ಆಮಿ ದಿಸಾಳಿಂ ಪತ್ರಾಂ ವಾಚ್ತಾನಾ, ಟಿವಿ ವಾ ಯೂಟ್ಯೂಬಾರ್ ಖಬ್ರೊ ಪಳೆತಾನಾ ನಾಕಾ ನಾಕಾ ಮ್ಹಳ್ಯಾರೀ ಏಕ್ ವಿಭಾಗಾತೆವ್ಶಿನ್ ಆಮ್ಚಿ ದೀಶ್ಟ್ ವೆತಾ. ‘ಕ್ರೈಮ್ ನ್ಯೂಜ್’ ಮ್ಹಳ್ಳ್ಯಾ ಮ್ಹಾತಾಳ್ಯಾ ಸಕಯ್ಲ್ ದೇಶ್-ವಿದೇಶಾಂತ್ ತಶೆಂತ್ ಆಮ್ಚ್ಯಾ ಸೆಜಾರಾಚ್ ಜಾಲ್ಲಿಂ ಕರಾಳ್ ಘಡಿತಾಂ ಫಾಯ್ಸ್ ಜಾಲ್ಲಿಂ ಆಸ್ತಾತ್. ಹ್ಯೊ ಖಬ್ರೊ ವಾಚ್ತಾನಾ ವಾ ‘ಕ್ರೈಮ್ ಪೆಟ್ರೋಲ್’, ‘ಸಾವ್‌ಧಾನ್ ಇಂಡಿಯಾ’ ತಸಲಿಂ ಟಿವಿ ಕಾರ್ಯಕ್ರಮಾಂ ಪಳಯ್ತಾನಾ ಆಮ್ಕಾಂ ಏಕ್ ಬೊಲಿವುಡ್ ಸಸ್ಪೆನ್ಸ್ ಥ್ರಿಲ್ಲರ್ ಪಿಂತುರ್ ಪಳಯಿಲ್ಲೊ ಅನ್ಭೋಗ್ ಜಾಂವ್ಕ್‌ಯೀ ಪುರೊ. ಪುಣ್ ಹ್ಯಾ ಚಡ್ತಾವ್ ಕ್ರೈಮ್ ಘಡಿತಾಂನಿ ಖುನಿಗಾರ್ ವಾ ಆಪ್ರಾಧಿಂಚ್ಯೆ ಪಟ್ಟೆರ್ ಆಸ್ಚಿಂ ನಾಂವಾಂ ದಾದ್ಲ್ಯಾಂಚಿಂ ಮಾತ್ರ್. ಚಲಿಯೊ ಚಡ್ತಾವ್ ಸಂದರ್ಭಾಂನಿ ‘ಬಲಿಪಶು’ ಜಾವ್ನಾಸ್ತಾತ್. ಎಕೆ ಸ್ತ್ರೀಯೆಕ್ ಆಪ್ರಾಧ್ಯಾಚ್ಯಾ ಸ್ಥಾನಾರ್ ಪಳೆಂವ್ಕ್ ಆಮ್ಕಾಂ ಕಶ್ಟ್ ಮಾರ್‍ತಾತ್. ಕಿತ್ಯಾಕ್ ತಿ ಜೀವ್‌ದಾತಾರ್‍ನ್, ಎಕಾ ನವ್ಯಾ ಜಿವಾಕ್ ನೋವ್ ಮ್ಹಯ್ನೆ ಆಪ್ಲ್ಯಾ ಗರ್ಬಾಂತ್ ಪೋಶಣ್ ಕರ್‍ನ್, ರಚ್ನೆಚ್ಯಾ ಕಾಮಾಂತ್ ವಿಶೇಸ್ ಪಾತ್ರ್ ಖೆಳ್ತಾ, ಜಿವಾಚೆಂ ಉಗಮ್ ಜಾಯ್ಜೆ ಆಸ್‌ಲ್ಲಿ ಏಕ್ ಕ್ರಿಸ್ತಾಂವ್ ಸ್ತ್ರೀ, ತಾಂತ್ಲ್ಯಾನ್ ತಾಂತುಂ ಹೆರಾಂಚೊ ಜೀವ್ ವಾಂಚೊಂವ್ಕ್ ಪೆಚಾಡ್ಚಿ ಏಕ್ ನರ್ಸ್ ಆಜ್ ‘ಖುನಿಗಾರ್‍ನ್’ ಮ್ಹಳ್ಳೊ ಬಿಲ್ಲೊ ಆಪ್ಣಾವ್ನ್ ಮರ್‍ಣಾಚ್ಯೆ ಶಿಕ್ಶೆಕ್ ರಾಕೊನ್, ಏಕ್ ಪರ್ಕಿ ದೆಶಾಚ್ಯಾ ಜಯ್ಲಾಂತ್ ಆಸ್ಚಿ ಖಬರ್ ಪಾಟ್ಲ್ಯಾ ದಿಸಾಂನಿ ಆಮ್ಕಾಂ ಆಯ್ಕೊಂಕ್ ಮೆಳ್ಳಿ.

ಹಿಚೆಂ ನಾಂವ್ ನಿಮಿಶಾ ಪ್ರಿಯಾ. ಪ್ರಾಯ್ 37 ವರ್‍ಸಾಂ. ಸೆಜಾರ್‍ಚ್ಯಾ ಕೇರಳಾಚ್ಯಾ ಪಾಲಕ್ಕಾಡ್ ಗಾಂವ್ಚಿ. ಲ್ಹಾನ್‌ಪಣಾರ್ ಇಗರ್ಜೆಚ್ಯಾ ಸಂಘ್-ಸಂಸ್ಥ್ಯಾಂನಿ ದಿಲ್ಲ್ಯೆ ಕುಮ್ಕೆನ್ ನರ್ಸಿಂಗ್ ಶಿಕಪ್ ಆಪ್ಣಾಯ್ಲೆಂ. ಕರಾವಳಿಚ್ಯಾ ಜಾಯ್ತ್ಯಾ ಲೊಕಾಬರಿ ಸುಫಳ್ ಫುಡಾರಾಚಿಂ ಸಪ್ಣಾಂ ಘೆವ್ನ್, 2008 ಇಸ್ವೆಂತ್ ಪ್ರಿಯಾ ಯೆಮೆನ್ ದೆಶಾಕ್ ಪಾವ್‌ಲ್ಲೆಂ. ಆರ್ಬ್ಯಾಂಚ್ಯಾ ಗಾಂವಾಂತ್ ಆಸ್ಚೊ ಲ್ಹಾನ್ ದೇಶ್ ಹೊ. ಏಕ್ ಸರ್ಕಾರಿ ಆಸ್ಪತ್ರೆಂತ್ ನರ್ಸ್ ಜಾವ್ನ್ ಆಪ್ಲೆಂ ವೃತ್ತಿಜೀವನ್ ಸುರ್ವಾತ್‌ಲ್ಲ್ಯಾ ಪ್ರಿಯಾಕ್ 2011 ಇಸ್ವೆಂತ್ ಲಗ್ನ್ ಜಾವ್ನ್ ಚೆಡುಂ ಭುರ್ಗೆಂ ಜಲ್ಮಾಲೆಂ. ಕುಟ್ಮಾಸವೆಂ ಸಂತೊಸ್ಭರಿತ್ ಜಿಣಿ ಜಿಯೆವ್ನ್ ಆಸ್‌ಲ್ಲೆಂ ಪ್ರಿಯಾ, ಆಪ್ಲ್ಯಾ ವೃತ್ತಿಜಿವಿತಾಂತ್ ಸಯ್ತ್ ಯಶಸ್ವಿ ಆಪ್ಣಾವ್ನ್ ಏಕ್ ಲೊಕಾಮೊಗಾಳ್ ನರ್ಸ್ ಜಾತಾ. ಲೊಕಾಂನಿ ಆಪ್ಲ್ಯಾ ಕಾಮಾಕ್ ಉಚಾರ್‌ಲ್ಲಿ ಹೊಗ್ಳಿಕ್ ಪಳೆತಾನಾ ಆಪ್ಲೆಂಚ್ ಕ್ಲಿನಿಕ್ ಸುರ್ವಾತ್ಚಿ ಆಶಾ ಪ್ರಿಯಾಚ್ಯೆ ಮತಿಂತ್ ಕಿರ್‍ಲತಾ. ಯೆಮೆನ್ ದೆಶಾಚ್ಯೆ ರುಲಿಪರ್ಮಾಣೆಂ ವಿದೇಶಿ ನಾಗರಿಕಾಂನಿ ತಾಂಚ್ಯಾ ಗಾಂವಾಂತ್ ಉದ್ಯಮ್ ಪ್ರಾರಂಭ್ ಕರಿಜೆ ತರ್ ಏಕ್ ಥಳೀಯ್ ವೆಕ್ತಿ ಬಿಜ್ನೆಸ್ ಪಾರ್ಟ್‌ನರ್ ಜಾವ್ನ್ ಘೆಂವ್ಚೆಂ ಖಡ್ಡಾಯೆಚೆಂ. ತಲಾಲ್ ಅಬ್ದೊ ಮೆಹೆದಿ ಮ್ಹಳ್ಳೊ ಯೆಮೆನಿ ನಾಗರಿಕ್ ಪ್ರಿಯಾಚೊ ಬಿಜ್ನೆಸ್ ಪಾರ್ಟ್‌ನರ್ ಜಾಂವ್ಕ್ ಕಬ್ಲಾತ್ ದಿತಾ. ಅಶೆಂ ನಿಮಿಶಾ ಪ್ರಿಯಾಚಿಂ ಸರ್ವ್ ಯೋಜನಾಂ ಪೊಂತಾಕ್ ಪಾವೊನ್, 2014 ಇಸ್ವೆಂತ್ ‘ಆಲ್ ಆಮನ್’ ಮ್ಹಳ್ಳೆಂ 14 ಬೆಡ್ ಆಸ್ಚೆಂ ಕ್ಲಿನಿಕ್ ಉಗ್ತಾವಣ್ ಜಾತಾ. ಪುಣ್ ೨೦೧೫ ವ್ಯಾ ವರ್‍ಸಾ ಯೆಮೆನ್ ದೆಶಾಂತ್ ಆಂತರಿಕ್ ಝಜ್ (Civil war) ಸುರ್ವಾತುನ್ ಪರಿಸ್ಥಿತಿ ಭಿಗಡ್ತಾ. ಖರ್ಚ್ ಸಯ್ತ್ ಚಡ್ ಜಾಲ್ಲ್ಯಾನ್ ನಿಮಿಶಾಚೊ ಪತಿ ಆನಿ ಧುವ್ ಗಾಂವಾಕ್ ಪಾಟಿಂ ಯೆತಾತ್. ಭಾರತೀಯ್ ಸರ್ಕಾರ್ ಭದ್ರತೆಚ್ಯಾ ಕಾರಣಾಕ್ ಲಾಗೊನ್ ಆಮ್ಚ್ಯಾ ನಾಗರಿಕಾಂನಿ ಯೆಮೆನ್ ದೆಶಾಕ್ ವಚನಾಶೆಂ ಪಯ್ಣಾಚೊ ನಿರ್ಬಂದ್ ಘಾಲ್ತಾ. ಕಿತ್ಲೆ ಕಶ್ಟ್ ಜಾಲ್ಯಾರೀ ಆಪ್ಲ್ಯಾ ಘಾಮಾಚೆ ಪಯ್ಶೆ ವಿನಿಯೋಗ್ ಕರ್‍ನ್ ಪ್ರಾರಂಭ್ ಕೆಲ್ಲೆಂ ಕ್ಲಿನಿಕ್ ಸೊಡುಂಕ್ ಮನ್ ನಾಸ್ತಾನಾ ಪ್ರಿಯಾ ಯೆಮೆನಾಂತ್‌ಚ್ ರಾಂವ್ಚೊ ನಿರ್ಧಾರ್ ಘೆತಾ.

ತಲಾಲ್ ಮೆಹೆದಿ – ಮನ್ಶಾರುಪಾರ್ ಆಸ್‌ಲ್ಲಿ ಮನ್ಜಾತ್

ಸುರ್ವೇರ್ ತಲಾಲ್ ಮೆಹೆದಿ ಕೇವಲ್ ಪ್ರಿಯಾಚೊ ಬಿಜ್ನೆಸ್ ಪಾರ್ಟ್‌ನರ್ ಮಾತ್ರ್ ನ್ಹಯ್ ಆಸ್ತಾಂ, ತಾಚ್ಯಾ ಕುಟ್ಮಾಚೊ ಆಪ್ತ್ ಈಶ್ಟ್ ಜಾವ್ನಾಸ್ತಾ. ಥೊಡ್ಯಾ ಮಾದ್ಯಮಾಂಚ್ಯಾ ವರ್ದೆಂಪ್ರಕಾರ್ ಪ್ರಿಯಾಚ್ಯೆ ಧುವೆಚ್ಯಾ ಬಾಪ್ತಿಜ್ಮಾಚ್ಯಾ ಕಾರ್ಯಾಕ್ ತಲಾಲ್ ಕೇರಳಾಕ್ ಸಯ್ತ್ ಆಯಿಲ್ಲೊ ಕಂಯ್. ಪುಣ್ ದೀಸ್ ಗೆಲ್ಲೆಬರಿ ತಲಾಲ್ ಪ್ರಿಯಾಚ್ಯಾ ಜಿವಿತಾಂತ್ಲೊ ವಿಲನ್ ಜಾತಾ. ಪ್ರಿಯಾಚೆಂ ಕುಟಮ್ ತಾಚ್ಯಾ ಸಾಂಗಾತಾ ನಾ ಮ್ಹಳ್ಳ್ಯೆ ಸಂಗ್ತಿಚೊ ಫಾಯ್ದೊ ಉಟೊವ್ನ್ ತಲಾಲ್ ಪ್ರಿಯಾಚೆರ್ ದೈಹಿಕ್ ಆನಿ ಮಾನಸಿಕ್ ಶೋಶಣ್ ಕರ್‍ತಾ. ಖುದ್ದ್ ಮಾದಕ್ ದ್ರವ್ಯಾಂಚೊ ವೆಸನಿ ಜಾಲ್ಲ್ಯಾನ್ ಪ್ರಿಯಾಚೆ ಪಯ್ಶೆ ವಸೂಲ್ ಕರ್‍ನ್, ಬಸೊನ್ ಖಾಂವ್ಚಿ ಗಿರಾಂತ್ ತಾಚಿ. ಪ್ರಿಯಾಚೊ ಪಾಸ್‌ಪೋರ್ಟ್ ಸಯ್ತ್ ಆಪ್ಲ್ಯೆ ಮುಟಿಭಿತರ್ ದವರ್‍ನ್, ತಾಕಾ ತಾಚ್ಯಾ ಕುಟ್ಮಾಸಂಗಿ ಫೊನಾರ್ ಉಲೊಂವ್ಕ್ ಸಯ್ತ್ ಪರ್ವಣ್ಗಿ ದೀನಾ. ಸಬಾರ್ ಸಂದರ್ಭಾಂನಿ ‘ಹಾಂವ್‌ಚ್ ಪ್ರಿಯಾಚೊ ಘೊವ್’ ಮ್ಹಣ್ ಸಾಂಗೊನ್ ಭೊಂವ್ತಾ. ತಲಾಲಾಚ್ಯಾ ಹಾತಾಂತ್ ಶಿರ್ಕಾಲ್ಲೆಂ ಪ್ರಿಯಾ, 2016 ಇಸ್ವೆಂತ್ ಪೊಲಿಸಾಂಕ್ ಹ್ಯಾ ವಿಶ್ಯಾಂತ್ ಕಳಯ್ತಾ ತರೀ ಯೆಮೆನಿ ಪೊಲೀಸ್ ಪ್ರಿಯಾಕ್‌ಚ್ ಏಕ್ ಹಫ್ತೊ ಜಯ್ಲಾಂತ್ ದವರ್‍ತಾತ್.

ಮಾಂಯ್‌ಗಾಂವಾಕ್ ಪಾಟಿಂ ಪರ್‍ತೊಂಕ್ ಪ್ರಿಯಾಚೆಂ ಯೋಜನ್

ಎಕಾ ವೆಕ್ತಿಚೊ ಸೊಸ್ಣಿಕಾಯೆಚೊ ಕಾಟ್ ತುಟ್ತಾನಾ, ಜಿಣಿಯೆಂತ್ಲೆ ಆಕ್ಲಾಸ್ ಸೊಸುಂಕ್ ಅಸಾಧ್ ಜಾತಾನಾ ತಾಂತ್ಲೆಂ ಭಾಯ್ರ್ ಯೇಂವ್ಕ್ ನೀಟ್ ವಾಟ್‌ಚ್ ಜಾಯ್ಜೆ ಮ್ಹಣ್ ನಾ. ಕಸಲ್ಯೆ ಆಡ್ ವಾಟೆಕ್ ವಚೊಂಕ್ ಸಯ್ತ್ ಮನಿಸ್ ತಯಾರ್ ಜಾತಾ ಮ್ಹಳ್ಳ್ಯಾಕ್ ಪ್ರಿಯಾಚಿ ಕಾಣಿ ಏಕ್ ನಿದರ್ಶನ್. ತಲಾಲ್ ಮೆಹೆದಿ ಮ್ಹಳ್ಳ್ಯಾ ಸಯ್ತಾನಾಚ್ಯಾ ಪಾಸಾಂತ್ಲೆಂ ಸುಟೊವ್ನ್ ಆಪ್ಲ್ಯಾ ಮಾಂಯ್‌ಗಾಂವಾಕ್ ಪಾಟಿಂ ಯೇಂವ್ಕ್ ಪ್ರಿಯಾಕ್ ಪಾಸ್‌ಪೋರ್ಟ್ ಜಾಯ್ ಆಸ್‌ಲ್ಲೊ. ಆಪ್ಲೊ ಪಾಸ್‌ಪೋರ್ಟ್ ಪಾಟಿಂ ಜೊಡುಂಕ್ ಪ್ರಿಯಾ ತಾಚಿ ನರ್ಸಿಂಗ್ ತಕ್ಲಿ ವಾಪಾರ್‍ತಾ. ಆಸ್ಪತ್ರೆಂನಿ ಅನಾಸ್ತೇಶಿಯಾ ದೀಂವ್ಕ್ ವಾಪಾರ್‍ಚೆಂ ಕೆಟಮಿನ್ ಇಂಜೆಕ್ಶನ್ ನಿದೊನ್ ಆಸ್‌ಲ್ಲ್ಯಾ ತಲಾಲಾಚ್ಯಾ ಹಾತಾಂಕ್ ತೊಪ್ತಾ. ತಾಚಿ ಮತ್ ಚುಕೊವ್ನ್ ತಾಚ್ಯಾ ಕುಡಾಂತ್ ಲಿಪೊನ್ ಆಸ್ಚೊ ಆಪ್ಲೊ ಪಾಸ್‌ಪೋರ್ಟ್ ಕಶೆಂ ತರೀ ಸೊಧುನ್ ಕಾಡ್ತಾಂ ಮ್ಹಳ್ಳೊ ಭರ್ವಸೊ ಪ್ರಿಯಾಚೊ. ಪುಣ್ ಎದೊಳ್‌ಚ್ ಡ್ರಗ್ಸ್ ವೆಸನಿ ಜಾಲ್ಲ್ಯಾ ತಲಾಲಾಕ್ ಹೊ ಕೆಟಮಿನ್ ಡೋಸ್ ಪಾವನಾಸ್ತಾನಾ ತೊ ಅರ್ಧ್ಯೆ ಮತಿರ್ ಪಿಂರ್‍ಗೊಂಕ್ ಸುರು ಕರ್‍ತಾ. “ತಲಾಲ್ ಮತಿರ್ ಯೇತ್ ತರ್ ಆಪುಣ್ ಜಿವಂತ್ ಉರ್‍ಚಿಂನಾ ಮ್ಹಣ್ ಭಿಯೆಲ್ಲೆಂ ಪ್ರಿಯಾ ಡೋಸ್ ಚಡೊಂಕ್ ಆನ್ಯೇಕ್ ಕೆಟಮಿನ್ ಇಂಜೆಕ್ಶನ್ ತಾಕಾ ದಿತಾ. ಅಶೆಂ ಗರ್ಜೆಚ್ಯಾಕೀ ಚಡ್ ಇಂಜೆಕ್ಶನ್ ಘೆತ್‌ಲ್ಲ್ಯಾನ್ ಕೆಟಮಿನ್ ಓವರ್‌ಡೋಸ್ ಜಾವ್ನ್ ತಲಾಲಾಚಿ ಕಾಳ್ಜಾ ಉಡಿ ರಾವ್ತಾ. ಕಿತೆಂಗೀ ಕರುಂಕ್ ವಚೊನ್ ಆನಿ ಕಿತೆಂಗೀ ಜಾಲೆಂ ಮ್ಹಣ್ ಸಮ್ಜಲ್ಲೆಂ ಪ್ರಿಯಾ ಜಾಲ್ಲೊ ವಿಶಯ್ ಆಪ್ಲ್ಯಾ ನರ್ಸಿಂಗ್ ಇಶ್ಟಿಣೆಕ್ ಕಳಯ್ತಾ. ಎದೊಳ್ ಲಾಬ್‌ಲ್ಲ್ಯಾ ವರ್ದೆಂಪ್ರಕಾರ್ ಹ್ಯಾ ದೊಗಾಂಯ್ನಿ ತಲಾಲಾಚಿ ನಿರ್ಜೀವ್ ಕೂಡ್ ಕಾತರ್‍ನ್ ಶೆಂಭೊರಾಚ್ಯಾಕೀ ಚಡ್ ಕುಡ್ಕೆ ಕರ್‍ನ್ ಉದ್ಕಾಚ್ಯೆ ಟಾಂಕಿಂತ್ ಉಡಯ್ಲಾಂ ಮ್ಹಣ್ ಮಾದ್ಯಮಾಂನಿ ಪ್ರಚಾರ್ ಕೆಲಾ. ಪುಣ್ ಪ್ರಿಯಾನ್ ಸಾಂಗ್ಚೆಪ್ರಕಾರ್ ತಾಣೆಂ ಮತ್ ಚುಕೊಂವ್ಕ್ ಇಂಜೆಕ್ಶನ್ ದಿಲ್ಲೆಂ ಮಾತ್ರ್. ಹೆಂ ಘಡಿತ್ ಘಡ್‌ಲ್ಲೆಂ 2017 ಇಸ್ವೆಂತ್. ಥೊಡ್ಯಾಚ್ ದಿಸಾಂಭಿತರ್ ಯೆಮೆನಿ ಪೊಲಿಸಾಂನಿ ಪ್ರಿಯಾ ಆನಿ ತಾಚ್ಯೆ ಇಶ್ಟಿಣೆಕ್ ಕಯ್ದ್ ಕರ್‍ನ್ ತನ್ಕಿ ಸುರ್ವಾತ್ಲಿ.

ಅರೇಬಿಕ್ ಭಾಶೆಂತ್ ಚಲ್‌ಲ್ಲಿ ತನ್ಕಿ

ನಿಮಿಶಾ ಪ್ರಿಯಾಚಿ ತನ್ಕಿ ಆನಿ ಕೊಡ್ತಿಚಿ ಪ್ರಕ್ರಿಯಾ ಜಾಲ್ಲಿ ಯೆಮೆನ್ ದೆಶಾಚಿ ರಾಜ್‌ಧಾನಿ ಸನ್ಹಾ ಮ್ಹಳ್ಳ್ಯಾ ಶ್ಹೆರಾಂತ್. ಆಂತರಿಕ್ ಝುಜಾಕ್ ಲಾಗೊನ್ ಸನ್ಹಾ ಶ್ಹೆರ್ ಯೆಮೆನ್ ಸರ್ಕಾರಾಚ್ಯಾ ಹಾತಾಂತ್ಲೆಂ ಚುಕೊನ್ ಹೂತಿ ಆಕಾಂತ್‌ವಾದಿಂಚ್ಯೆ ಮುಟಿಂತ್ ಶಿರ್ಕಾಲಾಂ. ಹೆಂ ಹೂತಿ ಮ್ಹಳ್ಳೆಂ ನಾಂವ್ ಆಮಿ ಪಾಟ್ಲ್ಯಾ ಎಕಾ ವರ್‍ಸಾಥಾವ್ನ್ ಚಡ್ ಆಯ್ಕಾಲಾಂ. ಇಸ್ರೇಲ್-ಪ್ಯಾಲೆಸ್ತೀನ್ ಝುಜ್ ಸುರ್ವಾತ್ಲ್ಯಾ ಉಪ್ರಾಂತ್ ತಾಂಬ್ಡ್ಯಾ ದರ್ಯಾಂತ್ ಪಯ್ಣ್ ಕರ್‍ಚ್ಯಾ ಪಾಶ್ಚಾತ್ಯ್ ದೆಶಾಂಚ್ಯಾ ತಾರ್‍ವಾಂವಯ್ರ್ ದಾಢ್ ಘಾಲ್ನ್, ಮಿಸಾಯ್ಲ್ ಫಾರ್ ಕರ್‍ಚೆಂ ಹ್ಯಾಚ್ ಹೂತಿ ಆಕಾಂತ್‌ವಾದಿಂನಿ. ತೆ ಶರಿಯಾ ಕಾನೂನ್ ಪಾಳ್ತಾತ್. ಕಟ್ಟರ್ ಇಸ್ಲಾಮಿ ಮೂಳ್‌ಭೂತ್‌ವಾದಾನ್ ಪ್ರಭಾವಿತ್ ಜಾಲ್ಲೆಂ ಭಿರಾಂಕುಳ್ ಕಾನೂನ್ ಹೆಂ. ಹ್ಯಾ ಕಾನೂನಾಪ್ರಕಾರ್ ಖುನಿ ಕರ್‍ಚಿ ಏಕ್ ಆಪ್ರಾಧ್, ತಾಚೆವಯ್ಲ್ಯಾನ್ ನಿರ್ಜೀವ್ ಕುಡಿಚೆ ಕುಡ್ಕೆ ಕರ್‍ನ್ ಉಡೊಂವ್ಚೆಂ ತಾಚ್ಯಾಕೀ ವ್ಹಡ್ ಆಪ್ರಾಧ್. ಪ್ರಿಯಾಚೆರ್ ತನ್ಕಿ ಸುರ್ವಾತ್‌ಲ್ಲ್ಯಾ ಎಕಾಚ್ ವರ್‍ಸಾಭಿತರ್ 2018 ಇಸ್ವೆಂತ್ ತಾಕಾ ಮರ್‍ಣಾಚಿ ಶಿಕ್ಶಾ ಘೋಶಿತ್ ಕೆಲಿ. ಹಿ ಖಬರ್ ಭಾರತಾಕ್ ಪಾವ್ತಚ್ ಥೊಡ್ಯಾ ಬರ್‍ಯಾ ಮನಾಚ್ಯಾ ಮುಕೆಲ್ಯಾಂನಿ ಸಾಂಗಾತಾ ಮೆಳೊನ್ ‘Save Nimisha Priya International Council’ ಮ್ಹಳ್ಳೆಂ ಸಂಘಟನ್ ಸುರ್ವಾತ್ಲೆಂ. ಕಾನೂನ್ ರಿತಿಂನಿ ಪ್ರಿಯಾಕ್ ಪಾಟಿಂಬೊ ದಿಂವ್ಚೊ ಉದ್ದೇಶ್ ಹ್ಯಾ ಸಂಘಟನಾಚೊ. ಹಾಚೊ ಮುಕೆಲಿ, ಸುಪ್ರೀಮ್ ಕೊಡ್ತಿಚೊ ವಕೀಲ್ ಸುಭಾಶ್ ಚಂದ್ರನ್ ಅಶೆಂ ಮ್ಹಣ್ತಾ, “ಪ್ರಿಯಾಚಿ ಸಗ್ಳಿ ತನ್ಕಿ ಕೊಡ್ತಿಂತ್ ಜಾತಾನಾ ವಾಪಾರ್‌ಲ್ಲಿ ಭಾಸ್ ಅರೇಬಿಕ್. ಏಕ್ ಇಂಗ್ಲಿಶ್ ತರ್ಜಣ್‌ದಾರ್ ವಾ Translator ಸಯ್ತ್ ಪ್ರಿಯಾಕ್ ದೀಂವ್ಕ್ ನಾತ್‌ಲ್ಲ್ಯಾನ್ ತಾಕಾ ಆಪ್ಲೊ ವಾದ್ ಮಾಂಡುಂಕ್ ಆವ್ಕಾಸ್‌ಚ್ ಲಾಬೊಂಕ್ ನಾ. ಹಾಚೆವಯ್ಲ್ಯಾನ್ ‘ತಲಾಲಾಚಿ ಖುನಿ ಕರ್‍ಚ್ಯಾ ಇರಾದ್ಯಾನ್‌ಚ್ ಆಪ್ಣೆಂ ತಾಕಾ ಕೆಟಮಿನ್ ಇಂಜೆಕ್ಶನ್ ದಿಲ್ಲೆಂ’ ಮ್ಹಣ್ ಅರೇಬಿಕ್ ಭಾಶೆಂತ್ ಬರಯಿಲ್ಲ್ಯಾ ಕಾಗ್ದಾಚೆರ್ ಬಲಾತ್ಕಾರಾನ್ ಪ್ರಿಯಾಚಿ ದಸ್ಕತ್ ಘೆವ್ನ್ ಹೆಂ Confessional Statement ಮ್ಹಣ್ ದಾಕಯ್ಲಾಂ. ಪ್ರಿಯಾಚ್ಯೆ ತರ್ಫೆನ್ ವಾದ್ ಕರಿಜೆ ಜಾಲ್ಲೊ ಯೆಮೆನಿ ಸರ್ಕಾರಿ ವಕೀಲ್ ಪಯ್ಶೆ ಘೆವ್ನ್ ಜೊಕ್ತೊ ವಾದ್ ಕರಿನಾಸ್ತಾನಾ ಪ್ರಿಯಾಕ್ ಘಾತ್ ಕೆಲಾ. ಪಾಟ್ಲ್ಯಾ ಸ ವರ್‍ಸಾಂಥಾವ್ನ್ ಚಲೊನ್ ಆಸ್ಚ್ಯಾ ಕಾನೂನಾಚ್ಯಾ ಹ್ಯಾ ಝುಜಾಕ್ ಆಯ್ಲೆವಾರ್ ನವಿ ಘುಂವ್ಡಿ ಲಾಬ್ಲ್ಯಾ. ಯೆಮೆನಾಚೊ ಅಧ್ಯಕ್ಶ್ ರಶಾದ್‌ಅಲ್ ಅಲಿಮಿನ್ ಪ್ರಿಯಾಚಿ ಮಾಫಿ ಅರ್ಜಿ ತಿರಸ್ಕೃತ್ ಕೆಲ್ಯಾ ಮ್ಹಳ್ಳಿ ಖಬರ್ ಆಯ್ಲ್ಯಾ.

Blood Money ಆಖ್ರೇಚಿ ವಾಟ್

ಜರ್ ತರ್ ವೆಗಿಂಚ್ ಪ್ರಿಯಾಕ್ ಕಾನೂನಾಚೊ ಪಾಟಿಂಬೊ ಲಾಬನಾತ್ಲ್ಯಾರ್, ತೀಸ್ ದಿಸಾಂಭಿತರ್ ಶರಿಯಾ ಕಾನೂನಾಪರ್ಮಾಣೆಂ ತಾಕಾ ವೊಮ್ತೆಂ ನಿದಾವ್ನ್ ಪಾಟಿರ್ ಗುಳೆ ಮಾರ್‍ತೆಲೆ. ಹಾಚೆಥಾವ್ನ್ ಬಚಾವ್ ಜಾಂವ್ಕ್ ಏಕ್ ಅಶೀರ್ ವಾಟ್ ಆಸಾ. ಮರಣ್ ಪಾವ್‌ಲ್ಲ್ಯಾ ತಲಾಲ್ ಮೆಹೆದಿಚ್ಯಾ ಕುಟ್ಮಾದಾರಾಂಚೊ ನಿರ್ಧಾರ್ ಕಿತೆಂ ಮ್ಹಳ್ಳಿ ಗಜಾಲ್ ಹಾಂಗಾ ಪ್ರಿಯಾಕ್ ಮಹತ್ವಾಚೊ ಜಾತಾ. ತಾಣಿಂ ಪ್ರಿಯಾಕ್ ಮರ್‍ಣಾಚಿ ಶಿಕ್ಶಾಚ್ ದೀಜೆ ಮ್ಹಣ್ ಸಾಂಗ್ಯೆತ್ ವಾ ಮರಣ್ ನ್ಹಯ್ ಬಗಾರ್ 15 ವರ್‍ಸಾಂಚಿ ಜಯ್ಲಾಶಿಕ್ಶಾ ದಿಯಾ ಮ್ಹಣ್ಯೆತ್ ವಾ ಹೆಂ ದೊನೀ ನಾಕಾ ತಲಾಲಾಚ್ಯಾ ಜಿವಾಚೆಂ ಮೋಲ್ ಘೆವ್ನ್ ಪ್ರಿಯಾಕ್ ಭೊಗ್ಸಾಣೆಂ ದಿವ್ಯೆತ್. ಹಾಕಾ Blood Money ಮ್ಹಣ್ತಾತ್. ಹೊ ಐವಜ್ ಕಿತ್ಲೊ ಮ್ಹಣ್ ಠರಾಂವ್ಚೊ ಅಧಿಕಾರ್ ತಲಾಲಾಚ್ಯಾ ಕುಟ್ಮಾದಾರಾಂಚೊ. ಯೆಮೆನ್ ದೆಶಾಂತ್ ಖುನಿಗಾರಾಕ್ ಭೊಗ್ಸಾಣೆಂ ದಿಲ್ಲೆ ದಾಖ್ಲೆ ಆಸಾತ್. 2023 ಇಸ್ವೆಂತ್ ಯೆಮೆನಾಚ್ಯಾ ಎಕಾ ರಾಜಕೀಯ್ ಮುಕೆಲ್ಯಾನ್ ಆಪ್ಲ್ಯಾ ಪುತಾಚ್ಯಾ ಖುನಿಗಾರಾಕ್ ಭೊಗ್ಸಾಣೆಂ ದಿಲ್ಲೆಂ. ಪ್ರಸ್ತುತ್ ಸೌದಿ ಅರೇಬಿಯಾ ಆನಿ ಇರಾನ್ ದೆಶಾಂಚ್ಯೆ ಕುಮ್ಕೆನ್ ಭಾರತೀಯ್ ಸರ್ಕಾರ್ ತಲಾಲಾಚ್ಯಾ ಕುಟ್ಮಾದಾರಾಂಸಂಗಿ ರಾಜಿಸಂಧಾನ್ ಕರ್‍ಚೆಂ ಪ್ರೇತನ್ ಕರ್‍ನ್ ಆಸಾ. ಯೆದೊಳ್ ಮೆಹೆದಿಚಾ ಕುಟ್ಮಾದಾರಾಂನಿ ಬ್ಲಡ್‌ಮನಿ ಘೆವ್ನ್ ರಾಜಿ ಸಂಧಾನ್ ಒಪಂವ್ಕ್‌ನಾ ಜಾಲ್ಲ್ಯಾನ್ ಪ್ರಿಯಾಕ್ ಜುಲಾಯ್ 16 ತಾರಿಕೆರ್ ಮರ್‍ಣಾಚಿ ಶಿಕ್ಷಾ ಜಾರಿ  ಜಾತೆಲಿ ಮ್ಹಳ್ಳಿ ಖಬಾರ್ ಆಯ್ಲ್ಯಾ.

ಸಂಪೊವ್ಚ್ಯಾ ವಗ್ತಾ

ಪ್ರಿಯಾನ್ ಕಾನೂನ್ ಹಾತಿಂ ಘೆತ್‌ಲ್ಲೆಂ ಸಮರ್ಥನ್ ಕರುಂಕ್ ಸಾಧ್ ನಾ. ಪುಣ್ ಆಪ್ಲ್ಯಾ ಸ್ವರಕ್ಶಣಾಕ್ ತಾಣೆಂ ಹೊ ಕಠೀಣ್ ನಿರ್ಧಾರ್ ಘೆತ್‌ಲ್ಲೊಗೀ ಮ್ಹಣ್ ವರೊವ್ನ್ ಪಳಯ್ಜೆ. ಕಾನೂನಾಚ್ಯಾ ಬುಕಾಂನಿ ಆಪ್ರಾಧ್ ಮ್ಹಣ್ ದಿಸ್ಚ್ಯೊ ಸಂಗ್ತಿ ಮನ್ಶಾಚ್ಯಾ ಮುಳಾಚ್ಯಾ ಹಕ್ಕಾಂಚ್ಯೆ ನದ್ರೆನ್ ಪಳೆಯ್ತಾನಾ ಸಾರ್ಕೆಂ ತಶೆಂ ದಿಸ್ತಾತ್. ಸೊಸ್ಣಿಕಾಯೆಚಿ ಪ್ರತಿರೂಪ್ ಜಾವ್ನಾಸ್ಚಿ ಸ್ತ್ರೀ, ನಿತಿಖಾತಿರ್ ಝುಜ್ತಾನಾ ಏಕ್ ಶಿಂವಾತಿತ್ಲಿ ಪ್ರಬಲ್ ಜಾತಾ ಮ್ಹಣ್ ಪ್ರಿಯಾನ್ ದಾಕಯ್ಲಾಂ.

✍️ –ಮನೋಜ್ ಫೆರ್ನಾಂಡಿಸ್, ಕಿರೆಂ