ಬೆಂಗ್ಳುರ್ 11 ಸಪ್ಟೆಂಬರ್ 2024(CCBI): ಕಾರ್ಮೆಲಿತ್ ಫ್ರಾದ್ ರುಡೋಲ್ಫ್ ಪಿಂಟೊ CCBI ಲಿತುರ್ಜಿಕ್ ಕಮಿಶನಾಚೊ ಕಾರ್ಯದರ್ಶಿ ಜಾವ್ನ್ ನೇಮಕ್ ಜಾಲಾ. ಸಪ್ಟೆಂಬರ್ 10-11 ತಾರಿಕೆರ್ ಬೆಂಗ್ಳುರಾಂತ್ ಚಲೊನ್ ಆಸ್ಚ್ಯಾ CCBI ಕಾರ್ಯಕಾರಿ ಸಭೆಂತ್ ಹೆಂ ನೇಮಕ್ಪಣ್ ಅಧಿಕೃತ್ ರಿತಿನ್ ಘೋಷಿತ್ ಕೆಲಾಂ.

ಬಾಪ್ ರುಡೋಲ್ಫ್ ಪಿಂಟೊನ್ ಮದ್ರಾಸ್ ವಿಶ್ವವಿದ್ಯಾಲಯ್ ಥಾವ್ನ್ Msc ಕೌನ್ಸಿಲಿಂಗ್ ಸೈಕೊಲಿಜಿಂತ್ ಪದ್ವಿ ಆನಿ Pontifical Athenaeum of Sant’ Anselmo ಥಾವ್ನ್ ಲಿತುರ್ಜಿಂತ್ ಡಾಕ್ಟರೇಟ್ ಪದ್ವಿ ಆನಿ ಲಿತುರ್ಜಿಕ್ ಸಂಗೀತಾಂತ್ ಲೈಸನ್ಸಿಯೆಟ್ ಪದ್ವಿ ತ್ಯಾಚ್ ಯುನಿವರ್ಸಿಟಿ ಥಾವ್ನ್ ಜೊಡ್ಲ್ಯಾ. ತಾಣಿಂ ಕೆಲ್ಲ್ಯಾ ಸಂಶೋಧನಾಚೊ ವಿಶಯ್ “The Extraordinary Minister of Holy Communion: Its Historical and Theological Perspectives,” and a Liturgical Music thesis titled “One Rite but Many Expressions: A Study of the Musical-Liturgical Treasury of Vocal Diversity in the Communion Rite of Missale Romanum 2002.”. ತಾಂಚ್ಯಾ ಡಾಕ್ಟರೇಟ್ ಸಂಶೋದಾನಾಚೊ ವಿಶಯ್ “Munus Musicae Sacrae Ministeriale in Dominico Servitio,” ಲಿತುರ್ಜಿಂತ್ ಸಂಗೀತಾಚೊ ಪಾತ್ರ್ ತಶೆಂಚ್ ಸಂಗೀತಾವಿಶಿಂ ದುಸ್ರ್ಯಾ ವಾತಿಕಾನಾಚ್ಯಾ ದಸ್ತಾವೇಜಾಂತ್ ಉಲ್ಲೇಕ್ ಕೆಲ್ಲೆ ವಿಶಯ್ ಸಮುದಾಯಾಂತ್ ಕಶೆಂ ಅನುಷ್ಟಾನ್ ಕರ್‍ಯೆತ್ ಮ್ಹಳ್ಳ್ಯಾವಿಶಿಂ ಆಸಾ.

ಸಪ್ಟೆಂಬರ್ 1, 1976 ಇಸ್ವೆಂತ್ ಬಾಪ್ ರುಡೋಲ್ಪ್ ಪಿಂಟೊಚೊ ಜಲ್ಮ್. ಕಂದಾವರಚಾ ಪೊಂಪೈ ಪ್ರಾಥಮಿಕ್ ಇಸ್ಕೊಲಾಂತ್ ಸುರ್‍ವಿಲೆಂ ಶಿಕಾಪ್. ಕಿನ್ನಿಕಂಬ್ಳಚಾ ರೊಜಾ ಮಿಸ್ಟಿಕಾಂತ್ ಹೈಸ್ಕೂಲ್ ಶಿಕಾಪ್. ಉಪ್ರಾಂತ್ ಕಾರ್ಮೆಲಿತ್ ಒಡ್ದಿಕ್ ಆಪೊವ್ಣೆಂ. ಮಡ್ಗಾಂವಾಂತ್ ನೊವಿಶಿಯೆಟ್, ತತ್ವಶಾಸ್ತ್ರ್ ಮೈಸೂರಾಂತ್, ರಿಜನ್ಸಿ ಕುಶಾಲ್‌ನಗರಾಚಾ ತಪೋವನಾಂತ್ ಆನಿ ದೇವ್‌ಶಾಸ್ತ್ರಾಚೆ ಶಿಕಾಪ್ ಜೆಪ್ಪು ಸಾಂ ಜುಜೆ ಸೆಮಿನರಿಂತ್ ಸಂಪ್ತಚ್ 2003 ಇಸ್ವಿ ಮೇ 31 ತಾರಿಕೆರ್ ಕಾರ್ಮೆಲಿತ್ ಒಡ್ದಿಂತ್ ಶಾಶ್ವತ್ ಆಂಗೊವ್ಣ್ಯೊ ಕರ್‍ನ್ 2004, ಡಿಸೆಂಬರಾಚಾ 28 ತಾರಿಕೆರ್ ಕಾರ್ಮೆಲ್ ಗುಡ್ಯಾರ್ ಯಾಜಕೀ ದೀಕ್ಷಾ.
ಯಾಜಕೀ ದೀಕ್ಷಾ ಲಾಭ್ಲ್ಯಾ ಉಪ್ರಾಂತ್ ಸಹಾಯಕ್ ವಿಗಾರ್ ಜಾವ್ನ್ ಸಾನ್ ಸಾಲ್ವದೊರ್ ಇಗರ್ಜ್ ಹೊನ್ನಾವಾರಾಂತ್ ತಶೆಂಚ್ ವಿಗಾರ್ ಜಾವ್ನ್ ಸಾಂ ಸೆಬಾಸ್ಟಿಯನ್ ಫಿರ್ಗಜೆಂತ್ ಸೆವಾ ದಿಲ್ಯಾ. ಹೊನ್ನಾವಾರಾಂತ್ ಸ್ಟೆಲ್ಲಾ ಮಾರಿಸ್ ಕೊವೆಂತಾಚೊ ವ್ಹಡಿಲ್ ಜಾವ್ನ್’ಯೀ ಸೆವಾ ದಿಲ್ಯಾ. ಪ್ರಸ್ತುತ್ ರಾಣಿಪುರಾಂತ್ ಆಸ್ಚ್ಯಾ ಋಷಿವನ ಆಧ್ಯಾತ್ಮಿಕ್ ಕೇಂದ್ರಾಚೆ ದಿರೆಕ್ತೊರ್ ಜಾವ್ನ್ ಸೆವಾ ದೀವ್ನ್ ಆಸಾತ್.
ಡಾಕ್ಟರೇಟ್ ಸಂಪೊನ್ ಗಾಂವಾಕ್ ಆಯ್ಲ್ಯಾ ಉಪ್ರಾಂತ್ ಕ್ರಿಸ್ತ ಜ್ಯೋತಿ ಕಾಲೇಜ್, ಬೆಂಗ್ಳುರ್, ವಿಜಯಾನಿಲಯಮ್ ಇನ್ಸಿಸ್ಟಿಟೂಟ್ ಆಪ್ ಫಿಲೋಸೊಪಿ ಆನಿ ರಿಲಿಜಿಯನ್, ಎಲೂರ್, ತಶೆಂಚ್, ಮಂಗ್ಳುರ್ ಸಾಂ ಜುಜೆ ಸೆಮಿನರಿತ್ ಪ್ರಾಧ್ಯಾಪಕ್ ಜಾವ್ನ್ ಸೆವಾ ದೀವ್ನ್ ಆಸಾ. ಮೈಸೂರ್‍ಚ್ಯಾ ಧ್ಯಾನವನ, ಧ್ಯಾನಸಾಧನ ತಶೆಂಚ್ ಋಷಿವನ ಕಾರ್ಮೆಲಿತ್ ಆಧ್ಯಾತ್ಮಿಕ್ ಕೇಂದ್ರಾಂತ್ ತಾಂಚಿ ನಿರಂತರ್ ಸೆವಾ ದೀವ್ನ್ ಆಸಾತ್.

ಲಿತುರ್ಜಿ ಕಮಿಶನಾಚೆ ಕಾರ್ಯದರ್ಶಿ ಜಾವ್ನ್ ನೇವಕ್ ಜಾಲ್ಲ್ಯಾ ತಾಂಕಾಂ ಕಾರ್ಮೆಲಿತ್ ಪ್ರಾಂತ್ಯಾಚೆ ವ್ಹಡಿಲ್, ಕೌನ್ಸಿಲ್ಸರ್, ಯಾಜಕ್, ಭಯ್ಣಿಂ ಆನಿ ಸೆಕುಲರ್ ಕಾರ್ಮೆಲಿತ್ ಸಾಂದೆ ಅಭಿನಂದನ್ ಪಾಟಯ್ತಾಂವ್. ಆನಿ ಹ್ಯಾ ಸೆವಾಚಾ ವಾವ್ರಾಕ್ ಬರೆಂ ಮಾಗ್ತಾಂವ್.