ಸೊಮಿಯಾಚ್ಯಾ ಪವಿತ್ರ್ ಕಾಳ್ಜಾಚೆಂ ಭಕ್ತಿಪಣ್ ಪವಿತ್ರ್ ಸಭೆಕ್ ನವ್ಯಾನ್ ಒಳ್ಕೆಕ್ ಹಾಡ್ಚೆಂ ‘ದಿಲೆಕ್ಸಿತ್ ನೊಸ್’ (ತಾಣೆಂ ಆಮ್ಚೊ ಮೋಗ್ ಕೆಲಾ), ಪಾಪಾ ಫ್ರಾನ್ಸಿಸಾಚೆಂ ಚೊವ್ತೆಂ ವಿಶ್ವ್‌ಪತ್ರ್. ಹೆಂ ಪತ್ರ್ ಜೆಜುಚ್ಯಾ ಪವಿತ್ರ್ ಕಾಳ್ಜಾವಿಶಿಂ ಉಜ್ವಾಡ್ ಫಾಂಕಯ್ತಾ. 1673 ವ್ಯಾ ವರ್‍ಸಾ ಸಾಂ. ಮಾರ್ಗರೆಟ್ ಮೇರಿ ಅಲೊಕೊಕ್, ಹಿಕಾ ಸೊಮಿಯಾನ್ ದಿಶ್ಟಿಕ್ ಪಡೊನ್, ತಾಚ್ಯಾ ಪವಿತ್ರ್ ಕಾಳ್ಜಾಥಾವ್ನ್ ಉಮಾಳ್ಚೊ ಮೋಗ್ ಸಂಸಾರಾಕ್ ಪ್ರಸಾರುಂಕ್ ಉಲೊ ದಿವ್ನ್ 350 ವರ್‍ಸಾಂ ಸಂಪ್ತಾನಾ ಹೆಂ ವಿಶ್ವ್‌ಪತ್ರ್ ಪರ್ಗಟ್ ಜಾಲಾಂ. ಪವಿತ್ರ್ ಕಾಳ್ಜಾಚೆಂ ಭಕ್ತಿಪಣ್ ಫಕತ್ ಎಕೆ ಕುಡಿಚ್ಯಾ ಭಾಗಾಚೆಂ ನ್ಹಯ್, ಬಗಾರ್ ಮನಿಸ್ ಜಾಲ್ಲ್ಯಾ ಜೆಜುಥಂಯ್ ಆಧಾರ್‍ಚೆಂ ಭಕ್ತಿಪಣ್, ತಾಚ್ಯಾ ಅಗಣಿತ್ ಮೊಗಾಚ್ಯೆ ವೆಂಗೆಂತ್ ಯೇಂವ್ಕ್ ಸಂಸಾರಾಕ್ ದಿಲ್ಲೆಂ ಆಪೊವ್ಣೆಂ, ಮ್ಹಣ್ತಾ ಪಾಪಾ.

ಹ್ಯಾ ವರ್‍ಸಾಚ್ಯೆ ಆಖೇರಿಕ್ ‘ಜೆಜುಚೊ ಅಪರಿಮಿತ್ ಮೋಗ್’ ಆಟಾಪ್ಚೆಂ ವಿಶ್ವ್‌ಪತ್ರ್ ಆಮ್ಕಾಂ ಪಾವ್ಲಾಂ ಆಸ್ತಾಂ, ತ್ಯಾಚ್ ಜೆಜುಚ್ಯಾ ಮೊಗಾನ್ ಆಪ್ಲ್ಯಾ ಮರ್‍ಣಾ ಉಪ್ರಾಂತ್‌ಯೀ ಹೆರಾಂಚ್ಯೆ ಜಿಣಿಯೆಂತ್ ಉಜ್ವಾಡ್ ಫಾಂಕೊವ್ನ್ ಭಾವಾಡ್ತಾಕ್ ಸಾಕ್ಸ್ ದಿಲ್ಲ್ಯಾ ಕಾಂಯ್ ಥೊಡ್ಯಾ ಯುವಜಣಾಂಚೊ ಉಗ್ಡಾಸ್ ಕಾಡ್ಚೊ ವಾಜ್ಬಿ ಮ್ಹಣ್ ಮ್ಹಾಕಾ ಭೊಗ್ತಾ.

ಆಶೀಸ್ ಡಿಸೋಜಾ: ಗಾಂವಾನ್ ಅತ್ತಾವರ್‍ಚೊ. ಪೂತ್ ಶ್ರೀ ಆಲ್ಫೋನ್ಸ್ ಡಿಸೋಜಾ ಆನಿ ಶ್ರೀಮತಿ ಸೋನಿಯಾ ಡಿಸೋಜಾಚೊ. ತೆರಾ ವರ್‍ಸಾಂಚೊ. ಅಚಾನಕ್ ತೊ ಡೆಂಗ್ಯೂ ಪಿಡೆಕ್ ವೊಳಗ್ ಜಾಲೊ. ಆಸ್ಪತ್ರೆಂತ್ ಬರೊ ಜಾವ್ನ್ ಘರಾ ವೆಚ್ಯಾಕ್ ತಯಾರಾಯ್ ಕರ್‍ತಾನಾ ಕಾಳ್ಜಾಘಾತಾಕ್ ಬಲಿ ಜಾಲೊ! ಹ್ಯೆ ಸಂದಿಗ್ದ್ ಪರಿಸ್ಥಿತೆಂತ್ ತಾಚಿ ಕೂಡ್ ದಾಕ್ತೆರ್‍ಗಿ ಶಿಕ್ಚ್ಯಾ ವಿದ್ಯಾರ್ಥಿಂಕ್ ಉಪ್ಕಾರಾಚಿ ಜಾಂವ್ದಿ ಮ್ಹಣೊನ್ ಆಸ್ಪತ್ರೆಕ್ ದಾನ್ ದಿಲಿ. ಎದೊಳ್‌ಚ್ ತಾಚೆ ದೊಳೆ ಎಕಾ ಕುರ್ಡ್ಯಾಕ್ ಟ್ರಾನ್ಸ್‌ಪ್ಲ್ಯಾಂಟ್ ಕೆಲ್ಯಾತ್. ಇಗರ್ಜೆಂತ್ ಕ್ರಿಯಾಳ್ ಆಲ್ತಾರ್ ಭುರ್ಗೊ ಜಾವ್ನ್ ಜಾಯ್ತ್ಯಾಂಕ್ ತಾಣೆಂ ಭಾವಾಡ್ತಾಚಿ ದೇಕ್ ದಿಲ್ಯಾ ನ್ಹಯ್‌ಗೀ!

ಶ್ಯೊನ್ ಡಿಸೋಜಾ: ಗಾಂವಾನ್ ಕುಂದಾಪುರ್‍ಚೊ. 19 ವರ್‍ಸಾಂಚೊ ತರ್ನಾಟೊ. ಶ್ರೀ ಎಲ್ಯಾಸ್ ಡಿಸೋಜಾ ಆನಿ ಶ್ರೀಮತಿ ಪ್ರಮೀಳಾ ಡಿಸೋಜಾ ಹಾಂಚೊ ಮಾಲ್ಘಡೊ ಪೂತ್. ಶ್ಯೊನ್ ಸುರ್ಯಾಚ್ಯೆ ದಾವೆಕ್ ತಡ್ವೊಂಕ್ ತಾಂಕನಾಸ್ತಾ ಹೀಟ್‌ಸ್ಟ್ರೋಕ್ ಜಾವ್ನ್ ಅಂತರ್‍ಲೊ. ಮರ್‍ಣಾಚ್ಯಾ ಥೊಡ್ಯಾ ಮ್ಹಯ್ನ್ಯಾಂ ಪಯ್ಲೆಂ ತೊ ನವದ್ ದಿಸಾಂಭರ್ ರೆತಿರೆಂತ್ ಮಗ್ನ್ ಜಾಲ್ಲೊ. ಥಂಯ್ಸರ್ ಮೊಬಾಯ್ಲಾಚ್ಯಾ ವೆಸನಾಥಾವ್ನ್ ತಾಕಾ ಕಶಿ ಸುಟ್ಕಾ ಲಾಬ್ಲಿ ಮ್ಹಣ್ ಹೆರ್ ಯುವಜಣಾಂಕ್ ವಿವರುನ್ ಸಾಂಗ್ಚೊ ತಾಚೊ ವೀಡಿಯೋ ವೈರಲ್ ಜಾಲ್ಲೊ. ಭುರ್ಗ್ಯಾಂಕ್ ಕ್ರೀಸ್ತೀ ಶಿಕ್ಪಾ ತರ್ಬೆತಿ ದೀವ್ನ್‌ಯೀ ಆಸ್‌ಲ್ಲೊ. ಗಲ್ಫಾಚ್ಯೆ ವಿಕಾರಿಯೆಟೆಚ್ಯೆ ಗೊವ್ಳಿಕ್ ಪರಿಶದೆಕ್ ಯುವಜಣಾಂಚೊ ಪ್ರತಿನಿಧಿ ಜಾವ್ನ್ ನಿಯುಕ್ತ್ ಜಾಲ್ಲೊ. ಕ್ರೀಸ್ತಾಚೊ ಸಂದೇಶ್ ಸಂಪೂರ್ಣ್ ರಿತಿನ್ ಜಿಯೆಲ್ಲೊ ಆನ್ಯೇಕ್ ಯುವಜಣ್ ಹೊ ನ್ಹಯ್‌ಗೀ?

ಕ್ರೀಸ್ತಿ ಕ್ರಾಸ್ತಾ: ಅಶೋಕ್‌ನಗರ್ ಫಿರ್ಗಜೆಚೆಂ. ಶ್ರೀ ಸಿರಿಲ್ ಕ್ರಾಸ್ತಾ ಆನಿ ಶ್ರೀಮತಿ ಸ್ಯಾಂಡ್ರಾ ಕ್ರಾಸ್ತಾಚಿ ಧುವ್. ತಾಚಿ ಪ್ರಾಚಿ 27 ವರ್‍ಸಾಂ. ನಂತೂರ್ ರಸ್ತ್ಯಾ ಆವ್ಗಡಾಕ್ ಬಲಿ ಜಾವ್ನ್ ತಿಣೆಂ ಜೀವ್ ಅರ್ಪಿಲೊ. ತೆಂ ಶಿಕ್ಶಕಿ ಜಾವ್ನ್ ಸೆವಾ ದೀವ್ನ್ ಆಸ್‌ಲ್ಲೆಂ ತಶೆಂಚ್ ತಾಚ್ಯಾ ಲಗ್ನಾಕ್ ತಯಾರಾಯ್ ಕರ್‍ನ್ ಆಸ್‌ಲ್ಲೆಂ. Missionary Families of Christ (MFC) ಹಾಂತುಂ ಏಕ್ ಕ್ರಿಯಾಳ್ ಸಾಂದೊ ಜಾವ್ನ್ ಕ್ರೀಸ್ತಾಚಿ ಒಳೊಕ್ ತೆಂ ದೀವ್ನ್ ಆಸ್‌ಲ್ಲೆಂ. ತಾಚೆಂ ಜಿವಿತ್ ಕ್ರೀಸ್ತಾಕ್ ಸಮರ್ಪಿಲ್ಲೆಂ ಆಸ್ಲೆಂ ಮ್ಹಣ್ಚ್ಯಾಕ್ ತಾಚ್ಯಾ ಭಾವಾನ್ ದಿಲ್ಲಿ ಶೃದ್ದಾಂಜಲಿ ಆನಿ ತಾಚ್ಯಾ ಆವಯ್ ಬಾಪಾಯ್ನ್ ಮರ್‍ಣಾ ದಿಸಾ ದಾಕಯಿಲ್ಲಿ ಭಾವಾಡ್ತಾಚಿ ಚಾಲ್‌ಚ್ ಸಾಕ್ಸ್.

ಗ್ಲೋರಿಯಾ ಆಶಾ ರೊಡ್ರಿಗಸ್: ಬಜ್ಪೆ ಫಿರ್ಗಜೆಚಿ ತಾಲೆಂತ್‌ವಂತ್ ಚಲಿ. ತಾಚಿ ಪ್ರಾಯ್ ೨೩ ವರ್‍ಸಾಂ. ಶ್ರೀ ಗ್ರೇಶನ್ ರೊಡ್ರಿಗಸ್ ಆನಿ ಶ್ರೀಮತಿ ಗ್ರೆಟ್ಟಾ ರೊಡ್ರಿಗಸಾಚಿ ಧುವ್. ಖಾಣಾಚಿ ಅಲರ್ಜಿ ಜಾವ್ನ್ ಅಚಾನಕ್ ತಾಕಾ ಆಸ್ಪತ್ರೆಕ್ ದಾಖಲ್ ಕೆಲೆಂ. ಚಿಕಿತ್ಸಾ ಯಶಸ್ವಿ ಜಾಂವ್ಕ್ ನಾ. ಆಸ್ಪತ್ರೆಂತ್ ಮೆಂದು ನಿಶ್ಕ್ರಿಯ್ ಜಾವ್ನ್ ಆಸ್ತಾನಾ ತಿಚ್ಯಾ ಕುಟ್ಮಾಚ್ಯಾಂನಿ ಘೆತ್‌ಲ್ಲೊ ನಿರ್ಧಾರ್ ನಿಜಾಯ್ಕಿ ವಿಶೇಸ್. ತಿಚೆ ಸಗ್ಳೆ ವಿಸ್ವೆ ಆಸ್ಪತ್ರೆಕ್ ದಾನ್ ಜಾವ್ನ್ ದೀಂವ್ಕ್ ತಿಂ ತಯಾರ್ ಜಾಲಿಂ. ತಿಚೆ ಸ ವಿಸ್ವೆ ದಾನ್ ಜಾವ್ನ್ ದಿಲ್ಲ್ಯಾನ್ ಆಜ್ ತೆಂ ಧಾ ಜಣಾಂ ಮುಕಾಂತ್ರ್ ಜಿಯೆತಾ. ತಿಚ್ಯಾ ನಾಂವಾತೆಕೀದ್ ಗಾಯನಾಚೆಂ ದೆಣೆಂ ಆಸ್‌ಲ್ಲ್ಯಾನ್ ಫಿರ್ಗಜೆಚ್ಯಾ ಕೊಯರಾಂತ್ ತಾಚಿ ಸೆವಾ ದೀವ್ನ್ ಆಸ್‌ಲ್ಲೆಂ. ಆವ್ಕಾಸ್ ಮೆಳ್ತಾನಾ ಬಾಳೊಕ್ ಜೆಜುಚ್ಯಾ ಪೂನ್‌ಶೆತಾಕ್ ಭೆಟ್ ದೀವ್ನ್ ಮಾಗೊನ್, ಕೊಯರಾಂತ್ ಸಾಂಗಾತ್ ದೀವ್ನ್ ಕೀರ್ತನ್ ಗಾವ್ನ್ ದೆವಾಕ್ ಮ್ಹಯ್ಮಾ ದಿತಾಲೆಂ. ವೃತ್ತೆಂತ್ ಶಿಕ್ಶಕಿ ಜಾವ್ನಾಸ್ಲ್ಯಾರೀ ಆವ್ಕಾಸ್ ಮೆಳ್ತಾನಾ ಆಪ್ಲಿಂ ತಾಲೆಂತಾಂ ವಾಪಾರ್‍ನ್ ಕ್ರೀಸ್ತಾಚೊ ಸಂತೊಸ್ ಆನಿ ಮೋಗ್ ಹೆರಾಂಕ್ ಪಾಸಾರ್‍ಲೆಲ್ಯಾ ತಾಚೆಂ ನಾಂವ್ ಮರ್‍ಣಾ ಉಪ್ರಾಂತ್‌ಯೀ ಗಾಜತ್ ಆಸಾ. ಆಪ್ಲ್ಯಾ ಉತ್ರಾಂ-ಕರ್‍ನ್ಯಾಂನಿ ತೆಂ ಕ್ರೀಸ್ತಾಚ್ಯಾ ಮೊಗಾಕ್ ಸಾಕ್ಸ್ ಜಾಲಾಂ ನ್ಹಯ್‌ಗೀ?

ಹಾಂಗಾಸರ್ ಉಲ್ಲೇಖ್ ಕೆಲ್ಲಿಂ ಹಿಂ ಯುವಜಣಾಂ 30 ವರ್‍ಸಾಂ ಭಿತರ್‍ಲಿಂ. ಸಾಂ. ದೊಮಿನಿಕ್ ಸಾವಿಯೊ, ಜೆಜುಚೆಂ ಲ್ಹಾನ್ ಫುಲ್ ತೆರೆಜ್ ತಶೆಂ ಸಾಂತ್ ಎಲೋಶಿಯಸ್ ಗೊನ್ಸಾಗಾ ಹಾಂಚೆಬರಿಚ್ ಹ್ಯಾ ವ್ಹಯ್ಲ್ಯಾ ಯುವಜಣಾಂನಿ ಕ್ರೀಸ್ತಾಕ್ ಮೆಚ್ವಾಲ್ಲೆಂ ಜಿವಿತ್ ಜಿಯೆವ್ನ್ ಹ್ಯಾ ಸಂಸಾರಾಕ್ ಆದೇವ್ಸ್ ಮಾಗ್ಲಾ. ತಾಂಚೆಂ ಜಿವಿತ್ ಆಮ್ಕಾಂ ಸರ್ವಾಂಕ್ ಪ್ರೇರಣ್ ಜಾಂವ್ದಿ. ತಾಂಚೊ ಉಡಾಸ್ ದವರ್‍ನ್ ಹ್ಯಾ ಪಾವ್ಟಿಂಚೆಂ ನತಾಲ್ ಆಮಿ ಆಚರಿತಾನಾ ಖರ್‍ಯಾನ್ ‘ಇಮ್ಮಾನುಯೆಲಾಚೊ’ ಸಾಂಗಾತ್ ಭೊಗ್ಯಾಂ.

ತುಮ್ಕಾಂ ಸರ್ವಾಂಕ್ ಭಾಗಿ ನತಾಲಾಂ ಫೆಸ್ತ್ ಮಾಗ್ತಾಂ. ಹ್ಯಾ ವರ್‍ಸಾ ‘ನಮಾನ್ ಬಾಳೊಕ್ ಜೆಜು’ ಪತ್ರಾಕ್ ತುಮಿ ದಿಲ್ಲ್ಯಾ ಸಹಕಾರಾಕ್ ತುಮ್ಚೊ ಉಪ್ಕಾರ್ ಬಾವುಡ್ತಾಂ. ಮುಕ್ಲ್ಯಾ ವರ್‍ಸಾಕ್ ತುಮ್ಚೊ ಸಹಕಾರ್ ಆಶೆತಾಂ. ಜನೆರಾಂತ್ ಕಾರ್ಮೆಲ್ ಗುಡ್ಯಾರ್ ಬಾಳೊಕ್ ಜೆಜುಚಿ ವಾರ್‍ಶಿಕ್ ಪರಬ್ ಆಸಾ. ನೊವೆನಾಂಕ್ ಆನಿ ಫೆಸ್ತಾಕ್ ತುಮ್ಕಾಂ ಆಮಿ, ಕಾರ್ಮೆಲ್ ಗುಡ್ಯಾವಯ್ಲೆ ಕಾರ್ಮೆಲಿತ್ ಫ್ರಾದ್, ಮೊಗಾಚೆಂ ಆಪೊವ್ಣೆಂ ಪಾಟಯ್ತಾಂವ್. ಫೆಸ್ತಾಕ್ ಯೆತಾನಾ ಆಮ್ಚ್ಯಾ ಪತ್ರಾಕ್ ವರ್ಗಣಿ ಭರುಂಕ್ ವಾ ನವೀಕೃತ್ ಕರುಂಕ್ ವಿಸ್ರನಾಕಾತ್. ತುಮ್ಕಾಂ ಸಮೇಸ್ತಾಂಕ್ ಸಂತೊಸ್‌ಭರಿತ್ ನತಾಲ್ ಮಾಗ್ತಾಂವ್. 

ಬಾಪ್ ಐವನ್ ಸೊಜ್, ಕಾರ್ಮೆಲಿತ್