2023 ಇಸ್ವೆಚ್ಯಾ ಆಖೇರಿಕ್ ಭಾರತಾಚ್ಯಾ ಪಾಂಚ್ ರಾಜ್ಯಾಂನಿ ಜಾಲ್ಲೆಂ ಎಲಿಸಾಂವ್ 2024 ಏಪ್ರಿಲ್-ಮೇ ಮ್ಹಯ್ನ್ಯಾಂತ್ ಚಲೊಂಕ್ ಆಸ್ಚ್ಯಾ ಲೋಕಸಭಾ ಎಲಿಸಾಂವಾಚೆಂ ಸೆಮಿಫೈನಲ್ ತಶೆಂ ಪಿಂತ್ರಾಯಿಲ್ಲೆಂ. ಕರ್ನಾಟಕಾಚಿ ಕೊಂಗ್ರೆಸ್ ಜೀಕ್, ಭಾರತ್ ಜೋಡೊ ಯಾತ್ರಾಚಿ ಯಶಸ್ವಿ ಇಂಡಿಯಾಚೆಂ (I.N.D.I.A) ಉಗಮ್ ಪಾಂಚ್ ರಾಜ್ಯಾಂನಿ ಚಾರ್ ಪುಣೀ ಕೊಂಗ್ರೆಸ್ ಯೆತೆಲೆಂ ತಶೆಂ ರಾಜಕೀಯ್ ಪಂಡಿತಾನಿ ಬೊಲ್ಮೆಂ ಸಾಂಗ್‌ಲ್ಲೆಂ. ಫಲಿತಾಂಶ್ ಯೆತಾನಾ ತೀನ್ ವ್ಹಡ್ ರಾಜ್ಯಾಂನಿ ಸಾಳಕ್ ಫುಲ್ಲೆಂ. ತೆಲಂಗಾಣಾಂತ್ ಹಾತ್ ಜಿಕ್ಲೊ ಆನಿ ಮಿಜೋರಾಮಾಂತ್ ತಾಂಚಿಚ್ ಪ್ರಾದೇಶಿಕ್ ಪಾಡ್ತ್ ಝೋರೋಮ್ ಪೀಪಲ್ಸ್ ಮೂವ್‌ಮೆಂಟ್ (ZPM) ಪಯ್ಲೆಪಾವ್ಟಿಂ ಬಹುಮತ್ ಜೊಡುಂಕ್ ಸಕ್ಲೆಂ. ಮಿಜೋರಾಮ್ ನ್ಯಾಶನಲ್ ಫ್ರಂಟ್ ಆನಿ ಕೊಂಗ್ರೆಸ್ ತವಳ್ ತವಳ್ ಅಧಿಕಾರಾಕ್ ಯೆತಾಲೆ, ಪುಣ್ ಹ್ಯಾ ಪಾವ್ಟಿಂ ZPM ಪಾಡ್ತೆಂತ್ ಹಾಂಕಾಂ ಆಸೆಂಬ್ಲಿ ಅಧಿಕಾರಾಥಾವ್ನ್ ಮುಕ್ತ್ ಕೆಲಾಂ. ಡೆಲ್ಲಿಚೊ ಫೇಕು 3.0 ಪಾವ್ಟಿಂ ಪ್ರಧಾನಿ ಜಾಂವ್ಕ್ ಬಿಜೆಪಿನ್ ನವೊ ಖೆಳ್ ಖೆಳ್ಳಾ. ರಾಜಸ್ತಾನ್, ಮಧ್ಯಪ್ರದೇಶ್ ಆನಿ ಛತ್ತೀಸ್‌ಗಡಾಂತ್ ನವ್ಯಾಚ್ ವೆಕ್ತಿಂಕ್ ಮುಕೇಲ್ ಮಂತ್ರಿ ಕೆಲಾಂ. ಮಾದ್ಯಮಾಂನಿ ಸಯ್ತ್ ಹಿಚ್ ಚರ್ಚಾ. ಹ್ಯಾ ಮದೆಂ 74 ವರ್‍ಸಾಂ ಪ್ರಾಯೆಚೊ ಮಿಜೋರಾಮಾಚೊ ಮುಕೇಲ್ ಮಂತ್ರಿ ಜಾವ್ನ್ ಕಿತೆಂಚ್ ಆವಾಜ್ ಕರಿನಾಸ್ತಾನಾ ಪಾಟಾರ್ ಬಸ್ಲಾ ತೊಚ್ ಶ್ರೀ ಲಾಲ್ದುಹೋಮಾ.

ಪೋರ್ ಮ್ಹಣಸರ್ ಲಾಲ್ದುಹೋಮಾ ಕೋಣ್ ಮ್ಹಳ್ಳೆಂ ಸೊಧುನ್ ಕಾಡುಂಕ್ ಗೂಗಲ್ ಕರಿಜೆ ಆಸ್‌ಲ್ಲೆಂ. ಆತಾಂ ರಾತ್ ಕಾಬಾರ್ ಜಾಯ್ಜೆ ತರ್ ಹ್ಯಾ ವೆಕ್ತಿವಿಶಿಂ ಖೂಬ್ ಒಳೊಕ್ ಜಾಲ್ಯಾ. ಇಂದಿರಾ ಗಾಂಧಿಚ್ಯೆ ರಾಕಣೆ ಜವಬ್ದಾರಿವಿಶಿಂ ಹಾಂವೆಂ ಹಾಚೆವಿಶಿಂ ವಾಚ್‌ಲ್ಲೊ ಉಗ್ಡಾಸ್. ಸೆಕ್ಯುರಿಟಿ ಗಾರ್ಡ್ ಹೆಡ್ಡ್ ಜಾವ್ನಾಸ್ಲೊ ಹೊ, ತ್ಯಾಚ್ ಕೊಂಗ್ರೆಸಾಕ್ ಠಕ್ಕರ್ ದೀವ್ನ್ ಮುಕೇಲ್ ಮಂತ್ರಿ ಕಸೊ ಜಾಲೊ ಮ್ಹಣ್ ಸೊಧ್ನಾಂ ಕೆಲಿಂ. 1972 ಇಸ್ವೆಂತ್ ಮೆಟ್ರಿಕ್ ಪಾಸ್ ಜಾಲ್ಲೊ ಏಕ್ ಚಲೊ ತ್ಯಾಚ್ ವರ್‍ಸಾ ಮಿಜೋರಾಮಾಂತ್ ತವಳ್ಚೊ ಮುಕೇಲ್ ಮಂತ್ರಿ ಸಿಚ್ದುಂಗಾಚೊ ಆಪ್ತ್ ಕಾರ್ಯದರ್ಶಿ ಜಾತಾ. ಪನ್ನಾಸ್ ವರ್‍ಸಾಂ ಉಪ್ರಾಂತ್ ಖಂಯ್ಚ್ಯಾ ಕದೆಲಾಕ್ ಸಲಾಮ್ ಮಾರ್‍ತಾಲೊಗೀ ತ್ಯಾಚ್ ಕದೆಲಾಚೆರ್ ಬಸ್ಕಾ ಘೆತಾ. ಹೆಂ ಕಾಂಯ್ ರಜನಿಕಾಂತಾಚೆಂ ಫಿಲ್ಮ್ ನ್ಹಯ್ ಬಗಾರ್ ಮಿಜೋರಾಮಾತ್ ರಾಜಕೀಯ್ ಕ್ರಾಂತಿ ಹಾಡ್‌ಲ್ಲ್ಯಾ ಆನಿ ವಿಶೇಸ್ ಸಾಧನ್ ಕರ್‍ನ್ ದಾಕಯಿಲ್ಲ್ಯಾ ವೆಕ್ತಿಚಿ ನೀಜ್ ಕಥಾ.

ಮಿಜೋರಾಮಾಚ್ಯಾ ತೌಲ್ಪುಯಿ ಹಳ್ಳೆಚ್ಯಾ ರಯ್ತಾಕುಟ್ಮಾಂತ್ ಫೆಬ್ರೆರ್ 22 ವೆರ್ 1949 ಇಸ್ವೆಂತ್ ಚೊವ್ಗಾ ಭುರ್ಗ್ಯಾಂಪಯ್ಕಿ ನಿಮಾಣೊ ಜಾವ್ನ್ ಜಲ್ಮಲೊ. ಘರಾಂತ್ ಖಾಂವ್ಕ್ ಯೆಂವ್ಚಿ ದುಬ್ಳಿಕಾಯ್. ದುಬ್ಳಿಕಾಯೆಥಾವ್ನ್ ಭಾಯ್ರ್ ಯೇಜೆ ತರ್ ಶಿಕ್ಪಾವರ್ವಿಂ ಮಾತ್ರ್ ಸಾಧ್ ಮ್ಹಣ್ ತಾಣೆಂ ಚಿಂತ್ಲೆಂ ಆನಿ ಖೂಬ್ ಶಿಕ್ಲೊ. ತ್ಯಾ ಕಾಳಾರ್ ಮೆಟ್ರಿಕ್ ಪಾಸ್ ಜಾಲ್ಲೊ ಹಳ್ಳೆಚೊ ಪಯ್ಲೊ ಚಲೊ ಜಾಲೊ ಮಾತ್ರ್ ನ್ಹಯ್, ಚಡಿತ್ ಅಂಕ್ ಜೊಡ್ಲಲೊ ರಾಜ್ಯಾಚೊ ಪಯ್ಲೊ ವಿದ್ಯಾರ್ಥಿ. ಹಿ ವಿಶಯ್ ಮಿಜೋರಾಮ್ ಮುಕೇಲ್ ಮಂತ್ರಿಚ್ಯಾ ದಫ್ತರಾಕ್ ಪಾವ್ಲಿಚ್ ತಾಕಾ ಮುಕೇಲ್ ಮಂತ್ರಿ ದಫ್ತರಾಚೊ ಆಸ್ತ್ ಸಹಾಯಕ್ ಜಾವ್ನ್ ನೇಮಕ್ ಕರ್‍ತಾ. ಇತ್ಲ್ಯೆ ಲ್ಹಾನ್ ಪ್ರಾಯೆರ್ ವ್ಹಡ್ ಜವಾಬ್ದಾರಿ ಕೊಣಾಕ್ ಮೆಳತ್? ಇತ್ಲ್ಯಾರ್ ಲಾಲ್ದುಕ್ ಲೈಫ್ ಸೆಟಲ್ ಕರ್‍ಯೆತೆ ಆಸ್‌ಲ್ಲೆಂ. ಪುಣ್ ತಾಚೆಭಿತರ್ ಹಾಂವೆಂ ಕಿತೆಂ ಕರಿಜೆ, ವ್ಹಡ್ ಕಿತೆಂಯ್ ಆಪ್ಣಾಯ್ಜೆ ಮ್ಹಳ್ಳೊ ಜಿನೊಸ್ ಧೊಸ್ತಾಲೊ. ದೆಕುನ್ ಸಾಂಜೆಚ್ಯಾ ಕೊಲೆಜಿಕ್ ಭರ್‍ತಿ ಜಾವ್ನ್ ಬಿ‌ಎ ಸನದ್ ಜೊಡ್ತಾ. ನಿರಂತರ್ ರಾತ್‌ಭರ್ ಅಭ್ಯಾಸ್ ಕರ್‍ತಾ, ಕೇಂದ್ರಿಯ್ ಲೊಕಾ ಸೆವಾ ಆಯೋಗಾಚಿ ಪರೀಕ್ಶಾ ಬರಯ್ತಾ. ಲಾಲ್ದುಕ್ ಐ‌ಎಸ್ ಸನದ್ ಲಾಬ್ತಾ.

ಐ‌ಎಸ್ ಜಾಲ್ಲೊ ಲಾಲ್ದುಕ್ ಗೊಂಯಾಂತ್ ಜವಾಬ್ದಾರಿ ಮೆಳ್ತಾ. ಹಾಂಗಸರ್ ತಾಕಾ ಹಿಪ್ಪಿಂಚೆ ಕಶ್ಟ್ ಆಸ್‌ಲ್ಲೆ. ಹಿಪ್ಪಿಬರಿ ವೇಸ್ ಪಾಂಗ್ರುನ್ ಅನ್ನಾಡಿ ಡ್ರಗ್ಸ್ ವಿಕ್ತಾಲೆ. ತಾಂಕಾಂ ಹದ್‌ಬಸ್ತೆಕ್ ಹಾಡುನ್ ಗೊಂಯಾಂತ್ ಡ್ರಗ್ಸ್ ದಂದೊ ರಾವಯ್ತಾ. ಇತ್ಲ್ಯಾರ್ ತಾಚೆಂ ಸಾಹಸ್ ದೇಶ್‌ಭರ್ ನಾಂವ್ ಹಾಡುಂಕ್ ಸಕ್ಲೆಂ. ಹಾಚೆಂ ಧಯ್ರ್, ಸಾಹಸ್ ಆನಿ ಕಾಮ್ ಕರ್‍ಚಿ ರೀತ್ ಪ್ರಧಾನಿ ಇಂದಿರಾ ಗಾಂಧಿಕ್ ಮೆಚ್ವಾಲಿ ಆನಿ ಡೆಲ್ಲಿಕ್ ಆಪೊವ್ಣೆ ಲಾಬ್ಲೆಂ. ಪ್ರಧಾನ್ ಮಂತ್ರಿಚ್ಯೆ ರಾಕಣೆಚೆ ಜವಬ್ದಾರಿ ತಾಕಾ ಲಾಬ್ಲಿ. ಥಂಯ್ ಆಸ್ತಾ ವರೇಗ್ ತಾಚೆಂ ಕರ್ತವ್ಯ್ ತಾಣೆಂ ವರ್ತ್ಯೆ ಜವಾಬ್ದಾರೆನ್ ಕೆಲೆಂ. ಲಾಲ್ದು ತ್ಯಾಚ್ ಹುದ್ದ್ಯಾರ್ ಆಸ್‌ಲ್ಲೊ ತರ್ ಇಂದಿರಾ ಗಾಂಧಿಚಿ ಹತ್ತ್ಯಾ ಜಾತಿನಾ. ರಾಜಕೀಯ್ ವರ್ತುಲಾಂತ್ ಅನ್ಭೋಗ್ ಜೊಡ್‌ಲ್ಲೊ ತೊ ರಾಜೀನಾಮೊ ದೀವ್ನ್ ಶೀದಾ ಮಿಜೋರಾಮಾಕ್ ವೆತಾ. ಕೊಂಗ್ರೆಸ್ ಪಾಡ್ತೆಥಾವ್ನ್ ಎಲಿಸಾಂವಾಕ್ ರಾವೊನ್ ಸಲ್ವತಾ. ಪುಣ್ ಇಂದಿರಾ ಗಾಂಧಿಚೊ ಹಾತ್ ತಾಚೆರ್ ಆಸ್‌ಲ್ಲೊ. ಮಿಜೋರಾಮಾಂತ್ ಹಿಂಸಾ ಚಡೊನ್ ಆಸ್‌ಲ್ಲಿ. ಎಂಎನ್‌ಎಫ್ (MNF) ಪಂಗ್ಡಾಚೊ ಮುಕೆಲಿ ಲಾಲ್ದೆಂಗಾ ಲಂಡನಾಂತ್ ರಾವೊನ್ ಮಿಜೋರಾಮ್ ಸ್ವತಂತ್ರ್ ಜಾಯ್ಜೆ ಮ್ಹಣ್ ಪ್ರಚೋದನ್ ದೀವ್ನ್ ಆಸ್‌ಲ್ಲೊ. ತಾಚೆಸಂಗಿ ಸಂಧಾನ್ ಕರ್‍ನ್ ಭಾರತಾಕ್ ಪಾಟಿಂ ಆಪೊವ್ನ್ ಹಾಡುಂಕ್ ಇಂದಿರಾನ್ ಲಾಲ್ದುಕ್ ರಾಯ್‌ಭಾರಿ ಕೆಲ್ಲೊ. ಅಕ್ಟೋಬರ್ 31 ವೆರ್ ಇಂದಿರಾ ಗಾಂಧಿಸವೆಂ ಜಮಾತ್ ಆಸ್‌ಲ್ಲಿ. ದುಕಾಚಿ ಗಜಾಲ್ ಮ್ಹಳ್ಯಾರ್ ತ್ಯಾಚ್ ದೀಸ್ ಸಕಾಳಿಂ ತಿಚಿ ಹತ್ತ್ಯಾ ಜಾಲಿ.

ರಾಜೀವ್ ಗಾಂಧಿ ಕಾಳಾರ್ ಮಿಜೋರಾಮಾಂತ್ ಕೊಂಗ್ರೆಸಾಥಾವ್ನ್ ಲೋಕಸಭಾ ಎಲಿಸಾಂವ್ ಜಿಕೊನ್ ತೊ ಎಮ್‌ಪಿ ಜಾತಾ. ಪುಣ್ ಕೊಂಗ್ರೆಸ್ ಕೇವಲ್ ಥೊಡ್ಯಾ ಮುಕೆಲ್ಯಾಂಚ್ಯೆ ಮುಟಿಂತ್ ಆಸಾ ಆನಿ ಆಪ್ಲ್ಯಾ ದಿಶ್ಟಾವ್ಯಾಥಾವ್ನ್ ಬದ್ಲೊನ್ ಯೆತಾ ತೆಂ ಪಳೆವ್ನ್ 1988 ಇಸ್ವೆಂತ್ ತೊ ರಾಜೀನಾಮೊ ದಿತಾ. ಏಕ್ ಸಂಸದ್ ಜಾವ್ನ್ ಎಕೆ ಪಾಡ್ತೆಥಾವ್ನ್ ವಿಂಚುನ್ ಯೇವ್ನ್ ಪಾಡ್ತೆಕ್ ರಾಜೀನಾಮೊ ದಿಲ್ಯಾರ್ ತೊ ರಾಜಕೀಯ್ ಆಪ್ರಾಧ್. ಕೊಂಗ್ರೆಸ್ ತಾಕಾ ಪಾಡ್ತೆಥಾವ್ನ್ ಅಮಾನತ್ ಕರ್‍ತಾ. ಪಕ್ಶಾಂತರ್ ಕಾಯ್ದ್ಯಾ ಸಕಯ್ಲ್ ಅಮಾನತ್ ಜಾಂವ್ಚ್ಯಾ ದೆಶಾಚೊ ಪಯ್ಲೊ ಸಂಸದ್ ಲಾಲ್ದುಹೋಮಾ. ಲಾಲ್ದು ವೊಗೊಚ್ ರಾವ್ಲೊನಾ. ನವಿ ರೀಜನಲ್ ಪಾಡ್ತ್ ಆಸಾ ಕರ್‍ತಾ; ಮಿಜೋ ನ್ಯಾಶನಲ್ ಫ್ರಂಟ್. 2018 ಇಸ್ವೆಂತ್ “ಝೋರಾಮ್ ನ್ಯಾಶನಲ್ ಪಾರ್ಟಿ” ಮ್ಹಣ್ ನಾಂವ್ ಬದ್ಲಿತಾ. ಎಲಿಸಾಂವಾಂತ್ ಜಿಕ್ತಾ. 2018 ಇಸ್ವೆಂತ್ ZPM ಸವೆಂ ಮೈತ್ರಿ ಕರ್‍ನ್ ಮುಕೇಲ್ ಮಂತ್ರಿ ಜಾತಾ ಮ್ಹಣ್ತಾನಾ ಚುನಾವಣ್ ಆಯೋಗ್ ಮಾನ್ಯತಾ ದೀನಾ. ಅಶೆಂ ಸ್ವತಂತ್ರ್ ಅಭ್ಯರ್ಥಿ ಜಾವ್ನ್ ಎಲಿಸಾಂವಾಂತ್ ರಾವೊನ್ ಜಿಕ್ತಾ. ಇತ್ಲ್ಯಾರ್ zಓP ಕ್ ಚುನಾವಣ್ ಆಯೋಗ್ ತಾಕಾ ಮಾನ್ಯತಾ ದಿತಾ. ಇತ್ಲ್ಯಾರ್ ಪರತ್ ತೊ ತ್ಯೆ ಪಾಡ್ತೆಕ್ ಭರ್‍ತಿ ಜಾತಾ. ಪರತ್ ಪಕ್ಶಾಂತರ್ ಕಾಯ್ದ್ಯಾಚೆಂ ನೀಬ್ ದೀವ್ನ್ ತಾಕಾ ಶಾಸಕ್ ಸ್ಥಾನಾಥಾವ್ನ್ ಅಮಾನತ್ ಕರ್‍ತಾತ್. ಲೋಕಸಭಾ ತಶೆಂ ವಿಧಾನಸಭಾ ಥಾವ್ನ್ ಅಮಾನತ್ ಜಾಲ್ಲೊ ಪಯ್ಲೊ ವೆಕ್ತಿ ಲಾಲ್ದುಹೋಮಾ.

ಸಾಳಿಯಾಂಚೊ ಘೊಂಟೆರ್ ಕಿತ್ಲೆಪಾವ್ಟಿಂ ಕಾಡ್ನ್ ಉಡಯ್ಲ್ಯಾರೀ ಪರತ್ ಪರತ್ ಸಾಳಿಯೊ ಘೊಂಟೆರ್ ಬಾಂದ್ಚೆಬರಿ ಅಮಾನತ್ ಕೆಲ್ಲ್ಯಾ ವಗ್ತಾ ಪರತ್ ಚುನಾವಣಾಂತ್ ರಾವೊನ್ ಜೀಕ್ ಆಪ್ಣಾಯ್ತಾ ಲಾಲ್ದು. ಹ್ಯಾ ಪಾವ್ಟಿಂ ಪೂರ್ಣ್ ಬಹುಮತ್ ತಾಚ್ಯೆ ಪಾಡ್ತೆಕ್ ಮೆಳ್ತಾ. ಒಟ್ಟುಕ್ 47 ಕ್ಷೇತ್ರಾಂನಿ 27 ಕ್ಷೇತ್ರ್ ಹಾಚ್ಯೆ ಪಾಡ್ತೆಕ್ ಮೆಳ್ತಾತ್. ಲಗ್ಬಗ್ ಪನ್ನಾಸ್ ವರ್‍ಸಾಂಚ್ಯಾ ನಿರಂತರ್ ವಾವ್ರಾಚಿ ಜೀಕ್ ಹಿ. ”74 ವರ್‍ಸಾಂಚ್ಯೆ ಹ್ಯೆ ಪ್ರಾಯೆರ್ ಹೆಂ ಸಕ್ಕಡ್ ಜಾಯ್ಜೆಗೀ?” ವಿಚಾರ್‍ತಲ್ಯಾಕ್ 2024 ಇಸ್ವೆಂತ್ ಹಾಚ್ಯಾಕೀ ಡಿಫರೆಂಟ್ ಆಸಾ ಮ್ಹಣ್ತಾ ತೊ. ಜೀವನ್ ಮ್ಹಳ್ಯಾರ್ ಜೀಕ್ ನ್ಹಯ್ ಸಲ್ವಣಿಯ್ ನ್ಹಯ್. ತೆಂ ಏಕ್ ಲಾಂಬ್ ಪಯ್ಣ್. ಹ್ಯಾ ಪಯ್ಣಾಕ್ ಪ್ರಯತ್ನ್ ಮ್ಹಳ್ಳೆಂಚ್ ಇಂಧನ್. ಲೊಕಾಚಿ ಸೆವಾಚ್ ಆನಿ ಮಾಂಯ್‌ಗಾಂವ್ಚೊ ಮೋಗ್‌ಚ್ ಮುಕೇಲ್. ಖಂಯ್ಚ್ಯಾಕೀ ಭಿಯೆನಾಸ್ತಾನಾ, ನಕಾರಾತ್ಮಕ್ ರಿತಿನ್ ಚಿಂತಿನಾಸ್ತಾನಾ ‘ಜಸ್ಟ್ ಡು ಇಟ್’ ಮ್ಹಳ್ಳಿಚ್ ಲಾಲ್ಡುಚಿ ಫಿಲೋಸಫಿ. ನವ್ಯಾ ವರ್‍ಸಾ ತುಮ್ಚಿಂ ಸರ್ವ್ ಸಪ್ಣಾಂ ಜ್ಯಾರಿ ಜಾಂವ್. ಸಗ್ಳೆಂ ಬರೆಂಚ್ ಜಾಂವ್. Just do it!!

✍️ –ಆಲ್ವಿನ್ ದಾಂತಿ, ಪೆರ್ನಾಲ್