ಏಕ್ ಪಾವ್ಟಿಂ ಪವಿತ್ರ್ ಸಭಾ ಆನಿ ತಿಚ್ಯೆ ಶಿಕವ್ಣೆವಿಶಿಂ ಭಾಸಾಭಾಸ್ ಚಲಯ್ತಾನಾ, ಮ್ಹಜ್ಯಾ ಎಕಾ ಇಶ್ಟಾನ್, “ಕಥೊಲಿಕ್ ಪವಿತ್ರ್ ಸಭೆನ್ ಸಾಂತಾಂಕ್ ಪಾಚಾರ್‍ಚೆಂ ರಾವೊಂವ್ಕ್ ಜಾಯ್” ಮ್ಹಳ್ಳಿ ಅಭಿಪ್ರಾಯ್ ಉಚಾರ್‍ಲಿ. ತಾಚೆಂ ತರ್ಕ್ ಹ್ಯಾ ಪರಿಂ ಆಸ್‌ಲ್ಲೆಂ. ಪಯ್ಲ್ಯೆ ಸುವಾತೆರ್ ಪವಿತ್ರ್ ಸಭೆಂತ್ ಸಾಂತಾ ಭಕ್ತಾಂಚಿ ಪಟ್ಟಿ ಉರ್‍ಲಲ್ಯಾ ಸಾಂತಾಂಥಂಯ್ ಎಕೆ ರಿತಿಚೆಂ ‘ಆಮಿ ಫಾವೊ ನ್ಹಯ್’ ಮ್ಹಳ್ಳೊ ಕೀಳ್ ಮನೋಭಾವ್ ಉಬ್ಜಯ್ತಾ, ಮ್ಹಣ್ಜೆ ಭಾಗೆವಂತ್ಪಣಾಚೆಂ ಜಿವಿತ್ ಆಮ್ಕಾಂ ಸಹಜ್‌ಲ್ಲೆಂ ನ್ಹಯ್, ತೆಂ ವಿಂಚ್ಲಲ್ಯಾಂಕ್ ಮಾತ್ರ್, ಆಮಿ ಪಾತ್ಕಿ, ಪಾತ್ಕಾಂತ್‌ಚ್ ಮರೊಂಕ್ ಫಾವೊ – ಅಸಲ್ಯಾ ತುಲನಾತ್ಮಾಕ್ ಚಿಂತ್ಪಾಕ್ ವೊಳಗ್ ಜಾವ್ನ್ ಭಾಗೆವಂತ್ಪಣಾಚ್ಯೆ ವಾಟೆರ್ ಚಲ್ಚೆಂ ಪ್ರಯತ್ನ್ ಸೊಡುಂಕ್ ಕಾರಣ್ ಜಾತಾ. ದುಸ್ರ್ಯಾನ್, ಸೊಮಿಯಾ ಜೆಜುನ್ ಹರ್‍ಯೆಕ್ಲ್ಯಾಂಕ್ ಸಂಪೂರ್ಣ್ ಜಾಂವ್ಚ್ಯಾಕ್ ಆಪೊವ್ಣೆಂ ದಿಲಾಂ (ಮಾತೆವ್ ೫:೪೮). ತರ್ ಥೊಡ್ಯಾಂಚೆಂ ಜಿವಿತ್ ಮಾತ್ರ್ ಉಕಲ್ನ್ ಧರ್‍ಚೆಂ ಕಿತ್ಯಾಕ್, ಹರ್‍ಯೆಕ್ಲಿಂ ತಾಂಚ್ಯಾ ತಾಂಚ್ಯಾ ಭೆಸಾ ಪರ್ಮಾಣೆಂ, ಪರಿಸ್ಥಿತೆ ಪರ್ಮಾಣೆಂ ಆನಿ ಚಿಂತ್ಪಾ ಪರ್ಮಾಣೆಂ ಬರೆಂ ಜಿವಿತ್ ಜಿಯೆಂವ್ಕ್ ಪ್ರಯತ್ನ್ ಕರ್‍ತಾತ್. ಥೊಡ್ಯಾಂಚೆಂ ‘ಬರೆಂಪಣ್’ ದಿಸ್ತಾ ಆನಿ ಥೊಡ್ಯಾಂಚೆಂ ‘ಗುಪಿತ್’ ಉರ್‍ತಾ. ಅಂತಸ್ಕರ್ನಾಚೆಂ ಸತ್ ದೆವಾಕ್ ಮಾತ್ರ್ ಕಳಿತ್ ಆಸ್ತಾ ಜಾಲ್ಲ್ಯಾನ್ ಮನ್ಶಾಂನಿ ಹ್ಯಾ ವಿಶಿಂ ತೀರ್ಪ್ ದಿಂವ್ಚೆಂ ಕಶೆಂ? ಆನಿ ತಿಸ್ರ್ಯಾನ್, ಪವಿತ್ರ್ ಸಭೆಂತ್ ಎಕಾ ವೆಕ್ತಿಕ್ ಸಾಂತ್ ಮ್ಹಣ್ ಪಾಚಾರುಂಕ್, ವ್ಹಡ್ ಪ್ರಕ್ರಿಯಾ ಆಸಾ ಆನಿ ಹಾಚೆಪಾಟ್ಲ್ಯಾನ್ ಜಾಯ್ತೊ ವಾವ್ರ್ ಆಸಾ ಆನಿ ಸಾಂಗಾತಾಚ್ ಜಾಯ್ತೊ ಖರ್ಚ್ ಆಸಾ. ತ್ಯಾ ದೆಕುನ್ ಕೊಣಾಕ್ ಸಾಧ್ ಆಸಾ ತಾಂಕಾಂ ಮಾತ್ರ್ ‘ಸಾಂತಿಪಣಾಚೊ ಕುರೊವ್’ ಮೆಳ್ತಾ. ಜಾಯ್ತೆಪಾವ್ಟಿಂ ಆಮ್ಚೆ ಮದೆಂಚ್ ಸಾಂತಿಪಣಾಚೆಂ ಜಿವಿತ್ ಜಿಯೆಂವ್ಚಿಂ ಆಸಾತ್. ತಿಂ ಸಾದಿಂ, ದುಬ್ಳಿಂ ಆನಿ ಗುಪಿತ್ ಜಿವಿತಾಚಿಂ ಜಾಲ್ಲ್ಯಾನ್ ತಾಂಚೆ ಪಾಟ್ಲ್ಯಾನ್ ವಾವ್ರ್ ಆನಿ ಖರ್ಚ್ ಕರುಂಕ್ ಕೊಣ್‌ಚ್ ನಾತ್ಲಲ್ಯಾನ್ ತಾಂಕಾಂ ಸಾಂತ್ ಮ್ಹಣ್ ಪಾಚಾರುಂಕ್ ನಾ, ತರ್ ತಿಂ ಸಾಂತಿಪಣಾಕ್ ಫಾವೊ ನ್ಹಯ್‌ಗಿ?

ಮ್ಹಜ್ಯಾ ಇಶ್ಟಾಚ್ಯಾ ತರ್ಕಾಂತ್ ಖಂಡಿತ್ ಜಾವ್ನ್ ಸತ್ ಆಸ್‌ಲ್ಲೆಂ. ತ್ಯಾ ದೆಕುನ್ ತಾಕಾ ಜಾಪ್ ದಿಂವ್ಚೆಂ ಪ್ರಯತ್ನ್ ಹಾಂವೆಂ ಕೆಲೆಂನಾ. ಬದ್ಲಾಕ್ ಪವಿತ್ರ್ ಸಭೆಂತ್ ‘ಸಾಂತಾ ಭಕ್ತಾಂಕ್’ ಪಾಚಾರ್‍ಚಿ ರಿವಾಜ್ ಕಿತ್ಯಾಕ್ ಆಯ್ಲಿ ಹ್ಯಾ ವಿಶಿಂ ಜಾಣಾಂ ಜಾಂವ್ಚೆಂ ಇಲ್ಲೆಂ ಪ್ರಯತ್ನ್ ಕೆಲೆಂ.

1. ಸಾಂತಾಂಚೆಂ ಜಿವಿತ್ ಆಮ್ಕಾಂ ಏಕ್ ಆದರ್ಶ್

 ಹರ್‍ಯೆಕ್ಲ್ಯಾಕ್ ಆಮ್ಕಾಂ ಭಾಗೆವಂತ್ಪಣಾಚ್ಯಾ ಜಿವಿತಾಕ್ ಆಪೊವ್ಣೆಂ ಆಸಾ ತೆಂ ಖರೆಂ. ಹ್ಯೆ ವಾಟೆರ್ ಸಾಂತಾಚೆಂ ಜಿವಿತ್ ಆಮ್ಕಾಂ ಏಕ್ ಆದರ್ಶ್ ಜಾತಾ. ತಾಂಚ್ಯಾ ಕಶ್ಟಾ-ಸಂಕಶ್ಟಾಂಮದೆಂ ಭಾವಾಡ್ತ್ ಉಕಲ್ನ್ ಧರುಂಕ್ ತಾಣಿಂ ಸೊಧ್ಲಲಿ ವಾಟ್, ಆಪ್ಣಾಯಿಲ್ಲಿ ಆಧ್ಯಾತ್ಮಿಕತಾ, ದೆವಾಥಂಯ್ ಆಸ್ಲಲಿ ಸಳಾವಳ್ – ಹೆಂ ಸಗ್ಳೆಂ ಭಾವಾಡ್ತ್ಯಾಂಕ್ ಏಕ್ ಪ್ರೇರಣ್ ಜಾತಾ. ದೇವ್ ಅಗಣಿತ್. ತಾಕಾ ಸಂಪೂರ್ಣ್ ಜಾವ್ನ್ ವ್ಹಳ್ಕಲ್ಲೊ ‘ಜೆಜು’ ಶಿವಾಯ್ ಹೆರ್ ಕೊಣ್‌ಚ್ ನಾ. ದೆಕುನ್ ಆಮ್ಚೆಬರಿಚ್ ‘ಪಾತ್ಕಿ’ ಜಾವ್ನಾಸೊನ್ ತಾಚೆವಯ್ರ್ ಜಯ್ತ್ ಜೊಡ್ಲಲ್ಯಾ ಸಾಂತಾಂಚೆಂ ಜಿವಿತ್ ಖಂಡಿತ್ ಆಮ್ಕಾಂ ಪ್ರೇರಣಾಚೆಂ ಜಾತಾ.

2. ದೆವಾಥಂಯ್ ಪರ್ತೊಣಿ ಆನಿ ಕನ್ವಡ್ತರ್‌ಪಣ್

 ಸಾಂತ್ ಆಗುಸ್ತಿನ್, ಲೊಯಾಲಾಚೊ ಸಾಂತ್ ಇನಾಸ್, ಸಾಂ. ಪ್ರಾನ್ಸಿಸ್ ಸಾವೆರ್, ಹಾಂಚೆಂ ಜಿವಿತ್ ಸಂಸಾರಿ ವೊಸ್ಯಾಥಾವ್ನ್, ಆಪ್ಣಾಕ್‌ಚ್ ಮೆಕ್ಳೆಂ ಕರ್‍ನ್ ದೆವಾಥಂಯ್ ಸಂಪೂರ್ಣ್ ರಿತಿನ್ ಪರ್‍ತಲ್ಲ್ಯಾಕ್ ಏಕ್ ವರ್ತಿ ಸಾಕ್ಸ್. ತಾಂಚೆಂ ಜಿವಿತ್, ಆಮಿ ಆಮ್ಚೆಂ ಪಾತಕ್ ಸಾಂಡುನ್ ಪರತ್ ಸಂಪೂರ್ಣ್‌ಕಾಯೆಚ್ಯೆ ವಾಟೆರ್ ಚಮ್ಕೊಂಕ್ ಆಮ್ಕಾಂ ಪ್ರೇರಣ್ ದಿತಾ.

3. ಶೆಗುಣಾಂಚೆಂ ಜಿವಿತ್ ಆಮ್ಕಾಂ ಪ್ರೇರಣ್

 ಸಾಂತ್ ಆಮ್ಕಾಂ ಥೊಡೆ ಪ್ರತ್ಯೇಕ್ ಶೆಗುಣ್ ಆಮ್ಚ್ಯಾ ಜಿವಿತಾಂತ್ ಪಾಳುಂಕ್ ಪ್ರೇರಣ್ ದಿತಾತ್. ದಾಖ್ಲ್ಯಾಕ್ ಅಸಿಸಿಚೊ ಸಾಂ. ಫ್ರಾನ್ಸಿಸ್ ಆಮ್ಕಾಂ ದುಬ್ಳಿಕಾಯೆಚ್ಯಾ ಶೆಗುಣಾವಿಶ್ಯಾಂತ್ ಪ್ರೇರಿತ್ ಕರ್‍ತಾ. ಜೆಜುಚೆಂ ಲ್ಹಾನ್ ಫುಲ್ ಸಾಂ. ತೆರೆಜ್, ದೆವಾಚ್ಯೆ ಕಾಕುಳ್ತಿಥಂಯ್ ಅಖಂಡ್ ಪಾತ್ಯೆಣಿ ದವ್ರುನ್ ಜಿಯೆಂವ್ಕ್ ಆಪೊವ್ಣೆಂ ದಿತಾ. ಕೊಲ್ಕಾತ್ತಾಚಿ ಸಾಂ. ತೆರೆಜ್, ದುಬ್ಳ್ಯಾ-ದಾಕ್ಟ್ಯಾಂಥಂಯ್ ಜೆಜುಕ್ ಪಳೆಂವ್ಕ್ ಶಿಕಯ್ತಾ. ಅಶೆಂ ಸಾಂತಾಥಂಯ್ ಆಸ್ಚೆ ವಿಶೇಸ್ ಶೆಗುಣ್ ಆಮ್ಕಾಂ ಭಾಗೆವಂತ್ಪಣಾಚ್ಯೆ ವಾಟೆರ್ ಆಧಾರ್ ಜಾತಾತ್.

4. ಜಿವಿತಾಚ್ಯಾ ಝುಜಾಂತ್ ಮಾರ್ಗದರ್ಶಕ್

 ಸಬಾರ್ ಸಾಂತಾಂಚೆಂ ಜಿವಿತ್ ಫುಲಾಂ ಝೆಲ್ಯಾಂಚೆಂ ಹಾಂತುಳ್ನ್ ನ್ಹಯ್ ಆಸ್ಲೆಂ. ಬಗಾರ್ ಕಾಂಟ್ಯಾ-ಖುಂಟ್ಯಾಂಚೆಂ ಜಿವಿತ್ ತಿಂ ಚಮ್ಕಲ್ಯಾಂತ್. ಖುರ್‍ಸಾಚ್ಯಾ ಸಾಂ. ಜುವಾಂವ್ಕ್ ತಾಚ್ಯಾಚ್ ಭಾವಾಂ ಫ್ರಾದಿಂಥಾವ್ನ್ ದಗ್ದವ್ಣಿ ಮೆಳ್‌ಲ್ಲಿ. ಅವಿಲಾಚಿ ಸಾಂ. ತೆರೆಜಾಕ್ ತಿಚ್ಯಾ ಮೆಳಾಂತ್ ನವೀಕರಣ್ ಹಾಡ್ಚ್ಯೆ ವಾಟೆರ್ ಜಾಯ್ತ್ಯೊ ಅಡ್ಕಳಿ ಉಬ್ಯೊ ಜಾಲ್ಲ್ಯೊ. ಆಮ್ಚ್ಯಾಚ್ ದೆಶಾಚ್ಯಾ ಸಾಂ. ಅಲ್ಫೊನ್ಸಾಕ್ ತಿಚೆವಿಶಿಂ ಕೆಲ್ಲ್ಯಾ ಅಪಪ್ರಚಾರಾಕ್ ಆನಿ ಚೂಕ್-ಚಿಂತ್ಪಾಕ್ ಫುಡ್ ಕರುಂಕ್ ಆಸ್‌ಲ್ಲೆಂ. ಭಾವಾಡ್ತಾಚ್ಯೆ ಸಕ್ತೆನ್ ದೆವಾಚ್ಯೆ ಕುರ್ಪೆನ್ ಹ್ಯಾ ಸರ್ವ್ ಕಾಂಟ್ಯಾ-ಖುಂಟ್ಯಾವಯ್ರ್ ಜೊಡ್ಲಲೆಂ ಜಯ್ತ್ ಆಮಾ ಸರ್ವಾಂಚ್ಯಾ ಭಾವಾಡ್ತಿ ಪಯ್ಣಾರ್ ‘ದಿವೊ’ ಜಾಂವ್ಕ್ ಪಾವ್ತಾ.

 5. ಜೆಜು ಕ್ರೀಸ್ತಾಚಿ ಶಿಕವ್ಣ್ ಪಾಳುಂಕ್ ಆರ್ಸೊ

 ಏಕ್ ಮೊಗಾಚಿ ನಾಗರಿಕತಾ ಆಮ್ಚೆಭಿತರ್ ಆನಿ ಭೊಂವಾರಿಂ ರಚುಂಕ್ ಜಾಯ್ ಮ್ಹಣೊನ್ ಜೆಜು ಕ್ರೀಸ್ತಾನ್ ದಿಲ್ಲೊ ಉಲೊ. ಸಾಂ. ವಿನ್ಸೆಂಟ್ ದೆ ಪಾವ್ಲ್ ಹಾಣೆಂ ದುಬ್ಳ್ಯಾ-ಧಾಕ್ಟ್ಯಾಥಂಯ್ ದಾಕಯಿಲ್ಲೊ ಹುಸ್ಕೊ ಆಮ್ಕಾಂ ಸಮಾಜೆಚ್ಯೆ ಮೆರೆರ್ ಆಸೊನ್ ನಿರ್ಗತಿಕ್ ಜಾವ್ನ್ ಆಸ್ಲಲ್ಯಾಥಂಯ್ ಮೋಗ್ ದಾಕೊಂವ್ಕ್ – ಅಶೆಂ ಜೆಜುನ್ ಕೆಲ್ಲೆಬರಿ ಆಮಿಂಯ್ ಕರ್‍ಚ್ಯಾಕ್ ತೊ ಏಕ್ ‘ಆರ್ಸೊ’ ಕಸೊ ಆಮ್ಕಾಂ ಜಾತಾ.

6. ಮಾಗ್ಣೆಂ ಆನಿ ಪ್ರಾಚಿತಾಚ್ಯಾ ಜಿವಿತಾಕ್ ಮೇಲ್‌ಫಂಕ್ತ್

ಸರ್ವ್ ಸಾಂತ್‌ಭಕ್ತ್ ಆಮ್ಕಾಂ ಆಮಿ ದೆವಾಥಂಯ್ ಸಳಾವಳ್ ಆಪ್ಣಾಂವ್ಕ್ ಅತೀ ಗರ್ಜ್ ಜಾವ್ನಾಸ್ಚ್ಯಾ ಮಾಗ್ಣೆಂ ಆನಿ ಪ್ರಾಚಿತಾಚ್ಯಾ ಜಿವಿತಾಕ್ ಮೇಲ್‌ಫಂಕ್ತ್ ಜಾವ್ನಾಸಾತ್. ತಾಂಚ್ಯಾ ಜಿವಿತಾಂತ್ಲೆಂ ಮಾಗ್ಣೆಂ ಮಾಗ್ಣ್ಯಾಚಿಂ ವಿಧಾನಾಂ ಆಮ್ಕಾಂ ಆಮ್ಚ್ಯಾ ಮಾಗ್ಣ್ಯಾ ಜಿವಿತಾಕ್ ಬಳ್ವಂತ್ ಆಧಾರ್ ಜಾತಾತ್. ಖುರ್‍ಸಾಚೊ ಸಾಂ. ಜುವಾಂವ್ ಆನಿ ಅವಿಲಾಚಿ ಸಾಂ. ತೆರೆಜ್ ಆಜ್ ಅತ್ಮೀಕ್ ಜಿವಿತಾಕ್ ಮಾರ್ಗದರ್ಶನ್ ದಿಂವ್ಚಿಂ ವ್ಹಡ್ ಪ್ರೇರಕ್ ಜಾವ್ನ್ ಪವಿತ್ರ್ ಸಭೆಂತ್ ಪರ್ಜಳ್ತಾತ್. ದೈವಿಕ್ ಕಾಕುಳ್ತಿಚ್ಯಾ ಭಕ್ತಿಪಣಾಚಿ ಸಾಂ. ಫಾವುಸ್ತಿನಾ, ಅರ್ವಿಲ್ಯಾ ಕಾಳಾಚೊ ಸಾಂತ್ ಪಾದ್ರ್-ಪಿಯೊ ಹಾಂಚೆಂ ಪ್ರಾಚಿತಾಚೆಂ ಜಿವಿತ್ ಆಮ್ಕಾಂ ಖಂಡಿತ್ ಜಾವ್ನ್ ಮೇಲ್‌ಫಂಕ್ತ್ ಜಾವ್ನಾಸಾ.

7. ಭಾವಾಡ್ತಾಕ್ ಸಾಕ್ಸ್ ಜಾಂವ್ಕ್ ಶಿಕಯ್ತಾತ್

ಪವಿತ್ರ್ ಸಭೆಂತ್ ಆಸ್ಚೆ ಹಜಾರಾಂನಿ ಮಾಡ್ತಿರ್ ಸಾಂತ್ ಆಮ್ಕಾಂ ಆಮ್ಚ್ಯಾ ಚಾಲ್ತ್ಯಾ ಜಿವಿತಾಂತ್ ಭಾವಾಡ್ತಾಕ್ ಸಾಕ್ಸ್ ಜಾಂವ್ಚೆಂ ಕಶೆಂ ಮ್ಹಣ್ ದಾಕಯ್ತಾತ್. ಆಮ್ಚ್ಯಾಚ್ ದೆಶಾಚಿ ಆಯ್ಲೆವಾರ್ ಸಾಂತ್ ಮ್ಹಣ್ ಪಾಚಾರ್‍ಲಲಿ ರಾಣಿ ಮರಿಯಾ, ಸಾಂ. ಮ್ಯಾಕ್ಸಿಮಿಲಿಯನ್ ಕೊಲ್ಬೆ, ಸಾಂ. ಲೊರೆಸ್, ಸಾಂ. ತೊಮಾಸ್ ಮೋರ್, ಸಾಂ. ಎಡಿತ್ ಸ್ಪೆಯ್ನ್ ಹಾಣಿಂ ಜಿವಿತಾಚ್ಯೆ ವಿವಿಧ್ ಪರಿಗತೆಂತ್ ಆಮಿ ಕಶೆಂ ಆಮ್ಚ್ಯಾ ಭಾವಾಡ್ತಾಕ್ ಸಾಕ್ಸ್ ಜಾವ್ಯೆತ್ ಗರ್ಜ್ ಪಡ್ಲ್ಯಾರ್ ರಗತ್ ವಾರೊವ್ಯೆತ್ ಮ್ಹಣ್ ಶಿಕಯ್ತಾತ್.

ಸಾಂತ್‌ಭಕ್ತಾವಿಶಿಂ ಹೆ ಥೊಡೆ ವಿಚಾರ್ ಮ್ಹಜ್ಯಾ ಮಿತ್ರಾನ್ ಮಾಂಡ್‌ಲ್ಲ್ಯಾ ತರ್ಕಾಕ್ ಸಂಪೂರ್ಣ್ ಜಾಪಿ ನ್ಹಯ್ ತರೀ, ಕಥೊಲಿಕ್ ಪವಿತ್ರ್ ಸಭೆಂತ್ ಸಾಂತಾಭಕ್ತಾಂಚೊ ಪಾತ್ರ್ ತಶೆಂ ಪ್ರಾಮುಕ್ಯತಾ – ಹ್ಯಾ ವಿಶಿಂ ಖಂಡಿತ್ ಜಾವ್ನ್ ಥೊಡೊ ಉಜ್ವಾಡ್ ಫಾಂಕೊಂವ್ಚ್ಯಾಂತ್ ಕಸಲೊಚ್ ದುಬಾವ್ ನಾ.

–ಫ್ರಾದ್ ನೆಲ್ಸನ್ ಪಿಂಟೊ