ಪಾಟ್ಲ್ಯಾ ಎಕಾ ಮಹಿನ್ಯಾಂತ್ ಇಂಡಿಯಾ ಆನಿ ಪಾಕಿಸ್ತಾನಾ ವಯ್ರ್ ಮಾಂಡ್‌ಲ್ಲಿಂ ಝಜಾಚಿಂ ಕಾಳಿಂ ಮೊಡಾಂ ಸದ್ದ್ಯಾಕ್ ನಿತಳ್ ಜಾಲ್ಯಾಂತ್. ಪ್ರತ್ಯಕ್ಷ್ ರಿತಿನ್ ಝಜಾಚೆ ಪರಿಣಾಮ್ ಭೊಗುಂಕ್ ನಾತ್‌ಲ್ಲ್ಯಾ ಲೊಕಾಕ್ ಗಡಿಚೆರ್ ಜಾಂವ್ಚಿ ಹಿ ಲಡಾಯ್ ಖಂಯ್ಚೆಂಗಿ ಹಾಲಿವುಡ್ ಆಕ್ಷನ್ ಪಿಂತುರ್ ಪಳೆಯ್ಲೆಬರಿಂ ವಾ ಬಂದೂಕ್ ಘೆವ್ನ್ ವಿಡಿಯೋ ಗೇಮ್ ಖೆಳ್‌ಲ್ಲ್ಯಾ ತಿತ್ಲೊ ಚಿಲ್ಲರ್ ವಿಶಯ್. ಪೂಣ್ ಝುಜಾಂತ್ ಭಾಗ್ ಘೆಂವ್ಚ್ಯಾ ಸೊಜೆರಾಂಕ್ ಆನಿ ತಾಂಚ್ಯಾ ಕುಟ್ಮಾದಾರಾಂಕ್ ಹೊ ಜಿಣ್ಯೆ ಮರ್‍ಣಾಚೊ ಆಕ್ಲಾಸ್, ಆಪ್ಣೆ ಕೆಲ್ಲ್ಯಾ ಚುಕಿಂ ಥಾವ್ನ್ ಲಿಸಾಂವ್ ಶಿಕನಾತ್‌ಲ್ಲಿ ಏಕ್ ಮಾತ್ರ್ ಜಿವಿ ಮನಿಸ್ ಮ್ಹಳ್ಳ್ಯಾ ಉತ್ರಾಂಕ್ ಪಾಟ್ಲ್ಯಾ 78 ವರ್ಸಾಂ ಥಾವ್ನ್ ಇಂಡಿಯಾ-ಪಾಕಿಸ್ತಾನಾ ಮಧೆಂ ತವಳ್-ತವಳ್ ಜಾಂವ್ಚಿ ಹಿಂ ಝ‌ಉಜಾಂ ಸಾಕ್ಸ್. ಎದೊಳ್ ಹ್ಯಾ ದೋನ್ ರಾಶ್ಟ್ರಾಂ ಮಧೆಂ ಚಲ್‌ಲ್ಲ್ಯಾ ಪ್ರಮುಖ್ ಸಂಘರ್ಷಾಚ್ಯಾ ಘಡಿತಾಂಚೆರ್ ಝಳಕ್ ಘಾಲ್ಚೆಂ ಪ್ರೇತನ್ ಹೆಂ ಲೇಖನ್.

ಝುಜಾಚೆಂ ಪಾಟ್‌ಥಳ್

ಮನ್ಶಾಕುಳಾಚ್ಯಾ ಚರಿತ್ರೆಂತ್ ಘಡ್‌ಲ್ಲ್ಯಾ ‘ಸ್ವಯಂಕೃತ್ ಅಪ್ರಾದ್’ ಪಟ್ಟೆಂತ್ ಭಾರತ್-ಪಾಕಿಸ್ತಾನ್ ದೆಶಾಂಚೆ ವಿಭಜನ್ ಆನಿ ತಾಚ್ಯಾ ಉಪ್ರಾಂತ್ ಜಾಲ್ಲೊ ವಿನಾಶ್‌ಕಾರಿ ಬೊಂಗೊಸ್ತಳ್ ಪ್ರಮುಖ್ ಸ್ಥಾನ್ ಘೆತಾ. ಮಹಮ್ಮದ್ ಅಲಿಜಿನ್ನಾ ಮ್ಹಳ್ಳ್ಯಾ ಏಕ್ ಸ್ವಾರ್ಥಿ ಆನಿ ಮೂರ್ಖ್ ಮುಖೆಲ್ಯಾಚ್ಯಾ ಹಠಾಕ್ ಲಾಗುನ್ 1947 ಆಗಸ್ಟ್ 14 ತಾರಿಕೆರ್ ಪಾಕಿಸ್ತಾನ್ ಆಮ್ಚ್ಯಾ ದೇಶಾ ಥಾವ್ನ್ ವಿಂಗಡ್ ಜಾಲೆಂ. ಹ್ಯಾ ಸಂದರ್ಭಾರ್ ಸುಮಾರ್ 565 ಪ್ರಾಂತ್ಯಾಂಚ್ಯಾ ತುಂಡು ರಾಯಾಂಕ್, ಖಂಚ್ಯಾ ದೇಶಾಕ್ ಮೆಳಂವ್ಚೆಂ ಮ್ಹಣ್ ನಿರ್ಧಾರ್ ಘೆಂವ್ಕ್ ಆಸ್‌ಲ್ಲೊ. ಸರ್ದಾರ್ ವಲ್ಲಬ್‌ಭಾಯಿ ಪಟೇಲಾಚೆಂ ಯೋಜನ್ ಮಾನುನ್ ಘೆವ್ನ್ ಜಾಯ್ತೆ ರಾಯ್, ತಾಂಚೆಂ ರಾಜ್ಯ್ ಭಾರತಾಂತ್‌ಚ್ ಉರ್‍ತೆಲೆಂ ಮ್ಹಳ್ಳ್ಯಾ ತೀರ್ಮಾನಾಕ್ ಆಯ್ಲೆ ತರ್ ಆನಿ ಥೊಡೆ ರಾಜ್ಯ್ ಪಾಕಿಸ್ತಾನಾಚ್ಯಾ ವಾಂಟ್ಯಾಕ್ ಮೆಳ್ಳೆ. ಪುಣ್ ಪ್ರಧಾನ್ ಸಮಸ್ಸೊ ಆಸ್‌ಲ್ಲೊ ಜಮ್ಮು ಕಾಶ್ಮೀರ್ ರಾಜ್ಯಾಂತ್. ಹ್ಯಾ ರಾಜ್ಯಾಂತ್ ಬಹುಸಂಖ್ಯಾತ್ ಮುಸ್ಲಿಂ ಲೋಕ್ ಆಸ್‌ಲ್ಲೊ ತರ್, ಹಾಂಗಾಚಿ ರಾಜ್ವಟ್ಕಿ ರಾಜಾ ಹರಿಸಿಂಗ್ ಮ್ಹಳ್ಳ್ಯಾ ಹಿಂದೂ ರಾಯಾಚ್ಯಾ ಹಾತಾಂತ್ ಆಸ್‌ಲ್ಲಿ. “ಮುಸ್ಲಿಮಾಂಚೆಂ ಬಳ್ ಆಸ್‌ಲ್ಲ್ಯಾ ಪಾಕಿಸ್ತಾನಾಂತ್ ಆಪ್ಣಾಕ್ ಬಚಾವಿ ನಾ ತರ್ ಪ್ರಜಾಪ್ರಭುತ್ವ್ ಮಾನುನ್ ಘೆಂವ್ಕ್ ತಯಾರ್ ಜಾಲ್ಲ್ಯಾ ಭಾರತಾಂತ್ ಆಪುಣ್ ರಾಯ್ ಜಾವ್ನ್ ಉರ್‍ಚೊನಾ” ಮ್ಹಣ್ ಸಮ್ಜಲ್ಲ್ಯಾ ಹರಿಸಿಂಗಾನ್ ಆಪ್ಲೊ ರಾಜ್ಯ್ ಕಾಶ್ಮೀರ್ ಖಂಯ್ಚ್ಯಾಕ್ ದೆಶಾಕ್ ಸೆರ್‍ವಾನಾಸ್ತಾನಾ, ಏಕ್ ಸ್ವಾಯತ್ತ್ ಪ್ರದೇಶ್ ಜಾವ್ನ್ ಉರ್‍ತಲೊ ಮ್ಹಳ್ಳೊ ವಿಚಿತ್ರ್ ನಿರ್ಧಾರ್ ಘೆತ್ಲೊ.

1947 ಇಂಡೋ ಪಾಕ್ ಪಯ್ಲೆಂ ಝುಜ್

ದೋನ್ ದೆಶಾಂ ಮಧೆಂ ‘ಸ್ಯಾಂಡ್‌ವಿಚ್’ ಜಾವ್ನ್ ಆಪ್ಣಾಚಿ ಅಸ್ಮಿತಾಯ್ ರಾಕೊನ್ ವ್ಹರ್‍ತಾಂ ಮ್ಹಳ್ಳೊ ಹರಿಸಿಂಗಾಚೊ ನಿರ್ಧಾರ್ ಚೂಕ್ ಮ್ಹಣ್ ಸಮ್ಜುಂಕ್ ಚಡ್ ವೇಳ್ ಲಾಗೊಂಕ್ ನಾ. ಭಾರತ್-ಪಾಕಿಸ್ತಾನ್ ವಿಭಜನಾಚ್ಯಾ ದೋನ್ಂಚ್ ಮ್ಹಯ್ನಾಂ ಭಿತರ್ ಮ್ಹಣ್ಜೆ 1947 ಅಕ್ಟೋಬರಾಂತ್ ಪಾಕಿಸ್ತಾನ್ ಸಯ್ನಾನ್ ಕಾಶ್ಮೀರಾಚೆರ್ ಧಾಡ್ ಘಾಲಿ. ದುಸ್ರಿ ವಾಟ್ ನಾಸ್ತಾನಾ ರಾಜಾ ಹರಿಸಿಂಗನ್ ಕಾಶ್ಮೀರ್ ಭಾರತಾಕ್ ಸೆರ್‍ವೊಂಕ್ ದಸ್ಕತ್ ಘಾಲಿ. ಭಾರತೀಯ್ ಸರ್ಕಾರಾನ್ ಆಪ್ಲೆಂ ಸಯ್ನ್ ಕಾಶ್ಮೀರಾಕ್ ಧಾಡ್ನ್ ಪಾಕಿಸ್ತಾನಿ ಸಯ್ನ್ಯಾಕ್ ಥಂಯ್ ಥಾವ್ನ್ ಭಾಯ್ರ್ ಧಾಂವ್ಡಾಂವ್ಚೆಂ ಕಾಮ್ ಸುರ್‍ವಾತ್ಲೆಂ. ಏಕ್ ವರಸ್ ಆನಿ ದೋನ್ ಮ್ಹಯ್ನೆಂ ಚಲ್‌ಲ್ಲೆಂ ಹೆಂ ಝುಜ್ ವಿಶ್ವ್‌ಸಂಸ್ಥ್ಯಾನ್ ಕೆಲ್ಲ್ಯಾ ಪಂಚಾಯ್ತೆಕ್ ಲಾಗುನ್ 1949 ಜನೆರ್ ಮ್ಹಯ್ನಾಂತ್ ಸಂಪ್ಲೆಂ. CEASE FIRE ಘೋಷಿತ್ ಜಾಲ್ಲ್ಯಾನ್ ಕೊಣಾಚ್ಯಾ ವಾಂಟ್ಯಾಕ್ ಕಿತ್ಲಿ ಭುಂಯ್ ಮೆಳ್ಳ್ಯಾ ತಿ ತಾಣಿಂ ದವರ್‍ನ್ ಘೆಂವ್ಚಿ ಆನಿ Line of Control (LOC) ಮ್ಹಳ್ಳಿ ಗಡ್ ದೊನೀ ದೆಶಾಂನಿ ಮಾನುನ್ ಘೆಂವ್ಕ್ ವಿಶ್ವ್‌ಸಂಸ್ಥಾನ್ ಠರಾಯ್ಲೆಂ. ಹಾಚ್ಯಾ ಪರ್ಮಾಣೆಂ ಕಾಶ್ಮೀರಾಚೊ ತಿನಾಂತ್ಲೊ ದೋನ್ ವಾಂಟೊ (2/3) ಭಾರತಾಕ್ ಲಾಭ್ಲೊ ತರ್ ಉರ್‌ಲ್ಲೊ ಏಕ್ ವಾಂಟೊ ಪಾಕಿಸ್ತಾನಾನ್ ಭಿತರ್ ಘಾಲ್ನ್ ಸೊಡ್ಲೊ. ಹ್ಯಾ ವಾಂಟ್ಯಾಕ್ ಆಜ್ ಆಮಿ ಪಾಕ್ ಅಕ್ರಮಿತ್ ಕಾಶ್ಮೀರ್ (POK- Pakistan Occupied Kashmir) ಮ್ಹಣ್ತಾಂವ್ ತರ್, ಪಾಕಿಸ್ತಾನಾನ್ ಹಾಕಾ ‘ಆಜಾದ್ ಕಾಶ್ಮೀರ್’ ಮ್ಹಣ್ ವೊಲಾಯ್ಲಾಂ. ‘ಫೀಲ್ಡ್ ಮಾರ್ಷಲ್, ಕೆ.ಎಮ್.ಕಾರ್ಯಪ್ಪಚ್ಯಾ ಮುಖೆಲ್ಪಣಾನ್ ಆಮಿ ಕಾಶ್ಮೀರ್ ಉರೊಂವ್ಕ್ ಸಕ್ಲ್ಯಾಂವ್ ತರ್ ಬ್ರಿಟಿಷಾಂಚಿ Divide and Rule ಸವಯ್ ಪರ್ತ್ಯಾನ್ ಆಮ್ಕಾಂ ಮಾರಗ್ ಪಡ್ಲಿ. ದೆಶಾಕ್ ಸುಟ್ಕಾ ಮೆಳ್‌ಲ್ಲಿ ಮಾತ್ರ್ ಜಾಲ್ಲ್ಯಾನ್ ದೋನ್‌ಯಿ ದೆಶಾಚ್ಯಾ ಸಯ್ನಾಂತ್ ಬ್ರಿಟಿಶ್ ಅಧಿಕಾರಿಚ್ ಆಸೊನ್, ಎಕಾಮೆಕಾ ಸಾಬೊವ್ನ್ ಪಡೊಂಕ್ ತಾಣಿಂಚ್ ಯೋಜನ್ ಘಾಲ್ಲೆಂ ಮ್ಹಳ್ಳೊ ಆರೋಪ್ ಅಜೂನ್ ಆಯ್ಕೊಂಕ್ ಮೆಳ್ತಾ.

1965: ದುಸ್ರೆಂ ಇಂಡೋ-ಪಾಕ್ ಝುಜ್

1962ಂತ್ ಚಲ್‌ಲ್ಲ್ಯಾ ಚೈನಾ ಝುಜಾಂತ್ ಸಲ್ವಲ್ಲ್ಯಾ ಆಮ್ಚ್ಯಾ ದೇಶಾಚ್ಯಾ ಸೈನ್ಯಾಂತ್, ಝಜಾಚಿಂ ಹಾತೆರಾಂ ನವೀಕೃತ್ ಕರ್‍ಚೆಂ ಕಾಮ್ ಚಲೊನ್ ಆಸ್‌ಲ್ಲೆಂ. ಹೆಣೆಂ 1960 ಇಸ್ವೆಂತ್ ಪಾಕಿಸ್ತಾನಾಕ್ ಅಂತಾರಾಶ್ಟ್ರೀಯ್ ಕುಮಕ್ ಮ್ಹಳ್ಳಾ ನಿಬಾನ್ ಅಮೇರಿಕಾ ಥಾವ್ನ್ 700 ಮಿಲಿಯನ್ ಡಾಲರಾಚೊ ಪೆರ್ಗೊ ಮೆಳ್‌ಲ್ಲೊ. ಹಾಚ್ಯಾ ಬಳಾನ್ ಪಾಕಿಸ್ತಾನ್, ಕಾಶ್ಮೀರಾಚೊ ವಿಶಯ್ ಮುಕಾರ್ ದವರ್‍ನ್ ಪರತ್ ಝುಜಾಕ್ ದೆವ್ಲೆಂ. ಉಡಾಸ್ ಆಸೊಂದಿ, 1947 ಚ್ಯಾ ಪಯ್ಲ್ಯಾ ಝುಜಾ ಉಪ್ರಾಂತ್ ಕಾಶ್ಮೀರಾಚಾ ಸಮಸ್ಯಾಕ್ ಶಾಶ್ವಿತ್ ಪರಿಹಾರ್ ದಿಂವ್ಚ್ಯಾಕ್ ಥಂಯ್ ಏಕ್ Pಐ‌ಇಃISಅIಖಿ‌ಇ ವಾ ಕಾಶ್ಮೀರಿ ಲೊಕಾಂನಿ ಆಪ್ಲೊ ಮತ್ ಘಾಲ್ನ್ ತಾಂಕಾ ಇಂಡಿಯಾ ವಾ ಪಾಕಿಸ್ತಾನಾ ಸಾಂಗಾತಾ ರಾವುಂಕ್ ಜಾಯ್ ಮ್ಹಣ್ ನಿರ್ಧಾರ್ ಘೆಂವ್ಕ್ ಆವ್ಕಾಸ್ ದಿಂವ್ಚೊ ಪ್ರಸ್ತಾಪ್ ವಿಶ್ವ್‌ಸಂಸ್ಥ್ಯಾನ್ ಸೂಚನಾ ರುಪಾರ್ ದಿಲ್ಲೊ. ಪೂಣ್ ಹೊ ಪ್ರಾಯೋಗಿಕ್ ರಿತಿನ್ ಜ್ಯಾರಿ ಜಾಂವ್ಕ್ ನಾ ದೆಕುನ್, 1965 ಇಸ್ವೆಂತ್ ಪಾಕಿಸ್ತಾನಾಚೊ ಅಧ್ಯಕ್ಷ್ ಆನಿ ಮಿಲಿಟ್ರಿ ಸರ್ವಾಧಿಕಾರಿ ಆಯೂಬ್ ಖಾನಾನ್ ಝುಜ್ ಮಾಂಡ್ಚೆಂ ಪಿಶೆಂಪಣ್ ದಾಕಯ್ಲೆಂ. ಪೂಣ್ 17 ದಿಸಾಂ ಭಿತರ್ ಅಮೇರಿಕಾ ಆನಿ ರಶ್ಯಾ ದೇಶಾಂಚ್ಯಾ ಮುಖೆಲ್ಪಣಾ ಖಾಲ್ ಭಾರತ್-ಪಾಕಿಸ್ತಾನಾಚೆಂ ರಾಜಿಸಂಧಾನ್ ನಖ್ಖಿ ಜಾಲ್ಲೆಂ. ಉಜ್ಯೆಕಿಸ್ತಾನಾಚ್ಯಾ ತಾಷ್ಕೆಂಟ್ ಶಹರಾಂತ್ ಜಾಲ್ಲ್ಯಾ ಹ್ಯಾ ಅಧಿಕೃತ್ ರಾಜಿಸಂಧಾನಾಕ್ ದಸ್ಕತ್ ಘಾಲ್ಲ್ಯಾ ದುಸ್ರ್ಯಾಚ್ ದಿಸಾ ಭಾರತೀಯ್ ಪ್ರಧಾನಿ ಲಾಲ್ ಬಹಾದ್ದೂರ್ ಶಾಸ್ತ್ರಿ ಕಾಳ್ಜಾಘಾತಾಕ್ ಬಲಿ ಜಾಲೊ.

1971: ಬಾಂಗ್ಲಾದೇಶ್ ವಿಮೋಚನಾಚೆಂ ಝುಜ್

“ಅರ್‍ಸ್ಯಾಚ್ಯಾ ಘರಾ ಜಿಯೆತೆಲ್ಯೆ ವ್ಯಕ್ತಿನ್ ಸೆಜಾರ್‍ಚ್ಯಾ ಘರಾ ಫಾತೊರ್ ಮಾರುಂಕ್ ವಚುಂಕ್ ನಜೊ” ಮ್ಹಳ್ಳ್ಯಾ ಉತ್ರಾಂಕ್ ಪಾಕಿಸ್ತಾನ್ ಖರಿ ರುಜ್ವಾತ್. 1947 ಇಸ್ವೆಂತ್ ಹೊ ದೇಶ್ ಜಲ್ಮಲ್ಲ್ಯಾ ಥಾವ್ನ್ ಆಜ್ ಮ್ಹಣಾಸರ್ ಒಟ್ಟುಕ್ 23 ಪ್ರಧಾನಿ ಹ್ಯಾ ದೆಶಾಕ್ ಲಾಭ್ಲ್ಯಾತ್. ಪೂಣ್ ಹಾಂಚ್ಯಾ ಪಯ್ಕಿ ಕೊಣ್ ಎಕ್ಲ್ಯಾನ್ ಆಪ್ಲಿ ಪಾಂಚ್ ವರ್ಸಾಚಿ ಆವ್ದಿ ಸಂಪೂರ್ಣ್ ಕೆಲ್ಲಿ ನಾ. 1970 ಇಸ್ವೆಂತ್ ಲಗ್ಬಗ್ ಅಶೆಂಚ್ ಘಡ್ಲೆಂ. ಪಾಕಿಸ್ತಾನಾಚ್ಯಾ ಜೆರಾಲ್ ಎಲಿಸಾಂವಾಂತ್ ಶೇಕ್ ಮುಜಿಬುರ್ ರೆಹಮಾನಾಚ್ಯಾ ‘ಅವಾಮಿ ಲೀಗ್’ ಪಾಡ್ತೆಕ್, ಪೂರ್ವ್ ಪಾಕಿಸ್ತಾನ್ ಪ್ರಾಂತ್ಯಾಂತ್ (ಆತಾಂಚೆ ಬಾಂಗ್ಲಾದೇಶ್) ಸಂಪೂರ್ಣ್ ಬೊವ್‌ಮತ್ ಲಾಭ್ಲೊ. ಲೊಕಾನ್ ದಿಲ್ಲ್ಯಾ ಆದೇಶಾ ಖಾಲ್ ತಾಣೆಂ ದೆಶಾಚೊ ಪ್ರಧಾನಿ ಜಾಯ್ಜೆಯ್ ಆಸ್‌ಲ್ಲೆಂ. ಪುಣ್ ತೆದಾಳಾಚೊ ಪಾಕಿಸ್ತಾನಿ ರಾಶ್ಟ್ರಪತಿ ಜುಲ್ಫಿಕರ್ ಅಲಿ ಬುಟ್ಟೊ ಆನಿ ಮಿಲಿಟ್ರಿ ಸವಾರ್ಧಿಕಾರಿ ಯಾಯಾ ಖಾನ್ ಹಾಕಾ ವಿರೋಧ್ ಆಸ್‌ಲ್ಲೆ. ಕಿತ್ಯಾಕ್ ಮುಜಿಬುರ್ ರೆಹಮಾನ್ ಕಾಳ್ಯಾ ರಂಗಾಚ್ಯಾ ಬೆಂಗಾಲಿ ಉಲಂವ್ಚ್ಯಾ ಲೊಕಾಚೊ ಪ್ರತಿನಿಧಿ ತರ್ ಪಶ್ಚಿಮ್ ಪ್ರಾಂತ್ಯಾಚೆ ಪಾಕಿಸ್ತಾನಿ ಗೊರೆ ಪಠಾನ್ ಜಾವ್ನಾಸುನ್ ಉರ್ದು ಉಲಯ್ತಲೆ. ಹ್ಯಾ ಆಶೀರ್ ಚಿಂತ್ಪಾನ್ ಬೆಂಗಾಲಿ ಲೊಕಾಚೊ ಅಧಿಕಾರ್ ಹುಮ್ಟುನ್ ಕಾಡುಂಕ್ ಅಪರೇಶನ್ ಸಚ್‌ಲೈಟ್ ನಾಂವಾನ್ ಯಾಯಾ ಖಾನಾನ್ ಪಾಕಿಸ್ತಾನಿ ಸಯ್ನಾಕ್ ಪೂರ್ವ್ ಪಾಕಿಸ್ತಾನಾಕ್ ಧಾಡ್ಲೆಂ. ತ್ಯಾ ಭಿರಾಂಕುಳ್ ಆನಿ ಕ್ರೂರ್ ಸೈನಿಕಾಂನಿ ಆಪ್ಲ್ಯಾಚ್ ದೇಶಾಚ್ಯಾ 3 ಲಾಕ್ ಲೊಕಾಕ್ ಅತ್ಯಾಚಾರ್ ಕರ್‍ನ್ ಜಿವೆಶಿಂ ಮಾರ್‍ಲೆಂ. ದೆದೆಸ್ಪೊರ್ ಜಾಲ್ಲೊ ಸುಮಾರ್ 1 ಕೊರೊಡ್ ನಿರಾಶ್ರಿತ್ ಲೋಕ್ ಪೂರ್ವ್ ಪಾಕಿಸ್ತಾನಾ ಥಾವ್ನ್ ಪೊಳ್ನ್ ಧಾಂವುನ್ ಭಾರತಾಚ್ಯಾ ಪಶ್ಚಿಮ್ ಬಂಗಾಲ್, ಅಸ್ಸಾಂ, ತ್ರಿಪುರಾ ರಾಜ್ಯಾಂತ್ ಯೇಂವ್ಕ್ ಪ್ರಾರಂಭ್ ಜಾಲೊ. ಇತ್ಲ್ಯಾ ವ್ಹಡ್ ಸಂಖ್ಯಾನ್ ಆಸ್‌ಲ್ಲ್ಯಾ ನಿರಾಶ್ರಿತಾಂಕ್ ಭಾರತಾಂತ್ ಆಸ್ರೊ ದಿಂವ್ಚೆಂ ಕಾಮ್ ಅಸಾಧ್ ಮ್ಹಣ್ ಸಮ್ಜಲ್ಲಿ ಪ್ರಧಾನಿ ಇಂದಿರಾ ಗಾಂಧಿನ್ ‘ಮುಕ್ತಿ ವಾಹಿನಿ’ ನಾಂವಾನ್ ಹ್ಯಾ ಬೆಂಗಾಲಿ ಲೊಕಾಕ್ ಪಾಕಿಸ್ತಾನಿ ಸಯ್ನಾ ವಿರೋಧ್ ಝಜೊಂಕ್ ಹಾತೆರಾಂ ಆನಿ ತರ್‍ಭೆತಿ ದಿಲಿ.

ಹಾಚಿ ಖಬರ್ ಮೆಳ್‌ಲ್ಲ್ಯಾ ಪಾಕಿಸ್ತಾನ್ 1971 ಚ್ಯಾ ದಶಂಬ್ರ್ 3 ತಾರಿಕೆರ್ ‘ಆಪರೇಶನ್ ಚೆಂಗಿಸ್ ಖಾನ್’ ನಾಂವಾನ್ ಭಾರತೀಯ್ ವೈಮಾನಿಕ್ ಕೇಂದ್ರಾಂ ವಯ್ರ್ ಬಾಂಬ್ ಘಾಲುಂಕ್ ಸುರು ಕೆಲೆಂ. ಇಂದಿರಾಗಾಂಧಿನ್ ಆಕಾಶ್‌ವಾಣಿ ರೇಡಿಯೊ ಮುಖಾಂತ್ರ್ ಲೊಕಾಕ್ ಝಜ್ ಸುರ್‍ವಾತ್ಲಾಂ ಮ್ಹಣ್ ಕಳಯ್ಲೆಂ. ಹ್ಯಾ ಸಂಧರ್ಭಾರ್ ಮಂಗ್ಳುರಾಂತ್ ಸಯ್ತ್ ರಾತಿಚೆ ವೀಜ್ ದಿವೆ ಪಾಲ್ವೊನ್ ಲೋಕ್ ಭಿಯಾನ್ ಕಾಳೊಕಾಂತ್ ಬಸ್ತಲೊ ಮ್ಹಣ್ ಆಮ್ಚೆ ಮಾಲ್ಘಡೆ ಉಡಾಸ್ ಕಾಡ್ತಾತ್. ಹ್ಯಾ ಝಜಾಂತ್ ಭಾರತೀಯ್ ಸೈನ್ಯಾನ್ ಆಪ್ಲೆಂ ಪರಾಕ್ರಮ್ ಪರ್ತ್ಯಾನ್ ದಾಕಯ್ಲೆಂ. ರಾಜಸ್ತಾನ್‌ಚ್ಯಾ ಮರುಭೂಮಿಂತ್ಲಾ ಲೊಂಗೆವಾಲಾ ಮ್ಹಳ್ಳ್ಯಾ ಜಾಗ್ಯಾಂತ್ 2000 ಪಾಕಿಸ್ತಾನಿ ಸೈನಿಕಾನಿಂ ಆಪ್ಲ್ಯಾ ಮಿಲಿಟ್ರಿ ಟ್ಯಾಂಕಾ ಸವೆಂ ಧಾಡ್ ಘಾಲ್ಲ್ಯಾ ವೆಳಾರ್, ಥಂಯ್ ಆಸ್‌ಲ್ಲ್ಯಾ ಕೇವಲ್ 120 ಭಾರತೀಯ್ ಸೊಜೆರಾನಿಂ ಪಾಕಿಸ್ತಾನಿ ಸೊಜೆರಾಂಕ್ ಧರ್‍ಣಿಕ್ ಶೆವ್ಟಾಯ್ಲೆಂ. ಹ್ಯಾ ಘಡಿತಾಚೆರ್ ಆಧಾರಿತ್ ಸನ್ನಿ ಡಿಯೋಲ್ ಆನಿ ಸುನೀಲ್ ಶೆಟ್ಟಿನ್ ನಟನ್ ಕೆಲ್ಲೆಂ. ‘ಬೋರ್ಡರ್’ ಹಿಂದಿ ಪಿಂತುರ್ ಮುಕ್ಲ್ಯಾ ವರ್‍ಸಾನಿಂ ಲೊಕಾ ಮೊಗಾಳ್ ಜಾಲೆಂ. ಅಶೆಂ ಫಿಲ್ಡ್ ಮಾರ್ಷಲ್ ಸ್ಯಾಮ್ ಮಾಣಿಕ್ ಶಾಚ್ಯಾ ಮುಖೆಲ್ಪಣಾನ್ ಆನಿ ಇಂಧಿರಾ ಗಾಂದಿಚ್ಯಾ ದೃಡ್ ನಿರ್ಧಾರಾನ್ ಕೇವಲ್ 13 ದಿಸಾನಿಂ ಭಾರತೀಯ್ ಸೈನ್ಯಾನ್ ಪಾಕಿಸ್ತಾನಾಚೆ ದೋನ್ ವಾಂಟೆ ಕರ್‍ನ್ ಸೊಡ್ಲೆ. ಪೂರ್ವ್ ಪಾಕಿಸ್ತಾನ್ ಬಾಂಗ್ಲಾದೇಶ್ ಮ್ಹಳ್ಳೊ ನವೊ ದೇಶ್ ಜಾಲೊ. 93000 ಪಾಕಿಸ್ತಾನಿ ಸೊಜೆರ್ ಪರ್ಗಟ್ ರಿತಿನ್ ಭಾರತೀಯ್ ಸೈನ್ಯಾ ಮುಕಾರ್ ಶರಣಾಗತ್ ಜಾಂವ್ಚಿ ತಸ್ವೀರ್ ಆಜೂನ್ ಮಾಧ್ಯಮಾನಿಂ ಪಳೆಂವ್ಕ್ ಮೆಳ್ತಾ. ಹ್ಯಾ ಝಜಾ ಉಪ್ರಾಂತ್ ಆನಿ ಮುಕಾರ್ ಎಕಾಮೆಕಾಚ್ಯಾ ರಗ್ಳ್ಯಾಕ್ ವಚನಾಂವ್ ಮ್ಹಣ್ ದೋನ್‌ಯಿ ದೇಶಾನಿಂ ಶಿಮ್ಲಾ ಅಗ್ರಿಮೆಂಟ್ ಕೆಲೆಂ. ಹೆಂ ಝಜ್ ಜಿಕ್‌ಲ್ಲೊ ಫಾಯ್ದೊ ಉಟವ್ನ್ ಇಂದಿರಾ ಗಾಂಧಿನ್ ಕಾಶ್ಮೀರಾಚೊ ವಿವಾದ್ ಪರಿಹಾರ್ ಕೆಲ್ಲೊ ತರ್ ಆಜ್ ಇತ್ಲಿ ವೀದ್-ವಾವ್ಳಿ ಜಾತಿನಾ ಮ್ಹಣ್ ಥೊಡೊ ಲೋಕ್ ಶಿಣ್ ಉಚಾರ್‍ತಾ. ಹ್ಯಾಚ್ ವಗ್ತಾ ಬಹುಸಂಖ್ಯಾತ್ ಬೆಂಗಾಲಿ ಲೊಕಾನ್ (ಲಗ್ಬಗ್ 7 ಕೊರೊಡ್) ಅಲ್ಪಸಂಖ್ಯಾತ್ ಪಾಕಿಸ್ತಾನಿ ಲೊಕಾ ಥಾವ್ನ್ (ಲಗ್ಬಗ್ 5 ಕೊರೊಡ್ ಪಾಕಿಸ್ತಾನಿ) ಆಪ್ಣಾಕ್ ಸುಟ್ಕಾ ಜಾಯ್ ಮ್ಹಣ್ ವಿಚಾರ್‍ಲೆಲ್ಲ್ಯಾ ವಿಚಿತ್ರ್ ಘಡಿತಾಕ್ ಹೆಂ ಝಜ್ ಏಕ್ ನಿದರ್ಶನ್.

1999 ಕಾರ್ಗಿಲ್ ಝುಜ್

ಹ್ಯಾ ಝುಜಾಕ್ ಪಾವ್ತಾನಾ ದೋನ್‌ಯಿ ರಾಷ್ಟ್ರಾಂಚ್ಯಾ ಹಾತಾಂಕ್ ನ್ಯೂಕ್ಲಿಯರ್ ಬಾಂಬ್ ಆಸ್‌ಲ್ಲೆ. ಭಾರತಾನ್ ಪೋಖ್ರಾನ್ ನ್ಯೂಕ್ಲಿಯರ್ ಪರೀಕ್ಷಾ 1974 ಇಸ್ವೆಂತ್ ಕೆಲ್ಲಿ ತರ್ 1998 ಇಸ್ವೆಂತ್ ‘ಮಾಂಕ್ಡಾಚ್ಯಾ ಹಾತಾಂತ್ ಮಾಣಿಕ್’ ಮ್ಹಳ್ಳೆಪರಿಂ ಪಾಕಿಸ್ತಾನಾಕ್ ಸಯ್ತ್ ಹೊ ಆಣ್ವಸ್ತ್ ಲಾಭ್‌ಲ್ಲೊ. 1999  ಇಸ್ವೆಂತ್ ಭಾರತೀಯ್ ಪ್ರಧಾನಿ ಆಟಲ್ ಬಿಹಾರಿ ವಾಜಪೇಯಿ, ಭಾವ್ ಭಾಂದವ್ಪಣಾಚ್ಯಾ ಇರಾದ್ಯಾನ್ ಆಮ್ಚ್ಯಾ ದೇಶಾಚ್ಯಾ ಊಂಚ್ಲ್ಯಾ ಕಲಾಕಾರಾಂಕ್ ಘೆವ್ನ್ ಅಮೃತ್‌ಸರಾಥಾವ್ನ್ ಲಾಹೋರ್ ಪರ್‍ಯಾಂತ್ ಬಸ್ಸಾರ್ ಪಯ್ಣ್ ಕರ್‍ನ್ ಗೆಲೊ. ಪಾಕಿಸ್ತಾನಾಚೊ ಪ್ರಧಾನಿ ನವಾಜ ಶರೀಫ್ ಸಾಂಗಾತಾ ‘ಲಾಹೋರ್ ಡೆಕ್ಲರೇಶನ್’ಕ್ ದಸ್ಕತ್ ಘಾಲ್ನ್ ವಾಜಪೇಯಿ ಶಾಂತಿ ಸಮಾಧಾನಾಚೊ ತೇರ್ಸ್ ಕರ್‍ನ್ ಆಸ್‌ಲ್ಲೊ, ತರ್ ತಾಚ್ಯಾ ಪಾಟ್ಲ್ಯಾನ್ ಪಾಕಿಸ್ತಾನಿ ಮಿಲಿಟ್ರಿ ಜನರಲ್ ಪರ್ವೆಜ್ ಮುಶರಫ್ ಆಪ್ಲಿ ಕೊಲ್ಯಾಚಿ ಬೂದ್ ದಾಕಂವ್ಕ್ ತಯಾರ್ ಜಾಲೊ. ಎಪ್ರಿಲ್ ಮಹಿನ್ಯಾಂತ್ ಲಗ್ಬಗ್ 5000 ಪಾಕಿಸ್ತಾನಿ ಆಕಾಂತ್‌ವಾದಿ (LOC) ಗಡ್ ಉತ್ರೊನ್ 200 ಕಿಲೋಮೀಟರ್ ಭಾರತಾಚ್ಯಾ ಗಡಿ ಭಿತರ್ ದೊಂಗ್ರಾಳ್ ಪ್ರದೇಶಾನಿಂ ಲಿಪೊನ್ ಬಸ್ಲೆ. ಗಿಮಾಚೊ ಕಾಳ್ ಮುಗ್ದೊನ್ ಥಂಡ್ ಪಡ್ತಾನಾ ಲಡಾಕ್ ಪ್ರದೇಶಾಂತ್ ಆಸ್ಚ್ಯಾ ಕಾರ್ಗಿಲ್ ಪ್ರಾಂತ್ಯಾಂತ್ ತಾಪ್‌ಮಾನ್ -40 ಡಿಗ್ರಿ ಮ್ಹಣಸರ್ ದೆಂವ್ತಾ ಜಾಲ್ಲ್ಯಾನ್ ದೋನ್ ದೇಶಾಚೆ ಸೈನಿಕ್ ಪಾಟಿಂ ಆಪ್ಲ್ಯಾ ಶಿಬಿರಾಕ್ ಪಾಟಿಂ ಯೆಂವ್ಚೆ ಅಲಿಖಿತ್ ನಿಯಮ್ ಪಾಕಿಸ್ತಾನಾನ್ ಕಚ್ರ್ಯಾ ಡಬ್ಬ್ಯಾಕ್ ಉಡಯ್ಲೆಂ. ಭಾರತೀಯ್ ಸರ್ಕಾರಾನ್ ಫಿರ್ಯಾದ್ ದಿತಾನ “ಹ್ಯಾ ಆಕಾಂತ್‌ವಾದಿಂಕ್ ಆನಿ ಆಮ್ಕಾ ಸಂಬಂದ್‌ಚ್ ನಾ, ಹೊ ತುಮ್ಚೊಚ್ ಕಾಶ್ಮೀರಿ ಲೋಕ್” ಮ್ಹಳ್ಳೆ ಸದಾಂಚೆಂ ನೀಬ್ ಪಾಕಿಸ್ತಾನ ಥಾವ್ನ್ ಆಯ್ಕೊಂವ್ಕ್ ಮೆಳ್ಳೆಂ. ಪೂಣ್ ಥೊಡ್ಯಾಂಚ್ ದಿಸಾಂ ಭಿತರ್ ಹೆಂ 5000 ಜಣ್ ಆಕಾಂತ್‌ವಾದಿಂಚೆಂ ನೆಸಾಣ್ ಘಾಲ್ಲೆ, ದೊಂಗ್ರಾಳ್ ಝಜಾಂತ್ ತರ್‍ಬೆತಿ ಜೊಡ್‌ಲ್ಲೆ ಪಾಕಿಸ್ತಾನಿ ಮಿಲಿಟ್ರಿಚೆ ಸೊಜೆರ್ ಮ್ಹಣ್ ಕಳ್ತಾನಾ ಭಾರತೀಯ್ ಸೈನ್ಯಾನ್ ಆಪ್ಲಿ ಪ್ರತಿಕ್ರಿಯಾ ಸುರ್‍ವಾತ್ಲಿ.

ಬೋಪೋರ್ಸ್ ಗನ್, ಮಿರಾಜ್ ವಿಮಾನಾ ದ್ವಾರಿಂ ಹ್ಯಾ ಆಕ್ರಮಿತ್ ಪಾಕಿಸ್ತಾನಿ ಫೊವ್ಜೆ ವಯ್ರ್ ದಾಢ್ ಘಾಲಿ. ಪೂಣ್ ದುಸ್ಮಾನ್ ಉಬಾರಾಯೆರ್ ಬಸೊನ್ ಆಸ್‌ಲ್ಲ್ಯಾನ್ ಲಗ್ಬಗ್ ಪಾಂಯ್ಶಾಚ್ಯಾಕಿ ಚಡ್ ಭಾರತೀಯ್ ಸೈನಿಕಾನಿ ಆಪ್ಲ್ಯಾ ಜಿವಾಚೆಂ ಬಲಿದಾನ್ ಕೆಲೆಂ. ಪಾಕಿಸ್ತಾನಿ ಸೈನೆಚಾ ಹಾತಾಂತ್ ಸಾಂಪಡ್ಲಲ್ಯಾ ಕ್ಯಾಪ್ಟನ್ ಸೌರಭ್ ಕಾಲಿಯಾಚಿ ಕೂಡ್ ಕುಡ್ಕೆ ಕರ್‍ನ್ ಪಾಟಿಂ ಧಾಡ್ಚಿ ಅಮಾನುಷ್ ಕರ್‍ನಿ ಆಮ್ಚಾ ಸೆಜಾರಿ ರಾಷ್ಟ್ರಾನ್ ಆಧಾರ್‍ಲಿ. ಆಕೇರಿಕ್ 3 ಮಹಿನ್ಯಾಚ್ಯಾ ಝಜಾ ಉಪ್ರಾಂತ್ ಆಪವ್ಣೆ ನಾಸ್ತಾನಾ ಭಿತರ್ ರಿಗ್‌ಲ್ಲ್ಯಾ ಸರ್ವ್ ಅತಿಥಿಂಚಿ ಭಾರತೀಯ್ ಸೈನ್ಯಾನ್ ‘ತಿಥಿ’ ಕರ್‍ನ್ ಸೊಡ್ಲಿ. ಕ್ಯಾಪ್ಟನ್ ವಿಕ್ರಂ ಬಾತ್ರಾನ್ ಮರಣ್ ಪಾಂವ್ಚ್ಯಾ ವಗ್ತಾ ಸಾಂಗ್‌ಲ್ಲಿಂ ಉತ್ರಾಂ ‘ಯೆ ದಿಲ್ ಮಾಂಗೇ ಮೋರ್’ ಭಾರತೀಯ್ ಸೈನಿಕಾಂಚ್ಯಾ ಉತ್ಸಾಹಕ್ ಆರ್ಸೊ ಧರುಂಕ್ ಸಕ್ಲಿಂ. ಹ್ಯಾ ಸಾಹಿಸಿಕ್ ಯಶಸ್ವೆಚ್ಯಾ ಉಡಾಸಾಕ್ ಹರ್‍ಯೇಕಾ ವರ್‍ಸಾ ಜುಲೈ 26 ತಾರಿಕೆರ್ ಆಮಿ ಕಾರ್ಗಿಲ್ ವಿಜಯ್ ದಿವಸ್ ಸಂಭ್ರಮ್ತಾಂವ್. ಹ್ಯಾ ಸಗ್ಳ್ಯಾ ಸೈನಿಕ್ ಪ್ರಕ್ರಿಯೆಕ್ ‘ಆಪರೇಶನ್ ವಿಜಯ್’ ಮ್ಹಣ್ ಜೊಕ್ತೆಂ ನಾಂವ್ ದಿಲ್ಲೆಂ.

ಲೆಕಾ ಭಾಯ್ರ್ ಘಡಿತಾಂ ಹಜಾರ್

ಹ್ಯಾ ಚಾರ್ ಝಜಾಂಕ್ ಪೂರ್ಣ್‌ಪ್ರಮಾಣಾಚಿಂ ಝಜಾಂ ಮ್ಹಣ್ ಲೆಕ್ಯೆತ್ ತರ್, ಉರ್‌ಲ್ಲ್ಯಾ ಲ್ಹಾನ್-ವ್ಹಡ್ ತಿಕ್ಕಾಟಾಂ ಮೆಜುಂಕ್ ವಾ ತಾಂಚೆ ವಿಶ್ಯಾಂತ್ ಬರಂವ್ಕ್ ಮುಕ್ಲಿಂ 78 ವರ್‍ಸಾಂ ಸಯ್ತ್ ಪಾಂವ್ಚಿನಾಂತ್. 1984ಚಿ ಸಿಯಾಚಿನ್ ಲಡಾಯ್, 2001 ಇಸ್ವೆಂತ್ಲೆಂ ಪಾರ್ಲಿಮೆಂಟ್ ಆಟ್ಸಾಕ್, 2002 ಅಕ್ಷರ್‌ಧಾಮ್ ದಿವ್ಳಾಚೆರ್ ಹಲ್ಲೊ, 2008 ಮುಂಬೈಚೆರ್ ಆಕಾಂತ್‌ವಾದಿ ಹಲ್ಲೊ, ಉರಿ, ಪಠಾಣ್‌ಕೋಟ್, ಫುಲ್ವಾಮಾ, ಆಯ್ಲೆವಾರ್ ಪೆಹೆಲ್‌ಗಾಂವಾಂತ್ 26 ಹಿಂದೂ ಯಾತ್ರಿಕಾಂಕ್ ಧರ್ಮ್ ಪಳೆವ್ನ್ ಜಿವೆಶಿಂ ಮಾರ್‌ಲ್ಲೆಂ ಘಡಿತ್, ಉಪ್ರಾಂತ್ಲೆಂ ಆಪರೇಶನ್ ಸಿಂಧೂರ್, ಹರ್‍ಯೇಕಾ ದಿಸಾ ಮ್ಹಳ್ಳೆಪರಿಂ ಗಡಿಚೆರ್ ಜಾವ್ನಾಸ್ಚಿ ಗಡಿಬಿಡಿ, ಹಿ ಸಾಂಗೊನ್ ಮುಗ್ದನಾ ತಸಲಿ ಕಾಣಿ.

ಸಂಪವ್ಚ್ಯಾ ವಗ್ತಾ

“You can’t Chose your neighbors” ಮ್ಹಳ್ಳ್ಯಾ ಸಾಂಗ್ಲೆ ಪರ್ಮಾಣೆಂ ಆಮಿ ಇತ್ಲ್ಯಾ ವರ್‍ಸಾಂನಿ ಜಾಯ್ತೆಂ ಸೈರಣ್ ದಾಕೊವ್ನ್ ಪಾಕಿಸ್ತಾನಾಕ್ ಸೊಸುನ್ ವೆಲಾಂ. ಹ್ಯಾಚ್ ವೆಳಾ ಭಾರತಾಚ್ಯಾ ಸಾರ್ವಭೌಮತ್ವಕ್ ಕಸಲ್ಯಾಚ್ ರಿತಿನ್ ಭಾದಕ್ ಜಾಯ್ನಾತ್ಲ್ಯಾಪರಿಂ ಆಮ್ಚ್ಯಾ ಸಯ್ನಾನ್ ಆಮ್ಕಾಂ ರಾಕೊವ್ನ್ ವೆಲಾಂ. ಮುಕ್ಲ್ಯಾ ದೋನ್ ವರ್‍ಸಾಂ ಭಿತರ್ ಆಮಿಂ ಸಂಸಾರಾಚಿ ತಿಸ್ರಿ ವ್ಹಡ್ ಆರ್ಥಿಕ್ ಸಕತ್ ಜಾತೆಲ್ಯಾಂವ್. ಆಮ್ಚ್ಯಾ ಮುಕಾರ್ ಆಸಾತ್ ಮ್ಹಳ್ಯಾರ್ ಅಮೇರಿಕಾ ಆನಿ ಚೈನಾ ಮಾತ್ರ್. ಹೆಣೆಂ ಪಾಕಿಸ್ತಾನ್ ಆರ್ಥಿಕ್ ರಿತಿನ್ ಸಂಪೂರ್ಣ್ ದಿವಾಳಿ ಜಾವ್ನ್ ಹೆರಾಂಲಾಗಿಂ ಮಾಗೊನ್ ಖಾವ್ನ್ ಆಸಾ. ತರೀಪುಣ್ ಭಾರತಾಚ್ಯಾ ವಿರೋಧ್ ತವಳ್ ತವಳ್ ಝಗ್ಡ್ಯಾಕ್ ದೆಂವನಾತ್ಲ್ಯಾರ್ ಪಾಕಿಸ್ತಾನಿ ಸಯ್ನಾಚಿ ಅಸ್ಮಿತಾಯ್‌ಚ್ ಅಪಾಯಾಕ್ ಸಾಂಪಡ್ತಾ ಮ್ಹಳ್ಳಿ ಪರಿಗತ್. ಕಿತ್ಯಾಕ್ ಉರ್‍ಲ್ಯಾ ಸರ್‍ವ್ ದೇಶಾಂಚ್ಯಾ ಸರ್ಕಾರಾಂಚ್ಯಾ ಹಾತಾಂತ್ ಸೈನ್ಯ್ ಆಸ್ಲ್ಯಾರ್, ಪಾಕಿಸ್ತಾನಾಚ್ಯಾ ಸೈನಾಚ್ಯಾ ಹಾತಾಂತ್ ತಾಂಚೊ ಸರ್ಕಾರ್ ಆಸಾ. ಜಿಣಿ ಭರ್ ಝುಜಾಚ್ಯಾ ಆಂಗ್ಣಾಂತ್ ಶಿಜ್‌ಲ್ಲ್ಯಾ ಪ್ಯಾಲೆಸ್ತಿನಿ ಕವಿ ಮೊಹಮ್ಮದ್ ಡಾರ್ವಿಶಾಚಿಂ ಉತ್ರಾಂ ಆಯ್ಕಾ “ಝುಜ್ ಅಕೇರ್ ಜಾತಾಲೆಂ. ಮುಖೆಲಿ ಹಾತ್ ಮೆಳಯ್ತಲೆ. ಪುಣ್ ಪ್ರಾಯ್ವಂತ್ ಸ್ತ್ರೀ ಆಪ್ಲ್ಯಾ ಪುತಾಕ್, ಚಲಿ ಆಪ್ಲ್ಯಾ ಘೊವಾಕ್, ಭುರ್ಗಿಂ ಆಪ್ಲ್ಯಾ ಬಾಪಾಯ್ಕ್ ಸಾಸ್ಣಾಕ್ ರಾಕೊನ್ ರಾವ್ತಾಲಿಂ. ಝಜಾಕ್ ಕಾರಣ್ ಕೋಣ್? ತೆಂ ಹಾಂವ್ ನೆಣಾಂ ಪೂಣ್ ಝಜಾಚೆಂ ಮೋಲ್ ಫಾರಿಕ್ ಕರ್‍ತೆಲ್ಯಾ ಸಾದ್ಯಾ ಲೊಕಾಕ್ ಮಾತ್ರ್ ಹಾಂವ್ ಜಾಣಾಂ” ಸರ್ಗಾಕ್ ವೆಚಿ ವಾಟ್ ಸೆಜಾರ್‍ಚ್ಯಾ ಆಂಗ್ಣಾ ಥಾವ್ನ್ ಪಾಶಾರ್ ಜಾತಾ ಮ್ಹಳ್ಳೆಂ ಸೊಂಪೆ ಸತ್ ಸರ್ವ್ ದೇಶಾಂಚೆ ಫುಡಾರಿ ಸಮ್ಜತಿತ್ ಥರ್ ಆಮ್ಚಿ ಭುಂಯ್ ಭುಮಿವೈಕುಂಠ್ ಜಾಯ್ತ್.

——–

✍️ –ಮನೋಜ್ ಫೆರ್ನಾಂಡಿಸ್, ಕಿರೆಂ