📰ಎಪ್ರಿಲ್ 18: ಚುನಾವಾಚಿ ಧಾವ್ ಚಡೊನ್ ಯೆತಾಸ್ತಾನಾಂಚ್ ಕ್ರಿಸ್ತಾಂವಾಚೆರ್ ಅನ್ಯೇಕ್ ವ್ಹಡ್ ಮಾಪಾಚೊ ಹಲ್ಲೊ ಜಾಲ್ಲೆಂ ಘಡಿತ್ ತೆಲಂಗಾಣಾ ಥಾವ್ನ್ ವರ್ದಿ ಜಾಲಾಂ. ತೆಲಂಗಣಾಚ್ಯಾ ಎಕಾ ಕಥೊಲಿಕ್ ಇಸ್ಕೊಲಾಕ್ ಶ್ರೀ ರಾಮ ಸೇನೆಚ್ಯಾ ಕಾರ್ಯಕರ್ತಾಂನಿ ಎಕಾಎಕಿ ಧಾಡ್ ಘಾಲ್ನ್ ಇಸ್ಕೊಲಾಚಿ ಜುಲುಮ್ ಕೆಲ್ಯಾ.

ಹೈದಾರಾಬಾದ್ ಥಾವ್ನ್ 625 ಕಿ.ಲೊ. ಪಯ್ಸ್ ಆಸ್ಚ್ಯಾ ಮಣ್ಚೇರಿಯಲ್ ಜಿಲ್ಲೆಚ್ಯಾ ಕಣೆಪಾಲಿ ಹಳ್ಳೆಂತ್ ಹೆಂ ನಾಲಿಸಾಯೆಚೆಂ ಘಡಿತ್ ಘಡ್ಲಾಂ. ಥಂಯ್ಸರ್ ಆಸ್ಚ್ಯಾ ಸಾಂ ಮದರ್ ತೆರೆಸಾ ಇಂಗ್ಲಿಶ್ ಮಿಡಿಯಮ್ ಇಸ್ಕೊಲಾಚೆರ್ ಎಪ್ರಿಲ್ ಸತ್ರಾ ತಾರಿಕೆರ್ ದಿಸಾ ಉಜ್ವಾಡಾಕ್ ಧಾಡ್ ಜಾಲ್ಯಾ. ಜೈ ಶ್ರೀ ರಾಮ್ ಮ್ಹಣ್ ನಾರೆ ಲಾಗವ್ನ್ ಏಕ್ ಜಮೊ ಯೆತಾ ಆನಿ ಇಸ್ಕೊಲಾಚೆ ಗೆಟಿಕ್ ಆನಿ ಮುಕಾರ್ ಆಸ್ಚ್ಯಾ ಮದರ್ ತೆರೆಸಾಚ್ಯಾ ಇಮಾಜಿಕ್ ಫಾತೊರ್ ಮಾರ್ತಾ.

“ಎಪ್ರಿಲ್ 15 ತಾರಿಕೆರ್ ಥೊಡ್ಯಾ ಭುರ್ಗ್ಯಾಂನಿ ಇಸ್ಕೊಲಾಂತ್ ಯೂನಿಫೊರ್ಮಾ ಬದ್ಲಾಕ್ ಹೆರ್ ಧರ್ಮಿಕ್ ನ್ಹೆಸಣ್ ನೆಸ್’ಲ್ಲೊ ವಿಷಯ್ ಹಾಂವೆಂ ಇಸ್ಕೊಲಾಚ್ಯಾ ರುಲಿಭಾಯ್ರ್ ಮ್ಹಣ್ ಭುರ್ಗ್ಯಾಂಚ್ಯಾ ಗಮನಾಕ್ ಹಾಡ್ಲೊ ಆನಿ ವ್ಹಡಿಲಾಂಕ್ ಆಪವ್ನ್ ಹಾಡ್ನ್ ಸ್ಪಶ್ಟತಾ ದಿಂವ್ಕ್ ಆದೇಸ್ ದಿಲ್ಲೊ. ಹೆಂ ಜಾವ್ನ್ ಎಕಾ ದಿಸಾ ಉಪ್ರಾಂತ್ ಹಿಂದೂ ಕಾರ್ಯಕರ್ತಾಂನಿ ಇಸ್ಕೊಲಾಕ್ ಲುಕ್ಸಾಣ್ ಕೆಲ್ಯಾ. ಮ್ಹಾಕಾ ತೊಂಡಾಂಕ್ ಅನಿ ಪೊಟಾಕ್ ಮಾರ್‍ಲಾಂ. ಎಕ್ಲ್ಯಾನ್ ಪಾಟಿಕ್ ಮಾರ್‍ಲಾಂ” ಮ್ಹಣ್ ಪ್ರಿನ್ಸಿಪಾಲ್, ಬಾಪ್ ಜೈಮೊನ್ ಜೋಸೆಫ್ ಘಡಿತಾಚೊ ವಿವರ್ ದಿತಾ.

ಹ್ಯಾ ಘಡಿತಾ ಪಾಟ್ಲೆಂ ಕಾರಣ್ ಕಿತೆಂ?

ಎಪ್ರಿಲ್ 15 ತಾರಿಕೆರ್ ಇಸ್ಕೊಲಾಚೊ ಪ್ರಿನ್ಸಿಪಾಲ್ ಬಾಪ್ ಜೈಮೊನ್ ಜೋಸೆಫ್ ಹಾಣಿಂ ಇಸ್ಕೊಲಾಚೆಂ ಯುನಿಫೊರ್ಮ್ ಸೊಡ್ನ್ ಧರ್ಮಿಕ್ ನೆಸಣ್ ನೆಸೊನ್ ಆಯಿಲ್ಲ್ಯಾ ಥೊಡ್ಯಾ ವಿದ್ಯಾರ್ಥಿಂಕ್ ವಾರ್ನಿಂಗ್ ದಿಲ್ಲೆಂ.

ಧರ್ಮಿಕ್ ನೆಸಣ್ ನೆಸೊನ್ ಯೆಂವ್ಕ್ ಕಾರಣ್ ಸೊದುನ್ ವೆತಾನಾ, ಥೊಡ್ಯಾ ಭುರ್ಗ್ಯಾಂನಿ 21 ದಿಸಾಂಚೆಂ ಧರ್ಮಿಕ್ ವೃತ್ ಧರ್‍’ಲ್ಲೆಂ ಆನಿ ತ್ಯಾಚ್ ನೆಸ್ಣಾರ್ ಇಸ್ಕೊಲಾಕ್ ವಿದ್ಯಾರ್ಥಿ ಗೆಲ್ಲೆ. ಇಸ್ಕೊಲಾಚ್ಯಾ ನಿಯಮಾಪರ್ಮಾಣೆಂ ಹೆಂ ತಾಂಚೆಂ ನಡ್ತೆಂ ಸವಾಲ್ ಕರ್‍ನ್ ಪ್ರಿನ್ಸಿಪಾಲಾನ್ ತಾಂಚ್ಯಾ ವ್ಹಡಿಲಾಂಕ್ ಆಪಂವ್ಕ್ ಸಾಂಗ್’ಲ್ಲೆಂ. ಪುಣ್ ಎಕಾ ವಿದ್ಯಾರ್ಥಿನ್ ಇಸ್ಕೊಲಾಚೆರ್ ಉಳ್ಟೊ ಆರೋಪ್ ಲಾವ್ನ್ ಏಕ್ ವಿಡಿಯೊ ವೈರಲ್ ಕೆಲ್ಲೆಂಚ್ ಹೆಂ ಘಡಿತ್ ಘಡ್ಲಾಂ. ಇಸ್ಕೊಲಾಚ್ಯಾ ಆಡಳ್ತ್ಯಾನ್ ಹಿಂದು ಧರ್ಮಾಕ್ ಅಕ್ಮಾನ್ ಕೆಲಾ ಮ್ಹಣ್ ನೀಬ್ ದೀವ್ನ್ ಶ್ರೀ ರಾಮ ಸೇನೆಚ್ಯಾ ಕಾರ್ಯಕರ್ತಾಂನಿ ಇಸ್ಕೊಲಾಚೆ ಧಾಡ್ ಘಾಲ್ನ್ ಇಸ್ಕೊಲಾಚ್ಯಾ ವಸ್ತುಂಕ್ ಪಿಟೊ ಕೆಲಾಂ. ಇತ್ಲ್ಯಾ ವರ್ಸಾಂನಿ ಹ್ಯಾ ಧರ್ಮಿಕ್ ವೃತಾವರ್ವಿಂ ಇಸ್ಕೊಲಾ ಭಿತರ್ ರಿಗಾನಾತ್ಲೊ ಧರ್ಮ್ ಹ್ಯಾ ವರ್ಸಾ ಭಿತರ್ ಸರ್‍ಲಾ!

ಧರ್ಮಿಕ್ ಸಿಂತಿಮೆಂತಾಂ ದುಕಯ್ಲ್ಯಾಂತ್ ಮ್ಹಣ್ ಇಸ್ಕೊಲಾಚೆರ್ ಹ್ಯಾ ಉದ್ರಿಕ್ತ್ ಜಮ್ಯಾನ್ ಕೇಸ್ ದಾಖಲ್ ಕೆಲ್ಯಾ ತರೀ ’ಅಧಿಕೃತ್’ ಜಾವ್ನ್ ಕಸಲಿಯ್ ಮಾಹೆತ್ ಇಸ್ಕೊಲಾಕ್ ದೀಂವ್ಕ್ ನಾ. ಹ್ಯಾಚ್ ವೆಳಾ ಇಸ್ಕೊಲಾ ಥಾವ್ನ್ ಹ್ಯಾ ಜಮ್ಯಾಂತ್ಲ್ಯಾ ಸುಮಾರ್ 120 ಜಣಾಂಚೆರ್ ಕೇಸ್ ದಾಕಲ್ ಕೆಲ್ಯಾ ತರೀ ಎದೊಳ್ ಕೊಣಾಯ್ಕಿ ಕಯ್ದ್ ಕರುಂಕ್ ನಾ.

ಹೆಂ ಘಡಿತ್ ಘಡ್ಲ್ಯಾ ಉಪ್ರಾಂತ್ ರಾಜ್ಯಾ ಥಾವ್ನ್ 18 ಸಿಆರ್’ಪಿಎಫ್ ಪೊಲಿಸಾಂಕ್ ಇಸ್ಕೊಲಾಚೆ ಭದ್ರತೆ ಖಾತಿರ್ ನೇಮಕ್ ಕೆಲ್ಯಾತ್.