ ಹಾಡುಂಕ್ ತಶೆಂಚ್ ಸಂಘರ್ಶ್ ನಿವಾರುಂಕ್ ಪ್ರೇರಣ್ ದಿಂವ್ಚ್ಯಾಕ್ ಥಂಕೊ ದೀಂವ್ಕ್ ವಿಶ್ವ್‌ಸಂಸ್ಥ್ಯಾನ್ ವೆವೆಗ್ಳಿಂ ಕಾರ್ಯಯೋಜನಾಂ ತಯಾರ್ ಕೆಲಿಂ. ದೆಶಾಚಿ ಶಾಂತಿ ಆನಿ ಭದ್ರತಿ ತಸಲ್ಯಾ ವಿಶಯಾಂತ್ ತರ್ನಾಟ್ಯಾಂಕ್ ತಾಂಚಿ ಅಭಿಪ್ರಾಯ್ ಮಂಡನ್ ಕರುಂಕ್ ಆವ್ಕಾಸ್ ದೀಜೆ ಮ್ಹಣ್ಚೊ ಹ್ಯಾ ಕಾರ್ಯಯೋಜನಾಚೊ ಪ್ರಮುಕ್ ಉದ್ದೇಶ್. ವಿಶ್ವ್‌ಸಂಸ್ಥ್ಯಾಚ್ಯಾ ಙPS ಕಾರ್ಯಯೋಜನಾಕ್ ಭಾರತಾಚ್ಯಾ ನ್ಯಾಶನಲ್ ಯೂತ್ ಪೊಲಿಸಿಂತ್ ಎಕ್ಟಾಂಯ್ ಕರಿಜೆ ಮ್ಹಣ್ 2021 ಇಸ್ವೆಂತ್ ಚಿಂತಪ್ ಕೆಲೆಂ.

2021 ಚೆಂ NYP ಯೋಜನ್ ಆನಿಕೀ ಜ್ಯಾರಿಯೆಕ್ ಯೇಂವ್ಕ್ ನಾ. ಪ್ರತಿಂತ್ ತಿಳ್ಸಿಲ್ಲೆ ವಿಶಯ್ ಪ್ರತಿಂತ್‌ಚ್ ಉರ್‍ಲ್ಯಾತ್! 2014 ಇಸ್ವೆಂತ್ ಜ್ಯಾರಿಯೆಕ್ ಹಾಡುಂಕ್ ಸಲ್ವಲ್ಲ್ಯಾ ವಿಶಯಾಂಕ್ 2021 ಇಸ್ವೆಂತ್ ಜ್ಯಾರಿಯೆಕ್ ಹಾಡಿಜೆ ಮ್ಹಣ್ ಉದ್ದೇಶ್ ದವರ್‍ಲೊ. ಪುಣ್ ತೀನ್ ವರ್‍ಸಾಂ ಜಾವ್ನ್ ಆಯ್ಲ್ಯಾರೀ ಹೊ ಉದ್ದೇಶ್ ಪರಿಪೂರ್ಣ್ ಜಾಂವ್ಕ್ ನಾ! 2021 ಯೋಜನಾ ಪರ್ಮಾಣೆಂ ಹರ್‍ಯೆಕಾ ವರ್‍ಸಾ ತರ್ನಾಟ್ಯಾಂಚ್ಯಾ ಅಭಿವೃದ್ಧಿಖಾತಿರ್ ಏಕ್ ಕೊರೊಡ್ ರುಪಯ್ ಫಂಡ್ ಸರ್ಕಾರಾಥಾವ್ನ್ ಮಂಜೂರಿ ಜಾಯ್ಜೆ. ಯೋಜನಾಂತ್ ತಿಳ್ಸಿಲ್ಲ್ಯಾ ಪರ್ಮಾಣೆಂ ಏಕ್ ಸಮಿತಿಚೆಂ ರಚಪ್ ಕರ್‍ನ್ ತಿ ಸಮಿತಿ ತೀನ್ ಮ್ಹಯ್ನ್ಯಾಂಕ್ ಏಕ್ ಪಾವ್ಟಿಂ ಮೆಳೊನ್ ಚರ್ಚಾ ಕರುಂಕ್ ಆಸಾ ಆನಿ ವರ್‍ಸಾಕ್ ಏಕ್ ಪಾವ್ಟಿಂ ವಾರ್ಶಿಕ್ ವರ್ದಿ ತಯಾರ್ ಕರ್‍ನ್ ಕೇಂದ್ರ್ ಸರ್ಕಾರಾಕ್ ಧಾಡುಂಕ್ ಆಸ್ತಾ. ಪುಣ್ ಸಮಿತಿಂತ್ ಕೋಣ್ ಕೋಣ್ ಸದಸ್ಯ್ ಆಸಾತ್ ಮ್ಹಣ್ಚಿ ಮಾಹೆತ್ ಕೊಣಾಯ್ಕಿ ಮೆಳನಾ, ಮಾಹೆತಿ-ಹಕ್ಕ್ ಕಾರ್ಯಾಂತ್ ಅರ್ಜಿ ಘಾಲ್ಯಾರೀ! ಆನಿ ಹಾಣಿಂ ತಯಾರ್ ಕೆಲ್ಲಿ ವಾರ್ಶಿಕ್ ವರ್ದಿ ಜಾಂವ್ದಿ ವಾ ಏಕ್ ಕೊರೊಡ್ ನಿಧಿ ಖಂಯ್ಚ್ಯಾಕ್ ಉಪ್ಯೋಗ್ ಜಾಲಾಂ ಮ್ಹಣ್ಚಿ ಖಬರ್ ಕೊಣಾಯ್ಕಿ ಮೆಳನಾ! ಕೇಂದ್ರ್ ಸರ್ಕಾರಾಚೆಂ ವಾರ್ಶಿಕ್ ಬಜೆಟ್ ತಯಾರ್ ಕರ್‍ತಾನಾಂಯ್ NYP ಯೋಜನಾಂಚೊ ಏಕ್ ಪುಣೀ ಉಲ್ಲೇಖ್ ಆಸನಾ! ಸಂಪೂರ್‍ಣಾಯೆನ್ ಹೆಂ ಯೋಜನ್ ಜ್ಯಾರಿಯೆಕ್ ಆಯ್ಲಾಂಗೀ ವಾ ಫಕತ್ ಏಕ್ ಪ್ರತಿ ಜಾವ್ನ್‌ಚ್ ಉರ್‍ಲಾಂಗೀ ವಾ ಜ್ಯಾರಿಯೆಕ್ ಆಯ್ಲ್ಯಾರೀ ಕಸಲಿಯ್ ಪ್ರಗತಿ ಜಾವ್ನಾಂಗೀ… ಖಂಯ್ಚೀಯ್ ಮಾಹೆತ್ ಲಭ್ಯ್ ನಾ. ವಿಪರ್ಯಾಸ್ ಮ್ಹಳ್ಯಾರ್ ದೆಶಾಚ್ಯಾ 95 ಪ್ರತಿಶತ್ ಯುವಜಣಾಂಕ್ ಅಶೆಂ ಯೋಜನ್ ಆಸಾ ಮ್ಹಣ್ಚೆಂ ಕಳಿತ್ ನಾ! ಥೊಡ್ಯಾಂಕ್ NYP ಯೋಜನಾವಿಶಿಂ ತಾಂಚ್ಯಾ ಟೆಕ್ಸ್ಟ್ ಬುಕಾಂನಿ ಇಲ್ಲಿ ಮಾಹೆತ್ ಆಸ್ತಾ ತರೀ ಪರೀಕ್ಶಾಖಾತಿರ್ ವಾಚುನ್ ಮಾಗಿರ್ ವಿಸ್ರೊನ್ ಬಸ್ತಾತ್! ಪರಿಸ್ಥಿತಿ ಅಶಿ ಆಸ್ತಾನಾ ತರ್ನಾಟ್ಯಾಂಚಿ ಅಭಿವೃದ್ದಿ ಆನಿ ಸಬಲೀಕರಣ್ ಜಾಂವ್ಚೆಂ ತರೀ ಕಶೆಂ?

✍️ –ಮುದ್ದು ತೀರ್ಥಹಳ್ಳಿ