ಭುಲನಾಕಾತ್ ನೊಟಾಕ್, ಯೆಯಾ ವೊಟಾಕ್’ ಮ್ಹಳ್ಳೆಂ ಜಾಗೃತ್ ಕರ್‍ಚೆಂ ಲೇಖನ್ ಬರಯ್ತಾನಾಂಚ್ ಸಿಕೇರಾಮಾಚ್ಯಾ ಪೆನ್ನಾಂತ್ಲೆಂ ತೀಂತ್ ಅರ್ಧ್ಯಾರ್‌ಚ್ ಖಾಲಿ ಜಾಲೆಂ. ಕೊಡ್ಯಾಳ್ಚ್ಯಾ ಉದ್ಕಾಚ್ಯಾ ನಳಾಂನಿ ಲೋಕ್ ಉದಕ್ ನಾ ಮ್ಹಣ್ ಬೊಬಾಟ್ತಾ. ಪುಣ್ ಕೊಂಕ್ಣಿ ಲೇಖಕಾಂಚ್ಯಾ ಪೆನ್ನಾಂನಿ ತೀಂತ್ ಖಾಲಿ ಜಾವ್ನ್ ಆಸಾ ತೆಂ ಕೊಣಾಯ್ಕಿ ಖಬರ್ ನಾ. ಹೊ ಏಕ್ ನಿಜಾಯ್ಕಿ ಉದ್ಕಾವರ್ನಿ ವ್ಹಡ್ ಆನಿ ಚಡ್ ಗಂಭೀರ್ ವಿಶಯ್ ಮ್ಹಣ್ ಸಿಕೇರಾಮಾಕ್ ಗಮ್ಲೊ. ಪುಣ್ ಹೊ ವಿಶಯ್ ಕಳೊಂವ್ಚೊ ಕೊಣಾಕ್? ಏಕ್ ಕೊಂಕ್ಣಿ ಶಾಸಕ್ ವಾ ಮಂತ್ರಿ ಆಮ್ಚ್ಯೆ ಸಮಾಜೆಂತ್ ನಾ. ತಿತ್ಲ್ಯಾರ್ ಸಿಕೇರಾಮಾಚ್ಯಾ ಭಿತರ್‍ಲೊ ಮಂತ್ರಿ ಜಾಗೊ ಜಾಲೊ. ಕೊಂಕ್ಣಿ ಲೇಖಕಾಂಚೆ ಸಮಸ್ಸೆ ಪರಿಹಾರ್ ಜಾಯ್ಜೆ ತರ್ ಆತಾಂ ಆಪ್ಣೆಂಚ್ ಎಲಿಸಾಂವಾಕ್ ರಾವಜೆ ಮ್ಹಣ್ ತಾಕಾ ಭೊಗ್ಲೆಂ. ಆಪುಣ್ ನಿದೊನ್, ರಾತಿಕ್ ಭಡ್ವೊ ಯೇವ್ನ್ ಖಬರ್ ದೀವ್ನ್ ಉಪ್ರಾಂತ್ ಸಕಾಳಿಂ ನಿರ್ಧಾರ್ ಕೆಲೊ ತರ್ ಹೊ ವಿಶಯ್ ರಾಜಕೀಯ್ ಜಾಂವ್ಚ್ಯಾ ಬದ್ಲಾಕ್ ಧರ್ಮಿಕ್ ಜಾಯ್ತ್ ಮ್ಹಣೊನ್ ತಾಣೆಂ ತ್ಯೆಚ್ ರಾತಿಂ ನಿದ್ಚ್ಯಾ ಆದಿಂಚ್ ನಿರ್ಧಾರ್ ಕೆಲೊ.

ದುಸ್ರ್ಯಾಚ್ ದಿಸಾ ಸಿಕೇರಾಮಾನ್ ಎಲಿಸಾಂವಾಚೆಂ ನಾಂವ್‌ಪತ್ರ್ ಚುನಾವ್ ಅಧಿಕಾರಿಂಕ್ ದಿಲೆಂ. ಚುನಾವ್ ಗ್ಹುರ್‍ತ್ ಜಾವ್ನ್ ಖಾಲಿ ಜಾಲ್ಲ್ಯಾ ತಿಂತಾಚಿ ಬೋತ್ಲ್ ತಾಣೆಂ ವಾಪಾರ್‍ಲಿ. ಹ್ಯಾ ಮುಕಾಂತ್ರ್ ಕೊಂಕ್ಣಿ ಲೇಖಕಾಂಕ್ ಆನಿ ಲೊಕಾಂಕ್ ಒಟ್ಟುಕ್ ಕರ್‍ಯೆತ್ ಆನಿ ಜಿಕ್ಯೆತ್ ಮ್ಹಣ್ ತೊ ಭರ್ವಸ್ಲೊ.

ಆತಾಂ ಸುರು ಜಾಲೊ ಸಿಕೇರಾಮಾಚೊ ಚುನಾವ್ ಪ್ರಚಾರ್. ಪಯ್ಲೆಂ ಸಿಕೇರಾಮ್ ಆಶೀರ್ವಾದ್ ಘೆಂವ್ಚ್ಯಾ ಖಾತಿರ್ ಎಕಾ ಮಾಲ್ಘಡ್ಯಾ ಕೊಂಕ್ಣಿ ಲೇಖಕಾಚ್ಯಾ ಘರಾ ಗೆಲೊ. ಆದ್ಲೆಪಾವ್ಟಿಂ ನವೊ ಬೂಕ್ ಕಾಡ್ಚ್ಯಾಕ್ ಸಿಕೇರಾಮ್ ತಾಚ್ಯಾ ಘರಾ ಏಕ್ ಹಜಾರ್ ವಿಚಾರ್‍ನ್ ಗೆಲ್ಲೊ. ಹ್ಯಾ ಪಾವ್ಟಿಂಯ್ ಬೂಕ್ ಕಾಡ್ಚ್ಯಾಕ್ ಪಯ್ಶೆ ವಿಚಾರ್‍ನ್ ಆಯ್ಲಾ ಕೊಣ್ಣಾ ಮ್ಹಣ್ ಚಿಂತುನ್, ಘರಾ ಭಿತರ್ ಬಸೊನ್ ಸಿಸಿ ಟಿವಿಚೆರ್ ಸಿಕೇರಾಮ್ ಯೆಂವ್ಚೊ ಪಳೆವ್ನ್ ತ್ಯಾ ಮಾಲ್ಘಡ್ಯಾ ಲೇಖಕಾನ್ ದಾರ್‌ಚ್ ಉಗ್ತೆಂ ಕೆಲೆಂನಾ. ತ್ಯಾ ಉಪ್ರಾಂತ್ ತೊ ಲಗ್ಬಗ್ ವೀಸ್ ಜಣ್ ಲೇಖಕಾಂಚ್ಯಾ ಘರಾ ವೋಟ್ ವಿಚಾರ್‍ನ್ ಗೆಲೊ. ಪುಣ್ ಹ್ಯಾ ಮಾಲ್ಘಡ್ಯಾ ಲೇಖಕಾನ್ ಬಾಕಿಚ್ಯಾ ಲೇಖಕಾಂಕ್‌ಯೀ ಫೊನ್ ಕರ್‍ನ್ ಸಾಂಗ್‌ಲ್ಲ್ಯಾನ್ ಆನಿ ತಾಣಿಂಯ್ ಆದ್ಲೆಪಾವ್ಟಿಂ ಬುಕಾ ಖಾತಿರ್ ಪಯ್ಶೆ ದಿಲ್ಲ್ಯಾನ್ ಹ್ಯಾ ಪಾವ್ಟಿಂಯ್ ಸಿಕೇರಾಮ್ ತ್ಯಾಚ್ ಕಾರಣಾಕ್ ಲಾಗೊನ್ ಆಯ್ಲಾ ಮ್ಹಣ್ ಚಿಂತುನ್ ತಾಣಿಂಯ್ ದಾರ್ ಉಗ್ತೆಂ ಕೆಲೆಂನಾ.

ತರೀ ಸಿಕೇರಾಮ್ ನಿರಾಸ್ ಜಾಲೊನಾ. ಆಪುಣ್ ಎಲಿಸಾಂವಾಕ್ ರಾವ್ಲಾಂ ಮ್ಹಣ್ ಕೊಂಕ್ಣಿ ಲೊಕಾಂಕ್ ತಿಳ್ಸುಂಚ್ಯಾಕ್ ತೊ ಎಕಾ ಫಾಮಾದ್ ಕೊಂಕ್ಣಿ ಪತ್ರಾಚ್ಯಾ ದಫ್ತರಾಕ್ ಏಕ್ ಜಾಯ್ರಾತ್ ದಿಂವ್ಚ್ಯಾಕ್ ಗೆಲೊ. ಮುಕ್ಲೊ ಅಂಕೊ ‘ಹಾಸ್ಯ್ ವಿಶೇಸ್ ಅಂಕೊ’ ಕಾಡ್ಚ್ಯಾರ್ ಆಸ್ಚ್ಯಾ ಸಂಪಾದಕಾಕ್ ಏಕ್‌ಯೀ ಸಾರ್ಕೆಂ ಹಾಸ್ಯ್ ಲೇಖನ್ ನಾಸ್ತಾಂ ಮಾಂಡ್ಡೊ ಹುನ್ ಜಾಲ್ಲೊ. ತಿತ್ಲ್ಯಾರ್ ಸಿಕೇರಾಮಾಚಿ ಎಂಟ್ರಿ ಪಳೆವ್ನ್, ತೊ ಎಲಿಸಾಂವಾಕ್ ರಾವ್ಲಾ ಮ್ಹಣ್ ಆಯ್ಕೊನ್ ಸಂಪಾದಕಾಚೊ ‘ಹಾಸ್ಯ್ ಅಂಕೊ’ ಘಡಿಯೆನ್ ತಯಾರ್ ಜಾಲೊ. ತಾಣೆಂ ಎಲಿಸಾಂವಾಕ್ ರಾವ್‌ಲ್ಲ್ಯಾ ಸಿಕೇರಾಮಾಚಿ ಇಂಟರ್‌ವ್ಯೂ ಘೆತ್ಲಿ ಆನಿ ಹಾಸ್ಯ್ ಅಂಕ್ಯಾರ್ ಪ್ರಮುಕ್ ಹಾಸ್ಯ್ ಲೇಖನ್ ಜಾವ್ನ್ ಪರ್ಗಟ್ಲೆಂ. ವಯ್ಲ್ಯಾನ್ ಸಿಕೇರಾಮಾಚೊಚ್ ಫೊಟೊ ಹಾಸ್ಯ್ ವಿಶೇಸ್ ಅಂಕ್ಯಾಕ್ ಪಯ್ಲ್ಯಾ ಪಾನಾರ್ ವಾಪಾರ್‍ಲೊ ಆನಿ ಬರಯ್ಲೆಂ ‘ರಾವ್ಲಾ ವೊಟಾಕ್, ಕೊಂಕ್ಣಿ ಲೇಖಕ್’. ಹ್ಯಾ ಪಾವ್ಟಿಂಚೊ ಹಾಸ್ಯ್ ವಿಶೇಸ್ ಅಂಕೊ ಖಂಡಿತ್ ಭರಾನ್ ವಿಕೊನ್ ವೆತೊಲೊ ಮ್ಹಣ್ ತೊ ಸಂತೊಸ್ಲೊ.

ತ್ಯಾ ನಂತರ್ ಸಿಕೇರಾಮ್ ಕೊಂಕ್ಣಿ ಲೇಖಕಾಂಕ್ ಉದ್ದೇಸುನ್ ಉಲೊಂವ್ಕ್ ಆವ್ಕಾಸ್ ಸೊಧುನ್ ಆಸ್‌ಲ್ಲೊ. ಎಕಾ ಆಯ್ತಾರಾ ಪೊಕ್ರಿ ಲೇಖಕ್ ಸಂಘಚ್ಯಾಂನಿ ಕೊಡ್ಯಾಳ್ಚ್ಯಾ ಹೊಲಾಂತ್ ಏಕ್ ಕೊಂಕ್ಣಿ ಕಾರ್ಯಕ್ರಮ್ ಯೆವ್ಜಿಲೆಂ. ತ್ಯಾ ಕಾರ್ಯಕ್ರಮಾಂತ್ ಎಕಾ ಪೊಕ್ರಿ ಲೇಖಕಾನ್, ವೊಟಾಕ್ ರಾವ್‌ಲ್ಲ್ಯಾ ಸಿಕೇರಾಮಾಕ್ ಆಪೊವ್ಣೆಂ ದಿಲೆಂ. ಎಲಿಸಾಂವಾಕ್ ರಾವ್ಲ್ಯಾ ಉಪ್ರಾಂತ್ ಹರ್‍ಯೆಕ್ಲೊ ಅಭ್ಯರ್ಥಿ ಖಂಡಾಪಟ್ಟೆ ಬಿಝಿ ಜಾಂವ್ಚೆಬರಿ ಸಿಕೇರಾಮ್‌ಯೀ ಬಿಝಿ ಜಾಲೊ. ಘರ್‍ಚಿಂ ಆಯ್ದಾನಾಂ ಧುವ್ನ್, ಘರ್ ಝಾಡ್ನ್, ಪುಸುನ್, ವಸ್ತುರಾಂ ಸುಕತ್ ಘಾಲ್ನ್ ಕೊಂಕ್ಣಿ ಕಾರ್ಯಾಕ್ ಪಾವ್ತಾನಾ ಘಳಾಯ್ ಜಾಲಿ. ಆನಿ ಕಿತೆಂ ಉಪ್ಕಾರ್ ಆಟೊವ್ಣಿ ಸುರು ಕರ್‍ಯಾಂ ಮ್ಹಣ್ತಾನಾ ಸಿಕೇರಾಮ್ ಪಾವ್ಲೊಚ್. ತೆಂ ಕಾರ್ಯಕ್ರಮ್ ಕಸಲೆಂ ಮ್ಹಣ್ ಸಿಕೇರಾಮಾಕ್ ಕೊಣೀ ಸಾರ್ಕಿ ಮಾಹೆತ್ ದೀಂವ್ಕ್ ನಾತ್‌ಲ್ಲಿ. ಪುಣ್ ಭಿತರ್ ರಿಗ್‌ಲ್ಲೆಂಚ್ ಲೊಕಾಂಚ್ಯಾ ದೊಳ್ಯಾಂನಿ ದುಕಾಂ ಪಳೆವ್ನ್ ಆನಿ ಥಂಯ್ಸರ್ ಆಸ್‌ಲ್ಲ್ಯಾ ಫಾಮಾದ್ ಬರೊವ್ಪ್ಯಾಚೆಂ ಬ್ಯಾನರ್ ಪಳೆವ್ನ್ ಹೆಂ ಖಂಡಿತ್ ತ್ಯಾ ಲೇಖಕಾಚೆಂ ಶೃದ್ಧಾಂಜಲಿ ಕಾರ್ಯೆಂ ಮ್ಹಣ್ ತಾಕಾ ಸಮ್ಜಲೆಂ. ದೆಕುನ್ ಪಯ್ಲೆಂ ತಾಕಾ ಭುಜ್ವಣ್ ಪಾಟೊಂವ್ಚೆಂ ಆನಿ ಉಪ್ರಾಂತ್ ವೊಟಾವಿಶಿಂ ಸಾಂಗ್ಚೆಂ ಮ್ಹಣ್ ತಾಣೆಂ ಚಿಂತ್ಲೆಂ. 

ತೊ ಮ್ಹಣಾಲೊ “ಪಯ್ಲ್ಯಾನ್ ಹಾಂವ್ ಹ್ಯಾ ಲೇಖಕಾಕ್ ಸಾಸ್ಣಾಚೊ ವಿಶೆವ್ ಮಾಗ್ತಾಂ. ಅಸಲೆ ಲೇಖಕ್ ಮರೊಂಕ್ ಮುಕ್ಯ್ ಕಾರಣ್ ತಾಂಚೆಂ ಆವ್ಕ್ ಮುಗ್ದಾಲೆಂ ಮ್ಹಣ್ ನ್ಹಯ್, ಬಗಾರ್ ತಾಂಚ್ಯಾ ಪೆನ್ನಾಂತ್ಲೆಂ ತೀಂತ್ ಖಾಲಿ ಜಾಲೆಂ. ದೆಕುನ್ ಲೇಖಕ್ ತೊ ಖಂಯ್ಚೋಯ್ ಜಾಂವ್ದಿ, ತಾಚ್ಯಾ ಪೆನ್ನಾಂತ್ಲೆಂ ತೀಂತ್ ಖಾಲಿ ಜಾಲ್ಲೆಫರಾ ತೊ ಮರ್‍ತಾ. ದೆಕುನ್ ತುಮ್ಕಾಂ ಪೆನ್ನಾಂತ್ ತೀಂತ್ ಜಾಯ್ ತರ್ ಮ್ಹಜ್ಯೆ ಬೊತ್ಲಿಕ್ ವೋಟ್ ಘಾಲಾ ಆನಿ ತೀಂತ್ ಭರಾ. ಉಪ್ರಾಂತ್ ಮೆಲ್ಲೆ ಲೇಖಕ್‌ಯೀ ಜೀವ್ ಜಾತೆಲೆ ಆನಿ ಆಮ್ಚಿಂ ಕೊಂಕ್ಣಿ ಪತ್ರಾಂ ಜಿವಾಳ್ ಜಾತೆಲಿಂ. ಹಾಂವ್ ಜಿಕೊನ್ ಆಯ್ಲೊಂ ತರ್ ಸರ್‌ಲ್ಲ್ಯಾ ಹ್ಯಾ ಲೇಖಕಾಚ್ಯಾ ನಾಂವಾರ್ ಏಕ್ ನಿಧಿ ಉಗಡ್ತೊಲೊಂ ಆನಿ ಹರ್‍ಯೆಕಾ ವರ್‍ಸಾ ಸಾಹಿತಿಕ್ ಸ್ಪರ್ಧೆ ಕರ್‍ನ್ ಜಿಕ್‌ಲ್ಲ್ಯಾಂಕ್ ಇನಾಮಾಂ ವಾಂಟ್ತೊಲೊಂ. ದೆಕುನ್ ಸರ್‌ಲ್ಲೊ ಹೊ ಲೇಖಕ್ ಸರ್ಗಾಕ್ ಪಾವಜೆ ತರ್ ತಾಚ್ಯಾ ಕುಟ್ಮಾಚ್ಯಾಂನಿ ಮ್ಹಾಕಾ ಜರೂರ್ ವೋಟ್ ಘಾಲಿಜೆ ಆನಿ ತಾಚ್ಯಾ ಅತ್ಮ್ಯಾಕ್ ಶಾಂತಿ ಮೆಳಶೆಂ ಕರಿಜೆ”.

ತಿತ್ಲ್ಯಾರ್ ಕಾರ್ಯಾಚ್ಯಾ ಎಮ್ಸಿನ್ ಸಿಕೇರಾಮಾಕ್ ಕುಶಿಕ್ ವೊಡ್ಲೆಂ ಆನಿ ಮ್ಹಣಾಲೊ –

“ಖಂಯ್ಚೊ ಲೇಖಕ್ ಮೆಲಾ ಮ್ಹಣ್ ತುಂ ಅಶೆಂ ಉಲಯ್ತಾಯ್ ಸಾಯ್ಬಾ? ತ್ಯಾ ಲೇಖಕಾಕ್ ಪೋರ್‌ಚ್ ಏಕ್ ಗೊಂಯ್ಚಿ ಪ್ರಶಸ್ತಿ ಮೆಳ್ಳ್ಯಾ. ತ್ಯೆ ಖುಶೆನ್ ತಾಕಾ ಆಮಿ ಸನ್ಮಾನ್ ದವರ್‌ಲ್ಲೊ. ತುವೆಂ ತಾಕಾ ಮದೆಂಚ್ ಲಗಡ್ ಕಾಡ್ಲೊಯ್. ಆತಾಂಚ್ ಅಶೆಂ, ಜಿಕ್ಲೊಯ್ ತರ್ ಆನಿ ಕೊಣಾ ಕೊಣಾಕ್ ಲಗಡ್ ಕಾಡುಂಕ್ ಆಸಾಯ್ಗೀ”

“ತಶೆಂ ತರ್ ವೊಡೊಲ್ ತೊ ಲೋಕ್ ರಡೊನ್ ಆಸ್‌ಲ್ಲೊ ಕಿತ್ಯಾಕ್?”

“ತೆ ರಡೊನ್ ಆಸ್‌ಲ್ಲೆ, ಕಾರ್ಯೆಂ ಎದೊಳ್‌ಚ್ ಘಳಾಯ್ ಜಾಲಾಂ, ಆತಾಂ ಸಿಕೇರಾಮ್ ರಯ್ಲಾಂ ಸೊಡುಂಕ್ ಆಯ್ಲೊನೇ ಮ್ಹಣ್”.

ಸಿಕೇರಾಮ್ ಸಾಂಪಡ್ಲೊ. ತಾಕಾ ಆತಾಂ ಕಿತೆಂ ಮ್ಹಣ್ಚೆಂ ಮ್ಹಣ್ ಕಳೊಂಕ್ ನಾ. ತಾಣೆಂ ಎಮ್ಸಿಚ್ಯಾ ಬೊಲ್ಸಾಂತ್ ಏಕ್ ನೋಟ್ ಚೆಪ್ಲೊ ಆನಿ ತಕ್ಶಣ್ ತಕ್ಲಿ ಘುಂವ್‌ಲ್ಲೆಬರಿ ನಟನ್ ಕೆಲೆಂ. ಚಾರ್ ಜಣ್ ಆಯ್ಲೆ ಆನಿ ಸಿಕೇರಾಮಾಕ್ ವ್ಹರ್‍ನ್ ಕಾರಾರ್ ಬಸಯ್ಲೊ ಆನಿ ಸಿಕೇರಾಮ್ ಪದ್ರಾಡ್ ಜಾಲೊ.

ಸಿಕೇರಾಮಾಕ್ ಸದಾಂಚ್ ಮೊಗಾಚೊ ಆನಿ ಮಯ್ಪಾಸಾಚೊ ಸಾಂಗಾತಿ ಜಾವ್ನಾಸ್ಚ್ಯಾ ಎಕ್ಲ್ಯಾನ್ ಸಲಹಾ ದಿಲಿ – ‘ತುವೆಂ ರೋಡ್ ಶೋ ಕರಿಜೆ ತೆದ್ನಾ ತುಂ ಜಿಕ್ತೊಲೊಯ್’. ಅಶೆಂ ತಾಕಾ ಹೆರಾಂನಿ ರೋಡ್ ಶೋ ಕೆಲ್ಲ್ಯಾಚೊ ವೀಡಿಯೊ ದಾಕಯ್ಲೊ. ಹೆಂ ಪಳೆವ್ನ್ ಸಿಕೇರಾಮ್‌ಯೀ ರೋಡ್ ಶೋ ಕರುಂಕ್ ಆಯ್ತೊ ಜಾಲೊ. ಸಿಕೇರಾಮ್ ಲಗ್ಬಗ್ ತೀಸ್ ಕೊಂಕ್ಣಿ ವಾಟ್ಸಾಪ್ ಗ್ರೂಪಾಂನಿ ಆಸ್‌ಲ್ಲೊ. ತಾಣೆಂ ಏಕ್ ದೀಸ್ ನೆಮ್ಲೊ ಆನಿ ಸಕ್ಕಡ್ ಕೊಂಕ್ಣಿ ವಾಟ್ಸಾಪ್ ಗ್ರೂಪಾಂನಿ ಆಪ್ಣಾಚ್ಯಾ ರೋಡ್ ಶೋವಿಶಿಂ ಮಾಹೆತ್ ದಿಲಿ. 

ಪುಣ್ ಸಿಕೇರಾಮಾನ್ ಏಕ್ ಸಲಹಾ ದಿಲಿ. ಆಪುಣ್ ಏಕ್ ಖಾಲ್ತೊ ಆನಿ ಸಾದೊ ಕೊಂಕ್ಣಿ ಅಭ್ಯರ್ಥಿ. ದೆಕುನ್ ಹೆರಾಂನಿ ಕೆಲ್ಲೆಬರಿ ರಾಜಾಮರ್ಜೆಚೊ ರೋಡ್ ಶೋ ನಾಕಾ, ಮ್ಹಾಕಾ ವಾಟೆರ್ ಫುಲಾಂ ನಾಕಾತ್, ಮೊಲಾಧಿಕ್ ವಸ್ತು ನಾಕಾತ್. ಬಗಾರ್ ತುಮ್ಚೆಲಾಗಿಂ ಕಿತೆಂ ಆಸಾ ತೆ ಅರ್ಪಣ್ ಕರಾ ಮ್ಹಣ್ ವಿನತಿ ಕೆಲಿ.

ನಮಿಯಾರ್‌ಲ್ಲ್ಯಾ ದಿಸಾ ಸಿಕೇರಾಮಾಚೊ ಪುರ್ಶಾಂವ್ ವಿಗಾರಾಚೆಂ ಬೆಸಾಂವ್ ಘೆವ್ನ್ ಇಗರ್ಜೆಥಾವ್ನ್ ಆರಂಬ್ ಜಾಲೊ. ವ್ಹಡ್ ವ್ಹಡ್ ಗಾಡಿಯೆರ್ ಬಸ್ಚ್ಯಾಕ್‌ಯೀ ಸಂಸ್ಕೃತೆಚ್ಯಾ ನಿಬಾನ್ ಸಿಕೇರಾಮ್ ಬೊಯ್ಲಾಚ್ಯೆ ಗಾಡಿಯೆರ್ ಚಡ್ಲೊ. ಇಗರ್ಜೆಥಾವ್ನ್ ಸುರು ಜಾಲ್ಲ್ಯಾನ್ ಬೆಂಡ್ಕಾರಾಂನಿ ಕಂತಾರ್‌ಚ್ ವ್ಹಾಜಯ್ಲೆಂ. ಕಂತಾರಾದ್ವಾರಿಂ ಸುರು ಜಾಲ್ಲೊ ಪುರ್ಶಾಂವ್ ಗೆಟಿ ಭಾಯ್ರ್ ಆಯಿಲ್ಲೊಚ್ ಲೊಕಾಂನಿ ಬೊಬಾಟುಂಕ್ ಸುರು ಕೆಲೆಂ. ಎಕಾ ವಾಂಟ್ಯಾಚೊ ಲೋಕ್ ಬೊಬಾಟುಂಕ್ ಲಾಗ್ಲೊ “ಕಾಡ್ ತಾಕಾ ಕಾಡ್ ತಾಕಾ”. ದುಸ್ರ್ಯೆ ಪಾಡ್ತಿಂತ್ ಸಿಕೇರಾಮಾಚೆ ಥೊಡೆ ವಿರೋಧಿ ಆಸ್‌ಲ್ಲ್ಯಾನ್ “ಖುರ್‍ಸಾಯ್ ತಾಕಾ” ಮ್ಹಣ್ ಬೊಬಾಟ್ಲೆ. ಆಯ್ಕೊನ್ ಸಿಕೇರಾಮ್ ಉಡೊನ್ ಪಡ್ಲೊ. “ಖುರ್‍ಸಾಯ್ ನ್ಹಯ್ ಸಾಯ್ಬಾನೊಂ, ಜಿಕಯ್ ತಾಕಾ” ಮ್ಹಣ್ ಸಿಕೇರಾಮ್ ಬೊಬಾಟ್ಲ್ಯಾರೀ ಇತ್ಲ್ಯೆ ಗದ್ದಾಳಾಯೆ ಮುಕಾರ್ ತಾಚೆಂ ಆಯ್ಕನಾ ಜಾಲೆಂ. ಆಪ್ಣಾಕ್ ಫುಲಾಂ ವಾ ಮೊಲಾಚೆಂ ಕಿತೆಂಚ್ ನಾಕಾ ಮ್ಹಣ್ ಸಿಕೇರಾಮಾನ್ ಪಯ್ಲೆಂಚ್ ಸಾಂಗ್‌ಲ್ಲೆಂ. ಅಶೆಂ ಪುರ್ಶಾಂವ್ ಫುಡೆಂ ಗೆಲ್ಲೊಚ್ ಥೊಡ್ಯಾಂನಿ ಪಾಡ್ ಜಾಲ್ಲೆ ಟೊಮೆಟೆ ರಸ್ತ್ಯಾರ್ ಉಡೊಂವ್ಚ್ಯಾ ಬದ್ಲಾಕ್ ಸಿಕೇರಾಮಾಚ್ಯಾ ಮುಸ್ಕಾರಾಕ್ ಉಡಯ್ಲೆ. ಕುಂಕ್ಡಾಂಚಿ ಪೊಲ್ಟ್ರಿ ಆಸ್‌ಲ್ಲ್ಯಾನ್ ಆಪುಣ್‌ಯೀ ಕಾಂಯ್ ಉಣೆಂ ನಾ ಮ್ಹಣೊನ್ ದಾಕೊಂವ್ಚ್ಯಾಕ್ ಕುಸ್‌ಲ್ಲಿಂ ಆನಿ ಪಾಡ್ ತಾಂತಿಯಾಂ ಸಿಕೇರಾಮಾಚ್ಯಾ ಮಾಂಡ್ಡ್ಯಾರ್ ಉಡಯ್ಲಿಂ. ಥೊಡ್ಯಾಂನಿ ವಿಕುನ್ ವಚನಾತ್‌ಲ್ಲೆ, ಚಡ್ತಿಕ್ ಉರ್‌ಲ್ಲೆ ವ್ಹಾಳ್ಚ್ಯೆ ಭಾಜಿಯೆಚ್ಯೊ ಮೊವ್ಳ್ಯೊ ಸಿಕೇರಾಮಾಕ್ ಝೆಲೆ ಜಾವ್ನ್ ಘಾಲೆ. ಥೊಡ್ಯಾಂನಿ ಸಿಕೇರಾಮಾಚ್ಯಾ ಕಾನಾಂಕ್ ಚಡ್ತಿಕ್ ಉರ್‌ಲ್ಲಿಂ ವಾಂಯ್ಗಿ ಬಾಂದ್ಲಿಂ. ಥೊಡ್ಯಾಂನಿ ಪಿಯಾವಾಚಿಂ ಸರ್‍ಲಾಂ ವಯ್ರ್‌ಥಾವ್ನ್ ಆಂಗಾರ್ ಉಡಯ್ಲಿಂ.

ಹ್ಯಾ ಮದ್ಗಾತ್ ಪುರ್ಶಾಂವ್ ಫುಡೆಂ ವೆತಾನಾ, ಸಿಕೇರಾಮಾಚೊ ಅಭಿಮಾನಿ, ಕೊಂಕ್ಣಿ ಜಾಣಾ ಆಸ್ಚೊ, ರಸ್ತ್ಯಾ ದೆಗೆರ್ ಬಸೊನ್ ವಾಣೊ ಸಮಾ ಕರ್‍ಚೊ ಚಾಮ್ಗಾರ್ ಸಿಕೇರಾಮಾಕ್ ಪಳೆವ್ನ್ ಭಾವುಕ್ ಜಾಲೊ. ಆಪ್ಣೆಂಯ್ ಕಿತೆಂ ತರೀ ದೀಜೆ ಮ್ಹಣ್ ಉಟ್ಲೊ, ದೆಕುನ್ ಆಪ್ಣಾಚ್ಯೆ ಆಂಗ್ಡಿ ಆಸ್‌ಲ್ಲ್ಯಾ ವಾಣ್ಯಾಂಚೊ ಏಕ್ ಹಾರ್ ತಾಣೆಂ ಕೆಲೊ ಆನಿ ಧಾಂವೊನ್ ವಚೊನ್ ಸಿಕೇರಾಮಾಕ್ ಪೊಟ್ಲುನ್ ಧರ್‍ನ್ ತಾಚ್ಯಾ ಗಳ್ಯಾಕ್ ಘಾಲೊ. ಹೆಂ ಪಳೆವ್ನ್ ಥಂಯ್ಸರ್ ಉಬೊ ಆಸ್‌ಲ್ಲ್ಯಾ ಎಕ್ಲ್ಯಾನ್ ಮ್ಹಳೆಂ. “ಸಕ್ಡಾಂನಿ ತಾಂಚೆಕಡೆನ್ ಆಸ್‌ಲ್ಲ್ಯಾ ಉರ್‌ಲ್ಲ್ಯಾಂತ್ಲೆಂ ಘಾಲೆಂ. ಪುಣ್ ಹಾಣೆಂ ಆಪ್ಣಾಚೆಂ ಆಸಾ ಕಿತೆಂ ತೆಂ ಸಕ್ಕಡ್, ದಿಸಾಚಿ ಪೋಡ್‌ಚ್ ಸಿಕೇರಾಮಾಕ್ ದಿಲಿ”.

ಸಿಕೇರಾಮಾಚ್ಯಾ ರೋಡ್ ಶೋಕ್ ಸಾರ್ಕಿ ದಿಶಾ ನಾತ್‌ಲ್ಲ್ಯಾನ್ ತೊ ಖಂಯ್ಸರ್ ವ್ಹರ್‍ಚೊ ಮ್ಹಣ್ ಕೊಣಾಯ್ಕಿ ಕಳ್ಳೆಂನಾ. ಕಂತಾರ್ ಫುಂಕುನ್ ಫುಂಕುನ್ ಮುಕ್ಲೆಂ ಖಂಯ್ಚೆಂ ಕಂತಾರ್ ವಿಂಚ್ಚೆಂ ಮ್ಹಳ್ಳ್ಯಾ ಗೊಂದೊಳಾಂತ್ ಆಸ್ತಾನಾಂಚ್ ಎಕ್ಲ್ಯಾನ್ “ತುಜೆಸರ್ಶಿಂ ದೆವಾ” ಮ್ಹಳ್ಳೆಂ ಕಂತಾರ್ ವ್ಹಾಜಯ್ಲೆಂಚ್. ಹ್ಯಾ ಕಂತಾರಾಂತ್ ಬುಡೊನ್ ಬೆಂಡ್ಕಾರಾಂಕ್ ಘುಸ್ಪೊಡ್ ಜಾವ್ನ್ ಇಗರ್ಜೆಚ್ಯಾ ಎಕೆ ಗೆಟಿಥಾವ್ನ್ ಸುರು ಜಾಲ್ಲೊ ಹೊ ಪುರ್ಶಾಂವ್ ಇಗರ್ಜೆಚ್ಯೆ ಆನ್ಯೆಕೆ ಗೆಟಿಥಾವ್ನ್ ಭಿತರ್ ಯೇವ್ನ್ ಶೀದಾ ಸಿಮೆಸ್ತ್ರಿಂತ್ ವ್ಹರ್‍ನ್ ರಾವಯ್ಲೊ. ‘ಆಮಿ ಖಂಯ್ ವಚೊನ್ ಆಸಾಂವ್’ ಮ್ಹಣ್ ಕಳಿತ್ ನಾತ್‌ಲ್ಲೆ ಜಾಯ್ತೆ ಕೊಂಕ್ಣಿ ಲೇಖಕ್ ಸಿಕೇರಾಮಾಚ್ಯಾ ರೋಡ್ ಶೋಂತ್ ತೆಯ್ ಸಿಮಿಸ್ತ್ರಿಕ್ ಯೇವ್ನ್ ಪಾವ್ಲೆ. ಗಾಡಿಯೆರ್ ಥಾವ್ನ್ ದೆಂವೊನ್ ಸಿಕೇರಾಮಾಕ್ ಕಿತೆಂ ಉಲೊಂವ್ಚೆಂ ಮ್ಹಣ್ ಕಳ್ಳೆಂನಾ. ಥಂಯ್ಸರ್ ಸರ್ಕಾರಾಚ್ಯಾ ಅನುದಾನಾಂತ್ ಸಿಮಿಸ್ತ್ರಿಚೆಂ ಕಾಮ್ ಚಲ್ತಾಲೆಂ. ಹೆಂ ಮತಿಂತ್ ದವರ್‍ನ್ ಸಿಕೇರಾಮ್ ಮ್ಹಣಾಲೊ –

“ಜರ್ ಹಾಂವ್ ಜಿಕ್ಲೊಂ ತರ್ ಹಿ ಸಿಮಿಸ್ತ್ರ್ ಹಾಂವ್ ವಯ್ಲ್ಯಾ ದರ್ಜೆಕ್ ಚಡಯ್ತೊಲೊಂ. ಮಾತ್ರ್ ನ್ಹಯ್, ತೀನ್ ಮಾಳಿಯಾಂಚಿ ಸಿಮಿಸ್ತ್ರ್ ಬಾಂದ್ತೊಲೊಂ. ತ್ಯಾ ಭಾಯ್ರ್ ಕೊಂಕ್ಣಿ ಲೇಖಕಾಂಕ್ ಆಧುನಿಕ್ ಫೊಂಡ್ ಕಾಡ್ನ್ ಪುರ್‍ತೊಲೊಂ ಆನಿ ತಾಂಕಾಂ ವೊರೆವಿಂಗಡ್ ಜಾಗ್ಯಾರ್ ಪುರ್‍ಚಿ ವೆವಸ್ಥಾ ಕರ್‍ತೊಲೊಂ ಆನಿ ಮ್ಹಜ್ಯೆ ಆವ್ದೆಂತ್ ಮೋರ್‍ನ್ ಪಾವ್ತೆಲ್ಯಾ ಹರ್‍ಯೆಕಾ ಲೇಖಕಾಕ್ ರುಪಯ್ ಪಂಚ್ವೀಸ್ ಹಜಾರ್ ದಿತೊಲೊಂ. ದೆಕುನ್ ಹೊ ಆವ್ಕಾಸ್ ಕೊಂಕ್ಣಿ ಲೇಖಕಾಂನಿ ಬಿಲ್ಕುಲ್ ಹೊಗ್ಡಾಂವ್ಕ್ ನ್ಹಜೊ ಮ್ಹಣ್ ವಿನತಿ ಕರ್‍ತಾಂ ಆನಿ ತಾಂಚೊ ಸಹಕಾರ್ ಆಶೆವ್ನ್ ಮ್ಹಾಕಾ ಜಿಕಯ್ಜೆ ಮ್ಹಣ್ ವಿನತಿ ಕರ್‍ತಾಂ”.

ಆಯ್ಕೊನ್ ಸಕ್ಕಡ್ ಲೊಕಾಂನಿ ಆನಿ ಲೇಖಕಾಂನಿ ತಾಳಿಯೊ ಪೆಟ್ಲ್ಯೊ. ಸಿಮಿಸ್ತ್ರಿಥಾವ್ನ್ ಘರಾ ಪಾಟಿಂ ವೆತಾನಾ ಥೊಡೆ ಮ್ಹಣಾಲೆಚ್ “ಆನಿ ಸಿಕೇರಾಮಾಚೆಂ ಜಾಲೆಂ”. ಆಯ್ಕೊನ್ ಸಿಕೇರಾಮ್ ಥಂಯ್ಸರ್‌ಚ್ ಆಸ್ಚ್ಯಾ ಲಾಗ್ಶಿಲ್ಯಾ ಫೊಂಡಾಂತ್ ಪಡ್ತಾ ಮ್ಹಣ್ತಾನಾಂಚ್ ಚಾಮಾದೊರಾನ್ ತಾಕಾ ಘಟ್ಟ್ ಧರ್‍ಲೊ ಆನಿ ಮ್ಹಣಾಲೊ “ತುಜೊ ವೇಳ್ ಆನಿಕೀ ಯೇಂವ್ಕ್ ನಾ”.

ಲೊಕಾಂಚೆಂ ದುರ್‍ಸೊಣೆಂ ಆನಿ ರೋಡ್ ಶೋ ಉಪ್ರಾಂತ್ ಸಿಕೇರಾಮಾಕ್ ಸಮಾಧಾನ್ ಭೊಗ್ಲೆಂನಾ. ವೊಟಾಖಾತಿರ್ ಪ್ರಚಾರ್ ಆನಿಕೀ ಪಾವೊಂಕ್ ನಾ ಮ್ಹಣ್ ತಾಕಾ ಭೊಗ್ಲೆಂ. ತಕ್ಶಣಾ ತಾಚ್ಯೆ ಮತಿಕ್ ಆನ್ಯೇಕ್ ಉಪಾಯ್ ಝಳ್ಕಲೊ. ಆಜ್‌ಕಾಲ್ ಸಕ್ಕಡ್ ತಾಂಚ್ಯೊ ತಾಂಚ್ಯೊ ಗ್ಯಾರಂಟಿ ದೀಂವ್ಕ್ ಭಾಯ್ರ್ ಸರ್‍ಲ್ಯಾತ್. ದೆಕುನ್ ಹಾಂವೆಂಯ್ ಕೊಂಕ್ಣಿ ಲೇಖಕಾಂಖಾತಿರ್ ಗ್ಯಾರಂಟಿ ಜರೂರ್ ದೀಜೆ. ಅಶೆಂ ದುಸ್ರ್ಯಾಚ್ ದಿಸಾ ತಾಣೆಂ ಪ್ರೆಸ್ ಕಾನ್ಫರೆನ್ಸ್ ಆಪಯ್ಲೆಂ. ಪಯ್ಲೆಂ ಸಿಕೇರಾಮಾಚ್ಯೊ ಗ್ಯಾರಂಟಿ ಆಯ್ಕೊಂಕ್ ಖಂಯ್ಚೇಯ್ ಪ್ರೆಸ್‌ವಾಲೆ ಯೆಂವ್ಚಿ ಗ್ಯಾರಂಟಿ ನಾತ್‌ಲ್ಲಿ ತರೀ ತಾಂಕಾಂಯ್ ಏಕ್ ತಮಾಶಾಂಚೊ ನ್ಯೂಜ್ ಜಾಯ್ ಆಸ್‌ಲ್ಲೊ ಜಾಲ್ಲ್ಯಾನ್ ತೆಯ್ ಆಖ್ರೇಕ್ ಆಯ್ಲೆ.

ಸಕ್ಕಡ್ ಜಮ್ಲ್ಯಾ ಉಪ್ರಾಂತ್ ಸಿಕೇರಾಮ್ ತಾಚ್ಯಾ ಗ್ಯಾರಂಟಿವಿಶಿಂ ಉಲಯ್ಲೊ.

“ಮೊಗಾಚ್ಯಾ ಮತ್‌ದಾರಾಂನೋ ಆನಿ ಕೊಂಕ್ಣಿ ಲೇಖಕಾನೊಂ. ವೃತ್ತೆನ್ ಹಾಂವ್ ಏಕ್ ಕೊಂಕ್ಣಿ ಲೇಖಕ್. ದೆಕುನ್ ಜರ್ ಹಾಂವ್ ಜಿಕೊನ್ ಆಯ್ಲೊಂ ತರ್ ತುಮ್ಕಾಂ ಮ್ಹಜ್ಯೊ ಗ್ಯಾರಂಟಿ ಹ್ಯಾ ಪರಿಂ ಆಸ್ತೆಲ್ಯೊ. ಮ್ಹಜಿ ಪಯ್ಲಿ ಗ್ಯಾರಂಟಿ ಜಾವ್ನಾಸಾ ಹರ್‍ಯೆಕಾ ಕೊಂಕ್ಣಿ ಲೇಖಕಾಚ್ಯಾ ಘರಾ ಏಕ್ ‘ಭಾಂಗಾರಾಚಿ ಇಮಾಜ್’ ಮ್ಹಳ್ಳೊ ಭುರ್ಗ್ಯಾಂಚ್ಯಾ ಕಾಣಿಯಾಂಚೊ ಪುಸ್ತಕ್. ಹಾಂತುನ್ ಭುರ್ಗ್ಯಾಂಕ್ ಜಾಯ್ತ್ಯೊ ಕೊಂಕ್ಣಿ ಕಾಣಿಯೊ ಆಸಾತ್. ಹ್ಯೊ ಭುರ್ಗ್ಯಾಂನಿ ವಾಚ್ಲ್ಯೊ ತರ್ ಫುಡಾರಾಂತ್ ಆಮ್ಕಾಂ ಬರೆ ಕೊಂಕ್ಣಿ ಲೇಖಕ್ ಮೆಳ್ಚ್ಯಾಂತ್ ದುಬಾವ್ ನಾ.

“ಮ್ಹಜಿ ದುಸ್ರಿ ಗ್ಯಾರಂಟಿ ಆಸಾ ಕೊಂಕ್ಣಿ ಲೇಖಕಾಂಕ್ ಹರ್‍ಯೆಕಾ ಕೊಂಕ್ಣಿ ಕಾರ್ಯಕ್ರಮಾಕ್ ವಚೊಂಕ್ ಬಸ್ಸಾರ್ ಫುಂಕ್ಯಾಕ್ ಪಯ್ಣ್. ಪುಣ್ ಏಕ್ ಕಂಡಿಶನ್ ಕಿತೆಂಗೀ ಮ್ಹಳ್ಯಾರ್ ತ್ಯಾ ಕಾರ್ಯಕ್ರಮಾಚೊ ಮುಕೇಲ್ ಸಯ್ರೊ ಹಾಂವ್ ಜಾವ್ನ್ ಆಸಜೆ. ಕೊಂಕ್ಣಿ ಕಾರ್ಯಿಂ ಮ್ಹಣೊನ್ ತುಮಿ ಕಾಜಾರಾಕ್, ರೊಸಾಕ್ ಭಾಯ್ರ್ ಸರ್‍ಲ್ಯಾರ್ ಜಾಯ್ನಾ. ಹೆಂ ಫಕತ್ ಕೊಂಕ್ಣಿ ಸಂಸ್ಕೃತಿ, ಕಲಾ ಆನಿ ಸಾಹಿತ್ಯಾಕ್ ಸಂಬಂದಿತ್ ಆಸಜೆ.

“ಮ್ಹಜಿ ತಿಸ್ರಿ ಗ್ಯಾರಂಟಿ ಜಾವ್ನಾಸಾ ಕೊಂಕ್ಣಿ ಲೇಖಕಾಂಕ್ ‘ಸುವಾತ್’ ಯೋಜನಾಖಾಲ್ ಆಧಾರ್ ದಿಂವ್ಚೊ. ಹೆಂ ಯೋಜನ್ ಕಿತೆಂಗೀ ಮ್ಹಳ್ಯಾರ್ ಆಮ್ಚೆ ಕೊಂಕ್ಣಿ ಲೇಖಕ್ ಚಡಾವತ್ ರಾತಿಚೆಂ ಬರೊಂವ್ಕ್ ಬಸ್ತಾತ್. ಹ್ಯಾ ವೆಳಾರ್ ಪವರ್ ಕಟ್ ಜಾಂವ್ಚಿ ಸಾಧ್ಯತಾ ಆಸ್ತಾ. ದೆಕುನ್ ತಾಂಕಾಂ ಸುವಾತ್ ಯೋಜನಾಖಾಲ್ ಕಾಳೊಕ್ ಧಾಂವ್ಡಾಂವ್ಕ್ ವಾತ್ ಫುಂಕ್ಯಾಕ್ ದಿತೆಲ್ಯಾಂವ್. ಪ್ರಾಯೆಕ್ ಲಾಗೊನ್ ವಾತಿಚೊ ಸಂಖೊ ಚಡತ್ತ್ ವೆತೊಲೊ.

“ಮ್ಹಜಿ ಚೊವ್ತಿ ಆನಿ ಆಖ್ರೇಚಿ ಗ್ಯಾರಂಟಿ ಜಾವ್ನಾಸಾ ಹರ್‍ಯೇಕ್ ಕೊಂಕ್ಣಿ ಲೇಖಕಾಂಕ್ ಮ್ಹಯ್ನ್ಯಾಕ್ ಧಾ ಲೀಟರ್ ತೀಂತ್. ಹಾಂವ್ ಜಾಣಾಂ ಆಜ್‌ಕಾಲ್ ಸಕ್ಡಾಂನಿ ಕಂಪ್ಯೂಟರಾರ್‌ಚ್ ಬರೊಂವ್ಚೆಂ. ಅಶೆಂ ಬರೊವ್ನ್ ಜಾಯ್ತ್ಯೊ ಚುಕಿ ಘಡೊನ್ ಫರಾಮಸ್ ಜಾಲ್ಲ್ಯೊ ಆಸಾತ್. ತೀಂತ್ ವಾಪಾರ್‍ನ್ ಪೆನ್ನಾಂತ್ ಬರಯ್ಲೆಂ ತರ್, ಆನಿ ಮದೆಂಚ್ ಕಸಲಿಯ್ ಚೂಕ್ ಜಾಲಿ ತರ್ ಸಗ್ಳೆಂ ಪಾನ್ ನವ್ಯಾನ್ ಬರಯ್ಜೆ ಪಡ್ತಾ ಆನಿ ತೆದಾಳಾ ಮಾತ್ರ್ ಎಕಾ ಲೇಖಕಾಚಿ ಸೊಸ್ಣಿಕಾಯ್, ನಿತಳಾಯ್ ಆನಿ ಸುಡಾಳಾಯ್ ದಿಸೊನ್ ಯೆತಾ. ದೆಕುನ್ ಆಮಿ ಕೊಂಕ್ಣೆಖಾತಿರ್ ಥೊಡಿಂ ವರ್‍ಸಾಂ ಪಾಟಿಂ ಗೆಲ್ಯಾರೀ ವ್ಹಡ್ ನಾ ಪುಣ್ ಫೊಂಡಾಂತ್ ಪಡ್ಚೆಂ ನಾಕಾ”. ಸಿಕೇರಾಮಾನ್ ತಾಚ್ಯೊ ಗ್ಯಾರಂಟಿ ಜಾಹೀರ್ ಕರ್‍ನ್ ಹರ್‍ಯೆಕಾ ಫಿರ್ಗಜಾಂನಿ ಧಾಡ್ಲ್ಯೊ. ಮಿಸಾ ಉಪ್ರಾಂತ್ ಯಾಜಕಾಂನಿ ಎನಾಂವ್ಸ್ ಕರುಂಕ್ ವಿನತಿ ಕೆಲಿ.

ವೊಟಾಂತ್ ಜಿಕ್ಚೆಖಾತಿರ್ ಸಿಕೇರಾಮಾನ್ ಕರ್‍ಚೆಂ ಸಕ್ಕಡ್ ಕರ್‍ನ್ ಜಾಲೆಂ. ತಾಕಾ ಕೊಣೆಂಗೀ ಸಾಂಗ್ಲೆಂ, ಜಿಕಜೆ ತರ್ ಮತ್‌ದಾರಾಂಕ್ ಇನಾಮಾಂ ಆನಿ ಕಾಣಿಕೊ ದೀಜೆ ಮ್ಹಣ್. ಸಿಕೇರಾಮಾನ್ ವೊಟಾಖಾತಿರ್ ಗರ್ಜೆಭಾಯ್ರ್ ಪಯ್ಶೆ ವಿಬಾಡುಂಕ್ ನಾತ್‌ಲ್ಲೆ. ದೆಕುನ್ ಕಿತೆಂಯ್ ಮೊಲಾಧಿಕ್ ಕಾಣಿಕೊ ದೀಂವ್ಕ್ ತಾಕಾ ಮನ್ ನಾತ್‌ಲ್ಲೆಂ. ತಕ್ಶಣ್ ತಾಚ್ಯೆ ಮತಿಕ್ ಉಪಾಯ್ ಝಳ್ಕಲೊ. ತಾಚ್ಯಾ ಹಾಸ್ಯ್ ಪುಸ್ತಕಾಚ್ಯೊ ಹಜಾರ್ ಹಜಾರ್ ಪ್ರತಿಯೊ ಘರ್‍ಚ್ಯಾ ಮಾಳ್ಯಾರ್ ಆಸ್‌ಲ್ಲ್ಯೊ. ತ್ಯೊಚ್ ಲೊಕಾಂಕ್ ವಾಂಟ್ಚ್ಯೊ ಆನಿ ತಾಂಚ್ಯಾ ತೊಂಡಾರ್ ಸಾಸ್ಣಾಕ್ ಉರ್‍ಚೆತಸಲ್ಯೊ ಹಾಸೊ ದಿಂವ್ಚ್ಯೊ.

ದುಸ್ರೆದೀಸ್ ಸಕಾಳಿಂ ಮಾಳ್ಯಾವಯ್ಲೆ ಬೂಕ್ ಸಕ್ಕಡ್ ಸಕ್ಲಾ ಹಾಡ್ಲೆ. ಬಾಯ್ಲೆಲಾಗಿಂ ಸಾತ್ ಆಟ್ ಗೊಣಿಯೊ ವಿಚಾರ್‍ನ್ ತಾಂತುಂ ಬೂಕ್ ಭರುಂಕ್ ಸಾಂಗ್ಲೆ. ಪಾಂಚ್ ಸ ಗೊಣಿಯೊ ಆಸ್‌ಲ್ಲ್ಯೊ ತರೀ ಬಾಕಿಚ್ಯಾ ಗೊಣಿಯಾಂನಿ ಥೊಡ್ಯೊ ವಸ್ತು ಆಸ್‌ಲ್ಲ್ಯೊ. ಪುಣ್ ತಾಂತ್ಲ್ಯೊ ವಸ್ತು ಕಾಡ್ನ್, ಗೊಣಿ ಖಾಲಿ ಕರ್‍ನ್ ಬೂಕ್ ಭರುಂಕ್ ಘಳಾಯ್ ಜಾತಾ ಜಾಲ್ಲ್ಯಾನ್ ತ್ಯಾಚ್ ಗೊಣಿಯಾಂನಿ ಬೂಕ್ ಭರ್‍ಲೆ ಆನಿ ಟೆಂಪೊ ಘೆವ್ನ್ ಸಿಕೇರಾಮ್ ಕೊಂಕ್ಣಿ ಘರಾ-ಘರಾಂನಿ ಭೊಂವ್ಡಿ ಮಾರ್‍ನ್ ಗೆಲೊ. ಬೂಕ್ ವಾಂಟುನ್ ವಾಂಟುನ್ ರಾತ್ ಜಾಲಿ. ಸಾತ್ ಗೊಣಿಯೊ ಖಾಲಿ ಜಾಲ್ಯೊ. ತಿತ್ಲ್ಯಾರ್ ಸಿಕೇರಾಮ್ ವೊಟಾಖಾತಿರ್ ಲೊಕಾಂಕ್ ಪಯ್ಶೆ ಆನಿ ಸೊರೊ ವಾಂಟ್ತಾ ಮ್ಹಣ್ ಕೊಣೆಂಗೀ ಅನ್ನಾಡ್ಯಾಂನಿ ಫಟ್ಕಿರಿ ಖಬರ್ ಚುನಾವ್ ಅಧಿಕಾರಿಂಕ್ ದಿಲಿ. ತೆ ಸಿಕೇರಾಮಾಕ್ ಸೊಧುನ್ ಆಯ್ಲೆ. ಅಶೆಂ ಆಟ್ವ್ಯೆ ಗೊಣಿಯೆಂತ್ಲೆ ಬೂಕ್ ವಾಂಟ್ತಾನಾ ಸಿಕೇರಾಮಾಕ್ ಅಧಿಕಾರಿಂನಿ ಧರ್‍ಲೊ. ಸೊಧ್ನಾಂ ಖಾತಿರ್ ಬುಕಾಚಿ ಆಟ್ವಿ ಗೊಣಿ ವೊಮ್ತಿ ಘಾಲಿ. ಕಿತೆಂ ಪಳೆಂವ್ಚೆಂ? ತಾಂತುನ್ ಬೂಕ್ ಖಾಲಿ ಜಾವ್ನ್ ಧಾ-ಬಾರಾ ಮಾತ್ರ್ ಉರೊನ್ ಆಡಿಯೆಕ್ ಗುಜರಿಕ್ ಮ್ಹಣ್ ವಿಕುಂಕ್ ದವರ್‌ಲ್ಲ್ಯೊ ಸೊರ್‍ಯಾಚೊ ಬೊತ್ಲ್ಯೊ ಮೆಳ್ಳ್ಯೊ. ರಾತ್ಚೊ ವೇಳ್ ಜಾಲ್ಲ್ಯಾನ್ ಬೂಕ್ ವಾಂಟ್‌ಲ್ಲ್ಯಾ ಘರ್‍ಚೊ ಯೆಜ್ಮಾನ್ ಪಿಯೆವ್ನ್ ಟಾಯ್ಟ್ ಜಾವ್ನ್ ಘರಾ ಆಯಿಲ್ಲ್ಯಾನ್ ಸಿಕೇರಾಮಾನ್ ಸೊರೊ ವಾಂಟ್ಲಾ ಮ್ಹಣ್ ತಾಕಾ ಕಯ್ದ್ ಕರ್‍ನ್ ನಿಯಮ್ ಉಲ್ಲಂಘನ್ ಕೆಲ್ಲೆಖಾತಿರ್ ಭಿತರ್ ಘಾಲೊ. ದುಸ್ರ್ಯಾ ದಿಸಾ ಪೇಪರಾಂನಿ ಛಾಪುನ್ ಆಯ್ಲೆಂಚ್ – “ಕೊಂಕ್ಣಿ ಲೇಖಕಾಂಕ್ ಗ್ಯಾರಂಟಿ ದಿಲ್ಲೊ ಸಿಕೇರಾಮ್ ಹ್ಯಾ ಪಾವ್ಟಿಂ ವೊಟಾಕ್ ರಾಂವ್ಚಿ ಗ್ಯಾರಂಟಿ ನಾ”.

—–

✍️ –ರೋಶು, ಬಜ್ಪೆ