📰ಜೂನ್.06: ಡೆಲ್ಲಿ ಕೊಡ್ತಿನ್ ಮೆಯಾಚ್ಯಾ 28 ವೆರ್ ಏಕ್ ಆದೇಶ್ ದಿಲೊ: ’ಅಲ್ಪ್ ಸಂಖ್ಯಾತ್ ಶಾಳಾಂನಿ ಖಾಲಿ ಪಡ್ಲಲ್ಯಾ ಹುದ್ದ್ಯಾಂಕ್, ಜಾಂವ್ ಪ್ರಾಂಶುಪಾಲ್ ಆನಿ ಶಿಕ್ಶಕಾಂ, ಜಾಯ್ ಪುರ್ತಿ ಆರ್ಹತಾ ಆನಿ ಅನ್ಭವ್ ಆಸ್ಲಲ್ಯಾಂಕ್, ನೇಮಕ್ ಕರ್‍ಚೆಂ ಹಕ್ಕ್ ತ್ಯಾ ಸಂಸ್ಥ್ಯಾಚೆಂ ಆಸೊನ್, ಹಾಚೆರ್ ಕೊಣೆಂಚ್ ನಿರ್ಬಂಧ್ ಹಾಡುಂಕ್ ಜಾಯ್ನಾ.’ ಡೆಲ್ಲಿ ತಮಿಳ್ ಶಿಕ್ಪಾ ಸಮಿತಿನ್ ದಿಲ್ಲ್ಯಾ ದುರಾಚೆಂ ಪರಿಶೀಲನ್ ಕರ್‍ನ್, ’ಅಸಲ್ಯಾ ನೆಮಕ್ಪಣಾಂಕ್ ಸರ್ಕಾರಾಚಿ ಮುಂಗಡ್ ಪರ್ವಣ್ಗಿ ಗರ್ಜ್ ನಾ’, ಮ್ಹಣುನ್ ಜಸ್ಟಿಸ್ ಸಿ. ಹರಿ ಶಂಕರ್ ಹಾಣಿಂ ವಾಕ್ಮುಲ್ ದಿಲಾಂ. ನ್ಯಾಯ್ ವಿಚಾರುನ್ ಗೆಲ್ಲಿ ’ಡೆಲ್ಲಿ ತಮಿಳ್ ಶಿಕ್ಪಾ ಸಮಿತಿ’, ಡೆಲ್ಲಿಚ್ಯಾ ತಮಿಳ್ ಉಲವ್ಪಿ ಪರಿಸರಾಂತ್ ಸಾತ್ ಪದ್ವೆ ಪೂರ್ವ್ ಶಾಳಾಂ ಚಲೊವ್ನ್ ಆಸಾ.

ಅಲ್ಪಸಂಖ್ಯಾತ್ ಶಿಕ್ಷಣ್ ಸಂಸ್ಥ್ಯಾಂನಿ ಸಿಬ್ಬಂದಿಕ್ ಸರ್ಕಾರಾಚಿ ಪರ್ವಣ್ಗಿನಾಸ್ತಾನಾ ನೇಮಕ್ ಕರ್‍ಯೆತ್ ಮ್ಹಳ್ಳೊ ಡೆಲ್ಲಿ ಹೈಕೊರ್ಟಾಚೊ ಆದೇಶ್ ಭಾರತೀಯ್ ಇಗರ್ಜ್‌ಮಾತೆನ್ ಸ್ವಾಗತ್ ಕೆಲಾ. ಭಾರತೀಯ್ ಬಿಸ್ಪಾ ಮಂಡಿಳಿಚೊ  ಶಿಕ್ಷಣ್ ಆನಿ ಸಾಂಸ್ಕೃತಿಕ್ ಕಾರ್ಯದರ್ಶಿ  ಬಾಪ್ ಮರಿಯಾ ಚಾರ್ಲ್ಸ್ ಅಂತೊನಿ ಸ್ವಾಮಿನ್ ಹೊ ಏಕ್ ಶ್ರೇಷ್ಟ್ ಆದೇಶ್ ಮ್ಹಣ್ ಸಂತೊಸ್ ವೆಕ್ತ್ ಕೆಲಾ. 

ಭಾರತಾಚೆಂ ಸಂವಿದಾನಾನ್ ವಿವಿಧ್ ಭಾಷೆಚಾ ತಶೆಂಚ್ ಅಲ್ಪಸಂಖ್ಯಾತ್ ಧಾರ್ಮಿಕಾಂಕ್ ತಾಂಚಾ ಸಮುದಾಯಾಂತ್ ಶಿಕ್ಷಣ್ ಸಂಸ್ಥೆ ಸ್ಥಾಪಿತ್ ಕರ್‍ನ್ ಚಲಂವ್ಕ್ ಪರ್ವಣ್ಗಿ ದಿತಾ. ರಾಜ್ಯಾಚಾ ಶಿಕ್ಪಾ ಸೆವೆಕ್ ಅಸಲೆ ಸಂಸ್ಥೆ ಆಧಾರ್ ದಿತಾತ್ ಜಾಲ್ಲ್ಯಾನ್ ಸರ್ಕಾರ್ ಅಲ್ಪ್ ಸಂಖ್ಯಾತ್ ಶಿಕ್ಪಾ ಸಂಸ್ಥ್ಯಾಂಕ್ ಸಾಂಬಾಳ್ ತಶೆಂಚ್ ಇತರ್ ನಿರ್ವಹಣ್ ಕಾರ್ಯಕ್ ದುಡ್ವಾ ಕುಮೊಕ್ ದಿತಾ. ಹ್ಯಾ ಕಾರಣಾ ಖಾತಿರ್ ತವಳ್ತವಳ್ ತಾಂಚ್ಯಾ ಶಾಳಾಚ್ಯಾ ವಿವಿಧ್ ನೆಮಕ್ಪಣಾಂನಿ ಮೆತೆರ್ ಜಾಂವ್ಚೆಂ ಆನಿ ಆಪ್ಲಿ ಹಿತಾಸಕ್ತ್ ರಾಕ್ಚ್ಯಾಂಕ್ ಹುದ್ದೆ ದಿಂವ್ಕ್ ಪ್ರಭಾವ್ ಘಾಲ್ಚೆಂ ಚಲ್ತಾಲೆಂ. ರಾಜ್ಯ್ ಶಿಕ್ಷಣ್ ಸಂಸ್ಥ್ಯಾಚೊ ನಿರ್ದೇಶಕ್ ಖಾಲಿ ಆಸ್‌ಲ್ಲ್ಯಾ 4 ಪ್ರಿನ್ಸಿಪಾಲ್ ಆನಿ 108 ಶಿಕ್ಷಕಾಂಚಾ ಹುದ್ದ್ಯಾಕ್ ನೇಮಕ್ ಕರುಂಕ್ ಪಾಟಿಂ ಸರ್‌ಲ್ಲ್ಯಾ ವೆಳಾರ್ ಡೆಲ್ಲಿ ತಮಿಳ್ ಶಿಕ್ಪಾ ಸಮಿತಿ ಕೊಡ್ತಿಕ್ ಗೆಲ್ಲಿ. ಆತಾಂ, ಶಿಕ್ಷಣ್ ಸಂಸ್ಥ್ಯಾಚಾ ನಿದೇರ್ಶಕಾಂಚಿ ಪರ್ವಣ್ಗಿನಾಸ್ತಾಂ ಜೊಕ್ತ್ಯಾ ವಕ್ತಿಂಕ್ ನೇಮಕ್ ಕರ್‍ಚೆಂ ಅಲ್ಪ್ ಸಂಖ್ಯಾತಾಂಚೆಂ ಹಕ್ಕ್ ಕೊಡ್ತಿನ್ ಉಕಲ್ನ್ ಧರ್‍ಲಾಂ. 

“ಸಿಬಂದ್ದಿ ನೇಮಕ್ಪಣಾ ವಿಶಿಂ ರಾಜ್ಯ್ ಸರ್ಕಾರ್ ಚಡಿತ್ ದಬಾವ್ ಘಾಲ್ಲ್ಯಾನ್ ಅನುದಾನಿತ್ ಇಗರ್ಜೆ ಶಾಳಾಂಚಿಂ ದಾರಾಂ ದಾಂಪಿಜೆ ಪಡ್ಲಿಂ. ಪುಣ್ ಕೊಡ್ತಿಚೊ ಹೊ ಆದೇಶ್ ಇಸ್ಕೊಲಾಚೆಂ ಮಟ್ಟ್ ಆನಿ ನಯ್ತಿಕ್ ಹಕ್ಕ್ ಉಕಲ್ನ್ ಧರುಂಕ್ ಆವ್ಕಾಸ್ ದಿತಾ. ಪ್ರಿನ್ಸಿಪಾಲ್ ಆನಿ ಟೀಚರಾಂಕ್ ವಿಂಚುನ್ ಕಾಡ್ಚೆಂ ಸ್ವಾತಂತ್ರ್ ಲಾಬ್ಲೆಂ ತರ್ ಮುಕ್ಲ್ಯಾ ಸಮಾಜೆಕ್ ಬರಿಂ ಮೌಲ್ಯಾಂ ಉಕಲ್ನ್ ಧರುಂಕ್ ಸಾಧ್ಯ್ ಆಸಾ” ಮ್ಹಣ್ ಬಾಪ್ ಮರಿಯಾ ಚಾರ್ಲ್ಸ್ ಹಾಣಿಂ ಕಳಯ್ಲಾಂ.

ಡೆಲ್ಲಿ ಕೋರ್ಟಾಚೊ ಹೊ ಆದೇಶ್ ಡೆಲ್ಲಿಚಾ ರಾಜ್ಯಾಕ್ ಮಾತ್ರ್ ಲಾಗು ಜಾತಾ. ಪೂಣ್ ಭಾರತಾಚ್ಯಾ ಹೆರ್ ರಾಜ್ಯಾಂನಿ  ಅಲ್ಪ್ ಸಂಖ್ಯಾತ್ ಶಿಕ್ಪಾ ಸಂಸ್ಥ್ಯಾಂಕ್ ಅಸಲೊ ಅನ್ಯಾಯ್ ಜಾಲ್ಯಾರ್ ಹ್ಯಾ ವ್ಹಯ್ಲ್ಯಾ ಆದೆಶಾಕ್ ಮಾರ್ಗದರ್ಶಿ ಜಾವ್ನ್ ಘೆವ್ಯೆತ್.