ಜೆಜುಚ್ಯಾ ಶಿಸಾಂನಿ ತಾಂಚ್ಯಾ ಸಂಪ್ರದಾಯಾ ಪರ್ಮಾಣೆಂ, ದೆಂವೊನ್ ಆಯ್ಲೆಲ್ಯೆ ರಿತಿ ಪರ್ಮಾಣೆ ಮಾಗ್ಚೆಂ ಆಸ್ಲೆಂ. ಜೆಜು ತಾಚ್ಯಾ ಇತ್ಲ್ಯಾಕ್ ಮಾಗ್ತಾಲೊ. ತಾಣೆಂ ’ತುಮ್ಚೆ ಮಾಗ್ಣೆಂ ಸಮಾ ನಾ’ ಮ್ಹಣ್ ಶಿಣ್ ಉಚಾರ್‌ಲ್ಲೊ ನಾ. ಶಿಸಾನಿಂಚ್ “ಆಮ್ಕಾಂ ಮಾಗೊಂಕ್ ಶಿಕಯ್” ಮ್ಹಣ್ ವಿಚಾರ‍್ತಾನಾ ತಾಣೆಂ ಮಾಗ್ಣೆಂ ಕರುಂಕ್ ಶಿಕಯ್ಲೆಂ ತಾಚೊ ಫಳ್ ’ಆಮ್ಚಾ ಬಾಪಾ’ ಮಾಗ್ಣೆಂ.

ಶಿಕ್ಷಕ್ ಜಾಯ್ಜೆ ತರ್ ತಾಣೆಂ TCH, B.Ed, M.Ed ಶಿಕ್ಷಕ್ ತರ್ಭೆತಿ ಜೊಡಿಜೆ. ಪಯ್ಲೆಂ ಪಿಯುಸಿಕ್ ಕೇವಲ್ ಸ್ನಾತ್‌ಕೋತ್ತರ್ ಪದ್ವಿ ಆಸ್ಲ್ಯಾರ್ ಪಾವ್ತಾಲೆಂ. ಆತಾಂ ತಾಕಾಯ್ B.Ed ಕಡ್ಡಾಯ್. ಪದ್ವೆಕ್ ಶಿಕಯ್ತೆಲ್ಯಾಂಕ್ SET, NET ಕಡ್ಡಾಯ್ ತರೀ ತಾಣಿ Phd, Mphil ಕರುಂಕ್ ಆಸಾ. ಹಾಂತು ತುಜಾ ಆಸಕ್ತೆಚೊ ವಿಶಯ್ ಮ್ಹಳ್ಯಾರ್ ಭಾಸ್ (Language) ಆನಿ ವಿಗ್ಯಾನ್ (Core Subject) ಶಿಕಂವ್ಚೆ ಕಶೆಂ ಮ್ಹಳ್ಳೆವಿಶಿಂ ತರ್ಭೆತಿ ಮೆಳ್ತಾ.

ಶಿಕ್ಷಕಾನ್ ಶಿಕೊಂವ್ಚೆಂ ಆನಿ ವಿದ್ಯಾರ್ಥಿನಿ ಶಿಕ್ಚೆಂ. ಹಾಂಚೆ ಮಧೆಂ ಗುರು-ಶಿಸಾಚೊ ಸಂಬಂಧ್ ರುತಾ ಜಾತಾ. ಶಿಕ್ಷಕಾನ್ ಶಿಕೊಂವ್ಚೆಂ ವಿದ್ಯಾರ್ಥಿಂಚ್ಯಾ ತಕ್ಲೆ ವಯ್ಲ್ಯಾನ್ ವಚೊಂಕ್ ನಜೊ ಯಾ ಭುಜಾಂ ಸಕ್ಲಾಯ್ ದೆವೊಂಕ್ ನಜೊ. ತೆಂ ಶೀದಾ ಮೆದ್ವಾಂತ್ ರಿಗಾಜೆ. ದೆಕುನ್ ತಾಣಿಂ ಕಾನಾಂನಿ ಆಯ್ಕಾಜೆ, ತರ್ಕ್ ಕರಿಜೆ ಆನಿ ಮನಾಂತ್ ಗ್ರಾಸಿಜೆ. ಹಿ ಪ್ರಕ್ರಿಯಾ ಘಡ್ಚಿ ಶಿಕ್ಷಕ್ ಸಮುದಾಯಾನ್ ಆಪ್ಣೆಂ ಶಿಕಂವ್ಚೊ ವಿಶಯ್ ವೈಚಾರಿಕ್ ದೃಷ್ಟೆನ್ ಸಮ್ಜಯ್ತಾನಾ. ಹ್ಯಾ ವೆಳಾ ಶಿಕ್ಶಕಾನ್ ಪ್ರಚಲಿತ್ ವಿಷಯಾಂಚೆರ್ ಕೋರಿಲೇಶನ್ ಕರಿಜೆಚ್. ಪಾಠ್ ಸಿಲೆಬಸ್ ಠರಯ್ತಾನಾ ಸಿದ್ಧ್ ಜಾವ್ನ್ ಆಸ್ತಾತ್. ತೆ ವಿಶಯ್ ಖಂಯ್ಚ್ಯಾಗೀ ಕಾಳಾರ್ ಲಿಖ್ಲಲೆ ಆಸ್ಯೆತ್. ಭುರ್ಗಿಂ ಆತಾಂಚ್ಯಾ ಕಾಳಾಚಿಂ; ಮ್ಹಳ್ಯಾರ್ ಪಾಠ್ 2G ವಿದ್ಯಾರ್ಥಿ 5G ತರ್ ಶಿಕ್ಷಕ್ 3G ಆಸ್ತಾ! ಹೊ ಅಂತರ್ ತುಲಾನಾತ್ಮಕ್ ರಿತಿನ್ ಶಿಕೊಂವ್ಚಾ ವರ್ವಿಂ ಉಣೊ ಕರ್‍ಯೆತ್. ತಶೆಂ ಕರ್‍ತಾನಾ ಥೊಡ್ಯಾಂಕ್ ಗಳ್ಯಾ ಕಡೆ ಲಾಸ್ತಾ! ದೆಕುನ್ 2014 ಉಪ್ರಾಂತ್ ಆಜ್ ವರೇಗ್ ನಿವೃತ್ತ್ ಜಾವ್ನ್ ವೆಚ್ಯಾ ಶಿಕ್ಷಕಾಂಕ್ ಹಾಂವ್ ಲಕ್ಕಿ ಮ್ಹಣ್ತಾಂ. ತುಮಿ ನಿಜಾಯ್ಕಿ ನಶೀಬ್‌ವಂತ್.

ಹಾಂವ್ ಕಾಲೇಜ್ ಕರ್‍ತಾನಾ ಇತಿಹಾಸ್ ಶಿಕಂವ್ಚೊ ಪ್ರೊಫೆಸರ್, ಜಾತಿನ್ ಬಾಮುಣ್, ಭಾರತಾಂತ್ ನವ್ಯಾ ಧರ್ಮಾಚೆಂ ಉಗಮ್ ಪಾಠ್ ಕರ್‍ತಾನಾ ವ್ಹಯ್ಲೆಭಾರ್ ಶಿಕವ್ನ್ ವೆಚೊ ತೊ ಮಧ್ಯಕಾಳೀನ್ ಯುರೊಪಾ ವಿಶಿಂ ಪಾವ್ತನಾ ತಾಚೊ ತಾಳೊ ಪಿಂದ್ತಾಲೊ. ಭೃಷ್ಟ್ ಪಾಪಾ, ಕ್ರಾಂತಿಕ್ ಕಾರಣ್ ಜಾಲ್ಲಿಂ ಪುರ್ವಿತಾಂಚಿಂ ಧೋರಣಾಂ, ರಾಜಕಾರಣಾಂತ್ ಧರ್ಮಾಚೊ ಹಸ್ತ್’ಕ್ಶೇಪ್.. ಹೆಂ ಪುರಾ ದಾಂಬೂನ್ ಸಾಂಗ್ತಾಲೊ. ಸಾಂಗೊಡಿ ಜೆಮೆಲ್ಯಾರ್ ಹಾಂವ್ ರಾಗಾನ್ ಪೆಟ್ತಾಲೊಂ. ಹಾಕಾ ಹುದ್ದೊ, ಕಾಮ್, ಮಾನ್ ದಿಲ್ಲೊ ಆಮ್ಚ್ಯಾ ಸಂಸ್ಥ್ಯಾನ್. ತೆಂ ವಿಸ್ರೊನ್ ಜಾಗೃತ್ ಜಾವ್ನ್ ಗರ್ಜೆಭಾಯ್ರ್ ತೊ ವೊಂಕ್ತಾಲೊ. ಆನೆಕ್ಲೊ ಇಂಗ್ಲಿಷ್ ಪ್ರೊಫೆಸರ್ ಕ್ರಿಸ್ತಾಂವಾಂಕ್ ’ಪೋರ್ಕ್ ಕಮ್ಯೂನಿಟಿ’ ಮ್ಹಣ್ ತಮಾಸೊ ಕರ‍್ನ್ ಆಮ್ಚಾ ಸಮುದಾಯಚಾಂಕ್ ಜಾಯ್ ಮ್ಹಣ್ ಇಂಟರ್ನಲ್ಸಾಂತ್ ಉಣೆ ದಿತಾಲೊ. ಪುಣ್ ಆಮಿ ಹಾಕಾ ಕೋಮುವಾದಾಚೊ ರಂಗ್ ಭರ್‌ಲ್ಲೊ ನಾ. ಕಿತ್ಯಾಕ್ ತವಳ್ಚಿ ಸಮಾಜ್, ಮಾಧ್ಯಮಾಂ ಆನಿ ಸರ್ಕಾರ್ ಅಸಲ್ಯಾ ಸಂಗ್ತಿಕ್ ಚಡ್ ಗುಮಾನ್ ಯಾ ಪ್ರಚೋದನ್ ದಿನಾತ್ಲಿಂ.

ಆತಾಂಚ್ಯಾ ಭುರ್ಗ್ಯಾಂಚ್ಯಾ ವ್ಹಡಿಲಾಂಕ್, ಆಡಳ್ತ್ಯಾ ಮಂಡಳಿಕ್, ಸಂಸ್ಥ್ಯಾಚ್ಯಾ ವ್ಹಡಿಲಾಂಕ್, ಜಾಯ್ ಕೇವಲ್ ಮಾರ್ಕ್, ಮಾರ್ಕ್ ಆನಿ ಕೇವಲ್ ಮಾರ್ಕ್. ದೆಕುನ್ ಮಾವ್ಲ್ಯಾಂ, ಆದರ್ಶ್, ಶೆಗುಣ್, ಹಾಕಾ ಮಾರ್‍ಲಿ ಶೆಂಡಿ. ಹಿಂಚ್ ಮಾರ್ಕ್ ಜೊಡ್’ಲ್ಲಿಂ ಭುರ್ಗಿಂ ಸಮಾಜ್ ಆನಿ ಸಮುದಾಯಾಂತ್ ರಿಮಾರ್ಕಾಚಿಂ ಜಾಂವ್ಕ್ ಪಾವ್ತಾತ್. ಕಾರಣ್ ಆಮ್ಕಾಂ 100% ರಿಸಲ್ಟ್ ಜಾಯ್, ಇಸ್ಕೊಲಾ ಮುಕಾರ್ ಜಯ್ತ್ ಬ್ಯಾನರ್ ಜಾಯ್. ದೆಕುನ್ ಕ್ಲಾಸಿಂತ್, ಟ್ಯೂಶನಾಂತ್, ಕೋಚಿಗಾಂತ್ ಶಿಕಂವ್ಚೆಂ ಕೇವಲ್ ಮಾರ್ಕ್ ಕಾಡುಂಕ್. ಹ್ಯಾ ಕಾರಣಾಕ್ ಶಿಕ್ಷಕ್ ಸಮುದಾಯ್ ವಿದ್ಯಾರ್ಥಿಂಕ್ ಕೇವಲ್ ಮಾರ್ಕ್ ಕಾಡುಂಕ್ ಶಿಕಯ್ತಾ, ವಯ್ಚಾರಿಕತಾ ವಿಸ್ರಾತಾ.

ಕಾಂಯ್ ಥೊಡಿಂ ಶಿಕ್ಷಕಾಂ ಕ್ಲಾಸ್‌ ರೂಮಾನಿ ಪ್ರಚಲಿತ್ ವಿಶಯಾಂಚೆರ್ ಚರ್ಚಾ, ತರ್ಕ್ ಕರುಂಕ್ ಆಸ್ಪದ್ ದಿತಾತ್, ಪಾಠ್ ವಿವರಣ್ ದಿತನಾ ಪ್ರಚಲಿತ್ ಸಂಗ್ತೆಚೆರ್ ತುಲನ್ ಕರ್‍ತಾತ್. ವಿಶಯಾ ಪಾಟ್ಲೊ ಇರಾದೊ ಸ್ಪಷ್ಟ್ ಕರ್‍ತಾತ್. ಎಕಾ ಉತ್ರಾನ್ ಸಾಂಗ್ಚೆ ತರ್ ರಿಸ್ಕ್ ಘೆತಾತ್. ಹ್ಯಾ ವರ್ವಿಂ ಭುರ್ಗ್ಯಾಂಕ್ ಜಿಣಿಯೆಚ್ಯಾ ಘುಂವ್ಡೆಂನಿ ರಿಸ್ಕ್ ಘೆಂವ್ಕ್ ಶಿಕಯ್ತಾತ್. ದೆಕುನ್ ಕರ್ನಾಟಕ್ ಸರ್ಕಾರಾನ್ ಇಸ್ಕೊಲಾಚ್ಯಾ ದಾರ್ವಟ್ಯಾರ್ ‘ಧೈರ್ಯವಾಗಿ ಪ್ರಶ್ನಿಸು’ ಮ್ಹಣ್ ಬರಂವ್ಕ್ ತಾಕೀದ್ ದಿಲ್ಯಾ. ಹಾಂವ್ ಮ್ಹಣ್ತಾ’ ’ಧೈರ್ಯವಾಗಿ ಭೊದಿಸು!’ ಶಿಕ್ಷಕ್ ಸಮುದಾಯಾಕ್ ಧಯ್ರ್ ಉಣೆಂ ಜಾಲಾಂ. ತ್ಯಾ ದೆಕುನ್ ಚಡ್ ವಿವರಣ್ ದಿಂವ್ಕ್ ವಚನಾಂತ್. ಹಾಕಾ ದೋನ್ ಕಾರಣಾಂ: ಚಡ್ತಿಕ್ ವಿವರಣ್ ದಿಲೆಂ ತರ್ ‘ವಿವಾದ್’ ಜಾತಾ, ವಾ ಚಡ್ತಿಕ್ ಸಾಂಗೊಂಕ್ ಜಾಣ್ವಾಯ್ ನಾ! ಕಿತ್ಯಾಕ್ ವಾಚಾಪ್ ಉಣೆಂ ಜಾಲಾಂ. ಜಾಣ್ವಾಯ್ ನಾತ್’ಲ್ಲೆ ಬುಕಾಂತ್ಲೆಂ ವಾಚುನ್ ವೆತಾತ್ ಆನಿ ಆಪ್ಲೆಂ ಪೋರ್ಶನ್ ಕವರ್ ಕರ್‍ತಾತ್. “ನನ್ನ ಪೋಶನ್ ಆಯ್ತು” ಮ್ಹಣ್ ಶೆಂಕಾರೆ ಫುಲಯ್ತಾತ್. ಧಯ್ರ್ ಆನಿ ಜಾಣ್ವಾಯ್ ಆಸ್ಚಿಂ ಶಿಕ್ಶಕಾಂ ಪ್ರಚಲಿತ್ ಸಂಗ್ತಿಂಕ್ ಕೋರಿಲೇಶನ್ ಕರ್‍ತಾತ್. ಆಪ್ಲೆಂ ಪೋರ್ಶನ್ ಕವರ್ ಕರ್‍ಚ್ಯಾಕೀ ಚಡ್ ‘ಡಿಸ್ಕವರ್’ ಕರ್‍ತಾತ್. ಕಿತ್ಲೆಶ್ಯೊ ಕವಿತಾ ಭುರ್ಗ್ಯಾಂಕ್ ತೋಂಡ್ ಪಾಟ್ ಕೆಲ್ಲೆ ಶಿವಾಯ್ ಕವಿತೆಚೊ ಸಾರ್ ಅರ್ಥ್ ಕೆಲ್ಲೊಚ್ ನಾ. 

ಆಜ್ ಭುರ್ಗ್ಯಾಂಕ್ ಮಾರುಂಕ್ ನಾ, ಜೋರ್ ಕರುಂಕ್, ದೊಳೆ ವಾಟರುಂಕ್, ಕ್ಲಾಸಿ ಥಾವ್ನ್ ಭಾಯ್ರ್ ಘಾಲುಂಕ್, ಬಸ್ಕಿ ಕಾಡುಂಕ್ ನಾಂಚ್ ನಾ. ಆಶೆಂ ಕೆಲ್ಯಾರ್ ’ಹೀಗೂ ಉಂಟೆ?’ ಚಾನೆಲಾಂನಿ”ಬೇಕಿಂಗ್ ನ್ಯೂಸ್’ ಜಾತಾ! ದೆಕುನ್ ಶಿಕ್ಶಕ್ ಮಾವ್ನ್ ಜಾತಾ. ಆಮಿ ವಿವಿಧ್ ಧರ್ಮಾಚೆ ಎಕಾಚ್ ಬಾಂಕಾರ್ ಬಸೊನ್ ಶಿಕ್ತೆಲ್ಯಾಂವ್, ‘ಸರ್ವ ಜನಾಂಗದ ಶಾಂತಿಯ ತೋಟ’ ಮ್ಹಣ್ ಗಾಯ್ತೆಲ್ಯಾಂವ್. ಆಜ್ ಧರ್ಮ್ ಸೊಡ್ಯಾಂ ಜಾತಿಕ್ ಏಕ್ ಇಸ್ಕೊಲ್ ಆಸಾ. ಬೊಣ್ಕ್ಯಾಂಚೆಂ, ಬಿರ್ವ್ಯಾಂಚೆಂ, ಶ್ರೀರಾಮಚೆಂ, ಸುನ್ನಿ, ಸಿರಿಯನ್, ಕಥೋಲಿಕ್, ಬಾಮುಣ್, ದಿಗಂಬರ ಜೈನಾಚೆಂ.. ಆಶೆಂ ಆಸೊನೀ ಆದಿಂ ಥಾವ್ನ್ ಹರ್ಯೆಕ್ ಧರ್ಮ್ ಜಾತಿಚಾಂಕೀ ತಾಂಚ್ಯಾ ಭುರ್ಗ್ಯಾಂನಿ ಮಾತ್ರ್ ಕಥೊಲಿಕ್ ಇಸ್ಕೊಲಾಂನಿ ಶಿಕಪ್ ಜೊಡ್’ಲ್ಲೆಂ ಜಾಯ್! ಹ್ಯಾ ಭುರ್ಗ್ಯಾಂನಿ ಪಾರ್ಲಿಮೆಂಟ್, ನ್ಯೂಸ್‌ರೂಮ್, ಡಿಬೇಟ್ ಪಳೆವ್ನ್ ಲಜ್ಮಾಡ್ಯಾ ರಾಜಕಾರಿಣಿ ಆನಿ ಪುರ್ವಿತಾಂಬರಿ ಚಿಲ್ಲರ್ ಸಂಗ್ತಿಂಕ್ ಝಗಡ್ಚೆಂ ಪಳೆವ್ನ್ ಪಳೆವ್ನ್ ಹೆಂಚ್ ಸಮಾ ಮ್ಹಣ್ ಚಿಂತಾತ್ ಆನಿ ಪಿಶೆಂ ಧಯ್ರ್ ಘೆತಾತ್. ಜೆರೋಸಾ ಶಾಳೆಚಾ ಭುರ್ಗ್ಯಾಂನಿ ಉಲಯಿಲ್ಲಿ ರೀತ್ ಪಳೆಯಾ! ಹ್ಯಾಚ್ ಭುರ್ಗ್ಯಾಂನಿ ಶಾಳೆಚ್ಯಾ ಪ್ರತಿಭಾ ಕಾರಂಜಿ ಅಂತರ್‌ಶಾಳೆಚಾ ಭಾಷಣ್, ಚರ್ಚಾ, ವಿಚಾರ್‌ ಮಂಡನ್ ಸ್ಪರ್ಧ್ಯಾಂನಿ ಇನಾಮಾ ಜೊಡ್ಚಿಂ ಸೊಡ್ಯಾಂ, ಏಕ್ ಪಾವ್ಟಿಂ ಪುಣಿ ಸ್ಪರ್ಧೊ ತರೀ ಕೆಲ್ಲೊ ಆಸಾ?

ಸಾಂಗಾ ಮ್ಹಾಕಾ, ಭಾರತಾಂತ್ ನವ್ಯಾ ಧರ್ಮಾಚೆಂ ಉಗಮ್ ಪಾಠ್ ಕರ್‍ತನಾ ಹಿಂದು ಧರ್ಮಾಂತ್ಲೆಂ ಜಾತಿ ವಿಂಗಡನ್, ತಾಂಚೆ ಕಡ್ಡಾಯ್ ಸಂಪ್ರಾದಾಯ್ ವಿವರುಂಚೆ ನಾಕಾತ್? ’ಸತಿ ಸಂಪ್ರದಾಯ್’ ಮ್ಹಳ್ಳೊ ಅನಿಶ್ಟ್ ವಿಶಯ್ ಉಲ್ಲೇಕ್ ಕರುಂಕ್ ನಜೊ? ಬ್ರಹ್ಮಸಮಾಜ್ ವಿವರಿತಾನಾ – ಯಾಗ, ಯಜ್ಞ, ಮೂರ್ತಿಪೂಜಾ, ಹಿಂದುಧರ್ಮಂತ್ಲೆ ಆಂದ್ಳೆಂಪಣ್, ಕುಡ್ಡಿ ಆನಿ ಮೂಢ್ ಪಾತ್ಯೆಣೆವಿಶಿಂ ರಾಜರಾಮಾನ್ ಕಿತೆಂ ಶಿಕಯ್ಲೆಂ ಮ್ಹಣ್ ವಿದ್ಯಾರ್ಥಿಂನಿ ಶಿಕ್ಚೆಂ ನಾಕಾ? ಅಂಬೇಡ್ಕರ್ ಕಿತ್ಯಾಕ್ ಕ್ಲಾಸಿಂತ್ ಧರ್ಣಿರ್ ಗೊಣಿ ಘಾಲ್ನ್ ಬಸ್ಲೊ? ನಾರಾಯಣಗುರುಕ್ ಕಿತ್ಯಾ ದಿವ್ಳಾಂಕ್ ಪ್ರವೇಶ್ ದೀವ್ನಾ? ಹ್ಯಾ ಸಂಗ್ತಿಂವಿಶಿ ಚರ್ಚಾ ಕರುಂಕ್ ನಜೊ?  ಧಾಂವ್ಚ್ಯಾ ರಯ್ಲಾರ್ ಥಾವ್ನ್ ತೆನ್ಕಾ ಆಫ್ರೀಕಾಂತ್ ಗಾಂಧಿಕ್ ಕಿತ್ಯಾಕ್ ಭಾಯ್ರ್ ಲೊಟ್ಲೊ ಮ್ಹಳ್ಳೆವಿಶಿಂ ಕಾಂಯ್ ಭಿರಾಂತ್ ನಾಸ್ತಾನಾ ಉಲಂವ್ಚಿಂ ಆಮಿ ಗೋಡ್ಸೆನ್ ಕಿತ್ಯಾಕ್ ಗಾಂಧಿಕ್ ಗುಳೊ ಘಾಲೊ, ಗೋಡ್ಸೆಚ್ಯಾ ಹ್ಯಾ ಕರ್ತುವಾಂ ಪಾಟ್ಲೊ ಇರಾದೊ ಕಿತೆಂ ಮ್ಹಣ್ ಸಮ್ಜಂವ್ಕ್ ನರ್ಗಾತಾಂವ್!

ಆತಾಂ ಉರ್‍ಲೆಂ ಸವಾಲ್ ನಾಗದೇವಾಚೆಂ! ಹೆರ್ ಜಿವ್ದಾಳಿ ಬರಿಚ್ ಸೊರೊಪ್’ಯೀ ಏಕ್. ತಾಕಾ ನಾಗದೇವ್ ಮ್ಹಣಾ ವಾ ಆದಿಶೇಷ್ ಮ್ಹಣಾ, ಬಯೋಲಜಿ ಕ್ಲಾಸಿಂತ್ ಪಾಠ್ ಕರ್‍ತಾನಾ – ಸೊರ್ಪಾಕ್ ಕಾನ್ ನಾಂತ್, ಉಗ್ಡಾಸ್ ಸಕತ್ ನಾ, ದೂದ್ ಸಲೀಸಾಯೆನ್ ಪಿಯೆಂವ್ಕ್ ತಾಕಾ ಜಾಯ್ನಾ, ಜಿಬೆಕ್ ಶೀರ್ ಆಸ್ಲೆಲ್ಯಾನ್ ತಾಚೆಂ ಖಾಣ್ 99 ಠಕ್ಕೆ ‘ನಾನ್‌ವೇಜ್’, ಮ್ಹಣ್ಜೆ ಉಂದಿರ್, ಮಾಣ್ಕೆ, ತಾಂತಿಯಾಂ, ಸುಕ್ಣ್ಯಾ ಪಿಲಾಂ.. ಮ್ಹಣುನ್ ಶಿಕಯ್ಲ್ಯಾರ್ ಕೋಮುವಾದ್ ಜಾತಾ!? ನಾಗದೆವಾಕ್ ಅಕ್ಮಾನ್ ಕೆಲೊ ಮ್ಹಣ್ ರಸ್ತ್ಯಾಕ್ ದೆಂವ್ತಾತ್?

ಉಡಾಸಾ ಸಕತ್ ನಾತ್ಲೆಲ್ಯಾ ಸೊರ್ಪಾಕ್ ’ಹಾವಿನ ದ್ವೇಷ ಹನ್ನೆರಡು ವರುಷ’ ಪದಾನ್ ಸಾಂಗ್ಲೆಲೆಂ ಸತ್ ಮ್ಹಣ್ ಮಂದುನ್ ಘೆತ್ಲಾಂ ಶಿವಾಯ್ ವಿಗ್ಯಾನ್ ಗೆಲೆಂ ಪೊಂಡಾಂತ್! ನಾಗ ದೇವ್ ತರ್ ತೊ ಚಾಬ್ತನಾ ಆಸ್ಪತ್ರೆಕ್ ಕಿತ್ಯಾ ಧಾಂವಾಜೆ, ದೇವ್ ಆಪವ್ನ್ ವ್ಹರುಂಕ್ ಆಯ್ಲಾ ಮ್ಹಣ್ ಸ್ವೀಕಾರ್ ಕರ್ಯೆತ್ ನ್ಹಯ್? (ಹೆಂ ಸವಾಲ್ ಎಕ್ಯೆ ವಿಡಿಯೊಂತ್ ಬಸವ ಸ್ವಾಮಿ ನಿಜಗುಣಾನಂದಾಚ್ ವಿಚಾರ್‍ತಾ!) ಅಸಲಿ ವಯ್ಚಾರಿಕತಾ ಇಸ್ಕೊಲಾಂತ್ ಉಲಯ್ಲ್ಯಾರ್ ಆಜ್ ಕೇಸರಿ ಬಾವ್ಟೆ ಇಸ್ಕೊಲಾಚ್ಯಾ ಕ್ಯಾಂಪಸಾಕ್ ರಿಗ್ತಲೆ!

ಪ್ರವಾದಿ ಮಹಮ್ಮದ್ ಗ್ರೇಸ್ತ್ ವಿದ್ವಿಚಾ ಘರಾ ಕಾಮಾಕ್ ರಾವ್ತಾ ತಾಚಾಕೀ ಸತ್ರಾ ವರ್ಸಾಂ ವ್ಹಡ್ ತಿ. ಉಪ್ರಾಂತ್ ತಿಚಾ ಕಡೆ ಲಗ್ನ್ ಜಾವ್ನ್ ದೋಗ್ ಚೆರ್ಕೆ ಆನಿ ಚೊವ್ಗಾಂ ಚೆಡ್ವಾಂ ಭುರ್ಗ್ಯಾಂಚೊ ಬಾಪುಯ್ ಜಾತಾ. ಹೊ ಪಾಠ್ ಬುಕಾಂತ್ ದಿಲಾ ತರ್ ಹಾಚೊ ವಿವರ್ ದಿಂವ್ಚೆಂ ನಾಕಾ? “ಎನ್ನ ಕಾಲೇ ಕಂಬ ದೇಹವೇ ದೇಗುಲ ಶಿರವೇ ಹೊನ್ನ ಕಳಶ” ಮ್ಹಳ್ಳೆಂ ವಚನ ಕಶೆಂ ವಿವರುಂಚೆಂ?

ಸಮಾಜೆಂತ್ ವಯ್ಜಾಂಕ್ ಆನಿ ಶಿಕ್ಷಕಾಂಕ್ ಮಾನ್ ಗೌರವ್ ಆಸ್ಲೊ. ತಾಂಚಿ ಉಂಚ್ಲಿ ವೃತ್ತಿ ಮ್ಹಳ್ಳೆಂ ಚಿಂತಪ್ ಆಸ್ಲೆಂ. ಚಿಕಿತ್ಸಾ ಕರ್ತನಾ ಕಾಂಯ್ ಚಡ್ ಉಣೆ ಜಾಲ್ಯಾರ್ ವಯ್ಜಾಂಚೆರ್ ಹಲ್ಲೊ ಜಾತಾ. ಆಸ್ಪತ್ರ್ ಪಿಟೊ ಜಾತಾ. ಆತಾಂ ತಾಂಕಾಂ ಕಾನೂನ್ ತರೀ ಸುರಕ್ಷಾ ದಿತಾ. ಶಿಕ್ಷಕಾಂಕ್ ರಾಕಣ್ ಕರುಂಕ್ ಅಸಲೆಂ ಕಾನೂನ್ ಗರ್ಜ್ ಆಸಾ. ಪಾಠ್ ದಿಲಾ ತೊ ಪ್ರಸ್ತುತ್ ವಿಶಯಾಂಕ್ ತಾಳ್ ಘಾಲ್ನ್ ಶಿಕಯ್ಲ್ಯಾರ್ ತಾಂಕಾಂ ರಾಗ್ ಯೆತಾ, ಸಾಂಗಾನಾ ತರ್ ಮ್ಹಜೆಂ ಕೊಶೆಡ್ದ್ ಆಯ್ಕನಾ.

ಮ್ಯಾನೆಜ್‌ಮೆಂಟ್ You ignore such points ಮ್ಹಣ್ತಾ ತರ್ ಸಾಂಗೊಡಿ ಶಿಕ್ಷಕಾಂ “ನಮಗೆ ಯಾಕೆ ಸರ್, ಅರ್ಥವಾಗದಿದ್ರೆ ಸಾಯಲಿ ಬಿಡಿ” ಮ್ಹಣ್ತಾತ್. ನೋಟ್ಸ್ ದಿತಾತ್, ಬಾಯ್ಪಟ್ ಕರಯ್ತಾತ್, ಪರೀಕ್ಷಾ ಕರ್‍ತಾತ್ ಆನಿ ಎ ಪ್ಲಸ್ ದಿತಾತ್. ಭುರ್ಗಿಂ ಹೋಪ್‌ಲೆಸ್ ಜಾತಾತ್! ಬುದ್ಧಿವಂತರ ಜಿಲ್ಲ್ಯಾಂತ್ ಕೋಮುವಾದ್ ವಾಡ್ಲಾ ಆನಿ ಹಾಂತು ಆಮಿ ಶಿಕಯಿಲ್ಲಿಂ ಭುರ್ಗಿಂಚ್ ಮೆತೆರ್! ಇತ್ಲೆಂ ಜಾತಾನಾಂಯ್ ’ನಮಗೆ ಯಾಕೆ?’ ಮ್ಹಣ್ ಆತಾಂಚೊ ಶಿಕ್ಷಕ್ ಸಮುದಾಯ್ ಮೌನ್’ಪಣಾಕ್ ಶರಣ್ ಜಾತಾ.  

ಕೊಪರ್ನಿಕಸ್, ಗೆಲೆಲಿಯೊ, ಸ್ಪಿನೋಜಾ ಹಾಣಿಂ ಕಥೊಲಿಕ್ (ಬೈಬಲಾಚಿ) ಪಾತ್ಯೆಣಿ ಫಟ್; ವಿಜ್ಞಾನ್ ಸತ್ ಮ್ಹಣ್ತಾನಾ ಅಧಿಕಾರ್’ಶಾಹಿ ಪವಿತ್ರ್ ಸಭೆನ್ ತಾಂಕಾಂ ಲಗಾಡ್ ಕಾಡ್‌ಲ್ಲೆಂ, ಶಿಕ್ಶೆಕ್ ವಳಗ್ ಕೆಲ್ಲೆಂ! ಕುಮ್ಸಾರಿ ಪಾಪಾಲ್ ಪತ್ರಾಂ, ಫ್ರೆಂಚ್ ಕ್ರಾಂತಿ, ಆನಿ ಫ್ರೊಟೆಸ್ಟೆಂಟಿಸಮ್ ಉಗಮ್ ಜಾಂವ್ಕ್ ಕಾರಣ್ ಮಾರ್ಟಿನ್ ಲೂಥರಾಚೆಂ ಧೋರಣ್ ಕಿತೆಂ ಮ್ಹಣ್ ಸಾಂಗ್ತಾನಾ, ಭೃಷ್ಟ್ ಕಥೋಲಿಕ್ ರಾಜ್ವಟಾವಿಶಿಂ ಸಾಂಗ್ಚೆ ನಾಕಾ? ದಯೆಯೇ ಧರ್ಮದ ಮೂಲ ಪಾಠ್ ಕರ್‍ತಾನಾ ಧರ್ಮಾಚಾ ನಾಂವಾಕ್ ಜಾಲ್ಲೊ ರಗ್ತಾಪಾತ್ ವಿವರಿಜೆಚ್ ನ್ಹಯ್? ಗಾಯ್ ಆಮ್ಚಿ ಆವಯ್ ತರ್ ಪಾಡೊ ಕಿತೆಂ ಲಾಗ್ತಾ ಮ್ಹಣ್ ವಿಚಾರ್‍ಚೆಂ ನಾಕಾ? ನತಲಾಂಕ್ ಆಸ್ಚೊ ಜುಜೆ ಪಾಸ್ಕ್ ಪರ್ಭೆಕ್ ಕಿತ್ಯಾಕ್ ನಾತ್ಲೊ, ಸಾಂಗ್ಚೆಂ ನಾಕಾ?

ತರ್ ಆಯ್ಚೆ ಪರಿಗತೆಂತ್ ಶಿಕ್ಶಕಾನ್ ಫಕತ್ ಶಿಕ್ಶಕ್ ಜಾವ್ನ್ ಉರೊಂಕ್ ಜಾಯ್ನಾ. ತಾಣೆಂ ಪ್ರವಾದಿ ಜಾಂವ್ಚೊ ವೇಳ್ ಆಯ್ಲಾ. ಆಮ್ಚ್ಯಾ ಹಾತಾಂನಿ ಮಿಶಿನಾಂ ತಯಾರ್ ಜಾಯ್ನಾಂತ್ ಬಗಾರ್ ಮನ್ಶಾಂ ತಯಾರ್ ಜಾತಾತ್ ಮ್ಹಣ್ ಸಮ್ಜಾಲ್ಯಾರ್ ಆಮ್ಚ್ಯಾ ವೃತ್ತೆಚೆರ್ ಗೌರವ್ ಆನಿ ಅಭಿಮಾನಾ ಸಾಂಗಾತಾ ಅಪೂರ್ವ್ ಧಯ್ರ್’ಯೀ ಆಮ್ಚೆಲಾಗಿಂ ಆಸ್ತೆಲೆಂ.

✍️ –ಆಲ್ವಿನ್ ದಾಂತಿ, ಪೆರ್ನಾಲ್