‘ಅಳೆಬಾ, ಆಯ್ಕಾಲೆಂ?’ ಆರಾಬಾಯ್ ದಿತಚ್ ಘರಾಭಿತರ್ ರಿಗ್ಲೆಂ ಸೆಲ್ಲಿ. ತಾಚೆಂ ಸೈರನ್ ಆಯ್ಕೊನ್ ತಾಪ್‌ಲ್ಲಿ ಇಸ್ತ್ರಿಪೇಟ್ ನೈಲಾನ್ ಕಾಪ್ಡಾರ್ ವೊಮ್ತಿಚ್ ಸೊಡ್ನ್ ದಡ್ಬಡೊನ್ ಭಾಯ್ರ್ ಆಯ್ಲೊ ವಲ್ಲಿ. ವಿಶೇಸ್ ಕಿತೆಂಚ್ ಝಳ್ಕನಾಸ್ತಾಂ “ಕಿತ್ಯಾಕ್ ಬೊಬಾಟ್ ಮಾರ್‍ತಾಯ್ ಸಾಯ್ಬಿಣಿ? ಸಕಾಳಿಂ ಥಾವ್ನ್ ಸಾಂಜೆರ್ ಪರ್ಯಾಂತ್ ಹಜಾರ್ ಪಾವ್ಟಿಂ ಆಯ್ಕಾಲೆಂ? ಆಯ್ಕಾಲೆಂ? ಮ್ಹಣ್ ವಿಚಾರ್‍ನ್ಂಚ್ ಮ್ಹಜೆಂ ಕಾನ್ ಕೆಪ್ಪೆ ಕೆಲೆಂಯ್. ತುಕಾ ಪಿಡ್ದುಕ್ ಬಾಂದ್‌ಲ್ಲಿಚ್ ತುವೆಂ ಉಲೊಂವ್ಕ್ ಆನಿ ಹಾಂವೆಂ ಆಯ್ಕೊಂಕ್ ನ್ಹಯ್‌ವೇ? ತುಜ್ಯೆ ಬೊಬೆಕ್ ಮ್ಹಜ್ಯಾ ಕಾನಾಚೆ ಟೊಮ್ಯಾಟೆ (ತಮಟೆ) ಬಸ್ಲೆ. ಕಿತೆಂ ಜಾಲೆಂ ತೆಂ ಪಯ್ಲೆಂ ಸಾಂಗ್” ಆನಿ ಆಪ್ಣಾಕ್ ಆವ್ಕಾಸ್ ಮೆಳನಾ ತೆಂ ನಖ್ಖಿ ಜಾವ್ನ್‌ಚ್ ತೊ ಎಕಾಚ್ ಧಮ್ಮಾನ್ ಉಸ್ಮಡ್ಲೊ! ತೆಂ ಆಯ್ಕೊನ್ ಸೆಲ್ಲಿಚೆಂ ಪೀಂತ್ ಕದ್ವಳ್ಳೆಂ ಆನಿ ತೆಂ ತ್ಯಾಚ್ಚ್ ವೆಗಾನ್ ತುಜ್ಯಾ ಕಾನಾಚೆ ಟೊಮ್ಯಾಟೆ ಖತ್ಕತ್ಚ್ಯಾ ಸಾಂಬಾರಾಕ್ ಘಾಲ್ ಆನಿ ಶೆಟ್ಟಿಚ್ಯೆ ಆಂಗ್ಡಿಚ್ಯಾ ಟೊಮ್ಯಾಟಾಂಚಿ ಗಜಾಲ್ ಆಯ್ಕ್” ಭಾರಿಚ್ ಉರ್ಬೆನ್ ಟಿ.ವಿ. ನೀವ್ಜ್ ರೀಡರಾಬರಿ ಬಿಲ್ಡಪ್ ದೀಲಾಗ್ಲೆಂ. “ಕಿತೆಂ ಜಾಲೆಂ ಶೆಟ್ಟಿಕ್? ಆನಿ ಕಿತೆಂ ಖಬರ್ ಟೊಮ್ಯಾಟ್ಯಾಚಿ?” ತೊ ಅಜ್ಯಾಪುನ್ ವಿಚಾರಿ, “ಆಜ್ ಶೆಟ್ಟಿಚ್ಯೆ ಆಂಗ್ಡಿಂತ್ ಟೊಮ್ಯಾಟ್ಯಾಕ್ ಕೆಜಿಕ್ ಫಕತ್ ಧಾ ರುಪಾಯ್ ಕಂಯ್. ಏಕ್ ಧಾ ಕೆ.ಜಿ. ಹಾಡ್ನ್ ಯೇ ಮ್ಹಣ್ ಸಾಂಗೊಂಕ್ ಆಪಯ್ಲೆಂ ತುಕಾ.”

ವಿಶಯ್ ಕಳೊನ್ ವಲ್ಲಿಕ್ ರಾಗ್ ಆಯ್ಲೊ. “ಕಿತೆಂ? ಧಾ ಕೆ.ಜಿ. ಟೊಮ್ಯಾಟೊಗೀ? ಟೊಮ್ಯಾಟೊ ಡೆಕೊರೇಶನ್ ಪುಣೀ ಕರುಂಕ್ ಆಸಾಗಿ? ವಾ ತುಕಾ ಏಕ್ ಆಂಗಡ್ ದವರುಂಕ್ ಆಲೋಚನ್ ಕರ್‍ತಾಯ್? ಜಾಯ್ ತರ್ ಟೊಮ್ಯಾಟೊ ಮೇಕಪ್ ಸ್ಪೋಟ್ ಮ್ಹಣ್ ಪಾರ್ಲರ್‌ಯೀ ದವರ್‍ಯೆತಾ” ತಾಣೆಂ ತುಕ್ಲಾಯ್ಲೆಂ. ಪುಣ್ ತಿ ಹಳ್ವಾಯೆನ್ “ಅಳೆಬಾ, ಮೆಳ್ತಾನಾ ಹಾಡ್ನ್ ದವರಿಜೆ. ಮಾಗಿರ್ ವಾಪಾರಿಜೆ. ವೆಗ್ಗಿಂ ವಚೊನ್ ಟೊಮ್ಯಾಟೊ ಹಾಡ್” ಮ್ಹಣ್ ಒತ್ತಾಯ್ ಕರ್‍ತಾನಾ ಕಿತೆಂಗೀ ಹುಲ್ಪಾಲ್ಲೊ ವಾಸ್ ನಾಕಾಕ್ ಆದಾಳ್ಳೊ. ತಕ್ಶಣ್ ಇಸ್ತ್ರಿಪೆಟೆಚೊ ಉಗ್ಡಾಸ್ ಯೇವ್ನ್ ಧಾಂವೊನ್ ವಚೊನ್ ವಲ್ಲಿನ್ ಆನಿ ಸೆಲ್ಲಿನ್ ಪಳೆತಾನಾ ಕಾಪಡ್ ಸಗ್ಳೆಂ ಐಸ್‌ಕ್ರೀಮಾ ಭಾಶೆನ್ ಕರ್‍ಗೊನ್ ಕರ್ಪೊನ್‌ಚ್ ಆಸಾ! ವೆವೆಗ್ಗಿಂ ಸ್ವಿಚ್ ಬಂದ್ ಕರ್‍ನ್ ವಲ್ಲಿನ್ ಕಾಪಡ್ ವೋಡ್ನ್ ಸಕ್ಲಾ ಘಾಲೆಂ. ಟೊಮ್ಯಾಟ್ಯಾ ಧರ್ಮಾನ್ ಕಾಪಡ್ ಹುಲ್ಪಾಲ್ಲೆಂ ಚಿಂತುನ್ ಸೆಲ್ಲಿ ರಡೊನ್ ಮ್ಹಣಾಲೆಂ – “ಮ್ಹಾಕಾ ಗೊತ್ತಾಸ್‌ಲ್ಲೆಂ ದಿಲ್ಲೆಂ ಏಕ್ ಕಾಮ್ ಸಯ್ತ್ ತುಂ ಸಮಾ ಕರಿನಾಂಯ್. ಆತಾಂ ಕಾಪಡ್ ಲಗಡ್ ಕಾಡ್ಲೆಂಯ್. ತೆಂ ಮ್ಹಜ್ಯಾ ಪಾಗುರ್‌ಮಾಂಯ್ಚ್ಯೆ ಧುವೆಚ್ಯೆ ಸುನೆಚ್ಯೆ ಭಯ್ಣಿನ್ ದಿಲ್ಲೆಂ. ತಾಚಿ ಗತ್ ಪಳೆ. ಕರ್ಪೊನ್ ಭಾಕ್ರಿ ಜಾಲಾಂ! ತೀನ್ ದೀಸ್ ಥಾವ್ನ್ ಭಾಕ್ರಿ ಭಾಜ್ ಮ್ಹಣ್ ಗಾನಾ ಗಾತಾಲೊಯ್ ಆತಾಂ ಹಿಚ್ ಭಾಕ್ರಿ ಮ್ಹಣ್ ಚಿಂತುನ್ ಖಾ..” ಹೆಂ ಟಾಸ್ಕ್ ಎಕ್ದಮ್ ಕಶ್ಟ್ ಜಾವ್ನ್ ತಿಕಾ ಆಟಾಂಪುಂಕ್ ವಲ್ಲಿಕ್ ಕಶ್ಟ್ ಜಾಲೆ.

ಹೆಣೆಂ ವಲ್ಲಿ ಹ್ಯಾ ಘಡಿತಾಂತ್ ಚುಕಿದಾರ್ ಕೋಣ್ ಮ್ಹಣ್ ವಿಮರ್ಸೊ ಕರಿತ್ತ್ ಪಿಳಿ ಪಿಳಿ ದೊಳೆ ಸೊಡ್ತಾಲೊ ಶಿವಾಯ್ ತಾಣೆಂ ವಿಚಾರ್‌ಲ್ಲಿ ಭಾಕ್ರಿ ಮೆಳತ್‌ಗೀ ಆನಿ ಆಪ್ಲ್ಯಾ ಅರ್ಧ್ಯಾ ಆಂಗ್ಲ್ಯಾಚಿ ಚಾಕ್ರಿ ಮೆಳಯ್‌ಗೀ ಮ್ಹಣ್ ದುಬಾವ್ಲೊ ಬಾವ್ಡೊ! ಆನಿ ಸನಿನ್ ಜಾವ್ನ್ “ಆಸೊಂದಿ ಸೊಡ್ ಲಿಲ್ಲಿ. ಶಾಕ್ ಸರ್ಕ್ಯೂಟ್ ಜಾಲಾಂಸ್ತಾಲೆಂ. ಅಕಸ್ಮಾತ್ ಹಾಂವ್‌ಚ್ ಪುಕ್ಕ್ ಜಾಲ್ಲೊಂ ತರ್ ಫಾಲ್ಯಾಂ ಸಕಾಳಿಂ ಸೆಜಾರ್‍ಚಿಂ ‘ನಿನ್ನ ಗಂಡ ವಲ್ಲಿ, ಎಲ್ಲಿ’ ಮ್ಹಣ್ ವಿಚಾರ್‍ತಾನಾ ಕಿತೆಂ ಮ್ಹಣ್ತಲೆಂಯ್? ಆಕಸ್ಮಾತ್ ಹಾಂವ್ ಟೊಮ್ಯಾಟೊ ಹಾಡ್ನ್ ದೀವ್ನ್ ಪುಕ್ಕ್ ಜಾಲ್ಲೊಂ ತರ್ ಪೊಲೀಸ್ ‘ವಲ್ಲಿ ಎಲ್ಲಿ ಸುಟ್ಟು ಹೋದರು? ನಿಮಗೆ ಏನು ಕೊಟ್ಟು ಹೋದರು? ಏನು ಬಿಟ್ಟು ಹೋದರು?’ ಮ್ಹಣ್ ವಿಚಾರ್‍ತಾನಾ ತುವೆಂ ‘ಸುಟ್ಟು ಹೋಗುವ ಮೊದಲು ೧೦ಕೆ.ಜಿ. ಟೊಮ್ಯಾಟೊ ಕೊಟ್ಟು ಹೋದರು. ಈ ಸೀರೆಯ ರೊಟ್ಟಿ ಬಿಟ್ಟು ಹೋದರು’ ಮ್ಹಳ್ಯಾರ್ ದುಬಾವಾನ್ ‘ಯಾವ ಟೊಮ್ಯಾಟೊ? ಅದರಲ್ಲಿ ಬಾಂಬ್ ಇತ್ತೇ? ಅಷ್ಟು ಟೊಮ್ಯಾಟೊ ಏಕೆ ತಂದರು? ಎಲ್ಲಿಂದ ತಂದರು? ಏನನ್ನು ತಿಂದರು?’ ಮ್ಹಣ್ ತುಜೊ ಮಾಂಡ್ಡೊ ಖಾತೆಲೆ. ಮಾಗಿರ್ ತುಕಾ ರಾಗ್ ಯೇವ್ನ್ ತುಜಿ ಬಿಪಿ ರೊಕೆಟಿಬರಿ ವಯ್ರ್ ಚಡ್ತಾನಾ ತುಕಾ ತುಕ್ಲಾವ್ನ್ ‘ಮ್ಹಜ್ಯಾ ಭಾಂಗಾರಾ’ ‘ಮ್ಹಜ್ಯಾ ಟೊಮ್ಯಾಟ್ಯಾ’ ಮ್ಹಣ್ ಆಪೊಂವ್ಕ್ ಹಾಂವ್ ಮೆಳನಾಸ್ಲೊಂ ಆನಿ ‘ನಿದೆಂತ್ ಸೆಲ್ಲಿ ಜಾಗ್ತಾನಾ ಸೆಲ್ಲಿ ಸಗ್ಳ್ಯಾಂನಿರೆ ದಿಸ್ತಾ ಪಳೆಂವ್ಕ್ ಮ್ಹಜೆಂಚ್ ಸೆಲ್ಲಿ’ ಮ್ಹಣ್ ತುಜೆಪಾಟ್ಲ್ಯಾನ್ ಯೆಂವ್ಚೊ ನೊವ್ರೊ ಆಸ್ತೊನಾ ಸೆಲ್ಲಿ…” ಮ್ಹಣೊನ್ ತಿಕಾ ಸಿಂತಿಮೆಂತಾಂನಿ ಬುಡೊವ್ನ್ ಕಾಪ್ಡಾಚಿ ಭಾಕ್ರಿ ವಿಸ್ರಶೆಂ ಕರ್‍ಚ್ಯಾಂತ್ ತೊ ಯಶಸ್ವಿ ಜಾಲೊ.

ತಾಚ್ಯಾ ತ್ಯಾ ಉತ್ರಾಂಕ್ ಕಂಪ್ಲೀಟ್ ಕರ್‍ಗಲ್ಲೆಂ ಸೆಲ್ಲಿ ಕಸ್ಕಸೊನ್ ರಡೊನ್ ತಾಕಾ ರೆವೊಡ್ತಾನಾ ತಾಚೆಂ ಮಾತೆಂ ಪುಸುನ್ ವಲ್ಲಿ ಮ್ಹಣಾಲೊ, “ಸೆಲ್ಲಿ, ಡೋಂಟ್ ಬಿ ಸಿಲ್ಲಿ. ಆತಾಂ ರಡಾನಾಕಾ, ಫಾಲ್ಯಾಂಚ್ ತುಕಾ ಪಸಂದಾಚೆಂ ನವೆಂ ಕಾಪಡ್ ಹಾಂವ್ ಹಾಡ್ನ್ ದಿತಾಂ.” ನವ್ಯಾ ಕಾಪ್ಡಾಚೆಂ ನಾಂವ್ ಆಯ್ಕಲ್ಲೆಂಚ್ ಸೆಲ್ಲಿ ಫುಲ್ ಖುಶ್ ಜಾವ್ನ್ “ಥ್ಯಾಂಕೂ ಡಿಯರ್… ಹೆಂ ಕರಂದಾಯೆಚೆಂ ಉಲೊವ್ಣೆಂ ಮ್ಹಾಕಾ ರಾಂದುಂಕ್ ಸೊಡಿನಾ. ಮ್ಹಾಕಾ ತಕ್ಲಿ ಫಡ್ತಾ. ಮ್ಹಾಕಾ ರಾಂದುಂಕ್ ಮನ್ ನಾ. ಫುಡ್ಡ್ ಒನ್‌ಲೈನಾರ್ ಹಾಡೊವ್ಯಾಂಗೀ?” ವಿಚಾರಿಲಾಗ್ಲೆಂ. ತೆಂ ಆಯ್ಕೊನ್ ವಲ್ಲಿಚ್ಯಾ ಕಾಳ್ಜಾಂತ್ಲೆ ಕಳ್ವಳೆ ಚಡ್ಲೆ “ತೊ ಎಕ್‌ಚ್ ಫರಾ, ತೆಂ ಖೆಲ್ಯಾರ್ ಮ್ಹಾಕಾ ವರ್ಗಾನಾ ಮೊಗಾ. ಪೋಟ್ ಅಪ್‌ಸೆಟ್ ಜಾತಾ” ತೊ ಮೋವ್ ಜಾಲ್ಲೊ!

ತರ್, ತುಕಾ ಪೇಜ್ ಕರ್‍ತಾಂ. ತುಂ ವೆಗ್ಗಿಂ ಫುಡ್ ಡೆಲಿವರಿಚ್ಯಾ ನಾಂವಾಂಕ್ ಫೊನ್ ಕರ್. ಅಮೆಜಾನ್ ಜಾಯ್ತ್‌ಗೀ?” ತೆಂ ಆಯ್ಕೊಂವ್ಚ್ಯೆ ಸ್ಥಿತೆರ್ ನಾತ್‌ಲ್ಲೆಂ! “ಅಮೆಜಾನ್ ನಾಕಾ ಮೇರಿ ಜಾನ್, ಗ್ಯಾಸ್ಟಿಕ್ ಟ್ರಬಲ್ ಸುರು ಜಾತಾ” ತಾಣೆಂ ಪರಾತ್ಲೆಂ. “ತರ್ ಟೊಮ್ಯಾಟೊಚ್ ಬರೆಂ”! ತಾಣೆಂ ಫಯ್ಸಲ್ ದಿಲೆಂ. “ತೆಂ ನಾಕಾ” ತೊ ಉಸ್ಮಡ್ಲೊ. “ತಾಂತುಂ ಟೊಮ್ಯಾಟ್ಯಾಕ್ ಸಯ್ತ್ ಅಜಿನಮೊಟೊ ಘಾಲ್ತಾತ್” ತೊಂಡಾಕ್ ಆಯಿಲ್ಲೊ ಸಬ್ದ್ ನಾಕಾ ಮ್ಹಳ್ಯಾರೀ ಭಾಯ್ರ್ ಪಡ್ಲೊ ಆನಿ ವಲ್ಲಿಕ್ ಒನ್‌ಲೈನಿರ್ ಖಾಣಾಂ ಹಾಡಯ್ಲಿಂ. ಸರ್ವ್ ಸಂದರ್ಭ್ ಉಗ್ಡಾಸ್ ಯೇವ್ನ್ ತೊ ಶಿರಿಂ ಚುಕ್ಲೊ. ತಾಚಿಂ ಉತ್ರಾಂ ಆಯ್ಕೊನ್ ಸೆಲ್ಲಿನ್ ಹಾಸೊ ದಿಲ್ಯೊ ಆನಿ ಮ್ಹಳೆಂ “ಅಜಿನಮೊಟೊ ಘಾಲುಂದಿತ್ ತೆಂ ಖಾವ್ನ್ ಪುಣೀ ತುಂ ಚಿಕ್ಕೆ ಮೊಟೊ ಜಾ ನಾ ತರ್ ಪೋಸ್ಟ್ ಮೇಟ್ಸಾಕ್ ಓರ್ಡರ್ ದಿವ್ಯಾಂ” ತೆಂ ಪಾಟಿಂ ಯೆಂವ್ಚೆಂ ಲಕ್ಶಣ್ ದಾಕಯ್ನಾತ್ಲೆಂ.

“ಪೋಸ್ಟ್ ಮೇಟ್ಸ್ ನ್ಹಯ್. ಮಾತ್ತಿಗೊಬೊರ್ ಘಾಲ್ಲೆಂ ಖಾವ್ನ್ ವಿಪರೀತ್ ಔಟ್‌ಲೆಟ್ ಜಾವ್ನ್ ಆಖೇರಿಕ್ ಪೋಸ್ಟ್ ಮಾರ್ಟಮ್ ಕರ್‍ತಾನಾ ಕರ್‍ಗಲ್ಲಿ ಆನ್ಕಿಟಿಯೀ ಮೆಳ್ಚಿನಾ. ತುಕಾ ರಾಂದುಂಕ್ ಆಳ್ಸಾಯ್ ದೆಕುನ್ ಸಂಕ್‌ಪಾಶಾಣ್ ಖಾವ್ನ್ ಎದೊಳ್‌ಚ್ ೯೦ ಕೆ.ಜಿ. ಪಾವ್ಲಾಂಯ್ ಆನಿ ತುವೆಂ ಪೋಸ್ಟ್‌ಮೇಟ್ಸಾ ಸಾಂಗಾತಾ ಸೆಂಚುರಿ ಮಾರ್‍ಚಿ ನಾಕಾ.” ವಲ್ಲಿ ಸವ್ಕಾಸ್ ಧಯ್ರ್ ಎಕ್ಟಾಂಯ್ ಕರಿಲಾಗ್ಲೊ. “ತೆಂ ತಶೆಂ ನ್ಹಯ್…” ತಿಣೆಂ ಮಸ್ಕಾ ಘಾಲುಂಕ್ ಸುರ್‍ವಾತ್ ಕರ್‍ತಾನಾ ವಲ್ಲಿ ಎಕ್‌ಚ್ ಧಮ್ಮಾನ್, “ತೋಂಡ್ ಧಾಂಪ್ ಆನಿ ಮರ್ಯಾದಿನ್ ಪೇಜ್ ಆನಿ ಟೊಮ್ಯಾಟಾಚಿ ಚೆಟ್ನಿ ಕರ್. ಹಾಂವ್ ಆಳ್ಸಾಯ್ ಸೊಡ್ನ್ ಟೊಮ್ಯಾಟೊ ಹಾಡ್ತಾಂ. ತುಂ ಆಳ್ಸಾಯ್ ಸೊಡ್ನ್ ರಾಂದಪ್ ಕರ್. ಟೊಮ್ಯಾಟಾಚೆಂ ಜಾಮ್ ಕರ್, ಸಾಸ್ ಕರ್, ಸೂಪ್ ಕರ್, ಬೋರ್ ಜಾಲ್ಯಾರ್ ಟೊಮ್ಯಾಟೊ ರೈಸ್ ವಾ ಪುಲಾವ್, ಟೊಮ್ಯಾಟೊ ಬಾತ್, ಕಡಿ, ಬಿರಿಯಾನಿ, ಕಿಚಡಿ, ಕಿತೆಂ ಜಾಯ್ ತೆಂ ಕರ್. ಪುಣ್ ಆನ್‌ಲೈನ್ ಫುಡ್ಡಾಚಿ ಖಬರ್ ಬಂದ್ ಕರ್” ಮ್ಹಣ್ ಖಡಕ್ಕ್ ಸಾಂಗೊನ್ ಪಾಂಯ್ ಧರ್‍ಣಿಕ್ ಆಪ್ಟೊನ್ ಗೆಲ್ಲೊ ವಲ್ಲಿ ಧಾಚ್ ಮಿನುಟಾಂನಿ ತೀಸ್ ಕೆ.ಜಿ. ಟೊಮ್ಯಾಟೊ ಹಾಡ್ನ್ ಸೆಲ್ಲಿಚ್ಯಾ ಮುಕಾರ್ ವೊಮ್ತಿಲಾಗ್ಲೊ! ತೆಂ ಜಾವ್ನ್ ತೀನ್ ದಿಸಾನಿಂಯ್ ಆಸ್ಪತ್ರೆಕ್ ಸ್ಕೂಟಿರ್ ವೆಚ್ಯಾ ವಲ್ಲಿಕ್ ಆನಿ ಸೆಲ್ಲಿಕ್ ಪಳೆವ್ನ್ ಕೊಣೆಂಗೀ ವಿಚಾರ್‍ಲೆಂ.“What is the Matter?” ಆನಿ ಕೊಣೆಂಗೀ ಜಾಪ್ ದಿಲಿ “Tomato does matter” ಮಾಗಿರ್ ಕೊಣೆಂಗೀ “ಹೆರಾಂಚಿ ಖಬರ್ ಆಮ್ಕಾಂ ಕಿತ್ಯಾಕ್?” ಮ್ಹಣೊನ್ ದಾರ್ ಧಾಂಪ್ಲೆಂ.

✍️ –ಅನಿತಾ ಅರ್ಸುಲಯ್ನ್