ಮನ್ಶಾಕ್ ಕೊಮನ್ ಸೆನ್ಸ್ ಮ್ಹಣ್ ಆಸ್ತಾ. ಹ್ಯಾ ಕೊಮನ್ ಸೆನ್ಸಾ ಭಾಯ್ರ್ ಮನ್ಶಾನ್ ಕರ್‍ಚಿಂ ಕಾಮಾಂ, ಉಲೊಂವ್ಚೆಂ ಉಲೊಣೆಂ ಜಾಯ್ತೆಪಾವ್ಟಿಂ ಹಾಸ್ಯಾಕ್ ಗ್ರಾಸ್ ಜಾತಾತ್. ಹ್ಯಾ ಖಾತಿರ್ ಆದಿಂ ಗಾಂವಾಂನಿ ಥೊಡ್ಯಾಂಕ್ ‘ಪೆದ್ದ’ ಮ್ಹಣ್‌ಚ್ ನಾಂವ್ ಪಡ್ತಾಲೆಂ. ಹೆರಾಂಬರಿ ನಾರ್ಮಲ್ ನ್ಹಯ್ ಆಸ್ಲಲ್ಯಾಂಚೆರ್ ಹಾಸ್ಚೆಂಯ್ ಸಮಾಜೆಂತ್ ‘ನಾರ್ಮಲ್’ ಜಾಲ್ಲೆಂ ಆಸಾ. ಇಶ್ಟಾಂಮದೆಂ ಎಕ್ಲೊ ಫೊಕಾಣಾಂ ಕರ್‍ಚೊ ಆಸ್ತಾಚ್. ಹಾಸೊಂಕ್‌ಚ್ ಮ್ಹಣ್ ತಾಚೆಭೊವಾರಿಂ ರಾಂವ್ಚೆ ಮನಿಸ್ ಆಸ್ತಾತ್. ಇಶ್ಟಾಗತೆಂತ್ ಜಾಂವ್ಚ್ಯಾ ಫೊಕಾಣಾಂನಿ ಕೊಣಾಯ್ಕಿ ಬೆಜಾರಾಯ್ ಆಸನಾ, ಬಗಾರ್ ಸಂತೊಸ್ ದೊಡ್ತೊ ಜಾತಾ. ಮಾಗಿರ್ ನಾಟಕಾಂನಿ, ಸಂಭ್ರಮಾಂನಿ ಹಾಸ್ಯ್ ಆಯೋಜಿತ್ ಕರಿಜೆ ಪಡ್ಲೆಂ. ಆಜ್ ನಾಟಕ್, ಸಿನೆಮಾಂತ್ಲ್ಯಾ ಹಾಸ್ಯಾಪ್ರಾಸ್ ಚಡ್

ಥಳ್ಹಾತಾಚೆರ್ ಆಸ್ಚ್ಯಾ ಮೊಬಾಯ್ಲಾಚೆರ್ ದರಬಸ್ತ್ ಹಾಸ್ಯ್ ಮೆಳ್ತಾ. ತಾಂತ್ಲೆಂಚ್ ವಿಂಚುನ್ ಆಜ್ ನಾಟಕಾಕ್, ಸಿನೆಮಾಕ್ ಹಾಸ್ಯ್ ವಸ್ತ್ ವಿಂಚ್ಚೆಂಯ್ ಪಳೆವ್ಯೆತ್.

ತಶೆಂ ಮ್ಹಣ್ತಾನಾ, ಹಾಸೊಂವ್ಚೆಂ ಏಕ್ ವಿಶೇಸ್ ತಾಲೆಂತ್. ಜಾಂವ್ ತೆ ಜ್ಯೋಕ್ಸ್, ಹಾಸ್ಯ್ ನಟನ್, ಹಾಸ್ಯ್ ಬರೊವ್ಪ್ – ಹಾಸೊಂವ್ಚ್ಯಾಂತ್ ಯಶಸ್ವಿ ಜಾಲ್ಲೆ ಬೊವ್ ಥೊಡೆ. ಹರ್‍ಯೆಕಾ ವರ್‍ಸಾ ನ.ಬಾ.ಜೆ. ಪತ್ರ್ ಗಂಭೀರ್ ವಿಶಯಾಂಸವೆಂ ಮದೆಂ ಏಕ್ ಬ್ರೇಕ್ ದೀವ್ನ್ ವಾಚ್ತಲ್ಯಾಂಚಿ ಮತ್ ಹಾಳು ಕರುಂಕ್ ಬರ್‍ಪಾರುಪಿಂ ಹಾಸೊಂವ್ಚೆಂ ಪ್ರಯತ್ನ್ ಚಾಲು ದವರ್‍ನ್ ಆಸಾ.

ಸೆಮಿನರಿಚ್ಯಾ ಶಿಕ್ಪಾ ವೆಳಾರ್ ಆನಿ ಕೊವೆಂತಾಂನಿ ಜಾಂವ್ಚ್ಯಾ ಹಾಸ್ಯ್ ಘಡಿತಾಂಚೊ ಪುಂಜೊಚ್ ಎದೊಳ್ ಬಾಪ್ ಆಲ್ವಿ ಕಾರ್ಮೆಲಿತ್ ‘ಕುಚಿಲ್ಯೊ’ ಮುಕಾಂತ್ರ್ ಲೊಕಾಮೆರೆನ್ ದವರ್‍ಲಾ. ಆಮ್ಚ್ಯಾ ಹ್ಯಾ ಪತ್ರಾರ್ ಸಬಾರ್ ತೇಂಪ್ ತಾಚಿಂ ಹಾಸ್ಯ್ ಬರ್‍ಪಾಂ ಫಾಯ್ಸ್ ಜಾತಾಲಿಂ. ಮ್ಹಜ್ಯಾ ಸೆಮಿನರಿ ಜಿವಿತಾಂತ್ ಸುರ್‍ವೇರ್ ಜಾಲ್ಲಿಂ ಏಕ್ ದೋನ್ ಘಡಿತಾಂ ಹಾಂಗಾ ಪಾತ್ಳಾಯ್ತಾಂ.

ಆಮಿ ಸೆಮಿನರಿಕ್ ಭರ್‍ತಿ ಜಾತಾನಾ ಕನ್ನಡ ಮಾದ್ಯಮಾಂತ್ ಶಿಕ್ಲಲ್ಯಾ ಆಮ್ಚೆಂ ಇಂಗ್ಲಿಶ್ ‘ಚಿಂತಾಜನಕ್’ ಸ್ತಿತೆರ್ ಆಸ್ಲೆಂ! ಧಾವಿ ಸಂಪೊವ್ನ್ ಆಯಿಲ್ಲ್ಯಾ ಭಾವಾಂಕ್ ಪಯ್ಲ್ಯಾ ವರ್‍ಸಾಚಿ ತರ್ಭೆತಿ ಗೊಂಯಾಂತ್ ಚಲ್ತಾ. ಕನ್ನಡ ಮೀಡಿಯಾಂತ್ ಶಿಕೊನ್ ಆಯಿಲ್ಲ್ಯಾ ಭಾವಾಂಕ್ ಪ್ರೇ ಇಂಗ್ಲಿಶ್, ವಾಕ್ ಇಂಗ್ಲಿಶ್, ಸಿಟ್ ಇಂಗ್ಲಿಶ್, ಪ್ಲೇ ಇಂಗ್ಲಿಶ್ ಮ್ಹಣ್ ಫರ್ಮಾಣ್ ಯೆತಾನಾ ದುಸ್ರಿ ವಾಟ್ ನಾಸ್ತಾನಾ ಘಾಮೆವ್ನ್ ಘಾಮೆವ್ನ್ ಇಂಗ್ಲಿಶ್ ಸೊಡಿಜೆ ಪಡ್ತಾಲೆಂ. ಏಕ್ ದೀಸ್ ಕೊವೆಂತಾಂತ್ಲೊ ಏಕ್ ಮಾಲ್ಘಡೊ ಯಾಜಕ್ ಮರಣ್ ಪಾವ್ಲೊ. ಮರ್‍ಣಾಚ್ಯೆ ಸುರ್‍ವಾತೆಚೆ ರೀತ್ ಚಾಪಲಾಂತ್ ಇಂಗ್ಲಿಶ್ ಭಾಶೆಂತ್ ಚಲ್ಲಿ. ಮಾಗ್ಣ್ಯಾಚಿ ರೀತ್ ಜಾತಚ್ ಸದಾಂಚ್ಯೆ ಸವಯೆ ಪರ್ಮಾಣೆಂ ದಿರೆಕೊರ್‍ತಾನ್ ಏಕ್ ಗೀತ್ ಗಾಂವ್ಕ್ ಭಾವಾಂಕ್ ಸಾಂಗ್ಲೆಂ. ಹರ್‍ಯೆಕ್ಲೆ ಎಕಾಮೆಕಾಚೆ ತೋಂಡ್ ಪಳೆಂವ್ಕ್ ಲಾಗ್ಲೆ. ಕೊಣಾಯ್ಚ್ಯಾ ಹಾತಾಂತ್ ಇಂಗ್ಲಿಶ್ ಗಿತಾಂಚೆ ಬೂಕ್ ನಾತ್ಲೆ. ‘ಜಾಣಾಂ ಹಾಂವ್ ಆಸಾ ಏಕ್ ರಾಜ್’ ಮ್ಹಣ್ ಇಂಗ್ಲಿಶಾಂತ್ ಹಾಂಕಾಂ ಸಾಂಗ್ಚೆಂ ಕಶೆಂ?! ಕೊಣೀ ತೋಂಡ್ ಉಗಡ್ನಾ ಜಾಲ್ಯಾರ್ ಸಕ್ಡಾಂಚೆ ದೊಳೆ ಲೀಡರಾಕ್ ಖುರ್‍ಸಾಂವ್ಕ್ ಲಾಗ್ಲೆ. ತಾಕಾ ದುಸ್ರೆಂ ಕಿತೆಂ ಗಾಂವ್ಚೆಂ ಮ್ಹಣ್ ಕಳ್ನಾಸ್ತಾಂ – ಔ give ಣhಚಿಟಿಞs ಣo ಣhe ಐoಡಿಜ ॒ಗಾಯನ್ ಸುರು ಕೆಲೆಂ! ಗಾಂವ್ಕ್ ಸಾಂಗ್ಲಲ್ಯಾ ದಿರೆಕ್ತೊರಾಕ್ ಹಾಸೊಂಕ್ ಆಯ್ಲ್ಯಾರೀ ಹಾಸನಾಸ್ತಾಂ ಧಮ್ಮ್ ಬಾಂದುನ್ ರಾವ್ಲೊ! ಹಾಚ್ಯಾ ಉಪ್ರಾಂತ್ ತೊ ಭಾವ್‌ಚ್ ಕೊಮಿಡಿ ಪೀಸ್ ಜಾವ್ನ್ ಗೆಲೊ!

ಏಕ್ ಪಾವ್ಟಿಂ ಎಕಾ ಕೊವೆಂತಾಚ್ಯಾ ಯಾಜಕಾಕ್ ಏಕ್ ಅರ್ಜೆಂಟ್ ಇಮೇಯ್ಲ್ ಧಾಡುಂಕ್ ಆಸ್‌ಲ್ಲೆಂ. ಜಾಯ್ತೆ ಮ್ಹಯ್ನೆ ಇಮೇಯ್ಲ್ ವಾಪಾರಿನಾತ್ಲ್ಯಾನ್ ತಾಕಾ ಪಾಸ್‌ವರ್ಡ್ ವಿಸ್ರೊನ್ ಗೆಲ್ಲೊ. ನವೊ ಪಾಸ್‌ವರ್ಡ್ ಘಾಲುಂಕ್ ಪ್ರಯತ್ನ್ ಕರ್‍ತಾನಾ ಜಾಯ್ತ್ಯಾ ಸವಾಲಾಂಕ್ ಜಾಪಿ ದೀಜೆ ಪಡ್ಲ್ಯೊ. ತಾಂತ್ಲೆಂ ನಿಮಾಣೆಂ ಸವಾಲ್ ಜಾವ್ನಾಸ್ಲೆಂ Whಚಿಣ is ಥಿouಡಿ ಜಿಚಿvouಡಿiಣe ಜಿooಜ? ಯಾಜಕಾನ್ ಚಿಂತುನ್ ಚಿಂತುನ್ ನಿಮಾಣೆಂ ‘ದುಕ್ರಾಮಾಸ್’ ಮ್ಹಣ್ ಬರಯ್ಲೆಂ. ಇಮೇಯ್ಲ್ ಉಗ್ತೆಂ ಜಾಲೆಂ!!

ಮೈಸೂರಾಂತ್ ಯಾಜಕೀ ತರ್ಬೆತಿಚ್ಯಾ ಹಂತಾರ್ ಆಸ್ಲಲ್ಯಾಂಕ್ ತತ್ವ್‌ಶಾಸ್ತ್ರಾಚ್ಯಾ ಶಿಕ್ಪಾಖಾತಿರ್ ಆನ್ಯೇಕ್ ಘರ್ ಆಸಾ. ಥಂಯ್ಸರ್ ಶಿಕ್ಪಾಂತ್ ದೊತೊರ್ ಸನದ್ ಜೊಡ್ಲಲೆ ಯಾಜಕ್ ಆಸಾತ್. ಏಕ್ ದೀಸ್ ದನ್ಪಾರಾಂಚ್ಯಾ ವೆಳಾರ್ ಲ್ಯಾಂಡ್‌ಲಾಯ್ನ್ ಫೊನಾಕ್ ಏಕ್ ಕೊಲ್ ಯೆತಾ. ಕೊಣೀ ಫೊನ್ ಉಕಲ್ನಾತ್ಲೆಂ ಪಳೆವ್ನ್ ಎಕಾ ಬ್ರದರಾನ್ ತೆಂ ಕಾಡ್ಲೆಂ. “ಹಲೋ, ಥಂಯ್ ಡೊಕ್ಟರ್ ಫ್ರಾನ್ಸಿಸ್ ಸಿಕ್ವೇರಾ ಆಸಾಗಿ?”. “ಹಿ ಆಸ್ಪತ್ರ್ ನ್ಹಯ್, ಕೊವೆಂತ್. ಹಾಂಗಾಸರ್ ಕೊಣೀ ದಾಕ್ತೆರ್ ನಾಂತ್” ಸಾಂಗೊನ್ ಬ್ರದರಾನ್ ಟಪ್ಪ್ ಕರ್‍ನ್ ಜಾಪ್ ದೀವ್ನ್ ರಿಸೀವರ್ ಖಿಳಾಯ್ಲೆಂ! (ತ್ಯಾ ನಾಂವಾಚೊ ಪಾದ್ರ್ಯಾಬ್ ತವಳ್ ನವ್ಯಾನ್ ದೊತೊರ್ ಸನದ್ ಜೋಡ್ನ್ ಆಯಿಲ್ಲೊ ಮಾತ್ರ್, ಹ್ಯಾ ಭಾವಾಕ್ ಕಿತೆಂ ಗೊತ್ತು!)

ಕೊವೆಂತಾಂತ್ ಯಾಜಕ್ ಆನಿ ತರ್ಬೆತಿ ಜೊಡ್ಚೆ ಭಾವ್ ಬ್ರೇಕ್‌ಪಾಸ್ಟ್ ಆನಿ ಜೆವ್ಣಾಕ್ ಸಾಂಗಾತಾ ಮೆಳ್ತಾತ್. ಏಕ್ ಪಾವ್ಟಿಂ ಎಕಾ ಕೊವೆಂತಾಂತ್ ಜೆವಣ್ ಜಾತಚ್ ದಿರೆಕ್ತೊರಾನ್ ಎಕಾ ಭಾವಾಕ್ ಆಪಯ್ಲೆಂ ಆನಿ ಮ್ಹಾಕಾ ಏಕ್ ಟೂತ್‌ಪಿಕ್ ಹಾಡ್ ಮ್ಹಣ್ ಸಾಂಗ್ಲೆಂ. (ಟೂತ್‌ಪಿಕ್ ಮ್ಹಳ್ಯಾರ್ ದಾಂತಾ ಇಡ್ಯಾಕ್ ಶಿರ್ಕಾಲ್ಲೆಂ ಕಾಡ್ಚಿ ಕಾಡಿ) ಟೂತ್‌ಪಿಕ್ ಮ್ಹಳ್ಳೊ ಸಬ್ದ್ ತ್ಯಾ ಭಾವಾನ್ ತಾಚ್ಯೆ ಜಿಣಿಯೆಂತ್ ಪಯ್ಲೆಪಾವ್ಟಿಂ ಆಯ್ಕೊಂವ್ಚೊ. ತಾಕಾ ಪರ್‍ತ್ಯಾನ್ ತೆಂ ಕಿತೆಂ ಮ್ಹಣ್ ವಿಚಾರುಂಕ್ ಧಯ್ರ್ ಪಾವ್ಲೆಂನಾ. ಟೂತ್ ಮ್ಹಳ್ಳೊ ಸಬ್ದ್ ಮತಿಂತ್ ದವರ್‍ನ್ ತೊ ರಾಂದ್ಪಾ ಕುಡಾಕ್ ಧಾಂವ್ಲೊ ಆನಿ ಥಂಯ್ಸರ್ ತಾಕಾ ಮೆಳ್ಳೆಂ ಏಕ್ ಟೂತ್‌ಪೇಸ್ಟ್. ಯಾಜಕಾನ್ ವಿಚಾರ್‌ಲ್ಲಿ ವಸ್ತ್ ಹಿಚ್ ಜಾಂವ್ಕ್ ಪುರೊ ಮ್ಹಣ್ ತಾಣೆಂ ಚಿಂತ್ಲೆಂ ಆನಿ ಪೇಸ್ಟ್ ದಿರೆಕೊರ್‍ತಾಕ್ ತುರ್ತಾನ್ ಹಾಡ್ನ್ ದಿಲೆಂ.

ಅಸಲಿಂ ಘಡಿತಾಂ ಸಾಂದರ್ಭಿಕ್ ಜಾವ್ನ್ ಉಡಾಸ್ ಯೆತಾನಾ ಪರ್‍ತುನ್ ಪರ್‍ತುನ್ ಹಾಸೊ ಯೆತಾತ್. ಹ್ಯಾ ಅಂಕ್ಯಾಂತ್ ಕೊಂಕ್ಣೆಚ್ಯಾ ವಿಂಚ್ಣಾರ್ ಬರೊವ್ಪ್ಯಾಂನಿ ಧಾಡ್ನ್ ದಿಲ್ಲಿಂ ಕುರ್ಕುರಿತ್ ಬರ್‍ಪಾಂ, ವಿಡಂಬನಾಂ, ಲಲಿತ್ ಪ್ರಬಂಧ್, ಕಾರ್ಟೂನಾಂ ಆನಿ ಹೆರ್ ಹಾಸ್ಯ್ ಲೇಖನಾಂ ಸಾಂಗಾತಾ ಘಾಲ್ನ್ ಹಾಸ್ಯ್ ಪುಂಜೊ ತುಮ್ಚ್ಯಾ ಹಾತಿಂ ದವರ್‍ತಾಂವ್. ತುಮ್ಚಿಂ ಹಾಸ್ಯಾಚಿಂ ಲ್ಹಾರಾಂ ಆಮ್ಚ್ಯಾ ದಫ್ತರಾ ಪರ್ಯಾಂತ್ ಪಾವ್ತಿತ್ ತರ್ ಆಮಿ ದಾದೊಶಿ.

✍️ – ಬಾಪ್ ಐವನ್ ಸೊಜ್, ಕಾರ್ಮೆಲಿತ್