“ರೊಮಾಂತ್ ಆಯ್ಕಲಿ ಏಕ್‌ಜಾತ್ ಬೋಬ್, ರುದಾನ್ ಆನಿ ಕಠೀಣ್ ವಿಳಾಪ್; ರಾಖೆಲ್ ಆಪ್ಲ್ಯಾ ಭುರ್ಗ್ಯಾಂಪಾಸತ್ ರಡ್ತಾಲಿ, ತಿಂ ಅಂತರ್‍ಲಿಂ ದೆಕುನ್ ಭುಜಾವಣ್ ಘೆಂವ್ಕ್ ತಿ ಆಯ್ಕಾನಾ ಜಾಲಿ,” (ಮಾತೆವ್ 3:18. ಪರ್ನ್ಯಾ ಸೊಲ್ಲ್ಯಾಂತ್ ಯೆರೆಮಿಯಾ ಪ್ರವಾದ್ಯಾನ್ ಉಚಾರ್‍ಲಲಿಂ ಹಿಂ ಉತ್ರಾಂ, ನವ್ಯಾ ಸೊಲ್ಲ್ಯಾಂತ್ ಮಾತೆವಾಚ್ಯಾ ವಾಂಜೆಲಾಂತ್ ಜೆಜುಚ್ಯಾ ಜನನಾ ಉಪ್ರಾಂತ್ ಜಾಲ್ಲ್ಯಾ ಬಾಳ್ಕಾಂಚ್ಯಾ ಸಂಹಾರಾವಿಶಿಂ ಉಲ್ಲೇಖ್ ಕೆಲ್ಲಿಂ ಆಮಿ ವಾಚ್ತಾಂವ್. ಜೆದ್ನಾ ಜ್ಯೋತಿಶಿಂನಿ ಆಪ್ಣಾಕ್ ಠಕಯ್ಲೊ ಮ್ಹಣ್ಚೊ ಹಿಶಾರೊ ಹೆರೊದಿಕ್ ಲಾಬ್ತಾ, ತೊ ರಾಗಾನ್ ಪೆಟ್ತಾ ಆನಿ ಜ್ಯೋತಿಶಿಂನಿ ಬಾಳೊಕ್ ಜಲ್ಮಲಾ ಮ್ಹಣ್ ಠರಯ್ಲಲ್ಯಾ ವೆಳಾಕ್ ಸರಿ ಜಾವ್ನ್ ಬೆತ್ಲೆಹೆಮಾಂತ್ ಆನಿ ಭೊಂವ್ತಣಿಂ ಆಸ್‌ಲ್ಲ್ಯಾ ಚಡುಣೆಂ ದೋನ್ ವರ್‍ಸಾಂಚ್ಯಾ ಚೆರ್ಕ್ಯಾ ಭುರ್ಗ್ಯಾಂಕ್ ಜಣ್ ಧಾಡ್ನ್ ಜಿವೆಶಿಂ ಮಾರಯ್ತಾ.

ಹೆರೊದಿಚ್ಯೆ ಹ್ಯೆ ಕರ್‍ನೆಪಾಟ್ಲೊ ಉದ್ದೇಶ್ ಜರ್ ವಿಶ್ಲೇಶಣ್ ಕೆಲೊ ತರ್, ತಾಚೆಥಂಯ್ ಆಸ್ಚಿ ಆಪ್ಲ್ಯಾ ಅಸ್ತಿತ್ವಾಚಿ ಭಿರಾಂತ್, ಆಪ್ಣಾಚೆರ್‌ಚ್ ಆಸ್ಚೆಂ ಅಪಧಯ್ರ್, ಹುದ್ದ್ಯಾಚೊ ಹೊರ್ಬೊಸ್, ಅಹಂಭಾವ್, ಕ್ರೂರ್ ಪ್ರವೃತ್ತಿ ಅಶೆಂ ಸಮ್ಜೊನ್ ಘೆವ್ಯೆತ್. ಹೆರೊದಿಚೊ ಮತ್ಲಬ್ ಕಿತೆಂಯ್ ಆಸೊಂ, ದೆವಾನ್ ದಿಲ್ಲೊ ಜೀವ್ ಕೊಣಾ ಎಕ್ಲ್ಯಾಚ್ಯಾ ಸ್ವಾರ್ಥಾಕ್ ಬಲಿ ಜಾಲೊ, ಕೊಣಾ ಮಾಯೆಚೊ ಕುಸ್ವೊ ರಿತೊ ಜಾಲೊ. ಕಾಳ್ಜಾಂತ್ ಘೆಟೆ ಜಾಲ್ಲೆಂ ದೂಕ್ ತಶೆಂಚ್ ಉರ್‍ಲೆಂ. ತ್ಯಾ ಬಾಳ್ಕಾಂಕ್, ಮಾಡ್ತಿರ್ ಬಾಳ್ಕಾಂ ಮ್ಹಣ್ ಪವಿತ್ರ್ ಸಭೆನ್ ಮಾನುನ್ ಘೆತ್ಲಿಂ. ವರ್‍ಸಾಂತ್ ಏಕ್ ಪಾವ್ಟಿಂ ಕ್ರಿಸ್ತಾಂವ್ ಭಾವಾಡ್ತ್ಯಾಂನಿ ಹ್ಯಾ ಮಾಡ್ತಿರ್ ಬಾಳ್ಕಾಂಚೊ ಉಗ್ಡಾಸ್ ಕಾಡುನ್ ಆಪ್ಲ್ಯಾ ಭುರ್ಗ್ಯಾಂಚೆರ್ ವಿಶೇಸ್ ಆಶೀರ್ವಾದ್ ಮಾಗೊನ್ ಘೆಂವ್ಚಿ ರಿವಾಜ್ ಪವಿತ್ರ್ ಸಭೆಂತ್ ಚಾಲ್ತೆರ್ ಆಸಾ.

ಹೆರೊದಿಚ್ಯಾ ಪಾಟ್ಲ್ಯಾನ್ ರಾವೊನ್ ಆಮಿ ಪಳಯ್ಲೆಂ ತರ್, ಇತಿಹಾಸ್‌ಕಾರ್, ವೆವೆಗ್ಳ್ಯಾ ಕಥೊಲಿಕ್ ಪಂಗ್ಡಾಚೆ, ಪವಿತ್ರ್ ಪುಸ್ತಕ್ ವಿಶ್ಲೇಶಕ್ ವೆವೆಗ್ಳ್ಯಾ ರಿತಿನ್ ಬಾಳ್ಕಾಂಚ್ಯಾ ಸಂಹಾರಾಚೆಂ ವಿಶ್ಲೇಶಣ್ ಕರ್‍ತಾತ್. ಹಕೀಕತ್ ಕಿತೆಂಯ್ ಆಸೊಂ, ದೋನ್ ಹಜಾರ್ ವರ್‍ಸಾಂ ಪುರ್‍ವಿಂ ಘಡ್‌ಲ್ಲಿ ಗಜಾಲ್ ಮ್ಹಣ್ ಮಾಂದುನ್ ಘೆಂವ್ಚ್ಯಾ ಬಾಳ್ಕಾಂಚ್ಯಾ ಸಂಹಾರಾವಿಶಿಂ ಪರತ್ ಪರತ್ ಉಗ್ಡಾಸ್ ಕಾಡ್ತಾನಾ, ಸದಾಂನಿತ್ ಪ್ರಸ್ತುತ್ ಸಂಸಾರಾಂತ್ ಜಾವ್ನ್ ಆಸ್ಚೊ ಬಾಳ್ಕಾಂಚೊ, ನೆಣ್ತ್ಯಾ ಭುರ್ಗ್ಯಾಂಚೊ ಸಂಹಾರ್ ಕಾಳ್ಜಾಚ್ಯಾ ಕೊನ್ಶಾಕ್ ಕಾಂತಯ್ತಾ. ನತಾಲಾಂ ಕಾಳಾರ್, ಹೆರೊದಿಚ್ಯಾ ಹಾತಿಂ ಜೀವ್ ದಿಲ್ಲ್ಯಾ ಭುರ್ಗ್ಯಾಂವಿಶಿಂ ಚುರ್‍ಚುರೆ ಉಚಾರ್‍ತಾನಾ, ದಿಸಾನ್ ದೀಸ್ ಸಂಹಾರಾಚ್ಯಾ ಘಾಸಾಕ್ ವೆಚ್ಯಾ ಆಯ್ಚ್ಯಾ ಭುರ್ಗ್ಯಾಂಚಿ ಪರಿಗತ್ ವಿಶ್ಲೇಶಣ್ ಕರ್‍ಚಿ ಥೊಡಿ ಗರ್ಜ್ ಆಸಾ ತಶೆಂ ದಿಸ್ತಾ. ವಿಶಾಲ್ ಥರಾನ್, ಗೂಂಡ್ ಚಿಂತ್ಪಾನ್ ದೀಶ್ಟ್ ಭೊಂವ್ಡಾಯ್ಲ್ಯಾರ್ ನೆಣ್ತ್ಯಾ ಭುರ್ಗ್ಯಾಂಚ್ಯಾ ಸಂಹಾರಾಚ್ಯೊ ಶಿಂಕ್ಳಿಚ್ ದೊಳ್ಯಾಂಕ್ ಝಳ್ಕತಾತ್.

ಇಸ್ರೇಲ್-ಪ್ಯಾಲೆಸ್ತೀನಾಚ್ಯಾ ಝುಜಾಂತ್ ಬಲಿ ಜಾಲ್ಲಿಂ ಭುರ್ಗಿಂ

 ವಿಶ್ವ್‌ಸಂಸ್ಥ್ಯಾಚೊ ಜನರಲ್ ಸೆಕ್ರೆಟರಿ ಆಂಟೊನಿಯೊ ಗುಟೆರೆಸ್ “ಧರ್‍ತೆರ್ ಜರ್ ಯೆಮ್ಕೊಂಡ್ ಮ್ಹಳ್ಳೆಂ ಆಸಾ ತರ್ ತೆಂ ಗಾಜಾಂತ್ಲ್ಯಾ ಆಯ್ಚ್ಯಾ ಭುರ್ಗ್ಯಾಂಚೆಂ ಜಿವಿತ್” ಅಶೆಂ ಮ್ಹಣ್ತಾ. 2023ವ್ಯಾ ಇಸ್ರೇಲ್-ಹಮಾಸ್ ಝುಜಾಂತ್ ಹಮಾಸ್ ಪಂಗ್ಡಾನ್ 30 ವರ್ನಿ ಚಡ್ ಇಸ್ರೇಲಿ ಭುರ್ಗ್ಯಾಂಕ್ ಅಪಹರಣ್ ಕರ್‍ನ್, ಜಾಯ್ತ್ಯಾಂಚಿ ತಕ್ಲಿ ಕಾಪ್‌ಲ್ಲಿ ವರ್ದಿ ಆಸಾ. ಇಸ್ರೇಲ್ ಆನಿ ಪ್ಯಾಲೆಸ್ತಿನಾಚ್ಯಾ ಮದೆಂ ಜಾಯ್ತೆಪಾವ್ಟಿಂ ಎಕಾಮೆಕಾಚೆರ್ ದಾಢ್ ಜಾಲ್ಲಿ ತರೀ ಭುರ್ಗ್ಯಾಂಕ್‌ಚ್ ನಿಶಾನಿ ಕರ್‍ನ್ ಚಲ್‌ಲ್ಲಿ. ಪಯ್ಲಿ ಭೀಕರ್ ದಾಢ್ 1970 ಮೇಯಾಚ್ಯೆ 12 ತಾರಿಕೆರ್ ಜಾಲ್ಲಿ. ಹಿ ಜಾವ್ನಾಸಾ, ಆವೀವಿಮ್ ಶಾಳಾಚ್ಯಾ ಬಸ್ಸಾಂತ್ಲ್ಯಾ ಭುರ್ಗ್ಯಾಂಚೊ ಹತ್ತ್ಯಾಕಾಂಡ್. ಹಾಂತುಂ 9 ಭುರ್ಗಿಂ ಬಲಿ ಜಾವ್ನ್ 25 ಭುರ್ಗಿಂ ಘಾಯೆಲ್ಲಿಂ. ಅಂಕಿ-ಅಂಶಾಂಪ್ರಕಾರ್ ಇಸ್ರೇಲಾಚ್ಯಾ ವೆಸ್ಟ್‌ಬ್ಯಾಂಕ್ ಆನಿ ಗಾಜಾ ಪ್ರದೇಶಾಂತ್ 1987 ಥಾವ್ನ್ 2023 ಮದೆಂ ಸತ್ರಾ ವರ್‍ಸಾಂ ಸಕಯ್ಲ್ಯಾ 2621 ಭುರ್ಗ್ಯಾಂಚಿ ಹತ್ತ್ಯಾ ಜಾಲ್ಯಾ. 2023ವ್ಯಾ ನವೆಂಬರಾಚ್ಯೆ 1 ತಾರಿಕೆರ್ ವಿಶ್ವ್‌ಸಂಸ್ಥ್ಯಾಚ್ಯಾ ಭುರ್ಗ್ಯಾಂಚ್ಯಾ ಹಕ್ಕಾಂ ಸಮಿತಿನ್ ದಿಲ್ಲ್ಯಾ ಉಲ್ಲೇಖಾಪರ್ಮಾಣೆಂ 2023 ವ್ಯಾ ಅಕ್ಟೋಬರಾಚ್ಯೆ 7 ತಾರೀಕೆ ಹೆವ್ಶಿನ್ ಥಾವ್ನ್ ಗಾಜಾಂತ್ 3500 ಭುರ್ಗ್ಯಾಂಚಿ ಹತ್ತ್ಯಾ ಜಾಲ್ಯಾ. ಖಂಯ್ಚೆಂಚ್ ಪಾಪ್ ಆಧಾರಿನಾತ್‌ಲ್ಲ್ಯಾ ನಿರಾಪ್ರಾಧಿ ಬಾಳ್ಕಾಂನಿ ಸ್ವಾರ್ಥ್ ಸಾಧನಾಖಾತಿರ್ ಆಪ್ಲೊ ಜೀವ್ ಬಲಿ ಭೆಟಯ್ಲಾ.

ಪೋಶಕಾಂಥಾವ್ನ್ ಭುರ್ಗ್ಯಾಂಚಿ ಖುನ್: ಜಲ್ಮ್ ದಿಲ್ಲ್ಯಾ ಪೋಶಕಾಂಥಾವ್ನ್‌ಚ್ ಭುರ್ಗ್ಯಾಂಚಿ ಖುನಿ ಜಾಂವ್ಚೆಂ ಆಯ್ಚ್ಯೆ ಸಮಾಜೆಂತ್ ಮನ್ಶಾ ಮೌಲ್ಯಾಂಚ್ಯಾ ಬೊರ್ಗೊಳಾಕ್ ಏಕ್ ಸಾಕ್ಸ್. ಅಮೆರಿಕಾಂತ್ ಚಲ್‌ಲ್ಲ್ಯಾ ಎಕಾ ಸೊಧ್ ವಾವ್ರಾಚ್ಯಾ ಫಲಿತಾಂಶಾಪ್ರಕಾರ್, ಖುನಿಯೆ ಪ್ರಕರಾಣಾಂತ್ ಕಯ್ದ್ ಜಾಂವ್ಚ್ಯಾ ಪಯ್ಕಿಂತ್ ಸುಮಾರ್ 15% ಆಪ್ಲ್ಯಾಚ್ ಭುರ್ಗ್ಯಾಂಚ್ಯೆ ಖುನಿಯೆಕ್ ಸಂಬಂದಿತ್. ಹ್ಯಾ 15% ತ್ ಚಡುಣೆಂ 11% ಖುನಿಗಾರ್ ಸವತ್ ಪೋಶಕಾಂ ಜಾವ್ನ್ ಆಸ್ತಾತ್. ಆರ್ಥಿಕ್ ಥರಾನ್ ಮುಕಾರ್ ಪಾವ್‌ಲ್ಲ್ಯಾ ದೆಶಾಂಚಿ ಹಿ ಪರಿಗತ್ ತರ್ ಆಮ್ಚ್ಯಾ ತಸಲ್ಯಾ ಸಮಾಜಿಕ್ ಸಮಸ್ಸ್ಯಾಂನಿ ರೆವ್ಡೊನ್ ಆಸ್ಚ್ಯಾ ದೆಶಾಂಚಿ ಗತ್ ವಿಚಾರ್‍ಚೆಬರಿ ನಾ. ಹಾಂಗಾಸರ್ ಜಾಯ್ತಿಂ ಪ್ರಕರಣಾಂ ಉಗ್ತಾಡಾಕ್ ಯೇನಾಂತ್ ವಾ ಸಮಾಜಿಕ್ ರಿತಿ ರಿವಾಜಿಂಚಿ ಮಾನ್ಯತಾ ಘೆವ್ನ್, ಸಮಾಜಿಕ್ ಥರಾನ್ ಸ್ವೀಕೃತ್ ಜಾತಾತ್.

ಲಂಯ್ಗಿಕ್ ಅತ್ತ್ಯಾಚಾರಾಂತ್ ಮಾಡ್ತಿರ್ ಮರ್‍ಚಿಂ ಭುರ್ಗಿಂ

 ಆಜ್‌ಕಾಲ್ ಮನ್ಶಾಂಮದೆಂ ಲಂಯ್ಗಿಕ್ ತಾನ್ ಇತ್ಲಿ ಕ್ರೂರ್ ಜಾಂವ್ಕ್ ಪಾವ್ಲ್ಯಾಗೀ ಪಾಳ್ಣ್ಯಾಂತ್ಲ್ಯಾ ಬಾಳ್ಶಾಲಗಾಯ್ತ್ ಮಾಂದ್ರೆರ್ ಪಡ್‌ಲ್ಲ್ಯಾ ಪಾಯ್ವಂತಾಂ ಪರ್ಯಾಂತ್ ಹಾಕಾ ಬಲಿ ಜಾತಾತ್. ಆಮಿ ಚಿಂತ್‌ಲ್ಲ್ಯಾಚ್ಯಾಕೀ ಚಡ್ ಮಾಪಾನ್, ಚಿಂತುಂಕ್‌ಯೀ ಅಸಾಧ್ ಜಾಲ್ಲ್ಯೆ ರಿತಿನ್, ಭುರ್ಗ್ಯಾಂಚೆರ್ ಲಂಯ್ಗಿಕ್ ಅತ್ತ್ಯಾಚಾರ್ ಜಾತಾತ್ ಮ್ಹಣ್ಚಿ ಭಿರಾಂತೆಚಿ ಗಜಾಲ್ ವಾಚುಂಕ್ ಮೆಳ್ತಾತ್. ಎಕಾ ಅಧ್ಯಯನಾ ಪರ್ಮಾಣೆಂ ಧಾಂತ್ ಏಕ್ ಭುರ್ಗೆಂ ಆಪ್ಲ್ಯಾ ಅಟ್ರಾವ್ಯಾ ಜಲ್ಮಾ ದಿಸಾ ಪಯ್ಲೆಂ ಲಂಯ್ಗಿಕ್ ಅತ್ತ್ಯಾಚಾರಾಕ್ ವೊಳಗ್ ಜಾತಾ. ಫಕತ್ ವಿರುದ್ಧ್ ಲಿಂಗಾಚೆರ್ ಚಲೊನ್ ಆಸ್‌ಲ್ಲೊ ಹೊ ಜುಲುಮ್ ದೀಸ್ ವೆತಾಂ ವೆತಾಂ ಸಲಿಂಗಾಂಚೆರ್‌ಯೀ ಚಲೊಂಕ್ ಲಾಗ್ಲಾ. ಪ್ರಾಯೆನ್ ಲ್ಹಾನ್ ಆಸ್ಚ್ಯಾ ಭುರ್ಗ್ಯಾಂಚೆರ್ ಚಲ್ಚ್ಯಾ ಲಂಯ್ಗಿಕ್ ಜುಲುಮಾಂಪಯ್ಕಿ ಚಡ್ತ್ಯಾನ್ ಹೊ ಜುಲುಮ್ ಕುಟ್ಮಾದಾರಾಂಥಾವ್ನ್‌ಚ್ ಚಲ್ತಾ ಮ್ಹಣ್ಚೆಂ ಭೀಕರ್ ಸತ್. ತಶೆಂ ಜಾವ್ನ್ ಆಪ್ಲ್ಯಾಂಕ್‌ಚ್ ದುಬಾವಾಚ್ಯೆ ದಿಶ್ಟಿನ್ ಪಳೆಂವ್ಚೆ ದೀಸ್ ಆಮ್ಚೆ ಜಾಲ್ಯಾತ್. ಕುಟ್ಮಾಂ ವೆವಸ್ಥಾ ಭುರ್ಗ್ಯಾ ಬಾಳಾಂಕ್ ರಕ್ಶಣ್ ದಿತಾ ಮ್ಹಣ್ ಪಾತ್ಯೆಂವ್ಚೊ ಕಾಳ್ ಆಸ್‌ಲ್ಲೊ. ಆಜ್ ಜಾಯ್ತೆಕಡೆನ್ ಆವಯ್ ಆಪ್ಲ್ಯೆ ಧುವೆಕ್ ತಾಚ್ಯಾಚ್ ಬಾಪಯ್ ಬರಾಬರ್ ಸೊಡ್ನ್ ವಚೊಂಕ್ ಪಾಟಿಂ ಮುಕಾರ್ ಪಳೆಂವ್ಚೆ ದಾಖ್ಲೆ ಜಾಯ್ತೆ ಆಸಾತ್. ಆಮಿ ಆಪಾಯ್ ಫಕತ್ ಚೆಡುಂ ಭುರ್ಗ್ಯಾಂಕ್ ಮಾತ್ರ್ ಮ್ಹಣ್ ಲೆಕ್ತಾಂವ್ ತರ್, ತೆಂ ಏಕ್ ಚೂಕ್ ಚಿಂತಪ್. ಚೆಡುಂ ಭುರ್ಗೆಂ ಕಿತ್ಲೆಂ ಅಸುರಕ್ಶಿತ್ ತಿತ್ಲ್ಯಾಚ್ ಮಾಪಾನ್ ಚೆರ್ಕೆ ಭುರ್ಗೆಯ್ ಅಸುರಕ್ಶಿತ್ ಜಾವ್ನಾಸಾತ್ ಮ್ಹಣ್ಚಿ ಮಾರೆಕಾರ್ ಸಂಗತ್. ಜಾಯ್ತೆಪಾವ್ಟಿಂ ಲಂಯ್ಗಿಕ್ ಅತ್ತ್ಯಾಚಾರಾವರ್ವಿಂ ಪ್ರಾಣ್ ವಚನಾ ಆಸೊಂಕ್ ಪುರೊ, ತರೀ ತೆಂ ಭುರ್ಗೆಂ ಶಾಶ್ವತ್ ಜಾವ್ನ್ ತ್ಯಾ ಕರ್‍ನೆಚ್ಯೆ ದುಕಿಚಿ ಮಾವ್ ವ್ಹಾವೊವ್ನ್ ಘೆತಾ. ಜಾಯ್ತೆಪಾವ್ಟಿಂ ಮೌಲ್ಯಾಂ ಮರೊನ್ ಆಪ್ಣಾಕ್‌ಚ್ ವಿಕ್ರ್ಯಾಕ್ ದವರ್‌ಲ್ಲಿ ವಸ್ತ್ ಮ್ಹಣ್ ಸಮ್ಜೊನ್ ಘೆಂವ್ಕ್‌ಯೀ ಪಾವ್ತಾ.

ಭುರ್ಗಿಂ ಆನಿ ಮಾದಕ್ ದ್ರವ್ಯಾಂ

 ಮಾದಕ್ ದ್ರವ್ಯಾಂಚೆಂ ಜಾಳ್ ಬಳಾಧಿಕ್ ಜಾವ್ನ್ ಭುರ್ಗ್ಯಾಂಕ್ ತಾಂತುಂ ಶಿರ್ಕಾವ್ನ್ ಸಾಳಿಯಾಂರುಪಿಂ ಭುರ್ಗ್ಯಾಂಚೊ ಜೀವ್ ಚಿಂವೊನ್ ಲಗಡ್ ಕಾಡ್ತೆಚ್ ಆಸಾ.  ಮಾದಕ್ ದ್ರವ್ಯಾಂ ಸೆವ್ತಲ್ಯಾಂಪಯ್ಕಿ ಭುರ್ಗಿಂ ಆನಿ ಯುವಜಣಾಂಚ್ ಚಡ್ತ್ಯಾ ಸಂಖ್ಯಾನ್ ಆಸ್ಚೆಂ ಪಳೆಂವ್ಕ್ ದಿಸ್ತಾ. ಆಯ್ಲೆವಾರ್ ಎಕಾ ಎನ್.ಜಿ.ಒ.ನ್ ಚಲಯಿಲ್ಲ್ಯೆ ಸಮೀಕ್ಶೆಪ್ರಕಾರ್ ಮಾದಕ್ ದ್ರವ್ಯಾಂಚ್ಯಾ ವೆಸನಾವರ್ವಿಂ ಪಿಡೇಸ್ತ್ ಜಾಲ್ಲ್ಯಾಂಪಯ್ಕಿ ೬೩.೬% ಪಿಡೇಸ್ತ್, ಆಪ್ಲ್ಯಾ 15 ವರ್‍ಸಾಂಚ್ಯೆ ಪ್ರಾಯೆವರ್ನಿ ಪಯ್ಲೆಂ ಮಾದಕ್ ದ್ರವ್ಯಾಂಚ್ಯಾ ಸೇವನಾಕ್ ವೊಳಗ್ ಜಾಲ್ಲೆ ಆಸಾತ್. ಭುರ್ಗ್ಯಾಂಮದೆಂ ವಾಪ್ರಾಪಾರ್ ಆಸ್ಚೆಂ ವೈಟ್‌ನರ್, ಇಲೆಕ್ಟ್ರಿಕ್ ಸಿಗಾರ್ ಅಸಲ್ಯೊ ವಸ್ತು ತಾಂಕಾಂ ಮಾದಕ್ ದ್ರವ್ಯಾಂಚ್ಯಾ ಜಾಳಾಕ್ ವೊಡ್ತಾತ್, ತರ್ ಉಗ್ತ್ಯಾನ್ ವಾಪ್ರಾಪಾರ್ ಆಸ್ಚೆಂ ಧುಮ್ಟಿ (ತಂಬಾಕು) ಸೇವನ್ ಕಿತ್ಲೆಂ ಮಾರೆಕಾರ್ ಮ್ಹಣ್ಚಿ ಜಾಣ್ವಾಯ್ ತಾಂಚೆಥಂಯ್ ನಾ. ಹ್ಯಾ ಸವೆಂ ಭಯಾನಕ್ ಕೂಸ್ ಜಾವ್ನ್ ಆಸಾ ಮಾದಕ್ ದ್ರವ್ರಾಂ ಇಂಜೆPಕ್ಶನಾ ರುಪಾರ್ ತೊಪುನ್ ಘೆತಾನಾ, ಎಕ್‌ಚ್ ಸುವಿ ಜಾಯ್ತ್ಯಾಂನಿ ವಾಪಾರ್‍ಲಲ್ಯಾವರ್ವಿಂ ರಗ್ತಾಥಾವ್ನ್ ಪಾಚಾರ್‍ಚ್ಯೊ ಪಿಡಾ ಜಶೆಂ ಹೆಚ್.ಐ.ವಿ. ವೆಗಾನ್ ವಿಸ್ತಾರೊಂಕ್ ಸಕ್ಲ್ಯಾತ್.  ಆಯ್ಲೆವಾರ್ ಮಂಗ್ಳುರಾಂತ್‌ಚ್ ಭುರ್ಗ್ಯಾಂನಿ ಖಾಂವ್ಚ್ಯಾ ಚೊಕ್ಲೆಟಾಂನಿ ಮಾದಕ್ ದ್ರವ್ಯಾಂ ಭರ್‍ಸುನ್ ವಿಕ್ಚೊ ದಂದೊ ಉಗ್ತಾಡಾಕ್ ಆಯಿಲ್ಲೊ, ವಿಶ್ಲೇಶಣ್ ಕರ್‍ತಾನಾ, ಅಸಲ್ಯೆ ಕರ್‍ನೆಚೊ ಉದ್ದೇಶ್ ಕಿತೆಂ ತೆಂ ಸ್ಪಶ್ಟ್ ಕಳ್ತಾ. ಬೆಜಾರಾಯೆಚಿ ಆನ್ಯೇಕ್ ಕೂಸ್ ಮ್ಹಳ್ಯಾರ್ ಕುಟ್ಮಾಭಿತರ್ ಚಲ್ಚ್ಯಾ ಲಂಯ್ಗಿಕ್ ಅತ್ತ್ಯಾಚಾರಾಂತ್ ಚಡ್ತಾವ್ ಜಾವ್ನ್ ಮಾದಕ್ ದ್ರವ್ಯಾಂಚ್ಯಾ ಸೇವನಾವರ್ವಿಂ ಶಿಂತಿದ್ ಹೊಗ್ಡಾವ್ನ್ ಘೆಂವ್ಚೆಚ್ ಏಕ್ ಮುಕೇಲ್ ಕಾರಣ್ ಮ್ಹಣ್ ತನ್ಕೆವೆಳಾರ್ ಕಳಿತ್ ಜಾಲಾಂ.

ಮಾದ್ಯಮಾಂ ಆನಿ ಭುರ್ಗ್ಯಾಂಚೊ ಲಿಪ್ತೊ ಸಂಹಾರ್

ತಾಂತ್ರಿಕತಾ ಆಯ್ಚ್ಯಾ ದಿಸಾಚಿ ಗರ್ಜ್ ಆನಿ ಪೊಟಾಚೊ ಗ್ರಾಸ್ ಜಾಲ್ಯಾ ತೆಂ ಸತ್. ಮಾದ್ಯಮಾಂ ಆಮ್ಚ್ಯಾ ಘರಾಂನಿ ಆನಿ ಕುಟ್ಮಾಂನಿ ಇತ್ಲಿಂ ಬಳ್ ಜಾಂವ್ಕ್ ಪಾವ್ಯಾಂತ್ ಕೀ, ಮನ್ಶಾಸಂಬಂದ್ ಆನಿ ಮನ್ಶಾಮೊಲಾಂ ಹ್ಯಾ ಮಾದ್ಯಮಾಂನಿ ಗಿಳೊನ್ ಸೊಡ್ಲ್ಯಾಂತ್. ಆಧುನಿಕ್ ಚಿಂತಪ್ ಆನಿ ಆಧುನಿಕ್ ಜಿಣಿಯೆರೀತ್, ನಗರೀಕರಣ್ ಭುರ್ಗ್ಯಾಂಕ್ ಆಪ್ಲ್ಯಾ-ಪೆಲ್ಯಾಥಾವ್ನ್ ಪಯ್ಸ್ ಕರ್‍ನ್ ಘರಾಚ್ಯಾ ಚ್ಯಾರ್ ವೊಣ್ತಿಂಭಿತರ್ ಮಾದ್ಯಮಾಂಚ್ಯಾ ಪಾಸ್ಳೆಂತ್ ಧಲಯ್ತಾ. ಭುರ್ಗ್ಯಾಂಥಂಯ್ ಅಸಹಜ್ ಮೊಟಾಯ್ ಹಾಚೊ ಏಕ್ ವಾಯ್ಟ್ ಪರಿಣಾಮ್ ಜಾವ್ನಾಸಾ. ಆಮಾಲ್ ಸೆವನ್, ಮಾದಕ್ ದ್ರವ್ಯಾಂಚೆಂ ಸೆವನ್, ಧುವ್ರಾಪಾನ್, ಲಂಯ್ಗಿಕ್ ಸಡಿಲಾಯ್ ಅಸಲೆಂ ಸರ್ವ್ ಏಕ್ ಮನೋರಂಜನ್, ಉತ್ಸುಕತಾ ಆನಿ ಸಾದಿ ಗಜಾಲ್ ಮ್ಹಣ್ಚೆಂ ಭಾವನ್ ಭುರ್ಗ್ಯಾಂಥಂಯ್ ಸಮಾಜಿಕ್ ಮಾದ್ಯಮಾಂನಿ ಒಂಪುನ್ ಜಾಲಾಂ. ಕ್ರೌರ್ಯ್ ಜಾವ್ನಾಸಾ, ಆಪ್ಣಾಚೆಂ ಬಳ್ ದಾಕೊಂವ್ಕ್, ಆಪ್ಣಾಕ್ ಆಪ್ಲ್ಯಾಂಥಂಯ್ ಆಸ್ಚಿ ಕಾಳ್ಜಿ ದಾಕೊಂವ್ಕ್ ಆನಿ ಚಲ್ಯಾಂಕ್ ಆಪ್ಣೆಂ ಆಶೆಂವ್ಚ್ಯೆ ಚಲಿಯೆಕ್ ಪ್ರಭಾವಿತ್ ಕರುಂಕ್ ಏಕ್ ಮಾತ್ರ್ ವಾಟ್ ಮ್ಹಳ್ಳೊ ವಾಂಕ್ಡೊ ಸಂದೇಶ್ ಭುರ್ಗ್ಯಾಂಕ್ ಪಾವಯ್ಲಾ. ತಡವ್ ರಾತ್ ಪರ್ಯಾಂತ್ ಮಾದ್ಯಮಾಂನಿ ವೆಸ್ತ್ ಆಸ್ಚೆಂ, ವೇಳ್ ಚುಕೊನ್ ನಿದ್ಚೆಂ ಹೆಂ ಸರ್ವ್ ನೆಣ್ತ್ಯಾಂಚ್ಯೆ ಮಾನಸಿಕ್ ಭಲಾಯ್ಕೆಚೆರ್ ಪ್ರಭಾವ್ ಘಾಲುಂಕ್ ಪಾವ್ಲಾಂ. ಬಾಳ್ಶ್ಯಾಂಕ್ ಮೀತ್ ಮಿರ್‍ವೊನ್ ಮೊಬಾಯ್ಲ್, ಟಿ,ವಿ. ಮುಕಾರ್ ಸೊಡ್‌ಲ್ಲೆವರ್ವಿಂ ತಾಂಚೆಥಂಯ್ ಆಟಿಸಮ್ ತಸಲೆ ಮಾನಸಿಕ್ ಊಣ್ ಉಬ್ಜೊಂಕ್ ಕಾರಣ್ ಜಾಲಾಂ. ಮಾದ್ಯಮಾಂನಿ ಯೆಂವ್ಚಿಂ ಜಾಯ್ರಾತಾಂ ಭುರ್ಗ್ಯಾಂಚಿ ವಾಟ್ ಚುಕಯ್ತಾತ್. ಮಾಸೂಮ್ ಮತಿ ಸತ್ ಗಜಾಲ್ ಆನಿ ಜಾಯ್ರಾತಾಂತ್ಲ್ಯೆ ಪಿಂತ್ರಾವ್ಣೆಮದ್ಲೊ ತಫಾವತ್ ಸಮ್ಜೊನ್ ಘೆಂವ್ಕ್ ಸಕನಾಂತ್. ಭುರ್ಗ್ಯಾಂನಿ ಖೆಳ್ಚ್ಯಾ ಒನ್‌ಲಾಯ್ನ್ ಗೆಮ್ಸಾಂವರ್ವಿಂ ಮೆಳ್ಚೆ ಟಾಸ್ಕ್, ತಾಂಚ್ಯಾ ಜಿವಾಚೆಂ ಆನಿ ಹೆರಾಂಚ್ಯಾ ಜಿವಾಚೆಂ ಮೋಲ್ ವಿಸ್ರಾಯ್ತಾತ್. ಮಾದ್ಯಮಾಂನಿ ಚಲ್ಚೊ ಸಟ್ಟೊ ಭುರ್ಗ್ಯಾಂಕ್ ಪಯ್ಶಾಂಖಾತಿರ್ ಜಾಯ್ತಿಂ ಕಾನೂನ್‌ಬಾಹಿರ್ ಕೃತ್ತ್ಯಾಂ ಕರುಂಕ್ ಪ್ರಚೋದನ್ ದಿತಾತ್. ರಿಯಾಲಿಟಿ ಶೋ ಮ್ಹಣ್ಚೆಂ ವಂಚನ್ ಭುರ್ಗ್ಯಾಂಚೆಂ ಭುರ್ಗೆಂಪಣ್ ಪೊಕೊರ್‍ತಾ. ಮಾದ್ಯಮಾಂನಿ ಕಸಲಿಚ್ ಬಂದಡ್ ನಾಸ್ತಾಂ ರಿಗೊನ್ ಬಸ್‌ಲ್ಲಿಂ ವೈರಸಾಂ, ತಾಂಕಾಂ ತಾಂಚ್ಯೆ ಪ್ರಾಯೆಕ್ ಮಿಕ್ವಲ್ಲ್ಯಾ ಸಂಗ್ತಿಂಚೊ ಸಂಸಾರ್ ಉಗ್ತೊ ಕರ್‍ನ್ ದಾಕಯ್ತಾ. ಅಶೆಂ ಭುರ್ಗ್ಯಾಚ್ಯಾ ಮಾಸೂಮ್ ಮತಿಚೆರ್ ಹಿಂ ವೈರಸ್ ಸಾಯ್ಟಾಂ ಆಕ್ರಮಣ್ ಕರ್‍ನ್, ಆಪ್ಲ್ಯಾ ತಶೆಂಚ್ ಹೆರಾಂಚ್ಯಾ ಕುಡಿಂಚ್ಯಾ ಪವಿತ್ರ್‌ಪಣಾಕ್ ಗೌಣ್ ಕರ್‍ತಾತ್. 

ಆಧುನೀಕರಣ್ ಆನಿ ಭುರ್ಗಿಂ

 ಆಧುನೀಕರಣಾಚ್ಯಾ ವ್ಹಾಳ್ಯಾಂತ್ ಆಮ್ಚಿಂ ಚಿಂತ್ನಾಂ ಆನಿ ಕರ್‍ನ್ಯೊ ವ್ಹಾಳೊನ್ ಆಸಾತ್ ತೆಂ ನೆಗಾರುಂಕ್ ಜಾಯ್ನಾತ್ಲಲೆಂ ಸತ್. ಶಿಕಪ್, ಲಿಸಾಂವ್, ಸಂವಾದ್, ಆನಿ ಸಾಮಾಜಿಕ್ ಸಂಬಂದ್ ಬದ್ಲೊನ್ ಗೆಲ್ಯಾತ್. ಆಧುನೀಕರಣಾಚ್ಯೆ ದಾವ್ಲೆಕ್ ಶಿರ್ಕಲ್ಲ್ಯಾಂಪಯ್ಕಿ ಪ್ರೌಢಾವಸ್ತೆರ್ ಆಸ್ಚಿಂ ಭುರ್ಗಿಂ ಚಡ್ತ್ಯಾವ್ ಪ್ರಭಾವಿತ್ ಜಾತಾತ್. ತ್ಯಾ ಪ್ರಾಯೆಚ್ಯಾಂನಿ ಚಡಿತ್ ಖಾಯ್ಸ್ ಕರ್‍ಚೆಂ ಇಲೆಕ್ಟ್ರೋನಿಕ್ ಮನೋರಂಜನ್ ಆನಿ ಒನ್‌ಲಾಯ್ನ್ ಶಿಕಪ್. ತಾಂಕಾಂ ಸಮಾಜಿಚ್ಯಾ ಮುಕೇಲ್ ಆಂಗ್ಣಾಥಾವ್ನ್ ಪಯ್ಸ್‌ಚ್ ದವರ್‍ತಾ. ಹ್ಯಾ ವರ್ವಿಂ ಒತ್ತಡ್ ನಿಭಾವನ್, ಭೊಗ್ಣಾಂಚೆರ್ ನಿಯಂತ್ರಣ್, ವೊಡ್ಣ್ಯಾಂಚೆರ್ ಬಂದಡ್, ಅಸಲ್ಯೊ ಸಂಕೀರ್ಣ್ ಗಜಾಲಿ ಸಾಂಬಾಳುಂಕ್ ಅಸಾಧ್ ಜಾವ್ನ್ ಸಮಾಜ್ ಘಾತ್ಕಿ ಚಾಲ್, ಜೀವ್‌ಘಾತ್, ಮಾನಸಿಕ್ ಅಸ್ವಸ್ಥತಾ ಅಸಲೆ ವಾಂದೆ ಭುರ್ಗ್ಯಾಂಕ್ ಗ್ರಾಸುಂಕ್ ಲಾಗ್ಲ್ಯಾತ್.

ಪರತ್ ಆಮಿ ಹೆರೊದಿಚ್ಯಾ ಕಾಳಾಚೆಂ ಬಾಳ್ಕಾಂಚೆಂ ಸಂಹಾರ್ ಪಳೆಂವ್ ತರ್, ಎಕಾ ವೆಕ್ತಿಚ್ಯಾ ಅಸ್ತಿತ್ವಾಚ್ಯಾ ಸವಾಲಾಚೆರ್ ಬಾಳ್ಕಾಂಚಿ ಬಲಿ ಚಡ್ಲಿ. ಆಜ್ ಆವಯ್-ಬಾಪಯ್, ಸಮಾಜ್, ಸತ್ತಾ, ವೆವಸ್ಥಾ ಹಿಂ ಸರ್ವಾಂ ಹೆರೊದಿಚ್ಯಾ ಜಾಗ್ಯಾರ್ ರಾವೊನ್ ಬಾಳ್ಕಾಂಚೊ ಸಂಹಾರ್ ಕರ್‍ತೇ ಆಸಾತ್. ಪುಣ್ ವಿಪರ್ಯಾಸ್ ಮ್ಹಳ್ಯಾರ್ ಹೆರೊದಿನ್ ಸ್ವಖುಶೆನ್ ಆನಿ ರಾಯಾಳ್ ಹುಕ್ಮೆನ್ ಹ್ಯಾ ಬಾಳ್ಕಾಂಚೊ ಸಂಹಾರ್ ಕೆಲೊ ತರ್, ಆಧುನಿಕ್ ಹೆರೊದಿಂಕ್ ಆಪ್ಲ್ಯಾ ಹಾತಾಂನಿ ಜಾಂವ್ಚ್ಯಾ ಬಾಳ್ಕಾಂಚ್ಯಾ ಆನಿ ಭುರ್ಗ್ಯಾಂಚ್ಯಾ ಸಂಹಾರಾಚೆಂ ಗಿನ್ಯಾನ್ ಜಾಂವ್, ಕನಿಶ್ಟ್ ಸಮ್ಜಣಿ ಜಾಂವ್, ತ್ಯಾ ವಿಶಿಂ ಖಂತ್ ಹುಸ್ಕೊ ಜಾಂವ್ ನಾ. ತಶೆಂಚ್ ಸಮಾಜೆಮುಕಾರ್ ತೆ ಖಂಯ್ಚ್ಯೆಚ್ ರಿತಿನ್ ಗುನ್ಯಾಂವ್‌ಕಾರ್ ಜಾವ್ನ್ ರಾವನಾಂತ್ ವಾ ತಾಂಚೊ ಗುನ್ಯಾಂವ್ ರುಜು ಕರುಂಕ್ ಸಾಧ್ ನಾಸ್‌ಲ್ಲ್ಯಾನ್, ಕಾನೂನಾನ್ ತಾಂಕಾಂ ಗುನ್ಯಾಂವ್‌ಕಾರ್ ಮಾಂದುಂಕ್ ಜಾಯ್ನಾ. ಹಾಚೊ ಫಳ್ ಜಾವ್ನ್, ಜೀವ್ ಹೊಗ್ಡಾಯ್ನಾತ್ಲ್ಯಾರೀ, ಸಂಸ್ಕಾರ್ ಹೊಗ್ಡಾಯಿಲ್ಲಿಂ, ಮೌಲ್ಯಾಂಕ್ ಚಿಲ್ಲುನ್ ಉಡೊಂವ್ಚಿಂ, ಪೆಲ್ಯಾಚ್ಯೆ ದುಕಿಂತ್ ಆಪ್ಲಿ ಜೀಕ್ ದೆಕ್ಚಿಂ ಜನಾಂಗಾಂ ವಾಡೊನ್ ಯೇವ್ನ್ ಆಸಾತ್. ಚಡೊನ್ ಯೆಂವ್ಚಿ ಹಿಂಸಾ, ತಾಂಕಾಂ ಪ್ರಚೋದನ್ ದಿಂವ್ಚಿಂ ಸಂಘಟನಾಂ, ಹೆರಾಂಕ್ ಲಗಡ್ ಕಾಡ್ಚೆಖಾತಿರ್‌ಚ್ ಆಪ್ಣಾಚೊ ಜೀವ್ ಸಯ್ತ್ ಅರ್ಪುಂಕ್ ತಯಾರ್ ಆಸ್ಚೆ ಸೂಯಿಸೈಡ್ ಬಾಂಬರ್, ಸ್ಲೀಪರ್ ಸೆಲ್ಲ್ಸ್ ಹೆಂ ಸರ್ವ್ ದೆಕ್ತಾನಾ, ದೆವಾನ್ ‘ಆನಿ ಮುಕಾರ್ ಉಜ್ಯಾಚೊ ಪಾವ್ಸ್ ಧಾಡ್ನ್ ಆಪುಣ್ ಸಂಸಾರ್ ನಾಸ್ ಕರಿಸೊನಾ’ ಮ್ಹಣ್ ಕೆಲ್ಲಿ ಭಾಸಾವ್ಣಿ ಫಟ್ ಕರ್‍ನ್, ಮನಿಸ್ ಆಪುಣ್‌ಚ್ ಸಂಸಾರಾಚೆರ್ ಉಜ್ಯಾಚೊ ಪಾವ್ಸ್ ವೊತುನ್, ದೆವಾಕ್ ಅಬಲ್ ಆನಿ ಫಟ್ಕಿರೊ ಸಾಭಿತ್ ಕರ್‍ಚಿ ಭಿರಾಂತ್ ಧೊಸ್ತಾ ನ್ಹಯ್‌ಗಿ? ಅಸಲೆ ದೀಸ್ ಖರ್‍ಯಾನ್ ಯೆಂವ್ಚ್ಯಾ ಪಯ್ಲೆಂ, ಜಶೆಂ ಜುಜೆ ಆನಿ ಮರಿಯೆಚ್ಯಾ ಉದೆಶಿಂ, ಹೆರೊದಿಚ್ಯಾ ಸಂಹಾರಾಂತ್ಲಿ ಜೆಜುಚಿ ರಾಕಣ್ ಜಾಲಿ, ತಶೆಂಚ್ ಘಾತ್ಕಿ ಸಂಸಾರಾಚ್ಯಾ ಫಟೊವ್ಣೆಥಾವ್ನ್, ದುಡು ಆನಿ ಯಶಸ್ವೆಪಾಟ್ಲ್ಯಾ ಧಾಂವ್ಣೆಥಾವ್ನ್ ಥೊಡೆಂ ಪುಣೀ ಭಾಯ್ರ್ ಯೇವ್ನ್, ಮಾನಸಿಕ್ ಆನಿ ದೈಹಿಕ್ ಸಂಹಾರಾಥಾವ್ನ್ ಆಮ್ಚ್ಯಾಮ್ಚ್ಯಾ ಬಾಳ್ಕಾಂಚಿ ರಾಕಣ್ ಆಮ್ಚೆಥಾವ್ನ್‌ಯೀ ಜಾಂವ್!

✍️ –ಲವಿ ಗಂಜಿಮಠ