ಪ್ರಾಚಿತ್ ಕಾಳ್ ಕ್ರೀಸ್ತಾಚ್ಯಾ ಪಾಟ್ಲಾವ್ದಾರಾಂಕ್ ಜಿಣಿ ನವ್ಯಾನ್ ರುತಾ ಕರುಂಕ್ ಲಾಬ್ಚೆಂ ಏಕ್ ಆಪೊವ್ಣೆಂ. ಹೊ ಕಾಳ್ ಆಮ್ಚೊ ಮನೋಭಾವ್, ಮೌಲ್ಯಾಂ ಆನಿ ಬರೊ ಮನ್ಶಾಸಂಬಂದ್ ರುತಾ ಕರುಂಕ್ ಆಧಾರ್ ಜಾಯ್ಜೆ. ಲೂಕಾಚೊ ಅಧ್ಯಾಯ್ 3:10-14 ಹ್ಯಾ ವಿಶಿಂ ಸ್ಪಶ್ಟ್ ಕಳಿತ್ ಕರ‍್ತಾ. ಸ್ನಾನಿಕ್ ಜುವಾಂವ್ ಆಪ್ಲ್ಯೆ ಶಿಕೊವ್ಣೆಂತ್ ಹೊ ವಿಶಯ್ ದಾಂಬುನ್ ಸಾಂಗ್ಲಾ. ಆಮಿ ಕಿತೆಂ ಕರಿಜೆ ಮ್ಹಣ್ ಲೊಕಾನ್ ವಿಚಾರ್‌ಲ್ಲ್ಯಾ ವೆಳಾರ್ ಸ್ನಾನಿಕ್ ಜುವಾಂವ್ನ್ ದಿಲ್ಲೊ ಸಂದೇಶ್:

1.“ತುಮ್ಚೆಮಧೆಂ ಕೊಣಾಲಾಗಿಂ ದೋನ್ ದಗ್ಲೆ ಆಸಾತ್, ತೊ ಕಾಂಯ್ ನಾತ್ಲಲ್ಯಾಕ್ ಏಕ್ ದೀಂವ್, ಆನಿ ಜೇಂವ್ಕ್ ಖಾಂವ್ಕ್ ಜಾಯ್‌ಪರ‍್ತೆಂ ಆಸ್ಲಲೊಯ್ ತಶೆಂಚ್ ಕರುಂ”: ಸ್ನಾನಿಕ್ ಜುವಾಂವ್ ತಾಚೆಂಲಾಗಿಂ ಚಡಿತ್ ಆಸ್‌ಲ್ಲೆಂ ದೀಂವ್ಕ್ ಸಾಂಗನಾ ಬಗಾರ್ ತಾಂಚೆಲಾಗಿಂ ಆಸ್‌ಲ್ಲ್ಯಾಂತ್ಲೆಂ ವಾಂಟುಂಕ್ ಸಾಂಗ್ತಾ. ಗ್ರೇಸ್ತ್ ಕಾಯ್ ಪುಂಜಾವ್ನ್ ದರ‍್ಚೆಂ ಪಾತಕ್ ಕಿತ್ಯಾಕ್ ಹ್ಯಾ ವರ್ವಿಂ ದುಸ್ರ್ಯಾಂಚ್ಯಾ ಮೂಳ್‌ಭುತ್ ಗರ್ಜಾಂಕ್ ಆಮಿ ಕಾರಣ್ ಜಾತಾಂವ್. ಮಹಾತ್ಮಾ ಗಾಂಧೀಜಿಚಿಂ ಉತ್ರಾಂ “ಸಂಸಾರಾಂತ್ ಸರ್ವಾಂಕ್ ಜಾಯ್‌ಪರ‍್ತೆಂ ಆಸಾ ಪುಣ್ ವಿಪರ್ಯಾಸ್ ಕಿತೆಂಗೀ ಮ್ಹಳ್ಯಾರ್ ಮನ್ಶಾಚ್ಯಾ ಸ್ವಾರ್ಥಾವರ್ವಿಂ ತೆಂ ಥೊಡ್ಯಾಂಚ್ಯಾ ಹಾತಾಂತ್ ಮಾತ್ರ್ ಆಸಾ”. 2020ವ್ಯಾ ಗ್ಲೋಬಲ್ ಹಂಗರ್ ಇಂಡೆಕ್ಸ್ ವರ್ದಿ ಆನಿ FAO ವರ್ದೆಪ್ರಕಾರ್ ಭಾರತಾಂತ್ 14% ಲೋಕ್ (19 ಕರೊಡ್ ಲೊಕಾಂತ್) ಪೌಶ್ಟಿಕಾಂಶಾನ್ ಭರ್‌ಲ್ಲೆಂ ಖಾಣ್ ಮೆಳನಾಸ್ತಾಂ ಕಶ್ಟೊನ್ ಆಸಾತ್. ಹ್ಯೆ ವರ್ದೆಪ್ರಕಾರ್ 107 ದೆಶಾಂಪಯ್ಕಿ ಭಾರತ್ ದೇಶ್ 94 ಸ್ಥಾನಾರ್ ಆಸಾ. ಈ ವರ್ದಿ ಪರ್ಗಟ್ ಜಾತಾನಾ ಭಾರತಾಂತ್ 68 ಮಿಲಿಯನ್ ಟನ್ ಖಾಣ್ ಆಸ್‌ಲ್ಲೆಂ ಆನಿ ಸಕ್ಡಾಂಕ್ ಪಾವ್ತಾತಿತ್ಲೆಂ ಆಸ್‌ಲ್ಲೆಂ, ಪುಣ್ ಪ್ರಸ್ತುತ್ ಸ್ಥಿತಿ ಆಮಿ ಜಾಣಾಂವ್ ದೀಸ್ ಏಕ್ ಜೆವಣ್ ಲಾಬನಾಸ್ತಾಂ ನಿದೊಂಕ್ ವೆಚೊ ಲೋಕ್ ಕೊರೊಡಾಂನಿ ಆಸಾ.

2.ತುಮ್ಕಾಂ ನಿಶ್ಚಯ್ ಕೆಲ್ಲೆಪ್ರಾಸ್ ಚಡಿತ್ ವಸೂಲ್ ಕರಿನಾಕಾತ್: ಕೊಣಾಯ್ಚೆಂ ಶೋಶಣ್ ಕರಿನಾಕಾತ್. ಕ್ರೀಸ್ತೀ ಸಮುದಾಯಾಂತ್ ಆನಿ ಭಾರತೀಯ್ ಸಮಾಜೆಂತ್ ವಿವಿಧ್ ರಿತಿಚೆಂ ಶೋಶಣ್ ಆಜೂನೀ ಚಾಲ್ತೆರ್ ಆಸಾ. ಭಾರತಾಚ್ಯಾ ಸ್ರ್ರೀಂಯಾಂಚೆರ್ ಜಾಂವ್ಚೆ ಹಲ್ಲೆ ದೀಸಾನ್‌ದೀಸ್ ಚಡೊನ್ ಆಸಾತ್. ಆಜ್ ಸ್ತ್ರೀ ಶೋ಼ಶಣ್ ಉಂಚಾಯೆಕ್ ಚಡ್ಲಾಂ. ಕಾಮೆಲ್ಯಾಂಕ್ ಕಾನೂನ್ ರಿತಿನ್ ಜೊಕ್ತೊ ಸಾಂಬಾಳ್ ದೀನಾಸ್ತಾಂ ತಾಂಚಿಂ ಹಕ್ಕಾಂ ಕೊನ್ಶಾಕ್ ಲೊಟುನ್ ತಾಂಚಿ ಜಿಣಿ ಕಶ್ಟಾಂಚಿ ಜಾಂವ್ಕ್ ಪಾವ್ಲ್ಯಾ.

3.ಕೋಣ್ ಮನ್ಶಾಕ್‌ಯೀ ಜುಲುಮ್ ಕರಿನಾಕಾತ್, ಕೊಣಾಯ್ಚೆರ್‌ಯೀ ಫಟ್ ಫಿರ್ಯಾದ್ ಮಾಂಡಿನಾಕಾತ್: ಹರ್ಯೆಕ್ಲ್ಯಾ  ಮನ್ಶಾಕ್ ಎಕೆ ವಾ ಆನ್ಯೆಕೆ ರಿತಿಚೊ ಅಧಿಕಾರ್ ಆಸಾ ಪುಣ್ ಉಂಚ್ಲ್ಯಾಂ ಸ್ಥಾನಾರ್ ಆಸ್ಲಲ್ಯಾಂತ್ ಚಡಿತ್ ಅಧಿಕಾರ್ ಆಸಾ. ಅಧಿಕಾರ್ ಆಸ್ಚೊ ಜವಾಬ್ದಾರೆನ್ ವಾವ್ರುಂಕ್ ತರೀ ಸ್ವಾರ್ಥಾ ಆನಿ ವಯಕ್ತಿಕ್ ದ್ವೇಶಾನ್ ಅಧಿಕಾರ್ ನಾಸ್ ಕರುಂಕ್ ವಾಪಾರ್‌ಲ್ಲಿಂ ಘಡಿತಾಂ ಜಾಯ್ತಿಂ ಆಸಾತ್. ಅಧಿಕಾರ್ ದುರುಪಯೋಗ್ ಕರ‍್ಚೆವಿರೋಧ್ ಪ್ರತಿಭಟನ್ ಕರ್ಚೆಂ ಹರ್ಯೆಕ್ಲ್ಯಾಚೆಂ ಕರ್ತವ್ಯ್.

ಆಸ್‌ಲ್ಲೆಂ ವಾಂಟುನ್ ಘೆವ್ನ್, ಶೋಶಣ್ ಪಯ್ಸ್ ಕರುನ್, ಅಧಿಕಾರ್ ದುರುಪಯೋಗ್ ರ‍್ಚೊ ಚುಕಯ್ಲ್ಯಾರ್ ಮಾತ್ರ್ ಆಮಿ ಕರ್ಚ್ಯಾ ಮಾಗ್ಣ್ಯಾಕ್, ಉಪಾಸಾಕ್, ದಾನ್‌ಧರ್ಮಾಕ್ ಅರ್ಥ್ ಲಾಬ್ತಾ. ಹಿ ಬದ್ಲಾವಣ್ ಆಮ್ಕಾಂ ತಶೆಂಚ್ ಆಮ್ಚೊ ಸಮುದಾಯ್ ರುತಾ ಕರುಂಕ್ ಆಧಾರ್ ದಿತಾ. ಆಮೊಸ್ ಪ್ರವಾದ್ಯಾ ನೀಜ್ ಉಪಾಸ್ ಹ್ಯಾ ವಿಶಿಂ ಉಲೊವ್ನ್ ಸಾಂಗ್ಲಲಿಂ ಉತ್ರಾಂ “ಬಗಾರ್ ನೀತ್ ಉದ್ಕಾಭಾಶೆನ್ ವ್ಹಾಳೊಂದಿ ಆನಿ ಪ್ರಾಮಾಣಿಕ್ಪಣ್ ಥಾಂಬನಾಸ್ತಾಂ ವ್ಹಾಂವ್ತಲ್ಯಾ ವ್ಹಾಳಾಭಾಶೆನ್” (ಆಮೊಸ್ 5:24).

4.ಡಿಜಿಟಲ್ ಉಪಾಸ್: ಸ್ನಾನಿಕ್ ಜುವಾಂವ್ಚ್ಯೆ ಶಿಕೊವ್ಣೆಂತ್ ಏಕ್ ಮೇಟ್ ಮುಕಾರ್ ವಚೊನ್ ಪ್ರಸ್ತುತ್ ಕಾಳಾಕ್ ಚಡ್ ಗರ್ಜೆಚೊ ಉಪಾಸ್ ಮ್ಹಳ್ಯಾರ್ ಡಿಜಿಟಲಾಚೊ. ಆಜ್ ಆಮಿ ಡಿಜಿಟಲ್ ಸಂಗ್ತಿAಕ್ ಚಡಿತ್ ರಿತಿನ್ ಲಬ್ದಲ್ಯಾಂವ್. ಡಿಜಿಟಲ್ ವಸ್ತು ಹಾತಾಂತ್ ನಾಂತ್ ತರ್ ಜಿವಿತ್ ಅಸಾಧ್ ಮ್ಹಳ್ಳ್ಯೆ  ಸ್ಥಿತೆಕ್ ಪಾವ್ಲ್ಯಾಂವ್. ಪ್ರಾಚಿತ್ ಕಾಳಾರ್ ಡಿಜಿಟಲ್ ಉಪಾಸಾವಿಶಿಂ ಚಿಂತಪ್ ಆಟೊಂವ್ಚೆಂ ನಿಜಾಯ್ಕಿ ಗರ್ಜೆಚೆಂ. ಸ್ನಾನಿಕ್ ಜುವಾಂವ್ ಹ್ಯಾ ಕಾಳಾರ್ ಆಸ್‌ಲ್ಲೊ ತರ್ ಹೊ ವಿಶಯ್ ಖಂಡಿತ್ ಜಾವ್ನ್ ಕುಡ್ಸಿತೊ. ಪಾಪಾ ಫ್ರಾನ್ಸಿಸಾನ್ ಹೊ ವಿಶಯ್ ಜಾಯ್ತೆಪಾವ್ಟಿಂ ಉಲ್ಲೇಖ್ ಕೆಲಾ. ರ‍್ಯಾ ಸಂಬಂದಾಕ್, ಗುಂಡಾಯೆಚ್ಯೆ ಆಧ್ಯಾತ್ಮಿಕತಾಯೆಕ್ ಆನಿ ಡಿಜಟಲ್ ಸಂಸಾರಾಚ್ಯಾ ಘುಸ್ಪೊಡ್ ಗೊಂದೊಳಾಂತ್ ಶಿರ್ಕನಾ ಜಾಂವ್ಚ್ಯಾಂಕ್ ಸಮತೋಲನ್ ರಾಕೊಂಕ್ ತಾಣಿಂ ಉಲೊ ದಿಲಾ. ಸಮಾಜಿಕ್ ಜಾಳಿಜಾಗ್ಯಾಂನಿ ಸಂಪೂರ್ಣ್ ಮಗ್ನ್ ಜಾಲ್ಯಾರ್ ಎಕ್ಸುರ್‌ಪಣ್ ಧೊಸ್ತೆಲೆಂ ಆನಿ ನೀಜ್ ಸಂಬಂದ್ ರುತಾ ಕರುಂಕ್ ಜಾಂವ್ಚೊನಾ. ಡಿಜಿಟಲ್ ಸಂವಾದಾಚ್ಯಾಕೀ ಚಡ್ ಎಕಾಮೆಕಾ ಸಂಬಂದ್ ರುತಾ ಜಾಯ್ಜೆ. ಪಾಪ್‌ಸಾಯ್ಬ್ ಡಿಜಟಲ್ ತಂತ್ರಜ್ಞಾನಾ ವಿರೋಧ್ ನ್ಹಯ್ ಬಗಾರ್ ಡಿಜಟಲ್ ಸಂಗ್ತಿಂ ಜವಾಬ್ದಾರೆನ್ ವಾಪಾರುಂಕ್ ಜಾಯ್ ಮ್ಹಣ್ ಸಾಂಗ್ತಾ. 2023 ವ್ಯಾ ವರ‍್ಸಾ ಪಾಪಾ ಫ್ರಾನ್ಸಿಸಾನ್ ‘ಭಲಾಯ್ಕೆಬರಿತ್ ಪರಿಸರ್ ಸಂಪರ್ಕ್’ ಮ್ಹಳ್ಳೊ ವಿಶಯ್ ಉಲ್ಲೇಖ್ ಕರುನ್ ಸಾಂಗ್ಚೆಂ ತರ್ ಡಿಜಿಟಲ್ ಸಂಪರ್ಕ್ ಆನಿ ಎಕಾಮೆಕಾಚ್ಯಾ ಸಂಬಂದಾಚಿ ತಾಕ್ಡಿ ಸಾರ್ಕಿ ಆಸ್ಲ್ಯಾರ್ ಜಿವಿತ್ ಬರೆಂ ಜಾಂವ್ಕ್ ಸಾಧ್.

ಉಪಾಸಾವಿಶಿಂ ಗರ್ಜೆಚಿ ಮಾಹೆತ್ ಬರ್ಯಾಂತ್ಲ್ಯಾ ಬರ‍್ಯಾ ಬರೊವ್ಪ್ಯಾಂನಿ ಹ್ಯಾ ಅಂಕ್ಯಾಂತ್ ಗುಂಡಾಯೆಚಿ ದೀಶ್ಟ್ ಘಾಲ್ನ್ ಬರಯ್ಲ್ಯಾಂತ್. ಪ್ರಸ್ತುತ್ ಕಾಳಾಕ್ ಖಂಯ್ಚ್ಯೆ ರಿತಿಚೊ ಉಪಾಸ್ ಗರ್ಜೆಚೊ ಮ್ಹಣ್ ಸಮ್ಜೊನ್ ಹ್ಯಾ ವಿಶಿಂ ಚಿಂತ್ಪಾಕ್ ಆಟೊಂವ್ಚ್ಯೆ ದಿಶೆನ್ ಹೊ ಅಂಕೊ ಗುಂತ್ಲಾ. ಜಾಯ್ತ್ಯಾಂಕ್ ಹೊ ಉಪ್ಕರ‍್ತೊಲೊ ಮ್ಹಣ್ ಪಾತ್ಯೆತಾಂ.

ಬಾಪ್ ಐವನ್ ಸೊಜ್, ಕಾರ್ಮೆಲಿತ್