ಆಸ್ಸಾಮ್ ಸರ್ಕಾರಾನ್ ಕ್ರಿಸ್ತಾಂವ್ ಪಾಸ್ಟರಾಂನಿ ಕರ್ಚ್ಯಾ ‘ಹೀಲಿಂಗ್ ಮಿನಿಸ್ಟ್ರಿ’ ವಯ್ರ್  ವ್ಹಡ್ ಆಡ್ಕಳ್ ಹಾಡುನ್ ಕಾಯ್ದೊ ಜ್ಯಾರಿಯೆಕ್ ಹಾಡ್ಚೆಂ ಚಿಂತಪ್ ಆತಾಂ ತೀವ್ರ್ ವಿರೋಧಾಕ್ ಕಾರಣ್ ಜಾಲಾಂ.

ಕ್ರಿಸ್ತಾಂವ್ ಪಾಸ್ಟರಾಂನಿ ರೆತಿರೆಂತ್ ಲೊಕಾಕ್ ಗೂಣ್ ಕರ್ಚೆಂ ಲೊಕಾಕ್ ಮತಾಂತರ್ ಜಾಂವ್ಕ್ ಕಾರಣ್ ಜಾತಾ. ಅಸಲೆಂ ‘ಮ್ಯಾಜಿಕ್’ ಕರ್ನ್ ಗೂಣ್ ಕರ್ಚೆಂ ಸಮಾಜೆಕ್ ಪಾಡ್ ವಾಟೆಕ್ ವ್ಹರ್ತಾ ಮ್ಹಣ್ ಸರ್ಕಾರಾಚೊ ವಾದ್. ‘ಹೀಲಿಂಗ್ ಮಿನಿಸ್ಟ್ರಿ ಏಕ್ ಅಸ್ವಭಾವಿಕ್ ಆಚರಣ್ ಮ್ಹಣ್ ಲೆಕುನ್ ಚುಕ್ಲೆಲ್ಯಾಂಕ್ ಏಕ್ ಲಾಕ್ ಜುಲ್ಮಾನ್ ಆನಿ 5 ವರ್ಸಾಂಚಿ ಜಯ್ಲ್ ಶಿಕ್ಶಾ ಲಾಭ್ಚೆಬರಿ ಕಾಯ್ದೊ ಹಾಡ್ತಾಂವ್’ ಮ್ಹಣ್ ಸರ್ಕಾರಾನ್ ಕಳಯ್ಲಾಂ.

ಆಸ್ಸಾಮಾಂತ್  ಮಿಶನರಿ ಚಟುವಟಿಕ್ಯೊ ಬಂಧ್ ಕರುಂಕ್ ಹಿ ಕಾಯ್ದೊ ಘಡ್ತಾಂವ್ ಮ್ಹಣ್ ಆಸ್ಸಾಮಾಚ್ಯಾ ಮುಕೆಲ್ ಮಂತ್ರಿನ್ ಪರ್ಗಟ್ ಸಾಂಗ್ಲಾಂ.

ಫೆಬ್ರವರಿ 26 ತಾರಿಕೆರ್ ಹೆಂ ಬಿಲ್ಲ್ ಪಾಸ್ ಜಾಲಾಂ ತರೀ ಅಧಿಕೃತ್ ರಿತಿನ್ ರಾಷ್ಟ್ರ ಪತಿ  ದ್ರೌಪದಿ ಮುರ್ಮುನ್ ಸ್ವಿಕಾರ್  ಕರುಂಕ್ ಮಾತ್ರ್ ಬಾಕಿ ಉರ್ಲಾಂ. ಹೆರ್ ರಾಜ್ಯಾಂನಿ ಜಾರಿಯೆಕ್ ಹಾಡ್ ಲ್ಲ್ಯಾ ಮತಾಂತರ್ ನಿಷೇದ್ ಕಾಯ್ದ್ಯಾ ಸಾಂಗಾತಾ ಹ್ಯಾ ನವ್ಯಾ ಮಸೂದೆವಿಶಿಂ ಸ್ಥಳೀಯ್ ಕ್ರೀಸ್ತಾಂವಾಂಕ್ ಆತಾಂ ಭಿರಾಂತ್ ಉಟ್ಲ್ಯಾ.

ಗೌಹಾಟಿ ಆರ್ಚ್ ದಿಯೆಸೆಜಿಚ್ಯಾ ತಶೆಂಚ್ ಆಸ್ಸಾಂ ಕ್ರೀಸ್ತಾಂವ್ ಘಟಕಾಚಾ ಅಧ್ಯಕ್ಷಾನ್ ಸಾಂಗ್ಚೆ ಪರ್ಮಾಣೆಂ, “ಆಮಿ ಕೊಣಾಯ್ಕಿ ಬೆಷ್ಟೆಂಚ್ ಗೂಣ್ ಕರುಂಕ್ ವಚನಾಂವ್. ಹೊ ಏಕ್ ಆಮ್ಚ್ಯಾ ಮಾಗ್ಣ್ಯಾಚೊ ವಾಂಟೊ. ಹರ್ಯೆಕ್ ಧರ್ಮಾಂತ್ ಆಸ್ಲೆಬರಿ ಆಮ್ಚ್ಯಾ ಧರ್ಮಾಂತೀ ಈ ರೀತ್ ಆಸಾ. ಪಿಡೆಸ್ತ್ ಆಮ್ಚೆಲಾಗಿಂ ಯೆತಾನಾ ತಾಂಚೆ ಪಾಸತ್  ಸಮುದಾಯೆಂತ್ ಮಾಗ್ತಾಂವ್ ಪೂಣ್ ಖಂಚ್ಯಾಚ್ ರಿತಿನ್ ಮ್ಯಾಜಿಕ್ ಕರಿನಾಂವ್. ಸರ್ಕಾರ್ ಕಿತ್ಯಾಕ್ ಹ್ಯಾವಿಶಿಂ ದಂಡ್ ಆನಿ ಶಿಕ್ಷಾ ದಿತಾ ತೆಂ ಕಳನಾ”

ಗೂಣ್ ಕರ್ಚ್ಯಾಕ್ ಆನಿ ಮತಾಂತರಾಕ್ ಕಸಲೊಚ್ಚ್ ಸಂಬಂಧ್ ನಾ. ಜಾತ್ ಭೇದ್ ಮ್ಹಣ್ ಲೆಕಿನಾಸ್ತಾಂ ಮನ್ಶಾಂಚಾ ಕಷ್ಟಾಂಕ್ ಸ್ಪಂದನ್ ಕರ್ಚಿ ವ ದಯಾ ದಾಕಂವ್ಚಿ ಮನ್ಶಾಪಣಾಚಿ ಕರ್ನಿ. ಅಸಲೆಂ ಬಿಲ್ಲ್ ಕ್ರೀಸ್ತಾಂವ್ ಸಮುದಾಯಾಕ್ ಆನಿ ಸಂಸ್ಥ್ಯಾಂಕ್ ಭಾಂದುನ್ ಘಾಲುಂಕ್ ಮ್ಹಣ್ ರಚ್ಲಲೆಂ ಆಸೊನ್, ಜಶೆಂ ಮಣಿಪುರಾಂತ್ ಚಲ್ಲಾಂ ತೆಂಚ್ ಅಸ್ಸಾಮಾಂತ್ ಜಾಂವ್ಕ್ ವೇಳ್ ವೆಚೊನಾ ಮ್ಹಣ್ ಅಸ್ಸಾಮಾಚ್ಯಾ ಕ್ರಿಸ್ತಾಂವಾಂನಿ ಆಪ್ಲಿ ಭಿರಾಂತ್ ಉಚಾರ್ಲ್ಯಾ.

2024 ಇಸ್ವೆಂತ್ 150 ಚ್ಯಾಕೀ ಚಡ್ ಭಾರತೀಯ್  ಕ್ರಿಸ್ತಾಂವಾಂಚೆರ್ ಹಲ್ಲೆ ಚಲ್ಲ್ಯಾತ್.
ಜನೆರಾಂತ್ -70, ಫೆಬ್ರುವರಿಂತ್ -62, ಮಾರ್ಚ್ಯಾಂತ್ 29 (ಫಕತ್ 15 ದಿಸಾಂನಿ) ಕ್ರೀಸ್ತಾಂವಾಂಚೆರ್ ದಾಡ್ ಘಾಲ್ಯಾ ಮ್ಹಣ್ ಯುಎಸ್ ಎಫ್ ಸಂಸ್ಥ್ಯಾನ್ ವರ್ದಿ ದಿಲ್ಯಾ.