ಪಾಪಾ ಫ್ರಾನ್ಸಿಸಾನ್ 2024 ಜುಬ್ಲೆವಾಚೆಂ ವರಸ್ ಮ್ಹಣ್ ಪರ್ಗಟ್ಲಾಂ. ಜೆಜು ಜಲ್ಮೊನ್ 2025 ವರ್‍ಸಾಂ ಸಂಪ್ತಾನಾ ಹೊ ಜುಬ್ಲೆವ್ ಆಚರಣ್ ಕರುಂಕ್ ಉಲೊ ದಿಲಾ. ದೋನ್ ಹಜಾರ್ ವರ್‍ಸಾಂ ಸಂಪ್ತಾನಾ ಜುಬ್ಲೆವಾಚೆಂ ಆಚರಣ್ ಚಲ್ಲೆಂ. ಪರತ್ 2024ವ್ಯಾ ವರ್‍ಸಾ ಪಾಪಾ ಫಾನ್ಸಿಸಾನ್ ಕಾಕುಳ್ತಿಚೆಂ ವರಸ್ ಮ್ಹಣ್ ಪಾಚಾರುನ್, ಜುಬ್ಲೆವ್ ಆಚರಣ್ ಕರುಂಕ್ ಉಲೊ ದಿಲ್ಲೊ. ೨೦೨೫ವ್ಯಾ ಜುಬ್ಲೆವಾಚೆಂ ವರಸ್ ಆಚರಣ್ ಕರ್‍ತಾನಾ, ಭರ್ವಶಾಚಿಂ ಯಾತ್ರಿಕಾಂ ಮ್ಹಳ್ಳೊ ಧ್ಯೇಯ್ ಪಾಪಾನ್ ವಿಂಚ್ಲಾ. ಹ್ಯಾ ಜುಬ್ಲೆವಾಚ್ಯಾ ಕುರ್ಪೆಚ್ಯಾ ವರ್‍ಸಾ ಪವಿತ್ರ್ ಸಭಾ ಭಾವಾಡ್ತ್ಯಾಂನಿ ಇಂದುಲ್ಜೆನ್ಸ್ ಜೊಡುಂಕ್ ಆವ್ಕಾಸ್ ಕರ್‍ನ್ ದಿಲಾ.

ಜುಬ್ಲೆವಾಚೆಂ ವರಸ್ ಮ್ಹಳ್ಯಾರ್ ಕುರ್ಪೆಚೆಂ ಆನಿ ಜಿಣಿ ಪರಿವರ್ತನಾಚೆಂ ವರಸ್. ಹೆಂ ವರಸ್ ಮಾಗ್ಣೆಂ, ಯಾತ್ರಿಕ್ ಪಯ್ಣ್ ಆನಿ ರಾಜಿ ಸಂಧಾನ್ ಆಟಾಪ್ತಾ. ಹರ್‍ಯೆಕಾ ೨೫ ವರ್‍ಸಾಂಕ್ ಏಕ್ ಪಾವ್ಟಿಂ ಜುಬ್ಲೆವಾಚೆಂ ವರಸ್ ಜಾತಾ. ಪಾಪಾ ಸಾಯ್ಬಾನ್ ತಾಚೆಮದೆಗಾತ್ ವಿಶೇಸ್ ಜುಬ್ಲೆವಾಚೆಂ ವರಸ್ ಪರ್ಗಟ್ ಕರ್‍ಯೆತ್. ಜುಬ್ಲೆವಾಚೊ ಸಂಭ್ರಮ್ ಪವಿತ್ರ್ ಪುಸ್ತಕಾಂತ್ ಆಮ್ಕಾಂ ಪಳೆಂವ್ಕ್ ಮೆಳ್ತಾ. ಲೆವಿಶಾಸ್ತ್ರ್ ಗ್ರಂಥ್ ಆಮ್ಕಾಂ ಜುಬ್ಲೆವಾಚ್ಯಾ ಆಚರಣಾವಿಶಿಂ ಕಳಯ್ತಾ (ಲೆವಿಶಾಸ್ತ್ರ್ ೨೫). ಸಬಾರ್ ಆರಾಧನ್, ವಿಧಿ ಆನಿ ಕಾರ್ಯಕ್ರಮಾಂ ಮಾರಿಫಾತ್ ಭಾವಾಡ್ತಿ ಲೊಕಾಮದೆಂ ಭಾಗೆವಂತ್ ಜಿವಿತಾಕ್ ಪ್ರೇರಣ್ ಉಬ್ಜೊಂಚೆಂ ಆನಿ ದೆವಾಚ್ಯೆ ಮೊಗಾಳ್ ಕಾಕುಳ್ತಿಕ್ ಪವಿತ್ರ್ ಸಭೆಂತ್ ಆನಿ ಸಂಸಾರಾಂತ್ ಸಾಕ್ಸ್ ದಿಂವ್ಚೆಂ – ಹ್ಯಾ ಜುಬ್ಲೆವಾಚ್ಯಾ ಆಚರಣಾಚೊ ಉದ್ದೇಶ್.

ಸಾಂ. ಪೆದ್ರುಚ್ಯಾ ಬಾಸಲಿಕಾಚೆಂ ಪವಿತ್ರ್ ದಾರ್ ಉಗ್ತೆಂ ಕರ್‍ನ್ ಪಾಪಾ ಜುಬ್ಲೆವಾಚೆಂ ವರಸ್ ಉಗ್ತಾವಣ್ ಕರ್‍ತಾ. ಹಾಚ್ಯಾ ಉಪ್ರಾಂತ್ ಸಾಂ. ಜುವಾಂವ್ ಲಾತೆರಾನ್, ಸಾಂ. ಪಾವ್ಲು ಆನಿ ಸಾಂ. ಮರಿ ಮೇಜರ್ ಬಾಸಿಲಿಕಾಂಚೆಂ ದಾರ್ ಉಗ್ತೆಂ ಕರ್‍ತಾತ್ ಆನಿ ಜುಬ್ಲೆವ್ ಸಂಪ್ತಾ ಪರ್ಯಾಂತ್ ಹೆಂ ದಾರ್ ಉಗ್ತೆಂ ದವರ್‍ತಾತ್. ಹಾಚ್ಯಾ ಬರಾಬರ್ ಸಂಸಾರಾಂತ್ಲ್ಯಾ ಇಗರ್ಜೆಂತ್ಲೆಂ ದಾರ್ ಉಗ್ತೆಂ ಕರುಂಕ್ ಆನಿ ಸ್ಥಳೀಯ್ ಭಾವಾಡ್ತ್ಯಾಂನಿ ಹ್ಯೆ ರಿತಿಂತ್ ವಾಂಟೆಲಿ ಜಾಂವ್ಕ್ ಪಾಪಾ ಪರ್ವಣ್ಗಿ ದಿತಾ.

ಜುಬ್ಲೆವಾಚ್ಯಾ ವರ್‍ಸಾಚೊ ಧ್ಯೇಯ್ – ಭರ್ವಶಾಚಿಂ ಯಾತ್ರಿಕಾಂ. ದುಬ್ಳ್ಯಾಂಚಿ ಬೋಬ್ ಆಯ್ಕೊಂಕ್, ಪ್ರಕೃತಿಕ್ ಜತನ್ ಕರುಂಕ್ ಆನಿ ಆಮ್ಚ್ಯಾ ಭಾಂವ್ಡಾಂಸಂಗಿ ಎಕ್ತಾರ್ ಆಸಾ ಕರುಂಕ್ ಪವಿತ್ರ್ ಸಭಾ ಆಮ್ಕಾಂ ಉಲೊ ದಿತಾ. ಹ್ಯಾ ಜುಬ್ಲೆವಾಕ್ ತಯಾರಾಯ್ ಜಾವ್ನ್ ತೀನ್ ವರ್‍ಸಾಂನಿ ಕಿತೆಂ ಕರ್‍ಯೆತ್ ಮ್ಹಣ್ ಪಾಪಾನ್ ಕಳಯ್ಲಾಂ.

• 2023ವೆಂ ವರಸ್ – ದುಸ್ರ್ಯೆ ವಾತಿಕನ್ ವಿಶ್ವಸಭೆಚಿಂ ದಸ್ತಾವೆಜಾಂ ಅಧ್ಯಯನ್ ಕರ್‍ಚಿಂ.
• 2024ವೆಂ ವರಸ್ – ಮಾಗ್ಣ್ಯಾಚೆಂ ವರಸ್
• 2025ವೆಂ ವರಸ್ – ಜುಬ್ಲೆವಾಚೆಂ ವರಸ್

ದುಸ್ರ್ಯೆ ವಾತಿಕಾನ್ ವಿಶ್ವಸಭೆಚಿಂ ಚಾರ್ ದಸ್ತಾವೆಜಾಂ ಶಿಕೊಂಕ್ ಪವಿತ್ರ್ ಸಭೆನ್ ಉಲೊ ದಿಲಾ.

1. ದೇವ್‌ಸ್ತುತಿಚೆಂ ದಸ್ತಾವೇಜ್ – ಸಾಕ್ರೊಸಾಂಕ್ತುಮ್ ಕೊನ್ಸಿಲಿಯುಮ್
2. ಪವಿತ್ರ್ ಸಭೆಚೆಂ ದಸ್ತಾವೇಜ್ – ಲೂಮೆನ್ ಜೆನ್ಶಿಯುಮ್
3. ದೈವಿಕ್ ಉಗ್ಡಾಪಣಾಚೆಂ ದಸ್ತಾವೇಜ್ – ದೆಯಿ ವರ್ಬುಮ್
4. ಆಧುನಿಕ್ ಸಂಸಾರಾಂತ್ ಪವಿತ್ರ್ ಸಭಾ ದಸ್ತಾವೇಜ್ – ಗಾವ್ದಿಯುಮ್ ಎತ್ ಸ್ಪೆಸ್

ಹ್ಯಾ ಜುಬ್ಲೆವಾಚ್ಯಾ ವರ್‍ಸಾ ಭರ್ವಶಾಚಿಂ ಯಾತ್ರಿಕಾಂ ಜಾಂವ್ಕ್ ಆನಿ ಜಿವಿತಾಂತ್ಲೆ ಕೊಡ್ಹು ಅನ್ಭೋಗ್ ಕಶೆ ಆಸ್ಚೆ ಘಾಯ್ ಗೂಣ್ ಕರ್‍ನ್ ಫುಡೆಂ ವಚೊಂಕ್ ಪಾಪಾ ಉಲೊ ದಿತಾ. ದೆಕುನ್ ಆಮ್ಚೆಭಿತರ್ ಆಸ್ಚೊ ಭರ್ವಸೊ ವಾಡೊಂವ್ಕ್, ಹೆರಾಂಕ್ ಭರ್ವಶಾನ್ ಆನಿ ಧಯ್ರಾನ್ ಭರುನ್, ಉಗ್ತ್ಯಾ ಮನಾನ್ ಫುಡಾರಾ ತೆವ್ಶಿಂ ಚಮ್ಕೊಂಕ್ ಆಧಾರ್ ದಿಂವ್ಚೆಂ ಆಮ್ಚೆಂ ಮಿಸಾಂವ್ ಮ್ಹಣ್ ಪಾಪಾ ಕಳಯ್ತಾ. ಹಾಚ್ಯಾ ಬರಾಬರ್ ಸಾರ್ವತ್ರಿಕ್ ಎಕ್ವಟ್ ರುತಾ ಕರುಂಕ್ ಆನಿ ಮನ್ಶಾ ಗವ್ರವ್ ಉಕಲ್ನ್ ಧರುಂಕ್ ಪಾಪಾ ಆಪಯ್ತಾ.

✍️ –ಬಾಪ್ ಗ್ರೇಶನ್ ಆಲ್ವಾರಿಸ್