ಕ್ರಿಸ್ಮಸ್ ಆನಿ ಈಸ್ಟರ್ ಫೆಸ್ತಾಂಚ್ಯೆ ಪಾಟಿಕ್ ಲಾಗೊನ್ ಆಮ್ಚ್ಯೆ ಕರಾವಳೆಂತ್ ಕಾಜಾರಾಂ ಸುರು ಜಾತಾತ್. ತಾಂತುಂಯ್ ಪರ್ಗಾಂವಾಂತ್ ಆಸ್ಲಲ್ಯಾಂಕ್ ಹೊ ವೇಳ್ ಏಕ್ ಅನ್ಕೂಲಾಚೊ ದೆಕುನ್ ‘ಜಲ್ದಿ ಶಾದಿ’ ಜಾವ್ನ್ ವೆತಾತ್. ತಾಂಚ್ಯೆ ಅನುಪಸ್ಥಿತೆರ್ ಆವಯ್ ಬಾಪಯ್, ಮಾಮ್ ಮಾಮಿಚ್ ಸಗ್ಳಿ ಜವಾಬ್ದಾರಿ ಘೆತಾತ್. ಲಗ್ನಾ ದಿಸಾ ಜೊಡ್ಯಾಚೆಂ ‘ಗೆಸ್ಟ್ ಎಪಿಯರೆನ್ಸ್’ ಮಾತ್ರ್ ಜಾಲ್ಲೆಂಯ್ ಆಸಾ! ಕಾಜಾರಾಚೊ ಸಂಭ್ರಮ್ ಸಂಪ್ತಾ, ವ್ಹಡ್ ಗದ್ದಾಳಾಯೆನ್. ತ್ಯಾ ಉಪ್ರಾಂತ್ಲಿ ಜಿಣಿ ಮಾತ್ರ್ ಖರ್ಶೆತಾ ಮ್ಹಣ್ಚ್ಯಾಕ್ ಜಾಯ್ತೆ ದಾಖ್ಲೆ ಆಮ್ಚೆಮುಕಾರ್ ದಿಸ್ಪೊಡ್ತೆಂ ಆಯ್ಕೊಂಕ್ ಮೆಳ್ತಾತ್. ಕಾಜಾರಾಚೆಂ ‘ಗ್ಲಾಮರ್’ ಕಿತ್ಲೆಂ ಚಡ್ಲಾಂ, ತಿತ್ಲೆಂಚ್ ತಾಚೆಂ ‘ಗ್ರಾಮರ್’ ಚುಕ್ಲಲೆಂ ಆಮ್ಕಾಂ ದಿಸ್ತಾ ತರೀ ಚುರ್ಚುರೆ ಮಾತ್ರ್ ಆಮ್ಚ್ಯಾ ವಾಂಟ್ಯಾಕ್ ಉರ್‍ಲ್ಯಾತ್. 

‘ಸಂಭ್ರಮಾಚರಣ್’ ಆನಿ ‘ಸಾಕ್ರಾಮೆಂತ್’ ಹಾಂಚೆಮದೆಂ ಆಸ್ಚೊ ಫರಕ್ ಸಮ್ಜಜೆ. ಕಾಜಾರಿ ಸಾಕ್ರಾಮೆಂತಾವಿಶಿಂ ಇಲ್ಲಿ ತರೀ ಸಮ್ಜೊಣಿ ಜೊಡ್ಯಾಕ್ ಜಾಯ್ತ್ಯಾ ಆಘಾತಾಂಥಾವ್ನ್ ವಾಂಚೊಂಕ್ ಸಕತ್. ಆಜ್ ಕಾಜಾರಾಚೆಂ ‘ಜಿವಂತ್ಪಣ್’ ಜಾಯ್ಜೆ, ಹ್ಯಾ ಸಾಕ್ರಾಮೆಂತಾಚ್ಯೆ ಸಮ್ಜೊಣೆಂತ್ ನವೀಕರಣ್ ಯೇಜೆ ಮ್ಹಳ್ಳಿ ಆಶಾ ಆಮ್ಚಿ.

ಪಳೆಯಾ, ಆಯ್ಚಿಂ ಯುವಜಣಾಂ ಚಾರ್ ಗಾಂವ್ ಭೊಂವ್ಲ್ಯಾಂತ್. ಚಾರ್ ಪಾಂಚ್ ಸಂಸ್ಕೃತೆಮದೆಂ ಐಟಿಬಿಟಿ ಸಂಸಾರಾಂತ್ ಥೊಡೊ ಕಾಳ್ ಪುಣೀ ಭಾಡ್ಯಾಕ್ ರಾವ್ಲ್ಯಾಂತ್. ತಾಂಗೆರ್ ಗೆಲ್ಯಾಂತ್, ಹಾಂಗೆರ್ ಗೆಲ್ಯಾಂತ್. ತಾಂಚೊ-ಹಾಂಚಿ ಸಂಸ್ಕೃತಿ, ಆಚಾರ್ ವಿಚಾರ್ ಖೂಬ್ ಸಮ್ಜಲ್ಯಾಂತ್ ಆನಿ ನಿಮ್ಣೆಂ ಸಕ್ಕಡ್ ಸಂಸ್ಕೃತಿ, ಆಚಾರ್ ಎಕ್‌ಚ್ ಮ್ಹಳ್ಳ್ಯಾ ನಿರ್ಧಾರಾಕ್ ಪಾವ್ಲ್ಯಾಂತ್. ದೆಕುನ್ ಆಪ್ಲಿ ಜೊಡಿ ಖಂಯ್ಚ್ಯಾಯ್ ಧರ್ಮಾಚಿ, ಖಂಯ್ಚ್ಯಾಯ್ ಸಂಸ್ಕೃತೆಚಿ ಖಂಯ್ಚೋಯ್ ಭಾವಾಡ್ತ್ ಪಾಳ್ಚಿ ಜಾಲ್ಯಾರೀ ವ್ಹಡ್ ನಾ; ಮನಾಂ ಏಕ್ ಜಾಲ್ಯಾರ್ ಜಾಲೆಂ ಮ್ಹಳ್ಳ್ಯಾ ಚಿಂತ್ಪಾನ್ ಲಗ್ನಾಕ್ ತಯಾರ್ ಜಾತಾತ್. ತೊ ತಾಚ್ಯಾ ತೆಂಪ್ಲಾಂತ್ ಲಗ್ನ್ ಜಾತಾ, ಹೆಂ ಆಪ್ಲ್ಯಾ ದೆವಾಳಾಂತ್ ಲಗ್ನ್ ಜಾತಾ. ಮಾಗಿರ್ ಸಕ್ಡಾಂಕ್ ಸಮಾಧಾನ್ ಕರುಂಕ್ ದೊನೀ ಪಾಡ್ತಿಚ್ಯಾಂಕ್ ಏಕ್ ಜೆವಣ್. ಇತ್ಲ್ಯಾರ್ ಆಚರಣ್ ಸಂಪ್ಲೆಂ. ಲೋಕ್ ಜೇವ್ನ್ ಘರಾ ಗೆಲೊ. ಆತಾಂ ಉರ್‍ಲೆಂ ಜೊಡೆಂ ಎಕ್ಸುರೆಂ. ಅಸಲ್ಯಾ ಸನ್ನಿವೆಶಾರ್ ಜೊಡಿಂ ಆರ್ಥಿಕ್ ರಿತಿನ್ ಘಟ್ ಆಸ್ಲ್ಯಾರ್ ಥೊಡೆ ದೀಸ್ ಸಲೀಸಾಯೆನ್ ವೆತಿತ್. ಪುಣ್ ಆರ್ಥಿಕ್ ಪರಿಸ್ಥಿತಿ ಘಟ್ ನಾಸ್ತಾನಾ ಹ್ಯೆ ವಾಟೆನ್ ಗೆಲ್ಲ್ಯಾಂನಿ ದೆಕ್‌ಲ್ಲೆಂ ಯೆಮ್ಕೊಂಡ್ ತಾಣಿಂಚ್ ಸಾಂಗೊನ್ ಕಳಜೆ.

ಹಿ ಏಕ್ ಆಯ್ಚಿ ಪ್ರಸ್ತುತ್ ಗಜಾಲ್ ತರ್ ಎಕಾಚ್ ಧರ್ಮಾಮದೆಂಚ್ ಕಾಜಾರ್ ಜಾಲ್ಲ್ಯಾಂನಿ ‘ಸಾಕ್ರಾಮೆಂತಾ’ಚಿ ಒಳೊಕ್ ಧರಿನಾಸ್ತಾಂ ವೆಗ್ಳಾಚಾರಾಕ್ ಮುಕಾರ್ ಸರ್‍ಚೆಂಯ್ ದಿಸೊನ್ ಯೆತಾ.

ಕಾಜಾರ್ ಏಕ್ ಸಾಕ್ರಾಮೆಂತ್, ದೊಗಾಂನಿ ಎಕಾ ಭಾವಾಡ್ತಾನ್, ಭರ್ವಶಾನ್ ಆನಿ ಮೊಗಾನ್ ಸ್ವೀಕಾರ್ ಕರ್‍ಚೊ ತೊ. ಪುಣ್ ಇಗರ್ಜೆಥಾವ್ನ್ ಭಾಯ್ರ್ ಯೆತಾನಾ ಕಾಜಾರ್ ‘ಕಮರ್ಶಿಯಲ್’ ಜಾವ್ನ್ ಸಾಕ್ರಾಮೆಂತಾಚೊ ಭೊಂಗಸ್ತಳ್ ಜಾತಾನಾ ಧೆಸ್ವಾಟ್ ಘರ್‍ಚ್ಯಾ ದಾರಾರ್ ಉಬಿ ಜಾತಾ. ವಿಪ್ರೀತ್ ಖರ್ಚ್, ರಿಣಾರ್ ಕಾಜಾರ್, ಗಲ್ಫ್ ಜೊಡಿಚೊ ಆಮಾಲಾಚೆರ್ ವಿಬಾಡ್, ವಿಪ್ರೀತ್ ಜೆವ್ಣಾಖಾಣಾಚೆಂ ಪ್ರದರ್ಶನ್ ಆನಿ ಆವಾಜ್ ದಿವ್ಯಾಂಚಿ ಸರ್ಬಾರಾಯ್ ಪಳೆತಾನಾ ಜೊಡ್ಯಾಚಿ ಬಿರ್ಮತ್ ಪಾವಜೆ ಪಡ್ತಾ. ಸಾಕ್ರಾಮೆಂತಾಚೆಂ ಆಚರಣ್ ಜಿಣಿಯೆಂತ್ ಜಾಯ್ಜೆ ವ್ಹಯ್, ಪುಣ್ ತ್ಯಾ ಸಾಕ್ರಾಮೆಂತಾಚಿ ಸುರ್ವಾತ್ ಕಮರ್ಶಿಯಲ್ ವ್ಹಾಳ್ಯಾಂತ್ ಉಪ್ಯೆವ್ನ್ ಗೆಲಿ ಜಾಲ್ಯಾರ್ ಸಾಕ್ರಾಮೆಂತಾಚಿ ಗುಂಡಾಯ್ ವಿಸ್ರಲ್ಯಾ ಮ್ಹಣ್ ಜಾಲೆಂ. ವಿಪ್ರೀತ್ ಜಾಲ್ಲೆಂ ಖಂಯ್ಚೇಂಯ್ ತೆಂ ವೀಕ್ ಜಾವ್ನ್ ಬದ್ಲತಾ ನ್ಹಯ್‌ಗೀ?

ಬದ್ಲೊನ್ ಯೆಂವ್ಚ್ಯೆ ಸಮಾಜೆಂತ್ ತಾಂತ್ರಿಕ್ ಸಕ್ತೆನ್ ಆನಿ ದುಡ್ವಾಚ್ಯೆ ಭಕ್ತೆನ್ ಏಕ್ ಕಾಜಾರ್ ಉರೊಂವ್ಕ್ ಜಾಯ್ನಾ. ಕಾಜಾರ್ ಜಾಯ್ತ್ಯಾ ಸಾಕ್ರಿಫಿಸಾಂಚೆರ್ ಬಾಂದ್ಲಲೆಂ ಘರ್. ದೆಕುನ್ ಎಕಾಮೆಕಾಚೆಂ ಬರೆಂಪಣ್ ಆನಿ ಕುಟ್ಮಾ ಜಿವಿತಾಚ್ಯೆ ಜವಾಬ್ದಾರೆಚಿ ಸ್ಪಶ್ಟತಾ ನಾಸ್ತಾನಾ ಕಾಜಾರ್ ಜಾಲ್ಯಾರ್ ಮರಾ ಪರ್ಯಾಂತ್ ಹೊ ಸಾಕ್ರಾಮೆಂತ್ ಜಿಯೆಂವ್ಕ್ ಅಸಾಧ್. ವಯಕ್ತಿಕ್ ಸ್ವಾಂತಂತ್ರ್ಯ್ ಮ್ಹಳ್ಳ್ಯಾ ಫೇಕ್ ಗರ್ವಾನ್ ಕುಟಮ್ ನಾಕಾ, ಭುರ್ಗಿಂ ನಾಕಾತ್ ಮ್ಹಣ್ಚೆಂ ತರ್ ಲಗ್ನಾಚೊ ಸಾಕ್ರಾಮೆಂತ್ ಆಮ್ಕಾಂ ಸಮ್ಜೊಂಕ್ ನಾ ಮ್ಹಣ್ ಜಾಲೆಂ. ಹೆಂಚ್ ಧೋರಣ್ ಆಮ್ಚ್ಯಾ ಆವಯ್-ಬಾಪಾಯ್ನ್ ಘೆತ್‌ಲ್ಲೆಂ ತರ್ ಆಜ್ ಆಮಿಯ್ ಆಸ್ತಿನಾಂವ್!

ಲಗ್ನಾಚ್ಯಾ ಸಾಕ್ರಾಮೆಂತಾಕ್ ಬಳಾಧಿಕ್ ಕರುಂಕ್ ಪವಿತ್ರ್ ಸಭೆಚ್ಯಾ ವ್ಹಡಿಲಾಂಕ್ ವರ್ತಿ ಜವಾಬ್ದಾರಿ ಆಸಾ. ಲಗ್ನಾಕ್ ತಯಾರಾಯೆಚೊ ಕೋರ್ಸ್ ದೀವ್ನ್ ವೊಗೆ ಬಸ್ಚೆ ದೀಸ್ ನ್ಹಯ್ ಹೆ. ಕುಟ್ಮಾ ಆಯೋಗ್ ಆಮ್ಚ್ಯಾ ಫಿರ್ಗಜಾಂನಿ ಆಸಾತ್. ನವ್ಯಾ ಜೊಡ್ಯಾಂಕ್ ಆನಿ ನವ್ಯಾನ್ ಲಗ್ನ್ ಜಾತೆಲ್ಯಾಂಕ್, ಆವಯ್ ಬಾಪಾಯ್ಕ್ ತವಳ್ ತವಳ್ ಎಕ್ಟಾವ್ನ್ ಜೊಕ್ತ್ಯಾ ಆನಿ ಮುಕ್ತ್ ಉಲೊವ್ಪಾಕ್, ಎಕಾಮೆಕಾಕ್ ಸುಖ್-ದೂಕ್ ವಾಂಟುನ್ ಘೆಂವ್ಚ್ಯಾಕ್, ಭಾವಾಡ್ತ್ ಉಚಾರುಂಕ್ ಆವ್ಕಾಸ್ ಮೆಳೊಂಕ್ couples for Christ, family for Christ, youth for Christ ತಸಲ್ಯಾ ಸಂಘಟನಾಂಕ್ ಫಿರ್ಗಜ್ ಮಟ್ಟಾರ್ ಆವ್ಕಾಸ್ ಕರ್‍ನ್ ದೀಜೆ. ಫಕತ್ ವರ್ದಿ ಬರೊವ್ನ್, ವರ್‍ಸಾಕ್ ಏಕ್ ಕಾರ್ಯೆಂ ಕರ್‍ನ್, ಸಂಪನ್ಮೂಳ್ ವೆಕ್ತಿಥಾವ್ನ್ ಭಾಶಣ್ ದಿವೊವ್ನ್ ಮುಗ್ದುಂಚೆಂ ಕಾಮ್ ನ್ಹಯ್ ಹೆಂ. ಹಾಂಗಾ ಭಾವಾಡ್ತ್ ಜಿಯೆಲ್ಲೊ ಜಾಯ್, ಆಪ್ಲ್ಯಾ ಲಗ್ನಾ ಜಿವಿತಾಚೆಂ ಮುಕ್ತ್ ಅನಾವರಣ್ ಜಾಯ್ಜೆ ಮಾತ್ರ್ ನ್ಹಯ್ ಎಕಾಮೆಕಾ ಮಾಗ್ಣ್ಯಾಂತ್ ಆನಿ ನೀಜ್ ರುಪಾರ್ ಆಧಾರ್ ದಿಂವ್ಚೊ ಸಂಬಂದ್ ರುತಾ ಜಾಯ್ಜೆ. ತವಳ್ ಆಪಾಪಿಂಚ್ ಲಗ್ನಾಭೆಸ್ ಜಿವಂತ್ಪಣ್ ಜೊಡ್ತೊಲೊ. ಅಸೊ ಆಮ್ಚೊ ಭರ್ವಸೊ.

ಹ್ಯಾ ಅಂಕ್ಯಾಚ್ಯಾ ಜಾಯ್ರಾತ್‌ದಾರಾಂಕ್, ವಾಚ್ಪ್ಯಾಂಕ್, ಬರೊವ್ಪ್ಯಾಂಕ್ ಆನಿ ಹಿತೈಶಿಂಕ್ ಪಾಸ್ಕಾಂ ಫೆಸ್ತಾಚೆ ಉಲ್ಲಾಸ್. ತುಮ್ಚಿಯ್ ಜಿಣಿ ಸಂತೊಸಾಚಿ, ಸಮೃದ್ಧೆಚಿ ಜಾಂವ್. 

ಬಾಪ್ ಐವನ್ ಸೊಜ್, ಕಾರ್ಮೆಲಿತ್