ಹ್ಯಾ ಕ್ರೂರ್ ಕಾಳಾರ್
ಏಕ್ ರೊಮ್ಯಾಂಟಿಕ್ ಪದ್
ಲಿಖ್ಚೆಂ ಮ್ಹಳ್ಯಾರ್ - 
ತೊ ಹಾಂವೆಂ ಕರ್‍ಚೊ 
ಬೋವ್ ವ್ಹಡ್ ಆಪ್ರಾಧ್!

ಮೆಜಾರ್ ಹಂತುಳ್ಳಲೆಂ ಮ್ಹಜೆಂ ಪಾನ್‌ಚ್  
ಭಾಕ್ರಿ ಮ್ಹಣ್ ಚಿಂತುನ್
ಕಿಂಪ್ಚುನ್ ಖಾಂವ್ಕ್ ರಾಸ್ ಪಡ್ಚ್ಯಾ 
ನಿರ್ಗತಿಕ್ ಭುರ್ಗ್ಯಾಂಕ್ ಪಾಪ್ಡುನ್
ಥಂಯ್ಸರ್, ಚಂದ್ರ್ ನೆಕೆತ್ರಾಂಕ್ ಸಜೊಂವ್ಚೆಂ ಮ್ಹಳ್ಯಾರ್
ಹಾಂವೆಂ ಭುರ್ಗ್ಯಾಂಚಿಂ ಮಾಸಾಂ ಖೆಲ್ಲೆಬರಿಚ್... 

ಉಸ್ಕ್ಯಾರ್ ಘೆತ್‌ಲ್ಲೆಂ ಮ್ಹಜೆಂ ಪಾನ್‌ಚ್
ಲುಗಟ್ ಮ್ಹಣ್ ಚಿಂತುನ್
ಪೆಂಕ್ಡಾಕ್ ಆಡ್ ಬಾಂದುಂಕ್ ಪರಾತ್ತುಂಚ್ಯಾ
ನಾಗ್ಡ್ಯಾ ಚಲಿಯಾಂಕ್ ನಿಸ್ರಾವ್ನ್ 
ವೋಂಟ್ ಉಮೊ ವೇಂಗ್ ವರ್ಣುಂಚೆಂ ಮ್ಹಳ್ಯಾರ್
ಅತ್ತ್ಯಾಚಾರಾಂತ್ ಹಾಂವೆಂಯ್ ವಾಂಟೆಲಿ ಜಾಲ್ಲೆಬರಿಚ್...

ಹಾತಿಂ ಘೆತ್‌ಲ್ಲೆಂ ಮ್ಹಜೆಂ ಪಾನ್‌ಚ್
ಬ್ಯಾಂಡೇಜಿಚೊ ತೀರ್ ಮ್ಹಣ್ ಚಿಂತುನ್
ಘಾಯ್ ಧಾಂಪುಂಕ್ ಆಡ್ದೊಸ್ ಮಾಗ್ಚ್ಯಾ
ಘಾಯೆಲ್ಲ್ಯಾ ಝುಜಾರಿಂಕ್ ಖೊಟಾವ್ನ್ 
ಮೊಗಾಚೆಂ ಮಾವ್ನ್ ವರ್ಣುಂಚೆಂ ಮ್ಹಳ್ಯಾರ್
ಖುನಿಯೆಂತ್ ಹಾಂವ್‌ಯೀ ವಾಂಟೆಲಿ ಜಾಲ್ಲೆಬರಿಚ್...

ಹ್ಯಾ ಕ್ರೂರ್ ಕಾಳಾರ್
ಏಕ್ ರೊಮ್ಯಾಂಟಿಕ್ ಪದ್
ಲಿಖ್ಚ್ಯಾ ಮ್ಹಾಕಾ
ಸಂಸಾರಾಚಿ ಅತಿ ಘೋರ್ ಶಿಕ್ಶಾ ಫಾವೊ!