ಮನಿಸ್ ತಾಚ್ಯಾ ಗಿನ್ಯಾನಾಚೆ ಸಕ್ತೆಕ್ ಲಾಗೊನ್ ಹೆರ್ ಜಿವಿಂಪ್ರಾಸ್ ಏಕ್ ಮೇಟ್ ಮುಕಾರ್ ಆಸಾ ಮ್ಹಣ್ ಆಮಿ ಸಮ್ಜಾತಾಂವ್. ಮನಿಸ್ ಸರ್ವ್ ಸಂಗ್ತಿಂನಿ ಆಪ್ಲಿ ಚತುರಾಯ್ ದಾಕಂವ್ಕ್ ಸಕ್ತಾ. ಚಡಾವತ್ ಜಾವ್ನ್ ಕುಡಿನ್ ಸುಧೃಡ್, ಮತಿನ್ ಚತುರ್ ಆನಿ ಅತ್ಮ್ಯಾನ್ ಪ್ರಫುಲ್ಲ್ ಆಸಾ ತೊಚ್ ಚಡ್ ಭಲಾಯ್ಕೆಭರಿತ್ ಮನಿಸ್ ಮ್ಹಣ್ಯೆತ್. ತಶೆಂ ಮ್ಹಣ್ತಾನಾ, ಕುಡಿಂತ್ ಅಪಾಂಗ್ ವಾ ಮತಿನ್ ಮಂದ್ ಆಸ್ಲೆಲ್ಯಾಂಕ್ ಮನಿಸ್ ಮ್ಹಣ್ಚೆ ನಾಂವ್? ಕುಡಿನ್ ಸುಧೃಡ್ ಆಸ್ಲೆಲೆ ಕಿತ್ಲೆಶೆ ಜಣ್ ಕಿತೆಂಚ್ ಸಾಧನ್ ಕರುಂಕ್ ಜಾಯ್ನಾಸ್ತಾಂ ಉರ್‍ಲೆಲೆ ಆಸಾತ್! ಸಾಧನ್ ಸೊಡ್ಯಾಂ ಆಪ್ಲೆಂ ಜಿವಿತ್ ಸಾರ್ಕೆಂ ಜಿಯೆಂವ್ಕ್ ಸಕಾನಾತ್ಲೆ ಆಸಾತ್! ಮತಿನ್ ಚತುರ್ ಆಸ್ಲ್ಯಾರೀ ಜಿವಿತಾಂತ್ಲಿಂ ಪಂಥಾಹ್ವಾನಾಂ ಫುಡ್ ಕರ್‍ಚೆತಿತ್ಲಿ ಶ್ಯಾಥಿ ನಾಸ್ತಾನಾ ಕಶ್ಟೊಂಚೆ ಆಸಾತ್. ತರ್ ಆಮ್ಕಾಂ ಮನಿಸ್ ಜಾವ್ನ್ ಜಿವಿತ್ ಸಂಪೂರ್ಣ್ ಸಂತೊಸಾನ್ ಜಿಯೆಜೆ ತರ್ ಫಕತ್ ಸಾರ್ಕಿ ಕೂಡ್, ಬರಿ ಮತ್ ಮಾತ್ರ್ ಪಾವನಾ, ಮನ್ಶಾಚ್ಯಾ ಕಾಳ್ಜಾಂತ್ ಆತ್ಮ್‌ವಿಶ್ವಾಸಾಚೆಂ ಆಕ್ಸಿಜನ್‌ಯೀ ಭೋವ್ ಗರ್ಜ್. 

ಆತ್ಮ್‌ವಿಶ್ವಾಸ್ ಮ್ಹಳ್ಯಾರ್ ಸ್ವಸಕ್ತೆಚೆರ್, ದೆಣ್ಯಾಂಚೆರ್ ಎಕ್ಲ್ಯಾನ್ ದವರ್‍ಚೊ ಭರ್ವಸೊ. ಜಿವಿತಾಂತ್ಲಿಂ ಪಂಥಾಹ್ವಾನಾಂ ಧಯ್ರಾನ್ ಫುಡ್ ಕರ್‍ನ್ ಜಿಣ್ಯೆಚೊ ಶೆವೊಟ್ ಜೊಡುಂಕ್ ಮನ್ಶಾಕ್ ಉಭಾರ್‍ಚೊ ಪಾಕಾಟೊ ಜಾವ್ನಾಸಾ ಆತ್ಮ್‌ವಿಶ್ವಾಸ್. ಆತ್ಮ್‌ವಿಶ್ವಾಸ್ ಆಸ್ಲ್ಯಾರ್ ಖಂಯ್ಚೆಂಯ್ ಅಸಾಧ್ ಮ್ಹಳ್ಳೆಂ ಚಿಂತಪ್ ಉದೆನಾ. 

ಹ್ಯಾ ಸಂದರ್ಭಾರ್ ಅಪಾಂಗ್ ವಾ ವಿಭಿನ್ನ್ ಸಾಮರ್ಥೆಚ್ಯಾ ಭುರ್ಗ್ಯಾಂವಿಶಿಂ ಇಲ್ಲೆಂ ಗುಮಾನ್ ದಿಂವ್ಚೆಂ ಬರೆಂ. ಎಕ್ಯೆ ವ್ಯಕ್ತಿಥಂಯ್ ಕುಡಿಚಿ ವಾ ಮತಿಚಿ ಕಸಲಿಯ್ ವಾಡಾವಳ್ ಸಾರ್ಕ್ಯಾ ಪ್ರಮಾಣಾರ್ ಜಾಲಿನಾ ತರ್ ತೊ ಊಣ್ ಉಟೊನ್ ದಿಸ್ತಾ. ಥೊಡಿಂ ಜಲ್ಮಾಥಾವ್ನ್ ತಶಿಂ ಆಸ್ತಾತ್ ಆನಿ ಹೆರ್ ಥೊಡಿಂ ಥೊಡ್ಯಾ ವರ್ಸಾಂ ಉಪ್ರಾಂತ್ ಆಂಗಾಂತ್ ವಾ ಮತಿಂತ್ ಊಣ್ ಉದೆವ್ನ್ ಕಶ್ಟಾತಾತ್. ತಸಲೆ ಊಣ್ ಆಸೊನೀ ಕಾಂಯ್ಚ್ ಉಣೆಂ ನಾ ಮ್ಹಳ್ಳಿ ಮನಾಸ್ಥಿತಿ ರುತಾ ಕರುನ್ ನವಲಾಂ ಕೆಲ್ಲಿಂ ಜಾಯ್ತಿಂ ಆಸಾತ್. ತಾಂಚೊ ಆತ್ಮ್ ವಿಶ್ವಾಸ್ ಸರ್ವ್ ಸಾರ್ಕೆಂ ಆಸೊನ್, ಸವ್ಲತಾಯೊ ಆಸೊನ್, ಪಾಟಿಂಬೊ ಆಸೊನ್ ವಾಡ್‌ಲ್ಲ್ಯಾಂಕೀ ಲಜೆಕ್ ಘಾಲ್ತಾ. ಊಣ್ ಆಸ್‌ಲ್ಲೊ ಮನಿಸ್ ಉಣೊ ನ್ಹಯ್. ತೊ ಶಾಣೊ ಜಾಂವ್ಕೀ ಪುರೊ, ಆತ್ಮ್ ವಿಶ್ವಾಸ್ ಏಕ್ ಆಸ್ಲ್ಯಾರ್!

ಊಣ್ ಆಸ್ಲೆಲ್ಯಾಂಕ್ ಹೆರ್ ಕಿತೆಂಯ್ ಸಾಧನ್ ಕರ್‍ಚೆ ಪಯ್ಲೆಂ ಆಪ್ಣಾಕ್‌ಚ್ ಜಿಕೊಂಕ್ ಕಶ್ಟ್ ಮಾರ್‍ತಾತ್. ಹೆರಾಂಬರಿ ಆಪುಣ್ ನಾ ಮ್ಹಳ್ಳೆಂ ಉಣೆಪಣ್ ಮತಿಕ್ ಆದಾಳ್ತಾನಾ ಜರ್ ವ್ಹಡಿಲಾಂ ಆನಿ ಸಾಂಗಾತ್ಯಾಂಥಾವ್ನ್ ತತ್ಸಾರ್ ಮೆಳ್ಳೊ, ತರ್ ತಾಣಿಂ ಆಪ್ಲೆ ಊಣ್ ಜಿಕ್ಚೆಂ ಕಶ್ಟ್. ಜರ್ ತಿಂ ಆಪ್ಲೆ ಊಣ್ ಸ್ವೀಕಾರ್ ಕರ್‍ತಾತ್, ಮಾಗಿರ್ ತಾಂಕಾಂ ಆಡಾಂವ್ಚಿ ಕೊಣೀ ಆಸ್ಚಿಂ ನಾಂತ್. ಹೆಂ ಜಾವ್ನಾಸಾ ಕಾರ್ಭಾರ್ ಆತ್ಮ್ ವಿಶ್ವಾಸಾಚೆಂ! 

ಸುಧಾ ಚಂದ್ರನ್, ಗಾಂವಾನ್ ಮುಂಬಯ್ಚಿ. ಭರತ್‌ನಾಟ್ಯ್ ಡ್ಯಾನ್ಸರ್ ತಶೆಂಚ್ ನಟಿ. 16 ವರ್ಸಾಂ ಪ್ರಾಯೆರ್ ಅವ್ಘಡಾಕ್ ಸಾಂಪ್ಡೊನ್ ಏಕ್ ಪಾಯ್ ಹೊಗ್ಡಾಯ್ತಾ. ತಿ ನಿರಾಶಿ ಜಾಯ್ನಾ. ಖಂಯ್ಚೊ ಊಣ್ ಆಸ್ಲೊಗಿ ತೊಚ್ ಆಪ್ಲೆಂ ಬಳ್ ಕರ್‍ನ್ ಘೆವ್ನ್ ತಿ ಏಕ್ ಅಪ್ರತಿಮ್ ಭರತ್‌ನಾಟ್ಯ್ ನಾಚ್ಪಿಣ್ ಜಾತಾ. ಫಿಲ್ಮಾಂನಿ ಕಾಮ್ ಕರುಂಕ್ ಸುರು ಕರ್‍ತಾ. ತ್ಯಾಚ್ ಪರ್ಮಾಣೆಂ, ರಾಜೇಂದ್ರರ್ ಸಿಂಗ್ ರಾಹೆಲು, ಪಂಜಾಬಾಂತ್ಲೊ ಆಟ್ ವರ್‍ಸಾಂಚೊ ಭುರ್ಗೊ ಪೊಲಿಯೊ ಪಿಡೆಕ್ ಒಳಗ್ ಜಾಲೊ. ಪುಣ್ ತಾಚಿ ಆಶಾ ಆಸ್ಲಿ ಪವರ್‌ಲಿಪ್ಟಿಂಗಾಂತ್ ಸಾಧನ್ ಕರ್‍ಚಿ. ಆಜ್ ರಾಜ್ಯ್ ಆನಿ ಅಂತರಾಷ್ಟ್ರೀಯ್ ಮಟ್ಟಾರ್ ಪವರ್‌ಲಿಪ್ಟಿಗಾಂತ್ ತಾಚೆಂ ಸಾದನ್ ಆಮ್ಚೆಮುಕಾರ್ ಆಸಾ. ತಶೆಂಚ್ ಅನ್ಯೆಕ್ಲೊ ಆಸಾ, ಭೊನಿಫಾಸ್ ಪ್ರಭು. ಬೆಂಗ್ಳುರಾಂತ್ ಜಲ್ಮಾಲ್ಲೊ ತೊ ಚಾರ್ ವರ್ಸಾಂ ಪ್ರಾಯೆರ್ ಪಾಟಿಕಣ್ಯಾಚೆ ಪಿಡೆಕ್ ಲಾಗೊನ್ ವೀಲ್‌ಚೇರ್ ವಾಪಾರುಂಕ್ ಲಾಗ್ಲೊ. ವೀಲ್‌ಚೆರಾರ್ ಆಸ್ಲ್ಯಾರೀ ತೊ ಆಜ್ ಏಕ್ ಪರಿಣತ್ ಟೆನ್ನಿಸ್, ಬ್ಯಾಂಡ್‌ಮಿಂಟನ್, ಟೇಬಲ್ ಟೆನ್ನಿಸ್, ಶೂಟಿಂಗ್ ಖೆಳ್ಗಾಡಿ! ಹಾಚೆಭಾಯ್ರ್ ಸ್ಟೀಪನ್ ವಿಲಿಯಂ ಹಾಕಿಂಗ್ಸ್, ಅವನಿ ಲೆಕ್‌ಹಾರಾ, ನಿಕೋಲಸ್ ಜೇಮ್ಸ್ ಹಾಂಚೆವಿಶಿಂ ತುಮ್ಕಾಂ ಕಳಿತ್ ಆಸಾ.

ಊಣ್ ಆಸ್ಲೆಲಿಂ ಕಶೆಂ ಇತ್ಲ್ಯಾ ಉಂಚ್ಲ್ಯಾ ಪಾಂವ್ಡ್ಯಾಕ್ ಪಾವ್ಲಿಂ? ತಾಂಕಾಂ ಇತ್ಲೊ ಆತ್ಮ್ ವಿಶ್ವಾಸ್ ಆಯ್ಲೊ ಖಂಯ್ಚೊ? ಹಾಕಾ ಖಂಡಿತ್ ಕಾರಣ್ ಆಸಾತ್, ತಾಂಚಿಂ ಆವಯ್-ಬಾಪಯ್. ತಾಂಕಾಂ ಜಲ್ಮಲ್ಲೆಂ ಬಾಳ್ ವಿಕಲ್ ಚೇತನ್ ಮ್ಹಣ್ ಕಳಿತ್ ಆಸ್ಲ್ಯಾರಿ, ತಾಕಾ ಸಾಂಬಾಳ್ಚೆಂ ಭೋವ್ ಕಶ್ಟಾಂಚೆ ಮ್ಹಣ್ ಜಾಣಾಸೊನೀ ತಾಣಿಂ ಆತ್ಮ್ ವಿಶ್ವಾಸ್ ಹೊಗ್ಡಾಂವ್ಕ್ ನಾ. ತಿಂ ಗುಪ್ತಿಂ ನಶಿಬಾಕ್ ಪುರ್ಪುರ್‍ಲ್ಯಾಂತ್ ಆಸ್ಯೆತ್, ನಿರಾಶೆನ್ ದುಕಾಂನಿ ರಾತಿ ಪಾಶಾರ್ ಕೆಲ್ಯಾತ್ ಆಸ್ಯೆತ್. ಪುಣ್ ತಾಣಿಂ ಆಪ್ಲ್ಯಾ ಅಪಾಂಗ್ ಭುರ್ಗ್ಯಾಂಕ್ ಲ್ಹಾನ್ ಕರುನ್ ಪಳೆಂವ್ಕ್ ನಾ. ಸಮಾನ್ ಮಾನ್ ಆನಿ ಗವ್ರವಾನ್ ಲೆಕ್ಲಾಂ. ತಸಲ್ಯಾ ವ್ಹಡಿಲಾಂಚೆ ಆಮಿ ಪಾಂಯ್ ಧುಂವ್ಕ್ ಫಾವೊ. ಅಪಾಂಗ್ ಭುರ್ಗ್ಯಾಂಕ್ ತಾಂಚಿಂ ಆವಯ್-ಬಾಪಯ್ ವಾ ಪೊಸ್ಕಿ ವ್ಹಡಿಲಾಂಚ್ ಆತ್ಮ್ ವಿಶ್ವಾಸ್! ಅಸಲ್ಯಾ ವ್ಹಡಿಲಾಂನಿ ಕರ್‍ಚ್ಯಾ ನವಲಾಂ ಮುಕಾರ್ ಆಮ್ಚೆಂ ಹೆರ್ ಸಗ್ಳೆಂ ಗರ್ವಾಚೆಂ ಸಾಧನ್ ನಗಣ್ಯ್.

ಅಸಲ್ಯಾ ಅಗಾಧ್ ಆತ್ಮ್ ವಿಶ್ವಾಸಾನ್ ಭರ್‍ಲೆಲ್ಯಾ ಅಪಾಂಗ್ ಭುರ್ಗ್ಯಾಂಚೆರ್, ತಾಂಚ್ಯಾ ವ್ಹಡಿಲಾಂಚೆರ್ ಹ್ಯಾ ಅಂಕ್ಯಾಂತ್ ಉಜ್ವಾಡ್ ಫಾಂಕಂವ್ಚೆಂ ಕಾಮ್ ಆಮಿ ಕೆಲಾಂ. ಹಾಚೆವರ್ವಿಂ ಥೊಡ್ಯಾ ವ್ಹಡಿಲಾಂಕ್ ಪುಣೀ ಭುಜ್ವಣ್ ಆನಿ ಧಯ್ರಾನ್ ಭರ್‍ಚೆಂ ಕಾಮ್ ಜಾತೆಲೆಂ ಮ್ಹಣ್ ಆಮಿ ಭರ್ವಸ್ತಾಂವ್.

ಫುಡ್ಲೆ ದಶೆಂಬರ್ ಆನಿ ಜನೆರಾಚೆ ಅಂಕೆ ಫೆಸ್ತಾಂಚೆ ವಿಶೇಸ್ ಅಂಕೆ ಆಸ್ತೆಲೆ. ಹ್ಯಾ ವಿಶೇಸ್ ಅಂಕ್ಯಾಂಕ್ ಜಾಯ್ರಾತ್‌ದಾರಾಂಚೊ ಆನಿ ಹಿತಚಿಂತಕಾಂಚೊ ಪಾಟಿಂಬೊ ಆಶೆತಾಂವ್.

✍️ – ಬಾಪ್ ಐವನ್ ಸೊಜ್, ಕಾರ್ಮೆಲಿತ್