ಆಯ್ಲೆವಾರ್ ಮೊಕ್ಳಿಕ್ ಜಾಲ್ಲ್ಯಾ ದೋನ್ ಬೊಲಿವುಡ್ ಫಿಲ್ಮಾಂನಿ ವೆಗ್ಳ್ಯಾಚ್ ಕಾರಣಾಂಕ್ ಲಾಗೊನ್ ದೆಶಾಂತ್ ಜಾಯ್ತೊ ಆವಾಜ್ ಕೆಲೊ. ಮೇಘನಾ ಗುಲ್ಜಾರ್ ಹಾಚ್ಯಾ ನಿರ್ದೇಶನಾಖಾಲ್ ಆಯಿಲ್ಲೆಂ ಫಿಲ್ಮ್ ‘ಸ್ಯಾಮ್ ಬಹಾದ್ದೂರ್’ ಆನಿ ಸಂದೀಪ್ ರೆಡ್ಡಿ ವಂಗಚೆಂ ‘ಆನಿಮಲ್’. ಪಯ್ಲೆಂ ಫಿಲ್ಮ್ ವಿಭಿನ್ನ್ ತರ್ ದುಸ್ರೆಂ ಫಿಲ್ಮ್ ವಿಚಿತ್ರ್ ಮ್ಹಣ್ಯೆತ್. ಪುಣ್ ಹ್ಯಾ ವಿಚಿತ್ರ್ ಫಿಲ್ಮಾಂನಿ ಆಮ್ಚ್ಯಾ ತರ್ನ್ಯೆ ಪಿಳ್ಗೆಚ್ಯಾ ಚಿಂತ್ಪಾ ಶಯ್ಲೆಕ್ ಆರ್ಸೊ ಧರ್‍ಲೊ ಆನಿ ಲಗ್ಬಗ್ ೮೦೦ ಕೊರೊಡ್ ಖಾಮಾಯ್ಲೆ. ಬಾಪಾಯ್ಚೊಚೊ ಮೋಗ್ ಲಾಬೊಂಕ್ ನಾ ಮ್ಹಣ್ ಉಪ್ರಾಟಿ ಜಾಂವ್ಚೊ ಪೂತ್ ಕ್ರಮೇಣ್ ಮೊನ್ಜಾತಿಚೆಂ ವರ್ತನ್ ಕಶೆಂ ದಾಕಯ್ತಾ ಮ್ಹಳ್ಳಿ ಕಾಣಿ. ಉತ್ರಾ ಉತ್ರಾಕ್ ಬಂದೂಕ್ ಉಕಲ್ನ್ ಗುಳೆ ಘಾಲ್ಚೊ, ರಗ್ತಾಚ್ಯೊ ನ್ಹಂಯೊ ವಾರೊಂವ್ಚೊ, ಸ್ತ್ರೀಯಾಂಕ್ ವಾಪಾರ್‍ನ್ ಉಡೊಂವ್ಚಿ ವಸ್ತ್ ತಶೆಂ ದೆಕ್ಚೊ, ತಾಂಕಾಂ ಆಪ್ಲೆ ಮೊಚೆ ಲೆವೊಂಕ್ ಆದೇಶ್ ದಿಂವ್ಚೊ, ಂಟಠಿhಚಿ ಒಚಿಟe ಆನಿ ಖಿoxiಛಿ ಒಚಿsಛಿuಟiಟಿiಣಥಿ ಪ್ರದರ್ಶಿತ್ ಕರ್‍ಚ್ಯಾ ಪ್ರಧಾನ್ ನಟ್ ರಣಬೀರ್ ಕಪೂರಾಚೊ ಪಾತ್ರ್ ಆಮ್ಚ್ಯಾ ತರ್ನಾಟ್ಯಾಂಕ್ ಬೊವ್ ಆಂವಡ್ಲೊ. ಪಾವನಾತ್‌ಲ್ಲ್ಯಾಕ್ ವಿಸ್ಕಿ ಗ್ಲಾಸ್ ಮಾತ್ಯಾರ್ ದವರ್‍ನ್ ನಾಸ್ ಕರ್‍ಚೊ ವಿಲನ್ ಆನಿ ತಾಕಾ ವಾಪಾರ್‌ಲ್ಲೆಂ ಇರಾನಿ ಮುಳಾಚೆಂ ಪದ್ ಸಯ್ತ್ ಮೀಮ್ಸ್-ರೀಲ್ಸಾಂನಿ ವೈರಲ್ ಜಾಲೆಂ. ಹಿಂಸಾ-ದೆಸ್ವಾಟ್ ವೈಭವೀಕೃತ್ ಕರ್‍ಚ್ಯಾ ಆನಿಮಲ್ ತಸಲ್ಯಾ ಪಿಂತುರಾಕ್ ಆಮ್ಚೊ ಲೋಕ್ ಅಸಲೊ ಪಾಟಿಂಬೊ ದಿತಾ ಮ್ಹಳ್ಯಾರ್ ಆಮ್ಚಿ ಯುವ ಸಮಾಜ್ ಖಂಯ್ಚ್ಯೆ ದಿಶೆನ್ ಚಮ್ಕತಾ ಮ್ಹಣ್ ಅಂದಾಜ್ ಕರ್‍ಯೆತ್. ಆಮ್ಚೆಭಿತರ್ ಆಸ್ಚ್ಯೆ ಮೊನ್ಜಾತಿಚೆಂ ರೂಪ್‌ಚ್ ಆಮ್ಕಾಂ ಫಿಲ್ಮಾಚ್ಯಾ ರುಪಾರ್ ದಿಸ್ತಾನಾ ಆಮ್ಕಾಂ ಭೊಗ್ಚೊ ವಿಕೃತ್ ಸಂತೊಸ್ ಹ್ಯಾ ಫಿಲ್ಮಾಚ್ಯೆ ಯಶಸ್ವೆಕ್ ಕಾರಣ್ ಜಾಂವ್ಕ್‌ಯೀ ಪುರೊ.

ಜಿಣಿಯೆಕ್ ಪ್ರೇರಣ್ ದಿಂವ್ಚೊ ಸ್ಯಾಮ್ ಬಹದ್ದೂರ್

ವಿಕ್ಕಿ ಕೌಶಲಾಚ್ಯಾ ಅದ್ಭುತ್ ನಟನಾದ್ವಾರಿಂ ಚರಿತ್ರೆಚ್ಯಾ ಪಾನಾಂನಿ ಲಿಪೊನ್ ಆಸ್‌ಲ್ಲಿ ಮಾಣಿಕ್ ಷಾಚಿ ಸಾಹಸ್‌ಭರಿತ್ ಕಾಣಿ ಲೊಕಾಮೆರೇನ್ ಪಾವ್ಲಿ ಮ್ಹಣ್ಚ್ಯಾಂತ್ ದುಬಾವ್ ನಾ. ದೆಶಾಚ್ಯೆ ಸುರಕ್ಶತಾಯೆಕ್ ಬಳಿಶ್ಟ್ ಬುನ್ಯಾದ್ ಘಾಲ್ಲ್ಯಾ ಮಾಣಿಕ್ ಷಾಚ್ಯೆ ಜಿಣಿಯೆಚೆರ್ ಉಜ್ವಾಡ್ ಫಾಂಕೊಂವ್ಚೆಂ ಪ್ರೇತನ್ ಹೆಂ ಲೇಖನ್. ೧೯೧೪ ಇಸ್ವೆಂತ್ ಏಕ್ ಫಾರ್ಸಿ ಕುಟ್ಮಾಂತ್ ಸ್ಯಾಮ್ ಮಾಣಿಕ್ ಷಾಚೊ ಜಲ್ಮ್. ಆರ್ಮಿಂತ್ ದಾಕ್ತೆರ್ ಜಾವ್ನ್ ಸೆವಾ ದೀವ್ನ್ ಆಸ್‌ಲ್ಲ್ಯಾ ಬಾಪಾಯ್ಕ್ ಪಳೆವ್ನ್ ಏಕ್ ಸೊಜೆರ್ ಜಾಂವ್ಚೆಂ ಸಪಣ್ ಉದೆಲ್ಲೆಂ. ಇಂಡಿಯನ್ ಮಿಲಿಟ್ರಿ ಅಕಾಡೆಮಿ ತಸಲೊ ಪ್ರತಿಶ್ಟಿತ್ ಸಂಸ್ಥ್ಯಾಚೆಂ ಕಾರ್ಬಾರ್‌ಪಣ್ ಬ್ರಿಟಿಶಾಂಚ್ಯಾ ಹಾತಾಂತ್ ಆಸ್‌ಲ್ಲೆ ದೀಸ್ ತೆ. Iಒಂ ಪರೀಕ್ಶೆಂತ್ ರ್‍ಯಾಂಕ್ ಆಪ್ಣಾವ್ನ್ ಮಾಣಿಕ್ ಷಾ ಒಫಿಸರ್ ಜಾವ್ನ್‌ಚ್ ಆರ್ಮಿಕ್ ಭರ್‍ತಿ ಜಾಲೊ.

ನೋವ್ ಬುಲೆಟ್ಸ್ ಆನಿ ಸ್ಯಾಮಾಚಿಂ ಫೊಕಾಣಾಂ

೧೯೪೨ ದುಸ್ರೆಂ ಜಾಗತಿಕ್ ಝುಜ್ ಚಲೊನ್ ಆಸ್‌ಲ್ಲೆಂ. ಬ್ರಿಟಿಶ್ ಇಂಡಿಯನ್ ಆರ್ಮಿಂತ್ ಸೆವಾ ದೀವ್ನ್ ಆಸ್‌ಲ್ಲ್ಯಾ ಸ್ಯಾಮಾಕ್ ಕ್ಯಾಪ್ಟನ್ ಜಾವ್ನ್ ಬರ್ಮಾ ಪ್ರಾಂತಾಂತ್ ಝುಜೊಂಕ್ ಆದೇಶ್ ಲಾಬ್‌ಲ್ಲೊ. ಮುಕಾರ್ ಆಸ್‌ಲ್ಲಿ ಭಿರಾಂಕುಳ್ ಜಪಾನಾಚಿ ಆರ್ಮಿ. ಮುಕ್ಲ್ಯಾ ಸಾಲಿಂತ್ ರಾವೊನ್ ವ್ಹಡಾ ಹುಮೆದಿನ್ ಆಪ್ಲ್ಯಾ ಪಂಗ್ಡಾಕ್ ಘೆವ್ನ್ ಝುಜಾ ಆಂಗ್ಣಾಕ್ ದೆಂವ್‌ಲ್ಲ್ಯಾ ಮಾಣಿಕ್ ಷಾಚೆರ್ ಖಿಣಾಭಿತರ್ ಜಪಾನೀಸ್ ಆರ್ಮಿನ್ ದಾಢ್ ಘಾಲಿ. ನೋವ್ ಗುಳೆ ಕುಡಿಭಿತರ್ ರಿಗ್ಲೆ. ಮತ್ ಚುಕೊನ್ ಪಡ್‌ಲ್ಲ್ಯಾ ತಾಕಾ ಶೇರ್‌ಸಿಂಗ್ ಮ್ಹಳ್ಳ್ಯಾ ಸೊಜೆರಾನ್ ಆಪ್ಲ್ಯಾ ಖಾಂದಾರ್ ಉಕಲ್ನ್ ಆರ್ಮಿ ಕ್ಯಾಂಪಾಕ್ ವ್ಹೆಲೆಂ. ಜಾಯ್ ತಿತ್ಲ್ಯಾ ಪ್ರಮಾಣಾರ್ ವೊಕ್ತಾಂ ಥಂಯ್ ನಾತ್‌ಲ್ಲಿಂ ದೆಕುನ್ ಆರ್ಮಿ ದಾಕ್ತೆರಾಂನಿ ಮಾಣಿಕ್ ಷಾಚಿ ಹಾಲತ್ ಪಳೆವ್ನ್ ಹಿ ‘ಈiಟಿisheಜ ಅಚಿse’ ಮ್ಹಣ್ ನಿರ್ಧಾರ್ ಘೆವ್ನ್ ತಾಕಾ ಚಿಕಿತ್ಸಾ ದೀಂವ್ಕ್ ಇನ್ಕಾರ್ ಕೆಲೆಂ. ಥೊಡ್ಯಾಚ್ ಘಡಿಯಾಂನಿ ಪ್ರಾಣ್ ತ್ಯಾಗ್ ಕರುಂಕ್ ಆಸ್ಚ್ಯಾ ಸೊಜೆರಾಚೆರ್ ವೊಕ್ತಾಂ ವಿಬಾಡ್ ಕರ್‍ಚ್ಯಾ ಬದ್ಲಾಕ್, ಹೆರ್ ಘಾಯೆಲ್ಲ್ಯಾ ಸೊಜೆರಾಂಖಾತಿರ್ ಹಿಂ ವೊಕ್ತಾಂ ಅಮಾನತ್ ಕರ್‍ನ್ ದವರ್‍ಚೊ ತಾಂಚೊ ಉದ್ದೇಶ್ ಜಾವ್ನಾಸ್‌ಲ್ಲೊ. ಪುಣ್ ಶೇರ್‌ಸಿಂಗ್ ಹಟಾಕ್ ರಾವ್‌ಲ್ಲ್ಯಾನ್ ದಾಕ್ತೆರಾಂನಿ ಮಾಣಿಕ್ ಷಾ ಲಾಗಿಂ ‘ಹೆಂ ಕಶೆಂ ಜಾಲೆಂ?’ ಮ್ಹಣ್ ಸವಾಲ್ ಕೆಲೆಂ. ನೋವ್ ಗುಳೆ ಖಾವ್ನ್ ಮರ್‍ಣಾಚ್ಯೆ ತಣಿರ್ ಆಸ್‌ಲ್ಲ್ಯಾ ಸ್ಯಾಮ್ ಮಾಣಿಕ್ ಷಾನ್ ತ್ಯೆ ಸ್ಥಿತೆಂತ್ ಸಯ್ತ್ ಆಪ್ಲೊ ಹಾಸ್ಯ್ ಮನೋಭಾವ್ ದಾಕೊವ್ನ್ “ಜಪಾನಾಚ್ಯಾ ಥೊಡ್ಯಾ ಕಾತ್ತ್ಯಾಂನಿ ಮ್ಹಾಕಾ ಖೊಟ್ ಘಾಲಿ, ತಶೆಂ ಹಾಂವ್ ಹಾಂಗಾ ಪಾವ್ಲೊ” ಮ್ಹಣ್ ಜಾಪ್ ದಿಲಿ. ತಿ ಜಾಪ್ ಆಯ್ಕೊನ್ ದಾಕ್ತೆರ್ ಅಜ್ಯಾಪ್ಲೆ ಆನಿ ಅಸಲ್ಯಾ ಖುಶಾಲಿ ಧಯ್ರ್ ಆಸ್‌ಲ್ಲ್ಯಾ ವೆಕ್ತಿಕ್ ಆಮಿ ವಾಂಚೊಂವ್ಚೆಂ ಪ್ರೇತನ್ ಕರ್‍ತಾಂವ್ ಮ್ಹಣ್ ಪಪರೇಶನ್ ಪ್ರಾರಂಬ್ ಕೆಲೆಂ. ನವಾಲ್ ಘಡ್ಲೆಂ. ಸ್ಯಾಮ್ ವಾಂಚ್ಲೊ.

ಫೀಲ್ಡ್ ಮಾರ್ಷಲ್ ಸ್ಯಾಮ್

ಭಾರತೀಯ್ ಸಯ್ನಾಂತ್ ಕೇವಲ್ ದೊಗಾಂ ವೆಕ್ತಿಂಕ್ ‘ಫೀಲ್ಡ್ ಮಾರ್ಷಲ್’ ಹುದ್ದೊ ಮೆಳ್ಳಾ. ಎಕ್ಲೊ ಸ್ಯಾಮ್ ಆನ್ಯೆಕ್ಲೊ ಕೆ.ಎಮ್. ಕಾರ್ಯಪ್ಪ. ಸಯ್ನಾಂತ್ ಹಾಚ್ಯಾಕಿ ಶ್ರೇಶ್ಟ್ ಹುದ್ದೊ ದುಸ್ರೊ ನಾ. ಫೀಲ್ಡ್ ಮಾರ್ಷಲ್ಸ್ ನಿವೃತ್ತ್ ಜಾಯ್ನಾಂತ್ ಆನಿ ಮರ್‍ಣಾ ಪರ್ಯಾಂತ್ ತಾಂಕಾಂ ಯುನಿಫೊರ್ಮ್ ಘಾಲುಂಕ್, ಸರ್ಕಾರಾಥಾವ್ನ್ ಸಂಪೂರ್ಣ್ ಸಾಂಬಾಳ್ ಜೊಡುಂಕ್ ಅಧಿಕಾರ್ ಆಸಾ. ಪುಣ್ ಅಸಲೆಂ ಸ್ಥಾನ್ ಆಪ್ಣಾಂವ್ಚ್ಯಾ ಪಯ್ಲೆಂ ಝುಜಾ ಆಂಗ್ಣಾಂತ್ ತ್ಯಾ ವೆಕ್ತಿನ್ ವರ್ತೆಂ ಸಾಧನ್ ಕರುಂಕ್ ಜಾಯ್. ಸ್ಯಾಮ್ ಮಾಣಿಕ್ ಷಾಚಿ ಸಾಧನಾಂಚಿ ಪಟ್ಟಿ ಲಾಂಬ್ ಆಸ್‌ಲ್ಲಿ. ದೆಶಾಚೆಂ ವಿಭಜನ್ ಜಾತಾನಾ ತಾಕಾ ಪಾಕಿಸ್ತಾನಿ ಮಿಲಿಟ್ರಿಥಾವ್ನ್ ವರ್ತೊ ಹುದ್ದೊ ಭಾಸಾಯ್ಲೊ. ಸ್ಯಾಮ್ ಹಿಂದೂ ನ್ಹಯ್ ಜಾಲ್ಲ್ಯಾನ್ ತೊ ಪಾಕಿಸ್ತಾನಾಕ್ ವೆತಾ ಮ್ಹಣ್ ಥೊಡ್ಯಾಂನಿ ಚಿಂತ್‌ಲ್ಲೆಂ. ಪುಣ್ ಸ್ಯಾಮ್ ಭಾರತಾಂತ್‌ಚ್ ಉರ್‍ಲೊ ಆನಿ ತಶೆಂ ಜಾಲ್ಲ್ಯಾನ್ ಆಮ್ಚೆಂ ಭಾರತ್ ಸಯ್ತ್ ಉರ್‍ಲೆಂ ಮ್ಹಣ್ಯೆತ್.

೧೯೪೭ ಇಸ್ವೆಂತ್ ಸುಟ್ಕಾ ಲಾಬ್‌ಲ್ಲ್ಯಾ ದೋನ್ ಮ್ಹಯ್ನ್ಯಾಂ ಭಿತರ್ ಪಾಕಿಸ್ತಾನಿ ಸಯ್ನಾನ್ ಕಾಶ್ಮೀರಾಚೆರ್ ದಾಢ್ ಘಾಲ್ತಾನಾ, ಗೃಹಮಂತ್ರಿ ಸರ್ದಾರ್ ವಲ್ಲಬ್‌ಭಾಯಿ ಪಟೇಲಾನ್ ಸ್ಯಾಮಾಕ್ ಕಾಶ್ಮೀರಾಕ್ ಧಾಡ್ಲೊ. ಸ್ಯಾಮಾಚ್ಯಾ ಖಡಕ್ಕ್ ಉತ್ರಾಂನಿ ಕಾಶ್ಮೀರಾಚೊ ರಾಯ್ ಹರಿಸಿಂಗ್ ಪ್ರಭಾವಿ ಜಾವ್ನ್ ಆಪ್ಲೆಂ ರಾಜ್ಯ್ ಭಾರತಾಕ್ ಮೆಳೊಂವ್ಕ್ ಪರ್ವಣ್ಗಿ ದಿಲಿ. ಆಜ್ ಕಾಶ್ಮೀರ್ ಭಾರತಾಚ್ಯಾ ಮ್ಯಾಪಾರ್ ದಿಸೊಂಕ್ ಏಕ್ ಪ್ರಮುಕ್ ಕಾರಣ್ ಸ್ಯಾಮ್. ೧೯೬೨ ಇಸ್ವೆಂತ್ ಪಂಡಿತ್ ನೆಹರೂಚಿಂ “ಹಿಂದಿ ಚೀನಿ ಭಾಯ್ ಭಾಯ್” ಸಿದ್ಧಾಂತ್ ತಿರಸ್ಕಾರ್ ಕರ್‍ನ್ ಚೀನೀ ಸೊಜೆರಾಂನಿ ಆಕ್ರಮಣ್ ಕೆಲೆಂ. ಝುಜಾಕ್ ತಯಾರ್‌ಚ್ ನಾತ್‌ಲ್ಲೆ ಭಾರತಾಚೆ ಸೊಜೆರ್ ತಾಂಚೊ ಪೋಸ್ಟ್ ಸೊಡ್ನ್ ಪಾಟಿಂ ಯೇಂವ್ಕ್ ಲಾಗ್ಲೆ. ಹ್ಯೆ ಸಂಧಿಗ್ದ್ ಪರಿಸ್ಥಿತೆಂತ್ ಪರ್‍ತ್ಯಾನ್ ಸ್ಯಾಮಾಚ್ಯಾ ಖಾಂದಾರ್ ಜವಾಬ್ದಾರಿ ದಿಲಿ. ಹ್ಯಾ ಸಂದರ್ಭಾರ್ ಸ್ಯಾಮ್ ಸೊಜೆರಾಂಕ್ ಮೆಳೊನ್ ಮ್ಹಣಾಲೊ. “ಆಜ್ ಥಾವ್ನ್ ಬರ್‍ಪಿನಿಶಿಂ ಆಸ್‌ಲ್ಲೊ ಮ್ಹಜೊ ಆದೇಶ್ ತುಮ್ಚ್ಯಾ ಹಾತಾಕ್ ಯೇನಾಸ್ತಾಂ ಕೊಣೆಂಯ್ ಪೋಸ್ಟ್ ಸೊಡ್ನ್ ಪಾಟಿಂ ಯೇಂವ್ಕ್ ನಾ ಆನಿ ಅಸಲೊ ಆದೇಶ್ ಹಾಂವ್ ಕೆದಿಂಚ್ ದಿಂವ್ಚೊಂನಾ”. ಹಿಂ ಉತ್ರಾಂ ಆಯ್ಕತಚ್ ಭಿಯೆವ್ನ್ ಘುಸ್ಪಡ್‌ಲ್ಲ್ಯಾ ಸೊಜೆರಾಂಚಿ ಉರ್ಬಾ ಪರ್‍ತ್ಯಾನ್ ಚಡ್ಲಿ. ಮಾಣಿಕ್ ಷಾಕ್ ಗವ್ರವಾನ್ ‘ಸ್ಯಾಮ್ ಬಹದ್ದೂರ್’ ಮ್ಹಣ್ ತಾಣಿಂ ಆಪೊಂವ್ಕ್ ಸುರು ಕೆಲೆಂ.

ಪಾಕಿಸ್ತಾನಾಚೆ ದೋನ್ ವಾಂಟೆ ಕೆಲ್ಲೊ ಸ್ಯಾಮ್

೧೯೭೧ ಆಮ್ಚ್ಯಾ ಮಿಲಿಟ್ರಿ ಚರಿತ್ರೆಂತ್ ಮಹತ್ವಾಚೆಂ ವರಸ್. ಸ್ಯಾಮ್ ‘ಅhieಜಿ oಜಿ ಂಡಿmಥಿ Sಣಚಿಜಿಜಿ’ ಜಾವ್ನ್ ಸಯ್ನಾಚೊ ಮುಕೆಲಿ ಜಾಲ್ಲೊ. ರಾಜಕೀಯ್ ಕಾರಣಾಂಕ್ ಪೂರ್ವ್ ಪಾಕಿಸ್ತಾನಾಂಚ್ ಹಿಂಸಾ ಸುರ್‍ವಾತ್ಲಿ. ಲಾಖಾಂನಿ ಬೆಂಗಾಲಿ ಲೋಕ್ ಮೆಲೊ. ಪಾಕಿಸ್ತಾನಿ ಸೊಜೆರ್‌ಚ್ ಸ್ತ್ರೀಯಾಂಚೆರ್ ಅತ್ತ್ಯಾಚಾರ್ ಕರ್‍ತಾಲೆ. ಲಾಚಾರ್ ಜಾಲ್ಲೊ ಏಕ್ ಕೊರೊಡ್ ಬೆಂಗಾಲಿ ಲೋಕ್ ಗಡ್ ಉತ್ರೊನ್ ಭಾರತಾಕ್ ಆಯ್ಲೊ. ಇತ್ಲ್ಯಾ ಲೊಕಾಕ್ ಖಂಯ್ ಜಾಗೊ ದಿಂವ್ಚೊ ಮ್ಹಣ್ ಪ್ರಧಾನಿ ಇಂದಿರಾ ಗಾಂಧಿಕ್ ಖಂತ್ ಜಾಲಿ. ಹ್ಯಾ ಲೊಕಾಕ್ ಪಾಟಿಂ ತಾಂಚ್ಯಾ ಘರಾ ಧಾಡಿಜೆ ತರ್ ಪಾಕಿಸ್ತಾನಿ ಸಯ್ನಾಕ್ ಥಂಯ್ಚೆಂ ಭಾಯ್ರ್ ಕಾಡಿಜೆ ಆಸ್ಲೆಂ. ಸ್ಯಾಮಾಕ್ ಆಪೊವ್ನ್ ಝುಜ್ ಸುರ್‍ವಾತುಂಕ್ ತಿಣೆಂ ಆದೇಶ್ ದಿಲೊ. ಪುಣ್ ಪ್ರಾಯೋಗಿಕ್ ರಿತಿನ್ ಚಿಂತಪ್ ಆಟೊಂವ್ಚೊ ಸ್ಯಾಮ್ ಪ್ರಧಾನಿಚ್ಯಾ ದೊಳ್ಯಾಂನಿ ಪಳೆವ್ನ್ “ಆತಾಂ ಝುಜ್ ಸುರ್‍ವಾತ್ಲ್ಯಾರ್ ಆಮಿ ಸಲ್ವತಾಂವ್ ಮ್ಹಣ್ ತುಕಾ ಬರೊವ್ನ್ ದಿತಾಂ. ಪುಣ್ ಮ್ಹಾಕಾ ಥೊಡ್ಯಾ ಮ್ಹಯ್ನ್ಯಾಂಚ್ಯೆ ತಯಾರಾಯೆಕ್ ವೇಳ್ ದಿಶಿ ತರ್ ಆಮಿ ಜಿಕ್ತೆಲ್ಯಾಂವ್” ಮ್ಹಣಾಲೊ. ಇಂದಿರಾ ಗಾಂಧಿನ್ ಕಬ್ಲಾತ್ ದಿಲಿ. ಸ್ಯಾಮಾನ್ ತಿಕಾ ದಿಲ್ಲೆಂ ಉತರ್ ಪಾಳ್ಳೆಂ. ಸಾಮಾನ್ಯ್ ಬೆಂಗಾಲಿ ಲೊಕಾಕ್ ಝುಜಾ ತರ್ಬೆತಿ ದೀವ್ನ್ ‘ಮುಕ್ತಿ ವಾಹಿನಿ’ ಸಯ್ನ್ ತಯಾರ್ ಕೆಲೆಂ. ಆಖೇರಿಕ್ ಡಿಸೆಂಬರ್ ಮ್ಹಯ್ನ್ಯಾಂತ್ ಝುಜ್ ಸುರ್‍ವಾತ್ತಾನಾ ಫಕತ್ ೧೩ ದಿಸಾಂಭಿತರ್ ಭಾರತೀಯ್ ಸಯ್ನ್ ಝುಜಾಂತ್ ಜಿಕ್ಲೆಂ. ೯೩೦೦೦ ಪಾಕಿಸ್ತಾನಿ ಸೊಜೆರಾಂನಿ ಅತ್ಮೆ ಸಮರ್ಪಣ್ ಕೆಲೆ. ಪೂರ್ವ್ ಪಾಕಿಸ್ತಾನ್ ‘ಬಾಂಗ್ಲಾದೇಶ್’ ಜಾವ್ನ್ ಏಕ್ ನವೊ ದೇಶ್‌ಚ್ ಉದೆಲೊ. ಏಕ್ ಭಿರಾಂಕುಳ್ ಗಡಿ ಸಮಸ್ಸ್ಯಾಕ್ ಸ್ಯಾಮಾನ್ ತೆರಾ ದಿಸಾಂಭಿತರ್ ಶಾಶ್ವಿತ್ ಪರಿಹಾರ್ ದಿಲ್ಲೊ.

೧೯೭೨ ಇಸ್ವೆಂತ್ ಸ್ಯಾಮಾಕ್ ‘ಪದ್ಮವಿಭೂಷಣ್’ ಗವ್ರವ್ ಲಾಬ್ಲೊ. ೨೦೦೮ ಇಸ್ವೆಂತ್ ಆಪ್ಲ್ಯಾ ೯೪ ವ್ಯಾ ವರ್‍ಸಾಂ ಪ್ರಾಯೆರ್ ನ್ಯುಮೋನಿಯಾಕ್ ಲಾಗೊನ್ ಅಂತರ್‍ಚ್ಯಾ ಪಯ್ಲೆಂ ಸ್ಯಾಮಾನ್ ಉಲಯಿಲ್ಲಿಂ ಆಖೇರಿಚಿಂ ಉತ್ರಾಂ “I am Okay”. ಆಮ್ಚ್ಯಾ ದಿಸ್ಪಡ್ತ್ಯಾ ಜಿವಿತಾಚ್ಯಾ ಝುಜಾಂತ್ ಆಮಿ ಹಿಂಚ್ ಉತ್ರಾಂ ವಾಪಾರ್‍ಲ್ಯಾರ್ ಯಶಸ್ವಿ ಆಮ್ಚಿ ಜಾತೆಲಿ. ‘ಸ್ಯಾಮ್ ಬಹದ್ದೂರ್’ ಫಿಲ್ಮ್ ಜರೂರ್ ಪಳೆಯಾ.

✍️ –ಮನೋಜ್ ಫೆರ್ನಾಂಡಿಸ್, ಕಿರೆಂ