ಪವಿತ್ರ್‌ಸಭೆಚೊ 267 ವೊ ಪಾಪಾ ಜಾವ್ನ್ ಅಮೆರಿಕಾಚೊ ಕಾರ್ಡಿನಲ್ ರೊಬರ್ಟ್ ಫ್ರಾನಿಸ್ ಪ್ರವೊಸ್ತ್ ಆಮ್ಕಾಂ ಲಾಬ್ಲಾ. ಏಕ್ ಬರೊ, ಖರೊ, ಶಾಥಿವಂತ್, ಭಕ್ತಿವಂತ್ ಪಾಪಾ ಆಮ್ಕಾಂ ಮೆಳ್ಳಾ. ತಾಣಿಂ ವಿಂಚುನ್ ಕಾಡ್‌ಲ್ಲೆಂ ನಾಂವ್ ಲಿಯೊ ಚೊವ್ದಾವೊ. ಮೇಯಾಚ್ಯೆ ೮ ತಾರಿಕೆರ್ ಸಾಂಜೆರ್ ನವೊ ಪಾಪಾ ಜಾವ್ನ್ ವಿಂಚುನ್ ಆಯಿಲ್ಲ್ಯಾ ಲಿಯೊ ಚೊವ್ದಾವ್ಯಾನ್ ಸಾಂ. ಪೆದ್ರುಚ್ಯಾ ಬಾಸಿಲಿಕಾಚ್ಯೆ ಬಾಲ್ಕನಿಚೆರ್ ಹಜಾರೊಂ ಲೊಕಾಂ ಹುಜಿರ್ ಆಪ್ಲ್ಯಾ (ಉರ್‍ಬಿ ಎತ್ ಒರ್‍ಬಿ) ದಿಲ್ಲ್ಯಾ ಬೆಸಾಂವಾಂತ್ ಉದ್ಗಾರ್‍ಲಲಿಂ ಉತ್ರಾಂ ‘ಭಾವಾಂ ಭಯ್ಣಿಂನೋ, ಶಾಂತಿ ತುಮ್ಚೆಸವೆಂ ಆಸೊಂ’. ತಶೆಂಚ್ ಮುಕಾರುನ್ ಸಾಂಗ್‌ಲ್ಲಿಂ ಉತ್ರಾಂ ‘ಆಮಿ ಕ್ರೀಸ್ತಾಚೆ ಪಾಟ್ಲಾವ್ದಾರಿ. ಕ್ರೀಸ್ತ್ ಆಮ್ಚ್ಯಾ ಮುಕ್ಲ್ಯಾನ್ ವೆತಾ, ಸಂಸಾರಾಕ್ ತಾಚೊ ಉಜ್ವಾಡ್ ಗರ್ಜ್ ಆಸಾ. ವಾಯ್ಟ್ ಕೆದಿಂಚ್ ಜಯ್ತ್ ವ್ಹರುಂಕ್ ಸಕ್ಚೆಂನಾ’.

ನವ್ಯಾ ಪಾಪಾನ್ ಲಿಯೊ ಚೊವ್ದಾವೊ ನಾಂವ್ ಘೆಂವ್ಕ್ ಕಾರಣ್ ಕಿತೆಂ? ಪಾಪಾ ಲಿಯೊ ತೆರಾವೊ (1878-1903) 19ವ್ಯಾ ಶತಮಾನಾಂತ್ ಕಾಮೆಲ್ಯಾಂಚೊ ಪಾಪಾ ಮ್ಹಣ್ ನಾಂವಾಡ್ಲಲೊ. ಸಮಾಜ್‌ವಾದ್, ವಸ್ತುವಾದ್ ಆನಿ ಹೆರ್ ಘುಸ್ಪಡ್ ಗೊಂದಾಳಾಚ್ಯಾ ವಾತಾವರಣಾಮದೆಂ  ಪವಿತ್ರ್‌ಸಭೆನ್ ಕಶೆಂ ಜಾಗತಿಕ್ ಶಾಂತಿ ಸಮಾಧಾನಾಚೆಂ ಹಾತೆರ್ ಜಾವ್ಯೆತ್ ಮ್ಹಣ್ ಸಪ್ಣೆಲ್ಲೊ ‘ವಿಶನರಿ’ ತೊ. ಕಾಮೆಲ್ಯಾಂಚಿಂ ಹಕ್ಕಾಂ ಆನಿ ಸಮಾಜಿಕ್ ಶಿಕೊವ್ಣೆವಿಶಿಂ ತಾಣಿಂ ಬರಯಿಲ್ಲೆಂ ‘ರೆರುಮ್ ನೊವಾರುಮ್’ (ಕ್ರಾಂತಿಕಾರಿ ಪರಿವರ್ತನ್) ಪರಿಪತ್ರ್ ಪರಂಪರಾ ಆನಿ ಆಧುನಿಕತೆಕ್ ಏಕ್ ಸಾಂಕೊವ್ ಜಾಂವ್ಕ್ ಪಾವ್ಲೆಂ. ಲಿಯೊ ತೆರಾವೊ ಏಕ್ ಚಿಂತ್ಪಿ, ಸುಧಾರಕ್ ಆನಿ ಬದ್ಲುನ್ ಯೆಂವ್ಚ್ಯಾ ಸಮಾಜೆಚ್ಯೆ ಅನಿತಿವಿರೋಧ್ ಝುಜೊಂಕ್ ಆನಿ ಸವಾಲ್ ಘಾಲುಂಕ್ ತೊ ಪಾಟಿಂ ಸರ್‍ಲೊನಾ. ಪಾಂಚ್ವ್ಯಾ ಶತಮಾನಾಂತ್ ಅಧಿಕಾರಾರ್ ಆಸ್ಲೊ ಲಿಯೊ ವರ್ತೊ ಅನಿತಿವಿರೋಧ್ ಧಯ್ರಾನ್ ಝುಜೊನ್ ಪವಿತ್ರ್‌ಸಭೆಕ್ ಆಧ್ಯಾತ್ಮಿಕತೆಚ್ಯೆ ಆನಿ ಸಮಾಜಿಕ್ ಬದ್ದತೆಚ್ಯೆ ವಾಟೆನ್ ಚಲಯ್ಲ್ಯಾ. ಲಿಯೊ ಮ್ಹಳ್ಳೆಂ ನಾಂವ್ ಧಯ್ರ್, ಸ್ಪಶ್ಟ್ ಉದ್ಧೇಶ್ ಆನಿ ಮೊವಾಳ್ ಗೊವ್ಳ್ಯಾಚೆಂ ಕಾಳಿಜ್ ಸೂಚಿತ್ ಕರ್‍ತಾ. ನವ್ಯಾ ಪಾಪಾನ್ ಲಿಯೊ ಮ್ಹಳ್ಳೆಂ ನಾಂವ್ ಘೆವ್ನ್ ದುಬ್ಳ್ಯಾ ಆನಿ ಗ್ರೇಸ್ತಾಮದೆಂ, ಸಂಪ್ರದಾಯ್ ಆನಿ ನವೀಕರಣಾಂಮದೆಂ ತಶೆಂಚ್ ದೇವ್ ಆನಿ ಅಸ್ಕತ್ ಮನ್ಶಾಕುಳಾಮದೆಂ ಸಾಂಕೊವ್ ಬಾಂದ್ಚೊ ಅರ್ಥ್ ಸೂಚಿತ್ ಕರ್‍ತಾ. ಹ್ಯೆ ದಿಶೆನ್ ತಾಣಿಂ ಉಲ್ಲೇಖ್ ಕೆಲ್ಲಿಂ ಉತ್ರಾಂ ‘ಆಮಿ ಸಾಂಕೊವ್ ಬಾಂದ್ಯಾಂ, ಸಂವಾದ್ ಕರ್‍ಯಾಂ, ಮಿಶನರಿ ಪವಿತ್ರ್‌ಸಭಾ ಜಾವ್ಯಾಂ, ಉಗ್ತ್ಯಾ ಮನಾನ್ ಸಕ್ಡಾಂಕ್ ಆರಾವ್ಯಾಂ’. ಹಿಂ ಉತ್ರಾಂ ತಾಂಚೆಂ ಮುಕ್ಲೆಂ ಮಿಸಾಂವ್ ಕಿತೆಂ ಜಾಂವ್ಕ್ ಪಾವ್ತೆಲೆಂ ಮ್ಹಳ್ಳೆಂ ಕಳಿತ್ ಕರ್‍ತಾ. ಲಿಯಾಂವ್ ತೆರಾವ್ಯಾಬರಿ, ದುಬ್ಳ್ಯಾ ಧಾಕ್ಟ್ಯಾಂಚ್ಯಾ, ಕಾಮೆಲ್ಯಾಂಚ್ಯಾ, ಸಮಾಜೆಂತ್ ಅನಿತಿಕ್ ವೊಳಗ್ ಜಾಲ್ಲ್ಯಾ ಲೊಕಾಂಖಾತಿರ್ ವಾವುರ್‍ಚಿ ತಾಂಚಿ ಆಶಾ ವರ್ತಿ ಮ್ಹಳ್ಳೆಂ ಹ್ಯಾ ನಾಂವಾಂತ್ ಆಮ್ಕಾಂ ಕಳೊನ್ ಯೆತಾ.

ಪಾಪಾ ಜಾಂವ್ಚ್ಯಾ ಪಯ್ಲೆಂ ಪಾಪಾನ್ ಕೆಲ್ಲಿ ಗುಪ್ತಿ ಸೆವಾ:

1. ಬಿಸ್ಪಾಚೆಂ ಘರ್ ವಿಕುನ್ ನಿರ್ವಾಸಿತಾಂಕ್ ಘರಾಂ ಬಾಂದ್ಲ್ಯಾಂತ್: ಇರಾಕ್ ಝುಜ್ ಸಂಪ್ಲ್ಯಾ ಉಪ್ರಾಂತ್ ಚಿಕಾಗೊಂತ್ಲೆಂ ಬಿಸ್ಪಾಚೆಂ ಘರ್ ವಿಕುನ್ 1.8 ಮಿಲಿಯನ್ ದುಡು ಜೊರ್ದಾನ್ ಆನಿ ಲೆಬನಾನಾಂತ್ 120 ನಿರ್ವಾಸಿತ್ ಲೊಕಾಂಕ್ ಘರಾಂ ಬಾಂದುಂಕ್ ಆಧಾರ್ ದಿಲಾ. ಇರ್ಗೆಜೆಚೆಂ ಪಾಕೆಂ ದುಬ್ಳ್ಯಾಂಚ್ಯಾ ಘರಾಂಚ್ಯಾ ಪಾಕ್ಯಾಚ್ಯಾಕೀ ಉಬಾರ್ ಆಸೊಂಕ್ ನ್ಹಜೊ ಮ್ಹಳ್ಳೆಂ ತಾಂಚೆಂ ಚಿಂತಪ್.

2. ಜಯ್ಲಾಂತ್ಲ್ಯಾ ಕಯ್ದ್ಯಾಂಕ್ ಪ್ರತ್ಯೇಕ್ ಜಾವ್ನ್ ಭುರ್ಗ್ಯಾಂಕ್ ಇಸ್ಕೊಲಾಚೆಂ ಶಿಕಪ್: 2012 ವ್ಯಾ ವರ್‍ಸಾ ಕ್ರಿಸ್ಮಸಾಕ್ ಜಯ್ಲಾಚಿ ಭೆಟ್ ಕರ್‍ನ್ ಕಯ್ದ್ಯಾಂಕ್ ಕಾಣಿಕ್ ದೀವ್ನ್ ಆನಿ ತಾಂಚೆಸವೆಂ ವೇಳ್ ಖರ್ಚಿಲಾ. “ಊoಠಿe ಖಿuiಣioಟಿ’ ಮ್ಹಳ್ಳೊ ಫಂಡ್ ಉಗ್ತೊ ಕರುನ್ ಹರ್‍ಯೆಕಾ ವರ್‍ಸಾ 200 ಚಡಿತ್ ಭುರ್ಗ್ಯಾಂಕ್ ಸೋಲ್ಕರ್‌ಶಿಪ್ ದೀವ್ನ್ ೫ ಹಜಾರ್ ಡಾಲರ್ ಹ್ಯಾ ಬರ್‍ಯಾ ಕಾಮಾಕ್ ಖರ್ಚಿಲ್ಯಾತ್.

3. ಆಸ್ಪತ್ರೆಂತ್ ದುಬ್ಳ್ಯಾಂಚೆ ಚಿಕಿತ್ಸೆಕ್ ಆಧಾರ್: ಆಸ್ಪತ್ರೆಂತ್ ದುಬ್ಳ್ಯಾ ಪಿಡೆಸ್ತಾಂಕ್ ಬರಿ ಚಿಕಿತ್ಸಾ ಮೆಳ್ಚೆದಿಶೆನ್ ಆಧಾರ್ ದಿಲಾ ಆನಿ ಜಾಯ್ತ್ಯಾಂಚೊ ತಾಣಿಂ ಜೀವ್ ವಾಂಚಯ್ಲಾ. 2020 ಇಸ್ವೆಂತ್ ಕೊವಿಡಾಕ್ ಲಾಗೊನ್ ಲ್ಯಾಟಿನ್ ಅಮೆರಿಕಾಚ್ಯಾ ಆಸ್ಪತ್ರೆಂನಿ ವೆಂಟಿಲೇಟರ್‍ಸ್ ನಾತ್‌ಲ್ಲ್ಯಾ ವೆಳಾರ್ 300 ಪ್ರಾಸ್ ಚಡಿತ್ ವೆಂಟಿಲೇಟರಾಂ ದೀವ್ನ್ ದುಬ್ಳ್ಯಾಂಚ್ಯಾ ಗರ್ಜಾಂಕ್ ತೊ ಪಾವ್ಲಾ. ಹ್ಯಾ ಖಾತಿರ್ 2.7 ಡಾಲರ್ ದುಡು ತಾಣಿಂ ಖರ್ಚಿಲಾ. ಪಾಪಾ ಜಾತಾ ಮ್ಹಣಾಸರ್ ತಾಣಿಂ ಕೆಲ್ಲಿ ಹಿ ಗುಪ್ತಿ ಸೆವಾ ಕೊಣಾಕ್‌ಚ್ ಕಳಿತ್ ನಾತ್‌ಲ್ಲಿ.

ನವ್ಯಾ ಪಾಪಾನ್ ಆಪ್ಲೆಂ ನವೆಂ ಮಿಸಾಂವ್ ಸುರ್ವಾತ್ ಕರ್‍ತಾನಾ ತಾಂಚೊ ಪಯ್ಲೊ ಸಂದೇಶ್ ಆಸಾ – ‘ಶಾಂತಿ ಆನಿ ಎಕ್ವಟ್’. ಚಿಕಾಗೊ ಥಾವ್ನ್ ವಾತಿಕಾನಾಚೆಂ ಪಯ್ಣ್ ಕೇವಲ್ ಅಧಿಕಾರಾಚೆಂ ನ್ಹಯ್ ಬಗಾರ್ ಸೆವೆಚೆಂ ಮ್ಹಣ್ ತಾಂಚ್ಯಾ ಪಾಟ್ಲ್ಯಾ ಜಿಣಿಯೆಮುಕಾಂತ್ರ್ ಸಮ್ಜತಾ. ಆನಿಕೀ ತೆ ಮಿಶನರಿ ಜಾವ್ನ್ ಆಸ್ತೆಲೆ. ತಾಂಚಿ ದೀಶ್ಟ್ ದುಬ್ಳ್ಯಾಂಚೆರ್ ಖಂಚೊನ್ ಆಸ್ತೆಲಿ ಆನಿ ಆನಿ ತಾಂಚ್ಯಾ ದೊಳ್ಯಾಂನಿ ದೆವಾಚೊ ಮೋಗ್ ಪೆಲ್ಯಾಥಂಯ್ ಪಾವೊಂವ್ಚಿ ಶಾಥಿ ಆಮ್ಕಾಂ ದಿಸ್ತಾ.

ಹ್ಯಾ ಅಂಕ್ಯಾಂತ್ ನವ್ಯಾ ಪಾಪ್‌ಸಾಯ್ಬಾಚ್ಯೆ ಜಿಣಿಯೆಚಿ ಝಳಕ್ ತುಮ್ಚೆಮುಕಾರ್ ದವರ್‍ಚೆಂ ಪ್ರಯತ್ನ್ ಕೆಲಾಂ. ಹೊ ಅಂಕೊ ತುಮ್ಕಾಂ ರುಚ್ತೊಲೊ ಮ್ಹಳ್ಳೊ ಆಮ್ಚೊ ಭರ್ವಸೊ.

ಬಾಪ್ ಐವನ್ ಸೊಜ್, ಕಾರ್ಮೆಲಿತ್