ಜೊಡ್‌ಲ್ಲಿ ಮಾಹೆತ್ ಸಮ್ಜೊನ್, ವ್ಹರೊವ್ನ್ ಪಳೆವ್ನ್ ಸಾರ್ಕ್ಯೆ ರಿತಿನ್ ಎಕೆ ಸಂಗ್ತಿಚಿ ವರೊವ್ಣಿ ಕರುಂಕ್ ಎಕ್ಲ್ಯಾಕ್ ಆಸ್ಚಿ ಶಾಥಿ ಜಾವ್ನಾಸಾ ಜಾಣ್ವಾಯ್. ಬೈಬಲಾಂತ್ ಹಾಚೊ ಅರ್ಥ್ ಚಡಿತ್ ಗುಂಡಾಯೆಚೊ. ಹಾಂಗಾಸರ್ ಕೇವಲ್ ಮತಿಚಿ ಸಮ್ಜೊಣಿ ಮಾತ್ರ್ ನ್ಹಯ್, ಬಗಾರ್ ಪ್ರಾಮಾಣಿಕ್ ಆನಿ ತೃಪ್ತಿದಾಯಕ್ ಜಿವಿತ್ ಜಿಯೆಂವ್ಕ್ ದೆವಾನ್ ದಿಂವ್ಚಿ ವಿಶೇಸ್ ಕುರ್ಪಾ. ಕೀರ್ತನ್‌ಗಾರಾಚಿಂ ಉತ್ರಾಂ ‘ಸರ್ವೆಸ್ಪರಾಚಿ ಭಿರಾಂತ್ ಜಾಣ್ವಾಯೆಚೆಂ ಮೂಳ್, ತಿಚೆಪರ್ಮಾಣೆಂ ಜಿಯೆತಾಂತ್ ತಿ ಶಾಣಿಂ’ (ಕೀರ್ತನ್ 111:10). ಹಿ ಜಾಣ್ವಾಯ್ ದೇವ್‌ಭಿರಾಂತೆಚೆಂ ಜಿವಿತ್ ಜಿಯೆಂವ್ಚ್ಯಾಂತ್ ಆನಿ ತಾಚೆ ಉಪದೆಸ್ ಪಾಳ್ಳ್ಯಾಂಚ್ ಆಟಾಪುನ್ ಆಸಾ.

ಸಂಸಾರಿ ಜಾಣ್ವಾಯ್ ಸ್ವ-ಆಸಕ್ತ್, ವಯಕ್ತಿಕ್ ಫಾಯ್ದೊ, ತಾತ್ಕಾಲಿಕ್ ಖುಶಾಲಾಯೆಚೆರ್ ಹೊದ್ವೊನ್ ಆಸಾ. ಹ್ಯಾ ವಿಶ್ಯಾಂತ್ ಜಾಕೊಬ್ ಸಾಂಗ್ತಾ, ‘ಅಸಲಿ ಜಾಣ್ವಾಯ್ ವಯ್ರ್ ಥಾವ್ನ್ ದೆಂವೊ ಯೇನಾ; ತಿ ಸಂಸಾರಿ, ಕೀಳ್ ಸಂಯ್ಬಾಚಿ ಆನಿ ದೆಂವ್ಸಾರಾಚಿ’ (ಜಾಕೊಬ್ 3:15). “ದೆವಾಚಿ ಜಾಣ್ವಾಯ್ ನಿತಳ್, ಸಮಾಧಾನಾಚಿ, ಭೊಳಿ, ಸುಧಾರ್‍ಸುನ್ ವ್ಹರ್‍ತಾ ತಸಲಿ, ದಯಾಳಾಯೆನ್ ಭರ್‍ಲಲಿ, ಬರ್‍ಯಾ ಕರ್‍ನ್ಯಾಂನಿ ಫಳ್ ದಿಂವ್ಚಿ ಆನಿ ಪಕ್ಶಾಪಾತ್ ಆನಿ ಕಪಟಿಪಣ್ ನಾತ್ಲಲಿ ಆನಿ ಕೋಣ್ ಹಿ ಜಾಣ್ವಾಯ್ ದೆವಾಲಾಗಿಂ ಮಾಗ್ತಾ, ದೇವ್ ತಾಂಕಾಂ ಉಬ್ಗನಾಸ್ತಾನಾ ಉದಾರ್ ಮನಾನ್ ದಿತಾ” ಹಿ ದೆವಾಚಿ ಜಾಣ್ವಾಯ್ ಆಪ್ಣಾಂವ್ಕ್ ಆಮಿ ಲ್ಹಾನ್ಶಿಕಾಯೆಚೊ ಶೆಗುಣ್ ರುತಾ ಕರುಂಕ್ ಜಾಯ್. ಸಾಲ್ಮಾಂವ್ ರಾಯಾನ್ ಹಿಚ್ ಜಾಣ್ವಾಯ್ ಖಾಲ್ತಿಕಾಯೆಕ್ ದೆವಾಥಾವ್ನ್ ಮಾಗೊನ್ ಘೆತ್ಲಿ. “ತುಜ್ಯೆ ಪರ್ಜೆಕ್ ನಿತಿನ್ ಚಲೊಂವ್ಕ್ ಆನಿ ಬರ್‍ಯಾ ಆನಿ ವಾಯ್ಟಾಮದ್ಲೊ ಫರಕ್ ಸಮ್ಜೊನ್ ಘೆಂವ್ಕ್ ಗರ್ಜ್ ಆಸ್ಲಲಿ ಜಾಣ್ವಾಯ್ ತುಜ್ಯಾ ಸೆವಕಾಕ್ ದೀ” (1 ರಾಯ್ 3:9).

ಮರಿ ಆಪ್ಲ್ಯಾ ಶೆಗುಣಾಂನಿ ದೆವಾಕ್ ಮಾನ್ವಾಲಿ. ದೆವಾನ್ ಮರಿಯೆಕ್ ವಿಶೇಸ್ ಜಾಣ್ವಾಯೆನ್ ಭರ್‍ಲೆಂ. ಸಾಂ. ಪಾವ್ಲ್ ಮ್ಹಣ್ತಾ, ‘ಕ್ರೀಸ್ತ್‌ಚ್ ದೆವಾಚಿ ಸಕತ್ ಆನಿ ಜಾಣ್ವಾಯ್’ (1 ಕೊರಿಂಥ್ 1:24). ತಾಕಾ ಸ್ವೀಕಾರ್ ಕರುಂಕ್ ದೆವಾಚ್ಯೆ ಖುಶೆಕ್ ತಿಣಿಂ ಖಾಲ್ತಿಮಾನ್ ಘಾಲೊ ದೆಕುನ್ ತಿ ತ್ಯೆ ಜಾಣ್ವಾಯೆಚೆಂ ಸಿಯಾಸಣ್ ಜಾತಾ. ಅಸಲ್ಯೆ ಜಾಣ್ವಾಯೆಚೊ ಸಂಪೂರ್ಣ್‌ಪಣಿಂ ಮೋಗ್ ಕೆಲ್ಲಿ ಭಾವಾಡ್ತಿ ತಿ. ತಿ ಇತ್ಲಿ ವರ್ತಿ, ತಿ ಸಗ್ಳಿಚ್ ದೆವಾಚ್ಯೆ ಕುರ್ಪೆನ್ ಭರ್‍ಲಲಿ (ಲೂಕ್1:28). ತಿಚಿ ಜಿಣಿಚ್ ದೆವಾಚ್ಯಾ ಮೊಗಾಪಾಸತ್ ಭೆಟಯ್ಲಲಿ ಏಕ್ ಕಾಣಿಕ್ ಜಾಲಿ. “ನಜರೆತಾಚಿ ಮರಿ ನವ್ಯಾ ಸೊಲ್ಲ್ಯಾಚಿ ಪಯ್ಲಿ ಭಾವಾಡ್ತಿ ಸ್ತ್ರೀ. ಜಿವಿತ್, ಉಜ್ವಾಡ್ ಆನಿ ಮೊಗಾಚೊ, ಉಗಮ್ ಜಾವ್ನಾಸ್ಚ್ಯಾ ತ್ರೀ‌ಏಕ್ ದೆವಾಚೊ ಅನ್ಭೋಗ್ ಕೆಲ್ಲಿ” ಮ್ಹಣ್ತಾ ಪಾಪಾ ಜುವಾಂವ್ ಪಾವ್ಲ್ ದುಸ್ರೊ. ದೇವ್‌ದುತ್ ತಿಕಾ ಕುರ್ಪೆನ್ ಭರ್‍ಲಲೆ ಮ್ಹಣ್ ಆಪಯ್ತಾನಾ ಹೆಂಚ್ ತಿಚೆಂ ನೀಜ್ ನಾಂವ್ ಮ್ಹಳ್ಳೆಭಾಶೆನ್ ಆಪಯ್ತಾ. ಪುಣ್ ತೊ ತಿಕಾ ತಿಚ್ಯಾ ನಾಂವಾನ್ (ಮರಿ) ಆಪಯ್ನಾ. ದೆಕುನ್ ಹೆಂ ನಾಂವ್ ದೆವಾನ್ ಸೊಡ್ವೊಣೆಚೆಂ ಕಾಮ್ ಸಮರ್ಪುನ್ ದಿಲ್ಲ್ಯಾಚ್ಯೆ ಆವಯ್ಕ್, “ಎಕೆ ಸ್ತ್ರೀಯೆಕ್” ಮ್ಹಣ್ ಅಮಾನತ್ ಕರ್‍ನ್ ದವರ್‍ಲಾಂ (“ಸೊಡ್ವೊಣ್ದಾರಾಚಿ ಮಾತಾ”, ಸಂಖೊ 8). ದುಸ್ರಿ ವಾತಿಕಾನ್ ಸಭಾ ಶಿಕಯ್ತಾ, “ಮರಿ ದೆವಾಚ್ಯಾ ಮೊಗಾಚಿ ಧುವ್ ಆನಿ ಪವಿತ್ರ್ ಅತ್ಮ್ಯಾಚೆಂ ಮಂದಿರ್. ಹೆ ವಿಶೇಸ್ ಕುರ್ಪೆವರ್ವಿಂ ಸರ್ಗಾ ಆನಿ ಸಂಸಾರಾಂತ್ಲ್ಯಾ ರಚ್ಣಾಂ ಭಿತರ್ ತಿ ಬೊವ್ ಸೊಭಿತ್” (ಜನಾಂಗಾಂಚೊ ಉಜ್ವಾಡ್”, ಸಂಖೊ 55).

ಪಾಪಾ ಫ್ರಾನ್ಸಿಸಾಕ್ ಮರಿಯೆಚೆರ್ ವಿಶೇಸ್ ಭಕ್ತ್. ಪಯ್ಲ್ಯಾನ್ ಪಯ್ಲೆಂ ಆಪುಣ್ ವಿಂಚುನ್ ಆಯಿಲ್ಲ್ಯಾ ದಿಸಾ ರೊಮಾಂತ್ ಭಾಗೆವಂತ್ ಮರಿಯೆಚ್ಯಾ ಬಾಸಿಲಿಕಾಕ್ ಭೆಟ್ ದೀವ್ನ್ ಆಲ್ತಾರಿರ್ ಫುಲಾಂ ದವರ್‍ನ್ ಮರಿಯೆಚೊ ಆಧಾರ್ ಆನಿ ರಕ್ಶಣ್ ತಾಣಿಂ ಮಾಗೊನ್ ಘೆತ್ಲೆಂ. ದುಸ್ರ್ಯಾನ್ ಆಮ್ಚ್ಯಾ ಬಾವಾಡ್ತಾಚ್ಯಾ ಪಯ್ಣಾಂತ್ ತಿ ಸದಾಂಚ್ ಆಮ್ಚೆಸಾಂಗಾತಾ ಆಸಾ. ದೆವಾಚ್ಯೆ ಮಾಯೆನ್ ಸಂಸಾರಿ ಹರ್‍ಯೇಕ್ ಕಶ್ಟ್ ಅನ್ಭೋಗ್ ಕೆಲೆ ಆನಿ ಭಾವಾಡ್ತಾಚ್ಯಾ ಪಯ್ಣಾಂತ್ ಉಂಚಾಯೆಕ್ ತಿ ಚಡ್ಲಿ. ಜೆಜುನ್ ಖುರ್‍ಸಾರ್ ಉಮ್ಕಾಳೊನ್ ಆಸ್ತಾನಾ ಆಪ್ಲ್ಯೆ ಆವಯ್ಕ್ ಆಮ್ಚ್ಯಾ ತಾಬೆನ್ ದಿಲ್ಲ್ಯಾನ್ ಆಮ್ಚ್ಯಾ ಭಾವಾಡ್ತಾಚ್ಯಾ ಪಯ್ಣಾಂತ್ ಮರಿಯೆಸಂಗಿ ಆಮ್ಕಾಂ ತುಟೊಂಕ್ ಜಾಯ್ನಾ ತಸಲೊ ಬಾಂದ್ ಆಸಾ ಮ್ಹಣ್ ತೊ ಸಾಂಗ್ತಾ. ೨೦೦೨ ವ್ಯಾ ವರ್‍ಸಾ ಬೆಂತಿಣಿಚೆಂ ದೆವಾಸಾಂವ್ ಸುರು ಕರ್‍ನ್ ೭೫೦ ವರ್‍ಸಾಂ ಸಂಪ್ಚ್ಯಾ ಸಂದರ್ಭಾರ್ ಪಾಪಾ ಜುವಾಂವ್ ಪಾವ್ಲ್ ದುಸ್ರ್ಯಾನ್ “ಹೆಂ ದೆವಾಸಾಂವ್ ಮ್ಹಾಕಾ ಫಾಯ್ದ್ಯಾಚೆಂ ಜಾಲಾಂ. ತುಮ್ಕಾಂಯ್ ತೆಂ ಫಾಯ್ದ್ಯಾಚೆಂ ಜಾಂವ್” ಮ್ಹಳ್ಳೊ ಸಂದೇಶ್ ದಿಲ್ಲೊ. ಮರಿ ಆಮಾ ಸಮೇಸ್ತಾಂಕ್ ಮೇಲ್‌ಫಂಕ್ತ್. ಅತ್ಮೀಕ್ ಜಾಣ್ವಾಯೆನ್ ಮಾಗ್ಣ್ಯಾಚೊ ಶಿಖರ್ ಚಡ್‌ಲ್ಲಿ ತಿ ಆಮ್ಕಾಂ ಏಕ್ ಪ್ರೇರಕಿ. ಲುವಿಸ್ ದೆ ಮೊಂಟ್ ಪೊರ್ಟ್ ಮ್ಹಣ್ತಾ, “ಪಯ್ಲೆಂ ತುಂ ಮರಿಯೆಕ್ ಸೊಧುನ್ ವಚ್. ತಿ ತುಕಾ ಮೆಳ್ತಚ್ ತುಜ್ಯಾ ಜಿವಿತಾಕ್ ನವೊ ಆಕಾರ್ ದೀಂವ್ಕ್ ತಿಕಾ ಸೊಡ್”.

ಜುಲಾಯ್ ಮ್ಹಯ್ನೊ ಕಾರ್ಮೆಲ್ ಮಾಯೆಕ್ ಸಮರ್ಪುನ್ ದಿಲ್ಲ್ಯಾನ್ ಹ್ಯಾ ಅಂಕ್ಯಾಂತ್ ಮರಿ ಜಾಣ್ವಾಯೆಚೆಂ ಸಿಯಾಸಣ್ ಮ್ಹಳ್ಳೊ ವಿಶಯ್ ಘೆತ್ಲಾ. ಬೈಬಲಾಂತ್ ಜಾಣ್ವಾಯೆಚೆಂ ಸಾಹಿತ್ಯ್ ಆಸಾ. ಜಾಣ್ವಾಯೆಚಿಂ ಪಾಂಚ್ ಪುಸ್ತಕಾಂ ಆಸಾತ್. 1. ಮ್ಹಣ್ಣ್ಯೊ, 2. ಜೋಬ್. 3. ಉಪದೇಶಕ್. 4. ಸಿರಾಖ್, 5. ಜಾಣ್ವಾಯ್. ಹ್ಯಾ ಪುಸ್ತಕಾಂಥಾವ್ನ್ ಜಾಣ್ವಾಯೆಕ್ ಸಂಬಂದ್ ಜಾಲ್ಲ್ಯಾ ವಿಶಯಾಂಚೆರ್ ನದರ್ ಘಾಲುಂಕ್ ಆಮಿ ಪ್ರಯತ್ನ್ ಕೆಲಾಂ. ವಾಚುನ್ ತುಮ್ಚಿ ಅಭಿಪ್ರಾಯ್ ಕಳಯಾ.

ತುಮ್ಕಾಂ ಸಮೇಸ್ತಾಂಕ್ ಕಾರ್ಮೆಲ್ ಮಾಯೆಚ್ಯಾ ಫೆಸ್ತಾಚೆ ಉಲ್ಲಾಸ್ ಪಾಟಯ್ತಾಂ.

ಬಾಪ್ ಐವನ್ ಸೊಜ್, ಕಾರ್ಮೆಲಿತ್