ಹಾಂಕಾಂ ಥೊಡಿಂ ‘ರಾಯ್’ ಮ್ಹಣ್ತಾತ್ ತರ್, ಹೆರ್ ಥೊಡಿಂ ‘ಜ್ಯೊತಿಷಿ’ ಮ್ಹಣ್ತಾತ್. ಹಾಂಕಾಂ ‘ಜಾಣ್ತೆ’ ಮ್ಹಣ್ಚಿಂಯ್ ಆಸಾತ್. ಉದೆಂತಿಚ್ಯಾ ಗಾಂವಾ ಥಾವ್ನ್ ಪಯ್ಣ್ ಕರ್‍ನ್ ಯೆವ್ನ್ “ಜುದೆವಾಂಚೊ ರಾಯ್ ಜಾವ್ಚ್ಯಾಕ್ ಜಲ್ಮಲಾ ತೊ ಭುರ್ಗೊ ಖಂಯ್ ಆಸಾ? ಉದೆಲ್ಲೆಂ ತೆಂ ತಾಚೆಂ ನೆಕೆತ್ರ್ ಆಮಿ ದೆಖ್ಲೆಂ ಆನಿ ಆಮಿ ತಾಕಾ ನಮಸ್ಕಾರ್ ಕರುಂಕ್ ಮ್ಹಣ್ ಆಯ್ಲ್ಯಾಂವ್” ಮ್ಹಣುನ್ ಜೆರುಸಾಲೆಮಾಂತ್ ಹೆರೊದಿಚ್ಯಾ ರಾಜಾಂಗ್ಣಾಂತ್ ಸವಾಲ್ ಕೆಲ್ಲೆಚ್ ಹೆ, ಆಮಿ ‘ರಾಯ್,’ ‘ಜಾಣ್ತೆ,’ ಆನಿ ‘ಜ್ಯೊತಿಷ್’ ಮ್ಹಣ್ ವೊಲಾಯ್ಲಲೆ ಮಾನೆಸ್ತ್ (ಮಾತೆವ್ 2;1-2). ಪವಿತ್ರ್ ಪುಸ್ತಕಾಂತ್ ತೆ ಕಿತ್ಲೆ ಜಣ್?, ತಾಂಚಿಂ ನಾಂವಾಂ ಕಿತೆಂ? ತೆ ರಾಯ್‌ಗಿ? ಹ್ಯೆ ವಿಶಿಂ ಕಿತೆಂಚ್ ವಿವರ್ ನಾ. ತರ್‌ಯಿ ಹ್ಯೆ ವಿಶಿಂ ಕಾಣಿಯಾಂಕ್ ಕಾಂಯ್ ಬರ್‍ಗಾಲ್ ನಾ. ಸುವಾರ್ತೆಕಾರ್ ಮಾತೆವಾಕ್‌ಚ್ ಮಹತ್ವಾಚ್ಯೊ ಮ್ಹಣ್ ದಿಸನಾಸ್ಲ್ಯಾ ಗಜಾಲಿಂ ವಿಶಿಂ ಮಹತ್ವ್ ದಿಂವ್ಕ್ ಮನ್ ಯೆನಾ. ಹ್ಯಾ ಲೇಕನಾಂತ್, ಮಾತೆವಾನ್ ದಿಲ್ಲ್ಯಾ ಉದೆಂತಿಚ್ಯಾ ಜ್ಯೊತಿಷ್ಯಾಂಚ್ಯೆ ಕಾಣಿಯೆಚೆಂ ಚಾರಿತ್ರಿಕ್ಪಣ್ ಸೊಧುನ್ ಕಾಡ್ಚೊ ಉದ್ದೇಶ್ ಭಿಲ್ಕುಲ್ ನಾ ಆನಿ ತೆಂ ಚಡ್ ಮಟ್ಟಾಕ್ ಸಾಧ್ಯ್‌ಯಿ ನಾ. ಪುಣ್ ತಾಚೊ ದೇವ್‌ಶಾಸ್ತ್ರೀಯ್ ಉದ್ದೇಶ್ ಮಾತ್ರ್ ಸೊಧುನ್ ಕಾಡುಂಕ್‌ಚ್ ಜಾಯ್. ಹ್ಯೆ ದಿಶೆನ್ ಹೆಂ ಲೇಕನ್ ಉಜ್ವಾಡ್ ಫಾಂಕೊಂವ್ಕ್ ಸೊಧ್ತಾ.

ಕೊಣ್ ಹೆ “ಮಾಗೊಯ್”

ನವ್ಯಾ ಸೊಲ್ಲ್ಯಾಚ್ಯಾ ಥೊಡ್ಯಾ ಇಂಗ್ಲಿಷ್ ಆವೃತ್ತ್ಯಾಂನಿ ಬಹುವಚನಾಚೆಂ ಗ್ರೇಕ್ “ಮಾಗೊಯ್” ಮ್ಹಳ್ಳೆಂ ಉತರ್, “ಜಾಣ್ತೆ” (ವೈಸ್ ಮೆನ್) ಮ್ಹಣ್ ಭಾಷಾಂತರ್ ಕೆಲಾಂ. ಪುಣ್, ಕೊಂಕ್ಣಿ ನವ್ಯಾ ಸೊಲ್ಲ್ಯಾಂತ್ ವಾಪರ್‍ಲಲೆಂ “ಜ್ಯೋತಿಷ್” ಉತರ್ ಸಾರ್ಕೆಂ ಆನಿ ಸೂಕ್ತ್ ಮ್ಹಣ್ ಮ್ಹಾಕಾ ಭೊಗ್ತಾ. ದೇವ್ ಶಾಸ್ತ್ರೀಯ್ ನದ್ರೆನ್‌ಯಿ ‘ರಾಯ್’ ವಾ ‘ಜಾಣ್ತೆ’ ಹಾಂಚ್ಯೆ ಬದ್ಲಾಕ್ “ಜ್ಯೋತಿಷ್” ಉತರ್ ಸಾರ್ಕೆಂ ಬಸ್ತಾ ತೆಂ ಆಮಿ ಉಪ್ರಾಂತ್ ಪಳೆತಲ್ಯಾಂವ್. ಕಾಲ್ದೇಯಾ ವಾ ಪರ್ಶಿಯಾಗಾರ್ ಭವಿಷ್ಯ್ ಸಾಂಗ್ಪಾಕ್ ಆನಿ ಜ್ಯೊತಿಷ್ಯಾಕ್ ಪ್ರಸಿದ್ಧ್ ಆಸ್ಲೆ. ರೋಮಿ ಆನಿ ಗ್ರೇಕ್ ಲೋಕ್ ಕಾಲ್ದೆಯಾಗಾರಾಂಚ್ಯಾ ಜ್ಯೊತಿಷ್ಯಾಂ ಸಂಗಿಂ ಆನಿ ತಾಂಚ್ಯಾ ಮ್ಯಾಜಿಕ್ ಕರ್‍ಚ್ಯೆ, ತಾಂಚ್ಯಾ ಭವಿಷ್ಯ್ ಸಾಂಗ್ಚ್ಯೆ, ಸಪ್ಣಾಂ ವಿವರುಂಚ್ಯೆ ಆನಿ ಹೆರ್ ಜಾಣ್ವಾಯೆಚ್ಯೆ ಸಕ್ತಿ ಥಂಯ್ ಸಳಾವಳ್ ದವರ್‍ನ್ ಆಸ್ಲೆ ಮ್ಹಳ್ಳ್ಯೆ ವಿಶಿಂ ಪುರಾತನ್ ಬರ್‍ಪಾಂನಿ ಧಾರಾಳ್ ಪುರಾವೆ ಆಸಾತ್. ರೊಮಿ ಅಧಿಕಾರಿ ತಾಂಕಾಂ ಮಾನಾನ್ ಲೆಕ್ತಾಲೆ ಮ್ಹಳ್ಳ್ಯೆ ವಿಶಿಂ ಆನಿ ಹೆರೊದ್ ವರ್ತೊ ರಾಯ್ ಅಜುದೆವ್ ವಾ ಪರ್ಗಾಂವಿ ಶಹರಾಂಕ್ ಉದಾರಿ ಆಸ್ಲೊ ಮ್ಹಣ್‌ಯಿ ಚರಿತ್ರಾ ಆಸಾ. ಮಾತೆವ್ ಸುವಾರ್ತೆಗಾರ್ ಹೆ “ಜ್ಯೋತಿಷ್” ಉದೆಂತಿಚೆ ಮ್ಹಣ್ ಮಾತ್ರ್ ಮ್ಹಣ್ತಾ. ದೆಕುನ್, ಹೆ ಸುವಾರ್ತೆಂತ್ಲೆ ಉದೆಂತಿಚೆ “ಜ್ಯೊತಿಷ್,” ವಾ “ಮಾಗೊಯ್” ಉದೆಂತಿಚ್ಯಾ ಖಂಯ್ಚ್ಯಾ ಗಾಂವ್ಚೆ ಆಸ್ಯೆತ್ ಮ್ಹಳ್ಳ್ಯೆ ವಿಶಿಂ ವಿವಿಂಗಡ್ ಸುಚನಾಂ ಆಸ್ಲ್ಯಾರ್‌ಯಿ, ಚಡಾವತ್ ಜಾಣಾರಿ ತೆ ಉದೆಂತಿಚ್ಯಾ ಎಕಾ ಯಾಜಕಿ ವರ್ಗಾಕ್ ಸೆರ್‍ವಲ್ಲೆ ಜ್ಯೋತಿಷ್ ಆಸುನ್ ಪರ್ಶಿಯಾ ಆನಿ ಬಾಬಿಲೊನ್ ಪ್ರದೆಶಾಚೆ ವಾ ಗಾಂವ್ಚೆ ಆಸ್ಯೆತ್ ಮ್ಹಣ್ತಾತ್. ಜ್ಯೊತಿಷ್ಯಾಂ ವಾ ವಿಶೇಸ್ ಮಿಸ್ತೆರಾಭರಿತ್ ಆಧ್ಯಾತ್ಮಿಕ್ ಜಾಣ್ವಾಯ್ ಆಸ್ಪಿ ವ್ಯಕ್ತಿಂ ಸಂಬಂಧಿಂ ಪವಿತ್ರ್ ಪುಸ್ತಕಾಚೆ ವಿವಿಧ್ ಉಲ್ಲೇಕ್‌ಯಿ ವರೊವ್ನ್ ಪಳೆವ್ನ್ ಹಾಂಗಾಸರ್ ಸುಚಯ್‌ಲ್ಲ್ಯೊ ಗಜಾಲಿ ದೆಕ್ಚೆಂ ಸೂಕ್ತ್ (ದಾಖ್ಲ್ಯಾಕ್, ಗಣನಾ 24:17; ಜೋಬ್ 1:3 ಮ್ಹಣ್ಣ್ಯೊ 30:1; 31:1). 

ಪಾಠ್, ಪರಿಸ್ಥಿತಿ ಆನಿ ಪ್ರತಿಕ್ರಿಯಾ (ಮಾತೆವ್ 2:1-12)

ಸುವಾರ್ತೆಂತ್, ಉದೆಂತಿಚೆ ಥೊಡೆ ಜ್ಯೊತಿಷ್ ಎಕಾ ನೆಕೆತ್ರಾಚ್ಯಾ ಉಜ್ವಾಡಾನ್ ಹೆರೊದ್ ವರ್ತ್ಯಾಚ್ಯಾ ರಾವ್ಳೆರಾಕ್ ಯೆವ್ನ್ ‘ಜುದೆವಾಂಚೊ ರಾಯ್ ಜಾಂವ್ಚ್ಯಾಕ್ ಜಲ್ಮಲ್ಲ್ಯಾ’ ಬಾಳ್ಕಾವಿಶಿಂ ಖಬರ್ ಕಾಡ್ತಾತ್. ಬೆತ್ಲೆಹೆಮಾಂತ್ ಮ್ಹಣುನ್ ಕಳಿತ್ ಜಾತಚ್ ಥಂಯ್ಸರ್ ವಚುನ್ ಮರಿಯೆ ಸಂಗಿಂ ಆಸ್ಚ್ಯಾ ಬಾಳ್ಕಾಕ್ ದೆಕುನ್ ತಾಕಾ ನಮಸ್ಕಾರ್ ಕರ್‍ತಾತ್. ಹೆರೊದಿಚ್ಯೆ ಫಸವ್ಣೆಕ್ ವಳಗ್ ಜಾಯ್ನಾಸ್ತಾಂ ತೆ ಪಾಟಿಂ ಪರ್ತತಾತ್. ಸುವಾರ್ತೆಚೊ ಪಾಠ್, ಏಕ್ ಆಪುರ್ಬಾಯೆಚಿ ಕಾಣಿ. ಹ್ಯಾ ಪಾಠಾಂತ್ ಜೆಜು, ದಾವಿದಾಚ್ಯೆ ಕುಳಿಯೆಚೊ ರಾಯ್ ಮ್ಹಳ್ಳಿ ಗಜಾಲ್ ವ್ಯಕ್ತ್ ಜಾತಾ (ಮಾತೆವ್ 2:2, 6; ಮಾತೆವ್ 2:11 ಆನಿ ಕೀರ್ತನ್ 45:7-9; 71:15). ಹೆರೊದ್ ರಾಯಾ ಆನಿ ಜೆಜು ರಾಯಾ ಮಧ್ಲೊ ತಫಾವತ್ ಹೆರೊದ್ ರಾಯಾನ್ ಜೆಜು ರಾಯಾಕ್ ದಿಲ್ಲ್ಯೆ ಪ್ರತಿಕ್ರಿಯೆಂತ್ ವ್ಯಕ್ತ್ ಜಾತಾ ಆನಿ ಜ್ಯೊತಿಷ್ಯಾಂನಿ ಹೆರೊದ್ ಆನಿ ಜೆಜು ರಾಯಾಕ್ ದಿಲ್ಲ್ಯೆ ಪ್ರತಿಕ್ರಿಯೆಂತ್ ಸ್ಪಷ್ಟ್ ಜಾತಾ. ಹೆರೊದ್ ರಾಯ್ ಹಿಕ್ಮತಿಚೊ ಆನಿ ಹಿಂಸೆಚೊ ಮ್ಹಣುನ್ ಸಾಂಗುನ್ ದಿಲಾಂ (ಮಾತೆವ್ 2:8, 16). ಪುಣ್, ಜೆಜು, ಖರೆಪಣಿ, ಕಾಯ್ದ್ಯಾನುಸಾರ್ ದಾವಿದಾಚ್ಯೆ ಬಸ್ಕೆಚೊ ವಾರಿಸ್ದಾರ್ ಆನಿ ರಾಯ್ ಜಾಂವ್ಕ್ ಜಲ್ಮಲ್ಲೊ (ಮಾತೆವ್ 2:2) ಮ್ಹಳ್ಳೆಂ ವ್ಯಕ್ತ್ ಜಾಲಾಂ.

ಜುದೆವ್ ನ್ಹಯ್ ಆಸ್ಲಲೆ (ಜೆಂತಿಲ್), ಭಾಯ್ಲೆ, ಉದೆಂತಿಚೆ ಜ್ಯೋತಿಷ್ ಹಾಂಕಾಂ “ಜುದೆವಾಂಚೊ ರಾಯ್ ಜಾಂವ್ಚ್ಯಾಕ್ ಜಲ್ಮಲ್ಲೊ” ಕಳಿತ್ ಆಸಾ (ಮಾತೆವ್ 2:2). ಪುಣ್ ಹೆರ್, ಹೆರೊದ್ ಆನಿ “ತಾಚ್ಯೆ ಸಂಗಿಂ ಸಗ್ಳೆಂ ಜೆರುಸಾಲೆಮ್” ಜಿಂ, ಜೆಜು ಮೆಸ್ಸಿಯಾಚ್ಯಾ ಜಲ್ಮಾ ವಿಶಿಂ ಸುರ್‍ವೆರ್ ನೆಣಾರಿ ಆಸಾತ್ ಆನಿ ಉಪ್ರಾಂತ್ ಆಯ್ಕತಾನಾ “ಘಾಬರ್‍ಲಲಿಂ” ಜಾತಾತ್. ಪರ್ಗಾಂವಿ, ಜೆಜುಕ್ ನಮಸ್ಕಾರ್ ಕರುಂಕ್ ಪಾವ್ತಾತ್ ಪುಣ್ ಜುದೆವ್ ಜೆಜುಕ್ ಸಸಾರಾಯೆನ್ ದೆಕ್ತಾತ್ ಆನಿ ವಳ್ಕುಂಕ್ ಸಲ್ವತಾತ್. ಮಾತೆವಾಚ್ಯಾ ವಾಚ್ಪ್ಯಾಂಕ್ ಜಲ್ಮಲ್ಲ್ಯಾ ಸೊಡ್ವೊಣ್ದಾರಾ ಆನಿ ರಾಯಾ ಜೆಜುಕ್ ಜೊಕ್ತಿ ಪ್ರತಿಕ್ರಿಯಾ ದಿಂವ್ಚ್ಯಾಕ್ ಉದೆಂತಿಚ್ಯಾ ಜ್ಯೊತಿಷಾಂಚಿ ಪ್ರತಿಕ್ರಿಯಾ ಏಕ್ ನಮುನೊ ಜಾತಾ.

ಎಕಾ ಪ್ರವಾದಾಚೆಂ ಶೆವೊಟಾಕ್ ಪಾವಪ್

ಹ್ಯೆ ಕಾಣಿಯೆಂತ್ ಸುವಾರ್ತಾ ತೀನ್ ಪಾವ್ಟಿಂ ಬೆತ್ಲೆಹೆಮಾಚೊ ಉಲ್ಲೇಕ್ ಕರ್‍ತಾ. ಉದೆಂತಿಚೆ ಜ್ಯೊತಿಷ್, “ಜುದೆವಾಂಚೊ ರಾಯ್ ಜಾಂವ್ಚ್ಯಾಕ್ ಜಲ್ಮಲಾ ತೊ ಭುರ್ಗೊ ಖಂಯ್ ಆಸಾ? ಮ್ಹಳ್ಳ್ಯಾ ಸವಾಲಾಕ್ ಜಾಪ್ ಪವಿತ್ರ್ ಪುಸ್ತಕಾಂತ್‌ಚ್ ಆಸ್ಚಿ ಯಾಜಕ್ ಆನಿ ಶಾಸ್ತ್ರಿಂ ಸೊಧುನ್ ಕಾಡ್ತಾತ್. ಮಿಖಾ ಪ್ರವಾದಿಚಿಂ ಉತ್ರಾಂ, “ಪೂಣ್ ತುಂ ಬೆತ್ಲೆಹೆಮ್-ಎಫ್ರಾತಾ, ಜುದಾಚ್ಯಾ ಕುಳಿಯಾಂ ಮಧೆಂ ತುಂ ಭೋವ್ ಲ್ಹಾನ್, ತರ್‌ಯಿ ಇಸ್ರಾಯೆಲಾಚೆರ್ ರಾಜ್ವಟ್ ಚಲೊಂವ್ಚೊ ಆಸಾ ತೊ ಮ್ಹಾಕಾ ತುಜ್ಯೆ ಥಾವ್ನ್ ಜಲ್ಮತಲೊ. ತಾಚೊ ಆರಂಭ್ ನ್ಹಯ್ ಆತಾಂಚೊ, ಬಗರ್ ಭೋವ್ ಪುರ್ವಿಲ್ಯಾ ಕಾಳಾಂಚೊ,” ಮಾತೆವ್ ಕಾಂಯ್ ಬದ್ಲಾವಣೆ ಬರಾಬರ್ ವಾಪರ್‍ತಾ (ಮಿಖಾ 5:2). “ತುಜ್ಯೆ ಥಾವ್ನ್ ಉಬ್ಜತಲೊ ಏಕ್ ಫುಡಾರಿ, ಇಸ್ರಾಯೆಲಾಕ್, ಮ್ಹಜ್ಯೆ ಪರ್ಜೆಕ್, ಚಲಯ್ತಲೊ ಗೊವ್ಳಿ” ಮ್ಹಣ್ ಚಡಿತ್ ಮೆಳಯ್ತಾ (ಮಾತೆವ್ 2:5-6). “ಫುಡಾರಿ” ಆನಿ “ಗೊವ್ಳಿ” ಹಿಂ ಉತ್ರಾಂ ಸಾಂಗಾತಾ ಘಾಲ್ಪಾಂತ್ ಮಾತೆವಾನ್ ಸಾಮುಯೆಲ್ 5:2 ಆನಿ ಇತಿಹಾಸ್ 11:3 ಹಾಂಚೊ ಪಾತ್ರ್ ಆಸ್ಯೆತ್. ಮಾತೆವಾಚ್ಯೆ ಸುವಾರ್ತೆಂತ್, ದಾವಿದ್ ಕಶೆಂ ಲೊಕಾಚೊ ಗೊವ್ಳಿ ಜಾಲೊ ತಶೆಂ ಜೆಜುಯ್ ದಾವಿದಾಚ್ಯಾ ಘರಾಣ್ಯಾಂತ್ಲೊ ಆಸುನ್ ಲೊಕಾಚೊ ಗೊವ್ಳಿ ಮ್ಹಣುನ್ ಸಾಂಗುನ್ ದಿಲಾಂ. ಹ್ಯಾ ಮುಖಾಂತ್ರ್ ಮಾತೆವಾಚೆಂ ಜೆಜು ಥಂಯ್ ದೆವಾಚೆಂ ಉತರ್ ಶೆವೊಟಾಕ್ ಪಾವ್ಪಾಚೆಂ ವಾ ಸಂಪೂರ್ಣತಾಯೆಕ್ ಪಾವ್ಪಾಚೆಂ ದೇವ್‌ಶಾಸ್ತ್ರ್ ಪರ್ಗಟ್ ಜಾಲಾಂ.

ಸುವಾರ್ತೆಚೊ “ಬಾಳಕ್” ಆನಿ “ಭುರ್ಗೊ”: ಸುವಾರ್ತೆಂತ್ ಹೆರೊದ್ ಆನಿ ಜೆಜು ರಾಯಾ ಮಧ್ಲ್ಯಾ ತುಲನಾಂತ್ ವಿಶೇಸ್ ಉತ್ರಾಂಚೊ ಖೆಳ್ ಚಲ್ತಾ. ಹೆರೊದ್ ಆಪ್ಲೊ ಅಧಿಕಾರ್ ದಾಕೊಂವ್ಕ್ ವದ್ದಾಡ್ತಾ ಆನಿ ದೆವಾಚಿಂ ಯೋಜನಾಂ ನಿರ್ಫಳ್ ಕರುಂಕ್ ವಾವುರ್‍ತಾ. ಹ್ಯಾ ಮುಖಾಂತ್ರ್ ಆಪುಣ್ ಕಿತ್ಲೊ ಅಶಕ್ತ್ ಆನಿ ಅಧಿಕಾರಾವಿಣ್ ಮ್ಹಣ್ ಪಾಚಾರ್‍ತಾ. ಜೆಜು, ಹೆರೊದಿ ಪರಿಂ ಹಿಂಸೆಚೊ ನ್ಹಯ್ ಬಗರ್ ತೊ ಖಾಲ್ತೊ ಆನಿ “ಆಪ್ಲ್ಯೆ  ಪರ್ಜೆಕ್ ಚಲಯ್ತಲೊ ಗೊವ್ಳಿ” ಜಾತಾ (ಮಾತೆವ್ 2:6). ಮಾತೆವ್ ಜೆಜುಕ್ ಉದ್ದೇಶ್ ಪೂರ್ವಕಿಂ, “ಬಾಳಕ್” ವಾ “ಭುರ್ಗೊ” ಮ್ಹಣುನ್‌ಚ್ ಆಪಯ್ತಾ (ಮಾತೆವ್ 2:2, 8, 9, 11, 13 [ದೋನ್ ಪಾವ್ಟಿಂ], 14, 20 [ದೋನ್ ಪಾವ್ಟಿಂ], 21]. ಹೆರೊದ್ ಆನಿ ಜೆಜು ಮಧ್ಲೊ ತಫಾವತ್, ರಾಯ್ಪಣಾಚೆಂ ನವೆಂ ವ್ಯಾಕ್ಯಾನ್‌ಚ್ ದಿತಾ ಮ್ಹಣ್ಯೆತ್. ಕಿತ್ಯಾಕ್, ಅಸ್ಕತ್ಕಾಯ್ (ಬಾಳಕ್, ಭುರ್ಗೊ) ಮ್ಹಣ್ ದಿಸ್ಚೆಂ ನೀಜ್ ಅಧಿಕಾರ್ ಜಾಂವ್ಕ್ ಪಾವ್ತಾ ಆನಿ ಅಧಿಕಾರ್ ದಾಕೊವ್ಪ್ (ಹೆರೊದ್, ಜುದೆವ್ ಮುಖೆಲಿ) ಮ್ಹಣ್ ದಿಸ್ಚೆಂ ಖರಿ ಅಸ್ಕತ್ಕಾಯ್ ಜಾಂವ್ಕ್ ಪಾವ್ತಾ. ಹೆಂ ಮಾತೆವಾಚ್ಯೆ ಸುವಾರ್ತೆಚ್ಯಾ ದೇವ್‌ಶಾಸ್ತ್ರಾಕ್ ಸಾರ್ಕೆಂ ಜುಳ್ತಾ.

ಸುವಾರ್ತೆಂತ್ ಮೆತೆರ್‍ಪಣ್ ಸರ್ವಾಂಚೆಂ

ಉದೆಂತಿಚೆ ಜ್ಯೊತಿಷ್ ಭಾಯ್ಲೆ. ತೆ ಜುದೆವ್ ನ್ಹಯ್. ಮಾತೆವಾಚ್ಯೆ ಸುವಾರ್ತೆಂತ್ ಅನ್ಯ್‌ಲೊಕಾಕ್ ವಾ ಜುದೆವ್ ನ್ಹಯ್ ಆಸ್ಲಲ್ಯಾಂಕ್ ಸುವಾರ್ತಾ ಪರ್ಗಟ್ಣಿ ಪ್ರಮುಕ್ ದೇವ್‌ಶಾಸ್ತ್ರೀಯ್ ವಿಚಾರ್ ಮ್ಹಳ್ಳೆಂ ವಿಸ್ರುಂನಯೆ (1:3, 5-6; 3:9; 4:15; 8:10-12, 28; 28:19). ಉದೆಂತಿಚ್ಯಾ ಜ್ಯೊತಿಷಿಂನಿ ಯೆವ್ನ್ ಜೆಜುಕ್ ನಮಸ್ಕಾರ್ ಕರ್‍ಚ್ಯಾಂತ್ ಅನ್ಯ್‌ಲೊಕಾಚೆಂ ವಾ ಅಜುದೆವಾಂಚೆಂ ಸುವಾರ್ತೆಂತ್ ಮೆತೆರ್‍ಪಣ್ ಆನಿ ಜೆಜುಚ್ಯಾ ಜಲ್ಮಾಚ್ಯಾ ಸಂದೇಶಾಚೆಂ ಸಾರ್ವತ್ರಿಕ್‌ಪಣ್ ವ್ಯಕ್ತ್ ಜಾಲಾಂ. ಮಾತೆವಾಚ್ಯೆ ಸುವಾರ್ತೆಂತ್ಲೆ ಜ್ಯೊತಿಷ್, ಮೆಸ್ಸಿಯಾಚಿ ವಳಕ್ ನಾಸ್ಲಲ್ಯಾ, ಜೆಂತಿಲಾಂಕ್/ಜುದೆವ್ ನ್ಹಯ್ ಆಸ್ಲಲ್ಯಾಂಕ್ ವಾ ಹೆರ್ ಜಾತಿಚ್ಯಾಂಕ್ ಪ್ರತಿನಿಧಿತ್ವ್ ಕರ್‍ತಾತ್. ತರ್‌ಯಿ ತೆ ದೈವಿಕ್ ಸಂದೇಶ್‌ಕಾರಾ ಥಾವ್ನ್ ಪ್ರೇರಿತ್ ಜಾವ್ನ್, ಮಾತೆವಾಚೊ ಜೆಂತಿಲಾಂಕ್ ವಾ ಹೆರ್ ಜಾತಿಚ್ಯಾಂಕ್ ದೆವಾಚ್ಯಾ ಲೊಕಾ ಥಂಯ್ ಮೆಳೊಂವ್ಚೊ ಮಾತೆವಾಚೊ ಮೂಳ್ ಮಿಸಾಂವ್ ಸಂದೇಶ್ ಪರ್ಗಟ್ ಕರ್‍ತಾತ್.

‘ರಾಯ್,’ ‘ಜಾಣ್ತೆ’ ಆನಿ ‘ನೆಕೆತ್ರ್’

ಮಾತೆವಾಚ್ಯಾ ವಾಚ್ಪ್ಯಾಂಚ್ಯೆ ನದ್ರೆನ್ ಪಳೆತಾನಾ ಹೆ ಜ್ಯೊತಿಷಿ ಜಾಣ್ತೆ ವಾ ರಾಯ್ ಮ್ಹಣ್ ಮಾನ್ವುಂಚೆಂ ಸಾರ್ಕೆಂ ದಿಸನಾ ಬಗರ್ ಚಿಂತಪ್ ಹಾಚ್ಯೆ ವಿರೋಧ್ ವೆತಾ. ಸಾರ್ಕೆಂ ಪಳೆಲ್ಯಾರ್ ಸುವಾರ್ತೆಂತ್ಲ್ಯಾ ಜ್ಯೊತಿಷಿಂ ಲಾಗಿಂ ರಾಯ್ಪಣ್‌ಯಿ ನಾ, ಜಾಣ್ವಾಯ್‌ಯಿ ನಾ. ತೆ ನೆಕೆತ್ರಾನ್ ವಾಟ್ ವ್ಹೆಲ್ಲ್ಯೆ ವರ್ವಿಂ ಆಯ್‌ಲ್ಲೆ ವ್ಹಯ್ ಪುಣ್ ತಾಂಕಾಂ ಜೆಜು ಖಂಯ್ ಜಲ್ಮಲಾ ತೆಂ ಕಳಿತ್ ನಾ. ಪುಣ್ ತಾಂಕಾಂ ಸೊಧುನ್ ಕಾಡ್ಚಿ ಉರ್ಭಾ ಆಸಾ. ಮಾತೆವಾಕ್ ರಾಯ್ಪಣ್ ಆನಿ ಜಾಣ್ವಾಯ್ ಹ್ಯಾ ದೋನ್‌ಯಿ ಅಧಿಕಾರಾಚ್ಯಾ ಗಜಾಲಿಂ ಥಂಯ್ ವಿರೋಧ್ಪಣ್ ಆಸ್ಚೆಂ ದಿಸುನ್ ಯೆತಾ. ದೆಕುನ್, ಜರ್ ಕೊಣ್‌ಯಿ ತೆ ‘ಜಾಣ್ತೆ’ ಆನಿ ‘ರಾಯ್ಪಣ್ ಆಸ್ಚೆ’ ದೆಕುನ್ ದೆವಾಚ್ಯೆ ಕಾಕುಳ್ತಿಕ್ ಪಾತ್ರ್ ಜಾಲೆ ಮ್ಹಣ್ಚೆಂ ಸುವಾರ್ತೆಚ್ಯಾ ಜಿನೊಸಾಕ್‌ಚ್ ವಿರೋಧ್ ಮ್ಹಣ್ಯೆತ್. ಹ್ಯೆ ದಿಶೆನ್ ಜೆಜುಚಿಂ ಮಾತೆವಾಚ್ಯೆ ಸುವಾರ್ತೆಂತ್ಲಿಂ ಉತ್ರಾಂ ಪಳೆಯಾ: “ಬಾಪಾ, ಸರ್ಗಾ ಸಂಸಾರಾಚ್ಯಾ ಧನಿಯಾ, ಜಾಣ್ತ್ಯಾಂ ಆನಿ ಬುದ್ವಂತಾಂ ದಾವ್ನ್ ಲಿಪೊವ್ನ್ ದವರ್‌ಲ್ಲ್ಯೊ ಹ್ಯೊ ಸಂಗ್ತಿ ಲ್ಹಾನಾಂಕ್ ತುವೆಂ ಉಗ್ಡಾಪ್ಯೊ ಕೆಲ್ಲ್ಯೆ ಖಾತಿರ್ ಹಾಂವ್ ತುಕಾ ಅರ್ಗಾಂ ದಿತಾಂ” (ಮಾತೆವ್ 11:25). ಜ್ಯೊತಿಷಿಂನಿ ಪಾಟ್ಲಾವ್ ಕರ್‍ನ್ ಆಯ್‌ಲ್ಲೆಂ ತೆಂ ನೆಕೆತ್ರ್, ಏಕ್ ಶಿಮ್ಟೆ-ನೆಕೆತ್ರ್ ನ್ಹಯ್ ವಾ ನೆಕೆತ್ರಾ ಪಾವ್ಸ್ (ಉಲ್ಕೆ) ತಸಲೆಂ ಏಕ್ ಪ್ರಾಕೃತಿಕ್ ವಾ ನೈಸರ್ಗಿಕ್ ದಿಸ್ಪಾವಸ್ತ್ (ಫೆನೊಮಿನನ್)ಯಿ ನ್ಹಯ್ (ತೆಂ ಜೆಜು ಆಸ್ಲಲ್ಯೆ ಕಡೆನ್ “ರಾವುಂಕ್” ಸಕನಾ ಮಾತೆವ್ 2:9-10), ವಾ ತಾಂಚ್ಯೆ ಜ್ಯೊತಿಷಿ ಜಾಣ್ವಾಯೆಕ್ ಝಳ್ಕಲ್ಲಿ ಏಕ್ ಸರ್ಗಿಂಚಿ ಖುಣಾಯ್ ನ್ಹಯ್. ತ್ಯಾ ಪುರ್ವಿಲ್ಯಾ ಕಾಳಾರ್ ನೆಕೆತ್ರಾಂಯ್ ಏಕ್ ಜಿವ್ಯೊ ಗಜಾಲಿ ಮ್ಹಣ್ ಲೋಕ್ ಮಾನ್ತಾಲೊ ದೆಕುನ್ ಜುದೆವ್ ಬರ್‍ಪಾಂ ಪ್ರಕಾರ್ ಹಾಂಕಾಂ ಏಕ್ ಭಡ್ವೊ ಮ್ಹಣುನ್‌ಯಿ ಮಾನ್ತಾಲೊ. ದೆಕುನ್ ಮಾತೆವ್ 2:9-10 ತ್ ವಿವರಿಲ್ಲಿ ಗಜಾಲ್ ಏಕ್ ಭಡ್ವೊ ಮ್ಹಣುನ್ ಸಾಂಗ್ಚೆಂ ಚಡ್ ಸೂಕ್ತ್ ದಿಸ್ತಾ.

ದೋನ್ ಮಿಟಿಂಗಾಂ, ಪಾಶಾಂವಾಚಿಂ ಖುಣಾಂ

 ಜೆಜುಚ್ಯಾ ಜಲ್ಮಾಚಿ ಖಬರ್ ಆಯ್ಕುನ್ ಹೆರೊದಿಚೆಂ ವರ್ತನ್ ವಾ “ಹೆರೊದ್ ರಾಯ್ ಸಗ್ಳೊ ಘಾಬರ್‍ಲೊ ಆನಿ ತ್ಯೆಚ್ ಪರಿಂ ಸಗ್ಳೆಂ ಜೆರುಜಲೆಮ್” ಮ್ಹಳ್ಳಿ ಉತ್ರಾಂ, ರಾಯಾನ್ ಆಪ್ಲ್ಯಾ ಅಧಿಕಾರಾಕ್ ಕುರಾಡ್ ಲಾಗ್ಲ್ಯಾ ಮ್ಹಣ್ ಚಿಂತ್ಚೆಂ ಸುಚಯ್ತಾತ್. ಫುಡೆಂ ರಾಯಾನ್ ಕಿತೆಂ ಕೆಲೆಂ ತೆಂ ಹಾಂಗಾಸರ್ ಪ್ರಮುಖ್ ಜಾತಾ. “ತವಳ್ ಹೆರೊದಿನ್ ಪ್ರಮುಖ್ ಯಾಜಕಾಂಕ್ ಆನಿ ಲೊಕಾಚ್ಯಾ ಶಾಸ್ತ್ರ್ಯಾಂಕ್ ಸಾಂಗಾತಾ ಆಪಯ್ಲೆ ಆನಿ ಕ್ರಿಸ್ತ್ ಖಂಯ್ ಜಲ್ಮುಂಚೊ ಆಸ್ಲೊ ತ್ಯೆ ವಿಶಿಂ ತಾಂಚ್ಯೆ ಲಾಗಿಂ ವಿಚಾರ್ ಕೆಲೊ” (ಮಾತೆವ್ 2:4). ಹಿಂ ಉತ್ರಾಂ ಆಮಿ ಸುವಾರ್ತೆಚ್ಯಾ ಶೆವೊಟಾಕ್ ಯೆಂವ್ಚ್ಯಾ ಉತ್ರಾಂಕ್ ತುಲನ್ ಕರುಂಕ್ ಜಾಯ್: “ಹೆಣೆಂ ಪ್ರಧಾನ್ ಯಾಜಕ್ ಆನಿ ಜುದೆವಾಂಚೆ ಮ್ಹಾತ್ಬಾರಿ ಕಾಯಿಫಾಸ್ ನಾಂವಾಚ್ಯಾ ಶ್ರೇಷ್ಠ್ ಯಾಜಕಾಚ್ಯೆ ಘರಿಂ ಜಮೊ ಜಾಲೆ, ಆನಿ ಜೆಜುಕ್ ಹಿಕ್ಮತೆನ್ ಧರುಂಕ್ ಆನಿ ಜಿವೆಶಿಂ ಮಾರುಂಕ್ ತಾಂಣಿಂ ಗುಟ್ಮಳ್ ಕೆಲೊ” (ಮಾತೆವ್ 26:3-4). ಸುವಾರ್ತೆಚ್ಯೆ ಸುರ್‍ವಾತೆರ್ ಆನಿ ಶೆವೊಟಾಕ್ ಜಾಂವ್ಚ್ಯೊ ದೋನ್ ಜಮಾತಿ ವಾ ದೋನ್ ಮಿಟಿಂಗಾಂ ಸಗ್ಳ್ಯೆ ಸುವಾರ್ತೆಕ್ ದಿಶಾ ದಿತಾತ್. ದೋನ್‌ಯಿ ಮಿಟಿಂಗಾಂ ಜೆಜುಚ್ಯಾ ಕಷ್ಟಾಂ ಮರ್‍ಣಾಕ್ ಬೊಟ್ ಕರ್‍ತಾತ್. ಏಕ್ ಮಿಟಿಂಗ್ ಆನ್ಯೆಕಾಚೆಂ ವಿವರಣ್ ಜಾತಾ. ಮಾತೆವಾಂತ್ ಜೆಜುಚ್ಯಾ ಜಲ್ಮಾಚೊ ಪಾಠ್ ಜೆಜುಚ್ಯಾ ಕಷ್ಟಾಂ ಮರ್‍ಣಾ ಜಿವಂತ್ಪಣಾಚೆಂ ವೊಕ್ಲ್ ದವರುನ್ ವಾಚುಂಕ್ ಹಾಂಗಾಸರ್ ಸುಚನ್ ಮೆಳ್ತಾ.

ನಮಸ್ಕಾರಾಚ್ಯೆ ಕಾಣಿಯೆಚಿ ಸುವಾರ್ತಾ

ಉದೆಂತಿಚೆ ಜ್ಯೊತಿಷ್ “ಆಮಿ ತಾಕಾ ನಮಸ್ಕಾರ್ ಕರುಂಕ್ ಮ್ಹಣ್ ಆಯ್ಲ್ಯಾಂವ್” ಮ್ಹಣ್ತಾತ್ (ಮಾತೆವ್ 2:2). ಶೆಕಿಂ, ತಾಣಿಂ “ಬಾಳ್ಕಾಕ್ ತಾಚ್ಯೆ ಆವಯ್ ಮರಿಯೆ ಸಾಂಗಾತಾ ದೆಖ್ಲೊ ಆನಿ ಸರ್ಪಡುನ್ ತಾಕಾ ನಮಸ್ಕಾರ್ ಕೆಲೊ. ಉಪ್ರಾಂತ್ ಆಪ್ಲಿಂ ದಿರ್ವ್ಯಾಂಚಿಂ ಚಿಲಾಂ ಉಗ್ತಿಂ ಕರ್‍ನ್ ತಾಂಣಿಂ ತಾಕಾ ಅರ್ಪಿಲ್ಯೊ ಕಾಣಿಕೊ: ಭಾಂಗಾರ್, ಧುಂಪ್ ಆನಿ ರಗ್ತಾಬೋಳ್” (ಮಾತೆವ್ 2:12). ಉದೆಂತಿಚ್ಯಾ ಜ್ಯೊತಿಷ್ಯಾಂಚಿ ಕಾಣಿ ನಮಸ್ಕಾರಾಚಿ ಕಾಣಿ. ತೆ ಜೆಜು ಬಾಳ್ಕಾಕ್, ರಾಯಾಕ್, ನಮಸ್ಕಾರ್ ಕರುಂಕ್ ಆಯ್ಲೆ ಆನಿ ನಮಸ್ಕಾರ್ ಕರುನ್ ಗೆಲೆ. ಹೆಂ ಕಾಣಿಯೆಚೆಂ ತೀರ್‍ಲ್ ಜಾಂವ್ಕ್ ಪಾವ್ತಾ. ತಾಣಿಂ ಆಯ್‌ಲ್ಲೊ ಉದ್ದೇಶ್ ಜ್ಯಾರಿ ಜಾತಾ. ಜೆಜುಕ್ ದೇವ್ ಆನಿ ರಾಯ್ ಮ್ಹಣುನ್ ತೆ ವಳ್ಕತಾತ್. ಸಗ್ಳಿ ಸುವಾರ್ತಾಯ್ ಹ್ಯೆಚ್ ದಿಶೆನ್ ಆಸಾ. ಜೆಜುಕ್ ಆಖಿ ಸುವಾರ್ತಾ ದೇವ್ ಆನಿ ರಾಯ್ ಮ್ಹಣುನ್ ವಳಕ್ ಕರುನ್ ದಿತಾ. ಸುವಾರ್ತೆಚ್ಯಾ ಶೆವೊಟಾಕ್ ಹಿಂ ಉತ್ರಾಂ ಆಸಾತ್: ಜಿವಂತ್ ಜೆಜುಕ್ “ …ಪಳೆತಚ್ ಶಿಸಾಂನಿ ತಾಕಾ ನಮಸ್ಕಾರ್ ಕೆಲೊ…” (ಮಾತೆವ್ 28:17). ಅಶೆಂ ಪಳೆಲ್ಯಾರ್ ಮಾತೆವಾಚಿ ಸುವಾರ್ತಾ ‘ನಮಸ್ಕಾರಾಚ್ಯಾ’ ವಾ ದೈವಿಕ್ ಆರಾಧನಾಚ್ಯಾ ದೋನ್ ಕಂಸಾಂ ಮಧೆಂ ಆಸಾ ವಾ ಜೆಜುಕ್ ನಮಸ್ಕಾರ್ ವಾ ಆರಾಧನ್ ಕರ್‍ಪಾಚ್ಯಾ ದೋನ್ ಬಾವ್ಳ್ಯಾಂನಿ ಪೊಟ್ಲಿಲ್ಯಾ. ಜೆಜು ಕ್ರಿಸ್ತಾಕ್ ಆನಿ ತಾಚ್ಯೆ ಸುವಾರ್ತೆಕ್ ಭಾವಾರ್ಥ್ಯಾಂಚಿ ಪ್ರತಿಕ್ರಿಯಾ ಹಾಂಗಾಸರ್ ನಮಸ್ಕಾರಾನ್ ವ್ಯಕ್ತ್ ಜಾಲ್ಯಾ. ಜೆಜುಚಿ ವಳಕ್ ಧರ್‍ಪಾಚೆಂ, ಜೆಜುಕ್ ವಳ್ಕುಂಚ್ಯೆ ಜೊಕ್ತ್ಯೆ ರಿತಿಚೆಂ ಆನಿ ಪ್ರತಿಕ್ರಿಯೆಚೆಂ ನಿದರ್ಶನ್ ಹಾಂಗಾ ಲಾಭ್ತಾ.

ಆಪ್‌ಪರ್ಗಟ್ಣೆಚಿ ಸುವಾರ್ತಾ ಆನಿ ಸಮಾಪ್ತ್

 ಜೆಜುಚ್ಯೆ ಆಪ್‌ಪರ್ಗಟ್ಣೆಚ್ಯಾ ಫೆಸ್ತಾ ದಿಸಾ ಪರ್ಗಟ್ಚಿ ಸುವಾರ್ತಾ ಉದೆಂತಿಚ್ಯಾ ಜ್ಯೊತಿಷ್ಯಾಂಚಿ. ಇಸಾಯಿಯಾ ಪ್ರವಾದಿಚಿಂ ಪ್ರವಾದೀಯ್ ಉತ್ರಾಂ ಜೆಜುಚ್ಯೆ ಆಪ್‌ಪರ್ಗಟ್ಣೆಂತ್ ವ್ಯಕ್ತ್ ಜಾತಾತ್ ಆನಿ ಶೆವೊಟಾಕ್ ಪಾವ್ತಾತ್ (ಇಸಾಯಿಯಾ 60ವಾಚ್). ಇಸಾಯಿಯಾಚಿಂ ಉತ್ರಾಂ ಮಾತೆವಾಚ್ಯೆ ಸುವಾರ್ತೆತ್ಲ್ಯಾ ‘ಉದೆಂತಿಚೆ ಜ್ಯೊತಿಷ್’ ಹ್ಯಾ ಪಾಠಾಚೊ ಅರ್ಥ್ ಸಮ್ಜುನ್ ಘೆಂವ್ಕ್ ಉಪ್ಕಾರ್‍ತಾತ್. ಜ್ಯೊತಿಷಿ ಉದೆಂತಿಚಿಂ ದಿರ್ವಿಂ – ಭಾಂಗಾರ್, ಧುಂಪ್ ಆನಿ ರಗ್ತಾಬೋಳ್ ಹಾಡುನ್ ಯೆತಾತ್. ಭಾಂಗಾರ್ ಬಾಳ್ಕಾಚ್ಯಾ ರಾಯ್ಪಣಾಚೊ, ಧುಂಪ್ ದೇವ್ಪಣಾಚೊ ಆನಿ ರಗ್ತಾಬೋಳ್ ತಾಚ್ಯಾ ಬಚಾವಿ ಹಾಡ್ಪಿ ಮರ್‍ಣಾಚೊ ಸಂಕೇತ್ ಮ್ಹಣುನ್ ಸಾಂಗ್ಚೆಂ ಆಸಾ. ಸಾರ್ಕೆಂ ಪಳೆಲ್ಯಾರ್, “ಭಾಂಗಾರ್ ಆನಿ ರಗ್ತಾಬೋಳ್” ರಾಷ್ಟ್ರಾಂಚ್ಯೆ ಗ್ರೆಸ್ತ್‌ಕಾಯೆಚೊ ಸಂಕೇತ್ (ಇಸಾ 60:5-6, 11; ಕೀರ್ತನ್ 72:10). ಹೆಂಚ್ ಶೆಬಾಚ್ಯೆ ರಾಣಿಯೆನ್ ಆನಿ “ಸಗ್ಳ್ಯಾ ಸಂಸಾರಾನ್” ಸಾಲ್ಮಾಂವ್ಕ್ ಕಾಣಿಕ್ ಜಾವ್ನ್ ಹಾಡ್‌ಲ್ಲೆಂ (1 ರಾಯ್ 10:10, 24). ನವ್ಯಾ ಬಾಳಾ ಜಲ್ಮಲ್ಲ್ಯಾ ಮೆಸ್ಸಿಯಾಕ್ ಜ್ಯೊತಿಷಿ ಸಂಸಾರಾಚೆಂ ಸರ್ವ್ ದಿರ್ವೆಂ ಆನಿ ಸಂಸಾರಾಚಿ ಸರ್ವ್ ಜಾಣ್ವಾಯ್ ಹಾಡುನ್ ಯೆತಾತ್. ತಾಂಚೆ ಹಾತ್ ಆನಿ ತಾಂಚಿಂ ಕಾಳ್ಜಾಂ ಭರ್‍ಲಲಿಂ ಆಸಾತ್. ಆನಿ ಹಿ ಭರ್‍ತಿ ತಾಂಣಿಂ ದೇವ್ ಬಾಳ್ಕಾಚ್ಯೆ ಪಾಯಾಂಥಳಿಂ ದವರ್‍ಲಿ ಆನಿ “ಸರ್ಪಡುನ್ ತಾಕಾ ನಮಸ್ಕಾರ್ ಕೆಲೊ” (ಮಾತೆವ್ 2:11).

–ಮಾ. ದೊ. ವಿನ್ಸೆಂಟ್ ಸಿಕ್ವೇರಾ