1. ತುಮ್ಕಾಂ ಕಾರ್ವಾರ್ ದಿಯೆಸೆಜಿಚೊ ಬಿಸ್ಪ್  ಜಾಂವ್ಕ್ ಆಪವ್ಣೆಂ ಮೆಳ್ತಾನಾ ತುಮ್ಚಿಂ ಪಯ್ಲಿಂ ಚಿಂತ್ನಾಂ ಕಿತೆಂ ಆಸ್ಲಿಂ?

ಹಿ ಖಬರ್ ಆಯ್ಕೊನ್ ವಿಜ್ಮಿತ್ ಜಾಲೊ. ಪಾತ್ಯೆಂವ್ಕ್ ಇಲ್ಲೆ ಕಷ್ಟ್ ಜಾಲೆ ಕಿತ್ಯಾಕ್ ಹಾಂವೆಂ ಹ್ಯಾವಿಶಿಂ ಆಪೇಕ್ಷಾ ಕರುಂಕ್‌ ನಾತ್ಲಿ. ಹ್ಯಾ ಪ್ರಕ್ರಿಯೆ ಪ್ರಕಾರ್ ಮ್ಹಾಕಾ ಜಾಪ್ ದೀಂವ್ಕ್ ಎಕಾ ದಿಸಾಚೊ ಆವ್ಕಾಸ್ ದಿಲ್ಲೊ. ಹೊ ವಾವ್ರ್ ಸುಲಭಾಯೆಚೊ ನ್ಹಯ್, ಜಾಯ್ತಿಂ ಪಂಥಾಹ್ವಾನಾಂ ಭೊಗುಂಕ್ ಆಸ್ತೆಲಿಂ ಮ್ಹಣ್ ಕಳಿತ್ ಆಸ್ಲೆಂ. ತರಿಪೂಣ್ ಪಾಪ್ ಸಾಯ್ಭಾಂನಿ ವಿಚಾರ್‍ಲೆಲಿ ಸೆವಾ ದಿಂವ್ಕ್ ತಯಾರ್ ಜಾಯ್ಜೆಚ್ ಪಡ್ತಾ.

2. ಹ್ಯಾ ನವ್ಯಾ ಗೊವ್ಳಿಕ್ ಸೆವೆಕ್ ಫುಡೆಂ ಸರ್‍ತಾನಾ ತುಮ್ಚೆಂ ಪಾಟ್ಲೆಂ ಯಾಜಕೀ ಜಿವಿತ್ ಕಿತ್ಲೆಂ ಪರಿಣಾಮ್ ಘಾಲ್ತೆಲೆಂ?

ಶಿವಮೊಗ್ಗಾ ದಿಯೆಸಿಜೆಂತ್ 26 ವರ್ಸಾಂ ಯಾಜಕೀ ಜಿಣ್ಯೆಚೊ ಅನ್ಭೋಗ್ ತಶೆಂಚ್ ಜಾಯ್ತೆ ಆವ್ಕಾಸ್ ಲಾಭ್ಲ್ಯಾತ್. ಹಾಂವ್ ಫಿರ್ಗಜ್ ವಿಗಾರ್ ಜಾವ್ನ್ ಆಸ್‌ಲ್ಲೊಂ. ಉಪ್ರಾಂತ್  ಶಿವಮೊಗ್ಗಾಚ್ಯಾ ಸೇಕ್ರೇಡ್ ಹಾರ್ಟ್ಸ್ ಕೊಲೆಜಿಚೊ ಪ್ರಿನ್ಸಿಪಾಲ್ ಜಾವ್ನ್ ಸೆವಾ ದಿಲ್ಯಾ. ಸೈಂಟ್ ಜಾನ್ಸ್ ಮೆಡಿಕಲ್ ಕೊಲೆಜಿಂತ್ ಅಸೋಶಿಯೇಟ್ ದಿರೊಕ್ತೊರ್ ಜಾವ್ನ್ 7 ವರ್ಸಾಂಚಿ ಸೆವಾ ದಿಲ್ಯಾ. ಹ್ಯಾ ಶಿವಾಯ್ 2002 ಥಾವ್ನ್ 2014 ಪರ್ಯಾಂತ್ ಕನ್ಸಲ್ಟರ್ ಜಾವ್ನಾಸ್ಲೊಂ. ಸಾಂಗಾತಾಚ್ ಹಾಂವ್ ಏಕ್ ಸಿನೊದ್ ಸಾಂದೊ. ಹ್ಯಾ ಸರ್ವಾಂನಿ ಹಾಂವೆಂ ಜಾಯ್ತಿ ಜಾಣ್ವಾಯ್ ಜೊಡ್ಲಿ. ಹೆರ್ ಭಿಸ್ಪಾಂ ಸಾಂಗಾತಾ ವಾವ್ರ್ ಕೆಲ್ಲೊ ಅನ್ಭೋಗ್ ಮ್ಹಾಕಾ ಅಸಾ. ಪಯ್ಲೆಂ ಭಿಸ್ಪ್ ಜೆರಾಲ್ಡ್ ಇಸಾಕ್ ಲೋಬೊ ಉಪ್ರಾಂತ್ ಅ.ಮಾ.ದೊ.ಫ್ರಾನ್ಸಿಸ್ ಸೆರಾವೊ ಆತಾಂಚೊ ಶಿವಮೊಗ್ಗಾಚೊ ಭಿಸ್ಪ್. ಬಿಸ್ಪ್ ಇಗ್ನೇಶಿಯಾಸಾ ಸವೆಂ ಥೊಡಿಂ ವರ್ಸಾ ಹಾಂವ್ ಆಸ್‌ಲ್ಲೊಂ. ಹ್ಯಾ ಸರ್ವ್ ಭಿಸ್ಪಾಂಚೊ ಪ್ರಭಾವ್ ಮ್ಹಜೆರ್ ಖಂಡಿತ್ ಜಾವ್ನ್ ಆಸಾ. ದೆವಾದಿನ್ ಭಿಸ್ಪ್ ಇಗ್ನೇಶಿಯಸ್ ಪಿಂಟೊ ಹಾಂಚೆ ಥಾವ್ನ್ ಆಡಳ್ತೆ ಚಲಂವ್ಚಿವಿಶಿಂ ಆನಿ ಭಿಸ್ಪ್ ಜೆರಾಲ್ಡ್ ಇಸಾಕ್ ಲೋಬೊ ಏಕ್ ಬರೊ ಗೊವ್ಳಿ ಆನಿ ತಾಂಚೆ ಥಾವ್ನ್ ಉದರ್ಗತೆ ಖಾತಿರ್ ವಾವ್ರುಂಕ್ ತಶೆಂಚ್ ಭಿಸ್ಪ್ ಫ್ರಾನ್ಸಿಸ್ ಸೆರಾವೊ ಥಾವ್ನ್ ಸರ್ವ್ ಥರಾಂಚಿ ಸೆವಾ ಗೊವ್ಳಿಕ್, ಆಡಳ್ತೆಂ ಆನಿ ಸಾರ್ಕೊ ದಿಷ್ಟಾವೊ ಘೆವ್ನ್ ವಾವ್ರ್ ದಿಂವ್ಚ್ಯಾ ವಿಶ್ಯಾಂತ್ ಹಾಂವ್ ಪ್ರಭಾವಿತ್ ಜಾಲಾಂ. ದಿಯೆಸೆಜಿಚ್ಯಾ ಗೊವ್ಳಿಕ್ ಆಯೋಗಾಚೊ ಸಂಯೋಜಕ್ ಜಾವ್ನ್ ಜಾಯ್ತೊ ಅನ್ಭೋಗ್ ಲಾಭ್ಲಾ.

3. ಕಾರ್ವಾರ್ ದಿಯೆಸೆಜ್ ವಿವಿಧ್ ಪಂಥಾಹ್ವಾನಾಂನಿ ಭರ್‍ಲೆಲಿ. ಹಾಕಾ ತುಮಿ ಕಶೆಂ ತಯಾರ್ ಜಾತಾತ್?

ಪಂಥಾಹ್ವಾನಾಂ ವೈಯಕ್ತಿಕ್ ಜಿಣ್ಯೆಂತ್ ತಶೆಂಚ್ ಸಮಾಜಿಕ್ ಜಿಣ್ಯೆಂತ್ ಸದಾಂಚ್ ಆಸಾತ್. ಸರ್ವ್ ಪಂಥಾಹ್ವಾನಾಂ ಆಮ್ಚ್ಯಾ ಬರ್‍ಯಾಕ್ ಮ್ಹನ್ ಚಿಂತ್ತಾಂ ಆನಿ ಹಾಚೆವರ್ವಿಂ ಜಾಯ್ತೆಂ ಶಿಕ್ತಾಂ.

ಪಯ್ಲ್ಯಾನ್, ಮ್ಹಜ್ಯಾ ಹಾತಾಖಾಲ್ ಆಸ್ಚ್ಯಾ ಸರ್ವ್ ಯಾಜಕ್ ಭಾವಾಂಚಿ ಜವಾಬ್ದಾರಿ ಮ್ಹಜೆರ್ ಯೆತಾ.  ಪಾಟ್ಲ್ಯಾ 5 ವರ್ಸಾಂನಿ ಕಾರ್ವಾರ್ ದಿಯೆಸೆಜಿಕ್ ಭಿಸ್ಪ್ ನಾತ್ಲೆ. ತವಳ್ ಕಿತೆಂ ಘಡ್ಲಾಂ ಮ್ಹಳ್ಳೆವಿಶಿಂ ಚಿಂತ್ಚೆಪ್ರಾಸ್ ಫುಡ್ಲ್ಯಾ ವರ್ಸಾಂನಿ ಕಿತೆಂ ಜಾಯ್ಜೆ ತ್ಯಾವಿಶಿಂ ಚಿಂತ್ತಾಂ. ದಿಯೆಸೆಜಿಚ್ಯಾ ದೇವ್ ಪರ್ಜೆಚೊ ಭಾವಾಡ್ತ್ ಚಡಂವ್ಚೊ, ದಿಯೆಸೆಜಿಚೆಂ ಸರ್ವತೋಮುಖ್ ಬರೆಂಪಣ್ ಆನಿ ಯಾಜಕಾಂಚೆಂ ಬರೆಂಪಣ್, ಸಾಂಗಾತಾಚ್ ಶೈಕ್ಷಣಿಕ್, ಸಾಮಾಜಿಕ್, ಆರ್ಥಿಕ್  ಶೆತಾಂನಿ ಅಭಿವೃದ್ಧಿ ಜಾಂವ್ಚಿ ಗರ್ಜೆಚಿ. ಹ್ಯೆ ದಿಶೆನ್ ಪ್ರಮಾಣಿಕ್ ವಾವ್ರ್ ಕರ್‍ತಾಂ. ತಾಚೆ ಸಾಂಗಾತಾ ಪ್ರಾದೇಶಿಕ್ ಆನಿ ಪ್ರಾಂತ್ರೀಯ್ ಹಂತಾರ್ ಪ್ರಸ್ತುತ್ ಆಸ್ಚೆಂ ೨೨ ಗೊವ್ಳಿಕ್ ಆಯೋಗ್ ಬಳಾಧಿಕ್ ಕರುಂಕ್ ವಾವುರ್‍ತಾಂ.

ಮ್ಹಾಕಾ ಕಾರ್‌ವಾರ್ ದಿಯೆಸೆಜಿಚ್ಯಾ ದೇವ್ ಪ್ರಜೆಚೆರ್ ಸಂಪೂರ್ಣ್ ಭರ್ವಸೊ ಆಸಾ. ಆನಿ ಪ್ರತ್ಯೇಕ್ ಜಾವ್ನ್ ತಾಣಿಂ ಆಜ್ ಮ್ಹಾಕಾ ಭಿಸ್ಪ್ ಜಾವ್ನ್ ಸ್ವೀಕಾರ್ ಕೆಲ್ಲಿ ರೀತ್ ಆನಿ ತಾಂಚೆಂ ಬರೆಂಮನ್, ಫುಡೆಂ ತಾಂಚೊ ಪಾಟಿಂಬೊ ಭರ್ಪೂರ್ ಆಸ್ತಲೊ ಮ್ಹಣ್ ದಾಕಯ್ತಾ. ಆಜ್ ತಾಣಿಂ ಮ್ಹಾಕಾ ಭೆಟ್ ಕರುಂಕ್ ಯೇವ್ನ್ ಪಾಟಯ್ಲಿ ಶಾಬಾಸ್ಕಿ, ತಾಣಿಂ ದಿಲ್ಲೊ ಸ್ವಾಗತ್ ಮ್ಹಾಕಾ ಅನಿಕೀ ಉಮೆದಿನ್ ಮುಕಾರ್ ಸರುಂಕ್ ಪ್ರೇರಣ್. ಪ್ರತ್ಯೇಕ್ ಜಾವ್ನ್ ಕಾರ್ವಾರ್ ದಿಯೆಸೆಜಿಂತ್ ವಾವ್ರ್ ಕರ್‍ಚ್ಯಾ ಯಾಜಕಾಂ ಥಂಯ್ ಆಸ್ಚಿಂ ತಾಲೆತಾಂ, ತಾಂಚೊ ಭಾವಾಡ್ತ್, ಸುಡ್ಸುಡಾಯ್ ಏಕ್ ಬಳ್ವಂತ್ ಕುಟಮ್ ರೂಪಿತ್ ಕರುಂಕ್  ಮ್ಹಾಕಾ ಆಧಾರ್ ಜಾತಲೊ.

4. ಕಾರ್ವಾರ್ ದಿಯೆಸೆಜಿಚ್ಯಾ ಭಾವಾರ್ಥ್ಯಾಂಕ್ ತುಮ್ಚೊ ದಿಷ್ಟಾವೊ ಕಸಲೊ?

ದಿಯೆಸೆಜಿಚ್ಯಾ ಭಾವಾಡ್ಯಾಂಚ್ಯೊ ಮುಳಾವ್ಯೊ ಗರ್ಜೊ ಸಮ್ಜುನ್ ಸಮ್ಜೊನ್ ಘೆವ್ನ್ ಮುಕ್ಲ್ಯಾ ಪಾಂಚ್ ವಾ ಧಾ ವರ್ಸಾಂಕ್ ಏಕ್ ಸಾರ್ಕೊ ದಿಶ್ಟಾವೊ ಘೆವ್ನ್ ಕಾರ್ಯಾಕ್ ದೆಂವ್ತಲೊಂ. ಕಾರ್ವಾರ್ ದಿಯೆಸೆಜ್ ಸಮಾಜಿಕ್ ಆನಿ ಅರ್ಥಿಕ್ ಪರಿಗತೆಂತ್ ವಾಡಾವಳ್ ಜೊಡುನ್ ಯೆಂವ್ಚಿ ದಿಯೆಸೆಜ್.  ಲೊಕಾಕ್ ತಾಂಚ್ಯೊ ಮುಳಾವ್ಯೊ ಗರ್ಜೊ ಆಪ್ಣಾಂವ್ಕ್ ಕಶ್ಟ್ ಆಸಾತ್. ಸೊಮ್ಯಾ ಜೆಜುಚೆಂ ರಾಜ್ ಹ್ಯಾ ಭಾವಾಭಯ್ಣಿಂ ಮಧೆಂ ಜ್ಯಾರಿಯೆಕ್ ಹಾಡುಂಕ್ ಪ್ರತ್ಯೇಕ್ ಮಿಸಾಂವ್ ಆಸಾ.

5. ಕಾರ್ವಾರ್ ದಿಯೆಸೆಜಿಚಿ ಉದರ್ಗತ್ ಖಂಯ್ ಥಾವ್ನ್ ಸುರು ಜಾಯ್ಜೆ ಮ್ಹಣ್ ಚಿಂತ್ತಾತ್? 

ಯಾಜಕ್ ಆನಿ ಲಾಯಿಕ್ ಭಾವಾ-ಭಯ್ಣಿಂ ಥಂಯ್ ಅತ್ಮಿಕ್ ಜಿವಿತಾಚಿ ವೋಡ್ ಚಡಂವ್ಚಿ ಗರ್ಜ್ ಆಸಾ. ಥೊಡ್ಯಾ ಜಾಗ್ಯಾಂನಿ ಶಿಕಪ್ ದಿಂವ್ಚೊ ವಾವ್ರ್ ಜಾಯ್ಜೆ. ಸಮಾಜಿಕ್ ಸೆವಾಕಾರ್ಯಾವಳಿಂಕ್ ಸೂಕ್ತ್ ಜಾಗೊ ನೆಮಿಜೆ.  ಆಶೆಂ ಅತ್ಮಿಕ್ ಆನಿ ಸಮಾಜಿಕ್ ವಾಡಾವಳಿಕ್ ಏಕ್ ಸಾರ್ಕೊ ಫೋಕಸ್ ದಿಂವ್ಚೆ ದಿಶೆನ್ ವಾವ್ರುಂಕ್ ಚಿಂತ್ತಾಂ.

6. “ದೇವ್ ಆಪವ್ಣ್ಯಾಂಚೊ ಬರ್ಗಾಲ್” ಆಜ್‌ಕಾಲ್ ಹರ್ಯೆಕಾ ದಿಯೆಸೆಜಿಂಕ್ ಧೊಸ್ತಾ, ಹ್ಯಾ ದಿಶೆನ್ ತುಮ್ಚಿಂ ಯೋಜನಾಂ ಕಿತೆಂ?

ಕಾರ್ವಾರ್ ದಿಯೆಸೆಜಿಂತ್ ಪ್ರಸ್ತುತ್ ದೇವ್ ಆಪವ್ಣ್ಯಾಕ್ ಬರ್ಗಾಲ್ ಆಸಾ ಮ್ಹಣ್ ಹಾಂವ್ ಮಾಂದಿನಾ. ಹ್ಯೆ ದಿಯೆಸೆಜಿಂತ್ 153 ಯಾಜಕ್ ಆಪ್ಲಿ ಸೆವಾ ದೀವ್ನ್ ಆಸಾತ್. ಹಾಂಗಾಂ ಕಥೊಲಿಕ್ ಲೋಕ್ ಆಪ್ಲೆಂ ಜಿವಿತ್ ದೇವ್ ಭಿರಾಂತೆನ್ ಜಿಯೆತಾ. ತಸಲ್ಯಾ ಕುಟ್ಮಾಂಥಾವ್ನ್ ದೇವ್ ಆಪವ್ಣ್ಯಾಕ್ ಉಣೆಪಣ್ ಆಸ್ಚೆಂ ನಾ ಮ್ಹಣ್ ಮ್ಹಾಕಾ ಭರ್ವಸೊ ಆಸಾ. ಸುರ್ವಿಲ್ಯಾ ಹಂತಾಂನಿ ಭುರ್ಗ್ಯಾಂಕ್ ಉರ್ಭಾ ಆನಿ ಸ್ಪಶ್ಟ್ ದಿಶ್ಟಾವೊ ದಿಂವ್ಚಿಂ ಕಾಮಾಂ ಶಿಬಿರಾಂ ಮುಕಾಂತ್ರ್, ವೆದಿ ಸೆವಕಾಂಚ್ಯಾ ಮೆಳಿಂತ್ ಜಾಯ್ಜೆ. ಸೆಮಿನರಿಸ್ತಾಂಕ್ ಬರಿ ತರ್ಭೆತಿ ಆನಿ ಪಾಟಿಂಬೊ ದಿಂವ್ಕ್ ಹಾಂವ್ ತಯಾರ್ ಆಸಾಂ. 

7. ತುಮಿ ಕಸಲೊ ’ಗೊವ್ಳಿಕ್ ಧ್ಯೇಯ್’ ವಿಂಚುಂಕ್ ಚಿಂತ್ಲಾ?

ಎದೊಳ್ ಮ್ಹಣಾಸರ್ ಕಸಲೊಚ್ ಧ್ಯೇಯ್ ಮತಿಂತ್ ಚಿಂತುಂಕ್ ನಾ. ಕೆದಾಳಾ ಮ್ಹಾಕಾ ಗೊವ್ಳಿ ಬಾಪ್ ಜಾವ್ನ್ ನೆಮಿಯರ್‍ಲೆಲಿ ಖಬರ್ ಮೆಳ್ಳಿ, ಹಾಂವ್ ಚಿಂತುಂಕ್ ಲಾಗ್ಲೊಂ, ಹ್ಯಾ ಸೆವೆಕ್ ಹಾಂವ್ ನಾ ಫಾವೊ ವ್ಯಕ್ತಿ.. ಹಾಂವ್ ಏಕ್ ಸಾದೊ ವ್ಯಕ್ತಿ ಆನಿ ಅಸ್ಕತ್. ತ್ಯಾ ವೆಳಾರ್ ಮರಿಯೆಚಿ ಜಾಪ್ ಮ್ಹಜ್ಯೆ ಮತಿಕ್ ಆಯ್ಲಿ. ತಿಣೆಂ ಉಚಾರ‍್ಲೆಲಿಂ ಉತ್ರಾಂ: ‘ತುಜ್ಯಾ ಸಬ್ದಾ ಪರ್ಮಾಣೆಂ ಮ್ಹಜೆ ಥಂಯ್ ಜಾಂವ್’. ಹಿ ದೆವಾಚಿ ಕಾಕುಳ್ತ್ ಶಿವಾಯ್ ಮ್ಹಜೆ ಆರ್ಹತೆಕ್ ಲಾಗುನ್ ಮೆಳ್’ಲ್ಲೆಂ ಇನಾಮ್ ನ್ಹಯ್.  ಆಜ್ ಹಾಂವ್ ಕಿತೆಂ ಜಾವ್ನಾಸಾ ತಿ ಸಕ್ಕಡ್ ತಾಚಿ ಅಪರಿಮಿತ್ ಕಾಕುಳ್ತ್.  ಹೆರಾಂ ಥಂಯ್ ಹಿಚ್ ಕಾಕುಳ್ತ್ ಮ್ಹಜ್ಯಾ ಮಿಸಾವಾಂತ್ ದಾಕಯ್ಜೆಯ್ ಮ್ಹಳ್ಳಿ ಮ್ಹಜಿ ಆಶಾ. ಬರೆಂ ವಾ ವಾಯ್ಟ್, ಸರ್ವಸ್ವ್ ದೆವಾಚ್ಯಾ ಹಾತಾಂತ್ ಹಾಂವ್ ಸಮರ್ಪಿತಾಂ.

8. ಪಾಪಾ ಫ್ರಾನ್ಸಿಸಾಚ್ಯಾ’ ಸರ್ವಾಂಕ್ ಸಾಂಗಾತಾ ಘೆವ್ನ್ ಚಲ್ಚಾ ಪವಿತ್ರ್ ಸಭೆವಿಶಿಂ ತುಮ್ಚಿ ಅಭಿಪ್ರಾಯ್ ಕಿತೆಂ? ಹೆಂ ಚಿಂತಪ್ ಕಾರ್ಯಗತ್ ಕರುಂಕ್ ತುಮ್ಚಿ ಯೆವ್ಜಣ್ ಕಿತೆಂ?

ಪಾಪಾ ಫ್ರಾನ್ಸಿಸಾಚ್ಯಾ ಸಕ್ಡಾಂಕ್ ಸಾಂಗಾತಾ ಘೆವ್ನ್ ಚಲ್ಚ್ಯಾ ಸಿನೊದಾವಿಶಿಂ ಸಾಂಗ್ಚೆಂ ತರ್- ಹೆಂ ಮ್ಹಜ್ಯಾ ಕಾಳ್ಜಾಕ್ ಲಾಗ್ಶಿಲೆಂ ಚಿಂತಪ್. ಪಾಪಾ ಫ್ರಾನ್ಸಿಸಾನ್ ಸಿನೊದಾವಿಶಿಂ ಯೋಜನ್ ಹಾತಿಂ ಘೆತಾನಾಂ ಮ್ಹಾಕಾ ಆನಿ ಆಪೊಸ್ತಲಿಕ್ ಕಾರ್ಮೆಲ್ ಭಯ್ಣ್ ಎವ್ಲಿನ್ ಹಿಕಾ ದಿಯೆಸೆಜಿಚೆ ಥಾವ್ನ್ ಹ್ಯಾ ಯೋಜನಾಚೆ ಪ್ರಮುಖ್ ಪಾತ್ರ್ ಘೆಂವ್ಕ್ ಜವಾಬ್ದಾರಿ ಮೆಳ್‌ಲ್ಲಿ. ಹ್ಯಾ ವಿಶಿಂ ಧಾ ಪಾನಾಂ ಆಟಾಪ್ಲೆಲಿ ಸಮೀಕ್ಞಾ ಕರುಂಕ್ ಆಸ್ಲಿ. ಹಿ ಸಮಿಕ್ಶಾ ಸಂಸಾರಾನ್ ಹರ್ ಕೊನ್ಶಾಂನಿ ಜಾಲ್ಲಿ ಆಸಾ. ಅಸಲೆಂ ಏಕ್ ಮೇಟ್ ಪಾಪಾ ಫ್ರಾನ್ಸಿಸಾನ್ ಕಾಡ್’ಲ್ಲೆಂ ನಿಜಾಯ್ಕಿ ಮೆಚ್ವಣೆಚೆಂ.

ಲ್ಹಾನ್ ಭುರ್ಗ್ಯಾಂ ಥಾವ್ನ್, ಯುವಜಣ್, ಮಧ್ಯಮ್ ಪ್ರಾಯೆಚಿಂ, ಪ್ರಾಯ್ವಂತಾಂ, ಮಾಲ್ಘಡ್ಯಾಂಕ್ ಸಾಂಗಾತಾ ಘೆವ್ನ್ ಮಿಸಾಂವ್ ವಾವ್ರ್ ಜಾಯ್ಜೆ.  ಹ್ಯಾ ವಿಶ್ಯಾಂತ್ ಹಾಂವ್ ವರ್ತ್ಯಾ ಸಂತೊಸಾನ್ ಉಗ್ತ್ಯಾ ಮನಾನ್ ಮ್ಹಜೊ ವಾವ್ರ್ ದಿತೊಲೊಂ.

ಲೌಕಿಕ್ ಶಿಕಾಪ್

ಗೊವ್ಳಿಕ್ ಸೆವಾ

ಇಗರ್ಜ್‌ಮಾತೆಕ್ ಸಂಬಂಧ್ ಜಾಲ್ಲ್ಯೊ ಜವಬ್ದಾರಿ

ಗೊವ್ಳಿಕ್, ಶೈಕ್ಷಣಿಕ್ ಆನಿ ಸಮಾಜಿಕ್ ಕೇತ್ರಾಂನಿ ಜಾಯ್ತೊ ಅನ್ಭೋಗ್ ತಾಣಿಂ  ಜೊಡ್ಲಾ.

✍️ ಸಂದರ್ಶನ್: ಬಾಪ್ ನೆಲ್ಸನ್ ಪಿಂಟೊ