ಏಕ್ ಪಾವ್ಟಿಂ ಏಕ್ ಮೆಸ್ತ್ರಿ ಎಕಾ ರುಕಾ ಮುಳಾಂತ್ ಆಪ್ಲ್ಯಾ ಶಿಸಾಂಕ್ ಶಿಕೊವ್ಣ್ ದೀವ್ನ್ ಆಸ್‌ಲ್ಲೊ. ತೆದ್ನಾಂ ಥೊಡೆ ಜಣ್ ಎಕಾ ಮೆಲ್ಲ್ಯಾ ಮನ್ಶಾಕ್ ಖಾಂದ್ಯಾರ್ ಉಕಲ್ನ್ ಸಿಮಿಸ್ತ್ರೆಕ್ ವ್ಹರ್‍ನ್ ವೆಚೆಂ ತಾಣಿಂ ಪಳಯ್ಲೆಂ. ತೆದ್ನಾಂ ಶಿಸಾಂಪಯ್ಕಿ ಎಕ್ಲ್ಯಾನ್ ಮೆಸ್ತ್ರಿಕ್ ಸವಾಲ್ ಕೆಲೆಂ. “ಮೆಸ್ತ್ರಿ, ಮನ್ಶಾಚೆಂ ಜಿವಿತ್ ತಾಚ್ಯಾ ಮರ್‍ಣಾಸಂಗಿ ಆಖೇರ್ ಜಾತಾಗೀ?”. ತವಳ್ ಮೆಸ್ತ್ರಿನ್ ಜಾಪ್ ದಿಲಿ “ಮನ್ಶಾಚೆಂ ಜಿವಿತ್ ತಾಚಾ ಮರ್‍ಣಾಸಂಗಿ ಆಖೇರ್ ಜಾಯ್ನಾ, ಬಗಾರ್ ಮನ್ಶಾಚೆಂ ಮರಣ್ ತಾಚ್ಯಾ ಜಲ್ಮಾಸಂಗಿ ಆರಂಭ್ ಜಾತಾ”.

ವ್ಹಯ್, ಮನ್ಶಾಕ್ ಮರಣ್ ಖಂಯ್ಚ್ಯೆ ಘಡಿಯೆ ವೆಂಗ್ತಾ ತೆಂ ಸಾಂಗೊಂಕ್ ಕಶ್ಟ್. ಪುಣ್ ಮರಣ್ ಹರ್‍ಯೆಕಾ ಮನ್ಶಾಕ್ ಆಸಾ ಮ್ಹಳ್ಳೆಂ ಸತ್. ಮರಣ್ ಮ್ಹಣ್ತಾನಾ ಮನ್ಶಾಕ್ ಪಯ್ಲೆಂ ಮತಿಕ್ ಉದೆಂವ್ಚೆಂ ಭ್ಯೆಂ, ದೂಕ್ ಆನಿ ಖಂತ್ ಬೆಜಾರಾಯ್. ಹಾಕಾ ಕಾರಣ್ ಮರಣ್ ಮ್ಹಳ್ಯಾರ್ ಸಮಾಪ್ತಿ ವಾ ಅಂತ್ ಮ್ಹಳ್ಳೆಂ ಆಮ್ಚೆಂ ಚಿಂತಪ್. ಮರಣ್ ಮ್ಹಣ್ತಾನಾ ಕೊಣೀ ಹ್ಯಾ ವಿಶಿಂ ಚಡ್ ಉಲೊಂವ್ಕ್ ಪಸಂದ್ ಕರಿತ್ ಮ್ಹಣ್ ಮ್ಹಾಕಾ ಭೊಗಾನಾ. ಹ್ಯಾ ವಿಶಿಂ ಉಲೊವ್ನ್ ಕೊಣೀ ಆಪ್ಲೊ ಸಂತೊಸ್ ವೆರ್ಥ್ ಕರುಂಕ್ ಆಶೆನಾ.

ಹಾಂವ್ ಆಲ್ತಾರ್ ಭುರ್ಗೊ ಜಾವ್ನ್ ಆಸ್‌ಲ್ಲ್ಯಾ ಸಂದರ್ಭಾರ್ ತ್ಯಾ ಕಾಳಾರ್ ಮೋರ್‍ನ್, ಮೊರ್‍ನಾಚ್ಯೆ ಗಾಡಿಯೆರ್ ಪುರ್ಶಾಂವಾರ್‌ಚ್ ಚಲೊನ್ ಇಗರ್ಜೆಕ್ ಹಾಡ್ಚಿ ಮಾಂಡಾವಳ್ ಆಸ್‌ಲ್ಲಿ. ಆಮ್ಚೆಂ ಘರ್ ಇಗರ್ಜೆಕ್ ಲಾಗಿಂ ಆಸ್‌ಲ್ಲ್ಯಾನ್ ಮ್ಹಾಕಾ ಜಾಯ್ತೆಪಾವ್ಟಿಂ ಮೊರ್‍ನಾಕ್ ಲೋಬ್ ಘಾಲುಂಕ್ ಆಪೊವ್ನ್ ವ್ಹರ್‍ತಾಲೆ. ತವಳ್ ಜಾಯ್ತಿಂ ಮೊರ್‍ನಾಂ ಚಡ್ ಕರ್‍ನ್ ದುಬ್ಳಿಂ ಮೊರ್‍ನಾಂ ಮೀಸ್ ನಾಸ್ತಾನಾಂಚ್, ಶೀದಾ ಇಗರ್ಜೆಕ್ ಹಾಡ್ನ್ ಬೆಂಜಾರ್ ಕರ್‍ನ್ ಸಿಮಿಸ್ತ್ರೆಕ್ ಪಾಯ್ತಾಲೆ ಆನಿ ಉಪ್ರಾಂತ್ ತೀನ್ ದಿಸಾಂನಿ ಹಫ್ತ್ಯಾಚೆಂ ಮೀಸ್ ಕರ್‍ತಾಲೆ. (ಕೇರಳಾಂತ್ ಆಜೂನೀ ಜಾಯ್ತೆಕಡೆನ್ ಹೆಂಚ್ ಪಾಳ್ತಾತ್). ತ್ಯಾ ನಂತರ್ ಹಾಂವ್ ಕಾಮ್ ಕರ್‍ಚ್ಯಾ ಜಾಗ್ಯಾರ್ ಸಿಮಿಸ್ತ್ರ್ ಲಾಗಿಂಚ್ ಆಸ್‌ಲ್ಲ್ಯಾನ್ ಮೀಸ್ ನ್ಹಯ್ ತರೀ ಮಾತಿಯೆಕ್ ಪಾಯ್ತಾನಾ ಚಡ್ತಾವ್ ಜಾಯ್ತ್ಯಾ ಮೊರ್‍ನಾಂಕ್ ಹಾಜರ್ ಜಾಲ್ಲೊಂ ಆಸಾಂ. ಹ್ಯಾ ಸಂದರ್ಭಾರ್ ಮೋರ್‍ನ್ ಮ್ಹಣ್ತಾನಾ ಮ್ಹಜ್ಯೆ ಮತಿಕ್ ದಿಸ್‌ಲ್ಲಿ ಚಡ್ ಆನಿ ಚಡ್ ವಿಶಯ್ ಜಾವ್ನಾಸಾ ಮೊರ್‍ನಾಚಿ ದೂಕ್.

ಜಿವಿತಾಂತ್ ಕಶ್ಟ್ ಸೊಸುಂಕ್ ಜಾಯ್ನಾಸ್ತಾಂ ಆನಿ ಥೊಡ್ಯಾ ವಿಶೇಸ್ ಕಾರಣಾಂಕ್ ಲಾಗೊನ್ ಥೊಡೆ ಮೊರ್‍ನಾಕ್ ಆಪೊವ್ನ್ ಜೀವ್ಘಾತ್ ಕರ್‍ಚೆಂ ಆಮಿ ಪಳಯ್ಲಾಂ. ಮರಣ್ ಮೊಗಾನ್ ಸ್ವೀಕಾರ್ ಕರ್‍ಚೆ ಬೊವ್‌ಚ್ ಥೊಡೆ ವಾ ನಾಂಚ್ ನಾಂತ್ ಮ್ಹಣ್ಯೆತ್. ತಶೆಂ ಮ್ಹಣೊನ್ ಮನಿಸ್ ಮರಣ್ ನಾಸ್ತಾನಾ ಹಾಂಗಾಸರ್ ಸಾಸ್ಣಾಕ್ ಜಿಯೆಂವ್ಕ್ ಸಕ್ತೊ ತರ್ ಕಿತೆಂ ಜಾತೆಂ? ಹ್ಯಾ ಸವಾಲಾಕ್ ಜಾಪ್ ಸೊಧುನ್ ಗೆಲ್ಯಾಂವ್ ತರ್ ಆಖ್ರೇಕ್ ಮನಿಸ್ ಮರ್‍ಣಾಚೆರ್‌ಚ್ ಸಂಧಾನ್ ಕರ್‍ತೊ ಮ್ಹಳ್ಳ್ಯಾಚೆರ್ ದುಬಾವ್ ನಾ. ಮನ್ಶಾಚೆ ಕಶ್ಟ್, ಪಿಡಾ, ತಿರಸ್ಕಾರ್ ತಾಕಾ ‘ಆನಿ ಪುರೊ’ ಮ್ಹಳ್ಳ್ಯಾಚೆರ್ ಒತ್ತು ದೀವ್ನ್ ಮರ್‍ಣಾಚ್ಯಾ ಅತ್ರೆಗಾಕ್ ರಾಕೊಂಕ್ ಕರ್‍ತಾತ್ ಮ್ಹಳ್ಯಾರ್ ಚೂಕ್ ಜಾಂವ್ಚಿನಾ.

ಹಾಂವ್ ಆಲ್ತಾರ್ ಭುರ್ಗೊ ಆಸ್ತಾಂ ಏಕ್ ಪಾವ್ಟಿಂ ಫಿರ್ಗಜೆಚ್ಯೆ ಎಕೆ ಪ್ರಾಯೆಸ್ತಿಣಿಕ್ ಕುಮ್ಗಾರ್ ದಿಂವ್ಚ್ಯಾಕ್ ಫಿರ್ಗಜ್ ಕಾಜಿತೊರಾ ಸಾಂಗಾತಾ ಗೆಲೊಂ. ತಿಕಾ ಮಾಗ್ಣೆಂ ಕರ್‍ನ್ ಕುಮ್ಗಾರ್ ದೀವ್ನ್ ಜಾತಚ್ ತಿಣೆಂ ಮ್ಹಳೆಂ. “ಫಾದರ್ ತೊ ಮ್ಹಜೊ ಆನಿಕೀ ಕಿತ್ಯಾಕ್ ಉಡಾಸ್ ಕರಿನಾ, ತಾಣೆಂ ಮ್ಹಜೊ ಉಡಾಸ್ ಕರ್‍ಚ್ಯಾಕ್ ಮಾಗಾ ಫಾದರ್”. ತಿಚಿ ವಿನತಿ ಆಯ್ಕೊನ್ ಹಾಂವ್‌ಯೀ ಏಕ್ ಪಾವ್ಟಿಂ ಚಿಂತ್ಚ್ಯಾರ್ ಪಡ್ಲೊಂ.

ಮರಣ್ ಚೊರಾಬರಿ ಯೆತಾ ಮ್ಹಣ್ತಾ ಎಕ್ಲೊ ತರ್ ಮರಣ್ ಯೆತಾ ಸುಟ್ಕಾ ದೀಂವ್ಕ್ ಮ್ಹಣ್ತಾ ಆನ್ಯೆಕ್ಲೊ. ಮರ್‍ಣಾಚಿ ಫಿಲೊಸೊಫಿ ಕಿತೆಂಯ್ ಜಾಂವ್ ಮರಣ್ ಮಾತ್ರ್ ಸಕ್ಡಾಂಕ್ ಗಿಳ್ತಾ. ಮರಣ್ ಚೊರಾಬರಿ ಯೇಂವ್ ವಾ ಸುಟ್ಕಾ ದೀಂವ್ಕ್ ಯೇಂವ್, ಮರ್‍ಣಾಚಿ ದೂಕ್ ಮಾತ್ರ್ ಖಾಯಾಮ್ ಗಿರಾಯ್ಕ್.

ಮ್ಹಜ್ಯಾ ಘರಾ ಲಾಗ್ಸಾರ್ ಕುಡ್ಮಿ ಜನಾಂಗ್ ವಸ್ತಿ ಕರ್‍ತಾ. ಕುಡ್ಮಿ ಜನಾಂಗ್ ಕಶ್ಟಿ, ದೀಸ್‌ಕುಲಿಚಿಂ ಕಾಮಾಂ ಕರ್‍ಚೊ ಆನಿ ಸಾದೆ ಮನಿಸ್. ತೆಯ್ ಆಮ್ಚೆ ಕೊಂಕ್ಣಿ ಮನಿಸ್. ಥಂಯ್ಸರ್ ಎಕಾ ಕುಟ್ಮಾಂತ್ ಪಾಂಚ್ ಜಣಾಂ ಚೆಡ್ವಾಂ ಭುರ್ಗಿಂ ಆಸ್‌ಲ್ಲಿಂ. ತೆಂ ದುಸ್ರೆಂ. ತಾಕಾ ಕಾಜಾರ್ ಜಾಲ್ಲೆಂ ಆನಿ ಘರಾಚ್ ಶಿಂವ್ಣೆಚೆಂ ಕಾಮ್ ಕರ್‍ತಾಲೆಂ. ತಾಕಾ ಖೆವಾದಾಚಿ ಪಿಡಾ ಆಸ್‌ಲ್ಲಿ ಮ್ಹಣ್ ಸಾಂಗ್ತಾಲೆ. ಅಪ್ರೂಪ್‌ಶೆಂ ಆಸ್ಪತ್ರೆಕ್ ವಚೊನ್ ಚಿಕಿತ್ಸಾ ದೀವ್ನ್ ಘರಾ ಹಾಡ್ತಾಲೆ. ತಾಕಾ ಏಕ್ ಚೆರ್ಕೊ ಭುರ್ಗೊ ಆಸ್‌ಲ್ಲೊ ಆನಿ ತೆಂ ತಾಚ್ಯಾ ಪುತಾಚೊ ಖೂಬ್ ಮೋಗ್ ಕರ್‍ತಾಲೆಂ. ದುಬ್ಳಿಕಾಯ್, ಅಸಹಾಯಕ್ಪಣ್ ತಾಕಾ ಸತಯ್ತಾಲೆಂ. ತಾಚಿ ಏಕ್ ಪಾವ್ಟಿಂ ಅಚಾನಕ್ ಭಲಾಯ್ಕಿ ಮ್ಹಸ್ತ್ ಭಿಗಡ್ಲಿ. ಆಸ್ಪತ್ರೆಕ್ ಜಾಯ್ತೆಪಾವ್ಟಿಂ ವ್ಹರ್‍ನ್ ಹಾಡ್ಲೆಂ ತರೀ ಆರ್ಥಿಕ್ ಅಡ್ಚಣೆವರ್ವಿಂ ಚಡ್ ಚಿಕಿತ್ಸಾ ದೀಂವ್ಕ್ ಜಾಲಿನಾ. ಆಖ್ರೇಕ್ ದಾಕ್ತೆರಾಂನಿ ಹಾತ್ ವಯ್ರ್ ಕರ್‍ತಾನಾ ತಾಕಾ ಘರಾ ಹಾಡ್ಲೆಂ. ತಾಕಾಯ್ ಕಳಿತ್ ಜಾಲ್ಲೆಂ ತೆಂ ಆನಿ ದೋನ್-ತೀನ್ ದಿಸಾಂಚೆಂ ಸಯ್ರೆಂ ಮ್ಹಣೊನ್. ಹ್ಯಾ ಸಂದರ್ಭಾರ್ ಆಸ್ಪತ್ರೆಥಾವ್ನ್ ಘರಾ ಆಯಿಲ್ಲ್ಯೆ ಸಾಂಜೆರ್ ತಾಣೆಂ ತಾಚ್ಯಾ ಧಾಕ್ಟುಲ್ಯಾ ಪುತಾಕ್ ಸರ್ಶಿಂ ಆಪೊವ್ನ್ ಅಶೆಂ ಸಾಂಗ್ಲೆಂ :

“ಆನಿ ತುಕಾ ಅಮ್ಮ ನಾ, ತುಂ ಆನಿ ಆನಾಸಂಗಿಚ್ ರಾವ್. ತಾಣೆಂ ಸಾಂಗ್‌ಲ್ಲೆಬರಿ ಆಯ್ಕ್”.

ಹಿ ಖಬರ್ ಆಮ್ಕಾಂ ತಶೆಂಚ್ ಬಾಕಿಚ್ಯಾಂಕೀ ಉಪ್ರಾಂತ್ ಕಳ್ಳಿ. ಆಯ್ಕೊನ್ ಮ್ಹಜೆಂ ಕಾಳಿಜ್ ರಡ್ಲೆಂ. ಏಕ್ ಘಡಿಭರ್ ತ್ಯೆ ಆವಯ್ಚೆಂ ಆನಿ ಪುತಾಚೆಂ ದ್ರಶ್ಯ್ ಮತಿ ಪಡ್ದ್ಯಾರ್ ಹಾಡ್ಲೆಂ ತರ್ ಆವಯ್ಕ್ ಕಿತೆಂ ಜಾಲೆಂ ಆಸ್ತೆಲೆಂ ಮ್ಹಣ್ ಕಲ್ಪನ್ ಸಯ್ತ್ ಕರುಂಕ್ ಕಶ್ಟ್. ಆಪುಣ್ ಆಪ್ಲ್ಯಾ ಧಾಕ್ಟುಲ್ಯಾ ಪುತಾಥಾವ್ನ್ ವೆಗ್ಳಾಚಾರ್ ಜಾತೇ ಆಸಾಂ ಮ್ಹಣ್ ಚಿಂತ್ತಾನಾಂಚ್ ಕಾಳಿಜ್ ಫುಮಾರ್ ಜಾತಾ. ಹೆಂ ಏಕ್ ಮರ್‍ಣಾ ಆದ್ಲೆಂ ದೂಕ್. ಜೆದ್ನಾಂ ಉಡಾಸ್ ಯೆತಾ ತೆದ್ನಾಂ ದೂಕ್ ಹಾಡ್ತಾ. ಅಸಲೆಂ ಕೊಣಾಯ್ಕಿ ಜಾಯ್ನಾಯೆ ಮ್ಹಣ್ ಭೊಗ್ಚೆಂ ಆಸಾ.

ಮ್ಹಜಿ ಮಾವ್ಶಿ, ಮ್ಹಜಿ ಮೊದೊರ್ನ್. ಬೊಂಬೊಯ್ ಕಾಮ್ ಕರ್‍ತಾಲಿ. ಗಾಂವಾಕ್ ಆಯಿಲ್ಲ್ಯಾ ವೆಳಾರ್ ಹರ್‍ಯೇಕ್ ಪಾವ್ಟಿಂ ಮ್ಹಾಕಾ ಇನಾಮ್ ಜಾವ್ನ್ ಪಯ್ಶೆ ದಿತಾಲಿ. ತಿಚ್ಯಾ ಕಾಳ್ಜಾಂತ್ ಬುರಾಕ್ ಆಸಾ ಆನಿ ತೊ ಸಾರ್ಕೊ ಕರುಂಕ್ ಜಾಯ್ನಾ ಮ್ಹಣ್ ದಾಕ್ತೆರಾಂನಿ ಸಾಂಗ್ಲ್ಯಾರೀ ತಿ ಭಿಯೆಲ್ಲಿ ನಾ. ತಿಕಾ ಕಾಜಾರ್ ಕರ್‍ನ್ ವಿಟ್ಲಾ ದಿಲ್ಲೆಂ. ಫೆಸ್ತಾಂಕ್, ಕಾರ್ಯಾಂಕ್ ಬಜ್ಪ್ಯಾಂ ಯೆತಾಲಿ. ತಿಣೆಂ ಏಕ್ ಸವಯ್ ಕೆಲ್ಲಿ. ತಿಚೆಂ ನಾಂವ್, ವಿಳಾಸ್, ಫೊನ್ ನಂಬರ್ ಎಕೆ ಚಿಟಿರ್ ಬರೊವ್ನ್ ತಿಚ್ಯಾ ಪರ್ಸಾಂತ್ ತಿ ಕೆದ್ನಾಂಯ್ ದವರ್‍ನ್ಂಚ್ ಆಸ್ತಾಲಿ. ಅಶೆಂ ಪಯ್ಣಾ ವೆಳಾರ್ ತಿಚೊ ಪ್ರಾಣ್ ಗೆಲ್ಯಾರ್ ಸಹ ಪಯ್ಣಾರ್‍ಯಾನ್ ಘರ್‍ಚ್ಯಾಂಕ್ ಖಬರ್ ದಿಂವ್ಚ್ಯಾಕ್ ತಿಣೆಂ ಹೆಂ ನಿಯಮ್ ಪಾಳ್‌ಲ್ಲೆಂ. ದಾಕ್ತೆರಾಂನಿ ದಿಲ್ಲ್ಯೆ ಆವ್ದೆಚ್ಯಾಕೀ ಚಡಿತ್ ವರ್‍ಸಾಂ ವಾಂಚ್‌ಲ್ಲಿ ಧಯ್ರಾಧಿಕ್ ಸ್ತ್ರೀ ತಿ. ಮ್ಹಜಿ ಮೊದೊರ್ನ್ ಮ್ಹಳ್ಳ್ಯಾ ಖಾತಿರ್ ಕೊಣ್ಣಾ, ಮ್ಹಜ್ಯಾ ಕಾಜಾರಾ ಮ್ಹಣಸರ್ ವಾಂಚ್ಲಿ. ಕಾಜಾರ್ ಜಾಲ್ಲ್ಯಾ ದೋನ್ ಮ್ಹಯ್ನ್ಯಾಂನಿಚ್ ಸರ್‍ಲಿ. ತಿಚಿ ಪಿಡಾ ಕಳಿತ್ ಆಸ್‌ಲ್ಲ್ಯಾನ್ ಆಮಿ ತಿಚೆಂ ಮರಣ್ ಸ್ವೀಕಾರ್ ಕೆಲ್ಲೆಂ ಮ್ಹಣ್ಯೆತ್. ಪುಣ್ ತಿ ಸರ್‌ಲ್ಲಿ ದೂಕ್ ಏಕ್ ದೀಸ್ ಮ್ಹಜ್ಯಾನ್ ಕಾಟ್ ತುಟೊನ್ ವ್ಹಾಳತ್ ಮ್ಹಣ್ ಹಾಂವೆಂ ಚಿಂತುಂಕ್ ನಾ. ತೆಂ ಘಡ್‌ಲ್ಲೆಂ ಅಶೆಂ :

ತಿಚೊ ಘೊವ್, ಮ್ಹಾಕಾ ಬಾಪ್ಪು ಲೆಕ್ತಾ ತೊ ಮರ್‍ಣಾಚ್ಯಾ ಸುಮಾರ್ ದೋನ್ ಹಫ್ತ್ಯಾ ಉಪ್ರಾಂತ್ ಘರಾ ಆಯ್ಲೊ ಆನಿ ತಾಣೆಂ ಏಕ್ ಕಾಗದ್ ಸಯ್ತ್ ಹಾಡ್‌ಲ್ಲೆಂ. ಆನಿ ತೆಂ ಕಾಗದ್ ಜಾವ್ನಾಸ್‌ಲ್ಲೆಂ ಮ್ಹಜ್ಯೆ ಮೊದೊರ್ನಿನ್ ಮರ್‍ಚ್ಯಾ ಆದಿಂ ಬರೊವ್ನ್ ದವರ್‌ಲ್ಲೆಂ ತಿಚೆಂ ನಿಮಾಣೆಂ ಕಾಗದ್. ತ್ಯಾ ಕಾಗ್ದಾರ್ ತಿಣೆಂ ತಿಚೆಂ ಮೋರ್‍ನ್ ಕಶೆಂ ಕರಿಜೆ, ತಿಚೆಂ ಭಾಂಗಾರ್ ವಿಕುನ್ ಮೋರ್‍ನ್ ಕರಿಜೆ, ಉರ್‌ಲ್ಲೆಂ ಭಾಂಗಾರ್, ಘರ್ ಆನಿ ತಿಚ್ಯೊ ವಸ್ತು ಕೊಣಾಕ್ ವಚಜೆ ಮ್ಹಣ್ ಬರಯಿಲ್ಲೆಂ. ಕೊಣಾಯ್ಕಿ ತೊಂದ್ರೆ ದೀನಾಸ್ತಾಂ ತಿಚಿ ಅಂತಿಮ್ ಆಶಾ ಜ್ಯಾರಿ ಜಾಂವ್ಚ್ಯಾಕ್ ಬರಯಿಲ್ಲೆಂ ತಿಚೆಂ ಕಾಗದ್ ಬಾಪ್ಪು ವಾಚುನ್ ಸಾಂಗ್ತಾನಾ ಮ್ಹಜೆಂ ದೂಕ್ ಮ್ಹಾಕಾ ಕಳಿತ್ ನಾಸ್ತಾನಾ ಕಾಟ್ ತುಟೊನ್ ವ್ಹಾಳ್ಳೆಂ.

ಮರಣ್ ಪಾವ್‌ಲ್ಲಿ ವೆಕ್ತಿ ಆಮ್ಚೆಥಂಯ್ ಸೊಡ್ನ್ ಗೆಲ್ಲ್ಯೊ ಯಾದಿ ಆಮ್ಕಾಂ ಚಡ್ ದೂಕ್ ಹಾಡಯ್ತಾತ್. ಮ್ಹಜೊ ಪಪ್ಪಾ ಸರ್‍ತಾನಾ ಹಾಂವ್ ಸ-ವ್ಯೆ ಕ್ಲಾಸಿಂತ್ ಶಿಕ್ತಾಲೊಂ. ತಾಚ್ಯಾ ಮರ್‍ಣಾವರ್ವಿಂ ಮ್ಹಾಕಾಯ್ ದೂಕ್ ಭೊಗ್ಲೆಂ ವ್ಹಯ್ ತರೀ ತಾಚಿ ಅಂದಾಜ್ ಮ್ಹಾಕಾ ತವಳ್ ಜಾಲ್ಲಿನಾ. ಪುಣ್ ಹಾಂವ್ ವಾಡೊನ್ ಯೆತಾನಾ ಆನಿ ಜಾಣ್ವಾಯೆನ್ ಭರ್‍ತಾನಾ ಮ್ಹಜ್ಯಾ ಪಪ್ಪಾನ್ ಆಮ್ಚೆಖಾತಿರ್ ಕಾಡ್‌ಲ್ಲೆ ಕಶ್ಟ್ ಉಡಾಸ್ ಯೆತಾನಾ ಹಾಂವ್ ಮತಿಭಿತರ್ ಜಾಯ್ತೆಪಾವ್ಟಿಂ ರಡ್‌ಲ್ಲೊಂ ಆಸಾಂ. ದೆಕುನ್ ಮರಣ್ ಏಕ್ ಪಾವ್ಟಿಂ ಸಂಪ್ತಾ ತರೀ ತಾಚ್ಯಾ ಪಾಟ್ಲೆಂ ದೂಕ್ ತಿತ್ಲ್ಯಾ ಸಲೀಸಾಯೆನ್ ಮಾಜ್ವಾನಾ.

ಆಯ್ಚ್ಯಾ ಕಾಳಾರ್ ಸೋಶಿಯಲ್ ಮೀಡಿಯಾ ಜಾಯ್ತೊ ಪ್ರಭಾವ್ ಘಾಲ್ನ್ ಆಸಾ. ಕೊರೊನಾಚ್ಯಾ ಕಾಳಾರ್ ಮರ್‍ಣಾವಿಶಿಂ ಆಮಿ ಚಡ್ ಆನಿ ಚಡ್ ಲಾಗ್ಶಿಲ್ಯಾನ್ ಪಾಶಾರ್ ಜಾಲ್ಯಾಂವ್. ತ್ಯಾ ವೆಳಾರ್ ಆಮ್ಚ್ಯಾ ಖಾಶಾ ಮನ್ಶಾಂಚ್ಯಾ ಮರ್‍ಣಾಂಕ್ ಸಯ್ತ್ ಆಮ್ಕಾಂ ಭಾಗ್ ಘೆಂವ್ಕ್ ಆವ್ಕಾಸ್ ಮೆಳೊಂಕ್ ನಾ ತರೀ ತಶೆಂ ಮ್ಹಣೊನ್ ತಾಂಚ್ಯಾ ವಾಂಟ್ಯಾಚೆಂ ಆಮ್ಚೆಂ ದೂಕ್ ಕಾಂಯ್ ಉಣೆಂ ಜಾಂವ್ಕ್ ನಾ. ಹ್ಯಾ ಸಂದರ್ಭಾರ್ ಏಕ್ ವೀಡಿಯೋ ವೈರಲ್ ಜಾಲ್ಲೊ ಆಮಾಂ ಸರ್ವಾಂಚೆಂ ಕಾಳಿಜ್ ಕಡೊಂವ್ಕ್ ಸಕ್‌ಲ್ಲೊ ತುಮ್ಕಾಂ ಉಡಾಸ್ ಆಸ್ಯೆತ್. ರಯ್ಲ್‌ವೇ ಪ್ಲ್ಯಾಟ್‌ಫೊರ್ಮಾರ್ ಏಕ್ ಬಾಳ್ಶೆಂ ದುದಾಖಾತಿರ್ ತಾಚ್ಯೆ ಮೆಲ್ಲ್ಯೆ ಆವಯ್ಕ್ ಉಟೊಂವ್ಕ್ ಕರ್‍ಚೆಂ ಪ್ರೇತನ್ ತೆಂ. ಟಿವಿರ್, ಮೊಬಾಯ್ಲಾಂನಿ ಪಳೆವ್ನ್ ಆಮಿ ‘ಹಾಯ್ ದೆವಾ’ ಮ್ಹಳ್ಳೆಂ ಆಸಾ, ಸರ್ಕಾರಾಚ್ಯೆ ನಿತಿವಿರೋಧ್ ರಾಗಾನ್ ಪೆಟ್‌ಲ್ಲೆಂ ಆಸಾ. ಆವಯ್ ಕಶಿಯ್ ಸರ್‍ಲಿ, ಪಾಪ್ ತ್ಯಾ ಬಾಳಾಚಿ ಗತ್ ಕಿತೆಂ ಜಾಂವ್ಕ್ ಪಾವ್ಲಿ ಮ್ಹಣ್ತಾನಾ ತಾಚೆಂ ಬಾಕಿಚೆಂ ಜಿವಿತ್ ತಾಕಾ ಏಕ್ ಲಾಂಬ್ ದೂಕ್ ದೀಂವ್ಕ್ ಆಯ್ತೆಂ ಆಸಾ ಮ್ಹಣ್ ಆಮ್ಕಾಂ ತೆಂ ಪಳಯ್ತಾನಾ ಝಳ್ಕತಾಲೆಂ.

ಹಾಂವ್ ಘಡಿಯೆ ಘಡಿಯೆ ಮರಣ್ ಆನಿ ದುಕಾವಿಶಿಂ ಉಲೊವ್ನ್ ವಿರ್‍ಯಾರ್ ಕರ್‍ತಾಂ ಮ್ಹಣ್ ಚಿಂತಿನಾಕಾತ್. ಮನಿಸ್ ಅಸ್ಕತ್ ಸಂಯ್ಬಾಚೊ ಆನಿ ದೂಕ್‌ಯೀ ತಾಚ್ಯೆ ಅಸ್ಕತ್ಕಾಯೆಚಿ ಏಕ್ ರುಜ್ವಾತ್. ಮನಿಸ್ ಚಡ್ ಭೊಗ್ಣಾಂನಿ ಭರ್‌ಲ್ಲೊ ವೆಕ್ತಿ ಜಾಲ್ಲ್ಯಾನ್ ತಾಕಾ ದೂಕ್ ವೆಗಿಂ ಯೆತಾ ಮ್ಹಣ್ಯೆತ್. ಕೊಡ್ಯಾಳ್‌ಥಾವ್ನ್ ಹಾಂವ್ ಏಕ್ ಪಾವ್ಟಿಂ ಜಾಯ್ತೊ ಸಾಮಾನ್ ಘೆವ್ನ್ ರಿಕ್ಶ್ಯಾರ್ ಯೆತಾಲೊಂ. ಹಾಂವೆಂ ಸಾಮಾನ್ ಘೆತ್‌ಲ್ಲ್ಯೆ ಆಂಗ್ಡಿ ಏಕ್ ಬಾಯ್ಲ್ ಮನಿಸ್‌ಯೀ ತಿಚೊ ಸಾಮಾನ್ ಘೆವ್ನ್ ರಿಕ್ಶ್ಯಾಕ್ ಆಪಯ್ತಾಲಿ. ತಿಕಾ ಪಳೆವ್ನ್ ಕಿತ್ಯಾಕ್‌ಗೀ ಮ್ಹಾಕಾ ತಿಕಾ ರಿಕ್ಶ್ಯಾರ್ ಆಪಯಾಂ ಮ್ಹಣ್ ಭೊಗ್ಲೆಂ ಆನಿ ತಿಕಾ ಹಾಂವೆಂ ಮ್ಹಜ್ಯಾ ರಿಕ್ಶ್ಯಾರ್ ಘೆತ್ಲೆಂ ಆನಿ ತಿಚಾ ಜಾಗ್ಯಾರ್ ಪಾಯ್ತಾ ಮ್ಹಳೆಂ. ತಿಚೆಂ ಮುಕಮಳ್ ಬಾವ್‌ಲ್ಲೆಂ. ವಾಟೆರ್ ಗಜಾಲ್ಯಾಂಕ್ ಬುನ್ಯಾದ್ ಘಾಲ್ತಾನಾ ತಿಣೆಂ ತಿಚಿ ಘರ್‍ಚಿ ಪರಿಸ್ಥಿತಿ ಮ್ಹಜೆಸಂಗಿ ವಾಂಟ್ತಾನಾ ಹಾಂವ್ ಅವಾಕ್ಕ್ ಜಾಲೊಂ.

ತಿಚೊ ಎಕ್ಲೊಚ್ ಪೂತ್ ಥೊಡ್ಯಾ ವರ್‍ಸಾಂ ಆದಿಂ ಕಾಮಾಕ್ ಮ್ಹಣ್ ದುಬಾಯ್ ಗೆಲ್ಲೊ. ಪುಣ್ ಥೊಡ್ಯಾಚ್ ದಿಸಾಂನಿ ಕಾಳ್ಜಾಘಾತ್ ಜಾವ್ನ್ ಸರ್‍ಲೊ ಮ್ಹಣ್ ಖಬರ್ ಆಯ್ಲಿ. ಉಪ್ರಾಂತ್ ತಾಚೆಂ ಮೋರ್‍ನ್ ಗಾಂವಾಕ್ ಹಾಡ್ನ್ ಮಾತಿಯೆಕ್ ಪಾಯ್ಲೆಂ. ಪ್ರಾಯೆಸ್ತ್ ಆವಯ್-ಬಾಪಾಯ್ಕ್ ಆಧಾರ್ ಜಾಯ್ಜೆ ಆಸ್‌ಲ್ಲೊ ಪೂತ್‌ಚ್ ಅಶೆಂ ಅಚಾನಕ್ ಮರ್‍ಣಾಕ್ ಬಲಿ ಜಾತಾನಾ ತಾಂಕಾಂ ತೆಂ ಜಿರೊಂವ್ಕ್ ಜಾಲೆಂನಾ. ಬಾಪಯ್ನ್ ಬೋತ್ಲ್ ಹಾತಿಂ ಧರ್‍ಲಿ ಆನಿ ಖುದ್ಧಾಚಿ ಭಲಾಯ್ಕಿ ಬಿಗ್ಡಾವ್ನ್ ಘೆತ್ಲಿ. ಪುಣ್ ತಿ ಮ್ಹಣಾಲಿ ‘ತೊ ಗೆಲಾ ಮ್ಹಣ್ ಆಮ್ಕಾಂಯ್ ತಾಚೆಪಾಟ್ಲ್ಯಾನ್ ವಚೊಂಕ್ ಜಾತಾವೇ, ಆಮಿ ಜಿಯೆಜೆಚ್ ನ್ಹಯ್‌ವೇ’. ಅಶೆಂ ತಿ ಸಾಂಗ್ತಾನಾ ತಿಚೆಂ ಕಾಳಿಜ್ ತಿಚ್ಯಾ ಉತ್ರಾಂನಿ ಕಿತ್ಲೆಪಾವ್ಟಿಂ ಶಿಂದೊನ್ ಗೆಲೆಂ ಮ್ಹಣ್ ತಾಚಿ ಧಾರ್ ಮ್ಹಾಕಾ ಆದಾಳ್ಳಿ. ತಿಚ್ಯಾ ಪುತಾಚೆಂ ದೂಕ್ ತಿಕಾ ಸದಾಂನಿತ್ ಮರಣ್ ದಾಕೊವ್ನ್ ಆಸಾ ಮ್ಹಣ್ ತಿಕಾ ಪಳಯ್ತಾನಾಂಚ್ ಕಳ್ತಾಲೆಂ.

ಆಖೇರ್ ಕರ್‍ಚ್ಯಾ ಫುಡೆಂ ಮರಣ್ ಜಾವ್ನಾಸಾ ಮನ್ಶಾಚ್ಯೆ ಜಿಣಿಯೆಚಿ ಸಮಾಪ್ತಿ ನ್ಹಯ್, ಬಗಾರ್ ಸಂಪೂರ್ಣತಾ. ಸಂಸಾರಾಚೆಂ ನಿಯಮ್‌ಚ್ ತೆಂ, ಹಾಂಗಾಸರ್ ಸದಾಂನಿತ್ ಜಲ್ಮಾಂ, ಸದಾಂನಿತ್ ಮರ್‍ಣಾಂ. ದೂಕ್ ತೆಂ ಸಹಜ್. ಆಮಿ ಆಮ್ಚೆರ್ ನಿಯಂತ್ರಣ್ ದವ್ರುಂಕ್ ಸಕ್ತಾಂವ್ ತರ್ ಖುಶೆನ್ ಆಸ್ತೆಲ್ಯಾಂವ್. ಅನಂತ್‌ನಾಗಾಚ್ಯಾ ಎಕಾ ಕನ್ನಡ ಫಿಲ್ಮಾಚ್ಯಾ ಡಯಲೋಗಾಬರಿ, ‘ಮನುಷ್ಯ ಸಾಯಲೇಬಾರದು ಎಂದಾದರೆ, ಆತ ಹುಟ್ಟಲೇ ಬಾರದು’.

✍️ –ರೋಶು, ಬಜ್ಪೆ