1. ಕಾರ್ಲೊ ಆಕುತಿಸ್ (1991-2006) ಪವಿತ್ರ್ ಸಾಕ್ರಾಮೆಂತಾಥಂಯ್ ಆಕರ್ಶಿತ್ ಜಾಲ್ಲೊ ಪಂದ್ರಾ ವರ್ಸಾಂ ಪ್ರಾಯೆಚೊ ಇಟೆಲಿಚೊ ತರ್ನಾಟೊ. ಖಂಯ್ಚ್ಯಾ ಡಿಜಿಟಲ್ ಮಾಧ್ಯಮಾಂಕ್ ಆಜ್ ಮನಿಸ್ ಗುಲಾಮ್ ಜಾಲಾ ತ್ಯಾಚ್ ಅಂತರ್‌ಜಾಳಿಂತ್ ಏಕ್ ವೆಬ್ ಸಾಯ್ಟ್ ತಯಾರ್ ಕರ‍್ನ್ ಸಂಸಾರ್‌ಭರ್ ಜಾಲ್ಲಿಂ ಸುಮಾರ್ 150 ಎವ್ಕರಿಸ್ತಿಕ್ ಅಜ್ಯಾಪಾಂ ದಾಖಲ್ ಕರ‍್ನ್ ಎವ್ಕರಿಸ್ತಿಕ್ ಜೆಜು ಖರ‍್ಯಾನ್ ಆಮ್ಚೆಮಧೆಂ ಆಸಾ ಮ್ಹಣುನ್ ಪರ್ಗಟ್ಲಲೊ ಆಪೊಸ್ತಲ್ ತೊ. ಆಮ್ಚ್ಯಾ ಸಹಸ್ರಾಚೊ ಪಯ್ಲೊ ಸಾಂತ್ ಹೊ. ತಾಕಾ ’ಇಂಟರ್‌ನೆಟ್ಟಾಚೊ ಸಾಂತ್’ ಮ್ಹಣುನ್ ಆಪಯ್ತಾತ್.

2.ಪಿಯರ್ ಜಾರ್ಜಿಯೊ ಫ್ರಸಾತಿ(1901-1925) ‘ಆಟ್ ಭಾಗಿಂಚೊ ವ್ಯಕ್ತಿ’ ಮ್ಹಣ್ ನಾಂವಾಡ್‌ಲ್ಲೊ ಹೊ ಯುವಕ್ ಎವ್ಕರಿಸ್ತಾ ಥಂಯ್ ಎಕ್ವಟ್ಲಲೊ, ಸಮಾಜಿಕ್ ನೀತ್ ಆಸಾ ಕರುಂಕ್ ವಾವರ‍್ಲಲೊ ವ್ಯಕ್ತಿ. ತಾಚೆ ಥಂಯ್ ಆಸ್‌ಲ್ಲೊ ಗೂಂಡ್ ಬಾವಾರ್ಥ್, ಗುಪ್ತಿ ಜಿವಿತ್ ಆನಿ ಸೆವಾ ಜಾಯ್ತ್ಯಾ ಯುವಜಣಾಂಕ್ ಪ್ರೇರಣ್.

ಸಾಂತಾಚ್ಯೆ ಆವಯ್‌ಲಾಗಿಂ ಸಂದರ್ಶನ್–ತರ್ಜಣ್: ಜೊ. ಸಿ. ಸಿದ್ದಕಟ್ಟೆ, ಕಾರ್ಮೆಲಿತ್

“ಕಾರ್ಲೊನ್ ಜಿಯೆಲ್ಲಿ ಅತ್ಮಿಕತಾ ಯುವಜಣಾಂನಿ ಟ್ರೈ ಕರ‍್ಯೆತ್ ತಸಲಿ”–(ಆಂಟೊನಿಯಾ ಸಲ್ಜಾನೊ, ಕಾರ್ಲೊ ಅಕುತಿಸಾಚಿ ಆವಯ್)

ತುಜೊ ಪೂತ್ ಕಿತ್ಯಾಕ್ ಆಜ್ ಇಟೆಲಿಂತ್ ಆನಿ ಸಂಸಾರ್‌ಭರ್  ಲೊಕಾಮೊಗಾಳ್ ಜಾಲಾ?

ಲೋಕ್ ಕಾರ್ಲೊವಿಶಿಂ ಉಲಯ್ತಾನಾ ಏಕ್ ವಿಶಿಶ್ಟ್ ರಿತಿನ್ ಉಲಯ್ತಾ; ಆಮ್ಚ್ಯಾ ಸಹಸ್ರಾಚೊ ತೊ ಪಯ್ಲೊ ಸಾಂತ್ ಆನಿ ಪ್ರಾಯೆನ್ ಲ್ಹಾನ್ ದೆಕುನ್ ಆಸೊಂಕ್ ಪುರೊ. ತಾಕಾ ’ಇಂಟರ್‌ನೆಟ್ಟಾಚೊ ಸಾಂತ್’ ಮ್ಹಣೊನ್ ಆಪಯ್ತಾತ್. ಆಯ್ಚೊ ಕಾಳ್ ಡಿಜಿಟಲ್ ಮಾದ್ಯಮಾಚೊ ಜಾಲ್ಲ್ಯಾನ್ ಚಡಾವತ್ ಲೋಕ್, ತಾಂತುಂಯ್ ಯುವಜಣ್ ಹ್ಯೆ ಮಾಂಚಿಯೆರ್ ಆಸಾತ್ ದೆಕುನ್ ಕಾರ್ಲೊ ಇಂಟರ್‌ನೆಟ್ ಯುಗಾಚೊ ಏಕ್ ವಿಶಿಶ್ಟ್ ವೆಕ್ತಿ ಮ್ಹಣೊನ್ ತಾಂಕಾಂ ಭೊಗ್ತಾ ದಿಸ್ತಾ.

ಕಾರ್ಲೊನ್ ಎವ್ಕರಿಸ್ತಿಕ್ ಪ್ರದರ್ಶನಾಂ ಕೆಲ್ಲಿಂ. ತಾಕಾ ಲೊಕಾನ್ ವೆಗಿಂಚ್ ಒಳ್ಕೊಂಕ್ ಹೆಂಯ್ ಏಕ್ ಕಾರಣ್ ಆಸೊಂಕ್ ಪುರೊಗೀ?

ಖಂಡಿತ್ ಸಾಧ್ ಆಸಾ! ಕಾರ್ಲೊನ್ ಎವ್ಕರಿಸ್ತಿಕ್ ಖುಣಾಂಚೆರ್ ತಯಾರ್ ಕೆಲ್ಲೆಂ ಎಕ್ಸಿಬಿಶನ್ ಸಂಸಾರ್‌ಭರ್ ವೆವೆಗ್ಳ್ಯಾಂ ಇಗರ್ಜಾಂನಿ ಪ್ರದರ್ಶಿತ್ ಜಾಲಾಂ. ಹಾಚೆವರ್ವಿಂ ಜಪಾನ್, ಭಾರತ್, ಆಫ್ರಿಕಾ, ಅಮೆರಿಕಾ, ಬ್ರೆಝಿಲ್, ಯುರೊಪ್ ಸಗ್ಳ್ಯಾಂನಿ ತಾಚಿ ಒಳೊಕ್ ಜಾಲ್ಲಿ. ಹಿಂ ಪ್ರದರ್ಶನಾಂ ಪಳೆವ್ನ್ ಜಾಯ್ತ್ಯಾಂ ಜಣಾಂನಿ ಜಿಣಿ ಬದಲ್ಲಲಿಂ ನಿದರ್ಶನಾಂ ಆಸಾತ್. ಎವ್ಕರಿಸ್ತಾಕ್ ಲಾಗಿಂ ಜಾಲ್ಲಿಂ ಜಾಯ್ತಿಂ ಗೂಣ್ ಜಾಲ್ಲಿಂ ಆಸಾತ್. ಕಿತ್ಯಾಕ್, ಎವ್ಕರಿಸ್ತಾವಿಶಿಂ ಆಮಿ ಉಲಯ್ತಾನಾ ಆಮಿ ಆಮ್ಚೆಸಾಂಗಾತಾ ರಾವೊಂಕ್ ಮನಿಸ್ ಜಾಲ್ಲ್ಯಾ  ಜೆಜುವಿಶಿಂ ಉಲಯ್ತಾಂವ್. ಆಮಿ ಎವ್ಕರಿಸ್ತಾವಿಶಿಂ ಉಲೊಂವ್ಚೆಂ ಜೆಜು ಪಸಂದ್ ಕರ‍್ತಾ.

ಕಾರ್ಲೊಕ್ ಸಾಂತ್ ಮ್ಹಣ್ ಪಾಚಾರುಂಕ್ ಜಾಯ್ ಆಸ್ಲೆಂ ಅಜ್ಯಾಪ್ ಎದೊಳ್‌ಚ್ ಮೆಳ್ಳಾಂ. ಸಾಂತಿಪಣಾಚೊ ಪರ್ಗಟ್ ಮಾನ್ ಮೆಳೊಂಕ್ ಕಸಲಿ ಪ್ರಕ್ರಿಯಾ ಪವಿತ್ರ್ ಸಭೆಂತ್ ಚಲ್ತಾ?

ತಾಚ್ಯಾ ಸಾಂತಿಪಣಾಕ್ ಸಾಕ್ಸ್ ಜಾವ್ನ್ ಮುಕಾರ್ ಆಯಿಲ್ಲೆಂ ದುಸ್ರೆಂ ಅಜ್ಯಾಪ್ ಮ್ಹಳ್ಯಾರ್ – ಕೊಸ್ತಾರಿಕಾಚ್ಯೆ ಎಕೆ ಸ್ತ್ರೀಯೆಕ್ ಸಯ್ಕಾಲಾಥಾವ್ನ್ ಪಡೊನ್ ತಕ್ಲೆಕ್ ಮಾರ್ ಜಾಲ್ಲೊ. ಹಾಂತುಂ ಮೆಂದ್ವಾಕ್ ವ್ಹಡ್ ಆಘಾತ್ ಜಾಲ್ಲೊ, ಕಾರ್ಲೊಲಾಗಿಂ ತಾಣಿಂ ಮಾಗೊನ್ ಥೊಡ್ಯಾಚ್ ದಿಸಾಂನಿ ವಯ್ಜಾಂಕ್ ವಿವರುಂಕ್ ಜಾಯ್ನಾತ್ಲೆಬರಿ ಕಸಲಿಯ್ ಸರ್ಜರಿ ನಾಸ್ತಾನಾ ವೆಕ್ತಿ ಸಂಪೂರ್ಣ್ ಬರಿ ಜಾಲಿ ಆನಿ ಅಸ್ಸಿಸಿಂತ್ ಕಾರ್ಲೊಚ್ಯಾ ಫೊಂಡಾಕ್ ತಾಣಿಂ ಭೆಟ್ ದಿಲ್ಲಿ.

ಹ್ಯಾ ಅಜ್ಯಾಪಾವಿಶಿಂ ಮ್ಹಾಕಾ ಖಬರ್ ಪಯ್ಲೆಂಚ್ ಮೆಳ್‌ಲ್ಲಿ. ಸಾಂತಿಪಣ್ ಪರ್ಗಟ್ ಉಚಾರಿಜೆ ತರ್ ಜಾಯ್ತಿ ಪ್ರಕ್ರಿಯಾ ತಾಚ್ಯಾ ಪಾಟ್ಲ್ಯಾನ್ ಚಲ್ತಾ. ವಾತಿಕಾನಾಥಾವ್ನ್ ಮೆಡಿಕಲ್ ಕಮಿಶನ್ ಆಸಾ ಕೆಲ್ಲೆಂ. ತಾಂತುಂ 15 ದಾಕ್ತೆರ್ ಹ್ಯಾ ಅಜ್ಯಾಪಾಚಿ ಕೇಜ್ ಶಿಕ್ತಾಲೆ. ವೆವೆಗ್ಳೆ ಪರಿಣತ್ ದಾಕ್ತೆರ್ ವೆವೆಗ್ಳ್ಯಾಂ ಆಯಾಮಾಂನಿ – ತಿಚ್ಯಾ ಮೆಂದ್ವಾಚೊ ಮಾರ್ ಆನಿ ತಾಕಾ ಕರಿಜೆ ಜಾಲ್ಲಿ ಚಿಕಿತ್ಸಾ, ಅಚಾನಕ್ ಜಾಲ್ಲಿ ಬದ್ಲಾವಣ್ ಆನಿ ತುರ್ತ್ ಬರೆಂಪಣ್ ಹೆಂ ಸಗ್ಳೆಂ ತುಕುನ್ ಪಳೆತಾಲೆ. ಸಕ್ಕಡ್ ತಪಾಸ್ಣಿ ಜಾಲ್ಯಾ ಉಪ್ರಾಂತ್ ತಾಣಿಂ ಸಕ್ಡಾಂನಿ ಮತ್ ಘಾಲುಂಕ್ ಆಸಾ. ಥೊಡೆಪಾವ್ಟಿಂ ಕಿತೆಂ ರಿಸಲ್ಟ್ ಆಯ್ಲಾಂ ತಾಚೆರ್ ಥೊಡ್ಯಾಂಕ್ ದುಬಾವ್ ವಾ ವಿರೋಧ್ ಅಭಿಪ್ರಾಯ್ ಆಸ್ಯೆತ್. ಪುಣ್ ಕಾರ್ಲೊಚ್ಯೆ ಕೆಜಿಂತ್ ಸಕ್ಡಾಂಚೊ ಮತ್ ಏಕ್ ಸಾರ್ಕೊ ಆಸ್ಲೊ. ತಾಣಿಂ ಸಕ್ಡಾಂನಿ ಹಿ ಏಕ್ ವಯ್ಜಕೀಯ್ ಆನಿ ವೆಗ್ಯಾನಿಕ್ ಸತಾಭಾಯ್ಲಿ ಖುಣಾ ಮ್ಹಣ್ ಮಾಂದುನ್ ಘೆತ್ಲಾಂ. 

ತಾಚ್ಯಾ ಉಪ್ರಾಂತ್ ಥಿಯೋಲಜಿಕಲ್ ಕಮಿಶನ್ ಆಸಾ. ಮಾಗಿರ್ ಕಾರ್ಡಿನಲಾಂಚೆಂ ಕಮಿಶನ್ ಆಸಾ ಆನಿ ನಿಮಾಣೆಂ ಪಾಪಾ ಸಾಯ್ಭ್. ಸಕ್ಡಾಂನಿ ಸಯ್ ಘಾಲ್ಯಾರೀ ನಿಮಾಣೆಂ ಪಾಪಾನ್ ನಿರಾಕರುಂಕ್ ಸಾಧ್ ಆಸಾ. ದೆಕುನ್ ಪಾಪಾನ್ ಸಯ್ ಘಾಲ್ನಾಸ್ತಾನಾ ಆಮಿ ತ್ಯಾ ವಿಶಿಂ ಉಲೊಂವ್ಕ್ ಯೀ ಜಾಯ್ನಾ. 

ಕಾರ್ಲೊಚಿಂ ಹೆರ್ ಅಜ್ಯಾಪಾಂ ಖಂಯ್ಚಿಂ? ತುಮ್ಕಾಂ ಕಳೊನ್ ಆಯಿಲ್ಲಿಂ ಹೆರ್ ಅಜ್ಯಾಪಾಂ ಆಸಾತ್?

ಕಾರ್ಲೊಚ್ಯೆ ವಿನೊವ್ಣೆನ್ ಸದಾಂಯ್ ಮ್ಹಳ್ಳೆಬರಿ ಅಜ್ಯಾಪಾಂ ಜಾಲ್ಲಿ ಖಬರ್ ಮ್ಹಾಕಾ ಮೆಳ್ತಾ. ಪವಿತ್ರ್ ಸಭೆಕ್ ದೋನ್ ಬಳಾಧಿಕ್ ಖುಣಾಂ ಪಾವ್ತಾತ್. ತಾಚೆಭಾಯ್ರ್ ಮ್ಹಸ್ತು ಮ್ಹಸ್ತು ಆಸಾ, ಥೊಡಿಂ ನಿಜಾಯ್ಕಿ ಆಯ್ಕಾತಾನಾ ಆಂಗ್ ಶಿಶಿರ‍್ತಾ. ನಿಜಾಯ್ಕಿ ತಾಚ್ಯಾ ಮರ‍್ಣಾದಿಸಾಚ್, ಮರ‍್ಣಾಚಿ ರೀತ್ ಕರ‍್ತಾನಾ ಬ್ರೆಸ್ಟ್ ಕ್ಯಾನ್ಸರ್ ಆಸ್ಚ್ಯೆ ಎಕೆ ಸ್ತ್ರೀಯೆಕ್ ಗೂಣ್ ಜಾಲ್ಲೆಂ, ಪಯ್ಲೆಂ ಅಜ್ಯಾಪ್. ತಿಚೆಂ ಮಾಗ್ಣೆಂ ಕಾರ್ಲೊನ್ ತುರ್ತಾನ್ ಆಯ್ಕಾಲ್ಲೆಂ.  

ಆತಾಂ ತುಂ ಆನಿ ತುಮ್ಚೆಂ ಕುಟಮ್ ಕಾರ್ಲೊಕಡೆ ಕಸಲ್ಯಾ ಸಂಬಂದಾಂತ್ ಆಸಾತ್, ಮ್ಹಣ್ಜೆ, ತುಮಿಯ್ ತಾಚೆಕಡೆ ಮಾಗ್ತಾತ್?

ಸಕ್ಡಾಂ ಮಾಗ್ತಾತ್ ತಶೆಂ ಹಾಂವ್‌ಯೀ ತಾಚೆಲಾಗಿಂ ವಿನೊವ್ಣೆಕ್ ಉಲೊ ಕರ‍್ತಾಂ. ತೊ ಆಮ್ಚ್ಯಾ ಘರಾಂತ್‌ಚ್ ಆಸಾಶೆಂ ಭೊಗ್ತಾ. ತಾಚ್ಯಾ ಉಪ್ರಾಂತ್ ಜಲ್ಮಾಲ್ಲಿ ದೊಗಾಂ ಭುರ್ಗಿಂ ಮ್ಹಾಕಾ ಆಸಾತ್. ತಾಂಚೆಥಂಯ್ ತಾಚೊ ವಿಶೇಸ್ ಆಧಾರ್ ಮ್ಹಾಕಾ ದಿಸ್ತಾ. ಸದಾಂ ಮ್ಹಳ್ಳೆಬರಿ ತೊ ಕೊಣಾಕ್ ದಿಶ್ಟಿಕ್ ಪಡ್ಲೊ, ಗೂಣ್ ಜಾಲಿಂ, ಬರೆಂಪಣ್ ಮೆಳ್ಳೆಂ ಮ್ಹಣೊನ್ ಆಯ್ಕಾತಾನಾ ತೊ ಆಜೂನ್ ಸಕ್ರಿಯ್ ಆಸಾ ಮ್ಹಣ್ ಮ್ಹಾಕಾ ಭೊಗ್ತಾ. ಅತ್ಮ್ಯಾಂತ್ ತಾಚೊ ಸಾಂಗಾತ್ ಭೊಗ್ತಾಂ. ತೊ ಕಸಲೊ ಸಾಂಗಾತ್ ಮ್ಹಣೊನ್ ಉತ್ರಾಂನಿ ಸಾಂಗೊಂಕ್ ಮ್ಹಾಕಾ ಕಳನಾ.. ಹಾಂವ್ ಕಾಂಯ್ ಮಿಸ್ತಿಕ್ ವಾ ಭಾಗೆವಂತ್ ನ್ಹಯ್. ಸದಾಂ ಮಿಸಾಕ್ ವೆತಾಂ. ಆರಾಧನಾಕ್ ಬಸ್ತಾಂ. ಉಣೆಂ ನಿದ್ತಾಂ, ಚಡಿತ್ ವೇಳ್ ಮಾಗ್ಣ್ಯಾಂತ್ ಖರ್ಚಿತಾಂ. ದೆವಾಚ್ಯಾ ಹಾಜರ‍್ಪಣಾಕ್ ಸೂಕ್ಮ್ಶ್ ಧ್ಯಾನ್ ದೀಂವ್ಕ್ ಹೆಂ ಸಲೀಸ್ ಜಾತಾ.

ಕಾರ್ಲೊಕ್ ‘ಸದಾಂ ಕುಮ್ಗಾರ್ ಸೆಂವ್ಚೊ’ ವ್ಹಡ್ ವಿಶಯ್ ಜಾವ್ನಾಸ್ಲೊ ಕಿತ್ಯಾಕ್?

ಸಾತ್ ವರ‍್ಸಾಂ ಪ್ರಾಯೆರ್ ತಾಕಾ ಕುಮ್ಗಾರ್ ಮೆಳ್‌ಲ್ಲೊ. ತ್ಯಾ ದಿಸಾ ಉಪ್ರಾಂತ್ ಲುಕೆಮಿಯಾ ಜಾವ್ನ್ ಬೆಡ್ಡಾರ್ ಪಡ್ತಾ ಪರ್ಯಾಂತ್ ಚಡಾವತ್ ಸದಾಂ ಮಿಸಾಕ್ ತೊ ಗೆಲಾ. ‘ಸದಾಂ ಜೆಜು ಸಾಂಗಾತಾ ಆಸ್ಚೊಚ್ ಮ್ಹಜ್ಯಾ ಜಿವಿತಾಚೊ ಉದ್ದೇಶ್’ ಅಶೆಂ ತೊ ಮ್ಹಣ್ತಾಲೊ. ಕುಮ್ಗಾರ್ ಸೆವ್ತಾನಾ ಸರ್ಗಿಂಚ್ಯಾ ಸಂಪರ್ಕಾಕ್ ಆಮಿ ಯೆತಾಂವ್, ತೊ ಮ್ಹಣ್ತಾಲೊ. ಎವ್ಕರಿಸ್ತ್ ಫಕತ್ ಏಕ್ ಸಂಕೇತ್ ನ್ಹಯ್, ಖಾಲಿ ಉಡಾಸ್ ನ್ಹಯ್ ಬಗಾರ್ ಹರ‍್ಯೆಕಾ ಎವ್ಕರಿಸ್ತಾಂತ್ ಜೆಜು – ಕೂಡ್-ರಗತ್-ಅತ್ಮೊ ಆನಿ ದೇವ್ಪಣ್ – ನೀಜ್ ರುಪಾನ್ ಹಾಜಿರ್ ಜಾತಾ. ಹೆಂ ಘಡೊಂಕ್ ಯಾಜಕಾಂಚೆಂ ವಾ ಕುಮ್ಗಾರ್ ಸೆವ್ತಲ್ಯಾಂಚೆಂ ಪವಿತ್ರ್ ಪಣ್ ಕಾರಣ್ ಜಾಯ್ನಾ. ಪುಣ್ ನಿತಳ್ ಜಾಲ್ಲೊ ಅತ್ಮೊ ಎವ್ಕರಿಸ್ತಾಥಾವ್ನ್ ಭರ‍್ಪೂರ್ ಬರೆಂಪಣ್ ಜೋಡ್ನ್ ಘೆತಾ.

‘ಎವ್ಕರಿಸ್ತ್ ಮ್ಹಜೊ ಸರ್ಗಿಂಚೊ ಹೈವೇ’ (ರಾಜ್‌ರಸ್ತೊ) ಅಶೆಂ ಕಾರ್ಲೊನ್ ಮ್ಹಳ್ಳೆಂ. ಹಾಚೊ ಅರ್ಥ್ ಕಿತೆಂ?

ಹಾಂವೆಂ ಪಳೆಲ್ಲೆ ಮ್ಹಜೆ ಥೊಡೆ ಒಳ್ಕಿಚೆ ಮನಿಸ್ ಮಾನಸಿಕ್ ಸಮಸ್ಸ್ಯಾಂನಿ ಸಾಂಪ್ಡೊನ್ ನಾಂವಾಡ್ದಿಕ್ ದಾಕ್ತೆರಾಂಕ್ ಧರ‍್ನ್ ಥೆರಪಿ ಕರ‍್ನ್ ಆಸ್ಲಲೆ ಸಕ್ಕಡ್ ಸೊಡ್ನ್ ಸದಾಂ ಮಿಸಾಕ್ ಯೇವ್ನ್ ಹ್ಯಾ ಬಾಂದ್ಪಾಸಾಥಾವ್ನ್ ತುರ್ತಾನ್ ಭಾಯ್ರ್ ಆಯಿಲ್ಲೆ ಆಸಾತ್. ಹ್ಯಾ ಸಂಸಾರಾಂತ್ ಎವ್ಕರಿಸ್ತಾ ಪ್ರಾಸ್ ಅಲೌಕಿಕ್ ಸಂಗತ್ ಹೆರ್ ಕಿತೆಂಚ್ ಆಸೊಂಕ್ ಸಾಧ್ ನಾ. ಮೊಯ್ಜೆ ಸಿನಾಯ್ ಪರ್ವತಾರ್ ದೆವಾನ್ ಭೆಟೊನ್ ದೆಂವೊನ್ ಯೇಜೆ ತರ್ ತಾಚೆಂ ಮುಕಮಳ್ ಪರ್ಜಾಳ್ತಾಲೆಂ. ಎವ್ಕರಿಸ್ತಿಕ್ ಆರಾಧನಾಂತ್ ತೆಂಚ್ ಆಮ್ಕಾಂಯ್ ಜಾತಾ. ಆಮಿ ಹೆಂ ಗಣ್ಣೆಂ ಕರಿನಾಂವ್, ದೆವಾಚೊ ಉಜ್ವಾಡ್ ಆಮ್ಕಾಂ ಪರ್ಜಳಾಯ್ತಾ, ಬದ್ಲಿತಾ, ನಿತಳ್ ಕರ‍್ತಾ. ದೆಕುನ್ ಕಾರ್ಲೊ ತೆಂ ಉತರ್ ಸಾಂಗ್ತಾ. 

ಹೈಸ್ಕೂಲಾಂತ್ ಕಾರ್ಲೊ ಜೆಜುವಿಶ್ಯಾಂತ್ ಉಗ್ತ್ಯಾನ್ ಉಲಯ್ತಾಲೊ. ತಾಕಾ ಹೆರ್ ಭುರ್ಗ್ಯಾಂನಿ ವಿರೋಧ್ ಕರುಂಕ್ ನಾ. ಕಶೆಂ ಸಾಧ್?

ಜಾಯ್ತಿಂ ಜೆಜುವಿಶಿಂ ಉಲೊಂವ್ಚೆಂ ಸೊಡ್ಯಾಂ, ಪರ್ಗಟ್ ಖುರ‍್ಸಾಘರ‍್ತ್ ಕಾಡ್ಚೊ, ಜೆವ್ಣಾ ಆದಿಂ ಜೆಜುಚೊ ಉಡಾಸ್ ಕಾಡ್ಚೊ, ಆಪ್ಣೆಂ ಪಾತ್ಯೆಂವ್ಚೆಂ ಸತ್ ಹೆರಾಂಲಾಗಿಂ ಸಾಂಗ್ಚೆಂ ಮ್ಹಳ್ಯಾರ್, ಕಿತೆಂಗೀ ಚೂಕ್ ಆಧರ‍್ತಾಂ ಕೊಣ್ಣಾ ಮ್ಹಳ್ಳೆಬರಿ ಲಜೆತಾತ್. ಹೆರಾಂಮುಕಾರ್ ಧರ್ಮಿಕ್ ಜಾವ್ನ್ ಜಿಯೆಂವ್ಚೆಂ ಕಾವ್ಜೆಣೆಚಿ ಸಂಗತ್ ನ್ಹಯ್. ಚೂಕ್ ಕೆಲ್ಲ್ಯಾಂತ್ ವಾ ಹೆರಾಂಕ್ ಅನ್ನ್ಯಾಯ್ ಕೆಲ್ಲ್ಯಾಂತ್ ಆಮಿ ಆಜ್ ಲಜ್, ಕಾವ್ಜೆಣಿ ಭೊಗ್ಚಿ ಉಣೆ, ಪುಣ್ ಆಪುಣ್ ಜೆಜುಚಿಂ/ಚೊ ಮ್ಹಣೊನ್ ಪರ್ಗಟ್ ಜಿಯೆಂವ್ಚ್ಯಾಂತ್ ಪಾಟಿಂ. ತಸಲ್ಯಾಂಚಿ ‘ಆಂತರಿಕ್ ಜಿಣಿ’ ಶೂನ್ಯ್ ಮ್ಹಣ್ ಸ್ಪಶ್ಟ್ ಜಾತಾ. ಸಾಸ್ಣಾಚ್ಯಾ ಜಿವಿತಾಚಿ ಖಬರ್‌ಚ್ ತಾಂಕಾಂ ನಾ ಅಶೆಂ ದಿಸ್ತಾ. ಕಾರ್ಲೊ ಎವ್ಕರಿಸ್ತಿಕ್ ಜಿವಿತ್ ಜಿಯೆತಾಲೊ, ಸಕ್ಡಾಂಚೊ ಮೋಗ್ ಕರ‍್ತಾಲೊ, ಸಕ್ಡಾಂಕ್ ಎಕೆಚ್ ರಿತಿನ್ ಮಾನ್ ದಿತಾಲೊ. ದೆಕುನ್ ತೊ ಜೆಜುವಿಶ್ಯಾಂತ್ ಉಗ್ತ್ಯಾನ್ ಉಲಯ್ತಾಲೊ ಆನಿ ಹೆರ್ ಆಯ್ಕಾತಾಲೆ. ತಾಚ್ಯೆಚ್ ಪ್ರಾಯೆಚೆ ಭುರ್ಗೆ ತಾಕಾ ಆಕರ್ಶಿತ್ ಜಾಲ್ಲೆ ತರ್ ಕಾರ್ಲೊಚೆಂ ಅತ್ಮೀಕ್ ಜಿವಿತ್ ಸಕ್ಡಾಂನಿ, ಪ್ರತ್ಯೇಕ್ ಜಾವ್ನ್ ಯುವಜಣಾಂನಿ ಟ್ರೈ ಕರ‍್ಯೆತ್.

ಕಾರ್ಲೊ ಇಂಟರ್‌ನೆಟ್ ಕಾಳಾಚೊ. ಫೊನ್, ಇಂಟರ್‌ನೆಟ್, ವೀಡಿಯೊ ಗೇಮ್ಸ್ ಆನಿ ಮಾದ್ಯಮಾಂಚೊ ವಾಪಾರ್ ಕಸೊ ಕರ‍್ತಾಲೊ?

 ತೊ ಆಸ್ತಾನಾ ಸ್ಮಾರ್ಟ್ ಪೊನಾಂ ನಾತ್ಲಿಂ. ಮೆಸೆಂಜರ್ ಆಸ್ಲೆಂ. ಕಾರ್ಲೊ ಚಡಾವತ್ ಹೆರ್ ಚಟುವಟಿಕೆಂನಿ ಸಕ್ರಿಯ್ ಆಸ್‌ಲ್ಲ್ಯಾನ್ ಸೆಲ್‌ಫೊನಾಚೊ ವಾಪಾರ್ ಗರ್ಜೆತೆಕೀದ್. ವೀಡಿಯೊ ಗೇಮ್ಸ್ ಖೆಳ್ತಾಲೊ. ಬರಾಬರ್, ಅಮೆರಿಕಾಂತ್ ವೀಡಿಯೊ ಗೇಮ್ಸಾಂಕ್ ಎಡಿಕ್ಟ್ ಜಾವ್ನ್ ಭುರ್ಗಿಂ ಮತಿಚ್ಯೆ ಪಿಡೆಕ್ ವೊಳಗ್ ಜಾಂವ್ಚೆವಿಶಿಂ ಖಬರ್ ವಾಚ್ತಾಲೊ ಜಾಲ್ಲ್ಯಾನ್ ತೊ ಹ್ಯಾ ವಿಶಿಂ ಚತ್ರಾಯ್ ಸಾಂಬಾಳ್ತಾಲೊ. ವ್ಹಡ್ ಜಾತಾನಾ ಇಂಟರ್‌ನೆಟ್ ವಾಪರ‍್ತಾಲೊ. ಎವ್ಕರಿಸ್ತಿಕ್ ಖುಣಾಂವಿಶಿಂ ಸರ್ವ್ ಖಬರ್ ಒಟ್ಟುಕ್ ಕರ‍್ನ್ ವೆಬ್‌ಸಾಯ್ಟ್ ತಾಣೆಂ ತಯಾರ್ ಕೆಲ್ಲಿ. ಮಾದ್ಯಮಾಂ ಆಮ್ಚ್ಯೆ ಗರ್ಜೆಕ್ ಭರ‍್ಪೂರ್ ವಾಪಾರಿಜೆ ಶಿವಾಯ್ ಆಮಿ ಕಶೆಂ ಚಿಂತಿಜೆ ಆನಿ ಚಲಜೆ ಮ್ಹಣೊನ್ ಮಾದ್ಯಮಾಂನಿ ಹುಕುಮ್ ದಿಂವ್ಚೆಬರಿ ಜಾಂವ್ಕ್ ನ್ಹಜೊ ಮ್ಹಣ್ ತೊ ಸಾಂಗ್ತಾಲೊ.

ಆಜ್‌ಕಾಲ್ ಯುವಜಣ್ ವಾ ಭುರ್ಗಿಂ ಭಾವಾಡ್ತಿ ಜಿವಿತಾಥಾವ್ನ್ ಪಯ್ಸ್ ರಾಂವ್ಚೆಂ ಪಳೆತಾಂವ್. ವ್ಹಡಿಲಾಂನಿ ಕಿತೆಂ ಕರಿಜೆ?

ಹಾಂವ್‌ಯೀ ಎಕಾ ತೆಂಪಾರ್ ಭಾವಾಡ್ತಾಂತ್ ಶೆಳೆಲ್ಲಿ ಆವಯ್ ಜಾವ್ನಾಸ್ಲಿಂ. ಕಾರ್ಲೊ ಮ್ಹಜ್ಯಾ ಜಿವಿತಾಂತ್ ಆಯ್ಲ್ಯಾ ಉಪ್ರಾಂತ್ ಜೆಜುಥಂಯ್ ರಾವ್ ಲ್ಲಿಂ.. ತೆದೊಳ್ ಹಾಂವ್‌ಯೀ ಮಿಸಾಕ್ ಗೆಲ್ಲಿಂಚ್ 3-4 ಪಾವ್ಟಿಂ ಮಾತ್ರ್! ದೆಕುನ್ ಆಮಿ ವ್ಹಡಿಲಾಂನಿ ಕರ್ಚ್ಯೆ ಚುಕಿವಿಶ್ಯಾಂತ್ ಉಲೊಂವ್ಕ್ ಸಕ್ತಾಂ. ಭುರ್ಗಿಂ ವಾಡೊನ್ ಯೆತಾನಾ ತಾಂಚೆಸಂಗಿ ಮೆಳೊನ್ ಮಾಗ್ಚೆಂ ರಾವೊಂವ್ಕ್ ನ್ಹಜೊ. ವ್ಹಡಿಲಾಂ ಭುರ್ಗ್ಯಾಂಕ್ ಪಯ್ಲಿಂ ಭಾವಾಡ್ತ್ ಶಿಕೊವ್ಪಿ ಶಿಕ್ಶಕಾಂ. ದೆಕುನ್ ತಾಣಿಂ ಪಯ್ಲೆಂ ಬೈಬಲ್ ವಾಚಿಜೆ, ಸಾಂತಾಂಚಿ ಜಿಣಿ ಸಮ್ಜಾಜೆ, ಆರಾಧನಾಕ್ ಬಸಜೆ ಆನಿ ಭಾವಾಡ್ತಾವಿಶಿಂ ಉಲಯ್ಜೆ. ಭುರ್ಗ್ಯಾಂಕ್ ಬಾಪ್ತಿಜ್ಮ್ ದಿಲ್ಲೆಂಚ್ ಜವಾಬ್ದಾರಿ ಮುಗ್ದಾನಾ. ದೆವಾಕ್ ಒಳ್ಕೊನ್ ಜಿಯೆಂವ್ಚೆಬರಿ ರ‍್ತಾಂ ಮ್ಹಣ್ ದೆವಾಕ್ ಭಾಸ್ ದಿಯಾ. ಆಯ್ಲೆವಾರ್ ಮ್ಹಾಕಾ ಎಕೆ ಆವಯ್ನ್ ಸಾಂಗ್ಲೆಂ: ಮ್ಹಜಿಂ ಭುರ್ಗಿಂ 16 ಆನಿ 17 ವರ್ಸಾಂಚಿ ಮಿಸಾಕ್ ಯೇನಾಂತ್, ವಿಗಾರಾಲಾಗಿಂ ಸಾಂಗ್ಲೆಂ. ತೊ ಮ್ಹಣಾಲೊ, ‘ತಾಂಕಾಂ ಫೋರ್ಸ್ ಕರಿನಾಕಾ’. ಹಿ ವ್ಹಡ್ಲಿ ಚೂಕ್ ಮ್ಹಜ್ಯಾ ಲೆಕಾರ್! ಭುರ್ಗಿಂ ಮನ್ ನಾಸ್ತಾನಾ ಮಿಸಾಕ್ ಗೆಲ್ಯಾರೀ ವ್ಹಡ್ ನಾ. ಸಾಕ್ರಾಮೆಂತಾಂತ್ಲೊ ಜೆಜು ತಾಂಚ್ಯಾ ಕಾಳ್ಜಾಂನಿ ಬದ್ಲಾವಣ್ ಹಾಡುಂಕ್ ಸಕನಾ ತಿತ್ಲೊ ಅಶಕ್ತ್ ನ್ಹಯ್. 

_____________

ಭಾಗೆವಂತ್ ಪಿಯರ್ ಜೊರ್ಜಿಯೊ ಫ್ರಸಾತಿ–(ಆಟ್ ಭಾಗಿಂಚೊ ವೆಕ್ತಿ)

ಬಾಪ್ ಗ್ರೇಶನ್ ಅಲ್ವಾರಿಸ್

ಪಿಯರ್ 1901 ಥಾವ್ನ್ 1925 ಪರ್ಯಾಂತ್ ಹ್ಯಾ ಸಂಸಾರಿಂ ಜಿಯೆಲ್ಲೊ ಇಟೆಲಿಚೊ ಕಥೊಲಿಕ್ ಕಾರ್ಯಕರ್ತ್ ಆನಿ ಸಾಂ. ದೊಮಿನಿಕಾಚ್ಯೆ ತಿಸ್ರ್ಯೆ ಒಡ್ದಿಚೊ ಸಾಂದೊ. ಸಮಾಜಿಕ್ ನಿತಿಚ್ಯಾ ವಿಶಯಾಂಚೆರ್ ತಾಣೆಂ ಆಪ್ಲೆಂ ಜಿವಿತ್ ಸಮರ್ಪಿಲೆಂ. ಹ್ಯಾ ಖಾತಿರ್ ತೊ ಕಥೊಲಿಕ್ ಆ್ಯಕ್ಷನ್ ಆನಿ ಸಾಂ. ವಿಶೆಂತ್ ಪಾವ್ಲ್ ಸಭಾ ಅಸಲ್ಯಾ ಮಾಯಾಮೊಗಾಚ್ಯಾ ಸಂಸ್ಥ್ಯಾಂನಿ ಭರ‍್ತಿ ಜಾಲೊ ಆನಿ ಆಪ್ಲೊ ಮಾಂಯ್‌ಗಾಂವ್ ಟ್ಯೂರಿನ್ ಶ್ಹೆರಾಂತ್ ಆಸ್ಲಲ್ಯಾ ದುಬ್ಳ್ಯಾಂ ಆನಿ ನಿರ್ಗತಿಕಾಂಪಾಸತ್ ವಾವರ‍್ಲೊ. ಭಕ್ತಿಪಣಾಕ್ ಆನಿ ರ‍್ಯಾ ನಡ್ತ್ಯಾಂಕ್ ತೊ ನಾಂವಾಡ್ಲಾ. ಏಕ್ ಬರೊ ದೊಂಗೊರ್ ಚಡ್ಪಿ, ಉಪ್ಯೆಂವ್ಚ್ಯಾಂತ್ ಹುಶಾರ್ ಆನಿ ಖೆಳ್ಗಾಡಿ ಜಾವ್ನ್ ಸಬಾರಾಂಕ್ ತಾಣೆಂ ಲಾಗಿಂ ವೊಡ್ಲಾಂ ಆನಿ ತಾಂಚ್ಯಾ ಸಾಂಗಾತಾ ಮೆಳೊನ್ ಸಮಾಜಿಕ್ ಚಟುವಟಿಕೆಂನಿ ಮೆತೆರ್ ಜಾವ್ನ್ ಹೆರಾಂಚಿ ಸೆವಾ ಕೆಲ್ಯಾ.

ಪಿಯರ್ 1901ಇಸ್ವೆಚ್ಯೆ ಎಪ್ರಿಲ್ 6 ತಾರಿಕೆರ್ ಜಲ್ಮಾಲ್ಲೊ. ತಾಚೊ ಬಾಪಯ್ ಆಲ್ಫ್ರೇಡ್ ಫ್ರಸಾತಿ ಎಕಾ ವಾರ್ತಾಪತ್ರಾಚೊ ಮ್ಹಾಲಕ್ ಆನಿ ಆವಯ್ ಅಡಿಲೇಡ್ ಅಮೆಟಿಸ್ ಏಕ್ ಚಿತ್ರ್ ಕಾರ್. ತಾಚಿ ಎಕ್ಲಿಚ್ ಭಯ್ಣ್ ಲೂಸಿಯಾನಾ ಫ್ರಸಾತಿ. ತಾಚೊ ಬಾಪಯ್ ರಾಷ್ಟ್ರೀಯ್ ರಾಜಕಾರಣಾಂತ್ ಕ್ರಿಯಾಳ್ ಆಸ್ಲಲೊ. ಉಪ್ರಾಂತ್ ತೊ ಜರ್ಮನಿಕ್ ರಾಯಭಾರಿ ಜಾಲೊ. ಲ್ಹಾನ್ ಥಾವ್ನ್ ಚ್ ಪಿಯರ್ ಹೆರಾಂಕ್ ಕುಮೊಕ್ ಕರ‍್ಚ್ಯಾಂತ್ ಮುಕಾರ್. ಏಕ್ ಆವಯ್ ತಿಚ್ಯಾ ಭುರ್ಗ್ಯಾಕ್ ಮೊಚೆ ನಾಂತ್ ಮ್ಹಣ್ ಮಾಗೊನ್ ಆಯ್ಲಲ್ಯಾ ವೆಳಾರ್, ಪಿಯರಾನ್ ತಾಚೆಚ್ ಮೊಚೆ ಭುರ್ಗ್ಯಾಕ್ ದಿಲ್ಲೆ. ಏಕ್ ಪಿಂವ್ಡೊ ತಾಂಚ್ಯಾ ದಾರಾರ್ ಭಿಕ್ ಮಾಗೊನ್ ಆಯ್ಲಲ್ಯಾ ವೆಳಾರ್ ಬಾಪಾಯ್ನ್ ತಾಕಾ ಧಾಂವ್ಡಾಯಿಲ್ಲೆಂ, ಪುಣ್ ಸಿಯೆರಾನ್ ತಾಕಾ ಸೊಧುನ್ ಕಾಡ್ನ್ ಖಾಣ್ ದಿಲ್ಲೆಂ.

ಪಿಯರ್ ಶಿಕ್ಪಾಂತ್ ಚಡ್ ಹುಶಾರ್ ನಾಸ್ಲಲೊ. ಪುಣ್ ತಾಚ್ಯೆ ಜಾಣ್ವಾಯೆಕ್ ಆನಿ ದೆವಾಸ್ಪಣಾಕ್ ಲಾಗೊನ್ ತೊ ಸರ್ವಾಂಕ್ ಮೊಗಾಚೊ ಜಾಲ್ಲೊ. ಸಮಾಜೆಂತ್ಲಿ ಅಸಮಾನತಾ ಪಯ್ಸ್ ಸರಜೆ ಮ್ಹಳ್ಳಿ ತಾಚಿ ಆಶಾ. ದೆಕುನ್ ಸಮಾಜಿಕ್ ಕಾರ್ಯಕರ್ತಾಂಚ್ಯಾ ಪಂಗ್ಡಾಂಕ್ ತೊ ಸೆರ್ವಾಲ್ಲೊ. ಬೆನಿಟೊ ಮುಸ್ಸೊಲಿನಿಚ್ಯಾ ಆಡಳ್ತ್ಯಾಂಕ್ ತೊ ವಿರೋಧ್. ಹಾಚೆವಿರೋಧ್ ಪ್ರತಿಭಟನ್ ಚಲಯಿಲ್ಲ್ಯಾಂಕ್ ತಾಕಾ ಬಂದೆಂತ್ ಸಯ್ತ್ ಘಾಲ್ಲೆಂ ಆಸಾ. 1922ವೆರ್ ತಾಣೆಂ ಸಾಂ. ದೊಮಿನಿಕಾಚ್ಯೆ ತಿಸ್ರ್ಯೆ ಒಡ್ದಿಚೊ ಸಾಂದೊ ಜಾವ್ನ್ ಸಮರ್ಪಣ್ ಕೆಲೆಂ. ಸಾಂ. ತೊಮಾಸ್ ಆಕ್ವಿನ್ ಆನಿ ಸಿಯೆನ್ನಾಚಿ ಸಾಂ. ಕಾತ್ರಿನ್ ಹಾಂಚ್ಯೆ ಶಿಕೊವ್ಣೆಥಾವ್ನ್ ತೊ ಪ್ರಭಾವಿತ್ ಜಾಲ್ಲೊ. ಆಪೊಸ್ತಲ್ ಪಾವ್ಲುಚಿ ಶಿಕೊವ್ಣ್ ತಾಚ್ಯಾ ಪತ್ರಾಂನಿ ಪಳೆಂವ್ಕ್ ಮೆಳ್ತಾ.

“ಫಕತ್ ಮಾಯಾಮೊಗಾಚ್ಯೊ ಕರ್ನ್ಯೊ ಪಾವಾನಾಂತ್; ಆಮ್ಕಾಂ ಸಮಾಜಿಕ್ ಬದ್ಲಾವಣ್ ಗರ್ಜ್ ಆಸಾ” ಅಶೆಂ ಪಿಯರ್ ಕೆದ್ನಾಂಯ್ ಸಾಂಗ್ತಾಲೊ. ಪಾಪಾ ಲಿಯೊ ತೆರಾವ್ಯಾಚ್ಯಾ ಸಮಾಜಿಕ್ ನಿತಿಚ್ಯೆ ಶಿಕೊವ್ಣೆಥಾವ್ನ್ ಪ್ರೇರಿತ್ ಜಾವ್ನ್ ತಾಣೆಂ ‘ಮೊಮೆಂಟೊ’ ಮ್ಹಳ್ಳೆಂ ವಾರ್ತಾಪತ್ರ್ ಫಾಯ್ಸ್ ಕೆಲೆಂ. ಸಾಂ. ವಿಶೆಂತ್ ಪಾವ್ಲ್ ಸಭೆಕ್ ಮೆಳೊನ್ ದುಬ್ಖ್ಯಾಂಚ್ಯಾ ಆನಿ ನಿರ್ಗತಿಕಾಂಚ್ಯಾ ಬರೆಪಣಾಪಾಸತ್ ವಾವ್ರ್ ಕೆಲೊ. ಖಣಿಯೆಂತ್ ಕಾಮ್ ಕರ್ಚ್ಯಾ ಕಾಮೆಲಾಂಥಂಯ್ ಸೊಮಿಯಾಕ್ ದೆಕುಂಕ್ ತೊ ತಾಂಚೆಂ ತಾಂತ್ರಿಕ್ ಶಿಕಪ್ ಶಿಕ್ಲೊ. ತಾಂತುಂ ಪದ್ವಿ ಜೊಡ್ಲಲ್ಯಾ ವೆಳಾರ್, ತಾಚ್ಯಾ ಬಾಪಾಯ್ನ್ ತಾಕಾ ಇನಾಮ್ ಜಾವ್ನ್ ದಿಲ್ಲೆ ಪಯ್ಶೆ ತಾಣೆಂ ದುಬ್ಳ್ಯಾಂಕ್ ಖರ್ಚಿಲೆ. 1925 ವೆರ್ ತಾಚ್ಯಾ ಇಶ್ಟಾಂಸಾಂಗಾತಾ ತೊ ದೊಣಿರ್ ಗೆಲ್ಲ್ಯಾ  ವೆಳಾರ್ ತಾಕಾ ಪಾಟಿಂಚ್ಯಾ ಶಿರಾಂನಿ ಕಠೀಣ್ ದೂಕ್ ಆಯ್ಲಿ. ತಕ್ಲೆಫಡಾಫಡ್ ಆನಿ ತಾಪಾನ್ ತೊ ನಿದ್ಲೊ. ದೀಸ್ ವೆತಾಂ ತಾಚಿ ಭಲಾಯ್ಕಿ ಪಾಡ್ ಜಾಲಿ. ಪಿಡೆಸ್ತಾಂಚಿ ಮಾಖ್ಣಿ ತಾಣೆಂ ಘೆತ್ಲಿ ಆನಿ 1925 ಇಸ್ವೆಚ್ಯೆ ಜೂನ್ 4 ತಾರಿಕೆರ್ ತೊ ಮರಣ್ ಪಾವ್ಲೊ.

ಟ್ಯೂರಿನ್ ಶ್ಹೆರಾಚ್ಯಾ ದುರ್ಬಳ್ಯಾ ಲೊಕಾಂನಿ ಪಿಯರಾಕ್ ಸಾಂತ್ ಮ್ಹಣ್ ಪಾಚಾರಿಜೆ ಮ್ಹಣ್ ಮನವಿ ಕೆಲಿ. 1932 ಚೆರ್ ಪಿಯರಾಚ್ಯಾ ಜಿವಿತಾ ವಯ್ರ್ ತನ್ಕಿ ಚಲ್ಲಿ ಆನಿ ತಾಚ್ಯಾ ಬರೊವ್ಪಾಚಿ ಪರೀಕ್ಶಾ ಜಾಲಿ. ಪುಣ್ ತಾಚ್ಯಾ ಜಿವಿತಾಚ್ಯಾ ಘಡಿತಾಂಚೆರ್ ಆರೋಪ್ ಆಯಿಲ್ಲ್ಯಾನ್ 1941 ವೆರ್ ಪಾಪಾ ಪಿಯುಸ್ ಬಾರಾವ್ಯಾನ್ ಹಿ ಪ್ರಕ್ರಿಯಾ ಅಮಾನತೆರ್ ದರ‍್ಲಿ. ಹೆ ಆರೋಪ್ ಫಟ್ ಮ್ಹಣ್ ರುಜು ಜಾಲೆ ಆನಿ ಪ್ರಕ್ರಿಯಾ ಪರತ್ ಸುರು ಜಾಲಿ. 1978 ವೆರ್ ಪಾಪಾ ಪಾವ್ಲ್ ಸವ್ಯಾನ್ ತಾಕಾ ದೆವಾಚೊ ಸೆವಕ್ ಮ್ಹಣ್ ಪಾಚರ‍್ಲೊ. 1987 ವೆರ್ ಪಾಪಾ ಜುವಾಂವ್ ಪಾವ್ಲ್ ದುಸ್ರ್ಯಾನ್ ತಾಕಾ ಮಾನಾಪಾತ್ರ್ ಮ್ಹಣ್ ಪಾಚರ‍್ಲೊ. ತಾಚ್ಯೆ ಮಜತೆನ್ ದೊಮಿನಿಕ್ ಸೆಲ್ಲಾನ್ ಮ್ಹಳ್ಳೊ ಟಿ.ಬಿ. ಆಸ್ಲಲೊ ವೆಕ್ತಿ ಸಂಪೂರ್ಣ್ ಗೂಣ್ ಜಾಲೊ. ಪಾಪಾ ಜುವಾಂವ್ ಪಾವ್ಲ್ ದುಸ್ರ್ಯಾನ್ ತಾಕಾ 1990 ವೆರ್ ಭಾಗೆವಂತ್ ಮ್ಹಣ್ ಪಾಚರ‍್ಲೊ. ತಶೆಂಚ್ ಸುವಾರ್ತೆಚ್ಯಾ ಆಟ್ ಭಾಗಿ ಪ್ರಕಾರ್ ತೊ ಜಿಯೆಲೊ ದೆಕುನ್ ತಾಕಾ ಆಟ್ ಭಾಗಿಂಚೊ ವೆಕ್ತಿ ಮ್ಹಣ್ ವೊಲಾಯ್ಲೊ. ತಾಚಿ ಕುಸಾನಾತ್‌ಲ್ಲಿ ಕೂಡ್ 2008ವೆರ್ ಸಿಡ್ನಿಕ್ ಆನಿ 2016 ವೆರ್ ಕ್ರಾಕೊಕ್ ಜಾಗತಿಕ್ ಯುವ ದಿಸಾ ವ್ಹೆಲಿ ಆನಿ ನಮಾನಾಕ್ ದರ‍್ಲಿ. ಆತಾಂ ತಾಚ್ಯಾ ರ‍್ಣಾಚ್ಯಾ ಶತಮಾನಾ ಉಪ್ರಾಂತ್, ಆಜ್ ಸಪ್ಟೆಂಬರ್ 7 ವೆರ್ ಪಾಪಾ ಲಿಯೊ ತಾಕಾ ಸಾಂತ್ ಮ್ಹಣ್ ಪಾಚರ‍್ತೊಲೊ