ಥೊಡ್ಯಾ ಕಾಳಾಚ್ಯಾ ಆವ್ದೆಚ್ಯಾ ಮೌನ್’ಪಣಾ ಉಪ್ರಾಂತ್ ಕಾರ್ವಾರ್ ದೇವ್ ಪ್ರಜೆಕ್ ಏಕ್ ಬರಿ ಖಬರ್ ಪಾವ್ಲ್ಯಾ. ಭೋವ್ ಮಾನಾಧಿಕ್ ಪಾಪಾ ಫ್ರಾನ್ಸಿಸಾನ್ 13, ಜನವರಿ 2024 ವೆರ್ ಶಿಮೊಗಾ ದಿಯೆಸೆಜಿಚೆ ಯಾಜಕ್ ಮೊನ್ಸಿಂಜೊರ್ ದುಮಿಂಗ್ ಡಯಾಸ್ ಹಾಂಕಾಂ ಕಾರ್ವಾರ್ ದಿಯೆಸೆಜಿಚೊ ನವೊ ಗೊವ್ಳಿ ಜಾವ್ನ್ ನಿಯುಕ್ತ್ ಕೆಲಾ.

ಹೊನ್ನಾವರಾಚ್ಯಾ ಮಾನೆಸ್ತ್ ಅಂಬ್ರೊಜ್ ಆನಿ ಮಾನೆಸ್ತಿಣ್ ಮಾರ್ಸೆಲಿನ್ ಡಯಾಸ್ ಹಾಂಚೊ ಸುಪುತ್ರ್ ಜಾವ್ನಾಸ್ಚೆ ಮೊನ್ಸಿ. ದುಮಿಂಗ್ ಡಯಾಸ್ ಸೆಪ್ಟೆಂಬರ್ 3, 1969 ಇಸ್ವೆಂತ್ ಜಲ್ಮಾಲೆ. ತತ್ವ್ ಶಾಸ್ತ್ರ್ ಭಾಗೆವಂತ್ ಪೆದ್ರುಚಿ ಫೊಂತಿಫಿಕಲ್ ಸೆಮಿನರಿ, ಬೆಂಗ್ಳುರ್ ಹಾಂಗಾಸರ್ ಶಿಕೊನ್ ಭಾಗೆವಂತ್ ಜುಜೆಚಿ ಸೆಮಿನರಿ ಜೆಪ್ಪು, ಮಂಗ್ಳುರ್ ಹಾಂಗಾಸರ್ ಆಪ್ಲೆಂ ದೇವ್ ಶಾಸ್ತ್ರ್ ಶಿಕಪ್ ಸಂಪವ್ನ್ ಮೇ 6, 1997 ಇಸ್ವೆಂತ್ ಶಿಮೊಗಾಂತ್ ತಾಂಕಾಂ ಯಾಜಕೀ ದೀಕ್ಶಾ ಲಾಭ್ಲಿ.

ಪ್ರಸ್ತುತ್ ಶಿಮೊಗಾಚ್ಯಾ ದಿಯೆಸೆಜಿಚೆಂ ಗೊವ್ಳಿಕ್ ಕೇಂದ್ರ್ – ಸನ್ನಿಧಿ-ಂತ್ ಆಪ್ಲಿ ಸೆವಾ ದೀವ್ನ್ ಆಸ್ಲೆಲ್ಯಾ ತಾಂಕಾಂ ಗೊವ್ಳಿಕ್ ವಾವ್ರಾಂತ್ ಆನಿ ಶಿಕ್ಪಾ ಶೆತಾಂತ್ ಅಪಾರ್ ಅನ್ಭೋಗ್ ಆಸಾ ಮಾತ್ರ್ ನ್ಹಯ್ ಉಲೊಣ್ಯಾಂತ್ ಮಯ್ಪಾಸಿ ಆನಿ ಸಕ್ಡಾಂಕ್ ಸಾಂಗಾತಾ ಘೆವ್ನ್ ವಾವುರ್‍ಚಿ ಶ್ಯಾಥಿ ಆಸಾ.

1976 ಇಸ್ವೆಂತ್ ಸುರ್ವಾತ್ ಜಾಲ್ಲೆ ಕಾರ್ವಾರ್ ದಿಯೆಸೆಜಿಂತ್ ಆಜ್ ಸುಮಾರ್ 69 ಫಿರ್ಗಜ್ಯೊ ಆನಿ ಕೊಪೆಲಾಂ ಆಸೊನ್ 43, 608 ಕಥೊಲಿಕ್ ಲೋಕ್ ಆಸಾ. ಅ.ಮಾ. ವಿಲಿಯಮ್ ಡಿ ಮೆಲ್ಲೊ ಆನಿ ಅ.ಮಾ ಡೆರಿಕ್ ಫೆರ್ನಾಂಡಿಸ್ ಉಪ್ರಾಂತ್ ಮೊನ್ಸಿಂಜೊರ್ ದುಮಿಂಗ್ ಡಯಾಸ್ ಕಾರ್ವಾರ್ ದಿಯೆಸೆಜಿಚೆ ತಿಸ್ರೆ ಭಿಸ್ಪ್ ಜಾವ್ನ್ ನಿಯುಕ್ತ್ ಜಾಲ್ಯಾತ್.