ಸಕಾಳಿಂಥಾವ್ನ್ ಬಾಯ್ಲೆಚೆ ಕರ್ಕರೆ ಆಯ್ಕೊನ್ ಪುರೊ ಜಾಲೆಂ. ಹೆಣೆಂ ಸುಶೆಗಾತ್ ನಿದ್ಲ್ಯಾರ್, “ಉಟನಾಂಯ್‌ಗೀ? ಪೆಟ್ಯಾಂಕ್ ಭಾಯ್ರ್ ವ್ಹರ್‍ಚೆಂ ಕೊಣೆಂ?”, ಕಶ್ಟಾಂನಿ ಉಟೊನ್ ಪೆಟ್ಯಾಕ್ ಭಾಯ್ರ್ ವ್ಹರ್‍ನ್ ಹಾಡ್ನ್ ಬಸ್ತಾನಾ “ಬಸ್ಲೊಯ್‌ಗೀ? ಘರ್ ಜಾಡ್ಚೆಂ ಕೊಣೆಂ?”, ಜಾಡ್ನ್ ಜಾತಚ್ ನಾಸ್ಟೊ ಕರ್‍ತಾನಾ ಸಾಕರ್ ಘಾಲ್ಯಾರ್, “ಶುಗರ್ ಚಡ್ ಜಾವ್ನ್ ನಿದ್ಲ್ಯಾರ್ ಪಳೆಂವ್ಚೆಂ ಕೊಣೆಂ?”, ಮೀಟ್ ಘಾಲ್ಯಾರ್, “ಬಿ.ಪಿ. ಚಡ್ಲ್ಯಾರ್, ಖಾಟ್ಲ್ಯಾರ್ ಪಡ್ಲ್ಯಾರ್ ಚಾಕ್ರಿ ಕರ್‍ಚಿ ಕೊಣೆಂ?” ಅಶೆಂ ಹರ್‍ಯೆಕಾಕೀ “ಕೊಣೆಂ? ಕೊಣೆಂ?” ಮ್ಹಣ್ ವಿರಾರ್ ಕರ್‍ತಾನಾ ಹಾಂವ್ ಚಾಳ್ವಾಲೊಂ. “ತುಕಾ ಅಶೆಂ ಸವಾಲಾಂ ಕರುಂಕ್ ಶಿಕಯಿಲ್ಲೆಂ ಕೊಣೆಂ? ಫ್ರೀಡಮ್ ದಿಲ್ಲೆಂ ಕೊಣೆಂ? ಅಧಿಕಾರ್ ದಿಲ್ಲೊ ಕೊಣೆಂ?” ಅಚಾನಕ್ ಹಾಂವ್ ಉಚಾಂಬಳ್ ಜಾತಾನಾ ತೆಂ ಥಂಡ್ ಜಾಲೆಂ! “ಹರ್‍ಯೇಕಾಕೀ ಮೀತ್ ಆಸಾ. ಸದಾಂಯ್ ಕೊಣೆಂ ಕೊಣೆಂ ಮ್ಹಣ್ ಪೆದಮ್ ಉಲಯ್ಲ್ಯಾರ್ ಆಯ್ಕೊಂವ್ಚೆಂ ಕೊಣೆಂ? ಧೊಸ್ಚೆಂ ಕೊಣೆಂ? ಸೊಸ್ಚೆಂ ಕೊಣೆಂ? ಹ್ಯಾ ಕರ್ಕರ್‍ಯಾಂಮದೆಂ ರಾಂವ್ಚೆ ಕೊಣೆಂ? ತುಜೆಸಂಗಿ ಜಿಯೆಂವ್ಚೆಂ ಕೊಣೆಂ?” ವ್ಹಡ್ ತಾಳ್ಯಾನ್ ಸವಾಲ್ ಕರ್‍ತಾನಾ ತಾಳೊ ಸುಕ್ಲೊ ತರೀ ತೆಂ ರೂಕ್ ಜಾಲ್ಲೆಂ ಪಳೆವ್ನ್ ಹಾಸೊ ಉದೆಲ್ಯೊ ತೊಂಡಾರ್. ಪುಣ್ ತಕ್ಶಣ್ ತೆಂ ಖುಬಾಳ್ಳೆಂ, “ತುಂ ಮ್ಹಾಕಾ ಪಾಟಿಂ ಉಲಯ್ತಾಯ್? ಹ್ಯಾ ಘರ್‍ಚಿ ಕೆಲ್ಲ್ಯಾರ್ ಚಾಕ್ರಿ, ಮ್ಹಾಕಾ ಮೆಳ್ಳಿ ಗಾಳಿಯಾಂಚಿ ಭಾಕ್ರಿ,” ಮ್ಹಣ್ ಭರ್ಮಾನ್ ಆರಂಬ್ ಕೆಲೆಂ ತರೀ ತಾಚೊ ತಾಳೊ ಫುಮಾರ್ ಜಾಲ್ಲೊ. “ಹಾಂವ್ ತರ್ ಹ್ಯಾ ಘರಾಂತ್ ರಾಂವ್ಚಿಂನಾ.” ತೆಂ ಕಸ್ಕಸ್ಲೆಂ.

ಸಬಾರ್ ದಿಸಾಂ ಉಪ್ರಾಂತ್ ಮ್ಹಜ್ಯಾಯ್ ಕಾಳ್ಜಾಂತ್ಲೆ ಕಳ್ವಳೆ ಭಾಯ್ರ್ ಘಾಲ್ಲ್ಯಾ ಸಂತೊಸಾನ್ ಹಾಂವ್ ನಿರ್ಲಿಪ್ತ್ ಜಾಲೊಂ ಆನಿ ತೆಂ “ತರ್ ಹಾಂವ್ ವಚೊಂ?” ಮ್ಹಣ್ ವಿಚಾರ್‍ತಾನಾ ಹಾಂವ್ ಥಂಡ್ ಬಸ್ಲೊಂ. “ಜಾಯ್ತ್ ತರ್” ತೆಂ ಸುಸ್ಕಾರ್‍ನ್ ಮ್ಹಣಾಲೆಂ. “ಹಾಂವ್ ಧಾ ಕೌಂಟ್ ಕರ್‍ತಾ. ತುಕಾ ಮ್ಹಜೆಸಂಗಿ ಜಿಯೆಂವ್ಕ್ ಮನ್ ನಾ ತರ್ ಸಾಂಗ್.” ತೆಂ ಜಳಾರೆಬರಿ ವಿರಾರ್ ಕರುಂಕ್ ಲಾಗ್ಲೆಂ. ವಚ್ ಮ್ಹಳ್ಯಾರ್ ಘೊವಾನ್ ಭಾಯ್ರ್ ಘಾಲೆಂ ಮ್ಹಣ್ ಪೊಲೀಸ್ ಮಾಮ್ ಮ್ಹಾಕಾ ಭಿತರ್ ಘಾಲ್ತಿತ್. ವಚನಾಕಾ, ಮ್ಹಳ್ಯಾರ್ ಹಾಚ್ಯಾ ‘ಕೊಣೆಂ? ಕೊಣೆಂ?’ ಮ್ಹಳ್ಳ್ಯಾ ಸವಾಲಾಂಕ್ ಜವಾಬ್ ಸೊಧುನ್ ತಕ್ಲಿ ಗಿರ್ಮಿಟ್ ಜಾವ್ನ್ ಎದೊಳ್‌ಚ್ ಟಕ್ಲೂ ಜಾಂವ್ಚ್ಯೆ ಸ್ಥಿತೆಕ್ ಪಾವ್‌ಲ್ಲ್ಯೆ ತಕ್ಲೆಚೆರ್ ಆಸ್ಚೆ ಚಾರ್ ಕೇಸ್‌ಯೀ ಝಡ್ತಿತ್. ದೆಕುನ್ “ಜಾಲ್ಲೆಬರಿ ಜಾತಾ ಮ್ಹಣ್ ಛುಪ್ ರಾವ್ಲೊಂ. “ತರ್ ಹಾಂವ್ ಕುಳಾರಾ ವಚೊಂ?” ತೆಂ ವಿರಾರ್ ಜಾಲ್ಲೆಂ! “ಜರ್ ತುಂ ಮ್ಹಾಕಾ ವಚನಾಕಾ ಮ್ಹಣ್ಶಿ ತರ್ ಹಾಂವ್ ರಾವ್ತಾಂ. ಜರ್ ಹಾಂವೆಂ ಧಾ ಮ್ಹಣ್ತಾ ಮ್ಹಣಸರ್ ತುಂ ಉಲಯ್ನಾಂಯ್ ತರ್ ಹಾಂವ್ ಘರಾ ಚಲ್ಲಿಂಚ್ ಮ್ಹಣ್ ಚೀಂತ್.” ಅಶೆಂ ತಾಕೀದ್ ದೀವ್ನ್ ತೆಂ ಪಾಸಾಯೊ ಮಾರಿತ್ತ್ ಲೇಕ್ ಕರುಂಕ್ ಲಾಗ್ಲೆಂ. “ಏಕ್.. ದೋನ್.. ತೀನ್..”

ಹಾಂವ್ ತಳ್ಮಳ್ಚಿ ಮತ್ ಆನಿ ಧಡ್ದಡ್ಚೆಂ ಕಾಳಿಜ್ ಘೆವ್ನ್ ತಿಕಾ ಆಯ್ಕಾತಾಲೊಂ. “ಪಳೆ ಹಾಂವ್ ಗೆಲ್ಯಾರ್ ತುಕಾ ರಾಂದುನ್ ವಾಡುಂಕ್ ಕೋಣ್ ಆಸಾ? ಹ್ಯೆ ಪ್ರಾಯೆರ್ ಚೆಡ್ವಾಂ ಸೊಡ್, ಮ್ಹಾತಾರಿಂ ಸಯ್ತ್ ಕುಮೊಕ್ ಕರುಂಕ್ ಯೇನಾಂತ್.” ತಿಣೆಂ ಮ್ಹಾಕಾ ಚಾಳ್ವೊಂವ್ಕ್ ಆರಂಬ್ ಕೆಲೆಂ. ಪುಣ್ ಹಾಂವ್ ಮಾತ್ರ್ ಫಾತರ್ ಜಾಲ್ಲೊಂ. ಸಬಾರ್ ತೆಂಪಾ ಉಪ್ರಾಂತ್ ಮ್ಹಜೆಸ್ತಕಿಂ ದೋನ್ ಹಫ್ತೆ ತರೀ ವೇಳ್ ಪಾಶಾರ್ ಕರುಂಕ್ ಆಶೆತಾಲೊಂ. “ಚಾರ್.. ಪಾಂಚ್.. ಸ… ಸಾತ್” ತೆಂ ಮ್ಹಾಕಾಚ್ ಪಳೆಂವ್ಕ್ ಲಾಗ್ಲೆಂ. ಹಾಂವೆಂ ತಾಚೆವಯ್ಲಿ ದೀಶ್ಟ್ ಚುಕಯ್ಲಿ. ತರೀ ಎಕಾ ಥರಾಚ್ಯೆ ಕಾವ್ಜೆಣೆನ್ ಆನಿ ಆತುರಾಯೆನ್ ಕುಡಿಂತ್ ಕಾಂಪ್ ಸುಟ್ಲಿ. “ಆಟ್… ಆಟ್… ನೋವ್..” ತೆಂ ಅತ್ರೆಗಾನ್ ಮ್ಹಾಕಾಚ್ ಪಳೆತಾಲೆಂ, ಹಾಂವೆಂ ತಕ್ಲಿ ಸಕ್ಲಾ ಘಾಲಿ. ಕಾಳ್ಜಾಂತ್ ಧಡ್ದೆಡೆ, ಮತಿಂತ್ ಕಳ್ವಳೆ ಮ್ಹಾಕಾ ದೆದೆಸ್ಪೊರ್ ಕರಿಲಾಗ್ಲೆ. ಪಾಟ್ಲ್ಯಾ ಚಾರ್ ವರ್‍ಸಾಂಥಾವ್ನ್ ಘರಾ ವಚ್ ಮ್ಹಳ್ಯಾರೀ ವಚನಾತ್ಲಿ ಮ್ಹಜಿ ಬಾಯ್ಲ್ ಆಜ್ ಅಶೆಂ ಪುಣೀ ವೆತಾ ತರ್ ಎಕ್ಸುರೊ ರಾಂವ್ಚೊ ತೊ ಅನ್ಭೋಗ್ ಮಾಕಾ ಬಿಲ್ಕುಲ್ ಚುಕೊನ್ ಘೆಂವ್ಕ್ ನಾಕಾ ಆಸ್‌ಲ್ಲೊ. ಹಾಂವ್ ರಾಕ್ಲೊಂ ಆನಿ ಥಕ್ಲೊಂ.

ಎಕಾಚ್ ಫರಾ ತಿಣೆಂ “ಧಾ” ಮ್ಹಣ್ಚ್ಯಾ ಬದ್ಲಾಕ್ “ಇಕ್ರಾ” ಮ್ಹಳೆಂ. “ಹಾಂ?” ಸುಸ್ಕಾರ್ ಸೊಡ್ನ್ ಹಾಂವ್ ತಾಕಾ ಪಳೆಯ್ತಾನಾ ತೆಂ ಮ್ಹಾಕಾ ಪಾಟ್ ಕರ್‍ನ್ ರಾವ್‌ಲ್ಲೆಂ! ಮ್ಹಾಕಾ ಟೆಂಪರ್ ಮಾಂಡ್ಡ್ಯಾಕ್ ಚಡ್ಲೊ, “ನೋವ್ ಜಾಲ್ಯಾ ಉಪ್ರಾಂತ್ ಧಾ ಮ್ಹಣ್ ತುಕಾ ಕಳಿತ್ ನಾ? ಖಂಯ್ಚ್ಯೆ ಟಿಚೆರಿನ್ ತುಕಾ ಲೆಕ್ಕ ಶಿಕಯ್ಲೆಂ? ಓಹೋ ಲೆಕ್ಕ ಮಾಸ್ಟೆರಾಕ್ ಮಸ್ಕಾ ಮಾರ್‍ನ್ ಪಾಸ್ ಜಾಲ್ಲೆಂಯ್‌ಗೀ?” ಆಟೆವಿಟೆ ತಡ್ವೊಂಕ್ ಜಾಯ್ನಾಸ್ತಾಂ ಹಾಂವ್ ಬೊಬಾಟ್ಲೊಂ. ಆತಾಂ ತೆಂ ಎಕಾಚ್ಘಾಣೆಂ ಮ್ಹಾಕಾ ಪಳೆವ್ನ್ ಕುತ್ತ್ ಕರ್‍ನ್ ಹಾಸ್ಲೆಂ. “ಹಾಂವೆಂ ಧಾ ಮ್ಹಣ್ಚೆಪಯ್ಲೆಂ ತುಂ ಉಲಯ್ಲೊಯ್. ಆತಾಂ ಹಾಂವ್ ಕುಳಾರಾ ವಚನಾ. ಸುಶೆಗಾತ್ತ್ ಹಾಂಗಾಚ್ ಸೊಫಾಚೆರ್ ಬಸ್ತಾಂ.” ಮ್ಹಣೊನ್ ಬಸೊಂಕ್ ವೆತಾನಾ ತ್ಯಾಚ್ಚ್ ಸೊಫಾಚೆರ್ ಸಕಾಳಿಂ ಪುತಾನ್ ಸುವಿ ತೊಪುನ್ ದವರ್‍ಲಿ ಉಗ್ಡಾಸ್ ಆಯ್ಲೊ ಆನಿ ಹಾಂವ್ “ಸು…ಸು..” ಮ್ಹಣ್ ಪಾದ್ದೆತಾನಾ ತೆಂ ದೊಳೆ ವಾಟಾರ್‍ನ್, “ಕಿತೆಂ ಸು…ಸು.. ಮ್ಹಣ್ ಸುಂಯ್ಪಿತಾಯ್? ‘ಸು’ ಮ್ಹಳ್ಯಾರ್ ಸುಕ್ರುಂಡೆ ಕರ್‍ನ್ ದಿತಾಂ ಮ್ಹಣ್ ಚಿಂತ್ತಾಯ್‌ಗೀ? ಮ್ಹಜಿ ಮತ್ ಕರ್ಕರ್ ಕೆಲ್ಲ್ಯಾಕ್ ತುಕಾ ಪನಿಶ್‌ಮೆಂಟ್. ರುಕಾಮುಳಾಂತ್ ಸರ್ಫಾಂತ್ ಘಾಲ್ನ್ ದವರ್‌ಲ್ಲೆಂ ವಸ್ತುರ್ ಉಂಬಳ್” ಮ್ಹಣ್ ತಾಕೀದ್ ದೀವ್ನ್ ಸೊಫಾಚೆರ್ ಹಾತ್ ತೆಂಕುನ್ ಬಸ್ಲೆಂ. ಕಿತೆಂಗೀ ಪುನ್ಯಾನ್ ಸುವಿ ಖಂಯ್‌ಗೀ ತೊಪ್ಚಿ ತಾಚ್ಯಾ ಹಾತಾಕ್ ತೊಪ್ತಾನಾ “ಯೇ ಮಾಂಯ್” ಮ್ಹಣ್ ಬೊಬಾಟ್ ಮಾರ್‍ತಾನಾ ಕಾವ್ಜೆಣೆನ್ ಆನಿ ಬಿರ್ಮತೆನ್ ವೆಚಿಂ ಸರ್ವ್ ಪಾತ್ಕಾಂ ಭೊಗ್ಸುನ್ ತಿಚೆಲಾಗಿಂ ಕುಮ್ಕೆಕ್ ಪಾವ್ಲೊಂ ಆನಿ ವ್ಹಳೊ ತಾಳ್ಯಾನ್ “ಸು ಮ್ಹಳ್ಯಾರ್ ಸದಾಂಯ್ ಸುಕ್ರುಂಡೆ ಜಾಯ್ ಮ್ಹಣ್ ಅರ್ಥ್ ನ್ಹಯ್, ತೊ ಸುಕೊ ಉಂಡೊಯ್ ನ್ಹಯ್. ‘ಉಜೊ’ ಜಾವ್ನ್ ‘ಸು’ ಮ್ಹಳ್ಯಾರ್ ಸುವಿಯೀ ಜಾವ್ಯೆತಾ. ತುಳ್ವೆಂತ್ ಜಾಲ್ಯಾರ್ ‘ಉಜೊ’ ಜಾವ್ನ್ ಕುಡಾಂ ನಾಸ್ ಕರ್‍ಯೆತಾ” ಮ್ಹಣ್ ತಿಚ್ಯಾ ಬೊಟಾಕ್ ಪ್ಲಾಸ್ಟರ್ ಘಾಲಿಲಾಗ್ಲೊಂ!

✍️ –ಅನಿತಾ ಅರ್ಸುಲಯ್ನ್