ವಿಗ್ಯಾನಾ ಪ್ರಕಾರ್ ಮಾಂಕ್ಡಾಥಾವ್ನ್ ಜಾಲ್ಲೊ ಮನಿಸ್ ಆಪ್ಲ್ಯಾ ದಿಸ್ಪೊಡ್ತ್ಯಾ ಗ್ರಾಸಾಖಾತಿರ್ ದೆಸಾಂತರ್ ಭೊಂವ್ತಾಲೊ. ತವಳ್ ದಿಸ್ಪೊಡ್ತೊ ಗ್ರಾಸ್ ಮ್ಹಳ್ಯಾರ್ ಆತಾಂಚೆಬರಿ GIP, EMI, Premium ಭರುಂಕ್ ನ್ಹಯ್, ಬಗಾರ್ ಫಕತ್ ಪೊಟಾ ಭುಕೆಖಾತಿರ್ ಗಾಂವಾಥಾವ್ನ್ ಗಾಂವ್ ವಾ ರಾನಾಂಥಾವ್ನ್ ರಾನ್ ಭೊಂವ್ತಾಲೊ. ಹೆರ್ ಮನ್ಜಾತಿಂಪಯ್ಕಿ ಮನಿಸ್ ಇಲ್ಲೊ ಚಡ್‌ಚ್ ಬುದ್ವಂತ್ ಜಾಲ್ಲ್ಯಾನ್ ಮನ್ಜಾಂತಿಕ್ ಧರ್‍ನ್ ತಾಣೆಂ ಆಪ್ಲೊ ಫಾಯ್ದೊ ಉಟೊಂವ್ಕ್ ಸುರು ಕೆಲೊ. ಎಕ್‌ಚ್ ಜಾಗ್ಯಾರ್ ರಾವೊನ್ ಸುರು ಕೆಲ್ಲಿ ವಸ್ತಿ ಗಾಂವ್ ಜಾವ್ನ್ ಪರಿವರ್ತನ್ ಜಾಲೆ. ಎಕಾಮೆಕಾ ವಸ್ತುಂಚೊ ವಿನಿಯೋಗ್ (Barter System) ಮುಕಾರುನ್ ಪಯ್ಶಾಂಚೊ ಉಗಮ್ ಜಾಲೊ. ಮನ್ಜಾತಿಂಚ್ಯಾ ಚಾಂಬ್ಡ್ಯಾಥಾವ್ನ್ ಧರ್‍ನ್ ಆಜ್ Online ವಾ Top Pay ಚ್ಯಾ ಆಧುನಿಕ್ ವೆವಸ್ಥೆಕ್ ಆಮಿ ಪಾವ್ಲ್ಯಾಂವ್. ಅಶೆಂ ಪಯ್ಶಾಂಚೆಂ ಅಸ್ತಿತ್ವ್ ಜಾಯ್ತ್ಯಾ ಹೆರ್ ಸಂಗ್ತಿಂಕ್ ಜಲ್ಮ್ ದಿತಾ. ವಿಟಮಿನ್ ‘M’= (Money) ಜಿಯೆಂವ್ಕ್ ಬೊವ್ ಗರ್ಜೆಂಚೆಂ ಜಾಲ್ಲೆಂಚ್ ಜಿಣಿಯೆಶಯ್ಲೆಂತ್ ಬದ್ಲಾವಣ್ ಸುರು ಜಾಲಿ. ಆಪ್ಲೆಂ ಪೋಟ್ ಭರುಂಕ್ ಸುರು ಕೆಲ್ಲಿ ವೃತ್ತಿ ಕುಟಮ್, ಘರ್ ಆನಿ ಘರಾಣೆಂ ಬಾಂದ್ಚ್ಯಾಂಕ್ ಚಡ್ ಆನಿ ಚಡ್ ಮಹತ್ವಾಚಿ ಜಾಂವ್ಕ್ ಪಾವ್ಲಿ. ಅವಿಭಕ್ತ್ ಕುಟ್ಮಾಶಯ್ಲಿ, ಹಾಂವ್-ಮ್ಹಜೆಂ ಕುಟಮ್, ಮ್ಹಜಿಂ ಭುರ್ಗಿಂ ಬಾಳಾಂ ಮ್ಹಣ್ ವಿಭಕ್ತ್ ಕುಟ್ಮಾಶಯ್ಲೆಕ್ ವೇಂಗ್ ಮಾರುಂಕ್ ಲಾಗ್ಲಿ. ಆಧುನಿಕತಾ ವಾಡೊನ್ ಆಯ್ಲಿ, ಸಂಪ್ರದಾಯ್-ರೀತ್ ರಿವಾಜಿ ಪಯ್ಸ್ ಜಾಲ್ಯೊ. ‘’Live to survive another day’ ಮ್ಹಳ್ಳ್ಯೆ ಸಾಂಗ್ಣೆಬರಿ ಜಿಣಿಯೆ ಶಯ್ಲಿ ‘ಆಮಿ ಆನಿ ಆಮ್ಚ್ಯಾ’ ಕುಟ್ಮಾಥಾವ್ನ್ ‘ಹಾಂವ್ ಆನಿ ಮ್ಹಜೆಂ ಜಿವಿತ್’ (Me, Myself & I) ಜಾಂವ್ಕ್ ಪಾವ್ಲಿ. ಹ್ಯಾ ಮದೆಂಯ್ ಯುರೋಪ್ ತಸಲ್ಯಾ ಆಧುನಿಕ್ ರಾಶ್ಟ್ರಾಂಚಿ ಜಿಣಿಯೆಶಯ್ಲಿ ಚಡ್ ಆನಿ ಚಡ್ ರಿತಿನ್ ಪ್ರಭಾವಿತ್ ಜಾಲ್ಯಾ ಮ್ಹಳ್ಯಾರ್ ಚೂಕ್ ನಾ.

ಕ್ಷಮಾ ಬಿಂದು ಮ್ಹಳ್ಳ್ಯೆ 24 ಪ್ರಾಯೆಚ್ಯೆ ತರ್ನಾಟ್ಯೆ ಚಲಿಯೆನ್ ಸ್ವತಾಲಾಗಿಂ ಕಾಜಾರ್ ಜಾವ್ನ್ ‘India First Self-Proclaimed Sologamist’ ಮ್ಹಣ್ ಸಗ್ಳ್ಯಾ ಸಂಸಾರಾನ್ ಏಕ್ ಪಾವ್ಟಿಂ ತಾಚೆಶಿಂ ತೀಳ್ನ್ ಪಳೆಂವ್ಚೆಬರಿ ಜಾಲೆಂ. ಹ್ಯಾ ಕಾಜಾರಾಂತ್ ಕ್ಷಮಾ ಬಿಂದು ಸಾಮಾನ್ಯ್ ಹೊಕ್ಲೆಭಾಶೆನ್‌ಚ್ ಸೊಭೊನ್ ಹಿಂದೂ ಸಂಪ್ರದಾಯಾಚ್ಯಾ ಆಚರಣಾಭಾಶೆನ್ ಹಳ್ದಿ-ಮೆಹೆಂದಿ ತಸಲ್ಯೊ ರಿವಾಜಿ ಮಾತ್ರ್ ನ್ಹಯ್, ಸಪ್ತಪದಿ ಗುಡ್ಡಾವ್ನ್ ಸಿಂಧೂರ್ ಸಯ್ತ್ ಆಪ್ಣಾಕ್‌ಚ್ ತಾಣೆಂ ಘಾಲ್ಲೆಂ.. ಹಾಚೆಸಾಂಗಾತಾ ಎಕ್ಲೆಂಚ್ ಹನಿಮೂನಾಕ್ ಸಯ್ತ್ ವಚೊನ್ ಸಮಾಜಿಕ್ ಮಾದ್ಯಮಾಂನಿ ಜಾಯ್ತಿ ಪಬ್ಲಿಸಿಟಿ ತಾಣೆಂ ಆಪ್ಣಾಯ್ಲಿ. ಥೊಡ್ಯಾ ದಿಸಾಂ ಆದಿಂ ಇನ್‌ಸ್ಟಾಗ್ರಾಮಾರ್ ಆಪ್ಲಿ ಪಯ್ಲಿ ಲಗ್ನಾ ಜುಬ್ಲೆವ್ ತಸ್ವೀರ್ ತಾಣೆಂ ವಾಂಟುನ್ ಘೆತ್ಲ್ಯಾ. ಹೆ ನಾಟಕ್ ಪಳೆಯಿಲ್ಲಿಂ ಜಾಯ್ತಿಂ ಅವಿವಾಹಿತ್ ಯುವಜಣಾಂ ಆಪ್ಲ್ಯಾ ಘರಾಂನಿ ಕಾಜಾರಾಚಿ ಖಬರ್ ಕಾಡ್ತಾನಾ ಆಮಿ ಕ್ಷಮಾ ಬಿಂದು ಭಾಶೆನ್‌ಚ್ ಜಾತಾಂವ್ ಮ್ಹಣ್ ಭೆಶ್ಟಾಯ್ತಾತ್ ಕಂಯ್!

ಶಿಕಪ್-ಫುಡಾರ್ ಮ್ಹಣ್ ಕುಟಮ್-ಗಾಂವ್ ಸಾಂಡುನ್ ಪರ್ಗಾಂವಾಕ್ ಗೆಲ್ಲಿ ಯುವಪಿಳ್ಗಿ ಥಂಯ್ಚ್ಯೆ ಜಿಣಿಯೆಶಯ್ಲೆಕ್ ತುರ್ತಾನ್ ವೆಂಗ್ಚೆಂ ಆಮಿ ಪಳೆತಾಂವ್. ಎಕಾ ಫಾಂತ್ಯಾರ್ ಕಾಮಾಕ್ ಗೆಲ್ಯಾರ್-ಕಾಳೊಕ್ ಪಡ್ತಾನಾ ಪಾಟಿಂ ಯೆಂವ್ಚಿಂ ತಿಂ, ವೀಕೆಡಾಂಕ್ ಇಲ್ಲೆಶೆಂ ಪಬ್-ಪಾರ್ಟಿ ವಾ ವಯಕ್ತಿಕ್ ಕಾಮ್ ವಾ ವೊಗೆತ್ ನಿದ್ಚೆಂ – ಹ್ಯೆ ಜಿಣಿಯೆ ರಿತಿಕ್ ಸಾಂಪ್ಡಲ್ಲ್ಯಾಂತ್. ‘Age is just a number’ ಮ್ಹಣ್ ವರ್‍ಸಾಂ ವರ್‍ಸಾಂ ಜಲ್ಮಾದೀಸ್ ಜಾಯಿತ್ತ್ ಗೆಲೆ. ತಾಚೆಮದೆಂ time pass relations,, ಎಫೇರ್‍ಸ್, ಸಾಂಗಾತಿ ಇಶ್ಟಾಂಲಾಗಿಂ ಮೊಗಾ ವೊಡ್ನಿ, ಪೊಸೆಸಿವ್‌ನೆಸ್, situationship, ಕಾಜಾರಿ ಇಶ್ಟಾಂಚೊ ಜಿಣಿಯೆ ಭೊಂಗಸ್ತಳ್, ಕುಟಮ್-ಬಾಯ್ಲ್, ಭುರ್ಗಿಂ ಮ್ಹಣ್ ತಾಣೆಂ ಪೆಚಾಡ್ಚೆಂ ಹೆಂ ಸರ್ವ್ ದೆಕ್ತಾನಾ ಖಂಯ್ಚೇಂಯ್ ನಾಸ್ತಾಂ ಎಕ್ಸುರೆಂ ಜಿಯೆಂವ್ಚೆಂಚ್ ಹಜಾರ್ ವಾಂಟ್ಯಾಕ್ ಬರೆಂ ತಶೆಂ ದಿಸ್ಚೆಂ ಸಹಜ್.

ಸಿಂಗಲ್ ಜಿವಿತಾಕ್ ಸಿನೆಮಾಚಿ ತಾಳ್ಣಿ

‘ಜಿಂದ್‌ಗೀ ನಾ ಮಿಲೆಗೀ ದುಬಾರಾ’ ಬೊಲಿವುಡ್ ಶೆತಾಂತ್ ಬೊವ್ ಫಾಮಾದ್ ಜಾಲ್ಲೆಂ ಚಲನ್‌ಚಿತ್ರ್. ತಾಚ್ಯಾ ಕ್ಲೈಮ್ಯಾಕ್ಸಾರ್ ಆಪ್ಲಿ ಜಿಣಿಯೆ ಸಾಂಗಾತಿಣ್ ಪಯ್ಸ್ ಗೆಲ್ಲೆಂಚ್ ಜಿಣಿಯೆಂತ್ ಸ್ವತಂತ್ರ್ ಜಾವ್ನ್ ಜಿಯೆವ್ಯೆತ್ ತಶೆಂ ಏಕ್ ಸಂದೇಶ್ ದಿಲ್ಲೊ ವಾ ಆಮಿ ತಶೆಂ ಮ್ಹಣ್ ಕಾಣ್ಘೆಲ್ಲೊಯ್ ಆಸೊಂಕ್ ಪುರೊ. ವೆವೆಗ್ಳ್ಯಾ ಕಾರಣಾಂಕ್ ಮೊಗಾಥಾವ್ನ್ ಪಯ್ಸ್ ಜಾಲ್ಲ್ಯಾ ಯುವಜಣಾಂಕ್ ಮೊಗಾಂತ್ ಉರ್‍ಚ್ಯಾಕ್ ಎಕ್ಸುರೆಂಚ್ ಜಿವಿತ್ ಸಾರ್‍ಚೆಂ ಬರೆಂ ತಶೆಂ ಏಕ್ ಸಂದೇಶ್ ದೀಂವ್ಕ್ ಲಾಗ್ಲೆ.

ಜಾಯ್ತಾ ವಿವಾದಾಂಕ್ ಕಾರಣ್ ಜಾಲ್ಲೆಂ ‘ಕಭೀ ಆಲ್‌ವಿದಾ ನಾ ಕೆಹೆನಾ’ ಚಲನ್‌ಚಿತ್ರ್ ಆನ್ಯೇಕ್ ಥರಾಚೊ ಸಂದೇಶ್ ಘೆವ್ನ್ ಆಯ್ಲೆಂ. ಆಪ್ಲ್ಯಾಕ್ ಏಕ್ ಜಿಣಿಯೆಸಾಂಗಾತಿ ಆಸ್‌ಲ್ಲೆಬರಿಚ್ ಆಪ್ಲ್ಯಾ ಇಶ್ಟಾಂ ಸಾಂಗಾತಾ ಸಂಬಂದ್ ದವರ್‍ನ್ ಆಪ್ಲ್ಯಾ ಜಿಣಿಯೆಸಾಂಗಾತ್ಯಾಕ್ ಮೋಸ್ ಕರ್‍ನ್ ಸಯ್ತ್ ಜಿಯೆಂವ್ಕ್ ಜಾತಾ ಮ್ಹಣ್ ಕ್ಲೈಮ್ಯಾಕ್ಸಾರ್ ದಾಕಯಿಲ್ಲೆಂ.

‘ಕ್ವೀನ್’ ಮ್ಹಳ್ಳ್ಯಾ ಸಿನೆಮಾಂತ್ ಕಾಜಾರ್ ತುಟ್ಲ್ಯಾರ್‌ಯೀ ಕಾಜಾರಾಪಯ್ಲೆಂ ಬುಕ್ ಕೆಲ್ಲೆಂ ಹನಿಮೂನ್ ಮಾತ್ರ್ ತಿರಸ್ಕಾರ್ ಕರ್‍ನಾಸ್ತಾನಾ ಎಕ್ಲ್ಯಾನ್‌ಚ್ ಹನಿಮೂನಾಕ್ ವಚೊನ್ ಯೆಂವ್ಚೆಂ ದಾಕಯಿಲ್ಲೆಂ. ಘೊವಾನ್ ರಾಗಾನ್ ಬಾಯ್ಲೆಕ್ ದಿಲ್ಲೆಂ ಏಕ್ ಥಾಪಡ್ ಪರತ್ ಪರತ್ ಕಿತ್ಲಿ ಚೂಕ್ ಮಾಗ್ಲ್ಯಾರ್‌ಯೀ ಭೊಗ್ಸಾಣೆಂಚ್ ನಾಸ್ತಾಂ ವಿಚ್ಛೇದನ್‌ಚ್ ಪರಿಹಾರ್ ಮ್ಹಣ್ ಸಂದೇಶ್ ಘೆವ್ನ್ ಆಯ್ಲೆಂ ‘ಥಪ್ಪಡ್’ ಹಿಂದಿ ಫಿಲ್ಮ್!

ಅಶೆಂ ಸದಾಂನಿತ್ ಕಾಜಾರಿ ಜಿವಿತ್ ಆನಿ ಎಕ್ಸುರ್‍ಯಾ ಜಿವಿತಾಚೆರ್ ಪ್ರಸಾರ್ ಜಾಂವ್ಚಿಂ ಫಿಲ್ಮಾಂ, ಸಿರೀಸ್ ಆನಿ ಸೀರಿಯಲಾಂ ಚಡಾವತ್ ಲಗ್ನಾ ಜಿವಿತಾಂತ್ಲೆ ಸಮಸ್ಸೆ ಆನಿ ಕುಟ್ಮಾಂ ಫುಟೊಂವ್ಚೆ ಸಂದೇಶ್ ಆಟಾಪುನ್ ಆಸ್ತಾತ್ ಆನಿ ತಾಂಚೆಂ ಟಾರ್ಗೆಟ್ ಆಡಿಯನ್ಸ್ ಯುವಜಣ್! ಕಾಜಾರ್ ಜಾವ್ನ್ ಫಾಲ್ಯಾಂ ಮ್ಹಜಿ ಕಾಣಿ ಅಶಿ ಜಾಂವ್ಕ್ ನ್ಹಜೊ ಮ್ಹಣೊನ್ ನಿರ್ಧಾರ್ ಘೆಂವ್ಚಿಂ ಜಾಯ್ತಿಂ ಆಸಾತ್!

Situationship ಮ್ಹಳ್ಳಿ ಭುಲ್

ಯುವಪ್ರಾಯೆರ್ ಹುನ್ ರಗ್ತಾನ್ ಕೆಲ್ಲೆ ನಿರ್ಧಾರ್ ಜಾಯ್ತೆಪಾವ್ಟಿಂ ದೀಸ್ ವೆತಾನಾ ಚುಕಿಚೆ ವರ್ತವ್ತಾತ್! ತ್ಯೆ ಪ್ರಾಯೆರ್ ಕರ್‍ಚೆ ನಿರ್ಧಾರ್ ಸ್ವ ಬುದಿನ್ ನ್ಹಯ್ ಮ್ಹಳ್ಳೆಂ ಸ್ಪಶ್ಟ್. ಆಜ್ ಮಾದ್ಯಮಾಚ್ಯಾ ಜಾಳಿಂಕ್ ಸಾಂಪಡ್ಲಲಿಂ Situationship ಉಗ್ತ್ಯಾನ್ ಸ್ವೀಕಾರ್ ಕರುಂಕ್ ಲಾಗ್ಲ್ಯಾಂತ್! Situationship ಮ್ಹಳ್ಯಾರ್ ರಿಲೇಶನ್‌ಶಿಪ್ಪಾ ಬದ್ಲಾಕ್ ಯುವ ಪಿಳ್ಗೆನ್ ಸೊಧುನ್ ಕಾಡ್‌ಲ್ಲೊ ನವೊ ಸಂಬಂದ್, ಮ್ಹಣ್ಜೆ ಎಕಾ ಸನ್ನಿವೆಶಾಕ್ ವಾ ಸಂದರ್ಬಾಕ್ ಲಾಗೊನ್ ದೊಗಾಂನಿ ಏಕ್ ಜಾಂವ್ಚೆಂ, ಹೊ ಸಂಬಂದ್ ಇಶ್ಟಾಗತೆಚೊ ಆಸ್ಲೊ, ದೈಹಿಕ್ ಜಾವ್ನ್ ಬದ್ಲತ್. ಉಪ್ರಾಂತ್ ಕಾಂಯ್ಚ್ ಜಾವ್ನಾ ಮ್ಹಳ್ಳ್ಯಾ ನಿತಳ್ ಅಂತಸ್ಕರ್ನಾನ್ ಆಪಾಪ್ಲಿ ವಾಟ್ ಧರ್‍ನ್ ವೆಚೆಂ. ಅಸಲೊ ಸಂಬಂದ್ ತೆವ್ಶಿಲ್ಯಾನ್ ಇಶ್ಟಾಗತೆಚೊಯ್ ನ್ಹಯ್, ಹೆವ್ಶಿಲ್ಯಾನ್ ಗಂಭೀರ್ ಜವಾಬ್ದಾರೆಚೊಯ್ ನ್ಹಯ್. ಹಾಂತುಂ ಸಾಬೀತ್ ಜಾತಾ ಕೀ, ಯುವಜಣ್ ಲಗ್ನಾಚ್ಯಾ ವಾ ದೈಹಿಕ್ ಸಂಪರ್ಕಾಭಾಯ್ರ್ ಎಕಾ ಜವಾಬ್ದಾರೆಚ್ಯಾ ಆನಿ ಮಾನಸಿಕ್ ಆನಿ ಅತ್ಮೀಕ್ ಸಂಬಂದಾಕ್ ತಯಾರ್ ನಾಂತ್! ಹ್ಯೆ ಭುಲಿಕ್ ಸಾಂಪಡ್ಲಲ್ಯಾ ಯುವಜಣಾಂಕ್ ನಯ್ತಿಕ್ ಸಂಗ್ತಿಂನಿ ಮುಕಾರ್ ವಚೊಂಕ್ ಮೊಸ್ತು ಉಬ್ದೆಸ್ ಭೊಗ್ತಾತ್. ಫುಡೆಂ ನೀಜ್ ಸಂಬಂದಾಕ್ ರಿಗೊಂಕ್ ಕಶ್ಟತಾತ್. ಪೊಳ್ಕುರೆಂ ಜಿವಿತ್ ಮ್ಹಣ್ ಜಾಣಾಸೊನ್‌ಯೀ ಅಸಲ್ಯಾ ಕಾಮಾಕ್ ಪರತ್ ಪರತ್ ಬಲಿ ಜಾತಾತ್!

ಮನಿಸ್ ಸಂಬಂದಾಖಾತಿರ್ ಆಸ್ಚೊ, ಕುದ್ರ್ಯಾಬರಿ ಎಕ್ಸುರೆಂ ಜಿಯೆಂವ್ಕ್ ನ್ಹಯ್. ಸಂಬಂದಾಚೆಂ ಮೋಲ್ ಜಾಣಾಸೊನ್ ಕುಟಮ್ ಬಾಂದ್ಲಲ್ಯಾ ಆಮ್ಚ್ಯಾ ಪುರ್ವಜಾಂಕ್ ಕುಟ್ಮಾ ಜವಾಬ್ದಾರ್‍ಯೊ ವ್ಹಡ್ ಮ್ಹಣ್ ಭೊಗುಂಕ್ ನಾಂತ್. ಜಿವಿತ್ ಕಿತ್ಲೆಂಯ್ ಕಶ್ಟಾಂಚೆಂ ಆಸೊಂ, ಏಕ್ ವೆಳಾರ್ ನೀಸ್-ಪೇಜ್ ಜೇಂವ್ಕ್‌ಯೀ ಕಶ್ಟ್ ಆಸೊಂ, ಆಮ್ಚ್ಯಾ ಮಾಲ್ಘಡ್ಯಾಂನಿ ಕುಟ್ಮಾಚ್ಯಾ ಹರ್‍ಯೆಕ್ಲ್ಯಾಕ್ ಸಾಂಬಾಳ್ಳಾಂ. ತಸಲಿ ಅಂತರ್ ಸಕತ್ ಆಜ್ ಉಣಿ ಜಾಲ್ಯಾ? ಜಿವಿತ್ ಸ್ವಾರ್ಥಾನ್ ಯಶಸ್ವಿ ಜಾತಾ ಮ್ಹಣ್ ಚಿಂತಪ್ ರಿಗ್ಲಾಂ? ಹೆರಾಂಚೆಂ ಲಗ್ನ್ ಪಳೆವ್ನ್ ಆಪ್ಣಾಕ್ ನಾಕಾ ಮ್ಹಣ್ ನಿರ್ಧಾರಾಕ್ ಯೆಂವ್ಚೆಂ ತರ್ ಸಕ್ಕಡ್‌ಯೀ ಹೆರಾಂಚೆಂ ಪಳೆವ್ನ್ ಆಪ್ಣಾಖಾತಿರ್ ನಿರ್ಧಾರ್ ಘೆಂವ್ಚೆ ಕೋಣ್ ಆಸಾತ್? ಸೆಲೆಕ್ಟಿವ್ ಜಾವ್ನ್ ಚಿಂತ್ಚೆಂ ಕಿತ್ಯಾಕ್?

ಆಧುನಿಕತೆಚೊ ಪ್ರಭಾವ್, ತರ್ನಾಟ್ಪಣಾರ್ ಕಶೆಂಯ್ ಜಿಯೆತಾಂ, ಕಿತ್ಲೆಂಯ್ ಘೊಳ್ತಾಂ, ಭೊಂವ್ತಾ ಆನಿ ಮ್ಹಜಿ ಮರ್ಜಿ ಕರ್‍ತಾಂ ಮ್ಹಳ್ಳೆಂ ಚಿಂತಪ್ ಕುಡಿಕ್ ಆನಿ ಮತಿಕ್ ಪ್ರಾಯ್ ಜಾತಾನಾ ಸಗ್ಳೆಂಯ್ ಪಿಗ್ಳೊನ್ ವೆತಾ ಆನಿ ತವಳ್ ಚುರ್ಚುರೊನ್ ಕಾಂಯ್ ಕರುಂಕ್ ಜಾಯ್ನಾ. ಹುನ್ ಹುನ್ ಖಾಂವ್ಚೆಂ ಮನ್ ತರೀ ಮಾಲ್ಘಡ್ಯಾಂನಿ ಸಾಂಗ್ಲಲೆಬರಿ ನಿಂವೊವ್ನ್ ಖಾಂವ್ಕ್ ಶಿಕ್ಲ್ಯಾರ್ ಜಿವಿತಾಕ್ ಏಕ್ ಅರ್ಥ್ ಮೆಳ್ತೊಲೊ.