📰 ವಾಟಿಕಾನ್ ಸಿಟಿ: 2025 ಜುಬ್ಲೆವ್ ವರ್‍ಸಾ ಥಾವ್ನ್ ನವೆಂಬರ್ 09ವೆರ್ `ಸಂಸಾರಾಂತ್ಲ್ಯಾ ಸ್ಥಳೀಯ್ ದಿಯೆಸೆಜಿಂನಿ ಆಪ್ಲ್ಯಾ ಮಾತಿಯೆಚ್ಯಾ ಸಾಂತ್, ಭಕ್ತಾಂಕ್ ಮಾನ್ ಕರುಂಕ್ ಪಾಪಾ ಫ್ರಾನ್ಸಿಸಾನ್ ಉಲೊ ದಿಲಾ.

“ಸ್ಥಳೀಯ್ ಪವಿತ್ರ್ ಸಭೆಂನಿ ತಾಂಚ್ಯಾಚ್ ಪುತಾ-ಧುವಾಂಕ್, ಮ್ಹಣ್ಜೆ ಸ್ಥಳೀಯ್ ಸಾಂತಾಂಕ್, ಸಾಂತಿಣಿಂಕ್, ಪುನೆವಂತಾಂಕ್ ಎಕ್ಯೆಚ್ ತಾರಿಕೆರ್ ಸ್ಮರಣ್ ಕರ್‍ಚೆಂ ಕಾಮ್ ಜಾಲ್ಯಾರ್ ಬರೆಂ ಮ್ಹಣ್ ಮ್ಹಾಕಾ ಭೊಗ್ತಾ”, ಅಶೆಂ ಪಾಪಾ ಫ್ರಾನ್ಸಿಸಾನ್ ನವೆಂಬರ್ ಸೊಳಾ-ವೆರ್ ಲಿಖ್ಲಲ್ಯಾ ಪತ್ರಾಂತ್ ವಾಚುಂಕ್ ಮೆಳ್ತಾ. ಸಾಂತಾಚೊ ಆನಿ ಭಾಗೆವಂತಾಚೊ ದೀಸ್ ನಮಿಯಾರರ್‍ಲೆಲ್ಯಾ ದಿಸಾ ಆಚರಣ್ ಕರ್‍ತಾಂವ್ ತಶೆಂಚ್ ಪುನೆವಂತ್ ಆನಿ ದೆವಾಚ್ಯಾ ಸೆವಕಾಂಚೊ ಸಂಭ್ರಮ್ ತ್ಯಾ ತ್ಯಾ ಜಾಗ್ಯಾಂನಿ ಚಲ್ತಾ. ಪುಣ್ ಜುಬ್ಲೆವಾಚ್ಯಾ ವರ್ಸಾ ಥಾವ್ನ್ ನವೆಂಬರ್ ನೊವ್ ತಾರಿಕೆರ್ ಸ್ಥಳೀಯ್ ದಿಯೆಸೆಜಿಂತ್ ಭಾಗೆವಂತ್ಪಾಚಿ ಜಿಣಿ ಜಿಯೆಲ್ಲ್ಯಾಂಕ್ ಮಾನ್ ದೀವ್ನ್ ತಾಂಚೊ ಉಗ್ಡಾಸ್ ಕಾಡುಂಕ್ ಜಾಯ್ ಮ್ಹಣ್ ಪಾಪಾ ಪ್ರಾನ್ಸಿಸಾನ್ ಕಳಯ್ಲಾಂ.

ಪಾಪಾ ಫ್ರಾನ್ಸಿಸಾಚಿ ಉತ್ರಾಂ ಹಿಂ: “ಭಾವಾರ್ಥ್, ಭರ್ವಸೊ ಆನಿ ಸೆವೆ ಮುಖಾಂತ್ ಕ್ರೀಸ್ತೀ ಮೊಲಾಂ ಜಿಯೆಲ್ಲ್ಯಾ ಆನಿ ಸಾಕ್ಸ್ ಜಾಲ್ಲ್ಯಾ ವ್ಯಕ್ತಿಂಕ್ ಆಮಿ ಒಳ್ಕುಂಕ್ ಜಾಯ್. ಭಾವಾರ್ಥಾಕ್ ಸಾಕ್ಸ್ ಜಾವ್ನ್ ಜಿಯೆಲ್ಲ್ಯಾ ಜೊಡ್ಯಾಂಚೊ, ಕಾಮಾಗಾರಾಂಚೊ, ಯುವಜಣಾಂಚೊ, ಗೊವ್ಳ್ಯಾಂಚೊ, ಧಾರ್ಮಿಕ್ ಭಾವಾ-ಭಯ್ಣಿಂಚೊ ಉಡಾಸ್ ಕಾಡ್ನ್ ತಾಂಚೆ ಖಾತಿರ್ ಆಮಿ ಸದಾಂಚ್ ದೆವಾಕ್ ಹೊಗ್ಳಾಪ್ ದೀಂವ್ಕ್ ಜಾಯ್”. ಪಿಡೆಂತ್, ಕಪ್ಟಾಂತ್, ದುಬ್ಳಿಕಾಯೆಂತ್, ಅಸ್ಕತ್ಕಾಯೆಂತ್ ದೆವಾಚೆರ್ ವಿಶ್ವಾಸ್ ದವರ್‍ಲ್ಯಾಂಕ್ ಆಮಿ ವಿಸ್ರುಂಕ್ ಅಸಾಧ್. ಸದಾಂಚ್ ಪವಿತ್ರ್‌ಪಣಾಂತ್ ಜಿಯೆಲ್ಲ್ಯಾನ್ ಆಜ್ ಪವಿತ್ರ್‌ಸಭಾ ಗ್ರೇಸ್ತ್ ಜಾಲ್ಯಾ”.

“ತಿಂ ಸಗ್ಳಿಂ ಆಮ್ಚಿಂಚ್, ವಾಟೆರ್ ಮೆಳ್ಚಿಂ ವ್ಹಳ್ಕಿಚಿಂ, ತಿಂ ಆಮ್ಕಾಂ ಆಮ್ಚ್ಯಾ ಬಾಪ್ತಿಜ್ಮಾಚ್ಯಾ ಆಪವ್ಣ್ಯಾಚೊ ಉಡಾಸ್ ದಿವಯ್ತಾತ್. ತಾಂಚೆ ಥಂಯ್ ಆಮಿ ಪವಿತ್ರ್ ಸಭೆಚೆಂ ಸೊಭಿತ್ ಮುಖಮಳ್ ದೆಕ್ತಾಂವ್”.