📰 ಯುಪಿ, ಮಾರ್ಚ್ 14: ದುಬ್ಳ್ಯಾ ದಲಿತಾಂಕ್ ಭುಲವ್ನ್ ಮತಾಂತರ್ ಕರ‍್ತಾತ್ ಮ್ಹಳ್ಳ್ಯಾ ಆರೊಪಾಚೆರ್ ಹಿಂದೂ ಮತೀಯ್ ವಾದಿಂಚ್ಯಾ ವೊತ್ತಾಯೆಕ್ ಲಾಗೊನ್ ಉತ್ತರ್ ಪ್ರದೇಶಾಂತ್ ಬಾಪ್ ಡೊಮಿನಿಕ್ ಪಿಂಟೊ ಆನಿ ಧಾ ಜಣಾಂ ಕ್ರಿಸ್ತಾಂವಾಂಕ್ ಪೆಬ್ರವರಿ 5 ತಾರಿಕೆರ್ ಕಯ್ದ್ ಕರ‍್ನ್ ಎಕಾ ಮ್ಹಯ್ನ್ಯಾ  ಉಪ್ರಾಂತ್  ಮ್ಹಣ್ಜೆ ಮಾರ್ಚಾಚಾ 12 ತಾರಿಕೆರ್ ಜಾಮೀನ್ ಲಾಭ್ಲ್ಯಾ ಮ್ಹಣ್ ಲಕ್ನೊಚೊ ಬಿಸ್ಪ್ ಜೆರಾಲ್ಡ್ ಜೋನ್ ಮತಾಯಸಾನ್ ಕಳಯ್ಲಾಂ.

ಬಾಪ್ ಡೊಮಿನಿಕ್ ಪಿಂಟೊ ಮುಳಾನ್ ಮಂಗ್ಳುರ್ ಬಜ್ಪೆಚೊ, ಲಕ್ನೊ ದಿಯೆಸೆಜಿಂತ್ ಯಾಜಕ್ ಜಾವ್ನ್ ದಿಯೆಸೆಜಿಚ್ಯಾ ಗೊವ್ಳಿಕ್ ಕೇಂದ್ರಾಂತ್ ಸೆವಾ ದೀವ್ನ್ ಆಸ್ಲೊ.

2017 ಇಸ್ವೆ ಥಾವ್ನ್ ಉತ್ತರ್ ಪ್ರದೇಶಾಂತ್ ಯೋಗಿ ಆದಿತ್ಯನಾಥ್ ಮುಕೆಲ್ ಮಂತ್ರಿ ಜಾಲ್ಯಾ ಉಪ್ರಾಂತ್ ಕ್ರಿಸ್ತಾಂವಾಂಚೆರ್ ಫಟ್ಕೆರೆ ಆರೋಪ್ ಆನಿ  ಹಲ್ಲೆ ಚಡುನ್ಂಚ್ ಆಯ್ಲ್ಯಾತ್. ಬಾಪ್ ಡೊಮಿನಿಕ್ ಪ್ರತ್ಯಕ್ಷ್ ಆರೋಪಿ ನ್ಹಯ್ ತರೀ ಕೇವಲ್ ಘಡ್ಪಾಂಚೆರ್ ಆಧಾರಿತ್ ಉಭೊ ಕೆಲ್ಲೊ ಆರೋಪ್ ಹೊ ಶಿವಾಯ್ ಹಾಂತುನ್  ಕಿತೆಂಚ್ ಸತ್ ನಾ ಮ್ಹಣ್ ದಿಯೆಸೆಜಿಚೊ ಚಾನ್ಸಲರ್ ಬಾಪ್ ಡೊನಾಲ್ಡ್ ಡಿಸೋಜಾನ್ ಮಾಧ್ಯಮಾಕ್ ಕಳಯ್ಲಾಂ.