ಜೆಜು ದೆವಾಚೊ ಪೂತ್ ಹ್ಯಾ ಸಂಸಾರಿಂ ಬಾಪಾಚಿ ಶಾಂತಿ ಘೆವ್ನ್ ಆಯ್ಲೊ. ಜೆಜುಚ್ಯಾ ಜಲ್ಮಾವೆಳಿಂ ದೇವ್‌ದುತಾಂನಿ ಸ್ತುತಿ ಕರಿತ್ ಗಾಯ್ಲೆಂ: “ಮ್ಹಯ್ಮಾ ದೆವಾಕ್ ಅತೀ ಉನ್ನತಿ ಆನಿ ಶಾಂತಿ ದೆವಾಕ್ ಮಾನ್ವಲ್ಯಾಂತ್ ತ್ಯಾ ಮನ್ಶಾಂಕ್ ಸಂಸಾರಿಂ”(ಲೂಕ್ 2:14). ಆಮ್ಕಾಂ ಪಾತ್ಕಾಥಾವ್ನ್ ಸುಟೊಂವ್ಚ್ಯಾ ಖಾತಿರ್, ಮನ್ಶಾಕುಳಾಕ್ ಬಾಪಾಚ್ಯೆ ವೆಂಗೆಂತ್ ಪರತ್ ಹಾಡ್ಚ್ಯಾ ಖಾತಿರ್ ಜೆಜು ಮನಿಸ್ ಜಾವ್ನ್ ಆಯ್ಲೊ. ದುಸ್ಮನ್ಕಾಯ್ ಪಯ್ಸ್ ಕರುನ್ ದೆವಾ ಆನಿ ಮನ್ಶಾಮದೆಂ ಶಾಂತಿ ಹಾಡ್ಲಿ. ದೆಕುನ್ ಜೆಜು, ಶಾಂತಿಚೊ ಕುಂವರ್.

ಶಾಂತಿಚೆ ದೂತ್ ಜಾವ್ಯಾಂ: ಮೇಯಾಚ್ಯೆ 8 ತಾರಿಕೆರ್ ಸಾಂಜೆರ್ ನವೊ ಪಾಪಾ ಜಾವ್ನ್ ವಿಂಚುನ್ ಆಯಿಲ್ಲ್ಯಾ ಲಿಯೊ ಚೊವ್ದಾವ್ಯಾನ್ ಸಾಂ. ಪೆದ್ರುಚ್ಯಾ ಬಾಸಿಲಿಕಾಚ್ಯೆ ಬಾಲ್ಕನಿಚೆರ್ ಹಜಾರೊಂ ಲೊಕಾಂ ಹುಜಿರ್ ಆಪ್ಲ್ಯಾ (ಉರ‍್ಬಿ ಎತ್ ಒರ‍್ಬಿ) ದಿಲ್ಲ್ಯಾ ಬೆಸಾಂವಾಂತ್ ಉದ್ಗರ‍್ಲಲಿಂ ಉತ್ರಾಂ ‘ಭಾವಾಂ ಭಯ್ಣಿಂನೋ, ಶಾಂತಿ ತುಮ್ಚೆ ಸವೆಂ ಆಸೊಂ’. ತಶೆಂಚ್ ಮುಕಾರುನ್ ಸಾಂಗ್‌ಲ್ಲಿಂ ಉತ್ರಾಂ ‘ಆಮಿ ಕ್ರೀಸ್ತಾಚೆ ಪಾಟ್ಲಾವ್ದಾರಿ. ಕ್ರೀಸ್ತ್ ಆಮ್ಚ್ಯಾ ಮುಕ್ಲ್ಯಾನ್ ವೆತಾ, ಸಂಸಾರಾಕ್ ತಾಚೊ ಉಜ್ವಾಡ್ ಗರ್ಜ್ ಆಸಾ. ವಾಯ್ಟ್ ಕೆದಿಂಚ್ ಜಯ್ತ್ ವ್ಹರುಂಕ್ ಸಕ್ಚೆಂನಾ’. ವಿಭಜಿತ್ ಸಂಸಾರಾಂತ್ ಇಗರ್ಜ್ ಮಾತೆಂ ‘ಶಾಂತಿಚೊ ಸಂಕೇತ್’ ಜಾಯ್ಜೆ ಮ್ಹಣ್ ಪರತ್ ಪರತ್ ಸಾಂಗೊನ್ ಆಸಾ. ರಾಜಕೀಯ್ ರಾಷ್ಟಭಕ್ತಿಚೊ ದುರಪಯೋಗ್, ವಿಭಜನವಿಶಿಂ ಉಲೊವ್ನ್ ಸಮಾಧಾನ್ ಆನಿ ರಾಜಿ-ಸಂಧಾನಾಕ್ ಪಾಪಾನ್ ಚಡಿತ್ ಪ್ರಾಮುಖ್ಯತಾ ದಿಲ್ಯಾ.

ಎಕ್ವಟ್ ಆನಿ ಸಹಭಾಗಿತ್ವ್: ಎಕೆಮೆಕಾಚಾ ಸಾಂಗಾತ್ಪಣಾ ಮುಖಾಂತ್ರ್ ‘ಸಾಂಕೊವ್ ಬಾಂದೊನ್’ ಸಕ್ಡಾಂಕ್ ಸ್ವಾಗತ್ ರ‍್ನ್ ಸಹಭಾಗಿತ್ಪಣ್ ರುತಾ ಕರ‍್ಚೆಂ ಆನಿ ಎಕ್ವಟಾಚಿ ಮಿಶನರಿ ಇಗರ್ಜ್ ಮಾತಾ ಬಾಂದುಂಕ್ ತಾಣಿಂ ಉಲೊ ದಿಲ್ಲೊ ಆಸಾ. ಹೊ ಎಕ್ವಟ್ ಕೇವಲ್ ಇಗರ್ಜೆ ಭಿತರ್ ಮಾತ್ರ್ ಉರನಾಸ್ತಾಂ ತೊ ಉಗ್ತ್ಯಾನ್ ದಿಸೊಂಕ್ ಜಾಯ್ ಆನಿ ಶಾಂತಿ ಸಂದಾನಾಚೆ ರಾಜ್ ಸ್ಥಾಪಿತ್ ಕರುಂಕ್ ಜಾಯ್ ಕಳಯ್ಲಾಂ.

ಸಂವಾದ್ ಆನಿ ಬಾವ್ಪಣ್: ಪವಿತ್ರ್ ಸಭಾ ಸರ್ವಾಂಕ್ ಸದಾಂಚ್ ಉಗ್ತಿ ಆಸಾ. ದುಬ್ಳ್ಯಾಂ ಆನಿ ನಿರ್ಗತಿಕಾ ಥಂಯ್ ಸಂವಾದಾಚೊ ಸಾಂಕೊವ್ ವಾಪಾರುಂಕ್ ಜಾಯ್. ಇಗರ್ಜ್ ಮಾತಾ ಲೊಕಾಂ ಸಾಂಗಾತಾ ವಚೊಂಕ್ ಜಾಯ್. ಬಾವ್ಪಣಾವಿಶಿಂ ಎಕಾ ಬುದ್ವರಾ ಪಾಪಾನ್ ದಿಲ್ಲಿ ಶಿಕೊವ್ಣ್ ಹಿ. ದೇವ್ ಬಾವ್ಪಣಾಚೆಂ ಮೂಳ್. ಬಾವ್ಪಣ್ ಮ್ಹಳ್ಯಾರ್ ಎಕಾಮೆಕಾ ಸಾಂಗಾತ್ ದಿಂವ್ಚೊ ಎಕಾಮೆಕಾಚಿ ಜತನ್ ರ‍್ಚಿ. ಭಾವ್ಪಣ್ ಮನ್ಶಾಪಣಾಕ್ ಸಂಬಂಧ್ ಜಾಲ್ಲೆಂ ಆನಿ ಹ್ಯಾ ಭಾವ್ಪಣಾವಿಣೆಂ ಆಮಿ ಜಿಯೆಂವ್ಕ್ ಅಸಾಧ್ಯ್. ಆಮಿ ಮನಿಸ್ ದೆಕುನ್ ಹೆರಾಂ ಸಂಗಿಂ ಬರೊ ಸಂಬಂಧ್ ಗರ್ಜೆಚೊ. ಆಮಿ ಸಾಂಗಾತಾ ಜಿಯೆತಾಸ್ತಾನಾ ಆಮ್ಚೆಂ ಮನ್ಶಾಪಣ್ ಸಂಪೂರ್ಣಾಯೆಕ್ ಪಾವ್ತಾ. ಆಮ್ಚೆ ಭಿತರ್‌ಚ್ ಆಮಿ ರಾವ್ಲ್ಯಾಂವ್ ತರ್ ಆಮಿ ಎಕ್ಸುರಿ ಜಾತಾಂವ್.

ದುಬ್ಳ್ಯಾಂಚೊ ಹುಸ್ಕೊ: ಪಾಪಾ ಫ್ರಾನ್ಸಿಸಾನ್ 2017ವ್ಯಾ ವರ‍್ಸಾ ಸಾದ್ಯಾಕಾಳಾಚೊ 33ವೊ ಆಯ್ತಾರ್ ಅಂತರಾಷ್ಟ್ರೀಯ್ ದುಬ್ಳ್ಯಾಂಚೊ ದೀಸ್ ಜಾವ್ನ್ ಆಚರಣ್ ಕರುಂಕ್ ಉಲ್ಲೊ ದಿಲ್ಲೊ. ತಾಚ್ಯಾ ಮೆಟಾಂನಿ ಆತಾಂಚೊ ಪಾಪಾ ಲಿಯಾಂವ್ ಚಲೊನ್ ಆಸಾ. ದುಬ್ಖ್ಯಾಂಕ್ ಆದಾರ್ ದೀಂವ್ಕ್, ತಾಚೆಂ ಥಂಯ್ ದೆವಾಚೆಂ ಹಾರ‍್ಪಣ್ ಪಳೆಂವ್ಕ್ ಆನಿ ಕ್ರಿಸ್ತಾಚೊ ಮೋಗ್ ತಾಂಕಾಂ ಕರ‍್ಯಾಂನಿ ದಾಕಂವ್ಕ್ ಉಲೊ ದಿಲಾ. ತಶೆಂಚ್ ನವೆಂಬರ್ 16 ತಾರಿಕೆರ್ ಹೊ ದೀಸ್ ಸಂಬ್ರಮುನ್  ವಾತಿಕಾನಾ ಪಾಪಾ ಪಾವ್ಲ್ ಸವ್ಯಾಚಾ ಹೊಲಾಂ 1309 ದುಬ್ಖ್ಯಾಂಕ್ ಆಸಾ ಕೆಲ್ಲ್ಯಾ ಜೆವ್ಣಾಂತ್ ತಾಣಿಂ ವಾಂಟೊ ಘೆತ್ಲಾ. ದುಬ್ಳ್ಯಾಂಥಂಯ್ ತಾಂಕಾಂ ಆಸ್ಚೊ ಹಾಂಗಸರ್ ಸ್ಪಷ್ಟ್ ದಿಸ್ತಾ.

ಪಾರಂಪರ ಆನಿ ನವೀಕರಣ್: ಪಾಪಾ ಲಿಯೊ ಚೊವ್ದಾವ್ಯಾಕ್ ಥೊಡೆ ಪಾರಂಪರಿಕ್ ದೇವ್‌ಸ್ತುತೆಚಿಂ ಆಚರಣಾಂ ಪುನರ್‌ಸ್ಥಾಪಿತ್ ಕೆಲ್ಯಾಂತ್. ದೃಷ್ಟಾಂತ್ ಕ್ರಿಸ್ಮಸಾ ದಿಸಾ ಸಕಾಳಿಂಚೆಂ ಮೀಸ್ ಪರತ್ ಆಸಾ ಕೆಲಾಂ. ತಶೆಂಚ್ ಹ್ಯಾ ವರ‍್ಸಾ ಎಕ್ವಟ್, ಶಾಂತಿಚೆ ಮಿಸಾಂವ್ ನವ್ಯಾ ರಿತಿಂನಿ ಕಾರ್ಯಗತ್ ಕರ‍್ಚೆವಿಶಿಂ ಪಾಪಾ ಲಿಯೊಚೊ ಸಂದೇಶ್ ಆಮ್ಕಾಂ ಲಾಭ್ತಲೊ.

2025ವೆಂ ವರಸ್ ಆಖೇರ್ ಜಾವ್ನ್ ಆಯ್ಲೆಂ. ಅಖ್ಖ್ಯಾ ವರ‍್ಸಾ ಪತ್ರಾಚ್ಯೆ ಯಶಸ್ವೆಕ್ ಜಾಯ್ತ್ಯಾಂನಿ ಸಾಂಗಾತ್ ಆನಿ ಮೋಗ್ ದಿಲಾ ಮ್ಹಳ್ಳಿಚ್ ದಾದೊಸ್ಕಾಯೆಚಿ ಗಜಾಲ್. ಬರ‍್ಯಾಂತ್ಲೆಂ  ಬರೆಂ ವಾಚಪ್ ತುಮ್ಕಾಂ ಪಾವೊಂವ್ಕ್ ಆಮಿ ಕಾಡ್‌ಲ್ಲ್ಯೆ ವಾಂವ್ಟಿಕ್ ತುಮ್ಚೊ ಪ್ರೋತ್ಸಾಹ್ ಲಾಬ್ಲಾ. ಫುಡೆಂಯ್ ತುಮ್ಚೆರ್ ಆಮಿ ಭರ್ವಸ್ತಾಂವ್ ಆನಿ ನವ್ಯೆ ಹುಮೆದಿನ್ ನವ್ಯಾ ವರ‍್ಸಾಕ್ ಮೇಟ್ ಕಾಡ್ತಾಂವ್.

ಜನೆರಾಚಾ 14 ಆನಿ 15 ತಾರಿಕೆರ್ ಕಾರ್ಮೆಲ್ ಗುಡ್ಯಾರ್ ಬಾಳೊಕ್ ಜೆಜುಚಿ ವಾರ್ಶಿಕ್ ಪರಬ್ ಆಸಾ. ನೊವೆನಾಂಕ್ ಆನಿ ಫೆಸ್ತಾಕ್ ತುಮ್ಕಾಂ ಕಾರ್ಮೆಲ್ ಗುಡ್ಯಾವಯ್ಲೆ ಕಾರ್ಮೆಲಿತ್ ಫ್ರಾದ್, ಮೊಗಾಚೆಂ ಆಪವ್ಣೆಂ ಪಾಟಯ್ತಾಂವ್. ಫೆಸ್ತಾಕ್ ಯೆತಾನಾ ಆಮ್ಚ್ಯಾ ಪತ್ರಾಕ್ ವರ್ಗಣಿ ಭರುಂಕ್ ವಾ ನವೀಕೃತ್ ಕರುಂಕ್ ವಿಸ್ರನಾಕಾತ್. ತುಮ್ಕಾಂ ಸಮೇಸ್ತಾಂಕ್ ಸಂತೊಸ್‌ಭರಿತ್ ನತಾಲ್ ಮಾಗ್ತಾಂವ್.

ಬಾಪ್ ಐವನ್ ಸೊಜ್, ಕಾರ್ಮೆಲಿತ್