ಹರ್‍ಯೇಕ್ ಮನಿಸ್ ಆನ್ಯೆಕಾ ಮನ್ಶಾಕ್ ಜೀವ್ ದಿಂವ್ಕ್ ವಾ ಜಿವಿತ್ ದೀಂವ್ಕ್ ಸಕ್ತಾ. ದೆವಾನ್ ಮನ್ಶಾಕ್ ರಚ್ತಾನಾ ಹ್ಯಾಚ್ ಉದ್ದೇಶಾನ್ ರಚ್ಲಾ. ಮನ್ಶಾಚೆ ವಿವಿಧ್ ವಿಸ್ವೆ ದಾನ್ ದಿಲ್ಲೆವರ್ವಿಂ ಕೋಣ್ ಎಕ್ಲೊ ನವೆಂ ಜಿವಿತ್ ಆಪ್ಣಾಂವ್ಕ್ ಸಕ್ತಾ, ಪಿಡೆಂತ್ಲೊ ಬರೊ ಜಾವ್ನ್ ಆಪ್ಲ್ಯಾ ಕುಟ್ಮಾಚೊ ಆಧಾರ್ ಜಾತಾ. ಹ್ಯಾ ದಿಸಾಂನಿ ವಿಸ್ವೆ ದಾನ್ ದಿಂವ್ಚ್ಯಾ ವಿಶ್ಯಾಂತ್ ಜಾಯ್ತಿ ಜಾಗೃತಿ ಆಯ್ಲ್ಯಾ. ಥೊಡೆ ವಿಸ್ವೆ ಜಿವಂತ್ ಆಸ್ತಾನಾ ದಾನ್ ದೀಂವ್ಕ್ ಜಾಲ್ಯಾರ್ (ಏಕ್ ಕಿಡ್ನಿ, ಲಿವರಾಚೊ ಭಾಗ್, ಏಕ್ ಪೊಪಿಸ್ ಇತ್ಯಾದಿ) ಹೆರ್ ಥೊಡೆ ಮೆಂದು ನಿಶ್ಕ್ರಿಯ್ ಜಾವ್ನ್ ದಾಕ್ತೆರಾನಿ ಆನಿ ಕಿತೆಂಚ್ ಸಾಧ್ ನಾ ಮ್ಹಣ್ ಸಾಂಗ್‌ಲ್ಲೆವೆಳಾರ್ ತ್ಯಾ ವೆಕ್ತಿಚೆ ಥೊಡೆ ವಿಸ್ವೆ (ಕಾಳಿಜ್, ಕಿಡ್ನಿ, ಇತ್ಯಾದಿ) ಹೆರಾಂಕ್ ದಾನ್ ದಿವ್ಯೆತ್ ಆನಿ ಮರ್‍ಣಾ ನಂತರ್‌ಯೀ ದೊಳೆ ವಾ ಕೂಡ್ ದಾನ್ ದೀಂವ್ಕ್ ಜಾತಾ. ಎಕಾ ದಾನಿನ್ ಆಟ್ ಜಣಾಂಚೊ ಜೀವ್ ಬಚಾವ್ ಕರ್‍ಯೆತ್ ತಶೆಂ ಸುಮಾರ್ 75 ಜಣಾಂಚೊ ಜೀವ್ ವೃದ್ಧಿ ಕರ್‍ಯೆತ್. (ಚಡಿತ್ ಮಾಹೆತ್ ದಾಕ್ತೆರಾಂಥಾವ್ನ್ ಜೊಡ್ಯೆತ್). ಹರ್‍ಯೆಕಾಕ್‌ಯೀ ಏಕ್ ನಿರ್ಧಿಶ್ಟ್ ವೇಳ್ ಆಸಾ ಆನಿ ತ್ಯಾ ವೆಳಾ ಭಿತರ್ ಸರ್ವ್ ಸಂಗ್ತಿ ಜಾಯ್ಜೆ. ದೆಕುನ್ ದಾನಿಂನಿ ವಾ ತಾಂಚಿ ಸೆವಾ ಕರ್‍ತಲ್ಯಾಂನಿ ಸಾರ್ಕ್ಯಾ ವೆಳಾರ್ ಚಿಂತುನ್ ನಿರ್ಧಾರ್ ಕರುಂಕ್ ಜಾಯ್. ಅಸಲ್ಯೊ ದಾನ್ ದಿಲ್ಲ್ಯೊ ಖಬ್ರೊ ಆಮ್ಕಾಂ ತವಳ್ ತವಳ್ ಆಯ್ಕೊಂಕ್ ಮೆಳ್ತಾತ್.

ಅಸಲ್ಯಾ ಸಂಗ್ತಿಂವಿಶ್ಯಾಂತ್ ಆಪ್ಣಾಚ್ಯಾ ಭುರ್ಗ್ಯಾಂಲಾಗಿಂ ಕೆದಾಳಾಯ್ ಉಲೊವ್ನ್ ಆಸ್‌ಲ್ಲೆಂ ಜೊಡೆಂ ಕಂಪ್ಯೂನೆಟ್ ಸಿಸ್ಟಮ್ ಹಾಚೊ ಮಾಲಕ್ ಶ್ರೀ ಆಲ್ಫೊನ್ಸ್ ಡಿಸೋಜಾ ಆನಿ ತಾಚಿ ಪತಿಣ್ ಶ್ರೀಮತಿ ಸೋನಿಯಾ ಡಿಸೋಜಾ. ತಾಣಿಂ ಆಪ್ಣಾಚ್ಯಾ ಮರ್‍ಣಾ ನಂತರ್ ಆಪ್ಣಾಚೆ ದೊಳೆ ತಶೆಂ ಕೂಡ್ ದಾನ್ ಜಾವ್ನ್ ದೀಜೆ ಮ್ಹಣ್ ತಾಂಚ್ಯಾ ಭುರ್ಗ್ಯಾಂಲಾಗಿಂ ಕೆದಾಳಾಯ್ ಸಾಂಗ್ಚೆಂ ಆಸ್‌ಲ್ಲೆಂ. ಪುಣ್ ಆಪ್ಣೆಂ ಸಾಂಗ್‌ಲ್ಲೆಂ ತೆಂ ಉತರ್ ಆಪ್ಣೆಂ ಜಾವ್ನ್ ಕರುಂಕ್ ಪಡ್ತೆಲೆಂ ಮ್ಹಣ್ ಬೊವ್ಶಾ ತಾಣಿಂ ಕೆದ್ನಾಂಚ್ ಚಿಂತುಂಕ್ ನಾ ಆಸ್ತಲೆಂ.

ಹಾಸೊನ್ ಖೆಳೊನ್ ಆಸ್‌ಲ್ಲೊ ತಾಂಚೊ ತೆರಾ ವರ್‍ಸಾಂಚೊ ಪೂತ್ ಆಶಿಶ್ ಡಿಸೋಜಾ ಅಚಾನಕ್ ಡೆಂಗ್ಯೂ ಪಿಡೆಕ್ ವೊಳಗ್ ಜಾತಾ. ಆಸ್ಪತ್ರೆಂತ್ ಬರಿ ಚಿಕಿತ್ಸಾ ಲಾಬೊನ್ ಬರೊ ಜಾವ್ನ್ ಆನಿ ಕಿತೆಂ ಘರಾ ವೆಚಿ ತಯಾರಾಯ್ ಚಲ್ತಾನಾ ಆವ್ಚಿತ್ ಕಾಳ್ಜಾಘಾತ್ ಜಾವ್ನ್ ದೆವಾಘರಿಂ ಚಮ್ಕತಾ. ಆಪ್ಣಾಚೊ ಪೂತ್ ಘರಾ ಯೆತಾಲೊ ಮ್ಹಣ್ ಚಿಂತುನ್ ಆಸ್‌ಲ್ಲ್ಯಾ ಆಶಿಶಾಚ್ಯಾ ವ್ಹಡಿಲಾಂಕ್ ಆನಿ ಭಾವಾ ಆಶರಾಕ್ ತ್ಯಾ ವೆಳಾ ಜಾಲ್ಲೆಂ ದೂಕ್ ಆನಿ ಆಘಾತ್ ಕೊಣಾಕ್ ವಿವರುಂಕ್ ಜಾಯ್ತ್? 

ಪುಣ್ ಅಸಲ್ಯಾ ಎಕಾ ಸಂದಿಗ್ದ್ ವೆಳಾರ್‌ಯೀ ಹ್ಯಾ ಆವಯ್-ಬಾಪಾಯ್ನ್ ಘೆತ್‌ಲ್ಲೊ ಏಕ್ ನಿರ್ಧಾರ್ ಆನ್ಯೆಕ್ಲ್ಯಾಕ್ ಹ್ಯಾ ಸಂಸಾರಾಚೊ ಉಜ್ವಾಡ್ ದೀಂವ್ಕ್ ಪಾವ್ಲೊ. ಆಪ್ಲ್ಯಾ ಮಟ್ವ್ಯಾ ಜಿವಿತಾ ಆವ್ದೆಂತ್ ಹೆರಾಂಕ್ ಸಂತೊಸ್ ದಿಲ್ಲೊ ಆಶಿಶ್ ಆಪ್ಲ್ಯಾ ಮರ್‍ಣಾ ನಂತರ್‌ಯೀ ಆನ್ಯೆಕ್ಲ್ಯಾಚ್ಯಾ ಜಿವಿತಾಕ್ ಉಜ್ವಾಡ್ ಜಾಂವ್ಕ್ ಪಾವ್ಲೊ. ‘ಆಶಿಶಾಚೆ ದೊಳೆ ಎಕಾ ಕುರ್ಡ್ಯಾಕ್ ಎದೊಳ್‌ಚ್ ಟ್ರಾನ್ಸ್‌ಪ್ಲಾಂಟ್ ಕರ್‍ನ್ ಜಾಲ್ಯಾತ್ ಮ್ಹಣ್ ಆಸ್ಪತ್ರೆಥಾವ್ನ್ ಖಬರ್ ಆಯ್ಲಿ’ ಮ್ಹಣ್ ಗದ್ಗದಿತ್ ತಾಳ್ಯಾನ್ ವಿಗಾರ್ ಬಾಪಾಂನಿ ಸಾಂಗ್ತಾನಾ ಮೊರ್‍ನಾಕ್ ಹಾಜರ್ ಆಸ್‌ಲ್ಲ್ಯಾ ಹಜಾರೊಂ ಲೊಕಾಚ್ಯಾ ದೊಳ್ಯಾ ಖಾಂಚಿಂನಿ ದುಕಾಂ ಆಸ್‌ಲ್ಲಿಂ! ಆಪ್ಣಾಚ್ಯಾ ಪುತಾಚ್ಯಾ ಮೊರ್‍ನಾಂತ್‌ಯೀ ಕಸಲಿ ಭುಜಾವಣ್ ಜೊಡ್ಲಿ ಜಾಯ್ಜೆ ತ್ಯಾ ಭುರ್ಗ್ಯಾಚ್ಯಾ ವ್ಹಡಿಲಾಂನಿ! ತಿತ್ಲೆಂಚ್ ನ್ಹಯ್ ಆಸ್ತಾಂ ತಾಚಿ ಕೂಡ್ ದಾಕ್ತರ್‍ಗಿ ಶಿಕ್ಚ್ಯಾ ವಿದ್ಯಾರ್ಥಿಂಕ್ ಉಪ್ಕಾರಾಚಿ ಜಾಂವ್ಚ್ಯಾಕ್ ಆಸ್ಪತ್ರೆಕ್ ದಾನ್ ಜಾವ್ನ್ ದಿಲಿ.

ಹಿ ಖಬರ್ ಆಯ್ಕಲ್ಲೊ ರಾಜ್ಯ್ ಭಲಾಯ್ಕೆ ಮಂತ್ರಿ ಶ್ರೀ ದಿನೇಶ್ ಗುಂಡೂರಾವ್ ಹ್ಯಾ ಕುಟ್ಮಾಚಿ ಭೆಟ್ ಕರ್‍ನ್ ತಾಂಕಾಂ ಭುಜಾವಣ್ ದಿಂವ್ಚೆಸವೆಂ ತಾಣಿಂ ಕೆಲ್ಲ್ಯಾ ಹ್ಯಾ ಮಹಾನ್ ಕಾರ್ಯಾಕ್ ತಾಂಚಿ ಹೊಗ್ಳಿಕ್ ಉಚಾರ್‍ಲಿ ಆನಿ ಗವ್ರವ್ ಪಾಟಯ್ಲೊ. ಹಿ ತಾಂಚಿ ದಯಾಳಾಯೆಚಿ ಕರ್‍ನಿ ಸರ್ವಾಂಕ್ ಏಕ್ ದೇಕ್ ಮ್ಹಣ್ ತ್ಯಾ ವೆಳಿಂ ತಾಣೆಂ ಸಾಂಗ್ಲೆಂ. ಜಿಣಿಯೆಂತ್ ಸರ್ವಾಂಕ್ ಸಂತೊಸ್ ದಿಲ್ಲೊ ಆಶಿಶ್ ಮರ್‍ಣಾಂತ್‌ಯೀ ಅಮರ್ ಜಾಲೊ.

ನತಾಲಾಂಚ್ಯಾ ಕಾಳಾರ್ ಆಮಿ ಆಸಾಂವ್. ಹ್ಯಾ ವೆಳಿಂ ಮನ್ಶಾಪಣಾಚಿ ಮೌಲ್ಯಾಂ ಉಕಲ್ನ್ ಧರ್‍ನ್ ಮನ್ಶಾಚ್ಯೆ ಬಚಾವೆಕ್ ಆಪ್ಲ್ಯಾ ಎಕಾಚ್ ಪುತಾಕ್ ಹ್ಯಾ ಸಂಸಾರಾಕ್ ದಾನ್ ದಿಲ್ಲ್ಯಾ ದೆವಾಥಂಯ್ ಆಮಿ ಆಮ್ಚೆಂ ಉಪ್ಕಾರಿ ಮನ್ ದಾಕೊಂವ್ಕ್, ಆಪ್ಲ್ಯೆ ಕುಡಿಚೊ ನಿಮಾಣೊ ರಗ್ತಾ ಥೆಂಬೊ ಪರ್ಯಾಂತ್ ಆಮ್ಚ್ಯೆ ಸೊಡ್ವಣೆಖಾತಿರ್ ದಾನ್ ದಿಲ್ಲೊ ಜೆಜು ಆಮ್ಕಾಂ ಸದಾಂಚ್ ಹೆರಾಂಥಂಯ್ ಉದಾರಿ ಜಾಂವ್ಕ್ ಆಧಾರ್ ದೀಂವ್.

✍️ –ರಿಚರ್ಡ್ ಅಲ್ವಾರಿಸ್