ಹೆಣೆಂ ಮಾಡಿಯೊ ಪುರುನ್ ಇಂದಾತಾಳ್ಯಾಂನಿ ಸುಂರ್ಗಾರುನ್ ಆಯ್ತೊ ಕೆಲ್ಲೊ ಮಾಟೊವ್. ತೆಣೆಂ ಕುವಾಳ್ಯಾಚೊ ಪೊಳೊವ್ ಆನಿ ವೊರ್ನಾಚೊ ಪರ್ಮಳ್, ವೊವ್ಳ್ಯಾಂಚ್ಯಾ ವದನಾಂನಿ ಧಾದೊಸ್ಕಾಯೆಚೊ ಹಾಸೊ. ಸಾಂಪ್ರದಾಯಿಕ್ ರೊಸಾಚೊ ಸಂಭ್ರಮ್ ತೊ. ಧುವೆಚ್ಯಾ ರೊಸಾಕ್ ಆಯ್‌ಲ್ಲ್ಯಾ ನವ್ಯಾ ಸಯ್ರ್ಯಾಂಕ್ ಯೆಜ್ಮಾನ್ಯಾನ್ ಮಾನಾನ್ ಮುಕ್ಲೆ ಪಂಗ್ತೆರ್ ಬಸಯ್ಲೆಂ ಆನಿ ಧುವೆಕ್ ರೊಸಾಕ್ ಬಸಯ್ಲೆಂ. ರೋಸ್ ಪುಸುನ್ ಜಾತಚ್ ಹೊಕ್ಲೆಕ್ ಅಭಿಶೇಕ್ ಕರುಂಕ್ ತರ್ನಾಟ್ಯಾಂನಿ ಧಂಯಾಂಚ್ಯೊ ಪೆಕೆಟಿ ಗುಪ್ತಿಂ ಭಾಯ್ರ್ ಕಾಡ್ಲ್ಯೊ. ತಿತ್ಲ್ಯಾರ್ ಹೆಣೆ ತೆಣೆ ಥಾವ್ನ್ ಚಾಚಾರ್ ಮೊಬಾಯ್ಲ್ ಕೆಮರಾ ಗೊಮ್ಟಿ ಲಾಂಬ್ ಕಾಡುಂಕ್ ಲಾಗ್ಲೆ.   

ಹೊಕ್ಲೆಕ್ ವೆಡೊ ಘಾಲ್ನ್ ಧಂಯ್ ವೊತ್ಚ್ಯಾ ಗಡಿಬಿಡಿಂತ್ ಎಕ್ಲ್ಯಾನ್ ಪಿಂದುನ್ ಚಿರ್ಡಿಲ್ಲ್ಯಾ ಪೆಕೆಟಿಂತ್ಲೆಂ ಧಂಯ್ ಉಸಾಳ್‌ಲ್ಲೆಂ ಮುಕ್ಲ್ಯಾ ಪಂಗ್ತಿರ್ ಬಸೊನ್ ಆಸ್‌ಲ್ಲ್ಯಾ ನವ್ಯಾ ಸಯ್ರ್ಯಾಂಚೆರ್! ಯೆಜ್ಮಾನಾಚ್ಯಾ ಮುಖಮಳಾ ವ್ಹಯ್ಲ್ಯೊ ಹಾಸೊ ಖಿಣಾನ್ ಮಾಯಾಗ್ ಜಾಲ್ಯೊ! ಹೊಕಲ್ ಬಾಯೆಚೆಂ ಮಾತೆಂ ಪುಸ್ಚೆ ಆದಿಂ ನವ್ಯಾ ಸಯ್ರ್ಯಾಂಚ್ಯಾ ಆಂಗಾವಯ್ಲೊ ರೋಸ್ ಪುಸುನ್ ಕಾಡಿಜೆ ಪಡ್ಲೊ.

ರೋಸ್ ಕಿತ್ಯಾಕ್ ಸುರ್‍ವಾತ್ಲೊ?

ಆಮ್ಚ್ಯಾ ಮಧೆಂ ರೋಸ್-ಕಾಜಾರ್ ಏಕ್ ಸಮುದಾಯಿಕ್ ಸಂಭ್ರಮ್. ರೆಸ್ಪೆರಾಕ್ ವೆಚ್ಯಾ ಆದ್ಲ್ಯಾ ದಿಸಾ ವಾ ತ್ಯೆಚ್ ಸಕಾಳಿಂ ದಾಯ್ಜಿ-ಸಯ್ರೆ-ವಾಡ್ಯಾಗಾರಾಂನಿ ಗುರ್ಕಾರಾಚ್ಯಾ ಮುಖೆಲ್ಪಣಾಖಾಲ್ ನಾರ್‍ಲ್ ಕಾಂತುನ್, ವಾನಾಂತ್ ವಾಟುನ್, ಗಾಳ್ನ್ ಕಾಡ್‌ಲ್ಲೊ, ಆಪುಟ್ ರೋಸ್ ಹೊಕ್ಲೆ/ನೊವ್ರ್ಯಾಕ್… ಬ್ಯಾಂಡಾಚ್ಯಾ ನಾದಾನ್, ಗರ್ನಾಳಿಚ್ಯಾ ಆವಾಜಾಸವೆಂ ಪುಸ್ಚೊ – ಆದಿಂ ಥಾವ್ನ್ ದೆಂವುನ್ ಆಯಿಲ್ಲಿ ರಿವಾಜ್. ನಾರ್‍ಲಾರೋಸ್ ಕೂಡ್ ನಿತಳ್ ಕರ್‍ನ್ ಕಾತ್ ಉಜಳಾಯ್ತಾ, ಪಿಡಾ ಆಡಯ್ತಾ ಜಾಲ್ಲ್ಯಾನ್ ಹೊಕೆಲ್-ನೊವ್ರ್ಯಾಕ್ ರೊಸಾಂತ್ ಮಾಖುನ್ ಹುನ್ ಉದ್ಕಾಂತ್ ನಾಣಂವ್ಚೆ ಆಸ್‌ಲ್ಲೆಂ. ಹಾಕಾ ಆಂಕ್ವಾರ್‌ಪಣಾಚೆಂ ನಿಮಾಣೆಂ ನಾಣ್ ಮ್ಹಣ್ತಾಲೆ. ರೊಸಾ ಥಾವ್ನ್ ಕಾತಿಕ್ ಮೆಳ್‌ಲ್ಲೊ ಪರ್ಜಳ್ ಮಾಜ್ವಾನಾಶೆಂ ರಾಕುಂಕ್ ಹೊಕಲ್ ನವ್ರ್ಯಾಕ್ ಭಾಯ್ರ್ ವೊತಾಕ್ ವ್ಹಚುಂಕ್ ಆಡ್ವಾರ್‌ಲ್ಲೆಂ. ಆಮ್ಚೆ ಮಾಲ್ಗಡೆ ಕೃಶಿಕ್ ವಾ ಕುಲಿ ಕಾಮಾಚೆ ಮನಿಸ್. ರಿಂಗೊ, ಶಿಕಾಯ್, ಸಾಂಗೊ ದಾಡವ್ನ್ ಆಂಗಾ-ಮ್ಹಾತ್ಯಾಕ್ ಸದಾಂ ನಾಂವ್ಚೆ ತೆ, ಕಾಜಾರಾಕ್ ತಯಾರ್ ಜಾತಾನಾ ಪುಣಿ ಇಲ್ಲೆಂ ಸೊಭಿತ್ ದಿಸಾಜೆ ಮ್ಹಳ್ಳೆಖಾತಿರ್ ಅಸಲಿ ಏಕ್ ರಿವಾಜ್ ಚಾಲ್ತೆರ್ ಆಯ್ಲಿ ಮ್ಹಣ್ತಾತ್. ಆಮ್ಚೆಮಧೆಂ ರೋಸ್ ತರ್ ಹಿಂದ್ವಾಮಧೆಂ ಮೆಹೆಂದಿ-ಹಲ್ಡಿಚಿ ರಿವಾಜ್ ಅಜೂನ್ ಚಾಲ್ತೆರ್ ಆಸಾ.   

ದುಬ್ಳಿಕಾಯೆಚ್ಯಾ ತ್ಯಾ ಕಾಳಾರ್ ಸಾಮಾನ್ಯ್ ದಿಸಾಂನಿ ನೀಸ್‌ಪೇಜ್, ಫೆಸ್ತಾ ಪರ್ಬೆಕ್ ಶೀತ್, ಕಡಿ ಜೆವ್ತಲ್ಯಾ ಲೊಕಾಕ್, ರೋಸಾ ದಿಸಾ ಪೊಳೊವ್ ಆನಿ ವೊರ್ನಾಚೆಂ ಜೆವಾಣ್. ಹೆಂ ಸಕ್ಕಡ್ ಮಾಂಡುನ್ ಹಾಡ್ಚ್ಯಾ ಘರ್‍ಚ್ಯಾ ಯೆಜ್ಮಾನ್ಯಾಕ್ ಕುಮಕ್ ಕರ್‍ಚ್ಯಾ ಇರಾದ್ಯಾನ್ ದಾಯ್ಜಾಂನಿ ಆನಿ ವಾಡ್ಯಾಗಾರಾಂನಿ ಸಾಂಗಾತಾ ಮೆಳೊನ್ ನಾರ್‍ಲ್, ತಾಂದುಳ್, ರಾಂದ್ವಯ್ ಹಾಚೆಂ ವೊಜೆಂ ಭಾಂದುನ್ ಸಂಭ್ರಮಾಚ್ಯಾ ಥೊಡ್ಯಾ ದಿಸಾಂ ಆದಿಂಚ್ ಕಾಜಾರಾಚ್ಯಾ ಘರಾ ಪಾವಿತ್ ಕರ್‍ಚೆ ಆಸ್‌ಲ್ಲೆಂ. ರೊಸಾಚ್ಯಾ ಸಕಾಳಿಂ ವಾಡ್ಯಾಗಾರಾಂನಿ ಸಾಂಗಾತಾ ಮೆಳೊನ್ ದುಕೊರ್ ಮಾರ್‍ನ್, ಸೆಜಾರ್‍ಚ್ಯಾ ಘರಾಂಥಾವ್ನ್ ರಾಂದ್ಪಾ ಆಯ್ದಾನಾಂ, ವಾನಾಂ ಆನಿ ಹೆರ್ ಗರ್ಜೆಚ್ಯೊ ವಸ್ತು ಹಾಡ್ನ್, ಶಿಂದಾಪ್ ಕರ್‍ನ್ ಆಳ್ಯಾನ್ ವಾಟುನ್ ರೊಸೊ ಘಾಲ್ನ್, ರೊಸಾಚೆಂ-ಕಾಜಾರಾಚೆಂ ರಾಂದಪ್ ತಯಾರ್ ಜಾತಾಲೆಂ. ಉಪ್ರಾಂತ್ ಮಾಡಿಯೊ ಚೀರ್‍ನ್ ಧರ್ಣಿರ್ ಘಾಲ್ಚ್ಯಾ ಕಾಂಬಿಯಾಂನಿ ಬಸೊನ್ ಶಿರೊತಿಚೆರ್ ರುಚಿಕ್ ಜೆವಾಣ್. ಹ್ಯಾ ಬಾಬ್ತಿಂ ನೀದ್ ಕಳ್ನ್ ಮಿನತ್ ಕಾಡ್‌ಲ್ಲ್ಯಾಂಕ್ ಸೊರೊ ದಿಂವ್ಚಿ ಸವಯ್ ಆಸ್‌ಲ್ಲಿ. ಥೊಡ್ಯಾಂಚ್ಯಾ ತ್ಯೆ ಸವಯೆಕ್ ಆಜ್ ಆಮಿ ಸಂಸ್ಕೃತಿ ಮ್ಹಣ್ ವೊಲಾಯ್ಲ್ಯಾ. ಆಯ್‌ಲ್ಲಿಂ ಸಯ್ರಿಂ ಹಫ್ತೊಭರ್ ಕಾಜಾರಾಚ್ಯಾ ಘರಾ ತಂಬು ಮಾರ್‍ತಾಲಿಂ. ಅಶೆಂ ರೊಸಾಚೆಂ ಕಾರ್‍ಯೆಂ ಸರ್ವಾಂಕ್ ಲಾಗಿಂ ಹಾಡ್ನ್ ಕುಮ್ಕೆಚೊ ಸೊಡ್‌ದೊಡಿಚೊ ಮನೋಭಾವ್ ಚಡಂವ್ಚೆ ಅರ್ಥಾಭರಿತ್ ಆಚರಣ್ ಜಾವ್ನಾಸ್‌ಲ್ಲೆಂ.

ಆಯ್ಚೊ ರೋಸ್ ಕಸಲೊ?

ಆಧುನಿಕತೆಚೆಂ ವಾರೆಂ ವ್ಹಾಳುಂಕ್ ಸುರು ಜಾತಾನಾ ಆಮ್ಚ್ಯಾ ಚಿಂತ್ಪಾಂತ್, ಜಿಣಿಯೆ ಶಯ್ಲೆಂತ್ ಆನಿ ಆಚರಣಾಂನಿ ಜಾಯ್ತಿ ಬದ್ಲಾವಣ್ ಆಯ್ಲಿ. ಬದ್ಲಾವಣ್ ವಾಡಾವಳಿಚೊ ಆನಿ ಅಭಿವೃದ್ಧೆಚೊ ಸಂಕೇತ್ ಮ್ಹಣ್ತಾತ್. ಪುಣ್ ನವೆಸಾಂವಾಚ್ಯಾ ನಿಬಾಟಿ ರೊಸಾಚಿ ಸಂಸ್ಕೃತಿ ಆಸ್‌ಲ್ಲಿ ತಿ ಆಜ್ ವಿಕೃತಿ ಜಾಲ್ಯಾಗೀ? ಆಜ್ ಆಮ್ಕಾ ಪಳೆಂವ್ಕ್ ಮೆಳ್ಚೆಂ ರೊಸಾಚೆಂ ಕಾರ್ಯೆಂ ಕಶೆಂ ಆಸಾ?

೧. ಆಮ್ಚಿ ಆರ್ಥಿಕ್ ಸ್ಥಿತಿ ಆಜ್ ಬರೀ ಸುಧಾರ್‍ಲ್ಯಾ. ದೆಕುನ್ ಕುಟ್ಮಾಂತ್ಲೆಂ ರೊಸಾಚೆಂ ಕಾರ್ಯೆಂ ಏಕ್ ಜಾತ್ರೊ ಉತ್ಸವ್ ಜಾಲಾ. ‘ಕೊಣಾಯ್ಚ್ಯಾ ಘರಾಂತ್ ಜಾಂವ್ಕ್ ನಾ ತಶೆಂ ಆಮ್ಚೆಂ ಜಾಯ್ಜೆ’ ಮ್ಹಳ್ಳ್ಯಾ ಗಿರಾಂತೆಕ್ ಸಾಂಪ್ಡಾಲ್ಲೆ ಜಾಯ್ತೆ ಆಸಾತ್. ಹರ್‍ಯೆಕ್ಲ್ಯಾಂಕ್ ವಿಭಿನ್ನ್ ಪ್ರಯೋಗ್ ಕರಿಜೆ.

೨. ಸಾಲಾಂತ್ ವೊವ್ಳ್ಯಾಂನಿ ಭಿತರ್ ಸರ್‍ತಾನಾಂಚ್ ಥಂಡ್ ಪೀವನ್ ಘೆವ್ನ್ ರಾವ್‌ಲ್ಲೊ ವೇಯ್ಟರ್ “ವೆಲ್‌ಕಮ್, ಉಲಾಯಿಕಮ್” ಮ್ಹಣ್ತಾ. ಪ್ಲೇಟಿಕ್ ಹಜಾರ್ ರುಪ್ಯಾಂಪ್ರಾಸ್ ಚಡ್ ಮೊಲಾಚಿಂ ಪಕ್ವನಾಂ. ಹೈಸ್ಕೂಲಾಚೆ ಭುರ್ಗೆ ಸಯ್ತ್ ಒಪನ್ ಬಾರ್ ಕೌಂಟರಾಲಾಗಿಂ ಉಮ್ಕೊಳ್ ಘೆತಾತ್!

೩. ಮುಕ್ಲೆ ಪಿಳ್ಗೆ ಆಮ್ಚಿ ರಿವಾಜ್ ದಾಕಯ್ಜೆ ಮ್ಹಳ್ಳೆಖಾತಿರ್ ಭಾಡ್ಯಾಚೆಂ ವೊಜೆಂ ವಾವೊವ್ನ್ ಹಾಡ್ತಾತ್. ಕೆಟರಿಂಗಾಚೊ ಪೊಳೊವ್ ತಯಾರ್ ಆಸ್ಲ್ಯಾರೀ ಮಾಟ್ವಾಂತ್ ಕುವಾಳ್ ಕಾತರ್‍ಚೊ ಡ್ರಾಮಾ ಜಾತಾ. ಇತ್ಲೆ ಸರ್ಭಾರಾಯೆನ್ ಕಾತರ್‍ಲಲೊ ಕುವಾಳೊ ದುಸ್ರ್ಯೆ ಸಕಾಳಿಂ ಕಚ್ರ್ಯಾ ಡಬ್ಬ್ಯಾಂತ್. ವೊಜ್ಯಾಕ್ ಹಾಡ್‌ಲ್ಲ್ಯಾ ತೆಂಡ್ಲಿ-ಬೊಬ್ಳ್ಯಾವಿಶಿಂ ಖಾಯಾಮ್ ದೊಡ್ಯಾ ಅರ್ಥಾಚೆಂ ಸಂಭಾಶಣ್. ಜಿಣ್ಯೆಂತ್ ಏಕ್ ದೀಸ್‌ಯೀ ಲುಂಗಿ-ಪುಡ್ವೆಂ ನೆಸನಾತ್ಲ್ಯಾಂಚಿ ತ್ಯಾ ಎಕಾ ದಿಸಾ ಪ್ರದರ್ಶನ್. ಕಾಂತ್ನ್ಯಾರ್ ಎದೊಳ್ ಘರಾ ಬಸೊನ್ ಆಸೊಂಕ್ ನಾ, ತ್ಯಾ ದಿಸಾ ಕೆಮರಾಮುಕಾರ್ ಲೆಹೆಂಗಾ ಘಾಲ್ನ್‌ಯೀ ಬಸಾಜೆ! 

೪. ಮ್ಯಾಚಿಂಗ್ ಟೀ-ಶರ್‍ಟಾರ್ ಬಾರಾ ದೆಡೆ ವಾ ದೆಡಿಯೊ. ದೆಡಿಯಾಂಕ್ ರೋಸ್ ಪುಸಿನಾಕಾತ್ ಮ್ಹಳ್ಯಾರೀ ವಾಟರ್ ಪಾರ್ಕಾಂತ್ ಕಾನಾಕ್ ವಾರೆಂ ರಿಗ್‌ಲ್ಲ್ಯಾ ಭುರ್ಗ್ಯಾಂಬರಿ ಥೊಡ್ಯಾಂಚೆಂ ವರ್ತನ್. 

೫.ವೊವಿಯೊ ರೊಸಾಚ್ಯಾ ಕಾರ್‍ಯಾಚೊ ಬರೊ ವಾಂಟೊ. ವೊವಿಯೊ ಮ್ಹಣ್ತೆಲ್ಯಾಂಕ್ ರಾಕೊನ್ ರಾವೊನ್, ತಿಂ ಆಯ್ಲ್ಯಾ ಉಪ್ರಾಂತ್ ರೊಸಾಚೆಂ ಕಾರ್ಯೆಂ ಸುರು ಕೆಲ್ಲೆಂ ಆಸಾ. ತಿಂ ಮಾಲ್ಗಡಿಂ ಪುಣಿ ಶಿಸ್ತೆನ್ ವೊವಿಯೊ ಗಾಯ್ತಾತ್. ಮಧೆಂಚ್ ಥೊಡಿಂ ಘುಸೊನ್, ಮೊಬಾಯ್ಲಾರ್ ಥಾಪುನ್ ಹಾಡ್‌ಲ್ಲಿಂ ಏಕ್ ದೋನ್ ಪೊಜ್ಡ್ಯೊ ವೊವಿಯೊ ಮಾರ್‍ನ್ ಆಪ್ಲೆಚ್ ಸೊಂಡಿಯೆಕ್ ಕರಿ ಪುಸುನ್ ವೆತಾತ್!

೬. ಆಜ್ ಡೆಸ್ಟಿನೇಶನ್ ವೆಡ್ಡಿಂಗ್ (Destination Wedding) ಮ್ಹಳ್ಳೆಂ ಟ್ರೆಂಡ್ ಸುರು ಜಾಲಾಂ. ಟ್ರೆಂಡಾಕ್ ಲಾಗೊನ್ ಹೊಕ್ಲೆಕ್ ಆನಿ ನೊವ್ರ್ಯಾಕ್ ಎಕಾಚ್ ಮಾಟ್ವಾಂತ್ ರೋಸ್ ಲಾಂವ್ಚೊ! ಹೊಕ್ಲೆಚ್ಯಾ ರೊಸಾಚ್ಯಾ ಕ್ಲ್ಯಾಯ್ಮೆಕ್ಸಾಂತ್ (Climax) ನೊವ್ರ್ಯಾಚಿ ಏಕ್ ಸರ್‌ಪ್ರಯ್ಜ್ (Surprise) ಎಂಟ್ರಿ, ಆನಿ ಕಾಜಾರಾಚ್ಯಾ First Waltzಕ್ ಟ್ರಾಯಲ್ ಮ್ಹಳ್ಳೆಪರಿಂ ರೊಸಾಚ್ಯಾ ಮಾಟ್ವಾಂತ್‌ಚ್ ಹೊಕಲ್ ನೊವ್ರ್ಯಾಚೊ ನಾಚ್. ತೆಣೆಂ ದಾರುಂ ಲಾಸ್ಚೆಂ ಮೆಗಾ ಕಾರ್ಯೆಂ, ಹೆಣೆಂ ಡಿಜೆ ಆನಿ ಬ್ಯಾಂಡಾಚ್ಯಾಂಕ್ ದೊಗಾಂಯ್ಕಿ ಆಪವ್ನ್ ಎಕ್ಲೊ ರಾವಯ್ತಾನಾ ಅನ್ಯೆಕ್ಲೊ ಫುಂಕ್ತಾ! ವೊವ್ಳ್ಯಾಂನಿ ಘರಾಥಾವ್ನ್ ಯೆತನಾ ದಾಂಪ್‌ಲ್ಲೆಂ ತೋಂಡ್ ಉಗ್ತೆಂ ಕರ್‍ಚೆಂ ಏಕ್ ಜಾಂಬಾಯೊ ಕಾಡುಂಕ್ ಆನಿ ಮಾಗಿರ್ ಚಿಕನ್ ಪೀಸ್ ಚೆಪುಂಕ್! ಕೊ‌ಆಣ್ಯ್ಕಿ ಎಕಾಮೆಕಾ ಉಲಂವ್ಕ್ ಆವ್ಕಾಸ್ ನಾ.  

೭. ಸೊಭಾಣಾಚ್ಯಾ ಕಾರ್ಯಾಂಕ್ ನೆಸಣ್ ಸೊಭಿತ್ ಆಸಾಜೆ ವ್ಹಯ್. ಪುಣ್ ಆಜ್ ನೆಸಣ್ ಆಂಗಾರ್ ಆಸಾಜೆ ಮ್ಹಣ್ ಉಡಾಸ್ ಕರಿಜೆ ಪಡ್ಲಾ. ಕಾರ್ಯಾಕ್ ಭುರ್ಗಿಂ ಯೆತಾತ್, ಪ್ರಾಯ್ವಂತಾಂ ಆನಿ ಪಿಡೆಸ್ತಾಂಯ್ ಯೆತಾತ್. ಎಕಾ ಪಾಟ್ಲ್ಯಾನ್ ಎಕ್ಲ್ಯಾಚೊ ನಾಚ್ ಮುಗ್ದಾನಾ, ಜೆವಣ್ ವೆಳಾರ್ ಮೆಳನಾ. ತ್ಯಾ ಭಾಯ್ರ್ ಆತಾಂ ಫ್ಲ್ಯಾಶ್‌ಮೊಬ್ (Flastmob) ಆನಿ ಬಾಲ್ ರೂಮ್ ನಂಬರ್‍ಸ್ ಸುರು ಜಾಲ್ಯಾಂತ್.

ರೋಸ್ ಪರ್‍ತ್ಯಾನ್ ರೊಸಾಳ್ ಕರ್‍ಯಾಂಗೀ?

ರೋಸ್ ಡೀಸೆಂಟ್ ಆನಿ ಅರ್ಥಾಭರಿತ್ ಜಾಯ್ಜೆ ಮ್ಹಣ್ ಸಕ್ಡಾಂಕ್ ಆಶಾ ಆಸಾ. ಪುಣ್ ಹೆರಾಂಗೆರ್ ತಸೊ ಜಾಲ್ಯಾರ್ ಬರೊ ಮ್ಹಣ್ ಆಶೆಂವ್ಚೆಂ ಸೊಡ್ಲ್ಯಾರ್, ಆಪ್ಣಾಗೆರ್ ಬರೆಂ ಫಾಲೆಂ ಜಾತಾನಾ ಹೆರಾಂಗೆರ್ ಕೆಲ್ಲ್ಯಾಚ್ಯಾಕೀ 10 ವಾಂಟ್ಯಾಂನಿ ಚಡ್ ವೀದ್‌ವಾವ್ಳಿ ಕರ್‍ಚ್ಯಾಂತ್ ಆಮ್ಚೊ ಉಕಲ್ಲಲೊ ಹಾತ್! ಬದ್ಲಾವಣ್ ಮ್ಹಜೆ ಥಾವ್ನ್, ಮ್ಹಜ್ಯಾ ಘರಾಥಾವ್ನ್ ಸುರು ಜಾಯ್ಜೆ. ಹ್ಯಾ ದಿಶೆನ್ ಅಶೆಂ ಕೆಲ್ಯಾರ್ ಕಶೆಂ? 

೧. ರೊಸಾ ಸಂಭ್ರಮಾಚ್ಯಾ ಮಾಟ್ವಾಂತ್ ಕೃಶಿ ಸಂಬಂಧಿತ್ ವಸ್ತು ದವರ್‍ನ್, ಆಮ್ಚ್ಯಾ ಮಾಲ್ಘಡ್ಯಾಂನಿ ವಾಪಾರ್‌ಲ್ಲ್ಯಾ ರುಕಾಡಾಚ್ಯಾ ರಾಂದ್ಪಾ ವಸ್ತುಂನಿ ವೆದಿ ಸಜವ್ನ್, ಆಯ್‌ಲ್ಲ್ಯಾ ವೊವ್ಳ್ಯಾಂಕ್ ಯೆವ್ಕಾರ್ ಮಾಗೊಂಕ್ ಯೆಜ್ಮಾನ್-ಯೆಜ್ಮಾನಿನ್ ಪಾನ್‌ಪೋಡ್ ಉದಕ್ ಘೆವ್ನ್ ಮುಕಾರ್ ರಾವೊಂದಿತ್. 

೨. ನಾರ್‍ಲ್ ಫೊಡ್ಚೆಂ, ಕುವಾಳೊ ಕಾತರ್‍ಚೊ ಸಗ್ಳೆಂಯ್ ಫೋಟೋ-ವಿಡಿಯೊ ಖಾತಿರ್ ಮ್ಹಣ್ ಸಕ್ಡಾಂಕ್ ಕಳಿತ್ ಆಸಾ. ತರ್ ತೆಂ ಕಾಮ್ ಕಾರ್ಯೆಂ ಸುರ್ವಾತುಂಚ್ಯಾ ಎಕಾ ವೊರಾ ಪಯ್ಲೆಂ ಘರಾಚ್ ಕುಟ್ಮಾಕ್ ಲಾಗ್ಶಿಲ್ಯಾಂನಿ ಕೆಲ್ಯಾರ್ ಕುಟ್ಮಾ ಭಾಂದ್‌ಯಿ ಉರ್‍ತಾ, ಹೊಲಾಂತ್ ಸಯ್ರ್ಯಾಂಚ್ಯಾ ಮೊಲಾದಿಕ್ ವೆಳಾಕ್ ಮೋಲ್ ದಿಲ್ಲೆಬರಿ ಜಾತಾ.  

೩. ವೊಜ್ಯಾಚೆಂ ಕಾರ್ಯೆಂ ಬಂಧ್ ಕರ್‍ಯಾಂ. ಅನಾವಶ್ಯ್ ಸುಕ್ಯಾ ಆಚರಣಾಂನಿ ವೇಳ್ ವಿಭಾಡ್ಚೊ ಸೊಡ್ಯಾಂ.

೪. ವೊವಿಯೊ ಗಾಂವ್ಕ್ ಮಾತ್ರ್ ನ್ಹಯ್, ಜಾಪಿ ದಿಂವ್ಕ್ ಸಯ್ತ್ ಥೊಡ್ಯಾಂಕ್ ವಿಂಚುನ್ ಕಾಡ್ಚೆಂ ಆಜ್ ಗರ್ಜ್ ಮ್ಹಣ್ ದಿಸ್ತಾ. ನವ್ಯೆ ಪಿಳ್ಗೆಕ್ ವೊವಿಯೊ, ವೇರ್ಸ್, ಗುಮ್ಟಾಂ ಪದಾಂಚ್ಯೆ ತರ್‍ಬೆತಿ ಕಾರ್‍ಯಾಗಾರಾಂಕ್ ಧಾಡ್ಚೆಂ ಬರೆಂ ಮನ್ ದಾಕವ್ಯಾಂ. ಪೊಜ್ಡ್ಯೊ ಆನಿ ಪೆಂಕ್ಟಾಸಕಯ್ಲ್ಯೊ ವೊವಿಯೊ ಕೊಣಿ ಸಾಂಗ್ತಾ ತರ್ ಹೆರಾಂನಿ ಜಾಪಿ ದೀನಾಸ್ತಾಂ ಮೌನ್ ಸಾಂಬಾಳ್ಳ್ಯಾರ್ ಅಪಾಪಿಂಚ್ ಹಿ ಚಾಲ್ ಉಣಿ ಜಾಯ್ತ್.

೫. ರೊಸಾದಿಸಾ ದೆಡಿಯಾಂಕ್ ರೋಸ್ ಪುಸ್ಲ್ಯಾರ್ ತಾಂಕಾಂ ನಾಂವ್ಕ್ ದುಸ್ರಿ ವೆವಸ್ಥಾ ಆನಿ ಚಡಿತ್ ವೇಳ್ ಜಾಯ್ ಪಡ್ತಾ. ದೆಕುನ್ ಹೊ ಅನಾಚರ್ ಚುಕಂವ್ಚೊ ಬರೊ. ದುಸ್ರೆಂ, ಘರ್‍ಚ್ಯಾಂನಿ ರೊಸಾಚಿ ಘನತಾ ಸಾಂಬಾಳುನ್ ತಾಂಚ್ಯಾ ಮನ್ಶಾಂಕ್ ಪಯ್ಲೆಂಚ್ ‘ರೋಸ್ ಹೊಕ್ಲೆ/ನವ್ರ್ಯಾಕ್ ಮಾತ್ರ್ ಪುಸ್ಚೊ’ ಮ್ಹಣ್ ನಿರ್ಧಾರ್ ಸಮ್ಜಯ್ಲ್ಯಾರ್ ಸಮಸ್ಸೊ ಉದೆನಾ.  

೬. ಕಾರ್ಯೆಂ ಜಾಂವ್ಚೆಂ ಗಾಂವಾಂತ್ ಜಾಲ್ಲ್ಯಾನ್ ಹೆರ್ ಧರ್ಮಾಚೊ ಲೋಕ್‌ಯಿ ಆಮ್ಚೆಮಧೆಂ ಆಸ್ತಾ. ಕಾರ್ಯಾಚಿ ಭಾಸ್ ಆಜ್ ಕೊಂಕ್ಣಿ ಸೊಡ್ನ್ ಇಂಗ್ಲಿಶಾಕ್ ಘುಂವ್ಲ್ಯಾ. ಹೊಕಲ್-ನವ್ರೊ ಇಂಗ್ಲಿಶ್ ಮಿಡೀಯಾಮಾಚಿಂ ಜಾಂವ್ಕ್ ಪುರೊ, ತಾಂಚಿಂ ವ್ಹಡಿಲಾಂ ಆನಿ ಆಯಿಲ್ಲೆ ಸಯ್ರೆ ಸದಾಂನೀತ್ ಕೊಂಕ್ಣಿ/ತುಳು/ಕನ್ನಡ ಉಸ್ವಾಸ್ ಸೆಂವ್ಚೆ. ತರ್ ಹೊ ಇಂಗ್ಲಿಶ್ ನಾಟಕ್ ಕೊಣಾಕ್ ಮೆಚ್ವೊಂಕ್! ಭೊವ್‌ಶಾ ಎಮ್ಸಿಚ್ಯೆ ಜಿಬೆರ್ ಕನ್ನಡಚೆ, ತುಳ್ವೆಚೆ ಆನಿ ಕೊಂಕ್ಣೆಚೆ ಸಬ್ದ್ ಸಾರ್ಕೆ ಘೊಳಾನಾಂತ್ ಮ್ಹಣ್ ಆಮಿ ಚಿಂತಿಜೆ! 70% ಇಂಗ್ಲಿಶ್, 30%ಕೊಂಕ್ಣಿ ಕಾರ್ಯೆಂ ಆಜ್ ಜಾಂವ್ಚೆಂ ಪಳೆತಾನಾ ಆಮಿ ಗಾಂವಾಂತ್ ಆಸಾಂವ್ ವಾ ಪರ್ಗಾಂವಾಂತ್ ಮ್ಹಳ್ಳೊ ದುಬಾವ್ ಜಾತಾ.

೭. ಕಾರ್ಯೆಂ ನಿರ್ವಾಹಣ್ ಆಜ್ ಏಕ್ ವೃತ್ತಿ ವಾ ಪ್ರೊಫೆಶನ್. ದೆಕುನ್ ತಾಂಕಾಂಯ್ ಗೌರವ್ ಜಾಯ್. ಪಯ್ಲೆಂ ಘಾಲ್ಲಿ ಮಾಂಡಾವಳ್ ದೆಗೆಕ್ ದವ್ರುನ್ ನೆಮ್ಲಲ್ಯಾ ದಿಸಾ ಕಾರ್ಯಾಚೆಂ ಸುಂಕಾಣ್ ಘರ್‍ಚಿ ಯೆಜ್ಮಾನ್ ಧರಿತ್ ತರ್ ಕಶ್ಟ್ ಜಾತಿತ್. ಕಾರ್ಯಾ ನಿರ್ವಾಹಕಾಕ್ ಮನ್ ನಾತ್ಲ್ಯಾರೀ ಘರ್‍ಚ್ಯಾಂನಿ ಫರ್ಮಾಂವ್ಚ್ಯಾ ಥೊಡ್ಯಾ ಸಂಗ್ತಿಂಕ್ ಸಹಮತ್ ಘಾಲುಂಕ್ ಲಾಂವ್ಚೆಂ ಚುಕಿಚೆಂ.  

೮. ಆಮ್ಚ್ಯಾ ರೊಸಾಚ್ಯಾ ಕಾರ್‍ಯಾಕ್ ರಾತಿಂ ಆಟ್ ವೊರಾಂ ಜಾಲ್ಯಾರಿ ಸಯ್ರಿಂಚ್ ಯೇವ್ನಾಂv, ಮ್ಹಳ್ಳಿ ಖಂತ್ ಆಸ್ಚಿಚ್. ಹೆರಾಂಗೆರ್ ಸೊಭಾಣ್ ಆಸ್ತಾನಾ ಆಮಿ ವೆಳಾರ್ ವೆಚಿ ಸವಯ್ ಕೆಲ್ಯಾರ್ ಆಮ್ಚ್ಯಾ ಘರ್‍ಚ್ಯಾ ಕಾರ್ಯಾಕ್ ಲೋಕ್ ವೆಳಾರ್ ಯೇತ್ ಕೊಣ್ಣಾ.

೯. ರೋಸ್ ಏಕ್ ಸಮುದಾಯಿಕ್/ಸಮಾಜಿಕ್/ಸಾಂಸ್ಕೃತಿಕ್ ಕಾರ್ಯೆಂ, ಸಾಕ್ರಾಮೆಂತ್ ನ್ಹಯ್. ದೆಕುನ್ ಯಾಜಕ್ ಆಸಾಜೆಚ್ (ಆಸ್ಲ್ಯಾರ್ ಸಂತೊಸ್), ಪಾಂಚ್ ಖಣ್ ತೇರ್ಸ್ ಕರಿಜೆಚ್ ಮ್ಹಳ್ಳೊ ವಾದ್ ಗರ್ಜೆಭಾಯ್ಲೊ. ರೊಸಾಂತ್ ಪವಿತ್ರ್‌ಪಣ್ ಜರೂರ್ ಆಸಾ. ಪುಣ್ ತಾಕಾ ಲಾಗೊನ್ ಲಾಂಬ್ ಮಾಗ್ಣ್ಯಾವಿಧಿ, ರೊಸಾವಾಟ್ಲಿ ಬೆಂಜಾರ್ ಕರ್‍ಚಿ – ಅಸಲ್ಯಾ ರಿವಾಜಿಂಕ್ ಜಲ್ಮ್ ದಿಂವ್ಚೆಂ ಗರ್ಜ್ ನಾ. ಮೀತ್ ಚುಕೊನ್ ಕರ್‍ಚೆಂ ಖಂಯ್ಚೆಯ್ ರೂಚ್ ಹೊಗ್ಡಾಯ್ತಾ.

ಮನ್ಶಾಚೆಂ ಜಿವಿತ್, ಚಾಲ್‌ಚಮ್ಕಾಣ್ ಆನಿ ರಿವಾಜಿ ಎಕಾ ಕಾಳಾ ಥಾವ್ನ್ ಅನ್ಯೇಕಾ ಕಾಳಾಕ್ ರುಪಾಂತರ್ ಜಾಯಿತ್ ವೆತಾತ್. ಪುಣ್ ಸಂಸ್ಕೃತಿಂತ್ ಏಕ್ ಅತ್ಮೊ ಆಸಾ, ತೊ ಬದ್ಲನಾ. ಭಾಯ್ಲಿಂ ಆಚರಣಾಂ ರುಪಾಂತರ್ ಜಾಯಿತ್ ವೆತಾತ್, ಪುಣ್ ಎಕ್ಯೆ ರಿವಾಜಿಚೊ ಮೂಳ್ ಉದ್ದೇಶ್ ತೊಚ್ ಉರ್‍ತಾ. ದೆಕುನ್ ಕಸಲೆಂಯ್ ಆಚರಣ್ ತೊ ಮೂಳ್ ಉದ್ದೇಶ್ ಭಂಗಯ್ನಾ ಜಾಂವ್. ಹೊ ಉದ್ದೇಶ್ ಮುಕ್ಲೆ ಪಿಳ್ಗೆಕ್ ಹಾತಾಂತರ್ ಕರ್‍ಚಿ ಜವಾಬ್ದಾರಿ ಆಮ್ಕಾಂ ಆಸಾ. ‘ಆಮ್ಚೊ ದುಡು, ಆಮ್ಚೆಂ ಕಾರ್‍ಯೆಂ, ಆಮ್ಕಾಂ ಜಾಯ್ ಜಾಲ್ಲೆಬರಿ ಚಲಯ್ತಾಂವ್’ ಮ್ಹಳ್ಳೊ ವಾದ್ ಮಾಂಡ್ಯೆತ್. ಅಶೆಂ ಕೆಲ್ಯಾರ್ ಫಾಲ್ಯಾಂ, ‘ರೋಸ್’ ಮ್ಹಳ್ಳೊ ಫಕತ್ ‘Pre-Wedding Event’ ವಾ ‘ಬ್ಯಾಚುಲರ್ ಪಾರ್ಟಿ’ ಮ್ಹಣ್ ಮುಕಾರುನ್ ವ್ಹಚತ್ ಆನಿ ‘ರೋಸ್’ ಮ್ಹಳ್ಳೊ ವಾಡ್ಯಾಚ್ಯಾ ದಿಸಾ ವೆದಿಚೆರ್ ಅಭಿನಯ್ ಕರ್‍ನ್ ದಾಕಂವ್ಚ್ಯಾಕ್ ಸೀಮಿತ್ ಉರತ್. ಚಿಂತುನ್ ಪಳೆಯಾ!

✍️ –ಮನೋಜ್ ಫೆರ್ನಾಂಡಿಸ್, ಕಿರೆಂ