ದೆಂವ್ಸಾರ್ ಕಾನಾಂತ್ ಶಿಮ್ಟಿ ಘಾಲ್ತಾ ಮ್ಹಣ್ ಹಾಂವೆಂ ಆಯ್ಕಾಲ್ಲೆಂ. ಪುಣ್ ಹಾಂವ್ ತೆಂ ಬಿಲ್ಕುಲ್ ಪಾತ್ಯೆನಾ. ಕಿತ್ಯಾಕ್ ಮ್ಹಳ್ಯಾರ್ ದೆಂವ್ಸಾರ್ ಕಾನಾಂತ್ ನ್ಹಯ್, ದೊಳ್ಯಾಂತ್ ಶಿಮ್ಟಿ ಘಾಲ್ತಾ. ಹೆಂ ಮ್ಹಾಕಾ ಕಳ್‌ಲ್ಲೆಂ ಆಯ್ತಾರಾಚ್ಯಾ ಮಿಸಾ ವೆಳಾರ್. ಮೀಸ್ ಸುರು ಜಾವ್ನ್ ಶೆರ್ಮಾಂವ್ ಸುರು ಜಾಲೊ ಮ್ಹಣ್ತಾನಾಂಚ್ ಹೊ ದೆಂವ್ಸಾರ್ ಯೆತಾ ಆನಿ ಕಾನಾ ಬದ್ಲಾಕ್ ಮ್ಹಜ್ಯಾ ದೊಳ್ಯಾಂತ್ ಶಿಮ್ಟಿ ಘಾಲ್ತಾ ಆನಿ ಮ್ಹಾಕಾ ಖಂಯ್ ನಾತ್‌ಲ್ಲಿ ನೀದ್ ಯೆತಾ. ಹಾಂವ್ ಹರ್‍ಯೇಕ್ ಪಾವ್ಟಿಂ ಅಶೆಂ ಶೆರ್ಮಾಂವಾ ವೆಳಾರ್‌ಚ್ ನಿದ್ಚೆಂ ಪಳೆವ್ನ್ ಏಕ್ ದೀಸ್ ಮೀಸ್ ಜಾಲ್ಲೆಂಚ್ ಭಾಯ್ರ್ ಯೆತಾನಾ ವಿಗಾರ್ ದರ್ವಾಟ್ಯಾಲಾಗಿಂಚ್ ಮೆಳ್ಳೊ ಆನಿ ಮ್ಹಣಾಲೊ –

“ಕಿತೆಂ ಸಿಕೇರಾಮಾ, ತುಂ ಏಕ್ ಕೊಂಕ್ಣಿ ಲೇಖಕ್‌ಗೀ?”

“ವ್ಹಯ್ ಫಾದರ್, ಕಿತೆಂ ಜಾಲೆಂ?” ಮ್ಹಣ್ ಪ್ರತಿ ಸವಾಲ್ ಕರ್‍ತಾನಾಂಚ್ ಏಕ್ ಜಾಂಬಾಯ್ ಸಯ್ತ್ ಯೇವ್ನ್ ಗೆಲಿ. ತೆಂ ಕಶೆಂ ಮ್ಹಳ್ಯಾರ್ ಶೆರ್ಮಾಂವ್ ಹ್ಯಾಚ್ ಪಾದ್ರ್ಯಾಬಾಚೊ ಜಾಲ್ಲ್ಯಾನ್ ಆತಾಂ ತಾಕಾ ಪಳಯ್ತಾನಾಂಚ್ ಜಾಂಬಾಯೊ ಯೇಂವ್ಕ್ ಲಾಗ್ತಾತ್.

“ತುಂ ಏಕ್ ಕೊಂಕ್ಣಿ ಲೇಖಕ್ ಮ್ಹಣ್ತಾಯ್. ತುಕಾ ಆನಿಕೀ ಕಳಿತ್ ನಾಂಗೀ, ಲೇಖಕಾಂನಿ ಕೆದ್ನಾಂಯ್ ದೊಳೆ ಉಗ್ತೆ ದವ್ರುನ್ ನಿದಜೆ ಮ್ಹಣೊನ್”

ಓಹೋ, ತರ್ ಹಾಕಾ ಹಾಂವ್ ನಿದ್‌ಲ್ಲೊಂ ಸಮಸ್ಸೆ ನ್ಹಯ್, ದೊಳೆ ಉಗ್ತೆ ದವ್ರುನ್ ನಿದೆ ಮ್ಹಣ್ಚೆಂ ಹಾಣೆಂ. “ಭೊಗ್ಶಿಯಾ ಫಾದರ್, ಆನಿ ಮುಕಾರ್ ಶೆರ್ಮಾಂವಾ ವೆಳಾರ್ ದೊಳೆ ಉಗ್ತೆ ದವ್ರುನ್ಂಚ್ ನಿದ್ತಾಂ”

“ಕಿತೆಂ ಮ್ಹಣಾಯ್, ಶೆರ್ಮಾಂವಾ ವೆಳಾರ್ ನಿದ್ತಾಯ್. ತುವೆಂ ಮಿಸಾಕ್ ನಿದೊಂಕ್ ಯೆಂವ್ಚೆಂಗೀ?”

“ತೆಂ ಮ್ಹಳ್ಯಾರ್ ಫಾದರ್, ಹಾಂವ್ ಕಾಲ್ ರಾತಿಕ್‌ಚ್ ಏಕ್ ವಿನೋದ್ ಬರೊವ್ನ್ ಆಸ್‌ಲ್ಲೊಂ. ತಶೆಂ…”

“ತುಜೊ ವಿನೋದ್ ವಾ ವಿನೀದ್. ದೊನೀ ಇಗರ್ಜೆಭಿತರ್ ಚಲನಾಂತ್. ಕಿತೆಂ ಜಾಂವ್ ಬರೆಂ ಜಾಲೆಂ ತುವೆಂ ಮ್ಹಜೊ ಶೆರ್ಮಾಂವ್ ಆಯ್ಕೊಂಕ್ ನಾತ್‌ಲ್ಲೊಯ್”

“ಅರೆ ವಾ! ವ್ಹಯ್‌ಗೀ ಫಾದರ್” ಮ್ಹಜಿ ನೀದ್ ಧಾಂವ್ಲಿ.

“ವ್ಹಯ್ ವ್ಹಯ್. ತೆಂ ಕಿತ್ಯಾಕ್ ಮ್ಹಳ್ಯಾರ್, ಹಾಂವೆಂ ಮ್ಹಜೆಂ ಏಕ್ ‘ಗುಡ್ ನ್ಯೂಜ್’ ಮ್ಹಳ್ಳೆಂ ಯೂಟ್ಯೂಬ್ ಚ್ಯಾನೆಲ್ ಸುರು ಕೆಲಾಂ. ಆನಿ ತಾಂತುಂ ಮ್ಹಜೆ ಶೆರ್ಮಾಂವ್ ಆಸಾತ್. ತುವೆಂ ತಾಂತ್ಲೆ ಶೆರ್ಮಾಂವ್ ಆಯ್ಕೊನ್ ‘ಲೈಕ್ಸ್, ಕಮೆಂಟ್ ಆನಿ ಶೇರ್’ ಕರಿಜೆ. ತುಂ ಕೊಂಕ್ಣಿ ಲೇಖಕ್ ಜಾಲ್ಲ್ಯಾನ್ ತುಜೆ ಜಾಯ್ತೆ ಮಿತ್ರ್ ಆಸ್ತಲೆ. ತಾಂಕಾಂ ಸಕ್ಡಾಂಕ್‌ಯೀ ಧಾಡ್. ಅಶೆಂ ಮ್ಹಜೆಂ ಹೆಂ ಚ್ಯಾನೆಲ್ ವೆಗಿಂಚ್ ಲೊಕಾಮೊಗಾಳ್ ಜಾಯ್ಜೆ”

“ಜಾಯ್ತ್ ಫಾದರ್, ಹಾಂವ್ ಖಂಡಿತ್ ಕರ್‍ತಾಂ”

ಪಾದ್ರ್ಯಾಬಾಚ್ಯಾ ಜಾಳಾಂತ್ ಥಾವ್ನ್ ಚುಕ್ಲೊಂ. ಎಕಾ ಕಾಳಾರ್ ಸಕ್ಡಾಂಚ್ಯಾ ಹಾತಾಂತ್ ಮೊಬಾಯ್ಲ್ ಆಸ್‌ಲ್ಲೆಂ. ಆತಾಂ, ಸಕ್ಡಾಂಚ್ಯಾ ನಾಂವಾರ್ ಎಕೇಕ್ ಯೂಟ್ಯೂಬ್ ಚ್ಯಾನೆಲ್. ಆಮ್ಚ್ಯೆ ಫಿರ್ಗಜೆಂತ್ ಪಾದ್ರ್ಯಾಬಾಚೆಂ ಏಕ್ ಬಾಕಿ ಆಸ್‌ಲ್ಲೆಂ, ತೆಂಯ್ ಜಾಲೆಂ. ಪಾದ್ರ್ಯಾಬ್ ಕಸೊಯ್ ಜಾಲೊ, ಮಿರ್ನ್ಯಾಮಾನ್‌ಯೀ ತಾಚೆಂ ಯೂಟ್ಯೂಬ್ ಚ್ಯಾನೆಲ್ ಸುರು ಕೆಲಾಂ ಮ್ಹಣ್ತಾಂ. ತಾಂತುಂ ತೊ ಘಾಂಟಿ ಕಶೆಂ ಮಾರ್‍ಚ್ಯೊ, ತೋರ್ ಕಿತ್ಲಿ ಉಬಾರಾಯೆರ್ ಆಸಾ, ಘಾಂಟಿಂತ್ ಕಿತ್ಲೆ ನಮೂನೆ ಆಸಾತ್, ಹೆಂ ಸಕ್ಕಡ್ ಜಾಲೆಂಮೂ, ಉಪ್ರಾಂತ್ ತಾಣೆಂ ವಿವಿಂಗಡ್ ಫಿರ್ಗಜ್ಯಾಂಕ್ ವಚೊನ್ ತಾಂಚ್ಯಾ ಘಾಂಟಿ ಆನಿ ತೊರಿವಿಶ್ಯಾಂತ್ ಸಯ್ತ್ ತಾಚ್ಯಾ ಚ್ಯಾನೆಲಾರ್ ದಾಕೊಂವ್ಕ್ ಸುರು ಕೆಲೆಂ. ಅಶೆಂ ಫಿರ್ಗಜ್ ಫಿರ್ಗಜ್ಯಾಂನಿ ನಾಚೊನ್ ಆತಾಂ ತಾಚ್ಯಾ ಪಾಂಯಾಂಚ್ಯೊ ಗಾಂಟಿ ದೂಕ್ ಕಂಯ್. ದೆಕುನ್ ಪಾಟ್ಲ್ಯಾ ಸ ಮ್ಹಯ್ನ್ಯಾಂಥಾವ್ನ್ ತಾಣೆಂ ಇಗರ್ಜೆಚ್ಯಾ ಘಾಂಟಿವಿಶಿಂ ಬಂದ್ ಕರ್‍ನ್ ಪಾಂಯಾಂಚ್ಯಾ ಗಾಂಟಿವಿಶಿಂ ಮಾಹೆತ್ ದೀಂವ್ಕ್ ಸುರು ಕೆಲಾಂ. ದೆಕುನ್ ಆಮ್ಚ್ಯೆ ಫಿರ್ಗಜೆಂತ್ ಆಸ್ಚಿಂ ಸಕ್ಕಡ್ ಗಾಂಟಿ ದುಕಿಚಿಂ ಸದಾಂನಿತ್ ತಾಚೆಂ ಚ್ಯಾನೆಲ್ ಪಳಯ್ತಾತ್. ಅಶೆಂ ಪಾದ್ರ್ಯಾಬಾಚ್ಯಾ ಚ್ಯಾನೆಲಾಚ್ಯಾಕೀ ಮಿರ್ನ್ಯಾಮಾಕ್ ಚಡ್ ಸಬ್‌ಸ್ಕ್ರೈಬರ್‍ಸ್ ಆಸಾತ್ ಮ್ಹಣ್ ವಿಗಾರ್ ಮಾತ್ಸೊ ತಾಪ್ಲಾ ಮ್ಹಳ್ಳಿ ಖಬರ್ ಆಸಾ. ಜರ್ ಹ್ಯಾ ಚ್ಯಾನೆಲಾಚ್ಯಾ ಸಬ್‌ಸ್ಕ್ರೈಬರ್‍ಸಾಕ್ ಲಾಗೊನ್ ಮ್ಹಾಕಾ ವಿಗಾರಾನ್ ಮೊಸ್ರಾನ್ ಕಾಮಾಥಾವ್ನ್ ಕಾಡ್ಲ್ಯಾರೀ ಹಾಂವ್ ಮ್ಹಜ್ಯಾ ಯೂಟ್ಯೂಬ್ ಚ್ಯಾನೆಲಾ ಮುಕಾಂತ್ರ್‌ಚ್ ದೀಸ್ ಕಾಡ್ತಾಂ ಮ್ಹಣ್ ಮಿರ್ನ್ಯಾಮಾನ್ ವಿಗಾರಾಕ್‌ಚ್ ಸವಾಲ್ ಉಡಯ್ಲಾಂ.

ತಶೆಂ ಮ್ಹಣ್ ಮಿರ್ನ್ಯಾಮಾಕ್ ಚಡ್ ಸಬ್‌ಸ್ಕ್ರೈಬರ್‍ಸ್ ಆಸಾತ್ ಮ್ಹಣ್ ಚಿಂತಿನಾಕಾತ್. ಆಮ್ಚ್ಯೆ ಫಿರ್ಗಜೆಂತ್ ಚಡ್ ಸಬ್‌ಸ್ಕ್ರೈಬರ್‍ಸ್ ಆಸ್ಚೆ ಆಮ್ಚ್ಯೆ ಫಿರ್ಗಜೆಚ್ಯಾ ಚಾಮಾದೊರಾಕ್. ತೊ ಆಮ್ಚ್ಯೆ ಸಿಮೆಸ್ತ್ರೆಂತ್ಲ್ಯಾ ಆದ್ಲ್ಯಾ ತಶೆಂಚ್ ಪುರಾತನ್ ಫೊಂಡಾವಿಶಿಂ ಮಾಹೆತ್ ದಿತಾ ಕಂಯ್. ತಶೆಂ ಜಾಲ್ಲ್ಯಾನ್ ಜಾಯ್ತ್ಯಾಂಕ್ ತಾಂಚ್ಯಾ ಮಾಲ್ಘಡ್ಯಾಂಚೆ ಫೊಂಡ್ ಸೊಧುನ್ ಕಾಡುಂಕ್ ಸುಲಬ್ ಜಾಲಾಂ ಕಂಯ್. ವಯ್ಲ್ಯಾನ್ ಚಾಮಾದೊರಾನ್ ಏಕ್ ಒಫರ್ ಸಯ್ತ್ ದಿಲಾಂ ಕಂಯ್. ಕೋಣ್ ಚಡ್ ಮ್ಹಜ್ಯಾ ಚ್ಯಾನೆಲಾಕ್ ಲೈಕ್ಸ್ ಕರ್‍ತಾತ್ ತಾಂಚೊ ವಾ ತಾಂಚ್ಯಾ ಕುಟ್ಮಾಚ್ಯಾ ಕೊಣೀ ಎಕ್ಲ್ಯಾ ಸಾಂದ್ಯಾಂಚೊ ಫೊಂಡ್ ಫುಂಕ್ಯಾಕ್ ಕಾಡ್ನ್ ದಿತಾಂ ಮ್ಹಣೊನ್. ತಶೆಂ ತಾಚೆ ಸಬ್‌ಸ್ಕ್ರೈಬರ್‍ಸ್ ಚಡ್ಲ್ಯಾತ್. ತಿತ್ಲೆಂಚ್ ನ್ಹಯ್ ಆಸ್ತಾಂ ತೊ ಹರ್‍ಯೆಕಾ ವೀಡಿಯೋ ನಂತರ್ ಏಕ್ ಕ್ವಿಜ್ ಆಸಾ ಕರ್‍ತಾ ಕಂಯ್, “ಹೆಂ ಕಟ್ಟೆಂ ಕೊಣಾಚೆಂ ಸಾಂಗಾ ಪಳೆಯಾಂ, ಹಿಂ ಹಾಡಾಂ ಕೊಣಾಚಿಂ ಸಾಂಗಾ ಪಳಯಾಂ”. ಅಶೆಂ ತರ್ನಾಟಿಂ ಆನಿ ಯುವಜಣಾಂ ವ್ಹಡಾ ಆಸಕ್ತೆನ್ ತಾಚೆಂ ಚ್ಯಾನೆಲ್ ಪಳೆವ್ನ್ ಬಿಝಿ ಆಸಾತ್ ಮ್ಹಳ್ಳೆಂ ಸತ್ ಫಿರ್ಗಜ್ ವಿಗಾರಾಕ್ ಜಿರೊಂಕ್ ಜಾಯ್ನಾ.

ಘರಾ ಪಾವಜೆ ತರ್ ಮ್ಹಜಿ ಬಾಯ್ಲ್ ಮೊಬಾಯ್ಲ್ ಘೆವ್ನ್ ಧಾಂವೊನ್ ಧಾಂವೊನ್ ಮ್ಹಜೆಸರ್ಶಿಂ ಆಯ್ಲಿ ಆನಿ ಮ್ಹಣಾಲಿ-

“ಅಳೆ, ಹೊ ದಾಂತ್ ಕೊಣಾಚೊ ಸಾಂಗ್ ಪಳೆಯಾಂ”

“ತುಂ ಏಕ್ ಕಸಲೆಂ ಬಿಂಗ್ರಿ ಉಲಯ್ತಾಯ್ ಸಾಯ್ಬಿಣಿ. ಫಕತ್ ದಾಂತ್ ಪಳೆವ್ನ್ ಕೊಣಾಚೊ ಮ್ಹಣ್ ಸಾಂಗೊಂಕ್ ಸಕ್‌ಲ್ಲೊಂ ತರ್ ಆಜ್ ಫಿರ್ಗಜೆಂತ್ಲ್ಯಾ ಖಂಯ್ಚ್ಯಾ ಭುರ್ಗ್ಯಾಚೊ ಬಾಪಯ್ ಕೋಣ್ ಮ್ಹಣ್ ಸಾಂಗೊಂಕ್ ಸಕೊನ್ ಹಾಂವ್ ಲಕ್ಪತಿ ಜಾತೊಂ”

“ತಶೆಂ ನ್ಹಯ್ ಸಾಯ್ಬಾ, ಹೊ ಕಿತ್ಲ್ಯಾ ವರ್‍ಸಾಂ ಆದ್ಲೊ ದಾಂತ್ ಮ್ಹಣ್ ಸಾಂಗಜೆ ಮ್ಹಣ್ ಚಾಮಾದೊರಾನ್ ತಾಚ್ಯಾ ಚ್ಯಾನೆಲಾರ್ ಘಾಲಾಂ”

“ಅಳೇ, ಪ್ಲೀಜ್, ತುಂ ತ್ಯಾ ಚಾಮಾದೊರಾಚೆಂ ಯೂಟ್ಯೂಬ್ ಚ್ಯಾನೆಲ್ ಪಳಯ್ನಾಕಾ, ಮ್ಹಾಕಾ ಪಳಯ್ತಾನಾಂಚ್ ಭ್ಯೆಂ ದಿಸ್ತಾ”

“ತಾಚೆಂ ಚ್ಯಾನೆಲ್ ಪುಣೀ ಹಾಂವ್ ಬಿಲ್ಕುಲ್ ಪಳೆಂವ್ಚೆಂ ಚುಕೊಂವ್ಚಿನಾ. ಎದೊಳ್ ವರೇಗ್ ತಾಚ್ಯಾ ಚ್ಯಾನೆಲಾಕ್ ಲೈಕ್ಸ್ ಕೆಲ್ಲೆಪಯ್ಕಿ ಹಾಂವ್‌ಚ್ ಫಸ್ಟ್ ಆಸಾಂ. ಆನಿ ತುಕಾ ಗೊತ್ತಾಸಾಯೆ, ಚಡ್ ಲೈಕ್ಸ್ ಕೆಲ್ಲ್ಯಾಕ್ ಎಕ್ಲ್ಯಾಚ್ಯಾ ಘರ್‍ಚ್ಯಾ ಸಾಂದ್ಯಾಕ್ ಫೊಂಡ್ ಫ್ರೀ ಕಂಯ್”

“ಆಮ್ಚ್ಯಾ ಘರಾ ಆಸ್ಚಿಂ ಆಮಿ ದೊಗಾಂಚ್. ಮ್ಹಣ್ಜೆ ತುವೆಂ ಮ್ಹಜೊ ಫೊಂಡ್ ಎದೊಳ್‌ಚ್ ತಯಾರ್ ಕೆಲಾಯ್ ಮ್ಹಣ್ ಜಾಲೆಂ, ಪಡ್ಪಶ್ಯಾ”

“ಹೇಯ್, ಚಿಕ್ಕೆ ಲೋವ್ ಉಲಯ್ ಸಾಯ್ಬಾ. ಆಮ್ಚ್ಯಾ ಸೆಜಾರಾ ಘರ್‍ಚೆಂ ಕ್ವೀನಿ ಆಸಾ ಪಳೆ ತಾಣೆಂ ನವೆಂಚ್ ಏಕ್ ಯೂಟ್ಯೂಬ್ ಚ್ಯಾನೆಲ್ ಸುರು ಕೆಲಾಂ ‘ಸೆಜ್ ಸಾಮಾರಾ, ಇಲ್ಲೆಂ ಬರಬರ’ ಮ್ಹಣ್. ಖಂಯ್ ಪುಣೀ ಆಮಿ ಝಗಡ್ನ್ ಆಸಾಂವ್ ಮ್ಹಣ್ ಗುಪಿತ್ ಜನೆಲಾಂತ್ಲ್ಯಾನ್ ಶೂಟ್ ಕರ್‍ನ್ ತಾಚ್ಯಾ ಚ್ಯಾನೆಲಾರ್ ಘಾಲೆಂ ತರ್ ಆಮ್ಚಿ ಮರ್ಯಾದ್ ಗೆಲ್ಲೆಬರಿಚ್”

“ಗುಪಿತ್ ಜನೆಲಾಂತ್ಲ್ಯಾನ್ ಕಿತ್ಯಾಕ್ ಶೂಟ್ ಕರಿಜೆ, ಧಯ್ರ್ ಆಸ್ಲ್ಯಾರ್ ಘರಾ ಭಿತರ್ ಯೇವ್ನ್ ಶೂಟ್ ಕರುಂದಿ”

“ತೆಂ ಮ್ಹಳ್ಯಾರ್ ಗುಪಿತ್ ಶೂಟ್ ಕೆಲ್ಯಾರ್ ಮಾತ್ರ್ ತೆಂ ಒರಿಜಿನಲ್ ಮ್ಹಣ್ ಕಳ್ಚೆಂ ಕಂಯ್. ನಾ ಜಾಲ್ಯಾರ್ ಸಾಂಗೊನ್ ಕೆಲ್ಲೆಬರಿ ಡ್ರಾಮಾ ಜಾತಾ ಕಂಯ್. ದೆಕುನ್ ಜಾಗ್ರುತ್, ತೆಂ ಖಂಯ್ ಪುಣೀ ಜನೆಲಾಚ್ಯಾ ಇಡ್ಯಾಂಥಾವ್ನ್ ತಿಳುಂಕ್ ಪುರೊ”

“ತಶೆಂ ಜಾಲ್ಯಾರ್ ಹಾಂವ್ ಪಯ್ಲೆಂ ವಚೊನ್ ನ್ಹಾವ್ನ್ ಯೆತಾಂ”

“ತುವೆಂ ನ್ಹಾವ್ನ್ ಯೆವ್ಯೆತ್. ಪುಣ್ ಹಾಂವೆಂ ನ್ಹಾಣಿಯೆಚಿಂ ಸಕ್ಕಡ್ ಜನೆಲಾಂ ಘಟ್ಟ್ ಬಂದ್ ಕೆಲ್ಯಾಂತ್”

“ನ್ಹಾಣಿಯೆಚಿಂ ಬಂದ್ ಕರ್‍ತಾನಾ ತುಕಾ ಬಾಕಿಚಿಂ ಸಕ್ಕಡ್ ಕರ್‍ಯೆತಿನೇ”

“ಬಾಕಿಚಿಂ ಕೆಲ್ಯಾರ್ ಹಾಂವೆಂ ಮ್ಹಜೆಂ ಚ್ಯಾನೆಲ್ ಕಶೆಂ ಶೂಟ್ ಕರ್‍ಚೆಂ”

“ಆತಾಂ ತುಜೆಂ ಖಂಯ್ಚೆಂ ಚ್ಯಾನೆಲ್ ಸಾಯ್ಬಿಣಿ?”

“ಹಾಂವ್‌ಯೀ ಪಾಟ್ಲ್ಯಾ ಎಕಾ ವರ್‍ಸಾಥಾವ್ನ್ ಏಕ್ ಚ್ಯಾನೆಲ್ ಚಲೊವ್ನ್ ಆಸಾಂ. ‘ಮಾರ್‍ಲಿ ಶೆಂಡಿ’ ಮ್ಹಣೊನ್. ತಾಂತುನ್ ಕೋಣ್ ಪಳೆ ಅಶೆಂ ಚೊರಿಯಾಂ ದುಸ್ರ್ಯಾಂಚ್ಯಾ ಘರ್‍ಚೆಂ ವಚೊನ್ ಶೂಟ್ ಕರ್‍ತಾತ್, ತಾಂಚ್ಯಾ ಪಾಟ್ಲ್ಯಾನ್ ವಚೊನ್ ತಾಂಚೆಂಚ್ ಹಾಂವೆಂ ಶೂಟ್ ಕರ್‍ನ್ ಮ್ಹಜ್ಯಾ ಚ್ಯಾನೆಲಾರ್ ಘಾಲ್ಚೆಂ. ತಾಂಕಾಂ ಕಳೊಂಕ್‌ಚ್ ಕಳನಾ. ಅಶೆಂ ಮ್ಹಾಕಾ ಚಡ್ ಲೈಕ್ಸ್ ಆನಿ ಕಮೆಂಟ್ಸ್ ಯೆತಾತ್”

“ಒಟ್ಟಾರೆ ತ್ಯಾ ಕ್ವೀನಿನ್ ಸುರು ಕೆಲಾಂ ಮ್ಹಣೊನ್, ತಾಕಾ ಫಾರಿಕ್ಪಣ್ ಘೆವ್ನ್ ತುಜೆಂ ಏಕ್ ಚ್ಯಾನೆಲ್ ನೇ. ತುಮ್ಚ್ಯಾ ಹ್ಯಾ ಚ್ಯಾನೆಲಾದ್ವಾರಿಂ ಮ್ಹಜ್ಯೆ ಕುಡಿಚಿಂ ಚ್ಯಾನೆಲಾಂ ಬಂದ್ ಪಡ್ಲ್ಯಾಂತ್” ಅಶೆಂ ಮ್ಹಣೊನ್ ಮ್ಹಜ್ಯಾ ಕುಡಾಭಿತರ್ ರಿಗ್ತಾನಾ ಎಕ್‌ಚ್‌ಪಾವ್ಟಿಂ

“ಬೇಂ…..” ಏಕ್ ಆವಾಜ್ ಆಯ್ಲೊ. ಹಾಂವ್ ಭಿಯಾನ್ ಭಾಯ್ರ್ ಧಾಂವೊನ್ ಆಯ್ಲೊಂ. ತಿತ್ಲ್ಯಾರ್ ಭಿತರ್ ಥಾವ್ನ್ ಮ್ಹಜೊ ಮಾಂವ್

“ಸರ್‌ಪ್ರೈಸ್… ಭಿಯೆಲ್ಯಾತ್‌ಗೀ ಜಾಂವ್ಯಾಂನೋ” ಮ್ಹಣಾಲೊ.

“ಅರೇ, ತುಮಿ ಕೆದಾಳಾ ಯೇವ್ನ್ ಲಿಪೊನ್ ರಾವ್‌ಲ್ಲ್ಯಾತ್. ಆನಿ ಹೆಂ ಬೇತ್ ಘೆವ್ನ್ ಮ್ಹಾಕಾ ಮಾರುಂಕ್ ಕಿತ್ಯಾಕ್ ಯೆತಾತ್?”

“ಹೆಂ ಬೇತ್ ನ್ಹಯ್ ಜಾಂವ್ಯಾಂನೋ, ಹೆಂ ಮೊಬಾಯ್ಲ್ ಸ್ಟಿಕ್ ಆನಿ ಹಾಂವ್ ಝೂಮ್ ಕರ್‍ನ್ ತುಮ್ಚ್ಯಾ ತೊಂಡಾಚೆಂ ಎಕ್ಸ್‌ಪ್ರೆಶನ್ ಮ್ಹಜ್ಯಾ ಮೊಬಾಯ್ಲಾಂತ್ ಕಯ್ದ್ ಕರ್‍ತೇ ಆಸಾಂ”

“ತಶೆಂ ಕಿತ್ಯಾಕ್?”

“ಅರೇ ಜಾಂವ್ಯಾಂನೋ, ತುಮಿ ಕೊಂಕ್ಣಿ ಬರೊವ್ನ್ ಬರೊವ್ನ್ ಆನಿಕೀ ತ್ಯಾಚ್ ಕುಂಡ್ಲ್ಯಾಂತ್ ಆಸಾತ್. ಹಾಂವೆಂ ಮ್ಹಜೆಂ ಏಕ್ ಯೂಟ್ಯೂಬ್ ಚ್ಯಾನೆಲ್ ಆರಂಬ್ ಕೆಲಾಂ ‘ಆಸ್ಲಿ-ನಕ್ಲಿ’ ಮ್ಹಳ್ಳೆಂ. ಹಾಂತುನ್ ಹಾಂವ್ ಮ್ಹಜ್ಯಾ ಕುಟ್ಮಾಚ್ಯಾ ಘರಾ ಎಕೇಕ್ ಹಫ್ತೊ ರಾವ್ತಲೊಂ ಆನಿ ತಿಂ ಮ್ಹಾಕಾ ಕಶೆಂ ಪಳಯ್ತಾತ್ ಮ್ಹಳ್ಳೆಂ ಮ್ಹಜ್ಯಾ ಯೂಟ್ಯೂಬ್ ಚ್ಯಾನೆಲಾಚೆರ್ ಘಾಲ್ತಲೊಂ”

“ಜಾಲಿ ಗತ್. ತುಮ್ಚೆಂ ಎದೆಂ ವ್ಹಡ್ ಕುಟಮ್ ಆಸ್ತಾನಾ, ತುಮಿ ಹಾಂಗಾಚ್ ಕಿತ್ಯಾಕ್ ಆಯ್ಲ್ಯಾತ್?”

“ಬೊವ್ಶಾ ತುವೆಂ ಮ್ಹಜ್ಯಾ ಯೂಟ್ಯೂಬ್ ಚ್ಯಾನೆಲಾಚೊ ಕಾಲ್ಚೊ ಆನಿ ಪಯ್ಲೊ ಎಪಿಸೋಡ್ ಪಳೆಂವ್ಕ್ ನಾಂಯ್ ದಿಸ್ತಾ”

“ಕಾಲ್ಚೊ ಆನಿ ಪಯ್ಲೊ ಮ್ಹಳ್ಯಾರ್ ಹೆಂ ಚ್ಯಾನೆಲ್ ತುಮಿ ಕಾಲ್‌ಚ್ ಸುರು ಕೆಲ್ಲೆಂಗೀ?”

“ತೆಂ ಆಸೊಂದಿ. ಕಾಲ್ಚ್ಯಾ, ಪಯ್ಲ್ಯಾ ಎಪಿಸೋಡಾ ಪರ್ಮಾಣೆಂ ಹಾಂವೆಂ ಲಕ್ಕಿ ಚೀಟ್ ಕಾಡ್ತಾನಾ ತಾಂತುಂ ಪಯ್ಲೆಂ ನಾಂವ್ ತುಮ್ಚೆಂಚ್ ಆಯ್ಲೆಂ. ದೆಕುನ್ ಪಯ್ಲೆಂ ತುಮ್ಚ್ಯಾ ಘರಾ. ಪಳೆಯಾ ತುಮಿಂ ಕಿತ್ಲೆ ಲಕ್ಕಿ”

“ಹಾಂವ್ ಕಿತ್ಲೊ ಲಕ್ಕಿ ಮ್ಹಳ್ಯಾರ್ ಮ್ಹಾಕಾ ದಿಸ್ತಾ ಚಾಮಾದೊರಾಚೆಂ ಒಫರ್ ಮ್ಹಜ್ಯೆ ಬಾಯ್ಲೆಕ್‌ಚ್ ಮೆಳ್ತಾಗೀ ಮ್ಹಣೊನ್”

ತಿತ್ಲ್ಯಾರ್ ಬಾಯ್ಲ್ “ಕಿತೆಂ, ಕಿತೆಂ ಮ್ಹಳೆಂಯ್ ತುವೆಂ?”

“ಕಾಂಯ್ ನಾ ಸಾಯ್ಬಿಣಿ, ತುಜ್ಯಾ ಡ್ಯಾಡಿಚೆಂ ಚ್ಯಾನೆಲ್ ಚಾಮಾದೊರಾಚ್ಯಾ ಚ್ಯಾನೆಲಾಚ್ಯಾಕೀ ಚಡ್ ಖಾಯ್ಸ್ ಜಾಂವ್ದಿ ಮ್ಹಳೆಂ”

“ತರ್ ಜಾಂವ್ಯಾಂನೋ, ವೀಡಿಯೋ ಲೈವ್ ಆಸಾ. ಆಮಿ ಆತಾಂಚ್ ಮಾರ್ಕೆಟಿಕ್ ವಚೊನ್ ಕಾಂಯ್ ಜಾಲ್ಲೆಂ ಹಾಡ್ಯಾಂ. ತುಮಿ ಮ್ಹಜೆಖಾತಿರ್ ಕಿತೆಂ ಪೂರಾ ಕರ್‍ತಾತ್ ಮ್ಹಳ್ಳೆಂ ಹಾಂಗಾಸರ್ ರೆಕೊರ್ಡ್ ಜಾತೇ ಆಸಾ”.

ಏಕ್ ಹಫ್ತೊ ಮಾಂವಾಂಚಿ ಚಾಕ್ರಿ ಕರ್‍ನ್ ಸುಧಾರ್‍ಸುನ್ ಪುರೊ ಪುರೊ ಜಾಲೆಂ. ಹರ್‍ಯೆಕಾ ಪತ್ರಾಂನಿ ವಿನೋದ್ ಬರೊವ್ನ್ ಮೆಳ್‌ಲ್ಲೆ ಸಂಭಾವನ್ ಸಯ್ತ್ ಖಾಲಿ ಜಾಲೆ. ನವೆ ವಿನೋದ್ ಬರಯಾಂ ಮ್ಹಳ್ಯಾರ್ ಮ್ಹಜ್ಯೊಚ್ ಹಾಸೊ ಮಾಯಾಗ್ ಜಾವ್ನ್ ಮ್ಹಜೆಭಿತರ್‍ಲೊ ‘ವಿನೋದ್ ಕುಮಾರ್’ ಕಾಣೆ ಜಾಲಾ. ತಿತ್ಲ್ಯಾರ್ ಸಂಪಾದಕಾಚೆಂ ಫೊನ್ ಆಯ್ಲೆಂ.

“ಹಲೋ ಸಿಕೇರಾಮಾ, ಹ್ಯಾ ಮ್ಹಯ್ನ್ಯಾಚೊ ತುಜೊ ವಿನೋದ್ ಆನಿಕೀ ಪಾವೊಂಕ್ ನಾ, ಫಾಲ್ಯಾಂ ಆಖ್ರೇಚಿ ತಾರೀಕ್”

“ಭೊಗ್ಶಿಯಾ ಮಾನೆಸ್ತಾಂನೋ, ಹ್ಯಾ ಪಾವ್ಟಿಂ ವಿನೋದ್ ಬರೊಂವ್ಕ್ ಜಾಂವ್ಚೆಂನಾ. ತಾಚೆಬದ್ಲಾಕ್ ಮ್ಹಜ್ಯಾ ಕಶ್ಟಾಂಚಿ ಸಿಂತಿಮೆಂತಾಳ್ ಕಾಣಿ ಆಸಾ, ತಿ ಬರೊವ್ನ್ ಧಾಡ್ತಾಂ”

“ಛೆ ಛೆ ಛೆ, ಕಿತೆಂ ಉಲಯ್ತಾಯ್ ಸಿಕೇರಾಮಾ, ಆಮ್ಕಾಂ ಹಾಸೊ ಜಾಯ್. ‘ಸಿಂತಿಮೆಂತಾಳ್’ ಮ್ಹಳ್ಳೆಂ ಮ್ಹಜೆಂಚ್ ಏಕ್ ದುಕಾಭರಿತ್ ಯೂಟ್ಯೂಬ್ ಚ್ಯಾನೆಲ್ ಆಸಾ. ತಾಚೆಮಾರಿಫಾತ್ ಹಾಂವ್ ಆಮ್ಚ್ಯಾ ಸಮುದಾಯಾಂತ್ಲ್ಯಾ ಹರ್‍ಯೆಕ್ಲ್ಯಾಂಚಿ ದುಕಾಭರಿತ್ ಜಿಣಿ ಫಾಯ್ಸ್ ಕರ್‍ನ್ ಆಸಾಂ ಆನಿ ತಾಂಚ್ಯಾ ಸಮಸ್ಸ್ಯಾಂಕ್ ಪರಿಹಾರ್ ದೀವ್ನ್ ಆಸಾಂ. ದೆಕುನ್ ಮ್ಹಜ್ಯಾ ಚ್ಯಾನೆಲಾಕ್ ಜಾಯ್ತೆ ಸಬ್‌ಸ್ಕ್ರೈಬರ್‍ಸ್ ಆಸಾತ್” 

“ತಶೆಂ ತರ್ ಹ್ಯಾ ಪಾವ್ಟಿಂ ಮ್ಹಜಿ ಜಿಣಿ ಫಾಯ್ಸ್ ಕರಾ ಸಂಪಾದಕಾಂನೋ. ಹ್ಯಾ ಮಾರಿಫಾತ್ ವೆಗಿಂಚ್ ಮ್ಹಜೆ ಸಮಸ್ಸೆ ಪರಿಹಾರ್ ಜಾಂವ್ದಿತ್ ಆನಿ ಹಾಂವ್ ವೆಗಿಂಚ್ ವಿನೋದ್ ಬರೊಂವ್ಕ್ ಸಕೊಂದಿ”

“ಕಿತೆಂ ಉಲಯ್ತಾಯ್ ಸಿಕೇರಾಮಾ. ಹೆಂ ಪತ್ರ್ ಸುರು ಕೆಲ್ಯಾ ಉಪ್ರಾಂತ್ ಹ್ಯಾ ಚ್ಯಾನೆಲಾರ್ ಸಾಂಕಳ್ ಕಾಣಿಯೆ ರುಪಾರ್ ಫಾಯ್ಸ್ ಜಾವ್ನ್ ಆಸ್ಚಿ ಮ್ಹಜಿಚ್ ದುಕಾಭರಿತ್ ಕಾಣಿ. ಆನಿ ತಿ ವೆಗ್ಗಿಂಚ್ಯಾಕ್ ಆಖೇರ್ ಜಾಂವ್ಚೆಬರಿ ನಾ. ತುಂ ತುಜ್ಯೆ ದುಕಾಭರಿತ್ ಜಿಣಿಯೆಖಾತಿರ್ ದುಸ್ರೆಂ ಚ್ಯಾನೆಲ್ ಸೊಧ್ ಆನಿ ಮ್ಹಾಕಾ ವೆಗಿಂಚ್ ವಿನೋದ್ ಧಾಡ್”.

ದುಸ್ರೆಕಡೆನ್ ರೆತಿರೆಕ್ ವಚ್ ಮ್ಹಳ್ಳೆಂ ತರ್ ಮಾಂವಾಂಕ್ ಘೆವ್ನ್ ವೆತೊಂ ಆಸ್‌ಲ್ಲೊಂ. ದುಸ್ರ್ಯಾ ಚ್ಯಾನೆಲಾಕ್ ಸೊಧ್ ಮ್ಹಣ್ತಾನಾ ಮ್ಹಾಕಾ ಖಂಯ್ ನಾತ್‌ಲ್ಲೊ ರಾಗ್ ಆಯ್ಲೊ. ಪುಣ್ ತಕ್ಶಣ್ ಮ್ಹಜ್ಯಾ ವಾಟ್ಸಾಪಾಕ್ ಸಂಪಾದಕಾಚಿ ಮೆಸೇಜ್ ಆಯ್ಲಿ. ತಾಂತುಂ ಏಕ್ ಯೂಟ್ಯೂಬಾಚೆಂ ಲಿಂಕ್ ಆನಿ ಇಮೇಯ್ಲ್ ವಿಳಾಸ್ ಆಸ್‌ಲ್ಲೊ ಆನಿ ಮೆಸೆಜಿಂತ್ ಅಶೆಂ ಬರಯಿಲ್ಲೆಂ – ಹಾಂಗಾಸರ್ ‘ಸಮಸ್ಸ್ಯಾಂಕ್ ಪರಿಹಾರ್’ ಮ್ಹಳ್ಳೆಂ ಏಕ್ ಯೂಟ್ಯೂಬ್ ಚ್ಯಾನೆಲ್ ಆಸಾ. ತಾಂಕಾಂ ತುಜೆ ಸಮಸ್ಸೆ ಏಕ್ ವೀಡಿಯೋ ಕರ್‍ನ್ ಧಾಡ್ ಆನಿ ತೆ ತಾಂಚ್ಯಾ ಚ್ಯಾನೆಲಾರ್ ಪ್ರಚಾರ್ ಕರ್‍ನ್ ತುಕಾ ಪರಿಹಾರ್ ದಿತಾತ್. ಆಜ್‌ಚ್ ಕರ್ ಆನಿ ಫಾಲ್ಯಾಂ ಸಕಾಳಿಂ ಭಿತರ್ ತುಜೊ ವಿನೋದ್ ಧಾಡ್.

ಸಂಪಾದಕಾಚಿ ಮೆಸೇಜ್ ವಾಚುನ್ ಮ್ಹಾಕಾ ತಾಚಿ ಬಿರ್ಮತ್ ದಿಸ್ಲಿ. ತಾಚಿಚ್ ಕಶ್ಟಾಂಚಿ ಜಿಣಿ ಆಸ್ತಾನಾಂಯ್ ತಾಕಾ ಮ್ಹಜೆರ್ ಹುಸ್ಕೊ ಆಸಾ. ದೆಕುನ್ ತ್ಯೆಚ್ ರಾತಿಕ್ ಸಕ್ಕಡ್ ನಿದ್ಲ್ಯಾ ಉಪ್ರಾಂತ್ ಹಾಂವ್ ವಳೂ ಕಾಕ್ಸಾಕ್ ಗೆಲೊಂ ಆನಿ ಮ್ಹಜೆ ಸಮಸ್ಸೆ ರೆಕೋರ್ಡ್ ಕರ್‍ನ್ ತಕ್ಶಣ್ ತ್ಯಾ ಇಮೇಯ್ಲ್ ವಿಳಾಸಾಕ್ ಧಾಡ್ಲೆ. ಧಾ ಮಿನುಟಾಂ ಉತ್ರಜೆ ತರ್ ಮ್ಹಜ್ಯಾ ಮೊಬಾಯ್ಲಾಕ್ ಫೊನ್ ಆಯ್ಲೆಂ. ಕೊಣಾಚೆಂ ಮ್ಹಣ್ ಪಾರ್ಕುಂಚ್ಯಾ ಆದಿಂಚ್ ಮಾಂವಾಕ್ ಜಾಗ್ ಜಾಯ್ತ್ ತಕ್ಶಣ್ ಕಾಡ್ಲೆಂ ಆನಿ ಹಲೋ ಮ್ಹಳೆಂ.

“ಹಲೋ ಜಾಂವ್ಯಾಂನೋ, ಹಾಂವ್ ತುಜಿ ಸಾಸುಮಾಂಯ್ ಉಲಯ್ತಾಂ. ‘ಸಮಸ್ಸ್ಯಾಂಕ್ ಪರಿಹಾರ್’ ಮ್ಹಳ್ಳೆಂ ತೆಂ ಚ್ಯಾನೆಲ್ ಮ್ಹಜೆಂಚ್. ತುಜೆ ಸಮಸ್ಸೆ ಆಯ್ಕೊನ್ ಮ್ಹಾಕಾ ಮ್ಹಜ್ಯಾ ಸಮಸ್ಸ್ಯಾಂಕ್ ಪರಿಹಾರ್ ಮೆಳ್ಳೊ. ಮ್ಹಜೆ ಉಪದ್ರ್ ತಡ್ವೊಂಕ್ ಜಾಯ್ನಾಸ್ತಾಂ ತುಜೊ ಮಾಂವ್ ಮ್ಹಾಕಾ ಸಾಂಗನಾಸ್ತಾನಾಂಚ್ ಗೆಲ್ಲೊ. ತಾಣೆಂ ಮೊಬಾಯ್ಲ್ ನಂಬರ್ ಸಯ್ತ್ ಬದ್ಲಿಲ್ಲ್ಯಾನ್ ತೊ ಖಂಯ್ ಗೆಲಾ ಮ್ಹಳ್ಳಿಚ್ ಖಬರ್ ನಾತ್‌ಲ್ಲಿ. ಹಾಂತುಂ ತುಜ್ಯೆ ಬಾಯ್ಲೆಚೊಯ್ ಹಾತ್ ಆಸಾ. ಪುಣ್ ತುವೆಂ ಧಾಡ್‌ಲ್ಲ್ಯಾ ವೀಡಿಯೋಥಾವ್ನ್ ಆತಾಂ ತೊ ಖಂಯ್ ಆಸಾ ಮ್ಹಣ್ ಕಳ್ಳೆಂ. ದೆಕುನ್ ಫಾಲ್ಯಾಂಚ್ ಹಾಂವ್ ತುಮ್ಗೆರ್ ಯೆತಾಂ. ಹೊ ವೀಡಿಯೋ ಧಾಡ್‌ಲ್ಲ್ಯಾಕ್ ತುಕಾ ದೇಬ್ರೆರುಂ”.

ಸಾಸುಮಾಂಯ್ನ್ ಸಾಂಗೊನ್ ಮುಗ್ದಿತಾನಾ ಮ್ಹಾಕಾ ಒಂದಕ್ಕೆ ಎರಡಕ್ಕೆ ದೊನೀ ಸಾಂಗಾತಾ ಜಾಲೆಂ. ಕಾಕ್ಸಾಂತ್‌ಚ್ ಆಸ್‌ಲ್ಲ್ಯಾನ್ ವಾಂಚ್ಲೊಂ. ದುಸ್ರ್ಯಾಚ್ ದಿಸಾ ಫಾಂತ್ಯಾರ್ ಸಾಸುಮಾಂಯ್ ಘರಾ ಆಯ್ಲಿಚ್. ‘ಸರ್‌ಪ್ರೈಸ್’ ಮ್ಹಣ್ ಮ್ಹಜ್ಯಾ ಮಾಂವಾಕ್ ಸರ್‌ಪ್ರೈಸ್ ದಿತಾನಾ ಆತಾಂ ತಾಕಾ ಒಂದಕ್ಕೆ ಎರಡಕ್ಕೆ ಜಾಲೆಂ. ತಿಣೆಂ ಯೇವ್ನ್ ಮ್ಹಜ್ಯಾ ಮಾಂವಾಚ್ಯಾ ಕಾನಾಕ್ ಧರ್‍ನ್ ಘರಾ ಆಪೊವ್ನ್ ವ್ಹರ್‍ಚಿ ಸೀನ್ ಪಳಯ್ತಾನಾ ಮ್ಹಜ್ಯೆ ಮತಿಂತ್ ಏಕ್ ಹುನೊನಿಂ ವಿನೋದ್ ತಯಾರ್ ಜಾವ್ನ್ ಜಾಲ್ಲೊ. ಪುಣ್ ಹ್ಯಾ ಪಾವ್ಟಿಂ ಹಾಂವೆಂ ತೊ ವಿನೋದ್ ಬರೊಂವ್ಕ್ ನಾ. ಬಗಾರ್ ಹಾಂವೆಂ ಘಡಿಯೆನ್ ಮ್ಹಜೆಂ ಮೊಬಾಯ್ಲ್ ಕಾಡ್ಲೆಂ ಆನಿ ಕೆಮೆರಾ ಓನ್ ಕರ್‍ನ್ ತೊ ವಿನೋದ್ ರೆಕೋರ್ಡ್ ಕೆಲೊ ಆನಿ ತ್ಯೆಚ್ ಘಡಿಯೆ ಉಗಡ್ಲೆಂ ಮ್ಹಜೆಂ ಕೊಂಕ್ಣಿ ಯೂಟ್ಯೂಬ್ ಚ್ಯಾನೆಲ್ ‘ಹಾಸ್ಯ್ ಎಟ್ಯಾಕ್’.

ಹಾಂವೆಂ ಮ್ಹಜೆಂ ಏಕ್ ‘ಗುಡ್ ನ್ಯೂಜ್’ ಮ್ಹಳ್ಳೆಂ ಯೂಟ್ಯೂಬ್ ಚ್ಯಾನೆಲ್ ಸುರು ಕೆಲಾಂ ಆನಿ ತಾಂತುಂ ಮ್ಹಜೆ ಶೆರ್ಮಾಂವ್ ಆಸಾತ್. ತುವೆಂ ತಾಂತ್ಲೆ ಶೆರ್ಮಾಂವ್ ಆಯ್ಕೊನ್ ‘ಲೈಕ್ಸ್, ಕಮೆಂಟ್ ಆನಿ ಶೇರ್’ ಕರಿಜೆ.

✍️ –ರೋಶು, ಬಜ್ಪೆ