ಪವಿತ್ರ್ ಸಭೆಚ್ಯೆ ದಸ್ತುರೆಖಾಲ್ ಯೆತಾ ತೆಂ ೨೦೨೫ ವೆಂ ವರಸ್, ಜುಬ್ಲೆವಾಚೆಂ ವರಸ್ ಮ್ಹಣ್ ಪಾಪಾ ಫ್ರಾನ್ಸಿಸಾನ್ ‘ಭರ್ವಶಾಚಿಂ ಯಾತ್ರಿಕಾಂ’ ಮ್ಹಳ್ಳ್ಯಾ ಸಂದೇಶಾಸಂಗಿ ಪರ್ಗಟ್ ಕೆಲಾಂ ಆನಿ ಹಾಚಿ ತಯಾರಾಯ್, ಹ್ಯಾಚ್ ಕ್ರೀಸ್ತ್ ರಾಯಾಚಾ ಫೆಸ್ತಾಚ್ಯಾ ಆಯ್ತಾರಾ ದೀಸ್ ಹರ್ ಫಿರ್ಗಜಾಂನಿ ‘ಜುಬ್ಲೆವಾಚೆಂ ಲಾಂಛನ್’ ಉಗ್ತಾವಣ್ ಕರ್‍ಚೆಮುಕಾಂತ್ರ್ ಸುರ್ವಾತ್ಲ್ಯಾ. ‘ಭರ್ವಶಾಚಿಂ ಯಾತ್ರಿಕಾಂ’ ಜುಬ್ಲೆವಾಚೊ ಹೊ ಧ್ಯೇಯ್ ಎಕ್ದಮ್ ಸಕಾಳಿಕ್. ಎಕೆ ಕುಶಿನ್ ವಿಜ್ಞಾನ್ ತಶೆಂ ತಾಂತ್ರಿಕತಾ ವಾರ್‍ಯಾವೆಗಾನ್ ಪ್ರಗತಿ ಜೊಡ್ತಾನಾ, ಆನ್ಯೆಕೆ ಕುಶಿನ್ ‘ನಿರಾಸ್ಪಣ್’ ದೊಡ್ತ್ಯಾ ವೆಗಾನ್ ಚಡೊನ್‌ಚ್ ಆಸಾ. ಝುಜಾಂಚ್ಯಾ ಮೊಡಾಂಮದೆಂ, ದುಬ್ಳಿಕಾಯ್, ಪಿಡಾ, ಝಗ್ಡಿಂ, ಮಾದಕ್ ದ್ರವ್ಯಾಂ, ಲಂಯ್ಗಿಕ್ ಕರ್ತುಂವಾಂ, ಮೊಬಾಯ್ಲಾಚೊ ವೊಸೊ, ಎಕ್ಸುರ್‌ಪಣ್, ತುಟ್ಲಲಿಂ ಕುಟ್ಮಾಂ ತಶೆಂ ಇತರ್ ಸಬಾರ್ ಕಾರಣಾಂಕ್ ಲಾಗೊನ್ ಮನಿಸ್ ಸಲ್ವಣಿ ಆನಿ ಆಕಾಂತಾಕ್ ವೊಳಗ್ ಜಾವ್ನ್ ಧರ್‍ಣಿಕ್ ಶೆವ್ಟಾಲಾ. ತಿರಾಸ್ಕಾರ್‌ಪಣಾಚೆಂ ಭೈಂ ಕುಟ್ಮಾಂನಿ ಧೊಸ್ತಾನಾ, ನಿರುದ್ಯೋಗ್ ಭಿರಾಂತ್ ಯುವಜಣಾಂಕ್ ದೆದೆಸ್ಪೊರ್ ಕರುನ್ ಆಸಾ. ಅಸಲ್ಯಾ ನಿರಾಸ್ಪಣಾಚ್ಯಾ ಅಂದ್ಕಾರಾಂತ್ ಸಾಸ್ಪೊಂವ್ಚ್ಯಾ ಸಂಸಾರಾಕ್ ಸೊಮಿ ಜೆಜು ಕ್ರೀಸ್ತ್‌ಚ್ ನೀಜ್ ಭರ್ವಸೊ ಮ್ಹಳ್ಳೆಂ ಸತ್ ಹ್ಯಾ ಜುಬ್ಲೆವಾ ಮುಕಾಂತ್ರ್ ಪಾಚಾರುಂಕ್ ತಶೆಂ ಸಾಕ್ಸ್ ದೀಂವ್ಕ್ ಪಾಪಾ ಫ್ರಾನ್ಸಿಸ್ ಉಲೊ ದಿತಾ. ಆವಯ್ಚ್ಯಾ ಉದರಿಂ ಜಲ್ಮಲ್ಲ್ಯಾಂಮದೆಂ, ಸಂಪೂರ್ಣ್‌ಕಾಯೆಂತ್ ಜಿಯೆಲ್ಲೊ ಜೆಜು ಆಮ್ಕಾಂ ಕಶೆಂ ಏಕ್ ಭರ್ವಸೊ ಜಾಂವ್ಕ್ ಸಕ್ತಾ ತೆಂ ಪಳೆವ್ಯಾಂ.

ಜೆಜು ಜಾಣ್ವಾಯೆನ್ ತಶೆಂ ಪ್ರಾಯೆನ್ ವಾಡೊನ್, ದೆವಾಕ್ ತಶೆಂ ಮನ್ಶಾಂಕ್ ಮಾನ್ವಾಲೊ

ಸಾಂ. ಲೂಕ್ ತಾಚ್ಯಾ ವಾಂಜೆಲಾಂತ್ ಜೆಜುಚೆಂ ಜನನ್ ವೃತ್ತಾಂತ್ ಸಂಪೊಂವ್ಚ್ಯಾ ವಗ್ತಾ, “ಜೆಜು ದೆವಾಕ್ ಆನಿ ಮನ್ಶಾಂಕ್ ಮಾನ್ವಾಲೊ ಜಾವ್ನ್, ಜಾಣ್ವಾಯೆನ್ ಆನಿ ಪ್ರಾಯೆನ್ ವಾಡ್ಲೊ” (ಲೂಕ್ ೨:೫೨) ಮ್ಹಣ್ ದಾಖಲ್ ಕರ್‍ತಾ. ಜುದೆವಾಂಚ್ಯೆ ಸಮ್ಜಣೆ ಪರ್ಮಾಣೆಂ ಏಕ್ ಚೆರ್ಕೊ ೧೨ ವರ್‍ಸಾಂ ಸಂಪಯ್ತಾನಾ ತೊ ದಾದ್ಲ್ಯಾಪಣಾಕ್ ರಿಗ್ತಾ ಆನಿ ತಾಚ್ಯಾ ಕರ್‍ನ್ಯಾಂಕ್ ತೊಚ್ ಸಂಪೂರ್ಣ್ ರಿತಿನ್ ಜವಾಬ್ದಾರ್ ಜಾತಾ. ತ್ಯಾ ದೆಕುನ್ ಸಾಂ. ಲುಕಾಚೆಂ, ಜೆಜು ವಿಶ್ಯಾಂತ್ಲೆಂ ವಯ್ಲೆಂ ವಾಕ್ಮೂಲ್ ಜೆಜು ಲಗ್ಬಗ್ ೧೨ ವರ್‍ಸಾಂ ಪ್ರಾಯೆರ್‌ಚ್ ಸಂಪೂರ್ಣ್‌ಕಾಯ್ ಜೊಡುಂಕ್ ಸಕ್ಲೊ ಮ್ಹಣ್ ಸುಚಯ್ತಾ ಆನಿ ಹ್ಯಾ ಖಾತಿರ್ ಮನ್ಶಾಸಂಯ್ಬಾಚ್ಯೆ ವಾಡಾವಳಿಂತ್ ಕಸಲೊಚ್ ಊಣ್ ನಾತ್‌ಲ್ಲೊ ಆನಿ ಹ್ಯಾ ಖಾತಿರ್ ಹ್ಯಾ ಸಂಸಾರಾಂತ್ ಸಂಪೂರ್ಣ್‌ಕಾಯ್ ಜೊಡುಂಕ್ ಆಶೆಂವ್ಚ್ಯಾ ಹರ್‍ಯೆಕ್ಲ್ಯಾಕ್ ತೊ ಏಕ್ ಮೇಲ್‌ಫಂಕ್ತ್ ಆನಿ ಆದರ್ಶ್.

ಜೆಜು ಜಾಣ್ವಾಯೆನ್ ವಾಡ್ಲೊ

“ಸರ್ವೆಸ್ಪರಾಚಿ ಭಿರಾಂತ್ ಜಾಣ್ವಾಯೆಚಿ ಸುರ್‍ವಾತ್” (ಮ್ಹಣ್ಣ್ಯೊ ೧:೭). ಜೆಜು ತ್ರಿಂದಾದಿಚೊ ದುಸ್ರೊ ಜಣ್ ಜಾವ್ನ್ ಹ್ಯಾ ಸಂಸಾರಿಂ ಯೆಂವ್ಚ್ಯಾಕ್ ಪ್ರಮುಕ್ ಕಾರಣ್‌ಚ್ ದೆವಾಬಾಪಾಕ್ ಉಗ್ಡಾಪೆಂ ಕರ್‍ಚ್ಯಾಕ್. ತ್ಯಾ ದೆಕುನ್ ತಾಚ್ಯಾ ಜಿವಿತಾಚೊ ಪ್ರಮುಕ್ ಶೆವೊಟ್ ಜಾವ್ನಾಸ್‌ಲ್ಲೊ, ಆಪ್ಲ್ಯಾ ಬಾಪಾವಿಶಿಂ ಸರ್ವಾಂಕ್ ಕಳಿತ್ ಕರ್‍ಚೆಂ. ಹಾಕಾ ಗರ್ಜೆಚಿ ಸರ್ವ್ ಜಾಣ್ವಾಯ್ ತಾಚೆಥಂಯ್ ಆಸ್‌ಲ್ಲಿ. “ಹ್ಯಾಚ್ ಕ್ರೀಸ್ತಾಥಂಯ್ ಸರ್ವ್ ಜಾಣ್ವಾಯೆಚೆಂ ಆನಿ ಸಮ್ಜಣೆಚೆಂ ಭಂಡಾರ್ ಲಿಪೊನ್ ಆಸಾ” (ಕೊಲೆಸ್ಸೆಗಾರಾಂಕ್ ೨:೩). ದೆವಾ ಬಾಪಾಥಂಯ್ ಮಾಗ್ಣ್ಯಾದ್ವಾರಿಂ ನಿರಂತರ್ ಸಂಬಂದ್ ತಶೆಂ ಪವಿತ್ರ್ ಅತ್ಮ್ಯಾಚೆಂ ಸಾಂಗಾತ್ಪಣ್ ಜೆಜುಚ್ಯೆ ಜಾಣ್ವಾಯೆಚೆಂ ಮೂಳ್ ಕಾರಣ್. ಬಾರಾ ವರ್‍ಸಾಂಚ್ಯೆ ಪ್ರಾಯೆರ್‌ಚ್ ವ್ಹಡ್ ವ್ಹಡ್ ಶಿಕೊಣ್ದಾರಾಂಕ್‌ಚ್ ತಾಣೆಂ ಆಪ್ಲ್ಯಾ ಸವಾಲಾಂ-ಜಾಪಿ ಮುಕಾಂತ್ರ್ ಆಪ್ಲ್ಯೆ ಜಾಣ್ತಿಕಾಯೆಚಿ ಒಳೊಕ್ ದೀವ್ನ್ ವಿಜ್ಮಿತ್ ಕೆಲ್ಲೆಂ ಲುಕಾಚ್ಯಾ ವಾಂಜೆಲಾಂತ್ ವಾಚ್ತಾಂವ್ (೨:೪೬-೪೭). ಮರುಭುಮಿಂತ್ ತಾಳ್ತಾನಾ ತೊ ಜಾಣ್ವಾಯ್ ವಾಪಾರ್‍ನ್ ತಾಳ್ಣ್ಯಾಂಥಾವ್ನ್ ಚುಕಾರಿ ಮಾರ್‍ತಾ. ಆಪ್ಣಾಕ್ ಸಾಂಪ್ಡಾವ್ನ್ ಘಾಲುಂಕ್ ಶಿಂತ್ರ್ಯೊ ಕರ್‍ತಲ್ಯಾಂಕ್ ಆಪ್ಲ್ಯೆ ಜಾಣ್ತಿಕಾಯೆನ್ ಜಾಪ್ ದೀವ್ನ್ ಶಾಬಿತಾಯೆನ್ ನಿಸರ್‍ತಾ.

ಜಾಣ್ವಾಯ್ ಜಾವ್ನಾಸಾ ಪವಿತ್ರ್ ಅತ್ಮ್ಯಾಚೆಂ ಪ್ರಥಮ್ ತಶೆಂ ಉಂಚ್ಲೆಂ ದೆಣೆಂ. “ವಯ್ರ್ ಥಾವ್ನ್ ಲಾಬ್ತಾ ತಿ ಜಾಣ್ವಾಯ್ ಪಯ್ಲ್ಯೆ ಸುವಾತೆರ್ ನಿತಳ್, ಸಾಂಗಾತಾಚ್ ಸಮಾಧಾನಾಚಿ, ಭೊಳಿ, ಸುಧಾರ್‍ಸುನ್ ವ್ಹರ್‍ತಾ ತಸಲಿ, ದಯಾಳಾಯೆನ್ ಭರ್‍ಲಲಿ, ಬರ್‍ಯಾ ಕರ್‍ನ್ಯಾಂಚಿ, ಫಳ್ ದಿತಲಿ ಆನಿ ಪಕ್ಶಾಪಾತ್ ಆನಿ ಕಪಟ್ಪಣ್ ನಾತ್ಲಲಿ” (ಜಾಕೊಬ್ ೩:೧೭). ಜೆಜುಚಿ ಜಾಣ್ವಾಯ್ ವಯ್ರ್ ಥಾವ್ನ್ ಆಯ್ಲಲಿ ಜಾಲ್ಲ್ಯಾನ್ ಥಂಯ್ಸರ್ ಸಂಪೂರ್ಣ್‌ಕಾಯ್ ಆಸ್‌ಲ್ಲಿ. ಜೆಜು ವಾಡ್ಲಲೆಬರಿಚ್ ತಾಚಿ ಜಾಣ್ವಾಯ್ ವಾಡೊನ್‌ಚ್ ಗೆಲಿ. ಹೆಂ ತಾಚ್ಯೆ ಶಿಕೊವ್ಣೆಂತ್, ಒಪಾರಿಂನಿ ಆನಿ ದಿಂವ್ಚ್ಯಾ ಜಾಪಿಂನಿ ಆಮ್ಕಾಂ ಕಳಿತ್ ಜಾತಾ. ಜೆಜುಚಿ ಜಾಣ್ವಾಯ್ ನ್ಹಯ್‌ಚ್ ಕೇವಲ್ ಬೌದ್ದಿಕ್, ಬಗಾರ್ ಮನ್ಶಾಕುಳಾಖಾತಿರ್ ದೆವಾಚಿ ಮಾಂಡಾವಳ್ ಗುಂಡಾಯೆನ್ ಸಮ್ಜೊಂಕ್ ತಶೆಂಚ್ ಮನ್ಶಾ ಜಿವಿತಾವಿಶಿಂ ಅರ್ಥ್ ಕರ್‍ಚೆವಿಶಿಂಯ್ ಮಿಸ್ಳೊನ್ ಆಸ್‌ಲ್ಲಿ. ಭರ್ವಶಾಚಿಂ ಯಾತ್ರಿಕಾಂ ಜಾವ್ನಾಸ್ಲಲಿಂ ಆಮಿ ಕೇವಲ್ ಸಂಸಾರಿ ಸಂಗ್ತಿಂಚ್ಯೆ ಜಾಣ್ತಿಕಾಯೆಕ್ ಲಬ್ದನಾಸ್ತಾಂ ಜೆಜುಬರಿ ಮಾಗ್ಣ್ಯಾ ಮುಕಾಂತ್ರ್ ದೆವಾಸಂಗಿ ಸಂಬಂದ್ ದವ್ರುನ್, ಪವಿತ್ರ್ ಅತ್ಮ್ಯಾಚ್ಯಾ ಸಾಂಗಾತ್ಪಣಾನ್ ಅತ್ಮೀಕ್ ಜಾಣ್ವಾಯೆಕ್ ಆಶೆಲ್ಯಾರ್ ಖಂಡಿತ್ ಜಾವ್ನ್ ಖರ್‍ಯೆ ಜಾಣ್ವಾಯೆನ್ ಭರ್‍ಲಲಿಂ ಜಾಂವ್ಕ್ ಸಕ್ತಾಂವ್.

ಜೆಜು ಪ್ರಾಯೆನ್ ವಾಡ್ಲೊ

“ಭುರ್ಗೊ ವಾಡೊನ್ ಯೆತಾಂ ಘಟ್‌ಮುಟ್ ಜಾಯ್ತ್ ಆಯ್ಲೊ ಆನಿ ಜಾಣ್ವಾಯೆನ್ ಭರ್‍ಲೊ, ಆನಿ ದೆವಾಚಿ ಮಜತ್ ತಾಚೆರ್ ಆಸ್ಲಿ” (ಲೂಕ್ ೨:೪೦). ಜೆಜು ಪ್ರಾಯೆನ್ ವಾಡ್ಲೊ ಮ್ಹಳ್ಯಾರ್ ಕೇವಲ್ ಕುಡಿಂತ್ ಮಾತ್ರ್ ಘಟ್‌ಮುಟ್ ನ್ಹಯ್, ಬಗಾರ್ ತಾಚೆಂ ಸಗ್ಳೆಂ ವೆಕ್ತಿತ್ವ್‌ಚ್ ವಿಕಸಿತ್ ಜಾವ್ನ್ ಆಯ್ಲೆಂ ಮ್ಹಣ್ ಅರ್ಥ್ ಕರುಂಕ್ ಜಾಯ್. ಕುಡಿಚ್ಯೆ ವಾಡಾವಳೆಸಂಗಿ ತಾಚಿ ಅತ್ಮೀಕ್ ತಶೆಂ ನಯ್ತಿಕ್ ವಾಡಾವಳ್ ಆಮಾ ಸಮೇಸ್ತಾಂಕ್ ಮೇಲ್‌ಫಂಕ್ತ್. ತಾಚೆಂ ವೆಕ್ತಿತ್ವ್ ಸರ್ವ್ ಶೆಗುಣಾಂನಿ ನೆಟಯ್ಲಲೆಂ ಆಸೊನ್, ಖಾಲ್ತೆಂಪಣ್, ಕಣ್ವಳಾಯ್ ಆನಿ ಮೊಗಾನ್ ಭರ್‍ಲಲೆಂ. ಸದಾಂಚ್ ಬಾಪಾಚಿ ಖುಶಿ ಕರ್‍ಚೆಮಾರಿಫಾತ್ ತಾಣೆಂ ವಿಂಚ್ಲಲೆಂ ನಿತಿವಂತ್ಪಣಾಚಿ ಜಿವಿತ್, ಭರ್ವಶಾಚೆ ಯಾತ್ರಿಕ್ ಜಾವ್ನಾಸ್ಚ್ಯಾ ಆಮಿ ಆಮ್ಚೆಂ ಕರುಂಕ್ ಜಾಯ್. ಆಮಿಂಯ್ ಜೆಜುಬರಿ ಸರ್ವ್ ಶೆಗುಣಾಂನಿ ಭರ್‍ಲಲೆಂ ವೆಕ್ತಿತ್ವ್ ಆಪ್ಣಾಂವ್ಕ್ ಪ್ರಯತ್ನ್ ಕರುಂಕ್ ಜಾಯ್. ಕೇವಲ್ ಲವ್ಕಿಕ್ ವಾಡಾವಳೆಕ್ ಗುಮಾನ್ ದೀನಾಸ್ತಾಂ, ಅತ್ಮೀಕ್ ತಶೆಂ ನಯ್ತಿಕ್ ವಾಡಾವಳೆಕ್‌ಯೀ ಗುಮಾನ್ ದೀವ್ನ್ ಏಕ್ ಶೆಗುಣಿಭರಿತ್ ಜಿವಿತ್ ಜಿಯೆಂವ್ಚ್ಯಾಕ್ ಜೆಜು ಖಂಡಿತ್ ಜಾವ್ನ್ ಆಮ್ಕಾಂ ಆದರ್ಶ್, ಕಿತ್ಯಾಕ್ ತೊ ಜಾವ್ನಾಸಾ ವಾಟ್, ಸತ್ ಆನಿ ಜಿವಿತ್.

ಜೆಜು ಸದಾಂಚ್ ದೆವಾಕ್ ಮಾನ್ವಾಲ್ಲೊ

ಸಗ್ಳ್ಯಾ ಜಿವಿತಾಂತ್ ಜೆಜುಕ್ ಸರ್ಗಿಂಚ್ಯಾ ಬಾಪಾಸವೆಂ ನಿರಂತರ್ ತಶೆಂ ಮೊಗಾಭರಿತ್ ಸಂಬಂದ್ ಆಸ್‌ಲ್ಲೊ. ಹ್ಯಾ ಸಂಸಾರಿಂ ಜೆಂ ಕಿತೆಂ ತೊ ಕರ್‍ತಾಲೊ, ತೆಂ ಸಗ್ಳೆಂ ಬಾಪಾಚ್ಯೆ ಪರ್ವಣ್ಗೆನ್‌ಚ್ ಕರ್‍ತಾಲೊ. “ಕಿತ್ಯಾಕ್ ಮ್ಹಜೆಸಕ್ತಿಂ ಹಾಂವ್ ಕಾಂಯ್ ಉಲಯ್ನಾ; ಹಾಂವೆಂ ಕಿತೆಂ ಸಾಂಗಜೆ ಆನಿ ಕಿತೆಂ ಉಲಯ್ಜೆ ತೆಂ ಮ್ಹಾಕಾ ಧಾಡ್ಲಲ್ಯಾ ಬಾಪಾನ್‌ಚ್ ಫರ್ಮಾಯ್ಲಾಂ” (ಜುವಾಂವ್ ೧೨:೪೯). ಹ್ಯಾ ಖಾತಿರ್ ತೊ ಆಪ್ಲ್ಯಾ ಬಾಪಾಲಾಗಿಂ ಚಡ್ ವೇಳ್ ಎಕ್ಸುರೊ ಸಾರ್‍ತಾಲೊ. “ಲೊಕಾಕ್ ಧಾಡ್ನ್ ಜಾತಚ್ ತೊ ಎಕ್ಲೊಚ್ ಮಾಗ್ಣೆಂ ಕರುಂಕ್ ಮ್ಹಣ್ ದೊಂಗ್ರಾಕ್ ಗೆಲೊ” (ಮಾತೆವ್ ೧೪:೨೩). ಪವಿತ್ರ್ ಪುಸ್ತಕಾಂತ್ ಜೆಜುಚ್ಯಾ ಮಾಗ್ಣ್ಯಾವಿಶ್ಯಾಂತ್ ಜಾಯ್ತೆ ದಾಖ್ಲೆ ಆಸಾತ್. (ಮಾರ್ಕ್ ೧೪:೨೩, ಮಾರ್ಕ್೧೪:೩೫-೩೬, ಲೂಕ್ ೬:೧೨, ೫:೭೬). ಆಪ್ಲ್ಯಾ ಬಾಪಾ ಥಂಯ್ ಸಂಪೂರ್ಣ್ ಸಮರ್ಪಣ್ ತಶೆಂ ಖಾಲ್ತೆಂಪಣ್, ಖುರ್‍ಸಾಚ್ಯಾ ಮರ್‍ಣಾ ಪರ್ಯಾಂತ್ ಆಸ್‌ಲ್ಲೆಂ. ಹ್ಯಾಚ್ ಪಾಸುನ್ ತಾಚ್ಯಾ ಪವಿತ್ರ್ ಸ್ನಾನಾವೆಳಾ ತಶೆಂ ರುಪಾಂತರಾಚ್ಯಾ ಘಡಿತಾ ವೆಳಾರ್ ತೊ ಮ್ಹಾಕಾ ಮಾನ್ವಾಲ್ಲೊ ಪೂತ್ ಮ್ಹಣ್ ದೇವ್ ಬಾಪ್ ಪರ್ಗಟ್ ಕರ್‍ತಾ. ಹ್ಯಾ ಸಂಸಾರಿಂ ಭಾವಾಡ್ತಾಚೆ ಯಾತ್ರಿಕ್ ಜಾವ್ನಾಸ್ಚೆ ಆಮಿ ಚಡ್ ಆನಿ ಚಡ್ ದೆವಾಕ್ ಲಾಗಿಂ ಜಾಂವ್ಕ್ ಪ್ರಯತ್ನ್ ಕರ್‍ಚೆಂ ಬೊವ್ ಗರ್ಜೆಚೆಂ. ಸದಾಂಚ್ ದೆವಾಚಿ ಖುಶಿ ಪಾಳುಂಕ್ ಆನಿ ಆಮ್ಕಾಂಚ್ ಸಮರ್ಪಣ್ ಕರ್‍ಚ್ಯಾಕ್ ನಿರಂತರ್ ಮಾಗ್ಣೆಂ, ತ್ಯಾಗ್ ಆನಿ ಸಾಕ್ರಿಫಿಸ್ ತಶೆಂ ಸಾಕ್ರಾಮೆಂತಾಚೆಂ ಜಿವಿತ್ ಆಮ್ಕಾಂ ಉಪ್ಕಾರ್‍ತಾ.

ಜೆಜು ಮನ್ಶಾಂಕ್ ಮಾನ್ವೊನ್ ಜಿಯೆಲೊ

ಜೆದ್ನಾ ಜೆಜು ದೆವಾಳಾಂತ್ ಉರ್‍ತಾ, ತಾಚಿ ಆವಯ್-ಬಾಪಯ್ ತಾಕಾ ಸೊಧ್ತಾತ್. ತೀನ್ ದಿಸಾಂಚ್ಯೆ ಸೊಧ್ನೆ ನಂತರ್ ತೊ ತಾಂಕಾಂ ಮೆಳ್ತಾ. ತವಳ್ ಜೆಜುಕ್ ಬಾರಾ ವರ್‍ಸಾಂಚಿ ಪ್ರಾಯ್. ಸಂಪ್ರದಾಯಾ ಪರ್ಮಾಣೆಂ ಆಪ್ಣಾಕ್ ಕಿತೆಂ ಜಾಯ್ ತೆಂ ಕರುಂಕ್ ವಾ ವಿಂಚುಂಕ್ ತಾಕಾ ಸ್ವಾತಂತ್ರ್ಯ್ ಆಸ್‌ಲ್ಲೆಂ. ಜೆಜು ದೆವಾಳಾಂತ್ ಶಿಕೊಣ್ದಾರಾಂಮದೆಂ ತರ್ಕ್ ಕರುನ್ ಆಸ್‌ಲ್ಲೊ ಶಿವಾಯ್, ಸಂಸಾರಿ ಗಜಾಲಿಂತ್ ಮಗ್ನ್ ನಾತ್‌ಲ್ಲೊ. ಪುಣ್ ಕೆದ್ನಾ ಮರಿ ತಾಕಾ ಪಾಟಿಂ ಆಪಯ್ತಾ ತೆದ್ನಾ ತೊ ಖಾಲ್ತೊ ತಸೊ ವಿಧೇಯ್ ಜಾತಾ. ಹೆಂ ಖಾಲ್ತೆಂಪಣ್ ತಶೆಂ ವಿಧೇಯ್‌ಪಣ್ ತಾಕಾ ಫುಡೆಂ ಲೊಕಾಂಮದೆಂ ತಫಾವತ್ ಕರಿನಾಸ್ತಾಂ ಭರ್‍ಸೊಂಕ್, ಗರ್ಜೆವಂತಾಂಕ್ ಪಾವೊಂಕ್, ಭುಕೆಲ್ಲ್ಯಾಂಕ್ ಜೆವಣ್ ದೀಂವ್ಕ್ ಆನಿ ಕಣ್ವಳಾಯ್ ದಾಕೊಂವ್ಕ್ ಕಾರಣ್ ಜಾತಾ. ಸಮಾಜೆಥಾವ್ನ್ ಬಹಿಶ್ಕೃತ್ ಜಾಲ್ಲ್ಯಾ ಕೊಡ್ಕಾರಾಂಕ್ ಸಯ್ತ್ ತೊ ಲಾಗಿಂ ಕರುಂಕ್ ಬಿಲ್ಕುಲ್ ಪಾಟಿಂ ಸರನಾ. ಸಮಾಜೆಂತ್ ಧಣ್ಸಲ್ಲ್ಯಾಂಕ್ ಸುಟ್ಕಾ ದಿಂವ್ಚೆಖಾತಿರ್, ಧರ್ಮಾಂತ್ಲೆಂ ಕುರ್ಡೆಂಪಣ್ ಕಾಡುನ್ ಥಂಯ್ಸರ್ ಮನ್ಶಾಪಣ್ ಹಾಡ್ಚ್ಯಾಕ್ ತೊ ಪೆಚಾಡ್ತಾ. ಶೆಕಿಂ ಖುರ್‍ಸಾರ್ ಥಾವ್ನ್ ಆಪ್ಣಾಕ್ ಖುರ್‍ಸಾಯ್ಲಲ್ಯಾ ದುಸ್ಮಾನಾಂಕ್ ಸಯ್ತ್ ಭೊಗ್ಸುಂಕ್ ತೊ ಪಾಟಿಂ ಸರನಾ. ಮನ್ಶಾಪಣ್ ನಾತ್ಲಲೆಂ ದೆವಾಸ್ಪಣ್ ಏಕ್ ಫಿತಿಸ್ಪಣ್. ಕಶ್ಟತಲ್ಯಾಂಚ್ಯಾ ಗರ್ಜಾಂಕ್ ಪಾವನಾಸ್ತಾಂ, ಕೇವಲ್ ದೇವ್‌ಮಂದಿರಾಚಿಂ ದಾರಾಂ ಮೆಜ್ಲ್ಯಾರ್ ತೊ ಪೊಕೊಳ್ಪಣಾಚೊ ಸಂಕೇತ್ ಜಾತಾ ಶಿವಾಯ್ ದೆವಾಸ್ಪಣ್ ವಾ ಅತ್ಮೀಕ್‌ಪಣಾಚೊ ನ್ಹಯ್. ಹ್ಯಾ ಸಂಸಾರಾಂತ್ ಭರ್ವಸೊ ರುತಾ ಕರುಂಕ್ ಜಾಯ್ ತರ್ ಮನ್ಶಾಪಣಾಚಿ ಗರ್ಜ್ ಆಸಾ. ಖರ್‍ಯಾ ಮೊಗಾವಿಣೆಂ ಮನ್ಶಾಪಣ್ ನಾ. ಖರ್‍ಯಾ ಮೊಗಾಚೆಂ ಆದರ್ಶ್ ಜೆಜುಥಂಯ್ ಮೆಳ್ತಾ. ಅಖ್ಖ್ಯಾ ಮನ್ಶಾಕುಳಾಚ್ಯೆ ಸೊಡ್ವಣೆಖಾತಿರ್ ಆಪ್ಣಾಚಿ ಬಲಿ ಭೆಟಯ್ಲಲ್ಯಾ ಜೆಜುಚ್ಯೆ ವಾಟೆನ್ ಮನ್ಶಾಪಣಾಚಿಂ ಮೆಟಾಂ ಚಲೊಂಯಾಂ.

ಸಂಪ್ಣಿ

ಜುವ್ಲೆವಾಚ್ಯಾ ವರ್‍ಸಾಕ್ “ಭರ್ವಶಾಚಿಂ ಯಾತ್ರಿಕಾಂ” ಜಾವ್ನ್ ತಯಾರಾಯ್ ಕರ್‍ಚ್ಯಾ ವಗ್ತಾ, ಸರ್ವ್ ಸಂಗ್ತಿಂನಿ ಸಂಪೂರ್ಣ್ ಜಾಲ್ಲೊ ಜೆಜು ಕ್ರೀಸ್ತ್ ಆಮ್ಚೆಂ ವೆಕ್ತಿತ್ವ್, ಕುಟಮ್, ಭೊಂವಾರ್ ತಶೆಂ ಸಗ್ಳೊ ಸಂಸಾರ್ ಏಕ್ ಮೊಗಾಚಿ ನಾಗರಿಕತಾ ಕಶೆಂ ಜಾವ್ನ್ ಬದ್ಲುಂಕ್ ಪ್ರೇರಣ್ ದೀಂವ್. “ಹಾಂವ್ ಆಯ್ಲಾಂ ತಾಂಕಾಂ ಜಿವಿತ್ ಮೆಳೊಂ ಮ್ಹಣ್, ಭರೊನ್ ವೊವ್ತೊಂಚ್ಯಾ ಮಾಪಾನ್ ತೆಂ ಮೆಳೊಂ ಮ್ಹಣ್” (ಜುವಾಂವ್ ೧೦:೧೦). ಆಮ್ಚೆಥಂಯ್ ಜೆಜುಚೊ ಹೊ ಭರ್ವಸೊ ತಾಚ್ಯೆಚ್ ಕುರ್ಪೆ ಮಾರಿಫಾತ್ ಪೊಂತಾಕ್ ಪಾವೊಂ.

✍️ –ಫ್ರಾದ್ ನೆಲ್ಸನ್ ಪಿಂಟೊ