ಪ್ರಸ್ತುತ್ ಆಮಿ ಇನ್‌ಸ್ಟೆಂಟ್ ಸಂಸಾರಾಂತ್ ಜಿಯೆತಾಂವ್. ಇನ್‌ಸ್ಟೆಂಟ್ ಕೊಫಿ, ಇನ್‌ಸ್ಟೆಂಟ್ ನೂಡಲ್ಸ್.. ಕಿತ್ಲೆವೆಗ್ಗಿಂ ಜಾತಾ ತಿತ್ಲೆವೆಗ್ಗಿ ಆಮಿ ಚಿಂತ್‌ಲ್ಲೆಂ ಜಾಯ್ಜೆ. ಪಿಡಾಯ್ ತಶಿಚ್! ಗುಳಿಯೊ, ಇಂಜೆಕ್ಶನಾಂ ಕಾಣ್ಘೆಲ್ಲ್ಯಾ ತಕ್ಶಣ್ ಪಿಡಾ ರಾವಜೆ. ವೆಗ್ಗಿಂ ಗೂಣ್ ಕರ್‍ಚ್ಯಾ ದಾಕ್ತೆರಾಕ್ ಸೊಧುನ್ ಕಿತ್ಲೆ ಪಯ್ಸ್ ತರೀ ವಚೊಂಕ್ ತಯಾರ್. ಆನಿ ಜರ್ ಖಂಯ್ಸರೀ ರೆತಿರ್ ಆಸಾ, ಥೊಡ್ಯಾಂನಿ ಥಂಯ್ ವೆಚೆಂಯ್ ಸಹಜ್, ಪಿಡಾ ಗೂಣ್ ಜಾಂವ್ಚ್ಯೆ ಆಶೆನ್.

ಲೋಕ್ ವೆಲಂಕಣಿ, ಹರಿಹರ, ಡೋರ್‍ನಹಳ್ಳಿ ತಸಲ್ಯಾ ಫಾಮಾದ್ ಜಾಗ್ಯಾಂಕ್ ಯಾತ್ರಿಕ್ ಪಯ್ಣ್ ಕರ್‍ತಾ. ಥಂಯ್ ಅಜ್ಯಾಪಾಂ ಜಾಲ್ಯಾಂತ್, ಆಪ್ಣಾಕ್‌ಯೀ ಬರೆಂ ಜಾಂವ್ದಿ ಮ್ಹಳ್ಳ್ಯೆ ಪಾತ್ಯೆಣೆನ್ ವೆತಾ. ತ್ಯಾ ವಿಶಿಂ ಆಮಿ ಕೊಣೆಂಯ್ ತಕ್ರಾರ್ ಉಲೊಂವ್ಕ್ ಜಾಯ್ನಾಂತ್. ತಾಣಿಂ ಪಾತ್ಯೆಲ್ಲ್ಯಾ ಸೊಮಿಯಾಥಂಯ್ ವಚನಾಸ್ತಾಂ ಆನಿ ಖಂಯ್ ಭೊಟಾಕಡೆ ವಚಜೆಗಿ? ಪುಣ್ ಆಮ್ಚ್ಯಾ ಘರಾಂನಿ ಆನಿ ಆಮ್ಚ್ಯೆ ಇಗರ್ಜೆಂತ್ ಮಾಗ್ಲ್ಯಾರ್ ಅಜ್ಯಾಪಾಂ ಜಾಂವ್ಚಿಂನಾಂತ್‌ಗಾಯ್? ಮ್ಹಳ್ಳೆಂ ಸವಾಲ್ ಆಮಿ ವಿಚಾರ್‍ಯೆತ್. ರೆತಿರೆಚ್ಯಾ ಪಾದ್ರ್ಯಾಬಾನ್ ಆನಿ ರೆತಿರೆಚ್ಯಾ ಬ್ರದರಾನ್ ಆಮ್ಚ್ಯಾ ಮಾತ್ಯಾರ್ ಹಾತ್ ದವರ್‍ನ್ ಸ್ಪೆಶಲ್ ಮಾಗ್ಣೆಂ ಕೆಲ್ಯಾರ್ ಗೂಣ್ ಜಾಯ್ತ್ ಮ್ಹಣ್ ಆಶೆಂವ್ಚೆಂ ಕಿತ್ಲಿಶಿಂ ಆಸಾತ್ ನ್ಹಯ್? “ಕಾರಿಜ್ಮಾಟಿಕ್ ರೆತಿರ್ ದಿಂವ್ಚೊ ಆನಿ ಮಾತ್ಯಾರ್ ಹಾತ್ ದವರ್‍ನ್ ಗೂಣ್ ಕರ್‍ಚೊ ಪಾದ್ರ್ಯಾಬ್, ಬ್ರದರ್ ಖಂಯ್ ಮೆಳ್ತಾ? ತಾಂಚೆಲಾಗಿಂ ಮ್ಹಜ್ಯೆ ಪಿಡೆವಿಶಿಂ ಸಾಂಗೊನ್ ಮಾಗೊಂಕ್ ಜಾಯ್… ತಾಂಚೆಂ ಮೊಬಾಯ್ಲ್ ನಂಬರ್ ದಿತಾತ್‌ಗಿ?” ಮ್ಹಣ್ ವಿಚಾರ್‍ತಾತ್ ನ್ಹಯ್?

75-100 ವರ್‍ಸಾಂ ವಾ ತಾಚ್ಯಾಕೀ ಚಡ್ ವರ್‍ಸಾಂ ಉತರ್‍ಲಲ್ಯೆ ಆಮ್ಚ್ಯೆ ಇಗರ್ಜೆಂತ್ ಕಿತ್ಯಾಕ್ ಅಜ್ಯಾಪಾಂ ಜಾಲ್ಲಿಂ ಆಯ್ಕೊಂಕ್ ಮೆಳೊಂಕ್ ನಾಂತ್? ಯಾತ್ರಿಕ್ ಜಾಗ್ಯಾಂನಿ ಮಾತ್ರ್ ಕಶೆಂ ಅಜ್ಯಾಪಾಂ ಜಾತಾತ್?

ಯಾತ್ರಿಕ್ ಪಯ್ಣಾಕ್ ವೆತಾನಾ ಆಮಿ ಜಾಯ್‌ಪುರ್‍ತಿ ತಯಾರಾಯ್ ಕರುನ್ ವೆತಾಂವ್. ನಿತಳ್ ಮನಾನ್, ಭಕ್ತಿನ್, ಕುಮ್ಸಾರ್ ಜಾವ್ನ್ ಮಾಗಿರ್ ಆಪ್ಣಾಕ್ ಜಾಯ್ ತೆಂ ಸೊಮಿ ದೀಂವ್ದಿ ಮ್ಹಣ್ ಭಾವಾಡ್ತಾನ್ ಮಾಗ್ತಾಂವ್. ಅಸಲ್ಯಾ ಭಾವಾಡ್ತಾನ್ ಮಾಗ್ಲಲೆಂ ಮೆಳ್ಳೆಂಚ್ ಮ್ಹಣ್ ಭರ್ವಸ್ತಾಂವ್. ಯಾತ್ರಿಕ್ ಪಯ್ಣಾಕ್ ವೆತಾನಾ ಕರ್‍ಚೆತಿತ್ಲಿ ತಯಾರಾಯ್ ಆಮಿ ಲ್ಹಾನ್‌ವ್ಹಡ್ ಜಾಲ್ಲ್ಯೆ, ‘ಸದಾಂಚ್ಯೆ’ ಇಗರ್ಜೆಕ್ ವೆತಾನಾ ಕರ್‍ತಾಂವ್‌ಗಾಯ್? ತಿತ್ಲಿಚ್ ಭಕ್ತ್ ಆನಿ ಉರ್ಬಾ ಆಸ್ತಾಗಾಯ್? ತರ್ ಹಾಂಗಾ ಏಕ್ ಸತ್ ಸ್ಪಶ್ಟ್ ಜಾತಾ, ‘ತುಜ್ಯಾ ಭಾವಾಡ್ತಾನ್ ತುಂ ಗೂಣ್ ಜಾತಾಯ್!’. ತೊಚ್ ಜಾಗೊ, ಹೊಚ್ ಬ್ರದರ್, ತೆಂಚ್ ಮಾಗ್ಣೆಂ ಕೆಲ್ಯಾರ್ ಮಾತ್ರ್ ಗೂಣ್ ಜಾತಾ ಮ್ಹಣ್ಚೆಂ ಫಟ್. ಜೆಜುಕ್ ಗೂಣ್ ಕರ್‍ಚಿ ಸಕತ್ ಆಸಾ ಮ್ಹಣೊನ್ ತೊ ಸಗ್ಳ್ಯಾಂಕ್ ಗೂಣ್ ಕರಿತ್ತ್ ಗೆಲೊನಾ. ತಾಚ್ಯಾಚ್ ಮಾಂಯ್‌ಗಾಂವಾಂತ್ ತಾಚ್ಯಾಚ್ ಲೊಕಾಕ್ ತಾಚೆರ್ ವಿಶ್ವಾಸ್ ದವರಿನಾತ್ಲೆಖಾತಿರ್ ತ್ಯಾ ಜಾಗ್ಯಾರ್ ಜೆಜುನ್ ಕಸಲಿಂಚ್ ಅಚರ್ಯಾಂ ಕೆಲಿಂನಾಂತ್ ಮ್ಹಣ್ತಾ ದೆವಾಚೆಂ ಉತರ್! (ಮಾತೆವ್ 13:58). ತ್ಯಾ ಶಿವಾಯ್ ಆಪ್ಣಾಕ್ ದೈವಿಕ್ ಸಕತ್ ಆಸ್ಲ್ಯಾರೀ ಗೂಣ್ ಜಾಲ್ಲ್ಯಾ ವೆಕ್ತಿಕ್ ಜೆಜುನ್ ಮ್ಹಳ್ಳೆಂ ಆಸಾ, ‘ತುಜ್ಯಾ ಭಾವಾಡ್ತಾನ್ ತುಂ ಬರೊ ಜಾಲೊಯ್’. (ಲೂಕ್ 17:19).

ಆನ್ಯೇಕ್ ಸವಾಲ್ ಧೊಸ್ಚೆಂ ಆಸಾ, ಮರಿಯೆಚ್ಯಾ ಪೂನ್‌ಶೆತಾಕ್ ವಚೊನ್ ಮಾಗೊನ್ ಬರಿ ಭಲಾಯ್ಕಿ ಜೊಡ್ಲಿ ತರ್ ಆಮಿ ಕೊಣಾಥಾವ್ನ್ ಬರಿ ಜಾಲ್ಯಾಂವ್, ಮರಿಯೆಥಾವ್ನ್ ವಾ ಜೆಜುಥಾವ್ನ್? ಪರತ್ ತಿಚ್ ಸೊಂಪಿ ಜಾಪ್, ‘ತುಜ್ಯಾ ಭಾವಾಡ್ತಾನ್!’. ತುಂ ಸಾಂತಾಲಾಗಿಂ ಮಾಗ್, ಮರಿಯೆಲಾಗಿಂ ಮಾಗ್.. ತುಜ್ಯಾ ಭಾವಾಡ್ತಾನ್ ಮಾಗ್ಲಲೆಂ ತೆಂ ತುಕಾ ಮೆಳ್ತೆಲೆಂಚ್. ಸಾಂತ್ ಜಾಂವ್, ಮರಿ ಜಾಂವ್ ಸೊಮಿಯಾಚ್ಯೆ ಖುಶೆಖಾಲ್ ಜಿಯೆಲ್ಲಿಂ ಜಾಲ್ಲ್ಯಾನ್ ತಿಂ ತುಕಾ ಸೊಮಿಯಾಥಾವ್ನ್ ಮೆಕ್ಳಿಂ ಕರ್‍ಚಿಂನಾಂತ್, ಬಗಾರ್ ಸೊಮಿಯಾಥಂಯ್ಚ್ ವ್ಹರ್‍ತಾತ್. 

ತರ್ ದೆವಾಚಿ ಖುಶಿ ಆಮ್ಕಾಂ ಕಳ್ಚಿ ಕಶಿ? ತಾಚ್ಯಾ ಉತ್ರಾಂ ಮುಕಾಂತ್ರ್! ಸೊಮಿಯಾಚಿಂ ಉತ್ರಾಂ ಜಿಂ ಆಪೊಸ್ತಲಾಂನಿ ಲಿಖ್ಲ್ಯಾಂತ್, ಆಮ್ಚೆಮುಕಾರ್ ಆಸಾತ್. ‘ದೆವಾಚೆಂ ಉತರ್’, ಹೆಬ್ರೆವಾಂಚೆಂ ಪತ್ರ್ ಮ್ಹಣ್ತಾ, ‘ದೋನ್ ಧಾರಿಂಚಿ ತಲ್ವಾರ್; ತೆಂ ಖರೆಂಚ್ ಜಿವೆಂ ಆನಿ ಕ್ರಿಯಾತ್ಮಕ್’. ಉತರ್ ಆಯ್ಕಲ್ಲ್ಯಾ ಮನ್ಶಾಕ್ ತೆಂ ‘ಉತರ್ ನಿರ್ಫಳ್ ಜಾಂವ್ಕ್ ಸೊಡಿನಾ’, ಮ್ಹಣ್‌ಯೀ ಇಸಾಯಿಯಾ ಪ್ರವಾದಿ ಬರಯ್ತಾ. (ಇಸಾ. 55:11)

ಹ್ಯಾ ಎಕಾ ಉತ್ರಾನ್ ಕುರ್ಡ್ಯಾಂನಿ ಪಳೆಲೆಂ, ಕೆಪ್ಪ್ಯಾಂನಿ ಆಯ್ಕಾಲೆಂ, ಥೊಂಟೆ ಚಲ್ಲೆ, ಕೊಡ್ಕಾರ್ ನಿತಳ್ ಜಾಲೆ, ಮೆಲ್ಲೆ ಜೀವ್ ಜಾಲೆ, ತಾಚ್ಯಾ ಎಕಾ ಉತ್ರಾನ್ ಝೊಡ್‌ವಾರೆಂ ರಾವ್ಲೆಂ, ದೆಂವ್ಸಾರ್ ಪೊಳ್ಳೆ, ಖುಣಾಂ ಅಚರ್ಯಾಂ ಘಡ್ಲಿಂ. ಎಕಾ ಪಿಡೇಸ್ತಾನ್ ವಯ್ಜಾಸರ್ಶಿಂ ಗೆಲ್ಲೆಬರಿ ಕೆದಾಳಾ ಆಮಿ ಪವಿತ್ರ್ ಪುಸ್ತಕಾಥಂಯ್ ವೆತಾಂವ್, ತೆಂ ವಾಚ್ತಾಂವ್, ನಿಯಾಳ್ತಾಂವ್ ಆನಿ ಕಾರ್ಯಾರುಪಿಂ ಘಾಲ್ತಾಂವ್ ತವಳ್ ಆಮಿ ಉಚಾರ್‍ಚ್ಯಾ ಭಾವಾಡ್ತಾಕ್ ಲಾಗೊನ್ ಆಮ್ಚ್ಯಾ ಚಿಂತ್ಪಾ ಆನಿ ಸಕ್ತೆಭಾಯ್ಲೆಂ ಭೊಗುಂಕ್ ಮೆಳ್ತೆಲೆಂ ಮ್ಹಣ್ಚ್ಯಾಂತ್ ದುಬಾವ್ ನಾ.

ಮನ್ಶಾಕ್ ಭಾವಾಡ್ತಾ ಸಾಂಗಾತಾ ಸೊಸ್ಣಿಕಾಯ್ ಸಯ್ತ್ ಜಾಯ್. ದೇವ್ ತಾಚ್ಯಾಚ್ ಆಯಿನ್ನ್ ವೆಳಾರ್ ಸರ್ವ್ ಸಂಗ್ತಿ ಆಮ್ಚ್ಯಾ ಬರ್‍ಯಾಕ್ ಪಡಶೆಂ ಕರ್‍ತಾ. ಕೀ. 90:4 ಮ್ಹಣ್ತಾ, ‘ತುಜ್ಯಾ ದೊಳ್ಯಾಂಮುಕಾರ್ ಹಜಾರ್ ವರ್‍ಸಾಂ, ಯೇವ್ನ್ ಗೆಲೊ ತ್ಯಾ ಕಾಲ್ಚ್ಯಾ ದಿಸಾಬರಿ, ರಾತ್ಚ್ಯಾ ಎಕಾ ಪಾಹ್ರಾಬರಿ’ ದೆಕುನ್ ಆಮ್ಕಾಂ ಸೊಸ್ಣಿಕಾಯ್ ಗರ್ಜೆಚಿ. ಸೊಸ್ಣಿಕ್ ಮನಿಸ್ ಫಾವೊತೊ ವೇಳ್ ಯೇಸರ್ ಸಗ್ಳೆಂ ಸೊಸ್ತಾ ಆನಿ ಶೆವೊಟಿಂ ತಾಕಾ ಸಂತೊಸ್ ಮೆಳ್ತಾ. ವಿಶ್ವಾಸ್ ಆನಿ ಭರ್ವಸೊ ಸಾಂಡಿನಾ ತೊ ಬರೆಂಪಣ್ ಜೊಡ್ತೊಲೊ.  ಹ್ಯಾಚ್ ಆಕ್ಟೋಬರ್ 23-25 ಪರ್ಯಾಂತ್ ಕಾರ್ಮೆಲ್ ಗುಡ್ಯಾರ್ ‘ಒಯಸಿಸ್-2023’ ರೆತಿರ್ ಚಲ್ತೆಲಿ. ಸಾಂ. ಪಾವ್ಲುನ್ ರೊಮಾಗಾರಾಂಕ್ ಬರಯಿಲ್ಲ್ಯಾ ಪತ್ರಾಚೆರ್ ಶಿಕೊವ್ಣ್ ಆಸ್ತೆಲಿ. ರೆತಿರೆಂತ್ ಭಾಗ್ ಘೆಂವ್ಚ್ಯಾ ಆದಿಂ ಹೆಂ ಪತ್ರ್ ವಾಚ್ಯಾಂ, ರೆತಿರೆಕ್ ಯೆತಾನಾ ಪವಿತ್ರ್ ಪುಸ್ತಕ್ ಹಾಡ್ಯಾಂ. ಉತ್ರಾಚಿ ಜಾಣ್ವಾಯ್ ಚಡಿತ್ ಮಾಪಾನ್ ಜಿರೊಂವ್ಕ್ ಪ್ರಯತ್ನ್ ಕರ್‍ಯಾಂ.

✍️ – ಬಾಪ್ ಐವನ್ ಸೊಜ್, ಕಾರ್ಮೆಲಿತ್