ಮೊಂತಿ ಫೆಸ್ತ್ ಏಕ್ ಪ್ಯಾಕೇಜ್ ಆಸ್ಲೆಬರಿ – ಆಮ್ಚಿ ಪ್ರಕೃತಿ, ನವೆಂ ಬೆಳೆಂ, ರಾಂದ್ವಯ್, ಶಿರೊತಿ, ಕೊಬು, ಜೆವಣ್ – ಸಗ್ಳೆಂಯ್ ಗುಟ್ಲಾವ್ನ್ ಹಾಡ್ನ್ ಯೆತಾ. ರೂಕ್ ಆಜೂನ್ ಹಳ್ಳೆಂನಿ ಉರ್‍ಲ್ಯಾತ್, ಫಳಾಂ ಶ್ಹೆರಾಂಕ್ ಪಾವ್ಲ್ಯಾಂತ್ ಮ್ಹಳ್ಳೆಂ ಉತರ್ ಆಸಾ. ತೆಂ ರುಕಾ-ಫಳಾವಿಶಿಂ ನ್ಹಯ್, ಮನ್ಶಾನ್ ತಾಚೆಂ ಅಸ್ತಿತ್ವ್ ನವ್ಯಾ ಶ್ಹೆರಾಂನಿ ಸೊಧುನ್ ಕಾಡ್ಚ್ಯಾ ಅತ್ರೆಗಾಕ್ ಆರ್ಸೊ ಧರ್‍ತಾತ್. ವರ್‍ಸಾಕ್ ಏಕ್ ಪಾವ್ಟಿಂ ಪುಣೀ ಆಮ್ಚ್ಯಾ ಮುಳಾಕ್ ವಚೊಂಕ್ ಹೆಂ ಫೆಸ್ತ್ ಆಮ್ಕಾಂ ಉಡಾಸ್ ಕರ್‍ತಾ ಮ್ಹಣ್ಯೆತ್. ತ್ಯಾಚ್ ಬರಾಬರ್ ಮರಿಯೆಕ್ ಮಾನ್ ಕರ್‍ತಾನಾ ತಿಚ್ಯಾ ಪಾಂಯಾಂಥಳಾ ಸೊರ್‍ಪಾಚೆರ್ ಆಮ್ಚಿ ದೀಶ್ಟ್ ಚುಕ್ಚಿನಾ. ಬೈಬಲಾಪರ್ಮಾಣೆಂ ಸಾಂಕೇತಿಕ್ ಸಯ್ತಾನಾಚೆಂ ರೂಪ್ ತೊ. ಪುಣ್ ಪ್ರಕೃತೆಂತ್ ಏಕ್ ಸಮತೋಲನ್ ಹಾಡುಂಕ್ ವಾವುರ್‍ಚಿ ಏಕ್ ಜೀವಿ ತಿ. ತಿಕಾ ಪಳೆತಾನಾ ಮನ್ಶಾಕ್ ಭಿರಾಂತ್, ಮನ್ಶಾಕ್ ಪಳೆತಾನಾ ತಿಕಾ ಆಕಾಂತ್! ದೆಕುನ್ ಹ್ಯಾ ಅಂಕ್ಯಾಂತ್ ಜಿವ್ದಾಳಿವಿಶಿಂ ಏಕ್ ಸಾನ್ ನದರ್ ಲಾಂವ್ಚೆಂ ಪ್ರಯತ್ನ್ ಆಮ್ಚೆಂ.

ಜಾಣಾರಿ ಸಾಂಗ್ತಾತ್, ‘ಭೊಂವ್ತಿಂ ಕಿತೆಂ ಘಡ್ತಾ ತೆಂ ಜಿವ್ದಾಳಿಂಕ್ ಪಯ್ಲೆಂ ಕಳಿತ್ ಜಾತಾ ಕಂಯ್. ಕಿತ್ಯಾಕ್ ತಾಂಕಾಂ ಖಬ್ರೊ ಆಯ್ಕೊಂಕ್ ಕಾನ್ ನಾಂತ್ ಪುಣ್ ಧರ್‍ತೆರ್ ಜಾಂವ್ಚ್ಯಾ ಕಂಪನಾಂಕ್ ಪಾರ್ಕುಂಚಿ ಏಕ್ ಸಕತ್ ಆಸಾ’. 

ಆದಿಂ ಮನಿಸ್ ಜೆದ್ನಾಂ ಪ್ರಕೃತೆಕ್ ಲಾಗಿಂ ಆಸ್ಲೊ ತೊ ಸರ್ವ್ ಜೀವಿಂಕ್ ಸಮ್ಜಾತಾಲೊ. ಸಕ್ಕಡ್ ಸಹಜೀವಿಂಕ್ ತೊ ಪಾರ್ಕುನ್ ಒಳ್ಕೊನ್ ಜಾಣಾಸ್ಲೊ. ಜಿವ್ದಾಳಿ ಆಮ್ಚ್ಯಾ ಬಿಡಾರಾ ತೆವ್ಶಿಂ ಯೆಂವ್ಚಿಂ ಸಹಜ್. ತಾಂಚಿಂ ನಾಂವಾಂ, ಖಾಣ್, ಖಂಯ್ಚ್ಯೊ ವಿಕಾಳ್, ಖಂಯ್ಚ್ಯೊ ಸಾದ್ಯೊ, ಖಂಯ್ಚಿ ಚಾಬ್ತಾ, ಕಿತ್ಲಿ ವಿಕಾಳ್, ಕಿತೆಂ ವೊಕತ್.. ಹಿ ಜಾಣ್ಕಾರಿ ತಾಕಾ ಆಸ್ಲಿ. ಕೆದ್ನಾಂ ಮನ್ಶಾ ಜಿವಿತ್ ತಾಂತ್ರಿಕತೆಕ್ ಒಳ್ಸಾಲೆಂ ಪ್ರಕೃತೆಸಂಗಿ ಆಸ್ಚಿ ಸಳಾವಳ್ ಆಳ್ವಾಲಿ. ದೆಕುನ್ ಮನ್ಶಾಕ್ ಆಜ್ ತಾಚ್ಯಾಚ್ ಸಹಜೀವಿಂಚಿ ಸಾರ್ಕಿ ಒಳೊಕ್‌ಯೀ ನಾ, ತಾಂಚೆ ಉದೆಶಿಂ ಕಾಳ್ಜಿಯ್ ನಾ. ಎಕೆ ಕುಶಿನ್ ಎಕಾ ಪ್ರಭೇದಾಕ್ ಮಾತ್ರ್ ದೇವ್ ಮ್ಹಣ್ ಮಾಂದುನ್ ದೂದ್ ವೊತ್ಚಿ ಸಂಸ್ಕೃತಿ ಆಸಾ ತರ್ ಬಾಕಿಚ್ಯಾ ಪ್ರಭೇದಾಂಕ್ (ಜಿವ್ದಾಳಿ ಜಾತಿಂಕ್) ಜಿವೆಶಿಂ ಮಾರ್‍ಚೆಂಯ್ ಪಳೆತಾಂವ್. ತಾಂತುಂಯ್ ಕ್ರಿಸ್ತಾಂವ್ಚಿಂ ಸೊರ್‍ಪಾಕ್ ಪಳೆಲ್ಲೆಂಚ್ ‘ತಾಕಾ ಮಾರಿಜೆ’ ಮ್ಹಳ್ಳ್ಯೆ ಮನಾಸ್ಥಿತೆನ್ ಜಿಯೆವ್ನ್ ಆಸಾತ್. ಬೈಬಲಾಚೊ ಸೊರೊಪ್ ಆನಿ ಆಮ್ಚ್ಯಾ ಸುತ್ತೂರಾಕ್ ಯೆಂವ್ಚೊ ಸೊರೊಪ್ – ತಾಂಕಾಂ ಕಾಂಯ್ಚ್ ಸಯ್ರಿಕ್ ನಾ ತರೀ ಆಮಿ ಮತಿಭ್ರಮಣ್ ಜಾಲ್ಲೆಬರಿ ಕರ್‍ತಾಂವ್.

ಜಿವ್ದಾಳಿಂವಿಶಿಂ ಆಮ್ಕಾಂ ಮುಳಾವ್ಯೊ ಥೊಡ್ಯೊ ಸಂಗ್ತಿ ಕಳಿತ್ ಆಸೊಂಕ್ ಜಾಯ್. ಜಿವ್ದಾಳಿ ಎಕ್ಸುರೆಂ ಜಿವಿತ್ ಪಸಂದ್ ಕರ್‍ತಾತ್. ತಾಂಕಾಂ ದೊಳ್ಯಾಂಚಿ ದೀಶ್ಟ್ ನಾ, ರಂಗಾಚಿ ದೀಶ್ಟ್ ನಾ ಜಾಲ್ಲ್ಯಾನ್ ತಾಂಚೆಮುಕಾರ್ ಕೊಣೀ ರಾವ್ಲ್ಯಾರ್ ಫಾತರ್‌ಗಿ ರೂಕ್‌ಗೀ ಮ್ಹಣ್ ತಾಂಕಾಂ ಕಳಿತ್ ಜಾಯ್ನಾ. ತ್ಯೊ ಆಪ್ಲ್ಯೆ ಜಿಬೆನ್ ವಾಸ್ ಘೆತಾತ್ ಆನಿ ತೊ ವಾಸ್ ಖಂಯ್ಚ್ಯೆ ಕುಶಿ ಥಾವ್ನ್ ಮ್ಹಣ್ ಸಾರ್ಕೆಂ ಸಮ್ಜಾತಾತ್. ತಾಂಚೊ ಸ್ವಭಾವ್ ಸಾದೊ. ಖಾಣ್ ಆನಿ ಸ್ವರಕ್ಶಣಾ ವೆಳಾರ್ ಮಾತ್ರ್ ಕ್ರೋದಿತ್ ಜಾತಾತ್ ಆನಿ ಚಾಬ್ತಾತ್. ಸುಮಾರ್ ೩೦೦೦ ವಿಭಿನ್ನ್ ರಿತಿಂಚೊ ಜಿವ್ದಾಳ್ಯೊ ಆಸಾತ್, ತಾಂತುಂ 600 ವಿಕಾಳ್. ಚಡ್ತಾವ್ ಜಿವ್ದಾಳ್ಯೊ ತಾಂತಿಯಾಂ ದವರ್‍ತಾತ್ ತರ್ ಉದ್ಕಾಚ್ಯೊ ಜಿವ್ದಾಳಿ ಪಿಲಾಂ ಕಾಡ್ತಾತ್. ಸುರ್ಯಾಚ್ಯಾ ಕಿರ್ಣಾಂ ಥಾವ್ನ್ ಸಕತ್ ಜೊಡ್ತಾತ್. ಜಿವ್ದಾಳಿಂಕ್ 1200 ತಿತ್ಲಿಂ ಹಾಡಾಂ ಆಸಾತ್. ದರ್ಯಾಂತ್ಲ್ಯೊ ಜಿವ್ದಾಳ್ಯೊ ತಾಂಚ್ಯೆ ಕಾತಿನ್ ಉಸ್ವಾಸ್ ಘೆತಾತ್ ಜಾಲ್ಲ್ಯಾನ್ ದರ್ಯಾಚ್ಯೆ ಗುಂಡಾಯೆತ್ ಚಡಿತ್ ವೇಳ್ ರಾವೊಂಕ್ ಸಕ್ತಾತ್.

ಏಕ್ ಚೂಕ್ ಸಮ್ಜೊಣಿ: 12 ವರ್‍ಸಾಂ ಸೊರೊಪ್ ದ್ವೇಶ್ ದವರ್‍ತಾ ಮ್ಹಳ್ಳಿ ಪಾತ್ಯೆಣಿ ಚೂಕ್ ಕಿತ್ಯಾಕ್ ಸೊರ್‍ಪಾಕ್ ಉಡಾಸಾಚಿ ಸಕತ್ ನಾ. ಸೊರೊಪ್ ದೂದ್ ಪಿಯೆನಾ. ದಿವ್ಡಾನ್ ಶಿಮ್ಟೆನ್ ಮಾರ್‍ಲ್ಯಾರ್ ಹಾಡಾಂ ಪಿಟೊ ಜಾತಾತ್ ಆನಿ ಕಾತ್ ಘಟ್ ಜಾತಾ ಮ್ಹಣ್ಚಿಯ್ ಏಕ್ ಚೂಕ್ ಸಮ್ಜೊಣಿ. ಹಾಕಾ ಕಾಂಯ್ ರುಜ್ವಾತ್ ನಾ. ಜಿವ್ದಾಳ್ಯೊ ದಿರ್ವೆಂ ರಾಕ್ಚೆಂ ಕಾಮ್ ಕರಿನಾಂತ್. ತಾಂಕಾಂ ತಾಚಿ ಗರ್ಜ್ ನಾ.

ಆಕರ್ಶಿಕ್ ಮಾಹೆತ್: ಜೂನ್ ಆನಿ ಆಗಸ್ಟ್ ಮ್ಹಯ್ನೊ ಜಿವ್ದಾಳ್ಯಾಂನಿ ತಾಂತಿಯಾಂ ದವರ್‍ಚೊ ವೇಳ್ ಜಾಲ್ಲ್ಯಾನ್ ಹ್ಯಾ ವೆಳಾರ್ ಜಾಗ್ರುತ್ಕಾಯ್ ಗರ್ಜೆಚಿ. ವಿಕಾಳ್ ಜಿವ್ದಾಳಿಂಚ್ಯಾ ಪಿಲಾಂಕ್ ಎಕಾ ವೆಕ್ತಿಕ್ ಜೀವ್ ಕಾಡ್ಚೆತಿತ್ಲೆಂ ವೀಕ್ ಆಸ್ತಾ. ಜಿವ್ದಾಳ್ ಚಾಬ್‌ಲ್ಲ್ಯಾಕ್ ದಿಂವ್ಚೆಂ ಆಂಟಿ ಸ್ನೇಕ್ ವೆನಮ್ ವೊಕತ್ ಚಡ್ತಾವ್ ಘೊಡ್ಯಾಚ್ಯಾ ರಗ್ತಾನ್ ತಯಾರ್ ಕರ್‍ಚೆಂ. ಭಾರತಾಂತ್ ವ್ಹಡ್ ಗಾತ್ರಾಚ್ಯೆ ಜಿವ್ದಾಳೆನ್ ಎದೊಳ್ ಮನ್ಶಾಕ್ ಗಿಳ್‌ಲ್ಲೆ ದಾಖ್ಲೆ ನಾಂತ್. ಆಫ್ರಿಕಾಂತ್ ಮಾತ್ರ್ ಅಸಲಿಂ ಘಡಿತಾಂ ಘಡ್ಲ್ಯಾಂತ್.

ಆಮ್ಕಾಂ ಸಕ್ಡಾಂಕ್ – ಮನ್ಶಾಂಕ್, ಮೊನ್ಜಾತಿಂಕ್, ಉಬ್ಚ್ಯಾ ಆನಿ ಧರ್‍ಣಿರ್ ಸರ್‍ಚ್ಯಾ ಜೀವಿಂಕ್ ಎಕ್‌ಚ್ ಪೃತ್ವಿ ದಿಲ್ಯಾ. ವಾಂಟುನ್ ಜಿಯೆಂವ್ಕ್, ನ್ಹಯ್ ವೋಂಯ್ ಘಾಲ್ನ್ ಪ್ರತ್ಯೇಕ್ ಜಿಯೆಂವ್ಕ್. ಹೆರ್ ಜೀವಿಂಕ್ ಆಮಿ ಕಾಂಯ್ ಪೊಶಿನಾಂವ್. ತರ್ ತಾಂಕಾಂ ಜಿವೆಶಿಂ ಮಾರ್‍ಚೆಂಯ್ ಆಮ್ಚೆಂ ಹಕ್ಕ್ ನ್ಹಯ್. ಪೃತ್ವೆ ವಿರೋಧ್ ಚಲ್‌ಲ್ಲೆಂ ಹರ್‍ಯೇಕ್ ಆಮ್ಚೆಂ ನಡ್ತೆಂ ಚುಕಿಚೆಂಚ್. ಸರ್ವ್ ಜೀವಿಂಚೆಂ ಸಂರಕ್ಶಣ್ ಜಾಂವ್ದಿ.

ಸರ್ವ್ ವಾಚ್ಪ್ಯಾಂಕ್, ಬರೊವ್ಪ್ಯಾಂಕ್, ಜಾಯ್ರಾತ್‌ದಾರಾಂತ್ ಆನಿ ಹಿತಚಿಂತಕಾಂಕ್ ಕಾರ್ಮೆಲಿತಾಂಚ್ಯೆ ನಾಂವಿಂ ಮೊಂತಿ ಫೆಸ್ತಾಚೆ ಉಲ್ಲಾಸ್ ಪಾಟಯ್ತಾಂ.

ಬಾಪ್ ಐವನ್ ಸೊಜ್, ಕಾರ್ಮೆಲಿತ್