ಝುಜ್ ಆನಿ ರಗ್ತಾಪಾತಾಚ್ಯಾ ಗಾಂವಾಂತ್ ಶಾಂತಿಚ್ಯಾ ಕುಂವರಾಚೊ ಜಲ್ಮ್!

ಎಕೆ ಕುಶಿನ್ ಸಂಸಾರ್ಭರ್ ಲೋಕ್ ಜೆಜುಚ್ಯಾ ಆಮ್ಚೊ ಸೊಡ್ವಣ್ದಾರ್ ಆನಿ ಶಾಂತಿ ಕುಂವರಾಚ್ಯಾ ಜಲ್ಮಾ ಫೆಸ್ತಾಕ್ ಆತುರಾಯೆನ್ ತಯಾರಾಯ್ ಕರ್ನ್ ಆಸ್ತಾಂ, ಆನ್ಯೆಕೆ ಕುಶಿನ್ ಸಂಸಾರಾರ್ ಝುಜ್ ಆನಿ ರಗ್ತಾಪಾತ್ ಚಡೊನ್ ಆಸಾ. ಹ್ಯಾ ಝುಜಾಂಪಯ್ಕಿ ಆಯ್ಲೆವಾರ್ಚೆಂ ಇಸ್ರಾಯೆಲ್ ಆನಿ ಹಮಾಸ್ ಭಯೋತ್ಪದಕಾಂ ಮದ್ಲೆಂ ಝುಜ್ ಭಿರಾಂತ್ ಉಬ್ಜಯ್ತಾ. ವಾಂಜೆಲಾಂತ್ ಹಿಬ್ರೂ ಭಾಶೆನ್ ಹಮಾಸ್ ಮ್ಹಳ್ಯಾರ್ ‘ಹಿಂಸಾ’ ಮ್ಹಣ್ ಅರ್ಥ್ ದಿತಾ. ನೊಯೆಚ್ಯಾ ಘಡಿತಾಂತ್ ಹೆಂ ಪಯ್ಲೆಪಾವ್ಟಿಂ ಝಳ್ಕತಾ. “ಸಗ್ಳೊ ಸಂಸಾರ್ ದೆವಾಚ್ಯೆ ದಿಶ್ಟಿಕ್ ಖೊಟೊ ಮ್ಹಣ್ ದಿಸ್ಲೊ. ಜುಲುಮ್ (ಹಮಾಸ್) ತಾಂತುಂ ಭರೊನ್ ಗೆಲ್ಲೊ. (ಉತ್ಪತ್ತಿ 6:11) ದುಸ್ರ್ಯಾ ಖಂಯ್ಚ್ಯಾಯ್ ಪ್ರದೇಶಾಂಪ್ರಾಸ್ ಚಡ್ ಮಧ್ಯ್ಪ್ರಾಚ್ಯ್ ಗಾಂವಾಂನಿ ಮನ್ಶಾಪಣಾಚ್ಯೆ, ಶಾಂತಿಚ್ಯೆ ತಾನೆಕ್ ಕೆದ್ನಾಂಯ್ ಜವಾಬ್ ಮೆಳ್ಲ್ಲಿ ಆಸಾ ತರ್ ತಿ ಭಿರಾಂಕುಳ್ ಝುಜಾಂ ಆನಿ ರಗ್ತಾಪಾತ್ ಮಾತ್ರ್! ಜೆಜುಚ್ಯಾ ಜಲ್ಮಾ ವೆಳಾ ಆಂಜ್ಯಾಂನಿ ಗೊವ್ಳ್ಯಾಂಕ್ ಶಾಂತಿಚೊ ಸಂದೇಶ್ ದಿಲೊ ಮ್ಹಣೊನ್, “ಮ್ಹಯ್ಮಾ ದೆವಾಕ್ ಅತೀ ಉನ್ನತಿ ಆನಿ ಶಾಂತಿ ದೆವಾಕ್ ಮಾನ್ವಲ್ಯಾತ್ ತ್ಯಾ ಮನ್ಶಾಂಕ್ ಸಂಸಾರಿಂ.” (ಲೂಕ್ 2:14) ತ್ಯಾಚ್ಪರಿಂ ಪುನರ್ಜಿವಂತ್ ಕ್ರೀಸ್ತ್ ಆಪ್ಲ್ಯಾ ಆಪೊಸ್ತಲಾಂಕ್ ದಿಶ್ಟಿಕ್ ಪಡ್ತಾನಾಂಯ್ “ಸಮಾಧಾನ್ ತುಮ್ಕಾಂ!” ವಾ “ಶಾಂತಿ ತುಮ್ಕಾಂ” ಮ್ಹಣಾಲೊ. (ಲೂಕ್ 24:36, ಜುವಾಂವ್ 20:19,26). ತರ್ ಏಕ್ ಸವಾಲ್ ಆಮ್ಕಾಂ ಧೊಸ್ತಾ – ಶಾಂತಿಚೊ ಕುಂವರ್, ಜೆಜು ಜರ್ ಹ್ಯಾ ಭಾಗೆವಂತ್ ಜಾಗ್ಯಾಂಚ್ಯಾ ಹರ್ಯೆಕಾ ಕೊನ್ಶಾ-ಕೊನ್ಶಾಂನಿ ಶಾಂತಿಚೊ ಸಂದೇಶ್ ದೀವ್ನ್ ಹರ್ಯೇಕ್ ಪಿಡಾಶಿಡಾ ಗೂಣ್ ಕರಿತ್ತ್ ಭೊಂವ್ಲಾ ತರ್, ಹ್ಯಾ ಗಾಂವಾಂತ್ ಕಿತ್ಯಾಕ್ ಆಜೂನ್ ಶಾಂತಿ ನಾ? ಹ್ಯಾ ಸವಾಲಾಕ್ ಜಾಪ್ ಮೆಳೊಂಕ್ ತಿತ್ಲೆಂ ಸಲೀಸ್ ನಾ, ಕಿತ್ಯಾಕ್ ಜುದೆವಾಂಚಿ ಲಾಂಬ್ ಕಾಳಾಚಿ ಚರಿತ್ರಾಚ್ ಎಕೆ ರಿತಿನ್ ಗೊಂದೊಳಾಚಿ ಜಾವ್ನಾಸಾ.
ಸುರ್ಯಾಪಂದಾ ನವೆಂ ಕಾಂಯ್ಚ್ ನಾ
ಉಪದೇಶಕಾನ್ ಸಾಂಗ್ಚೆಪರ್ಮಾಣೆಂ, “ಸುರ್ಯಾಪಂದಾ ನವೆಂ ಕಾಂಯ್ಚ್ ನಾ” (1:9), ತಶೆಂ ದ್ವೇಶ್, ಹಿಂಸಾ ಆನಿ ರಗ್ತಾಪಾತ್ ಮನ್ಶಾಕುಳಾನ್ ದೆವಾವಿರೋಧ್ ಕೆಲ್ಲ್ಯಾ ಪಯ್ಲ್ಯಾ ಪಾತ್ಕಾಚ್ಯಾ ಕಾಳಾಕ್ ಪಾಟಿಂ ವೆತಾ. ತರೀ, ಪಾತ್ಕಾಕ್ ನಾಡ್ಲಲ್ಯಾ ಸೊರ್ಪಾಕ್, “ತುಜೆ ಆನಿ ಸ್ತ್ರೀಯೆಮದೆಂ, ತುಜಿ ಸಂತತಿ ಆನಿ ತಿಚ್ಯೆ ಸಂತತಿಮದೆಂ ದುಸ್ಮನ್ಕಾಯ್ ಹಾಂವ್ ಘಾಲ್ತೊಲೊಂ ಆನಿ ತಿಚಿ ಸಂತತ್ ತುಜೆಂ ಮಸ್ತಕ್ ಚೆಂಚ್ತೆಲಿ ಆನಿ ತುಂ ತಿಚ್ಯೆ ಖೊಟೆಕ್ ಖೊಂಚ್ ಮಾರ್ತಲೊಯ್ (ಉತ್ಪತಿ 3:15) ಮ್ಹಳ್ಳ್ಯಾ ಉತ್ರಾಂ ಮಾರಿಫಾತ್ ವಾಯ್ಟಾಂತ್ ಪಡ್ಲಲ್ಯಾ ಮನ್ಶಾಕುಳಾಕ್ ಬಚಾವ್ ಕರುಂಕ್ ಆನಿ ಪಾತ್ಕಾಚ್ಯಾ ಗುಲಾಮ್ಪಣಾಥಾವ್ನ್ ಸುಟ್ಕಾ ದೀಂವ್ಕ್ ದೆವಾನ್ ಭಾಸಾವ್ಣಿ ಕೆಲಿ. ಮನ್ಶಾ ಸಮ್ಜಣೆಪರ್ಮಾಣೆಂ ಸಾಂಗ್ಚೆಂ ಜಾಲ್ಯಾರ್ ಹಿ ಭಾಸಾವ್ಣಿ ಕಾಯ್ನಾಥಾವ್ನ್ ಆಬೆಲಾಚಿ ಖುನಿ ಜಾಲ್ಲ್ಯಾ ಘಡಿತಾಕ್ ಸರಿ ಕರ್ಯೆತಾ. ಹಾಂಗಾ ಸೊರ್ಪಾಚೆಂ ರಾಗಾಚೆಂ ಬಿಂ ಸ್ತ್ರೀಯೆಚೆಂ ಮೊಗಾಚೆಂ ಫಳ್ ನಾಸ್ ಕರ್ತಾ. ಹ್ಯಾ ಪಯ್ಲ್ಯಾ ಆಕ್ರಮಣಾವರ್ವಿಂ ರಗ್ತಾಪಾತ್ ಜಾತಾ. ದೇವ್ಶಾಸ್ತ್ರಾಚ್ಯಾ ಗೂಂಡ್ ನಿಯಾಳಾಮುಕಾಂತ್ರ್ ಆಮ್ಕಾಂ ದೆವಾಚ್ಯಾ ಹ್ಯಾ ಭಾಸಾವ್ಣೆಚೊ ಅರ್ಥ್ ಖುರ್ಸಾರ್ ಸಮ್ಜತಾ. ಜೆಜುನ್ ಆಪ್ಲ್ಯಾ ಕಶ್ಟಾಂ ಆನಿ ಮೊರ್ನಾಮುಕಾಂತ್ರ್ ತ್ಯಾ ಖುರ್ಸಾರ್ ಪಾತಕ್ ಆನಿ ಮರ್ಣಾಚ್ಯಾ ಅಧಿಪತಿ ಸಯ್ತಾನಾಕ್ ಸಲ್ವಯ್ಲೆಂ. ಖುರ್ಸಾರ್ ಆಪ್ಣಾಕ್ಚ್ ನಾಲಿಸಾಯೆಚ್ಯಾ ಮರ್ಣಾಕ್ ಸಮರ್ಪುನ್ ದೀವ್ನ್ ಸಯ್ತಾನಾಚ್ಯಾ ಪಾಸಾಥಾವ್ನ್ ಘಾಯೆಲ್ಲ್ಯಾ ಮನ್ಶಾಕುಳಾಕ್ ತಾಣೆಂ ಬಚಾವ್ ಕೆಲೆಂ. (೧ಕೊರಿಂತ್ 5:55-57).
ಏಕ್ ಬಾಳೊಕ್ ಆಮ್ಕಾಂ ಜಲ್ಮಲಾ
ಅಸಲ್ಯಾ ಎಕಾ ಸಂಘರ್ಶ್ ಆನಿ ಹಿಂಸೆಚ್ಯಾ ವಾದಾಳಾಮದೆಂ, ದೆವಾನ್ ಆಪ್ಣಾಚೊ ಪೂತ್ ಶಾಂತಿಚೊ ಕುಂವರ್ ಉಬ್ಜೊಂಚ್ಯಾಕ್ ಏಕ್ ಪರ್ಜಾ ವಿಂಚ್ಲಿ. ಆಬೆಲಾಬರಿ, ಸೊರ್ಪಾಚೊ ರಾಗ್, ಹಗ್ಯಾಚೆಂ ಬಿಂ ತವಳ್ ತವಳ್ ಇಸ್ರಾಯೆಲಾಕ್ ಧೊಶಿ ದಿತಾ. ತ್ಯಾ ದೆಕುನ್ ಜುದೆವಾಂಚಿ ಚರಿತ್ರಾ ತಾಂಚ್ಯಾ ಭೊಂವಾರಿಂ ಆಸ್ಚ್ಯಾ ವೈರಿ ರಾಶ್ಟ್ರಾಂಥಾವ್ನ್ ತವಳ್ ತವಳ್ ಸಂಘರ್ಶ್ ಆನಿ ಝುಜಾಕ್ ವೊಳಗ್ ಜಾಲ್ಲಿ ಚರಿತ್ರಾ ಜಾತಾ. ಸುರ್ವೇರ್ ಇಸ್ರಾಯೆಲ್ ಪರ್ಜಾ ಇಜಿಪ್ತಾಚ್ಯಾ ಗುಲಾಮ್ಪಣಾಂತ್ ಕಶ್ಟಾಲಿ ತರೀ ದೆವಾಚ್ಯಾ ಬಳ್ವಂತ್ ಹಾತಾಂನಿ ತಾಂಕಾಂ ಸುಟ್ಕಾ ಲಾಬ್ಲಿ. 40 ವರ್ಸಾಂ ದೆವಾನ್ ತಾಂಕಾಂ ಅರಣ್ಯಾಂತ್ಲ್ಯಾನ್ ವಾಟ್ ವ್ಹೆಲಿ ಆನಿ ಭಾಸಾಯಿಲ್ಲ್ಯಾ ಗಾಂವಾಂಕ್ ಪಾವಯ್ಲೆಂ. ಹ್ಯಾ ಭಾಸಾಯಿಲ್ಲ್ಯಾ ಗಾಂವಾಂತ್ ಆನಿ ಕಿತೆಂ ವಸ್ತಿ ಕರ್ತಾ ಮ್ಹಣ್ ಚಿಂತ್ತಾನಾ ತಾಣಿಂ ಕಾನಾನ್ಗಾರಾಂ ವಿರೋಧ್ ಝುಜಜೆ ಪಡ್ಲೆಂ. ದಾವಿದ್ ಆನಿ ಸಾಲ್ಮಾಂವ್ಚ್ಯಾ ಮರ್ಣಾ ನಂತರ್ ಇಸ್ರಾಯೆಲ್ ಉತ್ತರ್ ರಾಜ್ಯ್ (ಇಸ್ರಾಯೆಲ್) ಆನಿ ದಕ್ಶಿಣ್ ರಾಜ್ಯ್ (ಜುದಾ) ಅಶೆಂ ದೋನ್ ವಾಂಟೆ ಜಾತಾನಾ ತಾಣಿಂ ದೋನ್ ಬಳಿಶ್ಟ್ ವೈರಿ ರಾಶ್ಟ್ರಾಂ ಅಸ್ಸೀರಿಯಾ ಆನಿ ಬಾಬಿಲೊನ್ಗಾರಾಂಚೊ ವಿರೋಧ್ ಫುಡ್ ಕರಿಜೆ ಪಡ್ಲೊ. ಅಸಲ್ಯೆ ಸಂಧಿಗ್ದ್ ಪರಿಗತೆಂತ್ ದೇವ್ ಇಸಾಯಿಯಾ ಪ್ರವಾದ್ಯಾಮುಕಾಂತ್ರ್ ಆಪುಣ್ ಎಕಾ ಸೊಡ್ವಣ್ದಾರಾಕ್ ಧಾಡ್ತೊಲೊಂ ಮ್ಹಣ್ ಭಾಸಾಯ್ತಾ: “ಕಿತ್ಯಾಕ್ ಏಕ್ ಬಾಳೊಕ್ ಆಮ್ಕಾಂ ಜಲ್ಮಲಾ, ಏಕ್ ಪೂತ್ ಆಮ್ಕಾಂ ದಿಲಾ, ತಾಚ್ಯಾ ಖಾಂದಾರ್ ಅಧಿಕಾರ್ ಘಾಲಾ; ಆನಿ ತಾಕಾ ಹೆಂ ನಾಂವ್ ದವರ್ಲಾಂ: ‘ವಿಜ್ಮಿತ್ ಬೂದ್ದಿಣಾರ್, ಪದ್ವೆದಾರ್ ದೇವ್, ಸಾಸ್ಣಿಕ್ ಬಾಪ್, ಶಾಂತಿಚೊ ಕುಂವರ್.’ (ಇಸಾಯಿಯಾ 9:5)


ಜೆಜು-ಖಾಲ್ತೊ, ಕಶ್ಟೊಂಚೊ ದೆವಾಚೊ ಸೆವಕ್
ಜೆಜು ಜಲ್ಮೊಂಚ್ಯಾ ಸುಮಾರ್ ಶತಮಾನಾಂ ಪಯ್ಲೆಂ, ಪರ್ಶಿಯಾ, ಗ್ರೀಕ್ ಆನಿ ಫುಡೆಂ ರೊಮಾಗಾರಾಂನಿ ಶಾಸ್ವತ್ ಸಮಾಧಾನ್ ಆನಿ ಸಮೃದ್ಧಿ ಹಾಡ್ತಾಂವ್ ಮ್ಹಳ್ಳ್ಯೆ ಭಾಸಾವ್ಣೆಮುಕಾಂತ್ರ್ ತಾಂಚಿಂ ರಾಶ್ಟ್ರಾಂ ಸ್ಥಾಪಿತ್ ಕೆಲ್ಲಿಂ. ಬಳ್ವಂತ್ ರೊಮಾಚ್ಯಾ ಆಡಳ್ತ್ಯಾ ಕಾಳಾರ್, ಜೆದ್ನಾ ಲೋಕ್ ಏಕ್ ರಾಜಕೀಯ್ ಆನಿ ರಾಯಾಳ್ ಮೆಸ್ಸಿಯಾಚಿ ವಾಟ್ ಪಳೆವ್ನ್ ಆಸ್ಲ್ಲೊ ತ್ಯಾ ವೆಳಾರ್ ಜೆಜು, ಪ್ರವಾದ್ಯಾಂನಿ ಪಯ್ಲೆಂಚ್ ಕಳಿತ್ ಕೆಲ್ಲೆಪ್ರಕಾರ್ ಏಕ್ ದುರ್ಬಳೊ ಆನಿ ಅಸಹಾಯಕ್ ಬಾಳ್ ಜಾವ್ನ್ ಬೆತ್ಲೆಹೆಮಾಂತ್ ಜಲ್ಮಾಲೊ. “ಪುಣ್ ತುಂ ಬೆತ್ಲೆಹೆಮ್-ಎಪ್ರಾತಾ, ಜುದಾಚ್ಯಾ ಕುಳಿಯಾಂಮದೆಂ ತುಂ ಬೊವ್ ಲ್ಹಾನ್, ತರೀ ಇಸ್ರಾಯೆಲಾಚೆರ್ ರಾಜ್ವಟ್ ಚಲೊಂವ್ಚೊ ಆಸಾ ತೊ ಮ್ಹಾಕಾ ತುಜೆಥಾವ್ನ್ ಜಲ್ಮತೊಲೊ. ತಾಚೊ ಆರಂಬ್ ನ್ಹಯ್ ಆತಾಂಚೊ, ಬಗಾರ್ ಬೊವ್ ಪುರ್ವಿಲ್ಯಾ ಕಾಳಾಂಚೊ” (ಮಿಕಾ 5:1) ಆನಿ ಹೊ ದೈವಿಕ್ ರಾಯ್ ಕೊಣಾಕ್ ಪರ್ಗಟ್ ಜಾಲೊ? ನ್ಹಯ್ ಬಳ್ವಂತ್ ರಾಜಕೀಯ್ ಆನಿ ಧರ್ಮಿಕ್ ಮುಕೆಲ್ಯಾಂಕ್, ಬಗಾರ್ ಖಾಲ್ತ್ಯಾ ಆನಿ ಸಾದ್ಯಾ ಗೊವ್ಳ್ಯಾಂಕ್ ಆನಿ ಉದೆಂತಿಚ್ಯಾ ಜ್ಯೋತಿಶಿಂಕ್. ಝುಜ್ ಆನಿ ಹಿಂಸಾ ಭರ್ಲ್ಲ್ಯಾ ಸಂಸಾರಾಂತ್, ಜೆಜುಜೊ ಸರ್ವ್ ಪದ್ವೆದಾರ್ ದೇವ್ ತೊ ಮನ್ಶಾಚ್ಯೆ ಚರಿತ್ರೆಂತ್ ಶಾಂತಿಚೊ ರುಪ್ಕಾರ್ ಜಾತಾ ಮ್ಹಣ್ ಸಮ್ಜೊಂಕ್ ಬೊವ್ ಕಶ್ಟಾಂಚೆಂ. ಪುಣ್ ತ್ಯಾ ಕಾಳಾಚ್ಯೆ ಆಪೇಕ್ಶೆಭಾಯ್ರ್ ಜೆಜು ಏಕ್ ಖಾಲ್ತೊ ಕಶ್ಟೊಂಚೊ ದೆವಾಚೊ ಸೆವಕ್ ಜಾಲೊ (ಇಸಾಯಿಯಾ 53:3-7). ದೆಕುನ್ ತಾಚೆಂ ಮಿಸಾಂವ್ ರೊಮಾಚ್ಯಾ ಆಧಿಕಾರಾವಿರೋಧ್ ನ್ಹಯ್, ಬಗಾರ್ ತ್ಯಾ ಕಾಳಾಚ್ಯಾ ಧರ್ಮಿಕ್ ಆನಿ ಸಮಾಜಿಕ್ ಶೋಶಣಾವಿರೋಧ್ ಜಾವ್ನಾಸ್ಲೆಂ. ತಾಚ್ಯಾ ಪರ್ಗಟ್ ಮಿಸಾಂವಾಚ್ಯಾ ಸುರ್ವೇರ್ ಜೆಜುಚ್ ತಾಚ್ಯಾ ಮಿಸಾಂವಾಂವಿಶ್ಯಾಂತ್ ಸಾಂಗ್ತಾ: ‘ದೆವಾಚೊ ಪ್ರೇರಕ್ ಅತ್ಮೊ ಮ್ಹಜೆರ್ ಆಸಾ; ಕಿತ್ಯಾಕ್ ದುರ್ಬಳ್ಯಾಂಕ್ ಬರಿ ಖಬರ್ ಪರ್ಗಟ್ ಕರುಂಕ್ ತಾಣೆಂ ಮ್ಹಾಕಾ ಅಭಿಶೇಕ್ ಕೆಲಾ. ಬಂದೆಂತ್ ಆಸ್ಲ್ಲ್ಯಾಂಕ್ ಸುಟ್ಕಾ, ಕುರ್ಡ್ಯಾಂಕ್ ದೀಶ್ಟ್, ಧಣ್ಸತಲ್ಯಾಂಕ್ ಸವ್ಕಾಸಾಯ್ ಭಾಸಾಂವ್ಕ್ ಆನಿ ಸರ್ವೆಸ್ಪರಾನ್ ದಯಾಮಾಯಾ ದಾಕೊಂವ್ಚೆಂ ವರಸ್ ಪಾಚಾರುಂಕ್ ಮ್ಹಣ್ ತಾಣೆಂ ಮ್ಹಾಕಾ ಧಾಡ್ಲಾ.” (ಲೂಕ್ 4:18-19)
ತಾಚ್ಯೆ ರಾಜ್ವಟ್ಕೆಕ್ ಅಂತ್ ಆಸ್ಚೆಂನಾ: ಜೆಜುಚೆಂ ಮಿಸಾಂವ್ ಜಾವ್ನಾಸ್ಲೆಂ ಪ್ರತ್ಯೆಕ್ ಜಾವ್ನ್ ಸಾಂಡುನ್ ಘಾಲ್ಲ್ಯಾಂಕ್, ಕನಿಶ್ಟ್ ಮ್ಹಣ್ ಲೆಕ್ಲಲ್ಯಾಂಕ್ ಆನಿ ಸಮಾಜೆಂತ್ ಗಡಿಮೆರೆರ್ ಆಸ್ಲಲ್ಯಾಂಖಾತಿರ್. ನೀತ್, ಶಾಂತಿ, ಮೋಗ್, ಸಂತೊಸ್, ದಯಾ ಆನಿ ಭೊಗ್ಸಾಣ್ಯಾಚೆಂ ದೆವಾಚೆಂ ರಾಜ್ ವೆಗಿಂಚ್ ಸ್ಥಾಪನ್ ಜಾತೆಲೆಂ ಮ್ಹಣ್ ತಾಣೆಂ ತಾಂಕಾಂ ಶಿಕಯ್ಲೆಂ. ಹ್ಯಾ ರಾಜಾಚೆ ವಾರೆಸ್ದಾರ್ ಜಾಂವ್ಚ್ಯಾಕ್ ತಾಣೆಂ “ಪಾತ್ಕಿ ಜಿಣಿ ಬದಲಾ ಆನಿ ಬರಿ ಖಬರ್ ಸತ್ಮಾನಾ” (ಮಾರ್ಕ್ 1:15) ಮ್ಹಳ್ಳೊ ಸಂದೇಶ್ ದಿಲೊ. ಜೆಜು ಹ್ಯಾ ಸಂಸಾರಿಂ ತಾತ್ಕಾಲಿಕ್ ರಾಜಕೀಯ್ ರಾಜ್ ಬಾಂದುಂಕ್ ಆಯಿಲ್ಲೊ ನ್ಹಯ್, ಬಗಾರ್ ಹರ್ಯೆಕಾ ವಿಶ್ವಾಸಿ ಕಾಳ್ಜಾಂತ್ ಶಾಶ್ವತ್ ಉರ್ಚೆತಸಲೆಂ ಸರ್ಗಿಂಚೆಂ ರಾಜ್ ಬಾಂದುಂಕ್ ಆಯಿಲ್ಲೊ. ತ್ಯಾ ದೆಕುನ್ ಜೆಜು ಪಿಲಾತಾಲಾಗಿಂ, “ಮ್ಹಜೆಂ ರಾಜ್ ಹ್ಯಾ ಸಂಸಾರಾಚೆಂ ನ್ಹಯ್. ಮ್ಹಜೆಂ ರಾಜ್ ಹ್ಯಾ ಸಂಸಾರಾಚೆಂ ಜಾಲ್ಲೆಂ ಜಾಲ್ಯಾರ್, ಜುದೆವಾಂಚ್ಯಾ ಹಾತಾಂತ್ ಹಾಂವೆಂ ಪಡನಾಶೆಂ, ಮ್ಹಜೆ ಪಾಟ್ಲಾವ್ದಾರ್ ಝುಜ್ತೆ ಆಸ್ಲೆ. ಪುಣ್ ಮ್ಹಜೆಂ ರಾಜ್ ಹಾಂಗಾಚೆಂ ನ್ಹಯ್” (ಜುವಾಂವ್ 18:36) ಮ್ಹಣ್ ಜಾಪ್ ದಿತಾ. ತಿತ್ಲೆಂಚ್ ನ್ಹಯ್ ಜೆಜು, ಶಾಂತಿಚೊ ಕುಂವರ್ ವರ್ತೊ ಕಿತ್ಯಾ ತೊ ಪರಮೋನ್ನತಾಚೊ ಪೂತ್ (ಲೂಕ್ 1:32) ಮನ್ಶಾಕುಳಾಚ್ಯೆ ಚರಿತ್ರೆಂತ್, ಜಾಯ್ತೆ ವರ್ತೆ ಆನಿ ಬಳಿಶ್ಟ್ ರಾಯ್ ಉಬ್ಜಲ್ಯಾತ್ ಆನಿ ತಾಣಿಂ ರಾಜಾಂ ಸ್ಥಾಪಿತ್ ಕೆಲ್ಯಾಂತ್. ತರೀ ತಾಂಚ್ಯಾ ಪಟಾಪಾಟ್ ತಾಂಚಿಂ ರಾಜಾಂಯ್ ಆಳ್ವೊನ್ ಗೆಲ್ಯಾಂತ್. ರಾಯಾಂನಿ ತಾಂಚಿ ರಾಜ್ವಟ್ಕಿ ವಿಸ್ತಾರಾಂವ್ಚ್ಯಾ ಖಾತಿರ್ ದುಸ್ರ್ಯಾ ರಾಜಾಂವಯ್ರ್ ಝುಜಾಂ ಮಾಂಡ್ಲ್ಯಾಂತ್ ಆನಿ ಹ್ಯಾ ವೆಳಿಂ ತಾಂಚ್ಯಾ ಸ್ವಾರ್ಥಾಕ್ ಆನಿ ಹಟಾಕ್ ಲಾಗೊನ್ ಹೆರ್ ರಾಶ್ಟ್ರಾಂ ನಾಸ್ ಕರುಂಕ್ ಆನಿ ಮಾಸೂಮ್ ರಗತ್ ವಾರೊಂವ್ಕ್ ತೆ ಪಾಟಿಂ ಸರೊಂಕ್ ನಾಂತ್. ಅಸಲಿಂ ದುರಂತಾಂ ಆಜೂನ್ ಆಮ್ಚ್ಯಾ ದೊಳ್ಯಾಂಮುಕಾರ್ ಘಡೊನ್ ಆಸಾತ್. ಜೆಜುನ್ ಅಸಲ್ಯಾ ಹಿಂಸಾವಿರೋಧ್ ತವಳ್ಚ್ ಜಾಗ್ವಣಿ ದಿಲ್ಲಿ ಆಸಾ, “ತುಜಿ ತಲ್ವಾರ್ ಪೊತ್ಯಾಂತ್ ಘಾಲ್, ಜೆ ಕೋಣ್ ತಲ್ವಾರ್ ಘೆತಾತ್, ತೆ ತಲ್ವಾರಿನ್ ನಾಸ್ ಜಾತೆಲೆ.” (ಮಾತೆವ್ 26:52). ಪುಣ್ ಆಮ್ಚ್ಯಾ ರಾಯಾನ್ ಮೋಗ್, ಸತ್, ಭೊಗ್ಸಾಣೆಂ ಆನಿ ದಯಾ ಮ್ಹಳ್ಳಲ್ಯಾ ಬಳ್ವಂತ್ ಆಯ್ದಾಂಮುಕಾಂತ್ರ್ ಸಂಸಾರ್ ಜಿಕ್ಲೊ. ತ್ಯಾ ದೆಕುನ್ “ಆನಿ ಜಾಕೊಬಾಚ್ಯೆ ಸಂತತಿತೆಚೆರ್ ಸದಾಂಕಾಳ್ ತೊ ರಾಜ್ವಟ್ ಕರ್ತಲೊ; ಆನಿ ತಾಚ್ಯೆ ರಾಜ್ವಟ್ಕೆಕ್ ಅಂತ್ ಆಸ್ಚೆಂನಾ” (ಲೂಕ್ 1:33).
ಸಂಸಾರಾರ್ ಶಾಂತಿ ವಸ್ತಿ ಕರುಂ : ಜೆಜುನ್ ಭಾಸಾಯಿಲ್ಲಿ ಶಾಂತಿ ದೈಹಿಕ್ ರಕ್ಶಣ್ ಆನಿ ರಾಜಕೀಯ್ ಎಕ್ತಾರಾಚ್ಯೆ ಪರಿಧೆಭಾಯ್ರ್ ಆಸಾ. “ಮ್ಹಜೆಥಂಯ್ ತುಮ್ಕಾಂ ಸಮಾಧಾನ್ ಮೆಳ್ಚೆಖಾತಿರ್ ಹ್ಯೊ ಸಂಗ್ತಿ ಹಾಂವೆಂ ತುಮ್ಕಾಂ ಸಾಂಗ್ಲ್ಯಾತ್. ಸಂಸಾರಾಂತ್ ತುಮ್ಕಾಂ ಖಂತ್ ಬೆಜಾರಾಯ್ ಆಸ್ತಲಿಚ್. ಪುಣ್ ಧಯ್ರ್ ಘೆಯಾ. ಹಾಂವೆಂ ಸಂಸಾರಾಚೆರ್ ಜಯ್ತ್ ವ್ಹೆಲಾಂ.” (ಜುವಾಂವ್ 16:33) ಹಿಬ್ರೂ ಭಾಶೆನ್ ಶಾಂತಿ ಮ್ಹಳ್ಯಾರ್ ‘ಶಾಲೊಮ್’. ಉಚಾಂಬಳಾಯ್, ಸಂಕಶ್ಟ್ ಆನಿ ಝುಜಾವೆಳಾರ್ ಪ್ರಶಾಂತತಾ ಆನಿ ಸಮಾಧಾನ್ ಸೂಚಿತ್ ಕರುಂಕ್ ಹೊ ಸಬ್ದ್ ಪ್ರಯೋಗ್ ಕರ್ತಾತ್. ಜೆಜುಚ್ ಹೆಂ ಧೃಡ್ ಕರ್ತಾ: “ಸಮಾಧಾನ್ ತುಮ್ಚೆಥಂಯ್ ಹಾಂವ್ ದವರ್ನ್ ವೆತಾಂ; ಮ್ಹಜೆಂ ಸಮಾಧಾನ್ ತುಮ್ಕಾಂ ದಿತಾಂ.” ಸಂಸಾರ್ ಅಸಲೆಂ ಸಮಾಧಾನ್ ದೀಂವ್ಕ್ ಸಕನಾ. (ಜುವಾಂವ್ 14:27) ತ್ಯಾಚ್ಪರಿಂ ಗ್ರೀಕ್ ಭಾಶೆನ್ ‘ಐರೀನೆ’ (eirene) ಮ್ಹಣ್ತಾತ್ ಮ್ಹಳ್ಯಾರ್ ‘ಎಕ್ತಾರ್ ಆನಿ ಸಂಧಾನ್’. ತರ್ ಶಾಂತಿ ಮನ್ಶಾಕ್ ಕುರ್ಪೆನ್ ಭರ್ತಾ ಆನಿ ಅತ್ಮೀಕ್ ಸಂತೊಸಾನ್ ತೊ ದೆವಾಲಾಗಿಂ ಏಕ್ ಜಾತಾ. ಅಸಲ್ಯೆ ದೈವಿಕ್ ಎಕ್ತಾರಾಚ್ಯೆ ಜಿಣಿಯೆಮುಕಾಂತ್ರ್ ಆಮಿ ಬೆತ್ಲೆಹೆಮಾಂತ್ ಜಲ್ಮಲ್ಲ್ಯಾ ಶಾಂತಿಚ್ಯಾ ಕುಂವರಾಚೊ ಜಲ್ಮಾ ದಿವಸ್ ಆಚರಣ್ ಕರ್ತಾಂವ್. ಸಾಂತ್ ಲಿಯೊ ವರ್ತೊ ನತಾಲಾಂಚೊ ಸಂದೇಶ್ ಎಕಾ ಉತ್ರಾನ್ ಅಶೆಂ ಸಾಂಗ್ತಾ: ‘ನತಾಲಿಸ್ ದೊಮಿನಿ, ನತಾಲಿಸ್ ಎಸ್ತ್ ಪಾಚಿಸ್’ (ಸೊಮಿಯಾಚೊ ಜಲ್ಮ್ ಮ್ಹಳ್ಯಾರ್ ಶಾಂತಿಚೊ ಜಲ್ಮ್). ಪಾಪಾ ಫ್ರಾನ್ಸಿಸ್, ಜೆಜು ಕ್ರೀಸ್ತ್ ಶಾಂತಿಚಿ ವಾಟ್ ಮ್ಹಣ್ ಸಾಂಗ್ತಾ. ತಾಚ್ಯಾ ಮನ್ಶಾವತಾರಾನ್, ಕಶ್ಟಾಂ, ಮರ್ಣಾ ಆನಿ ಜಿವಂತ್ಪಣಾಮುಕಾಂತ್ರ್, ಝುಜ್ ಆನಿ ವೈರತ್ವಾಚ್ಯಾ ಕಾಳೊಕಾಚ್ಯೆ ಸಾವ್ಳೆಥಾವ್ನ್ ಬಂದ್ ಪಡ್ಲ್ಲ್ಯೆ ವಾಟೆಥಾವ್ನ್ ಭಾವ್ಭಾಂದವ್ಪಣ್ ಆನಿ ಸಮಾಧಾನಾಚ್ಯಾ ಉಗ್ತ್ಯಾ ಸಂಸಾರಾಂತ್ ಸ್ವತಂತ್ರ್ಪಣಿಂ ಜಿಯೆಂವ್ಚ್ಯೆ ಕುಶಿಚ್ಯೆ ವಾಟೆನ್ ಆಮ್ಕಾಂ ಆಪೊವ್ನ್ ವ್ಹರ್ತಾ. ಝುಜ್ ಆನಿ ಅಶಾಂತಿಚ್ಯಾ ಹ್ಯಾ ಸಂಸಾರಾಂತ್ ಆಮಿ ಶಾಂತಿಚೆ ದುತ್ ಜಾವ್ಯಾಂ, ಜೆಜು ಬಾಳ್ಕಾಚ್ಯಾ ಮುಗ್ದ್ ಮುಕಮಳಾರ್ ಆಮಿ ಸಮಾಧಾನಾಖಾತಿರ್ ಲಾಲೆಂವ್ಚ್ಯಾ ಸರ್ವ್ ಕಶ್ಟೊಂಚ್ಯಾ ಭುರ್ಗ್ಯಾಂಚಿಂ ಮುಕಮಳಾಂ ದೆಕ್ಯಾಂ. ಜ್ಯಾ ಗಾಂವಾಂತ್ ಶಾಂತಿಚೊ ಕುಂವರ್ ಜಲ್ಮಾಲ್ಲೊ ತ್ಯಾ ಗಾಂವಾಂತ್ ಉಗ್ತ್ಯಾ ಸಂವಾದಾಮುಕಾಂತ್ರ್, ಎಕಾಮೆಕಾಚೆರ್ ವಿಶ್ವಾಸ್ ಠೆವುನ್ ಭಾವ್ಭಾಂದವ್ಪಣ್ ರಾಜ್ ಕರುಂದಿ ಮ್ಹಣ್ ಆಮಿ ಬಾಪಾಲಾಗಿಂ ಮಾಗ್ಯಾಂ.
✍️ –ಫ್ರಾದ್ ರಿಚರ್ಡ್ ಡಿಸೋಜಾ, ರೋಮ್
(ಕೊಂಕ್ಣೆಕ್: ರಿಚರ್ಡ್ ಆಲ್ವಾರಿಸ್)