‘ಐಡಿಯಲ್ ಕಪಲ್’ ಅವಾರ್ಡ್ ಲಾಬ್ಲಾಂ ಮ್ಹಣ್ ಖಬರ್ ಆಯಿಲ್ಲಿಚ್ಚ್ ಹ್ಯಾರಿ ಅನಿ ಮೇರಿಚ್ಯಾ ಸಂತೊಸಾಕ್ ಗಡ್‌ಚ್ ನಾಸ್ಲಿ. ಸಂದರ್ಶನ್ ಕಾಣ್ಘೆಂವ್ಕ್ ‘ಆವ್ತಾರ್ ಆಲ್ವಿ’ ಯೆತಾ ಮ್ಹಣ್ ಸಕಾಳಿಂ ಫುಡೆಂ ಸಗ್ಳೆಂ ಘರ್ ನಿತಳ್ ಕೆಲೆಂ ತರೀ ಕುಜ್ನಾಂತ್ ಘುಸ್‌ಲ್ಯಾ ಜರ್ಲ್ಯಾಕ್ ಭಾಯ್ರ್ ಧಾಂವ್ಡಾಂವ್ಕ್ ಪ್ರಯತ್ನ್ ಕರ್‍ನ್ ಮಾತ್ರ್ ತಿಂ ಥಕ್‌ಲ್ಲಿಂ! “ಅಳೆ ಧಾಂವ್ಲೊ.. ಥಂಯ್ ಗೆಲೊ ಇಸ್ತಾ.. ಆಯ್ಯೋ ಹಾಂಗಾಚ್ ಆಸಾ ಸಾಯ್ಬಾ!” ಮ್ಹಣ್ ಮೇರಿ ಹೆಣೆಂ ತೆಣೆಂ ಉಡ್ಕಾಣಾಂ ಘಾಲ್ತಾನಾ ಮಿಸ್ತೆರ್ ಸಮ್ಜನಾಸ್ತಾಂ ಹ್ಯಾರಿ ಘಾಬಾರ್‍ಲೊ.

“ಕಿತೆಂ ಜಾಲೆಂ ತೆಂ ಸಾಂಗ್ ಸಾಯ್ಬಿಣಿ… ಕೋಣ್ ಆಯ್ಲೊ? ಖಂಯ್ ಗೆಲೊ?” ಮ್ಹಣ್ ಘಡ್ಬಡೊನ್ ಹ್ಯಾರಿ ವಿಚಾರಿ, “ಜರ್ಲೊ ಸಾಯ್ಬಾ ಜರ್ಲೊ! ಹಾಂವೆಂ ತಾಕಾ ಧರ್‍ಲೊ” ಮ್ಹಣ್ ದಾಕಯ್ತಾನಾ ಸಾರೊಣೆಂತ್ ಲಿಪೊನ್ ರಾವ್‌ಲ್ಲೊ ಜರ್ಲೊ ರಪಕ್ಕ ಹ್ಯಾರಿಚ್ಯಾ ಆಂಗಾರ್ ಉಡೊನ್ ಖಾಂದಾರ್ ಬಸ್‌ಲ್ಲೊ ಪಳೆವ್ನ್ ಮೇರಿನ್ ಸಾರೊಣೆಂತ್ ‘ರಪ್’ ಕರ್‍ನ್ ಮಾರುಂಕ್‌ಯೀ ಹ್ಯಾರಿನ್ ಜರ್ಲೊ ಪಾಪ್ಡುಂಕ್ ಉಕಲ್ಲಲೊ ಉಜ್ವೊ ಹಾತ್ ‘ಟಪ್’ ಕರ್‍ನ್ ಮೇರಿಚ್ಯಾ ಕಾನ್ಪಾಟ್ಯಾರ್ ಬಸೊಂಕ್‌ಯೀ ಸಮಾ ಜಾಲ್ಲೆಂ! ಆನಿ ತಾಚ್ಯಾ ದಾವ್ಯಾ ಹಾತಾಂತ್ಲೊ ಸ್ಟೀಲಾಚೊ ಚೆಂಬು ವಯ್ರ್ ಉಸ್ಳೊನ್ ಸಕ್ಲಾ ಪಡೊಂಕ್‌ಯೀ, ತಿತ್ಲ್ಯಾರ್ ತಾಂಚೆಂ ಸಂದರ್ಶನ್ ಘೆಂವ್ಕ್ ಆಂಕರ್ ಆಲ್ವಿ ಆಂಗ್ಣಾಕ್ ಪಾವೊಂಕ್‌ಯೀ ಸಮಾ ಜಾಲ್ಲೆಂ!

ಹಿಂ ‘ಗಂಡು-ಹೆಣ್ಣು’ ಎಕಾಮೆಕಾ ಮಾರ್‍ನ್ ಕಾಣ್ಘೆವ್ನ್ ದುಕಿನ್ ನೆಕೆತ್ರಾಂ ಮೆಜ್ತಾನಾ ಹೆಂ ‘ಐಡಿಯಲ್ ಫೈಟ್’ ಪಳಯಿಲ್ಲೊ ಜರ್ಲೊ ಮಾತ್ರ್ ‘ಕಾಣದಂತೆ ಮಾಯ’ ಜಾಲ್ಲೊ! ಪುಣ್ ಚೆಂಬು ಮಾತ್ರ್ ನಿಶಾನಿ ಚುಕನಾಸ್ತಾಂ ಆಲ್ವಿಚ್ಯಾ ಕಪಲಾಕ್ ಆಪ್ಟೊನ್ ಸ್ವಾಗತ್ ಕರ್‍ನ್‌ಚ್ ಧರ್‍ಣಿಕ್ ಪಾವ್ಲೊ! ಚೆಂಬು ಆಪ್ಟೊನ್ ಧುಂಕುಟಾಚೆಂ ‘ತಿಲಕ್’ ಆಯಿಲ್ಲೆಂ ಪಳೆವ್ನ್ ಜರ್ಲ್ಯಾಚ್ಯಾ ರಗ್ಳ್ಯಾಂಚೆಂ ‘ಝಲಕ್’ ವಿಸ್ರೊನ್ ತಿಂ ದೊಗಾಂಯ್ ಕ್ರಿಯಾಳ್ ಜಾಲಿಂ. ಆಂಕರ್ ಆಲ್ವಿ ಬೊವ್ ಹುಶಾರ್. ಕಪಲಾರ್ ಧುಂಕುಟ್ ಆಯ್ಲ್ಯಾರೀ ದಾವ್ಯಾ ಹಾತಾಂತ್ ಪುಸಿತ್ತ್ ಸಕ್ಲಾ ಪಡ್‌ಲ್ಲೊ ಚೆಂಬು ವಿಂಚುನ್ ತಾಂಚ್ಯಾ ಹಾತಾಂತ್ ದೀವ್ನ್ ತಾಣೆಂಚ್ ಉತ್ರಾಂ ವಿಂಚ್ಲಿಂ…

“ಹಾಂವ್ ಆಲ್ವಿ. ತುಮ್ಚೆಂ ಸಂದರ್ಶನ್ ಘೆಂವ್ಕ್ ಆಯ್ಲಾಂ. ತುಮ್ಚ್ಯಾ ಸ್ವಾಗತಾಚೊ ಚೆಂಬು ಪಾವ್ಲೊ ಮ್ಹಣ್ತಾತ್‌ಗಾ” ಮ್ಹಣತ್ತ್ ತಾಂಕಾಂ ಪಳೆವ್ನ್ ಹಾಸ್ಲೊ.

ಘಡ್‌ಲ್ಲೆಂ ಸಗ್ಳೆಂ ಪಳೆವ್ನ್ ಕಾಲುಬುಲು ಜಾಲ್ಲೊ ಹ್ಯಾರಿ ವೆವೆಗ್ಗಿಂ ಚೂಕ್ ಮಾಗಲಾಗ್ಲೊ. ಪುಣ್ ಆಲ್ವಿನ್ ತೆಂ ಗಣ್ಣೆಂ ಕರಿನಾಸ್ತಾಂ, ”ಕಾಂಯ್ ಬೆಜಾರಾಯ್ ಕರಿನಾಕಾತ್. ಆತಾಂ ಮ್ಹಜಿ ಸವಾಲಾಂಚಿ ಪೊಟ್ಲಿ ತುಮ್ಚೆಮುಕಾರ್ ಸೊಡೊಂವ್ಕ್ ಸಂತೊಸ್ತಾಂ. ಜಾಪ್ ದಿತಾತ್ ಮ್ಹಣ್ ಭರ್ವಸ್ತಾಂ” ಮ್ಹಣಾಲೊ.

ತಾಕಾ ಉಲೊಂಕ್ ಆವ್ಕಾಸ್ ದೀನಾಸ್ತಾಂ ಮೇರಿ, “ಹೋ ಆವ್ತಾರ್ ಆಲ್ವಿ… ತುಜೆ ಆವ್ತಾರ್ ಪಳೆವ್ನ್ ಖುಶಿ ಜಾಲಿ. ಎಕೇಕ್ ಪಾವ್ಟಿಂ ಗುಂಗುರ್ ಕೇಸ್, ಥೊಡೆಪಾವ್ಟಿಂ ಹಿಪ್ಪಿ ಕೇಸ್, ಎಕೇಕ್ ಪಾವ್ಟಿಂ ಲಾಂಬ್ ಕೇಸ್ ಸೊಡ್ನ್ ಆವ್ತಾರ್ ಕರ್‍ತಾಯ್ ನ್ಹಯ್‌ಗೀ? ಕಿತೆಂಯ್ ಜಾಂವ್ ತೆಂ ಬೊಕ್ಡೆಚೆಂ ಖಾಡ್ ತುಜ್ಯಾ ಆವ್ತಾರಾಂಕ್ ಏಕ್ ಥಿಕ್ ಮ್ಹಣ್ಯೆತಾ… ವ್ಹಡ್ ನ್ಹಯ್. ತುಂ ತುಜಿ ಪೊಟ್ಲಿ ಸೊಡಯ್. ತುಕಾ ಆಮ್ಚೊ ಸಂಪೂರ್ಣ್ ಸಹಕಾರ್ ಅಸಾ” ಮ್ಹಣ್ ಮಹಾನ್ ರಾಜಕಾರಣಿಬರಿ ಬಿಲ್ಡಪ್ ದೀಲಾಗ್ಲೆಂ.

ತೆಂ ಆಯ್ಕೊನ್, ಆನಿ ಸೊಡ್ಲ್ಯಾರ್ ಆಪ್ಣಾನ್ ಸಂದರ್ಶನ್ ಕರ್‍ಚೆಫುಡೆಂ ಆಪ್ಣಾಚೆಂ ಸಂದರ್ಶನ್ ಕರ್‍ತಿತ್ ಮ್ಹಣ್ ಸಮ್ಜಲ್ಲೊ ಆಲ್ವಿ “ದೇವ್ ಬರೆಂ ಕರುಂ ಮೇರಿ ಬಾಯೆ, ಮ್ಹಜಿ ಒಳೊಕ್ ಮ್ಹಾಕಾಚ್ ಕರ್‍ನ್ ದಿಲ್ಲ್ಯಾಕ್! ಹ್ಯಾ ವರ್‍ಸಾಚ್ಯಾ ‘ಐಡಿಯಲ್ ಕಪಲ್’ ಸ್ಪರ್ಧ್ಯಾಂತ್ ತುಮಿ ಜಿಕ್ಲ್ಯಾತ್ ದೆಕುನ್ ತುಮ್ಕಾಂ ಅಭಿನಂದನ್. ಪಯ್ಲೆಂ ಮ್ಹಾಕಾ ಸಾಂಗಾ, ತುಮ್ಚೆಂ ಲವ್ ಮ್ಯಾರೇಜ್‌ಗೀ ವಾ ಎರೇಂಜ್ಡ್ ಮ್ಯಾರೇಜ್?” ಶೀದಾ ಸವಾಲ್ ಕರಿಲಾಗ್ಲೊ.

ಆಪ್ಲ್ಯಾ ಮೊಗಾವಿಶಿಂ ಉಲಯ್ತಾನಾ ತಿಂ ಸುಡ್ಸುಡಿತ್ ಜಾಲಿಂ. “ಆಮ್ಚೆಂ ಲವ್ ಮ್ಯಾರೇಜ್‌ಚ್. ಕಾಜಾರ್ ಜಾವ್ನ್ ಬಾರಾ ವರ್‍ಸಾಂ ಜಾಲಿಂ” ಜಾಪ್ ದಿಲಿ ಮೇರಿನ್.

ಆಲ್ವಿನಾಕ್ ಪೋಂಯ್ಟ್ ಮೆಳ್ಳೊ ಉಲೊಂಕ್! “ಆತಾಂಚಿಂ ಲವ್ ಮ್ಯಾರೇಜ್ ಸಯ್ತ್ ಚಡಿತ್ ಕಾಳ್ ಬಾಳ್ವನಾಂತ್ ಮ್ಹಣ್ತಾತ್. ತುಮಿ ಕಶೆಂ ಸಾಂಗಾತಾ ಸಂತೊಸಾನ್ ಆಸಾತ್?” ಮ್ಹಣ್ ವಿಚಾರಿ, “ಕಶೆಂ ಮ್ಹಳ್ಯಾರ್? ಆಮಿ ಸುಖಾಂತ್ ತಶೆಂ ದುಕಾಂತ್, ಪಿಡೆಂತ್ ತಶೆಂ ಭಲಾಯ್ಕೆಂತ್ ಎಕಾಮೆಕಾಚೊ ಮೋಗ್ ಕರ್‍ತಾಂವ್” ಜಾಪ್ ದಿಲಿ ಹ್ಯಾರಿನ್.

“ತೆಂ ಸರ್ವ್ ಜೊಡಿಂ ಕರ್‍ತಾತ್. ತುಮ್ಚೆಂ ಕಿತೆಂ ಸ್ಪೆಶಲ್?” ಸವಾಲ್ ಆಲ್ವಿಚೆಂ.

“ಸುಖಾಂತ್ ಆಸ್ತಾನಾ ಸಾಂಬಾಳ್ ಶೀದಾ ಮೇರಿಚ್ಯಾ ಹಾತಾಂತ್ ದಿತಾಂ. (ನಾ ತರ್ ಸುಖಾನ್ ಜಿಯೆಂವ್ಕ್ ಜಾಯ್ತ್‌ಗೀ ಕೋಣ್ ಜಾಣಾ!) ಹೆರಾಂಚಿಂ ಸೊಭಿತ್ ಕಾಪ್ಡಾಂ, ಭಾಂಗಾರ್ ಪಳೆವ್ನ್ ಮೇರಿಕ್ ಪೊಟ್ಕಾಣಿ ಸುರು ಜಾತಾನಾ ಭಾಂಗಾರಾಚೆಂ ಕಿತೆಂ ತರೀ ಹಾಡ್ನ್ ದೀವ್ನ್ ದೂಕ್ ಥಾಂಬಯ್ತಾಂ (ಗುಳಿಯಾಂನಿ ಕರಿನಾಸ್ಲೆಂ ಭಾಂಗಾರ್ ಕರ್‍ತಾ!)” ತೊ ರಾವ್ಲೊ.

“ಆನಿ ಆಮಿ ವಾಕಿಂಗ್, ಮಾರ್ಕೆಟಿಂಗ್, ಶೊಪಿಂಗ್ ದೊಗಾಂಯ್ ಮೆಳೊನ್ ಕರ್‍ಚೆಂ. ತಾಕಾ ದೂಕ್ ಭೊಗ್ಲ್ಯಾರ್ ಹಾಂವೆಂ ತಾಕಾ ತಾಣೆಂ ಮ್ಹಾಕಾ ಭುಜಾವಣ್ ದಿಂವ್ಚಿ” ಮೇರಿನ್ ಪೊಣ್ಣ್ ಘಾಲೆಂ.

“ಆನಿ ಪಿಡೆಂತ್ ತಶೆಂ ಭಲಾಯ್ಕೆಂತ್?” ಮ್ಹಳ್ಳ್ಯಾ ಆಲ್ವಿಚ್ಯಾ ಸವಾಲಾಕ್ “ತಾಕಾ ಶೆಳ್ ಜಾಲ್ಯಾರ್ ಮ್ಹಾಕಾಯ್ ಶೆಳ್, ತಾಪ್, ಕೊಂಕ್ಲಿ ಆಸ್ತಾಚ್. ಬಿ.ಪಿ. ಶುಗರ್ ದೊಗಾಂಯ್ಕಿ ಆಸಾ. ತಿತ್ಲೆಂಚ್ ನ್ಹಯ್, ಆಯ್ಲೆವಾರ್ ದೊಗಾಂಯ್ಕಿ ಕಿಡ್ನಿ ಸ್ಟೋನ್ ದೂಕ್ ಸಾಂಗಾತಾ ಸೊಸುನ್ ಉಪ್ರಾಂತ್ ತೆ ಕ್ರಶ್ ಕರ್‍ನ್ ಸಾಂಗಾತಾ ಡಿಸ್ಚಾರ್ಜ್ ಜಾಲ್ಲ್ಯಾಂವ್. ಭಲಾಯ್ಕೆಂತ್ ಆಸ್ತಾನಾ ರಗ್ತಾದಾನ್ ಕೆಲಾಂ. ಐಸ್‌ಕ್ರೀಮ್ ಸಾಂಗಾತಾ ಖೆಲಾಂ… ಕಿರಾತ್ಯಾಚೊ ಕೊಡು ಕಸಾಯ್ ಸಯ್ತ್ ಎಕಾಚ್ ಗ್ಲಾಸಾಂತ್ ವೊತುನ್ ಸ್ಟ್ರಾ ಮುಕಾಂತ್ರ್ ಪಿಯೆಲ್ಯಾಂವ್” ಮ್ಹಣ್ ವಿವರಣ್ ದಿಲೆಂ ಹ್ಯಾರಿನ್.

ಆಲ್ವಿಕ್ ಹೆಂ ಆಯ್ಕೊನ್ ಖುಶಿ ಜಾಲಿ ಆನಿ “ವ್ಹಾವ್ ತುಮಿ ಗ್ರೇಟ್. ಆತಾಂಚ್ಯಾ ಜೊಡ್ಯಾಂಕ್ ವೀಕೆಂಡ್ ಸಯ್ತ್ ಸಾಂಗಾತ್ ದೀಂವ್ಕ್ ಕಶ್ಟ್. ತಶೆಂ ಆಸ್ತಾಂ ತುಮಿ ಮ್ಹಸ್ತ್ ಸಾಕ್ರಿಫಿಸ್ ಕರ್‍ತಾತ್ ಮ್ಹಣ್ ಜಾಲೆಂ” ಅಶೆಂ ಮ್ಹಣ್ತಾನಾಂಚ್ ಹ್ಯಾರಿಚಿ ವ್ಹಡ್ಲಿಮಾಂಯ್ ಥಂಯ್ಸರ್ ಪಾವ್ಲಿ ಆನಿ “ಸಾಕ್ರಿಫಿಸ್ ಸಬಾರ್ ಕೆಲ್ಯಾತ್ ಆಲ್ವಿ. ಸಮಾಜ್‌ಸೆವೆಚಿ ಅಭಿರೂಚ್ ಆಸ್ಚೆಂ ಮೇರಿ ಶಿಕಪ್ ಸಂಪೊವ್ನ್ ವಾವ್ರ್ ಕರ್‍ತಾನಾ ಲೊರಿಯೆರ್ ಘೊಳ್ಚೊ ಹ್ಯಾರಿ ತಾಕಾ ಭೆಟ್ಲೊ. ತಿಂ ಹೆಣೆಂ ತೆಣೆಂ ಮೆಳ್ತಾನಾ ‘ಯೇಗೊ ಮೇರಿ ಗಾದ್ಯಾ ಮೆರೇರಿ ಚಲ್ಯಾಂ ಕುಮೇರಿ, ಹಾತ್ ಧರಿ ಸುರು ಕರೀ ಮೊಗಾ ಆಮೊರಿ’ ಮ್ಹಣ್ ಮೊಗಾಖೆಳ್ ಖೆಳ್ತಾನಾ ಕೊಣೆಂಗೀ ಹಾಂಕಾಂಚ್ ಪಳೆವ್ನ್ ತೆಂ ಪದ್ ಘಡ್ಲೆಂ ಕಂಯ್. ಹಾಂಚ್ಯಾ ಮೊಗಾವಿಶಿಂ ಲೋಕ್ ಉಲಯ್ಲೊ. ‘ಮೇರಿ, ಹ್ಯಾರಿಲಾಗಿಂ ಆಸ್ಚಿ ಲಾಟ್ಟುಸ್ ಲೊರಿ. ಲೊರಿಯೆನ್ ಹಾತ್ ದಿಲ್ಯಾರ್ ಗೊಮ್ಟ್ಯಾಕ್ ದೊರಿ’ ಮ್ಹಣ್ ಸಬಾರಾಂನಿ ಸಾಂಗ್ಲೆಂ. ಪುಣ್ ಕಿತ್ಲೆಂ ಸಮ್ಜಾಯ್ಲ್ಯಾರೀ ‘ಹಾಂವ್ ಆನಿ ಹ್ಯಾರಿ ವಿ ವಿಲ್ ಮ್ಯಾರಿ. ಯೂ ಡೋಂಟ್ ವರಿ’ ಮ್ಹಣ್ ಕಾಜಾರ್ ಜಾಲೆಂ ಮೇರಿ.

“ತಾಂಚೆ ಮೊಗಾಚೆ ಆಟೆವಿಟೆ ಸಗ್ಳ್ಯಾ ಗಾಂವಾಂತ್ ಗಾಜ್‌ಲ್ಲೆ. ಆಪಾಲಿಪಾ ಸಗ್ಳ್ಯಾಂಕ್ ಕಳ್‌ಲ್ಲೆಂ. ಥೊಡ್ಯಾಂಕ್ ಹಿಚ್ ಬಿ.ಬಿ.ಸಿ. ನೀವ್ಜ್ ತರ್ ಹೆರಾಂಕ್ ಮುಕಾರ್ ಕಿತೆಂಗೀ ಮ್ಹಳ್ಳಿ ಖಂತ್. ಥೊಡ್ಯಾಂಕ್ ತಿಂ ಎಕಾಮೆಕಾಕ್ ಹಾತ್ ದಿತಾತ್‌ಗೀ, ಪಾಂಯ್ ದಿತಾತ್‌ಗೀ ಮ್ಹಣ್ ತಕ್ಲಿ ಹುನ್! ಥೊಡಿಂ ‘ಚೆಡೊ ಸಮಾ ನಾ’ ಮ್ಹಣ್ತಾನಾ ಆನಿ ಥೊಡಿಂ ‘ಚೆಡುಂ ಸಮಾ ನಾ’ ಮ್ಹಣ್ ಖೊಡಿ ಕಾಡ್ತಾಲಿಂ. ತರೀ ಹಿಂ ಮಾತ್ರ್ ಆಪ್ಲ್ಯಾ ನಿರ್ಧಾರಾಥಾವ್ನ್ ಹಾಲೊಂಕ್ ನಾಂತ್. ಮೊಗಾಥಾವ್ನ್ ಅಲಗ್ ಜಾವ್ನಾಂತ್. ಎಕಾಮೆಕಾಕ್ ದುರ್ಸೊಂಕ್ ಆವ್ಕಾಸ್ ಆಸ್ಲ್ಯಾರೀ ದುರ್ಸೊಂಕ್ ನಾಂತ್. ದುಬಾಂವ್ಕ್ ನಾಂತ್, ವಿಸ್ರೊಂಕ್ ನಾಂತ್, ಮೊಗಾಚ್ಯಾ ನಾಂವಿಂ ವಾಯ್ಟ್ ಚಾಲಿಕ್ ನಿಸ್ರೊಂಕ್‌ಯೀ ನಾಂತ್. ಬಗಾರ್ ತಿಂ ಹೆಣೆಂ ತೆಣೆಂ ಭೊಂವ್ಲಿಂ, ಮೊಗಾಚ್ಯಾ ದೊವಾಂತ್ ತೊವ್ಲಿಂ. ಎಕಾಮೆಕಾಕ್ ವಿಶ್ವಾಸಿ ರಾವ್ಲಿಂ. ಮದೆಂ ಮದೆಂ ಬೀಚಾಕ್, ಕ್ಲಬ್ಬಾಕ್, ಪಬ್ಬಾಕ್‌ಯೀ ಪಾವ್ಲಿಂ. ಅಶೆಂ ಸಬಾರ್ ಅಡ್ಕಳಿ ಉತ್ರೊನ್ ಹ್ಯಾರಿಚ್ಯೆ ಜಿಣಿಯೆ ಲೊರಿಯೆರ್ ಚಡೊನ್ ರಾಣಿಯೆಬರಿ ರೆಸ್ಪೆರ್ ಜಾಲ್ಲೆಂ ಮೇರಿ! ತಿಂ ತುಕಾ ತಾಂಚೆಚ್ ವಿಶ್ಯಾಂತ್ ಸಾಂಗಾನಾಂತ್ ಪಳೆ… ತಾಕಾ ಹಾಂವ್‌ಚ್ ತುಕಾ ಮೆಳೊಂಕ್ ಆಶೆತಾಲಿಂ” ಮ್ಹಳ್ಳ್ಯೆ ವ್ಹಡ್ಲಿಮಾಂಯ್ಕ್ ಹ್ಯಾ ಜೊಡ್ಯಾಥಂಯ್ ವಿಶೇಸ್ ಮೋಗ್ ಜಳ್ಕಾಲೊ ಆಲ್ವಿಕ್.

“ವ್ಹಯ್ ಮಾಂಯ್, ಫೆಬ್ರವರಿ ಚೊವ್ದಾ ತಾರಿಕೆರ್ ‘ಐ ಲವ್ ಯು ಡಾಲಿಂಗ್’ ಮ್ಹಣೊಂಕ್ ಭಾರಿಚ್ ಸುಲಬ್. ಪುಣ್ ಜಿಣಿಯೆಪಯ್ಣಾರ್ ಕಶ್ಟ್ ಯೆತಾನಾ, ದುಬಾವ್ ಬಳ್ ಜಾತಾನಾ, ಚೂಕ್ ಸಮ್ಜೊಣಿ ತಿಳ್ತಾನಾ, ಜವಾಬ್ದಾರಿ ಚಡ್ತಾನಾ, ದೆಂವ್ಸಾರ್ ನಾಡ್ತಾನಾ ‘ಐ ಲವ್ ಯೂ’ ಮ್ಹಣೊಂಕ್ ಭಾರಿಚ್ ಕಶ್ಟ್. ತರೀ ಹೆ ಕಶ್ಟ್ ಫುಡ್ ಕರುನ್ ತಾಣಿಂ ತೊ ಮೋಗ್ ಕೆಲೊ. ಹೆರಾಂಕ್ ತಿಂ ಏಕ್ ದೇಕ್ ಜಾಲ್ಯಾಂತ್. ಹ್ಯಾ ಇನಾಮಾಕ್ ತಿಂ ಖಂಡಿತ್ ಫಾವೊ” ಮ್ಹಣ್ ಆಲ್ವಿನ್ ಸಾಂಗ್ತಾನಾ, “ತಿತ್ಲೆಂಚ್ ನ್ಹಯ್ ಆಲ್ವಿ… ಕಶೆಂ ಮೋಗ್ ಸೊಸ್ಣಿಕ್ ಆನಿ ದಯಾಳ್ ತಶೆಂ ತಿಂಯ್ ಎಕಾಮೆಕಾಚೆಂ ಸೊಸುನ್ ವ್ಹರ್‍ತಾತ್. ಮೊಸ್ರಾಕ್ ತಾಂಚೆಥಂಯ್ ಜಾಗೊ ನಾ. ರಾಗ್ ಯೆತಾ ತರೀ ಉಲೊವ್ಣ್ಯಾನ್ ರಾಜಿ ಜಾತಾತ್. ಪ್ರಮುಕ್ ಜಾವ್ನ್ ಎಕಾಮೆಕಾಕ್ ಭೊಗ್ಶಿತಾತ್. ತಶೆಂ ಜಾಲ್ಲ್ಯಾನ್ ತಾಂಕಾಂ ಹೊ ಪುರಸ್ಕಾರ್ ಫಾವೊ” ಮ್ಹಣಾಲಿ ತಿ. ಅಶೆಂ ಮ್ಹಳ್ಳೆಂಚ್ ತಾಣೆಂ ತಿ ಏಕ್ ವ್ಹಡ್ ಜಯ್ತ್ ಶೀಲ್ಡ್ ಹ್ಯಾರಿಚ್ಯಾ ಹಾತಾಂತ್ ದಿಲಿ ಆನಿ “ತುಮಿ ದೊಗಾಂಯ್ ಸಯ್ಕಲಾರ್ ಏಕ್ ರೌಂಡ್ ಮಾರ್‍ನ್ ಯೆಯಾ. ತುಮ್ಚೊ ಸಂತೊಸ್ ಗಾಂವಾರ್ ಪ್ರಸಾರ್ ಕರಾ” ಮ್ಹಣ್ ಐಡಿಯಾ ದೀಲಾಗ್ಲೊ.

ತೆಂ ಆಯ್ಕೊನ್ ಹ್ಯಾರಿ ಆನಿ ಮೇರಿ ಅಟ್ಲಾಸ್ ಸಯ್ಕಲಾರ್ ಬಸ್ಲಿಂಚ್. “ಯಾಗೊ ಮೇರಿ ಗಾದ್ಯಾ ಮೆರೇರಿ ಕರ್‍ಯಾಂ ಸವಾರಿ. ಹೀರೊಬರಿ ಶೀಲ್ಡ್ ಧರಿ ಭೊಂವ್ಯಾಂ ಕುಮೇರಿ” ಮ್ಹಣ್ ಸಯ್ಕಲ್ ಗುಡ್ಡಾಯ್ತಾನಾ ಎಕಾಚ್ ಫರಾ ಮೇರಿ ಬ್ಯಾಲನ್ಸ್ ಚುಕೊನ್ ಸಕ್ಲಾ ಗಳ್ಳೆಂ. ತಾಕಾ ಧರುಂಕ್ ಬಾಗ್ವಾಲ್ಲೊ ಹ್ಯಾರಿ ಲೊರಿ ಪರ್‍ತಲ್ಲೆಬರಿ  ಧಡಲ್ಲ್ ಕರ್‍ನ್ ಧರ್‍ಣಿರ್ ಪಡ್ತಾನಾ, “ಸುರ್ಯೊ ತಕ್ಲೆರ್ ಯೇವ್ನ್ ಪಾವ್ಲ್ಯಾರೀ ಉಟೊಂಕ್ ಸಂಕಡ್ ತುಕಾ. ಊಟ್ ಸಾಯ್ಬಾ. ಉದ್ಕಾಚೊ ಪಂಪ್ ಪಾಡ್ ಜಾಲಾ. ರಿಪೇರಿ ಪುಣೀ ಕರಯ್” ಮ್ಹಣ್ ಪುರ್ಪುರ್‍ಚ್ಯಾ ಮೇರಿಕ್ ಪಳೆವ್ನ್ ಶೆರ್ಮೆಲೊ! ಉಶ್ಯಾಲಾಗಿಂ ಆಸ್ಚ್ಯಾ ಪೇಪರಾಂತ್ ‘ಐಡಿಯಲ್ ಕಪಲ್ ಸ್ಪರ್ಧೊ’ ತಕ್ಲೆನಾಂವ್ ಪಳೆವ್ನ್, ತರ್ ಆಪುಣ್ ಸಪ್ಣೆಲೊಂ ತೆಂ ತಾಕಾ ಕಳ್ಳೆಂ ಆನಿ ಶೀಲ್ಡ್ ಮ್ಹಣ್ ಹಾತಾಂತ್ ಧರ್‌ಲ್ಲೆಂ ಜಳಾರಿಂಚೆಂ ಬ್ಯಾಟ್ ಕಾಡ್ನ್ ಉಡೊವ್ನ್ ಆಮ್ಸೊರಾನ್ ನ್ಹಾಣಿಯೆಕ್ ರಿಗ್ಲೊ!!

✍️ –ಅನಿತಾ ಅರ್ಸುಲಯ್ನ್