ಆರ್ಟಿಫಿಶಿಯಲ್ ಇಂಟಲಿಜೆನ್ಸ್ (AI) ಚೊ ಕಾಳ್ ಹೊ. ವಿವಿಧ್ ನಮೂನೆಚಿಂ AI ಹಾತೆರಾಂ ಆಮ್ಕಾಂ ಹ್ಯಾ ದಿಸಾಂನಿ ಮೆಳೊನ್ ಆಸಾತ್. AI ಟೆಕ್ನೊಲೊಜಿ ವಿಕಸಿತ್ ಜಾವ್ನ್ ಸಮಾಜೆಕ್ ಬರೆಂ ಹಾಡ್ಚ್ಯಾ ಬದ್ಲಾಕ್ ಥೊಡೆಕಡೆ ಹಾಚೊ ವಾಯ್ಟ್ ಪ್ರಯೋಗ್‌ಯೀ ಜಾವ್ನ್ ಆಸ್ತಾ. ಆಜ್ AI ಹಾತೆರಾಂ ವಾಪಾರ್‍ನ್ ತುಮ್ಕಾಂ ಸುಲಬಾಯೆನ್ ತಸ್ವೀರ್ ವಾ ವೀಡಿಯೋ ಎಡಿಟ್ ಕರುಂಕ್ ಜಾತಾ. ತಿತ್ಲೆಂಚ್ ನ್ಹಯ್, ಹ್ಯಾ ದಿಸಾಂನಿ AI ವಾಪಾರ್‍ನ್ ಡೀಪ್ ಫೇಕ್ ತಸ್ಲೆ ಆಪ್ರಾಧ್ ಸುಲಬಾಯೆನ್ ಜಾತಾತ್. ಎಕ್ಲ್ಯಾಚಿ ತಸ್ವೀರ್ ವಾ ವೀಡಿಯೋಕ್ AI ದ್ವಾರಿಂ ಸುಲಬಾಯೆನ್ ಬದ್ಲಾವಣ್ ಕರ್‍ಯೆತ್. ಸಬಾರ್ ಅಸ್ಲ್ಯಾ ನಕ್ಲಿ ತಸ್ವೀರೆಂಕ್ ವಾ ವೀಡಿಯೋಂಕ್ ಅಂತರ್‌ಜಾಳಿರ್ ಹ್ಯಾ ದಿಸಾಂನಿ ಅಪ್ಲೋಡ್ ಕರ್‍ತಾತ್. ಥೊಡೆಪಾವ್ಟಿಂ ಲೋಕ್ ಆನ್ಯೆಕಾ ವೆಕ್ತಿವಯ್ರ್ ಫಾರಿಕ್ಪಣ್ ಘೆಂವ್ಕ್ ಮ್ಹಣ್‌ಯೀ ಅಸಲ್ಯಾ ತಸ್ವೀರೆಂಕ್ ತಯಾರ್ ಕರ್‍ನ್ ಜಾಳಿರ್ ಪ್ರಸಾರ್ ಕರ್‍ತಾತ್. ಥೊಡ್ಯಾ ತೆಂಪಾ ಆದಿಂ ಜಾಲ್ಲ್ಯೆ ಎಕೆ ಸಮೀಕ್ಶೆಪ್ರಕಾರ್ 96 ಟಕ್ಕೆ ಅಸಲ್ಯಾ ನಕ್ಲಿ ತಸ್ವೀರೆಂಕ್ ಅಶ್ಲೀಲ್ ಜಾವ್ನ್ ಎಡಿಟ್ ಕರ್‍ನ್ ಜಾಳಿರ್ ಸೊಡ್ತಾತ್. ವಿಪರ್ಯಾಸ್ ಮ್ಹಳ್ಯಾರ್ ತಾಂತುಂ 99 ಟಕ್ಕೆ ತಸಲ್ಯೊ ತಸ್ವೀರ್‍ಯೊ ಚಲಿಯಾಂಕ್ ಸಂಬಂದಿತ್ ಜಾಲ್ಲ್ಯೊ. ಅಶೆಂ ಜಾವ್ನ್ ಹ್ಯಾ ಘೊಟ್ಯಾಳ್ಯಾಂತ್ ಚಲಿಯೊ ಚಡಿತ್ ಜಾವ್ನ್ ಬಲಿ ಜಾವ್ನ್ ಆಸಾತ್.

ತರ್ ಅಂತರ್‌ಜಾಳಿಚ್ಯಾ ತಾಣಾರ್ ವಾ ಸೋಶಿಯಲ್ ಮೀಡಿಯಾಂತ್ ತುಮ್ಚೊ ಅಸಲ್ಯೊ ತಸ್ವೀರ್‍ಯೊ ವಾ ವೀಡಿಯೋ ಕೊಣೆಂಯ್ ಅಪ್ಲೋಡ್ ಕೆಲ್ಯಾರ್ ತುಮಿ ಕಿತೆಂ ಕರ್‍ಯೆತ್? ಅಸಲ್ಯಾ ತಸ್ವೀರೆಂಕ್ ಆಮಿ non-consensual intimate image (NCII) ಮ್ಹಣ್ ಆಪಯ್ತಾಂವ್. ಮ್ಹಳ್ಯಾರ್ ತುಮ್ಚ್ಯೆ ಕಬ್ಲಾತೆವಿಣೆಂ ತುಮ್ಚೊ ಸಳ್ಗೆಚೊ ವಾ ಅಶ್ಲೀಲ್ ಕಂಟೆಂಟ್ ಜಾಳಿರ್ ಅಪ್ಲೋಡ್ ಕರ್‍ಚೆಂ. ಅಶೆಂ ಜಾಲ್ಯಾರ್ ಭಾರತಾಂತ್ ತುಮಿ cybercrime.gov.in ಜಾಳಿಜಾಗ್ಯಾಕ್ ಭೆಟ್ ದೀವ್ನ್ ಹ್ಯಾ ವಿಶಿಂ ದೂರ್ ದಾಖಲ್ ಕರ್‍ಯೆತ್ ವಾ 24X7 ಚಾಲು ಆಸ್ಚ್ಯಾ 1930 ಸಂಖ್ಯಾಕ್ ಕೊಲ್ ಕರ್‍ನ್ ದೂರ್ ದಿವ್ಯೆತ್. ಪುಣ್ ಅಶೆಂ ಕೆಲ್ಯಾರ್ ತುಮ್ಚಿ ತಸ್ವೀರ್ ವಾ ವೀಡಿಯೋ ಜಾಳಿಥಾವ್ನ್ ಕಾಡುಂಕ್ ಜಾತಾಗೀ? ಚಡಾವತ್ ಜಾಯ್ನಾ. ಕಿತ್ಯಾಕ್ ಮ್ಹಳ್ಯಾರ್ ತಶೆಂ ಕರ್‍ಚೆ ಫೇಕ್ ಐಡಿ ಸೃಶ್ಟಿ ಕರ್‍ನ್ ತೆಂ ಅಪ್ಲೋಡ್ ಕರ್‍ತಾತ್. ಹಾಕಾ ಆಸ್ಚೊ ಆನ್ಯೇಕ್ ಪರಿಹಾರ್ ಮ್ಹಳ್ಯಾರ್ https://stopncii.org ಮ್ಹಳ್ಳೊ ಜಾಳಿಜಾಗೊ.

ತುಮ್ಚ್ಯೆ ಕಬ್ಲಾತೆವಿಣೆಂ ತುಮ್ಚಿ ಕಸ್ಲೀಯ್ ತಸ್ವೀರ್ ವಾ ವೀಡಿಯೋ ಕೊಣೆಂಯ್ ಸೋಶಿಯಲ್ ಮೀಡಿಯಾಂತ್ ಅಪ್ಲೋಡ್ ಕೆಲ್ಯಾರ್ ತುಮಿ https://stopncii.org ಮ್ಹಳ್ಳ್ಯಾ ಜಾಳಿಜಾಗ್ಯಾಕ್ ಭೆಟ್ ದೀವ್ನ್ ಥಂಯ್ Create Your Case ಮ್ಹಳ್ಳೆಕಡೆ ಕ್ಲಿಕ್ ಕರ್‍ನ್ ದೂರ್ ದಿವ್ಯೆತ್. ಹೆಂ ಕರುಂಕ್ ತುಮ್ಚಿ ಪ್ರಾಯ್ 18 ವರ್‍ಸಾಂಚ್ಯಾಕೀ ಚಡಿತ್ ಜಾಯ್ಜೆ. ಉಪ್ರಾಂತ್ ಕಸ್ಲಿ ತಸ್ವೀರ್ ವಾ ವೀಡಿಯೋ ಮ್ಹಣ್ ಥಂಯ್ ಥೊಡಿ ಮಾಹೆತ್ ಭರ್‍ತಿ ಕರುಂಕ್ ಆಸ್ತಾ. ಉಪ್ರಾಂತ್ ತುಮಿ ತ್ಯಾ ಜಾಳಿಜಾಗ್ಯಾರ್ ತ್ಯಾ ತಸ್ವೀರ್ ವಾ ವೀಡಿಯೋಕ್ ಅಪ್ಲೋಡ್ ಕರಿಜೆ ಪಡ್ತಾ. ಉಪ್ರಾಂತ್ ತುಮಿ ಏಕ್ PIN ಸಂಖೊ ದೀಜೆ ಪಡ್ತಾ. ಹೆಂ ದಿಲ್ಯಾ ಉಪ್ರಾಂತ್ ತುಮ್ಕಾಂ ಏಕ್ ಕೇಸ್ ಸಂಖೊ ಮೆಳ್ತಾ. ಹೊ ಕೇಸ್ ಸಂಖೊ ಆನಿ PIN ವಾಪಾರುನ್ ತುಮಿ ಹ್ಯೆ ಕೆಜಿವಿಶಿಂ ಟ್ರ್ಯಾಕ್ ಕರ್‍ಯೆತ್. ಹೊ StopNCII ಸರ್ಕಾರಿ ಸಂಸ್ಥೊ ನ್ಹಯ್. ಯುಕೆ ಮುಳಾಚ್ಯಾ ತಶೆಂ 2015 ಇಸ್ವೆಂತ್ ಆರಂಬ್ ಜಾಲ್ಲ್ಯಾ Revenge Porn Helpline (RPH) ಮ್ಹಳ್ಳ್ಯಾ ಸಂಸ್ಥ್ಯಾನ್ ಮೆಟಾ (ಫೇಸ್‌ಬುಕ್) ಸಂಸ್ಥ್ಯಾ ಸಾಂಗಾತಾ ಮೆಳೊನ್ ಆರಂಬ್ ಕೆಲ್ಲೆಂ ಪ್ರೋಜೆಕ್ಟ್ ಹೆಂ. ತಶೆಂ ಜಾವ್ನ್ ಸಂಸಾರಾಂತ್ ತುಮಿ ಖಂಯ್ ಆಸ್ಲ್ಯ್ಯಾರೀ ತುಮಿ StopNCII ತ್ ಕೇಸ್ ರೆಜಿಸ್ತ್ರ್ ಕರ್‍ಯೆತ್.

ತರ್ ಹೆಂ StopNCII ಕಶೆಂ ಕಾಮ್ ಕರ್‍ತಾ? ತುಮಿ ಅಪ್ಲೋಡ್ ಕೆಲ್ಲಿ ತುಮ್ಚಿ ಖಾಸ್ಗಿ ತಸ್ವೀರ್ ವಾ ವೀಡಿಯೋ ಸುರಕ್ಶಿತ್ ಜಾವ್ನ್ ಆಸ್ತಾ ಆನಿ ಕೊಣಾಯ್ಕಿ ತಿ ಮೆಳನಾ. ಪುಣ್ ಅಪ್ಲೋಡ್ ಜಾತಾನಾ ಹ್ಯಾ ಫಾಯ್ಲಾಚೆಂ ಡಿಜಿಟಲ್ ಫಿಂಗರ್‌ಪ್ರಿಂಟ್ ಬರಿ ‘hash’ ಮ್ಹಳ್ಳ್ಯಾ ಖಾಸ್ ಸಂಕೇತಾಂಕ್ ಉತ್ಪನ್ನ್ ಕರ್‍ತಾ. ಹ್ಯಾ ಸಂಕೇತಾಂಕ್ ಮಾತ್ರ್ StopNCII ಆಪ್ಲ್ಯಾಂಕಡೆ ಸೊಲ್ಲೊ ಕರ್‍ನ್ ಸಹಭಾಗಿ ಜಾಲ್ಲ್ಯಾ ಕಂಪ್ಣೆಂಕ್ ದಿತಾ. ಪ್ರಸ್ತುತೆಂತ್ StopNCII ಸಾಂಗಾತಾ ಆಸ್ಚ್ಯೊ ಕಂಪ್ಣ್ಯೊ ಮ್ಹಳ್ಯಾರ್ Facebook (Meta), TikTok, Reddit, Instagram (Meta), Bumble, OnlyFans, Threads (Meta), PornHub ಆನಿ Snap Inc. ಮ್ಹಳ್ಯಾರ್ ತುಮ್ಚಿ ತಸ್ವೀರ್ ವಾ ವೀಡಿಯೋ ಹ್ಯಾ ಜಾಳಿಜಾಗ್ಯಾಂತ್ ಆಸ್ಲ್ಯಾರ್, ತಾಚೊ ಕಿತ್ಲ್ಯೊಯ್ ಪ್ರತಿ ಆಸೊಂ ಹ್ಯೊ ಭಾಗಿದಾರ್ ಕಂಪ್ಣ್ಯೊ ತೆಂ ಡಿಲೀಟ್ ಕರ್‍ತಾತ್. ಗುಮಾನ್ ಕರಿಜೆ ಜಾಲ್ಲಿ ಗಜಾಲ್ ಮ್ಹಳ್ಯಾರ್ ಸಗ್ಳ್ಯಾ ಅಂತರ್‌ಜಾಳಿಥಾವ್ನ್ ಹ್ಯೊ ಪ್ರತಿ ಡಿಲೀಟ್ ಜಾಯ್ನಾಂತ್. ಫಕತ್ ಹಾಂಚ್ಯಾ ಭಾಗಿದಾರ್ ಕಂಪ್ಣೆಂಥಾವ್ನ್ ಮಾತ್ರ್ ಡಿಲೀಟ್ ಜಾತಾತ್. ಫುಡ್ಲ್ಯಾ ದಿಸಾಂನಿ ಚಡಿತ್ ಕಂಪ್ಣ್ಯೊ ಹಾಂಚೆ ಭಾಗಿದಾರ್ ಜಾಲ್ಯಾರ್ ಸರ್ವಾಂಕ್ ಆಧಾರ್ ಜಾತಾ. ಹಾಚಿ ಆನ್ಯೇಕ್ ಸೀಮಿತಾಯ್ ಮ್ಹಳ್ಯಾರ್ ತುಮಿ ತಿ ತಸ್ವೀರ್ ವಾ ವೀಡಿಯೋಕ್ ಕ್ರೊಪ್, ರಿಸೈಜ್ ವಾ ಕಂಪ್ರೆಸ್ ಕೆಲ್ಯಾರ್ ದುಸ್ರೆಂಚ್ ಹ್ಯಾಶ್ ಉತ್ಪನ್ನ್ ಜಾತಾ ಆನಿ ತುಮ್ಚೊ ಕಂಟೆಂಟ್ ಡಿಲೀಟ್ ಜಾಂವ್ಕ್ ಅಡ್ಕಳ್ ಜಾತಾ.

ತಶೆಂ ಜಾವ್ನ್ StopNCII ತುಮ್ಚ್ಯಾ ಹ್ಯಾ ಸಮಸ್ಸ್ಯಾಂಕ್ ಸಂಪೂರ್ಣ್ ಪರಿಹಾರ್ ಬಿಲ್ಕುಲ್ ನ್ಹಯ್. ತುಮಿ ಹೊ ಏಕ್ ತಾತ್ಕಾಲಿಕ್ ಉಪಾಯ್ ಜಾವ್ನ್ ಮಾತ್ರ್ ವಾಪಾರ್‍ಯೆತ್. ಫುಡ್ಲ್ಯಾ ದಿಸಾಂನಿ ಹ್ಯಾ ಟೆಕ್ನೊಲೊಜಿವಿಶಿಂ ಚಡಿತ್ ಸಂಸೊಧ್ ಕರ್‍ಚಿ ಗರ್ಜ್ ಆಸಾ.

✍️ –ಪ್ರಮೋದ್ ರೊಡ್ರಿಗಸ್