ಹೊ ಸಂಸಾರ್‌ಚ್ ಅಸೊ-ವಿಭಿನ್ನತಾಯೆಚೊ ಸಾಗೊರ್. ಹಾಂಗಾ ವೆಕ್ತಿ-ವೆಕ್ತಿಮದೆಂ ವಿಭಿನ್ನತಾ. ಗಾಂವ್, ದೇಶ್, ನ್ಹೆಸಣ್, ಖಾಣ್ ಹರ್‍ಯೆಕ್‌ಯೀ ವಿಭಿನ್ನ್. ಅಶೆಂ ಆಸ್ತಾನಾ ಆಮಿ ಆಮ್ಚ್ಯಾ ಗುಣಾ ಶೆಗುಣಾಂ, ದೆಣ್ಯಾಂನಿ ವಿಭಿನ್ನ್ ಆಸ್ಚೆಂ ವಿಶೇಸ್ ನ್ಹಯ್. ಮನ್ಶಾಸೃಶ್ಟೆಂತ್ ಆಮಿ ದೆಕ್ಚಿ ಏಕ್ ಸಮ್ಜಣೆಕ್ ಮಿಕ್ವಾಲ್ಲಿ ಗಜಾಲ್ ಹಿ – ಮನಿಸ್ ವಿಭಿನ್ನ್ ಸಾಮರ್ಥೆಚೊ ಜಾವ್ನ್‌ಯೀ ಜಲ್ಮತಾ. ಹೆಂ ಅಜ್ಯಾಪ್ ನ್ಹಯ್. ಬದ್ಲಾಕ್ ಅಸಲೆ ವೆಕ್ತಿಯ್ ಸಕ್ಕಡ್ ಮನ್ಶಾಂಬರಿಚ್. ಪುಣ್ ತಾಂಚೆಥಂಯ್ ಕಿತೆಂ ತರೀ ಇಲ್ಲೊ ಊಣ್ ಆಸೊನ್ ತೆ ಜಲ್ಮತಾತ್. ‘ಸಾಂತ್ ಆಗ್ನೆಸ್ ಸ್ಪೆಶಲ್ ಸ್ಕೂಲ್, ಮಂಗ್ಳುರ್’ ಸಂಸ್ಥೊ ವಿಭಿನ್ನ್ ಸಾಮರ್ಥೆಚ್ಯಾ ಭುರ್ಗ್ಯಾಂಕ್ ಮಾರ್ಗದರ್ಶನ್, ತರ್ಬೆತಿ ದೀವ್ನ್ ಸಾಂಬಾಳ್ಚೊ ನಾಮ್ಣೆಚೊ ಸಂಸ್ಥೊ. ಪ್ರಸ್ತುತ್ ಸಿಸ್ಟರ್ ಶ್ರುತಿ ಎ. ಸಿ. ಹಾಂಗಾಚಿ ಮುಕೆಲ್ನ್ ಜಾವ್ನ್ ವಾವುರ್‍ತಾ.

ಬಾಳ್ಪಣಾಥಾವ್ನ್ಂಚ್ ಸೆವಾ ಆಪ್ಲ್ಯಾ ಜಿವಿತಾಚೊ ಉದ್ದೇಶ್ ಜಾವ್ನ್ ಘೆತ್‌ಲ್ಲ್ಯಾ ಸಿಸ್ಟರ್ ಶ್ರುತಿಕ್ ತಿಚ್ಯಾ ವದನಾರ್ ದಿಶ್ಟಿಕ್ ಪಡ್‌ಲ್ಲಿ ಶಾಂತತಾ, ತೃಪ್ತೆಚ್ಯೊ ಹಾಸೊ ತಿಚ್ಯಾ ವಾವ್ರಾಂತ್ ತಿಣೆಂ ಭೊಗ್ಚ್ಯಾ ಸಮಾಧಾನಾಕ್ ಆರ್ಸೊ ಧರುನ್ ಆಸ್‌ಲ್ಲೆಬರಿ ದಿಸ್ತಾ. ಉದ್ಯಾವರಾ, ಉಡುಪಿ ಪೂರ್ಣಪ್ರಜ್ಞ ಕೊಲೆಜಿಂತ್ ಶಿಕಪ್ ಜೊಡುನ್ ಉಪ್ರಾಂತ್ ಸಾಂತ್ ಆನ್ನ್ ಕೊವೆಂತಾಕ್ ಭರ್‍ತಿ ಜಾತಚ್ ಫುಡ್ಲೆಂ ಶಿಕಪ್ ತಿಣೆಂ ಸಂಪಯ್ಲೆಂ. ಬೆಳ್ಗಾಂವ್ ತೀನ್ ವರ್‍ಸಾಂ, ಉಪ್ರಾಂತ್ ಮಂಗ್ಳುರಾಂತ್ ಬಾವಿಸ್ ವರ್‍ಸಾಂ ತಿಚಿಂ ಸೆವೆಚಿಂ ವರ್‍ಸಾಂ ಖರ್‍ಚಿಲ್ಯಾಂತ್. ಪ್ರಸ್ತುತ್ ಆಸ್ಚ್ಯಾ ಸಾಂತ್ ಆಗ್ನೆಸ್ ಸ್ಪೆಶಲ್ ಸ್ಕೂಲ್ ಸಂಸ್ಥ್ಯಾಂತ್ ತಿ ೧೯೮೮ವ್ಯಾ ವರ್ಸಾ ಥಾವ್ನ್ ಸೆವಾ ದೀವ್ನ್ ಆಸಾ. ತಿಚೆಲಾಗಿಂ ಘೆತ್‌ಲ್ಲೆಂ ಹೆಂ ಸಂದರ್ಶನ್ ತುಮ್ಚೆಖಾತಿರ್.

____________________________________

1. ಆಮ್ಚೆ ಭಂವ್ತಣಿ ವಿವಿಶ್ ಶಿಕ್ಪಾ ಸಂಸ್ಥೆ ಆಸಾತ್. ಹೊ ಸಂಸ್ಥೊ ಆನಿ ಹೆರ್ ಶಿಕ್ಪಾ ಸಂಸ್ಥೆ, ಹಾಂಚೆಮದೆಂ ಕಿತೆಂ ಫರಕ್?

ಹೆರ್ ಇಸ್ಕೊಲಾಂ ವಾ ಸಂಸ್ಥ್ಯಾಂನಿ ಶಿಕಪ್ ಜೊಡ್ಚ್ಯಾ ಭುರ್ಗ್ಯಾಂಕ್ ವಯಕ್ತಿಕ್ ಗುಮಾನ್ ದೀವ್ನ್ ರಾವಜೆ ಮ್ಹಣ್ ನಾ. ಪುಣ್ ವಿಭಿನ್ನ್ ಸಾಮರ್ಥೆಚ್ಯಾ ಭುರ್ಗ್ಯಾಂಕ್ ವಯಕ್ತಿಕ್ ಗುಮಾನ್ ಬೊವ್ ಗರ್ಜೆಚೆಂ. ತಾಂಕಾಂ ತಾಂಚೆಯಿತ್ಲ್ಯಾಕ್ ಸೊಡುಂಕ್ ಜಾಯ್ನಾ.

2. ತುಮ್ಕಾಂ,ವಿವಿಂಗಡ್ ರಿತಿಚಿ ಸೆವಾ ದಿಂವ್ಚೆ ಆವ್ಕಾಸ್ ಜಾಯ್ತೆ ಆಸ್‌ಲ್ಲೆ ಜಾವ್ಯೆತ್. ತರೀ ತುಮಿ, ವಿಭಿನ್ನ್ ಭುರ್ಗ್ಯಾಂಖಾತಿರ್ ವಾವ್ರ್ ಭೆಟೊಂವ್ಕ್ ಕಿತ್ಯಾಕ್ ವಿಂಚೊವ್ಣ್ ಕೆಲಿ? ತುಮ್ಕಾಂ ಪ್ರೇರಣ್ ಕಶೆಂ ಲಾಬ್ಲೆಂ?

ಮ್ಹಜೊ ಉದ್ದೇಶ್‌ಚ್ ಆಸ್‌ಲ್ಲೊ ಸಮಾಜೆಕ್ ಸೆವಾ ದಿಂವ್ಚೊ. ಮ್ಹಜೆಂ ಪದ್ವಿ ಶಿಕಪ್ ಬಿ.ಕೊಮ್ ಪಾಟ್‌ಥಳಾರ್ ಜಾಲ್ಲೆಂ. ಮ್ಹಜ್ಯಾ ಜಿವಿತಾಚೊ ಉದ್ದೇಶ್ ಜ್ಯಾರಿ ಜಾಯ್ಜೆ ತರ್ ಹಾಂವೆಂ ವಿಂಚೊವ್ಣ್ ಸಾರ್ಕಿ ಕರುಂಕ್ ಆಸ್‌ಲ್ಲಿ ದೆಕುನ್ ಆಮ್ಚ್ಯಾಚ್ ಸಂಸ್ಥ್ಯಾಂತ್ ಹಾಂವೆಂ ತರ್ಬೆತಿ ಜೊಡ್ಲಿ ಆನಿ ದೆವಾಚೆಂ ಯೋಜನ್ ಪರಿಪೂರ್ಣ್ ಜಾಂವ್ಕ್ ವಾಟ್ ತೊಚ್ ಉಘಡ್ತಾ ಜಾಲ್ಲ್ಯಾನ್ ಹಾವೆಂ ಹಾಂಗಾಚ್ ವಾವ್ರಾಕ್ ಸುರ್ವಾತ್ ಕೆಲಿ.

3. ಹ್ಯಾ ಭುರ್ಗ್ಯಾಂಸಂಗಿ ವಾವ್ರ್ ಕರ್‍ಚೆಂ ಕಶ್ಟಾಂಚೆಂ. ಹಾಂಗಾಥಾವ್ನ್ ಸೊಡ್ನ್ ದುಸ್ರ್ಯಾ ವಾವ್ರಾಕ್ ವೆಚೆಂ ಮನ್ ಕೆದಾಳಾ ತರಿ ತುಮ್ಕಾಂ ಜಾಲ್ಲೆಂ ಆಸಾಗೀ?

ಸುರ್ವೇರ್ ಮ್ಹಾಕಾ ಕಶ್ಟ್ ಭೊಗ್‌ಲ್ಲೆ ಆಸಾತ್. ಪುಣ್ ಕ್ರಮೇಣ್ ಮ್ಹಾಕಾ ಹ್ಯಾ ವಾವ್ರಾಂತ್ ತೃಪ್ತಿ ಭೊಗುಂಕ್ ಲಾಗ್ಲಿ. ಹಾಂಗಾಚ್ ರಾವೊನ್ ವಾವ್ರ್ ದೀಂವ್ಕ್ ಮ್ಹಾಕಾ ಬರೆಂ ಲಾಗ್ಲೆಂ. ಹಾಂವೆಂ ಹಾಂಗಾಸರ್ ಹ್ಯಾ ಭುರ್ಗ್ಯಾಂಸಂಗಿ ವಾವುರ್‍ಚಿ ಖುಶಿ ದೆವಾಚಿ ಮ್ಹಣ್ ಸಮ್ಜತಾಂ.

4. ಸಿಸ್ಟರ್, ಹ್ಯಾ ಭುರ್ಗ್ಯಾಂಕ್ ತುಮಿ ಕಶೆಂ ವಾಡೊಂಕ್, ಶಿಕೊಂಕ್ ತರ್ಬೆತಿ ದಿತಾತ್?

ಪಯ್ಲೆಂ ಆಮಿಂಚ್ ತಾಂಚೆವಿಶಿಂ ಶಿಕಾಜೆ ಪಡ್ತಾ. ಹರ್‍ಯೇಕ್ ಭುರ್ಗ್ಯಾಥಂಯ್ ಏಕ್ ವಾ ಆನ್ಯೇಕ್ ರಿತಿಚಿ ಸಾಮರ್ಥಿ ಆಸ್ತಾ. ಖೆಳ್, ಗಾಂವ್ಚೆಂ, ಪಿಂತುರ್ ರಚ್ಚೆಂ ಇತ್ಯಾದಿ. ಉಪ್ರಾಂತ್ ತಾಂಚ್ಯಾ ಚಟುವಟಿಕಾಂಚೆರ್ ಆಮಿ ಗುಮಾನ್ ದವರುಂಕ್ ಆಸಾ. ಏಕ್ ಪಾವ್ಟಿಂ ತಿಂ ಖುದ್ದ್ ಜೇಂವ್ಕ್, ಹಾತ್ ಧುಂವ್ಕ್.. ಅಸಲಿಂ ಲ್ಹಾನ್ ಲ್ಹಾನ್ ಕಾಮಾಂ ಕರುಂಕ್ ಶಿಕ್ತಾತ್ ತೆನ್ನಾ ಪಯಾಂತ್ ತಾಂಚಿ ಜತನ್ ಘೆಂವ್ಕ್ ಆಸಾ. ತಾಂಚಿಂ ತಾಂಚಿಂ ಕಾಮಾಂ ತಿಂ ಕರುಂಕ್ ಶಿಕ್ತಚ್ ತಾಂಕಾಂ ಆಮಿ ಶಿಕಪ್ ದಿಂವ್ಕ್ ತಯಾರ್ ಜಾತಾಂವ್. ಹಾಂಗಾ ೨೬ ಶಿಕ್ಶಕಾಂ ಆಸಾತ್. ತಾಂಕಾಂ ಹಾಂಗಾಚ್ ವಿಶೇಸ್ ತರ್ಬೆತಿ ಜೊಡುಂಕ್ ಆವ್ಕಾಸ್ ಲಾಬ್ತಾ. ಹ್ಯಾಚ್ ಭುರ್ಗ್ಯಾಂಕ್ ಸಾಂಗಾತಾ ತಿಂ ತರ್ಭೆತ್ ಜಾತಾತ್.

5. ಹಿಂ ಭುರ್ಗಿಂ ವಿಶೇಸ್ ದೆಣ್ಯಾಂನಿ ಭರ್‌ಲ್ಲಿಂ ಆಸ್ತಾತ್ ಮ್ಹಣ್ ಆಯ್ಕಲಾಂ. ಕಸಲಿಂ ದೆಣಿಂ ತಾಂಚೆಕಡೆ ಆಸ್ತಿತ್ ಮ್ಹಣ್ ಜಾಣಾ ಜಾಂವ್ಚಿ ಆತುರಾಯ್ ಮ್ಹಾಕಾ.

ತಾಂಚಿ ಸಾಮರ್ಥಿ ವಿಶೇಸ್ ಆಸ್ತಾ. ಥೊಡಿಂ ಬರ್‍ಯಾನ್ ಗಾಯನ್ ಕರುಂಕ್ ಸಕ್ತಾತ್. ಥೊಡಿಂ ಖೆಳ್ ಪಂದ್ಯಾಟಾಂನಿ ಬೊವ್ ಹುಶಾರ್ ಆಸ್ತಾತ್. ರಾಶ್ಟ್ರ್ ಮಟ್ಟಾರ್ ವಿಭಿನ್ನ್ ಸಾಮರ್ಥೆಚ್ಯಾ ಹೆರ್ ಭುರ್ಗ್ಯಾಂಸಂಗಿ ಪಂತಾಟಾಕ್ ದೆಂವೊನ್ ದಾಖ್ಲೊ ರಚ್‌ಲ್ಲೊ ಸಯ್ತ್ ಆಸಾ. ಥೊಡಿಂ ಮಿಮಿಕ್ರಿ ಕರ್‍ತಾತ್. ಸೊಭಿತ್ ಪಿಂತುರಾಂ ರಚ್ತಾತ್. ರಂಗಾಳ್ ಕಾಗ್ದಾಂಚಿಂ ಫುಲಾಂ ರಚ್ತಾತ್. ಅಶೆಂ ತಾಂಚಿ ಸಾಮರ್ಥಿ ಆಮಿ ಸೊಧುನ್ ಕಾಡ್ನ್ ತ್ಯಾಚ್ ವಾವ್ರಾಚೆರ್ ಆಮಿ ತಾಂಕಾಂ ತರ್ಬೆತಿ ದಿತಾಂವ್.

6. ಹಾಂಗಾಸರ್ ತಿಂ ಕೆದೊಳ್ ಪರ್ಯಾಂತ್ ಶಿಕ್ತಾತ್? ಉಪ್ರಾಂತ್ ತಿಂ ಕಿತೆಂ ಕರುಂಕ್ ಸಕ್ತಾತ್? ಕಾಂಯ್ ವಿಶೇಸ್ ಸಾಧನ್ ಕೆಲ್ಲೆ ದಾಖ್ಲೆ ಆಸಾತ್‌ಗಿ?

ತೀನ್ ವರ್‍ಸಾಂಥಾವ್ನ್ ಆಟ್ರಾ ವರ್‍ಸಾಂ ಪರ್ಯಾಂತ್ ತಾಂಕಾಂ ಹಾಂಗಾ ಶಿಕಪ್ ಲಾಬ್ತಾ. ಉಪ್ರಾಂತ್ ತಾಂಕಾಂ ಆಮ್ಚೆಂಚ್ ವರ್ಕ್‌ಶೋಪ್ ಆಸಾ. ಥಂಯ್ಸರ್ ಬುಕ್ ಬೈಂಡಿಂಗ್, ಕಾರ್ಪೆಂಟ್ರಿ, ಹೋಮ್ ಸೈನ್ಸ್ ಇತ್ಯಾದಿ ಭಲಾಯ್ಕಿ ಆಸ್ತಾವರೇಗ್ ತಾಣಿಂ ಮೆತೆರ್ ಜಾವ್ಯೆತ್. ತಾಂಚ್ಯಾ ವಾವ್ರಾಕ್ ತಾಂಕಾಂ ಪಾಗ್ ದಿತಾಂವ್. ತಿಂ ಜೊಡುಂಕ್‌ಯೀ ಸಕ್ತಾತ್. ಖೆಳಾಂತ್ ಅಂತರ್‌ರಾಶ್ಟ್ರೀಯ್ ಮಟ್ಟಾ ಪರ್ಯಾಂತ್ ಪಾವ್‌ಲ್ಲಿ ಕೀರ್ತ್ ಹಾಂಚಿ. ಅಥೆನ್ಸ್, ಚೀನಾ, ಅಮೆರಿಕ, ಆಸ್ಟ್ರೇಲಿಯಾ ಗಾಂವಾ ಪರ್ಯಾಂತ್ ತಿಂ ಸ್ಪರ್ಧಿ ಜಾವ್ನ್ ಗೆಲ್ಯಾಂತ್. ತಾಂಚೆಂ ಶಿಕಪ್ ಸಂಪ್ತಚ್ ವಿವಿಧ್ ಕಾಮಾಂ ಜೊಡುಂಕ್ ಲಾಗ್ತಾತ್, ದೆಕಿಕ್, ಲಿಫ್ಟ್ ಒಪರೇಟರ್, ಕಂಪ್ಯೂಟರ್ ಸೆಂಟರಾಂನಿ, ಇಲೆಕ್ಟ್ರಿಶಿಯನ್ ಹೆಲ್ಪರ್ಸ್.. ಆಶೆಂ ವಿವಿಧ್ ವಾವ್ರಾಕ್ ತಿಂ ಲಾಗ್ತಾತ್.

7. ತುಮ್ಚ್ಯೆ ಸೆವೆಂತ್ ಅಧಿಕ್ ತೃಪ್ತಿ ಜೊಡ್‌ಲ್ಲೆಂ ಘಡಿತ್ ವಾಂಟುನ್ ಘೆವ್ಯೆತ್?

ಚಲೊಂಕ್ ಸಕನಾತ್ಲೆಂ ಎಕ್ಲೆಂ ಭುರ್ಗೆಂ ವೀಲ್‌ಚೇರಾಚೆರ್ ಇಸ್ಕೊಲಾಕ್ ಆಯಿಲ್ಲೆಂ. ತಾಕಾ ಚಲೊಂಕ್ ಜಾತಾನಾ ಜಾಲ್ಲೊ ಸಂತೊಸ್ ವಣುಂಕ್ ಅಸಾಧ್. ಆಮ್ಚ್ಯೆ ತರ್ಬೆತಿವರ್ವಿಂ ತಿಂ ಎಕೇಕ್ ಸಬ್ದ್ ತರೀ ಉಲೊಂವ್ಕ್ ಸಕ್ತಾನಾ, ಆವಯ್-ಬಾಪಯ್ಕ್ ಮಾಮ್ಮಿ ಡ್ಯಾಡಿ ಮ್ಹಣ್ ಸಾಂಗೊಂಕ್ ಸಕ್ತಾನಾ.. ಹಾಚ್ಯಾಕೀ ವರ್‍ತೆಂ ಸಾಧನ್ ನಾ ಮ್ಹಣ್ ಹಾಂವ್ ಚಿಂತ್ತಾ. ತಾಂಚೆಂ ನಾಂವ್ ಬರೊಂವ್ಕ್ ತಿಂ ಸಕ್ತಾತ್. ಹೆಂಯ್ ಆಮ್ಚ್ಯಾ ವಾವ್ರಾಕ್ ಲಾಬ್‌ಲ್ಲೊ ಫಳ್ ಮ್ಹಣ್ ಸಂತೊಸ್ ಭೊಗ್ತಾ.

8. ಹ್ಯಾ ಭುರ್ಗ್ಯಾಂಚಿ ಜತನ್ ಘೆತಲ್ಯಾಂನಿ ಕಶೆಂ ಆಸೊಂಕ್ ಜಾಯ್?

ವರ್ತ್ಯೆ ಸೊಸ್ಣಿಕಾಯೆಚಿ ಗರ್ಜ್ ಆಸಾ. ಹ್ಯಾ ಭುರ್ಗ್ಯಾಂಕ್ ಸ್ವೀಕಾರ್ ಕರ್‍ಚೆಂ ಬೊವ್ ಗರ್ಜ್. ತಾಂಕಾಂ ಸಮ್ಜೊನ್ ಘೆಂವ್ಚೆಂ, ತಾಂಚೊ ಮೋಗ್ ಕರ್‍ಚೊ ಹೆ ಶೆಗುಣ್ ಹ್ಯಾ ಭುರ್ಗ್ಯಾಂಚಿ ಜತನ್ ಘೆತೆಲ್ಯಾಂಥಂಯ್ ಆಸಾಜೆಚ್. ತಿಂ ಆಮ್ಚೆಬರಿಚ್. ತಾಂಕಾಂಯ್ ಭೊಗ್ಣಾಂ ಆಸಾತ್. ಸಾಧನ್ ಕರ್‍ಚಿ ಉರ್ಬಾ ಆಸಾ. ತಾಂಕಾಂ ಆಮ್ಚೆಬರಿ ಉಚಾರ್‍ನ್ ಸಾಂಗೊಂಕ್ ಜಾಯ್ನಾ ಆಸ್ಯೆತ್. ತಾಂಕಾಂ ತಾಂಚೊಚ್ ಏಕ್ ಸಂಸಾರ್ ಆಸಾ. ಆಮಿ ತಾಂಚ್ಯಾ ಸಂಸಾರಾಕ್ ಪಾವೊನ್ ತಾಂಕಾಂ ಪ್ರೇರಣ್ ದಿಲ್ಯಾರ್ ಆಮ್ಚೆಬರಿಚ್ ತಿಂ ಸಾಧನ್ ಕರ್‍ತಾತ್.

9. ವಿಭಿನ್ನ್ ಸಾಮರ್ಥೆಚ್ಯಾ ಭುರ್ಗ್ಯಾಂಚ್ಯಾ ವ್ಹಡಿಲಾಂಕ್ ತುಮಿ ಕಿತೆಂ ಸಾಂಗೊಂಕ್ ಆಪೇಕ್ಶಿತಾತ್?

ವ್ಹಡಿಲಾಂನಿ ಭುಗ್ಯಾಂಕ್ ಆಸಾ ತಶೆಂ ಸ್ವೀಕಾರ್ ಕರ್‍ಚೆಂ ಪಯ್ಲ್ಯಾನ್ ಪಯ್ಲೆಂ ಗರ್ಜೆಚೆಂ. ಇತರ್ ಭುರ್ಗ್ಯಾಂಸಂಗಿ, (ಭಾವ್ ಭಯ್ಣ್ ಆಸಾತ್ ತರ್) ತಫಾವತ್ ದಾಕೊಂವ್ಚೊ ನ್ಹಯ್. ತಿಂ ಖಂಯ್ಸರ್ ವೆತಾತ್ ತಾಂಚೆಸಂಗಿ ಆಸೊಂಕ್ ಜಾಯ್. ತಾಂಕಾಂ ಪ್ರಾಮುಕ್ಯತಾ ದಿಂವ್ಚಿ ಗರ್ಜ್. ಹೆಂ ಏಕ್ ಪಂಥಾಹ್ವಾನ್ ಕಶೆಂ ಸ್ವೀಕಾರ್ ಕರುಂಕ್ ಶಿಕ್ಚೆಂ. ಭುರ್ಗ್ಯಾವಿಶ್ಯಾಂತ್ ಜಾಗ್ರುತ್ ಆಸೊಂಕ್ ಜಾಯ್. ಹ್ಯಾ ಸಂಗ್ತಿಂತ್ ದೂಕ್ ಪಾಂವ್ಚಿ ಗರ್ಜ್ ನಾ, ತಿಂಯ್ ಆಮ್ಚೆಬರಿಚ್ ಮ್ಹಳ್ಳೆಂ ಭೊಗಪ್ ಪಯ್ಲೆಂ ಆಸಾಜೆ.

10. ತುಮ್ಚ್ಯಾ ವಾವ್ರಾಂತ್ ಕಿತೆಂ ತರೀ ಪಂಥಾಹ್ವಾನಾಂ ತುಮಿ ಫುಡ್ ಕೆಲ್ಲಿಂ ಆಸಾತ್?

ಥೊಡೆಪಾವ್ಟಿಂ ಭುರ್ಗಿಂ ಚುಕೊನ್ ವೆತಾತ್. ಥೊಡೆಪಾವ್ಟಿಂ ಪಿಡೆಂತ್ ಪಡ್ತಾತ್. ತಾಂಕಾಂ ಚಿಕಿತ್ಸಾ ಬೊವ್ ನಾಜೂಕಾಯೆನ್ ದೀಜೆ. ಸಕ್ಕಡ್ ಪಿಡೆಸ್ತಾಂಬರಿ ತಾಂಕಾಂ ಚಿಕಿತ್ಸಾ ದೀಂವ್ಕ್ ಜಾಯ್ನಾ. ಅಸಲ್ಯಾ ಸೂಕ್ಶೀಮ್ ಸಂಗ್ತಿಂನಿ ಜಾಯ್ತೆ ಕಶ್ಟಾಂಚೆ ಸಂದರ್ಭ್ ಫುಡ್ ಕೆಲ್ಲೆ ಆಸಾತ್. ಪುಣ್ ಹರ್‍ಯೆಕಾಂತ್ ದೆವಾಚೊ ಸಾಂಗಾತ್ ಲಾಭ್ಲಾ.

11. ಸಂಸ್ಥೊ ಚಲೊಂವ್ಕ್ ಜಾಯ್ತಿ ಮ್ಹಿನತ್ ಆನಿ ಖರ್ಚ್ ಆಸ್ತಾ. ಹಾಕಾ ಕೋಣ್ ಆಧಾರ್ ದಿತಾತ್?

ಹಿತಚಿಂತಕ್, ದಾನಿ, ಆಮ್ಚೊ ಆಪೊಸ್ತಲಿಕ್ ಕಾರ್ಮೆಲ್ ಸಂಸ್ಥೊ ಆಸಾ. ಜಾಯ್ತೆ ಹಾತ್ ಸಾಂಗಾತಾ ಯೆತಾನಾ, ಸೆವಾ ಕೆದಿಂಚ್ ವೊಜೆಂ ಜಾಯ್ನಾ. ಹೊ ವಾವ್ರ್ ಮ್ಹಜೊ ಎಕ್ಲ್ಯೆಚೊ ನ್ಹಯ್. ಆಪೊಸ್ತಲಿಕ್ ಕಾರ್ಮೆಲ್ ಸಂಸ್ಥೊ ಮಾಕಾ ಆಧಾರ್ ದಿತಾ. ದೆವಾಚ್ಯಾ ಪ್ರೇರಣಾನ್ ಹರ್‍ಯೇಕ್ ವಾವ್ರ್ ಚಲ್ತಾ. ಶಿಕ್ಶಕಾಂ ಇತರ್ ಸಿಬಂದಿ, ಹಿತಚಿಂತಕ್ ಆನಿ ವ್ಹಡಿಲಾಂಚೊ ಪಾತ್ರ್, ಮ್ಹಜಿ ಆವಯ್, ಎಕ್ಲೊ ಭಾವ್ ಆನಿ ಚೊವ್ಗಿ ಭಯ್ಣಿ – ಹ್ಯಾ ಸವಾಂಚೊ ಪಾಟಿಂಬೊ ಮ್ಹಜ್ಯಾ ತೃಪ್ತೆಚ್ಯಾ ಮಿಸಾಂವಾಂಕ್ ಆಧಾರ್ ದಿತಾತ್.

12. ನಿಮ್ಣೆಂ, ಸಮಾಜೆಕ್ ತುಮ್ಚೊ ಸಂದೇಶ್ ಕಿತೆಂ?

ಹ್ಯಾ ಭುರ್ಗ್ಯಾಂಕ್ ಆಸಾ ತಶೆಂ ಸ್ವೀಕಾರ್ ಕರ್‍ಚೆಂ ಸೊಡ್ಲ್ಯಾರ್ ದುಸ್ರಿ ಚಿಕಿತ್ಸಾ ನಾ. ಸರ್ವಾಂಸಂಗಿ ಹ್ಯಾ ಭುಗ್ಯಾಂಕ್‌ಯೀ ಮುಕೇಲ್ ವ್ಹಾಳ್ಯಾಂತ್ ಲ್ಹಾನ್‌ವ್ಹಡ್ ವಾವ್ರಾ ಆವ್ಕಾಸ್ ದಿಂವ್ಕ್ ಜಾಯ್. ಥರ್‌ಭೇದ್ ಕರಿನಾಸ್ತಾಂ ತಾಂಕಾಂ ಗವ್ರವಾನ್ ಲೆಕ್ಚೆಂಯ್ ಗರ್ಜ್. ಸಮಾಜೆಂತ್ ಹಿ ಜಾಗೃತಿ ಯೇಜೆ. ಹ್ಯೆವಿಶಿಂ ಆಮಿ ಜಾಯ್ತಿಂ ಉಲೊವ್ಪಾಂ ಮಾಂಡುನ್ ಹಾಡ್ತಾಂವ್. ವ್ಹಡಿಲಾಂಕ್ ಆಮಿ ಜೊಕ್ತಿ ಮಾಹೆತ್, ಧಯ್ರ್ ದಿತಾಂವ್. ವಿಭಿನ್ನ್ ಸಾಮರ್ಥೆನ್ ಭುರ್ಗೆಂ ಜಲ್ಮಾತಾನಾ ಬೆಜಾರಾಯ್ ಜಾತಾ ವ್ಹಯ್. ಪುಣ್ ತಾಂಕಾಂ ಸ್ವೀಕಾರ್ ಕೆಲೆಂ ತರ್ ಅರ್ದೆಂ ವೊಜೆಂ ದೆಂವ್‌ಲ್ಲೆಬರಿಚ್.

✍️ –ಸಂದರ್ಶನ್:  ಫೆಲ್ಸಿ ಲೋಬೊ, ದೆರೆಬಯ್ಲ್