ಹಾಸ್ಯ್ ಜಾಲೆಂ ಬ್ರೇಕಿಂಗ್ ನ್ಯೂಜ್

ಕೊಂಕಣ್ ಕರಾವಳೆಚೊ ಸಂಪ್ರದಾಯಿಕ್ ಸ್ಪರ್ಶ್ ಆಸ್‌ಲ್ಲೊ ಮಾಟೊವ್ ಆನಿ ಆಪುರ್ಬಾಯೆಚ್ಯಾ ವೊವಿಯಾಂನಿ ಹಾಜರ್ ಆಸ್‌ಲ್ಲಿಂ ಸಯ್ರಿಂ ಹೊರೆತ್ ಬಾಬಾಕ್ ರೋಸ್ ಪುಸುನ್ ಆಸ್‌ಲ್ಲಿಂ. ಪಾಟ್ಲ್ಯಾನ್ ಬಸೊನ್ ಆಸ್‌ಲ್ಲೆ ಚಾರ್ ತರ್ನಾಟೆ ತಾಂಚ್ಯಾ ಎಕಾ ಇಶ್ಟಾಲಾಗಿಂ ಮ್ಹಣಾಲೆ, “ಹೆ ಕಸಲೆ ಬೋರಿಂಗ್ ವೊವಿಯೊ ಸಾಯ್ಬಾ, ತುಜೆ ಚಾರ್ ಗಮ್ಮತ್ ವೊವಿಯೊ ಸಾಂಗ್ ಪಳೆಯಾಂ”. ತಾಂಚ್ಯಾ ಪ್ರೋತ್ಸಾಹಾಕ್ ಲಾಗೊನ್ ಹರ್ದೆಂ ಫುಲೊವ್ನ್ ಮುಕಾರ್ ಆಯಿಲ್ಲೊ ತೊ ಮಾನೆಸ್ತ್, ವೊವಿಯೊ ಗಾವುನ್ ಆಸ್‌ಲ್ಲ್ಯಾ ಸ್ತ್ರೀಯಾಂಚ್ಯಾ ಹಾತಾಂತ್ಲೊ ಮೈಕ್ ವೋಡ್ನ್ ಕಾಣ್ಘೆವ್ನ್, ಆಪ್ಲ್ಯಾ ಬೊಲ್ಸಾಥಾವ್ನ್ ಪೊಕ್ರಿ ಆನಿ ಪೊಜ್ಡ್ಯಾ ವೊವಿಯಾಂನಿ ಭರ್‌ಲ್ಲಿ ಏಕ್ ಚೀಟ್ ಭಾಯ್ರ್ ಕಾಡ್ನ್ ಆಯ್ತೊ ಜಾಲೊ. ಮಾಟ್ವಾಂತ್ ಖುಶಾಲಾಯ್ ಹಾಡ್ಚ್ಯಾ ಉದ್ದೇಶಾನ್ ವೊವಿಯೊ ಗಾಂವ್ಕ್ ಮುಕಾರ್ ಆಯಿಲ್ಲ್ಯಾ ತ್ಯಾ ತರ್ನಾಟ್ಯಾನ್ ಆಪ್ಲೆಂ ಮ್ಹೆಳೆಂ ತೋಂಡ್ ಉಗಡ್ತಚ್ ವ್ಹಾಳೊಂಕ್ ಸುರು ಜಾಲ್ಯೊ ತಾಳ್ ಮೂಳ್ ನಾತ್‌ಲ್ಲ್ಯೊ ಅಶ್ಲೀಲ್ ವೊವಿಯೊ. ತೆಂ ಆಯ್ಕೊನ್ ಪಾಟ್ಲ್ಯಾನ್ ಬಸೊನ್ ಆಸ್‌ಲ್ಲ್ಯಾ ತಾಚ್ಯಾ ಠಪೋರಿ ಇಶ್ಟಾಂನಿ ಚಾರ್ ಶಿಲೊಣ್ಯೊ ಮಾರ್‍ಲ್ಯೊ ಸೊಡ್ಲ್ಯಾರ್, ಉರ್‌ಲ್ಲ್ಯಾ ಸಯ್ರ್ಯಾಂನಿ ಲಜೆನ್ ಮುದೊ ಜಾವ್ನ್ ತಕ್ಲಿ ಪಂದಾ ಘಾಲಿಜೆ ಪಡ್ಲಿ. ಆಮ್ಚ್ಯೆ ಸಮಾಜೆಂತ್ ಹಾಸ್ಯ್ ಆಸ್‌ಲ್ಲೆಂ ಅಪಹಾಸ್ಯ್ ಜಾಂವ್ಚಿಂ ಸಬಾರ್ ಘಡಿತಾಂಪಯ್ಕಿ ಏಕ್ ಘಡಿತ್ ಹೆಂ.

ಹಾಸ್ಯ್ ಜಾಲೆಂ ಬ್ರೇಕಿಂಗ್ ನ್ಯೂಜ್

ಚಡ್ತಾವ್ ಭಾರತೀಯ್ ಲೊಕಾಕ್ ತಾಂಚೊ ರಾಗ್ ಕಸೊ ಆನಿ ಕೊಣಾಚೆರ್ ದಾಕೊಂವ್ಚೊ ಮ್ಹಳ್ಳೊ ಗೊಂದೊಳ್ ಆಸ್ತಾ. ಖಂಯ್ ನಾತ್ಲ್ಯಾರೀ, ಸಮಾಜಿಕ್ ಜಾಳಿಜಾಗ್ಯಾಂನಿ ಕೋಣ್ ತರೀ ‘ಬಲಿಪಶು’ ಮೆಳತ್‌ಗೀ ಮ್ಹಣ್ ಆಮಿ ರಾಕೊನ್ ಆಸ್ತಾಂವ್. ಅಸಲ್ಯೆ ಪರಿಗತೆಂತ್ ಆಯ್ಲೆವಾರ್ ದೊಗಾ ತರ್ನಾಟ್ಯಾಂನಿ ಏಕ್ ವಿಚಿತ್ರ್ ಕೊಮಿಡಿ ಸರ್ಕಸ್ ಕರುಂಕ್ ವಚೊನ್ ಚಿಂತಿನಾತ್‌ಲ್ಲೊ ಭೊಂಗಸ್ತಳ್ ಜಾತಾನಾ ಆಮ್ಚ್ಯಾ ಲೊಕಾಕ್ ಭಾಜ್‌ಲ್ಲೆಂ ಮೆಳ್ಳೆಬರಿ ಜಾಲೆಂ. ಎಕ್ಲ್ಯಾಚೆಂ ನಾಂವ್ ಸಮಯ್ ರೈನಾ. ಆಪ್ಲ್ಯಾ ಯೂಟ್ಯೂಬ್ ಚ್ಯಾನೆಲಾಂತ್ India’s Got Latent ಮ್ಹಳ್ಳೆಂ ಕಾರ್ಯೆಂ ಪಾಟ್ಲ್ಯಾ ಸ ಮ್ಹಯ್ನ್ಯಾಂಥಾವ್ನ್ ಚಲೊವ್ನ್ ಆಸಾ. ಹರ್‍ಯೇಕ್ ನವೊ ಎಪಿಸೋಡ್ ಅಪ್‌ಲೋಡ್ ಜಾಲ್ಲ್ಯಾ ಥೊಡ್ಯಾಚ್ ವೊರಾಂನಿ ಕೊರೊಡಾಂಚ್ಯಾ ಸಂಖ್ಯಾಂನಿ ಲೋಕ್ ಪಳೆತಾ. ಕಿತೆಂ ವಿಶೇಸ್ ಹ್ಯಾ ಕಾರ್ಯಾಂತ್ ಮ್ಹಣ್ ಚಿಂತಾತ್‌ಗೀ? ಅಮೆರಿಕನ್ ಕೊಮಿಡಿ ಶೋ ‘ಕಿಲ್ ಟೋನಿ’ಚೆಂ ಹಿಂದಿ ರೂಪ್ ಜಾವ್ನಾಸ್ಚ್ಯಾ ಹ್ಯಾ ಕಾರ್ಯಾಂತ್ ಯೆಂವ್ಚ್ಯಾ ಸ್ಪರ್ಧಿಕಾಂನಿ 90 ಸೆಂಕುಡಾಂಭಿತರ್ ಆಪ್ಲೆಂ ಖಂಯ್ಚೇಂಯ್ ಏಕ್ ತಾಲೆಂತ್ ಪ್ರದರ್ಶನ್ ಕರ್‍ಯೆತ್. ತೀರ್ಪ್ ದೀಂವ್ಕ್ ಸಮಾಜಿಕ್ ಜಾಳಿಜಾಗ್ಯಾಂನಿ ಫಾಮಾದ್ ಜಾಲ್ಲ್ಯಾ ಸೆಲೆಬ್ರಿಟಿಂಕ್ ವರಯ್ಣಾರ್ ಜಾವ್ನ್ ಬಸಯ್ತಾತ್. ಸ್ಪರ್ಧಿಕಾಂನಿ ದಿಲ್ಲ್ಯಾ ಪ್ರದರ್ಶನಚ್ಯಾಕೀ ತಾಂಚೊ ಹಾವ್‌ಭಾವ್, ನ್ಹೆಸ್ಣಾಚೆರ್, ಪೋಲಿ ಜೊಕ್ಸ್ ಮಾರ್‍ನ್ ಸಾಂಗಾತಾ ಬಸ್‌ಲ್ಲ್ಯಾಂಚೆಂ ವೆಂಗ್ಯ್ ಆನಿ ಅಶ್ಲೀಲ್ ರಿತಿನ್ ಪಾಂಯ್ ವೊಡ್ಚೆಂ ಕಾಮ್ ಹ್ಯಾ ವರಯ್ಣಾರಾಂಚೆಂ. ಅಸಲ್ಯೆ ವಿಕೃತ್ ಹಾಸ್ಯ್ ಶಯ್ಲೆಕ್ Dark Humour ಮ್ಹಣ್ತಾತ್. ಅಶೆಂ ಆಸ್ತಾ ಫೆಬ್ರೆರಾಚ್ಯೆ 8 ತಾರಿಕೆರ್ ಏಕ್ ಎಪಿಸೋಡ್ ಅಪ್‌ಲೋಡ್ ಜಾಲೊ. ಸಮಯ್ ರೈನಾಚ್ಯಾ ಸಾಂಗಾತಾ ಆಶಿಷ್ ಚಂಚ್‌ಲಾನಿ, ಅಪೂರ್ವ ಮುಖೀಜ, ರಣ್‌ವೀರ್ ಅಲಹಾಬಾದಿಯಾ ತಸಲೆ ಆಧುನಿಕ್ ಯೂತ್ ಐಕಾನ್ ಹ್ಯಾ ಎಪಿಸೋಡಾಚೆ ವರಯ್ಣಾರ್ ಜಾವ್ನ್ ಆಸ್‌ಲ್ಲೆ. ಆನಿ ತೆದಾಳಾ ಉದೆಲಿ ಬಹುಚರ್ಚಿತ್ ವಿವಾದಾತ್ಮಕ್ ಘಡಿ. ಆಧುನಿಕ್ ಪಿಳ್ಗೆಚೊ ಹಾಸ್ಯ್ ಮನೋಭಾವ್ ಕಿತ್ಲ್ಯಾ ಕೀಳ್ ಮಟ್ಟಾಕ್ ದೆಂವ್ಲಾ ಮ್ಹಣ್ ವಾಚ್ಪ್ಯಾಂಕ್ ಕಳೊಂವ್ಚ್ಯಾಕ್ ಥೊಡ್ಯೊ ಗಜಾಲಿ ಆಸಾ ತಶೆಂ ಹಾಂವೆಂ ಹ್ಯಾ ಲೇಖನಾಂತ್ ಬರಯ್ಲ್ಯಾತ್. ಸಂಪಾದಕಾಚಿ ಕಾತರ್ ಪಡನಾತ್ಲ್ಯಾರ್ ತುಮ್ಕಾಂ ವಾಚುಂಕ್ ಮೆಳ್ಚಿಂ ಥೊಡಿಂ ಉತ್ರಾಂ ಎಕಾ ಕಾನಾಂತ್ ಆಯ್ಕೊನ್ ತ್ಯಾಚ್ ಕಾನಾಂತ್ ಭಾಯ್ರ್ ಸೊಡ್ಲ್ಯಾರ್ ಬರೆಂ. ಪರತ್ ಕೊಮಿಡಿನ್ ಕೆಲ್ಲ್ಯಾ ಆವ್ತಾರಾಕ್ ಪಾಟಿಂ ಯೆಯಾತ್. ವರಯ್ಣಾರ್ ರಣ್‌ವೀರ್ ಅಲಹಾಬಾದಿಯಾನ್ ವೆದಿರ್ ಆಸ್‌ಲ್ಲ್ಯಾ ಎಕಾ ಸ್ಪರ್ಧಿಕಾಲಾಗಿಂ ಸವಾಲ್ ಕೆಲೆಂ “ತುಂ ಹರ್‍ಯೆಕಾ ದಿಸಾ ತುಜ್ಯಾ ಆವಯ್-ಬಾಪಾಯ್ಚಿ ಲಂಯ್ಗಿಕ್ ಕ್ರಿಯಾ ಪಳೆಂವ್ಕ್ ಕಬ್ಲಾತ್ ದಿತಾಯ್ ವಾ…..”

(ದುಸ್ರೆಂ ಸವಾಲ್ ಬರೊಂವ್ಕ್ ಮ್ಹಾಕಾ ದಾಕ್ಶೆಣ್ ಜಾತಾ. ಪುಣ್ ತೆಂ ಪಯ್ಲ್ಯಾ ಸವಾಲಾಚ್ಯಾಕೀ ಪೊಜ್ಡೆಂ ಮ್ಹಣ್ ತುಮಿ ಸಮ್ಜಯಾ) ಹೆಂ ಸವಾಲ್ ಆಯ್ಕೊನ್ ತ್ಯಾ ಸ್ಟುಡಿಯೋಂತ್ ಆಸ್‌ಲ್ಲಿಂ ವೊಮ್ತೆಂ ಪಡೊನ್ ಹಾಸೊಂಕ್ ಲಾಗ್ಲಿಂ. ಪುಣ್ ರಣ್‌ವೀರಾಚೆಂ ಹೆಂ ಕೊಮಿಡಿ ಕಿಟಾಳ್ ಉಜೊ ಜಾವ್ನ್ ಖಂಯ್ಚ್ಯಾ ಮಾಪಾನ್ ಧೆಸ್ವಾಟ್ ಕರಿತ್ ಮ್ಹಳ್ಳ್ಯಾಚಿ ಅಂದಾಜ್ ಸಯ್ತ್ ತಾಂಕಾಂ ನಾತ್‌ಲ್ಲಿ. ಹೆಂ ವೀಡಿಯೊ ಕ್ಲಿಪ್ ವೈರಲ್ ಜಾಲೆಂ. ಬ್ರೇಕಿಂಗ್ ನ್ಯೂಜ್ ಜಾವ್ನ್ ಮಾದ್ಯಮಾಂನಿ ಆವಾಜ್ ಕರುಂಕ್ ಲಾಗ್ಲೆಂ. ಟಿವಿ ಆನಿ ಫೊನಾರ್ ಯೆಂವ್ಚ್ಯಾ ಹರ್‍ಯೇಕ್ ನಾಲಿಸಾಯೆಚ್ಯಾ ವಿಶಯಾಕ್ ಹೆಂ ಕೇವಲ್ ಮನಾರಂಜನಾಚ್ಯಾ ಉದ್ದೇಶಾನ್ ಘೆಜೆ ಮ್ಹಣ್ ಶೆರ್ಮಾಂವ್ ದಿಂವ್ಚ್ಯಾ ಎಕಾ ವರ್ಗಾಚ್ಯಾ ಲೊಕಾಕ್ ಸಯ್ತ್ ಹೆಂ Dark Humour  ಜಿರೊಂವ್ಕ್ ಕಶ್ಟ್ ಜಾಲೆ.

ಚಡತ್ತ್ ಗೆಲೊ ಲೊಕಾಚೊ ಆಕ್ರೋಶ್

ಹ್ಯಾ ಶೋ ವಿರೋಧ್ ಉಬ್ಜಲ್ಲ್ಯಾ ಜನಾಭಿಪ್ರಾಯಾಕ್ ರಾಜಕೀಯ್ ಫುಡಾರಿ ತಾಳೊ ಜಾಲೆ. ಮಹಾರಾಷ್ಟ್ರ ಮುಖ್ಯ್‌ಮಂತ್ರಿ ದೆವೇಂದ್ರ ಫಡ್ನವೀಸ್ ಆನಿ ಅಸ್ಸಾಮ್ ಮುಖ್ಯ್‌ಮಂತ್ರಿ ಹಿಮಂತ ಬಿಸ್ವ ಶರ್ಮಾನ್ ವಾಕ್ಮೂಲ್ ದೀವ್ನ್ “ಹ್ಯಾ ದೆಶಾಂತ್ ಅಭಿವೆಕ್ತಿ ಸ್ವಾತಂತ್ರ್ಯ್ ಆಸಾ ಮ್ಹಳ್ಯಾರ್ ತೊಂಡಾಕ್ ಆಯಿಲ್ಲೆಂ ಉಲೊಂವ್ಕ್ ಅಧಿಕಾರ್ ದಿಲಾ ಮ್ಹಳ್ಳೊ ಅರ್ಥ್ ನ್ಹಯ್. ಹ್ಯಾ ದೊಗಾಂ ತರ್ನಾಟ್ಯಾಂಚೆರ್ ಕಾನೂನ್ ಕ್ರಮ್ ಘೆಜೆ” ಮ್ಹಳ್ಳೆಂ. ದೆಶಾಚ್ಯಾ ವಿವಿಧ್ ರಾಜ್ಯಾಂನಿ ಸಮಯ್ ರೈನಾ ಆನಿ ರಣ್‌ವೀರ್ ಅಲಹಾಬಾದಿಯಾ ವಯ್ರ್ FIR ದಾಖಲ್ ಜಾಲಿಂ. ಹಾಂಕಾಂ ರಾಶ್ಟ್ರೀಯ್ ಸ್ತ್ರೀಯಾಂಚ್ಯಾ ಆಯೋಗಾನ್ ತನ್ಕೆಕ್ ಹಾಜರ್ ಜಾಂವ್ಕ್ ನೋಟಿಸ್ ದಿಲೆಂ. ವಿಶಯ್ ಪಾರ್ಲಿಮೆಂಟಾಕ್ ಸಯ್ತ್ ಪಾವ್ಲೊ. ಲೊಕಾಂನಿ ಹ್ಯಾ ಕಾರ್ಯಾಚೆ ಆದ್ಲೆ ಎಪಿಸೋಡ್ ಉಸ್ತಿತಾನಾ ಹಾಂತ್ಲೆ ಚಡಾವತ್ ಜೋಕ್ಸ್ ಕೀಳ್ ಅಭಿರುಚಿನ್ ಭರ್‍ಲಲೆ ಮ್ಹಣ್ ಕಳೊನ್ ಆಯ್ಲೆಂ. ಕೇಂದ್ರ್ ಸರ್ಕಾರಾನ್ ಹೊ ಎಪಿಸೋಡ್ ಡಿಲೀಟ್ ಕರುಂಕ್ ಯೂಟ್ಯೂಬ್ ಅಧಿಕಾರಿಂಕ್ ಸೂಚನ್ ದಿಲೆಂ. ಸಮಯ್ ರೈನಾನ್ ಹ್ಯಾ ಕಾರ್ಯಾಚೆ ಸಗ್ಳೆ ಎಪಿಸೋಡ್ ಸ್ವಖುಶೆನ್ ಡಿಲೀಟ್ ಕರ್‍ನ್ ಸೊಡ್ಲೆ. ಹ್ಯಾ ದೊಗಾಂಯ್ ತರ್ನಾಟ್ಯಾಂನಿ ಮಾಫಿ ಸಯ್ತ್ ಮಾಗ್ಲಿ. ಪುಣ್ ತಾಚೆಭಿತರ್ ವಿಶಯ್ ಸುಪ್ರೀಮ್ ಕೊಡ್ತಿಚ್ಯಾ ಬಾಗ್ಲಾರ್ ಆಸ್‌ಲ್ಲೊ. ಹೆಂ ಲೇಖನ್ ಬರೊಂವ್ಚ್ಯಾ ವೆಳಾರ್ ಸುಪ್ರೀಮ್ ಕೊಡ್ತಿನ್ ವಿಚಾರಣ್ ಸುರ್ವಾತ್ಲಾಂ ಆನಿ ನಿತಿಕರ್ತಾನ್ ದಿಲ್ಲೆಂ ಪಯ್ಲೆಂ ವಾಕ್ಮೂಲ್ ಅಶೆಂ ಆಸಾ. “ರಣ್‌ವೀರ್ ಅಲಹಾಬಾದಿಯಾನ್ ತಾಚ್ಯೆ ಮತಿಂತ್ಲೆ ಮ್ಹೆಳೆಂ ಹ್ಯಾ ಯೂಟ್ಯೂಬ್ ಕಾರ್ಯಾಂತ್ ಭಾಯ್ರ್ ಘಾಲಾಂ. ತಾಕಾ ಬಂದಿ ಕರುಂಕ್ ಆಮಿ ಆದೇಶ್ ದಿಂವ್ಚೆನಾಂವ್. ಪುಣ್ ತಾಚಿಂ ಉತ್ರಾಂ ಹ್ಯಾ ದೆಶಾಚ್ಯಾ ಸಮಾಜಿಕ್ ಆನಿ ನೈತಿಕ್ ಮೌಲ್ಯಾಂಕ್ ಅವ್ಮರ್ಯಾದ್ ಹಾಡ್ಚೆತಸಲಿಂ. ತಾಚೆ ಮುಕ್ಲೆ ಎಪಿಸೋಡ್ ಕೊಡ್ತಿಚೆಂ ವಿಚಾರಣ್ ಸಂಪ್ಚ್ಯಾ ಪರ್ಯಾಂತ್ ಯೂಟ್ಯೂಬಾರ್ ಮೊಕ್ಳಿಕ್ ಜಾಂವ್ಕ್ ನ್ಹಜೊ ಆನಿ ತಾಣೆಂ ದೇಶ್ ಸೊಡ್ನ್ ವಚನಾಶೆಂ ತಾಚೊ ಪಾಸ್‌ಪೋರ್ಟ್ ಪೊಲೀಸ್ ಸ್ಟೇಶನಾಂತ್ ದವ್ರುಂಕ್ ಜಾಯ್”.

INFLUENCERS ಸಾಮಾನ್ಯ್ ವೆಕ್ತಿ ನ್ಹಯ್

ಸಮಯ್ ರೈನಾ ಆನಿ ರಣ್‌ವೀರಾಚ್ಯಾ ಫೊಕಾಣಾಂಕ್ ಸಂತಾ ಸಿಂಗ್-ಬಂತಾ ಸಿಂಗಾಚೆ ಜೋಕ್ಸ್ ಮ್ಹಣ್ ನಿರ್ಲಕ್ಶಾ ಕರುಂಕ್ ಜಾಯ್ನಾ. ಕಿತ್ಯಾಕ್ ಸಮಾಜಿಕ್ ಜಾಳಿಜಾಗ್ಯಾಂನಿ ಹಾಂಕಾಂ ಮಿಲಿಯನ್ ಸಂಖ್ಯಾನ್ ಪಾಟ್ಲಾವ್ದಾರ್ ಆಸಾತ್. ದಿಸ್ಪೊಡ್ತೊ ಗ್ರಾಸ್ ಜೊಡುಂಕ್ ಹಾಂಕಾಂ ಆಸ್ಚಿ ವ್ಯಾಪ್ತ್‌ಚ್ ಯೂಟ್ಯೂಬ್ ವೀಡಿಯೊ ತಯಾರ್ ಕರ್‍ಚೆಂ. ಎಕಾ ಅಂದಾಜಾಪರ್ಮಾಣೆಂ ಹ್ಯೆ ವೃತ್ತೆಮುಕಾಂತ್ರ್ ಸಮಯ್ ರೈನಾನ್ 140 ಕೊರೊಡ್ ಆನಿ ರಣವೀರ್ ಅಲಹಾಬಾದಿಯಾನ್ 60 ಕೊರೊಡ್ ರುಪಯಾಂಚಿ ಆಸ್ತ್ ಪುಂಜಾಯ್ಲ್ಯಾ. ರಣವೀರ್ ಆಪ್ಲೆಂ ಯೂಟ್ಯೂಬ್ ಚ್ಯಾನೆಲ್ ‘ಬಿಯರ್ ಬೈಸೆಪ್ಸ್’ ಮುಕಾಂತ್ರ್ Podcast ವಾ ಸಂದರ್ಶನ್ ಕರ್‍ನ್ ಅತ್ಮೀಕ್ ಜಿವಿತ್, ಸನಾತನ್ ಧರ್ಮ್, ಧ್ಯಾನ ತಸಲ್ಯಾ ವಿಶಯಾಂಚೆರ್ ಭಾಶಣಾಂ ದಿತಾ. ಹಾಚ್ಯಾ ಕಾರ್ಯಾಂತ್ ಸರ್ವ್ ಶೆತಾಂತ್ಲೆ ಸೆಲೆಬ್ರಿಟಿ ಪಾವ್ತಾತ್. ಬಿಜೆಪಿ ಪಾಡ್ತಿಕ್ ಹೊ ಲಾಗ್ಶಿಲೊ. ಕಿತ್ಯಾಕ್ ಎದೊಳ್‌ಚ್ ಬಿಜೆಪಿ ಪಾಡ್ತಿಂತ್ಲೆ ಉಂಚ್ಲ್ಯಾ ಹಂತಾಚೆ ಮುಕೆಲಿ ಜೈಶಂಕರ್, ನಿತಿನ್ ಗಡ್ಕರಿ, ಸ್ಮೃತಿ ಇರಾನಿ ಹಾಚ್ಯಾ ಕಾರ್ಯಾಂತ್ ಸಯ್ರೆ ಜಾವ್ನ್ ಆಯ್ಲಾತ್. ಪಾವನಾತ್‌ಲ್ಲ್ಯಾಕ್ 2024ಚ್ಯಾ ಮಾರ್ಚ್ ಮ್ಹಯ್ನ್ಯಾಂತ್ ಖುದ್ದ್ ಪ್ರಧಾನಿ ಮೋದಿನ್ ರಣ್‌ವೀರ್ ಅಲಹಾಬಾದಿಯಾಕ್ ಯೂಟ್ಯೂಬ್ ಕ್ರಾಂತಿಕಾರಿ ಪುರಸ್ಕಾರ್ ದೀವ್ನ್ ಮಾನ್ ಕೆಲಾ. ಅಸಲ್ಯಾ ಇಂಟರ್‌ನೆಟ್ ಸೆಲೆಬ್ರಿಟಿಚೊ ಪ್ರಭಾವ್ ತರ್ನ್ಯೆ ಪಿಳ್ಗೆಚರ್ ವಿಶೇಸ್ ಜಾವ್ನ್ ಪಡ್ತಾ ಜಾಲ್ಲ್ಯಾನ್ ತಾಂಕಾಂ influencers ಮ್ಹಣ್ತಾತ್.

ಲೊಕಾಚೊ ರಾಗ್, ದ್ವೇಶ್ ಜಾಲೊಗಿ?

‘ಅತಿಯಾದರೆ ಅಮೃತವೂ ವಿಷ’. ಹ್ಯಾ ದೊಗಾಂ ತರ್ನಾಟ್ಯಾಂನಿ ಕೆಲ್ಲಿಂ ಆವ್ತಾರಾಂ ಪಳೆವ್ನ್ ಲೊಕಾಂನಿ ದಾಕಯಿಲ್ಲಿ ಪ್ರತಿಕ್ರಿಯಾ ಸ್ವಾಭಾವಿಕ್ ಮ್ಹಣ್ ಸುರ್ವೇರ್ ಭೊಗ್ಲೆಂ. ಕ್ರಮೇಣ್ ಲೊಕಾಚಿ ಸಮಾಜಿಕ್ ಕಾಳ್ಜಿ ದ್ವೇಶಾಚೆಂ ರೂಪ್ ಘೆಂವ್ಕ್ ಲಾಗ್ಲಿ. ರಣವೀರ್ ಅಲಹಾಬಾದಿಯಾಕ್ ಖುನಿ ಕರ್‍ಚಿ ಧಮ್ಕಿ ಯೇಂವ್ಕ್ ಸುರು ಜಾಲ್ಯಾತ್. ದಾಕ್ತೆರ್‍ನ್ ಜಾವ್ನಾಸ್ಚ್ಯಾ ತಾಚ್ಯೆ ಆವಯ್ಚ್ಯಾ ಕ್ಲಿನಿಕಾಕ್ ವಚೊನ್ ಥೊಡ್ಯಾಂನಿ ಗಲಾಟೊ ಕೆಲಾ. “ಆಮ್ಚಿ ತರ್ನಾಟಿಂ ಭುರ್ಗಿಂ ಆಮ್ಕಾಂ ಆಯ್ಕನಾಂತ್, ತಾಂಚೊ ರಾಗ್ ಹ್ಯಾ ದೊಗಾಂ ಕೊಮಿಡಿಯನಾಂಚೆರ್ ಕಾಡ್ತಾಂವ್” ಮ್ಹಣ್ ಥೊಡ್ಯಾಂನಿ ಚಿಂತ್ಲಾಂ ತಶೆಂ ಭೊಗ್ತಾ. ವಿಶೇಸ್ ಜಾವ್ನ್ 2014  ಉಪ್ರಾಂತ್ ಹಾಸ್ಯ್ ರಾಶ್ಟ್ರೀಯ್ ಚರ್ಚೆಚೊ ವಿಶಯ್ ಜಾಲಾ ತರ್, ಗರ್ಜೆಚೆ ವಿಶಯ್ ಖುಶಾಲಾಯೆನ್ ಘೆಂವ್ಚಿ ಮನಾಸ್ಥಿತಿ ಆಮ್ಚ್ಯಾ ಮಾದ್ಯಮಾಂಚಿ. ದೀಸ್‌ರಾತ್ ಧರ್ಮಾಚ್ಯಾ ನಾಂವಾನ್ ವೀಕ್ ವೊಂಕ್ಚೆ ಆಮ್ಚೆ ಪತ್ರ್‌ಕರ್ತ್, ರಾಜಕಾರಣಿ ಆತಾಂ ಸತೆವಂತ್ ವೆಕ್ತಿಬರಿ ನೈತಿಕ್ ಜವಾಬ್ದಾರಿವಿಶ್ಯಾಂತ್ ಉಲೊಂವ್ಕ್ ಲಾಗ್ಲ್ಯಾತ್. ಅಸಲ್ಯಾ ಕಾರ್ಯಾಂಕ್ ಲಾಗೊನ್ ಇಂಟರ್‌ನೆಟ್ ಹಾಸ್ಯ್ ಕಾರ್ಯಾಂಚೆರ್ ಸರ್ಕಾರಾನ್ ಖಾಡುಂ ಘಾಲ್ನ್ ‘ಸೆನ್ಸಾರ್‌ಶಿಪ್’ ಸುರ್ವಾತಿಜೆ ಮ್ಹಣ್ ಥೊಡ್ಯಾಂಚಿ ಸಲಹಾ. ಹಿ ರೂಲ್ ಜ್ಯಾರಿ ಜಾಲ್ಯಾರ್ ಲೊಕಾಚ್ಯಾ ಸವಾಲ್ ಕರ್‍ಚ್ಯಾ ಅಧಿಕಾರಾಚೆರ್‌ಚ್ ಸರ್ಕಾರ್ ನಿಯಂತ್ರಣ್ ದವ್ರುಂಕ್ ಪ್ರಾರಂಭ್ ಕರಿತ್ ಮ್ಹಣ್ ಆನಿ ಥೊಡ್ಯಾಂಚಿ ಅಬಿಫ್ರಾಯ್. ಎದೊಳ್‌ಚ್ ಕೊಮಿಡಿಯನ್ ಕುನಾಲ್ ಕಾಮ್ರಾಕ್ ಮೋದಿ ಸರ್ಕಾರಾಚಿ ಠಿಕಾ ಕೆಲ್ಲ್ಯಾಕ್ ವಿಮಾನ್ ಪಯ್ಣಾಚೊ ನಿರ್ಬಂದ್ ಘಾಲ್ಲೊ. ಕಪಿಲ್ ಶರ್ಮಾ ಶೋ ಕಾರ್ಯಾಂತ್ಲೊ ಫಾಮಾದ್ ನಟ್ ಕಿಕೂ ಶರ್ದಾನ್ ಏಕ್ ಧರ್ಮಿಕ್ ಮುಕೆಲಿ ಗುರ್ಮಿತ್ ರಾಮ್ ರಹೀಮಾಚ್ಯಾ ನೆಸ್ಣಾಚೆಂ ಅನುಕರಣ್ ಕೆಲ್ಲ್ಯಾಕ್ ತಾಣೆಂ ಜಯ್ಲಾಕ್ ವಚಜೆ ಪಡ್ಲೆಂ. 2015  ಇಸ್ವೆಂತ್ ಪ್ರವಾದಿ ಮೊಹಮ್ಮದಾಚೆಂ ವೆಂಗ್ಯ್‌ಚಿತ್ರ್ ಛಾಪ್‌ಲ್ಲ್ಯಾ ಫ್ರೆಂಚ್ ಖಬ್ರೆಪತ್ರ್ ಚಾರ್ಲಿ ಹೆಬ್ಡೊಚೆರ್ ಆಕಾಂತ್‌ವಾದಿಂನಿ ದಾಢ್ ಘಾಲ್ನ್ 12 ಜಣಾಂಚಿ ಖುನಿ ಜಾಲ್ಲಿ. ಥೊಡ್ಯಾ ಲೊಕಾಂನಿ ರಣ್‌ವೀರಾಚ್ಯೆ ಪಕ್ಶೆನ್ ಉಲೊವ್ನ್ “ಜಾಯ್ ಜಾಲ್ಲಿಂ ಫೊಕಾಣಾಂ ಕರುಂಕ್ ತಾಂಕಾಂ ಅಭಿವೆಕ್ತಿ ಸುಟ್ಕಾ ಆಸಾ. ತುಮ್ಕಾಂ ಮನ್ ನಾತ್ಲ್ಯಾರ್ ತಾಂಚೆಂ ಯೂಟ್ಯೂಬ್ ಚ್ಯಾನೆಲ್ ಪಳೆಯ್ನಾತ್ಲ್ಯಾರ್ ಜಾಲೆಂ” ಮ್ಹಣ್ ಶಾಣೆಪಣಾಚಿಂ ಅಭಿಪ್ರಾಯ್ ಉಚಾರ್‍ಲಿ. ಪುಣ್ ಖಂಯ್ಚೆ ಪಳೆಯ್ನಾಕಾತ್ ಮ್ಹಣ್ತಾಂವ್ ತೆಂಚ್ ಸೊಧುನ್ ಪಳೆಂವ್ಚಿ ಕಾಲೆತಿ ಆಯ್ಚ್ಯಾ ತರ್ನ್ಯೆ ಪಿಳ್ಗೆಚಿ.

ಖಂಯ್ ಪಾವತ್ ಆಮ್ಚಿ ಅಭಿರೂಚ್?

ಆಜ್‌ಕಾಲ್ ಸಮಾಜಿಕ್ ಜಾಳಿಜಾಗ್ಯಾಂಥಾವ್ನ್ ಪಯ್ಶೆ ಖಾಮಾವ್ಯೆತ್. ವೀಕ್ಶಕಾಂಕ್ ತುಮ್ಚ್ಯಾ ವೀಡಿಯೋಮುಕಾರ್ ಚಿಟ್ಕೊನ್ ಬಸೊಂವ್ಚಿ ಶಾಥಿ ಮಾತ್ರ್ ತುಮ್ಕಾಂ ಆಸಜೆ. ತಶೆಂ ಮ್ಹಣ್ ಹೆ ವೀಕ್ಶಕ್ ಬೊವ್ ಬರೆಂ ಆಸ್‌ಲ್ಲೆ ಕಶೆ ಪಳೆತಾತ್‌ಗೀ, ತಶೆಂಚ್ ವಿಚಿತ್ರ್ ಸಂಗ್ತಿ ಸಯ್ತ್ ಪಳೆಂವ್ಚ್ಯಾ ವೀಕ್ಶಕಾಂಚೊ ಏಕ್ ವರ್ಗ್ ಆಸಾ. ಅಸಲ್ಯಾ ವರ್ಗಾಚೆಂ ಧ್ಯಾನ್ ಆಕರ್ಶಿತ್ ಕರುಂಕ್ ಲಂಯ್ಗಿಕತಾ, ಹಿಂಸಾ, ದೊಡ್ಯಾ ಅರ್ಥಾಚೆಂ ಉಲೊವ್ಣೆಂ ಸುಲಬಾಯೆಚೊ ವಾಟೊ. ಹೈಸ್ಕೂಲಾಕ್ ಪಾವ್‌ಲ್ಲ್ಯಾ ಆಮ್ಚ್ಯಾ ಭುರ್ಗ್ಯಾಂನಿ ಪಯ್ಲೆ ಪಳೆಂವ್ಚೆಂ MTV Roadies, Big Boss ತಸಲಿಂ ಕಾರ್ಯಕ್ರಮಾಂ. ‘ಕಿತ್ಲೆ ಚಡ್ ಗಾಳಿ ಸೊವ್ತಾಯ್, ತಿತ್ಲ್ಲೊ ಚಡ್ ಲೊಕಾಂಚೊ ಪಾಟಿಂಬೊ ಮೆಳ್ತಾ’ ಮ್ಹಳ್ಳೆಂ ಸೊಂಪೆಂ ನಿಯಮ್ ಹ್ಯಾ ಕಾರ್ಯಾಂಚೆಂ. ಕಪಿಲ್ ಶರ್ಮಾ ತಸಲ್ಯಾ ಕಲಾಕಾರಾನ್ ಸಯ್ತ್ ಆಪ್ಲ್ಯಾ ಹಾಸ್ಯ್ ಕಾರ್ಯಾನಿಂ ಸ್ತ್ರೀವೇಸ್ ನ್ಹೆಸ್‌ಲ್ಲ್ಯಾ ದಾದ್ಲ್ಯಾಂಕ್ ನಿರಂತರ್ ಅಕ್ಮಾನ್ ಕರ್‍ತಾನಾ ವೀಕ್ಶಕ್ ಹಾಸೊಂಕ್ ಸುರು ಕರ್‍ತಾತ್. ಕ್ರಿಕೆಟ್ ಮ್ಯಾಚ್ ಲೈವ್ ಪಳೆಯ್ತಾನಾ ಕೊಹ್ಲಿ, ರೋಹಿತ್ ಶರ್ಮಾ ತಸಲ್ಯಾ ಸ್ಟಾರ್ ಖೆಳ್ಗಾಡ್ಯಾಂನಿ ಗಾಳಿ ಸೊಂವ್ಚೆಂ, ವಿಕೆಟಿಂಕ್ ಚಿಡ್ಕಾಯಿಲ್ಲೊ ಸ್ಟಂಪ್ ಮೈಕ್ ರೆಕೋರ್ಡ್ ಕರ್‍ನ್ ಸಗ್ಳ್ಯಾ ಸಂಸಾರಾಕ್ ಪ್ರಸಾರ್ ಕರ್‍ತಾ. ಅಸಲೆ ಖೆಳ್ಗಾಡಿ ಆಮ್ಚ್ಯಾ ಭುರ್ಗ್ಯಾಂಕ್ ಆದರ್ಶ್ ಜಾವ್ನ್ ತಾಂಚ್ಯಾ ವರ್ತನಾಚೆಂ ಅನುಕರಣ್ ಪ್ರಾರಂಭ್ ಜಾತಾ. ಸಬಾರ್ ವರ್‍ಸಾಂಥಾವ್ನ್ ಆಮ್ಚ್ಯಾ ಗಾಂವಾಂನಿ ‘ಸೂಪರ್ ಹಿಟ್’ ಜಾಲ್ಲ್ಯಾ ‘ತುಳು ಹಾಸ್ಯ್ ನಾಟಕ್’ ಪ್ರಕಾರಾಂತ್ ಸಯ್ತ್ ಚಡಾವತ್ ಲೊಕಾಕ್ ಮಝಾ ಯೆಂವ್ಚಿ ಕಲಾವಿದಾಂನಿ ಎಕಾಮೆಕಾಚಿಂ ಖೆಳ್ಕುಳಾಂ ಕರ್‍ತಾನಾ. ಹೆಂ ಪಳೆವ್ನ್ ವಾಡ್‌ಲ್ಲಿಂ ಭುರ್ಗಿಂ ಟ್ರಾಫಿಕಾಂತ್ ಇಲ್ಲೆಂ ಚಡುಣೆಂ ಘಡ್ಲ್ಯಾರೀ ತೊ ಬ್ಯಾ.. ಸಬ್ದ್ ವಾಪಾರುಂಕ್ ನರ್ಗನಾಂತ್. ಆತಾಂ ಫಿಲ್ಮಾಂನಿ ಸಯ್ತ್ ಹೊ ಸಬ್ದ್ ವಾಪಾರ್‍ಯೆತ್. ತೆಂಡ್ಲಿಂ, ಬೊಬ್ಳಿಂ ಮ್ಹಳ್ಳೆ ಸಬ್ದ್ ವಿಚಿತ್ರ್ ರಿತಿನ್ ಪ್ರಯೇಗ್ ಕರಿನಾಸ್ತಾನಾ ಆಮ್ಚೆಂ ವೊಜ್ಯಾಚೆಂ ಕಾರ್ಯೆಂ ಗಮ್ಮತ್ ಜಾಯ್ನಾ ಮ್ಹಳ್ಳೆಂ ಚಿಂತಪ್. ಚೆರ್ಕ್ಯಾಂಚ್ಯೆ ಜಿಬೆರ್ Brother ಸಬ್ದ್ Bro ಜಾಲ್ಲೊ. ಆತಾಂ ಚಲಿಯೊ ಸಯ್ತ್ ಎಕಾಮೆಕಾ ಕಿತ್ಯಾಕ್ Bro ಮ್ಹಣ್ತಾತ್ ಮ್ಹಳ್ಳೆಂ ಸಮ್ಜನಾ. ಆಯ್ಚ್ಯಾ ಕಾಳಾರ್ ಬೆಸ್ಟ್ ಫ್ರೆಂಡಾಚೆಂ ವ್ಯಾಖ್ಯಾನ್ ಮ್ಹಳ್ಯಾರ್ ‘ಕೋಣ್ ಮ್ಹಜ್ಯೊ ಗಾಳಿ ಆಯ್ಕೊನ್ ಕಿತೆಂಚ್ ಬೆಜಾರ್ ಕರಿನಾಸ್ತಾನಾ ತ್ಯಾಚ್ ಮಾಪಾನ್ ಮ್ಹಾಕಾ ಪಾಟಿಂ ಸೊವ್ತಾಗಿ ತೊ ಮ್ಹಜೊ ಈಶ್ಟ್’.

ಸಂಪ್ಣಿ

ಮಂಗ್ಳುರ್‍ಚ್ಯಾ ಗೊವ್ಳಿಬಾಪಾಂನಿ ತಾಂಚ್ಯಾ ಎಕಾ ಸಂದರ್ಶನಾಂತ್ ಉಲ್ಲೇಖ್ ಕೆಲ್ಲಿಂ ಉತ್ರಾಂ. “ಉಲಯ್ನಾತ್‌ಲ್ಲ್ಯಾ ಉತ್ರಾಂಚೊ ಧನಿ ತುಂ, ಉಲಯಿಲ್ಲ್ಯಾ ಉತ್ರಾಂಚೊ ಗುಲಾಮ್ ತುಂ”. ಕೊಣೆಂಯ್ ಗಾಳಿ-ಶಿರಾಪ್ ದಿಂವ್ಚೆಂ ಆಮ್ಕಾಂ ಪಸಂದ್ ಜಾತಾ ಮ್ಹಳ್ಯಾರ್ ಆಮ್ಕಾಂ ಸಾಂಗೊಂಕ್ ಜಾಯ್ನಾತ್ಲೆಂ ತಿಂ ಸಾಂಗೊನ್ ಆಸಾತ್ ಮ್ಹಳ್ಳೊ ವಿಕೃತ್ ಸಂತೊಸ್ ಭೊಗ್ಚೊ. ಆಯ್ಲೆವಾರ್ ಎಕಾ ತರ್ನ್ಯಾ ಕೊಮಿಡಿಯನಾನ್ ಪ್ರಖ್ಯಾತ್ ಲೇಖಕ್ ಜಾವೇದ್ ಅಖ್ತರಾಲಾಗಿಂ ಉಲೊವ್ಣ್ಯಾಂತ್ ಅಶ್ಲೀಲ್ ಉತ್ರಾಂ ವಾಪಾರ್‍ಚ್ಯಾ ವಿಶ್ಯಾಂತ್ ತಾಚಿ ಅಭಿಪ್ರಾಯ್ ವಿಚಾರ್‍ಲ್ಯಾ ವೆಳಾರ್ ತಾಣೆಂ ದಿಲ್ಲಿ ಜಾಪ್ “ಭಾರತಾಚ್ಯಾ ಜಾಯ್ತ್ಯಾ ಗಾಂವಾಂನಿ ಲೊಕಾಕ್ ಚಾಪ್ಪೆ ಜೆವಣ್ ಮಾತ್ರ್ ಮೆಳ್ತಾ. ಮ್ಹಳ್ಯಾರ್ ಗೊಡ್ಶೆಂ, ಆಮ್ಟಾಣ್ ವಾಪಾರುಂಕ್ ತಾಂಕ್ ನಾ ತಿತ್ಲಿ ದುಬ್ಳಿಕಾಯ್. ತಸಲೊ ಲೋಕ್ ಶಿತಾ ಸಾಂಗಾತಾ ತರ್ನಿ ಮಿರ್ಸಾಂಗ್ ಚಾಬೊನ್ ಜೆವ್ತಾ. ಗಾಳಿ-ಶಿರಾಪ್ ತುಜ್ಯೆ ಜಿಬೆಕ್ ತರ್ನಿ ಮಿರ್ಸಾಂಗ್ ಆಸ್‌ಲ್ಲೆಬರಿ. ಕೆದಾಳಾ ಬರ್‍ಯಾ ಉತ್ರಾಂನಿ, ಸ್ವಾದಿಶ್ಟ್ ಉತ್ರಾಂನಿ ತುಕಾ ಆಯ್ಕೊಂವ್ಚ್ಯಾ ವೆಕ್ತಿಚೆರ್ ಪ್ರಭಾವ್ ಘಾಲ್ಚಿ ತಾಂಕ್ ನಾ ತೆದಾಳಾ ತುಂ ಪೊಜ್ಡೆಂ ಉಲಯ್ತಾಯ್. ತಶೆಂ ಜಾವ್ನ್ ಪಯ್ಲೆಂ ಉಲೊವ್ನ್, ಹಾಂವ್ ಕಿತೆಂ ಉಲಯ್ಲೊಂ ಮ್ಹಣ್ ಚಿಂತ್ಚ್ಯಾಕೀ ಪಯ್ಲೆಂ ಇಲ್ಲೆಂ ಚಿಂತುನ್ ಮಾಗಿರ್ ಉಲೊವ್ಯಾಂ”.

——–

ಆಯ್ಚ್ಯಾ ಕಾಳಾರ್ ಬೆಸ್ಟ್ ಫ್ರೆಂಡಾಚೆಂ ವ್ಯಾಖ್ಯಾನ್ ಮ್ಹಳ್ಯಾರ್ ‘ಕೋಣ್ ಮ್ಹಜ್ಯೊ ಗಾಳಿ ಆಯ್ಕೊನ್ ಕಿತೆಂಚ್ ಬೆಜಾರ್ ಕರಿನಾಸ್ತಾನಾ ತ್ಯಾಚ್ ಮಾಪಾನ್ ಮ್ಹಾಕಾ ಪಾಟಿಂ ಸೊವ್ತಾಗಿ ತೊ ಮ್ಹಜೊ ಈಶ್ಟ್’.

✍️ –ಮನೋಜ್ ಫೆರ್ನಾಂಡಿಸ್, ಕಿರೆಂ