ರಾಜ್ ಕಾರ್ಭಾರಿ ಎಕ್ಲ್ಯಾಕ್ 
ತಾಚೆಂಚ್ ಪಿಂತುರ್ ಸೊಡಂವ್ಚಿ ಆಶಾ ಜಾಲಿ

ಪೆನ್ನ್ ಘೆತ್ಲೆಂ, ಗೀಟ್ ವೊಡ್ಲೆ
ವಾಂಕ್ಡೆ ತಿಂಕ್ಡೆ ಗೆಲೆ
ಆಪ್ಣಾಬರಿ ನ್ಹಯ್ ಆಸ್ಲೆಲ್ಯಾಕ್ ಸೊಡಯ್ಲೆಂ
ವೈರಲ್ ಜಾಂವ್ಚೆ ಆದಿಂ ಸಗ್ಳೆಂ ಮಾಜ್ವಯ್ಲೆಂ

ದೆಶಾಚೆಂ ಪಿಂತುರ್ ಸೊಡಂವ್ಕ್ ಬಸ್ಲೊ
ಕಲ್ಲರ್ ಕಲ್ಲರ್ ಪೆನ್ನಾಂ ಘೆತ್ಲಿಂ
ಪುಣ್ ಭರ್‍ಲೊ ರಂಗ್ ಎಕ್‌ಚ್, ಕಿಂರ್‍ಚೆಚೊ
ವಿರೋಧ್ ಪಾಡ್ತಿಚ್ಯೆ ಬೊಬೆಕ್ ಕಿಣಾನ್ ಮಾಜ್ವಯ್ಲೆಂ

ಮಾಗಿರ್, ಲೊಕಾಕ್ ಸೊಡಯ್ಲೆಂ
ಸಗ್ಳೆಂ ಸಂಪೊನ್ ಪಾನಾಮುಳಾ 
ಆಪ್ಲಿ ಸಹಿ ಘಾಲ್ತಚ್
ಪಾನಾವಯ್ಲೊ ಲೋಕ್ ಉಟೊನ್ ಕಾಮಾಕ್ ಗೆಲೊ

ಮಾಗಿರ್ ಧಯ್ರ್ ಘೆವ್ನ್ ತಾಣೆಂ
ಶೆತಾಂ ಭಾಟಾಂ ಸೊಡಯ್ಲಿಂ
ಕೊಣೆಂಯ್ ದೆಕ್ಚೆ ಆದಿಂಚ್ ಪೂರಾ ಮಾಜ್ವಯ್ಲಿಂ

ತಶೆಂಚ್ ರಾನಾಂ ಸೊಡಯ್ಲಿಂ, ಮಾಜ್ವಯ್ಲಿಂ
ನಂಯ್ ಸೊಡಯ್ಲಿ, ಮಾಜ್ವಯ್ಲಿ 
ದುಬ್ಳ್ಯಾಚಿ ವೋಂಯ್ ಸೊಡಯ್ಲಿ, ಮಾಜ್ವಯ್ಲಿ
ತನ್ಯಾಂಚೊ ಜೀವ್ ಸೊಡಯ್ಲೊ, ಮಾಜ್ವಯ್ಲೊ!

ಆತಾಂ,
ಅಕ್ಕಲ್ ಆಸ್ಲಲ್ಯಾನೋ
ಸಕ್ಕಡ್ ತಾಣೆಂ ಮಾಜ್ವಂಚೆ ಪಯ್ಲೆಂ
ತಾಚೆಂ ಪಿಂತುರ್ ಸೊಡಂವ್ಚೆಂ 
ಪಿಶೆಂ ಸೊಡಯಾ!