ಜೆಜುಚೆಂ ಲ್ಹಾನ್ ಫುಲ್ ತೆರೆಜಾಕ್ ಮರಿಯೆ ಮಾಯೆಥಂಯ್ ವಿಶೇಸ್ ಭಕ್ತ್ ಆಸ್‌ಲ್ಲಿ. ಪುಣ್ ತಿಚಿ ಭಕ್ತ್ ಸುಕ್ಶಿಮಾಯೆನ್ ಪಳೆತಾನಾ, ಖೂಬ್ ವೆಗ್ಳ್ಯೆಚ್ ರಿತಿಚಿ ದಿಸ್ತಾ. ಮರಿಯೆವಿಶ್ಯಾಂತ್ಲಿ ತಿಚಿ ಸಮ್ಜಣಿ ನಿಜಾಕೀ ಕ್ರಾಂತಿಕಾರಿ.

ಆಪ್ಲ್ಯಾ ಮರ್‍ಣಾಚ್ಯಾ ಎಕಾ ಮ್ಹಯ್ನ್ಯಾ ಆದಿಂ ಆಪ್ಲಿ ಭಯ್ಣ್ ಪಾವ್ಲಿನಾಲಾಗಿಂ (ಮದರ್ ಆಗ್ನೆಸ್) ತೆರೆಜ್ ಅಶೆಂ ಮ್ಹಣಾಲಿ: “ಮರಿಯೆವಿಶಿಂ ಶಿಕೊವ್ಣ್ ದಿಂವ್ಚೆಖಾತಿರ್ ಹಾಂವ್ ಏಕ್ ಯಾಜಕ್ ಜಾಲ್ಲಿಂ ತರ್ ಕಿತ್ಲೆಂ ಬರೆಂ ಜಾತೆಂ! ತಿಚೆವಿಶಿಂ ಜೆಂ ಹಾಂವ್ ಮಾಂದ್ತಾಂ ತೆಂ ಶಿಕೊಂವ್ಕ್ ಫಕತ್ ಏಕ್ ಶೆರ್ಮಾಂವ್ ಪುರೊ. ತಿಚ್ಯಾ ಜಿವಿತಾವಿಶಿಂ ಲೊಕಾಕ್ ಕಿತ್ಲೆಂ ಉಣೆಂ ಕಳಿತ್ ಆಸಾ ಮ್ಹಣ್ ಪಯ್ಲೆಂ ಹಾಂವ್ ಶಿಕಯ್ತಿಂ. ಅಸಂಭವ್ ಆನಿ ಆಮ್ಕಾಂ ಕಳಿತ್ ನಾತ್‌ಲ್ಲ್ಯಾ ಸಂಗ್ತಿಂವಿಶಿಂ ಆಮಿ ಸಾಂಗೊಂಕ್ ನ್ಹಜೊ! ದಾಖ್ಲ್ಯಾಕ್, ‘ತಿ ತೀನ್ ವರ್‍ಸಾಂಚಿ ಆಸ್ತಾನಾ ದೆವಾಚ್ಯಾ ಖತ್ಕತ್ಯಾ ಮೊಗಾನ್ ಭರೊನ್ ತೆಂಪ್ಲಾಕ್ ವಚೊನ್ ಆಪ್ಣಾಕ್‌ಚ್ ದೆವಾಕ್ ಭೆಟಯ್ಲೆಂ’ ಮ್ಹಣ್ ಥೊಡೆಪಾವ್ಟಿಂ ಶೆರ್ಮಾಂವಾಂತ್ ಸಾಂಗ್ತಾತ್! ಪುಣ್ ತೆಂ ಸಾರ್ಕೆಂ ನ್ಹಯ್! ಆವಯ್-ಬಾಪಾಯ್ಕ್ ಖಾಲ್ ಜಾವ್ನ್ ತಿ ತೆಂಪ್ಲಾಕ್ ಗೆಲಿ ಆಸ್ತಲಿ. ಪರತ್, ಸಿಮಿಯಾಂವ್ಚೊ ಪ್ರವಾದ್ ಉಲ್ಲೇಖ್ ಕರ್‍ನ್ ‘ಬಾಳ್ಕಾಜೆಜುಕ್ ತೆಂಪ್ಲಾಂತ್ ಭೆಟಯಿಲ್ಲ್ಯೆ ಘಡಿಯೆಥಾವ್ನ್ ಜೆಜುಚೊ ಪಾಶಾಂವ್ ಮರಿಯೆಚ್ಯಾ ದೊಳ್ಯಾಂಮುಕಾರ್ ಸದಾಂಚ್ ಆಸ್‌ಲ್ಲೊ’ ಮ್ಹಣ್ ಭೆಶ್ಟೆಂಚ್ ಕಿತ್ಯಾಕ್ ಸಾಂಗ್ಚೆಂ? ಜರ್ ಮರಿಯೆವಿಶ್ಯಾಂತ್ಲೊ ಶೆರ್ಮಾಂವ್ ನಿಜಾಕೀ ಮ್ಹಾಕಾ ಮಾನ್ವಜೆ ಆನಿ ಪ್ರೇರಣ್ ದೀಜೆ ತರ್ ತಿಚೆಂ ಖರೆಂ ಜಿವಿತ್ ಪಳೆಜೆ, ಕಾಲ್ಪನಿಕ್ ಜಿವಿತ್ ನ್ಹಯ್. ಹಾಂವ್ ಖಂಡಿತ್ ಜಾಣಾಂ, ತಿಚೆಂ ಜಿವಿತ್ ಬೊವ್ ಸಾದೆಂ ಆಸ್‌ಲ್ಲೆಂ. ತಿಕಾ ಇತ್ಲೆಂ ವಯ್ರ್ ದವರ್‍ತಾತ್, ತಿಚೆಸರ್ಶಿಂ ವಚೊಂಕ್ ಅಸಾಧ್ ತಶೆಂ ಭೊಗ್ತಾ. ಬದ್ಲಾಕ್ ತಿಚ್ಯಾ ಶೆಗುಣಾಂಚೊ ಆಮಿ ಕಸೊ ಪಾಟ್ಲಾವ್ ಕರ್‍ಯೆತ್ ಮ್ಹಣ್ ಶಿಕಯ್ಜೆ. ಆಮ್ಚೆಬರಿಚ್ ತಿ ಭಾವಾಡ್ತಿ ಜಿವಿತ್ ಜಿಯೆಲಿ. ಪವಿತ್ರ್ ವಾಂಜೆಲ್‌ಚ್ ಸಾಂಗ್ತಾ, ‘ತಾಣೆಂ ಉಲಯ್ಲಲ್ಯಾ ಹ್ಯಾ ಉತ್ರಾಂಚೊ ತಾಂಕಾಂ ಅರ್ಥ್ ಜಾಲೊನಾ’ (ಲೂಕ್ 2:50). ಆಮಿ ಖರ್‍ಯಾನ್ ಜಾಣಾಂವ್ ಕೀ, ಆಂಕ್ವಾರ್ ಮರಿ ಸರ್ಗಾ ಸಂಸಾರಾಚಿ ರಾಣಿ ಮ್ಹಣ್, ಪುಣ್ ರಾಣಿ ಜಾವ್ನಾಸ್ಚ್ಯಾಕೀ ತಿ ಚಡ್ ಆವಯ್!”

ಕುಟ್ಮಾಂತ್ ಮರಿಯೆಚಿ ಭಕ್ತ್: ತೆರೆಜಾಚ್ಯಾ ಆವಯ್-ಬಾಪಾಯ್ಕ್ ಮರಿಮಾಯೆಥಂಯ್ ವಿಶೇಶ್ ಭಕ್ತ್. ಹ್ಯಾಚ್ ಖಾತಿರ್ ಜಲ್ಮಾಲ್ಲ್ಯಾ ನೋವ್‌ಯೀ ಭುರ್ಗ್ಯಾಂಚೆಂ (ಚೆರ್ಕ್ಯಾ ಭುರ್ಗ್ಯಾಂಕ್ ಸಯ್ತ್) ಪಯ್ಲೆಂ ನಾಂವ್ ಮರಿ (Marie) ಮ್ಹಣ್ ದಿಲ್ಲೆಂ. ಜೆನ್ನಾ ತೆರೆಜಾಚಿ ಆವಯ್ ಝೆಲಿ ಕ್ಯಾನ್ಸರ್ ಪಿಡೆಕ್ ವೊಳಗ್ ಜಾಲಿ, ತೆನ್ನಾ ಲೂರ್ದ್ ಶ್ಹೆರಾಕ್ (ಬೆರ್ನಾದೆತಾಕ್ ಮರಿ ದಿಶ್ಟಿಕ್ ಪಡ್‌ಲ್ಲ್ಯಾ ಜಾಗ್ಯಾಕ್) ವಚೊನ್ ಥಂಯ್ಚ್ಯಾ ಅಚರ್ಯಾಂಚ್ಯಾ ಉದ್ಕಾಂತ್ ಚಾರ್ ಪಾವ್ಟಿಂ ತಿ ಬುಡೊನ್ ವಯ್ರ್ ಆಯ್ಲಿ. ಚವ್ತೆಪಾವ್ಟಿಂ ಆಂಕುಡ್ಚ್ಯಾ ತ್ಯಾ ಥಂಡ್ ಉದ್ಕಾಂತ್ ಪಂದ್ರಾ ಮಿನುಟಾಂಭರ್ ತಿ ರಾವ್ಲಿ. ಪುಣ್ ಕಠೀಣ್ ದುಕಿಥಾವ್ನ್ ತಿಕಾ ಸುಟ್ಕಾ ಮೆಳ್ಳಿನಾ. ಆಪ್ಣಾಕ್ ಬರೆಂ ಕರುಂಕ್ ಸಾಯ್ಬಿಣಿಕ್ ಖುಶಿನಾ ಮ್ಹಣ್ ತಿ ಸಮ್ಜಲಿ ಆನಿ ಘರಾ ಆಸ್‌ಲ್ಲ್ಯಾಂಕ್ ತಿಣೆಂ ಬರಯ್ಲೆಂ: “ಹಾಂವ್ ಬರಿಂ ಜಾಲ್ಲಿಂ ಜಾಲ್ಯಾರ್ ತುಮ್ಚೆಪಾಸುನ್ ಹಾಂವ್ ಸಂತೊಸ್ ಪಾವ್ತಿಂ; ಪುಣ್ ಬೆರ್ನಾದೆತಾಕ್ ತಿಣೆಂ ಸಾಂಗ್‌ಲ್ಲೆಬರಿ ಮ್ಹಾಕಾಯ್ ಸಾಯ್ಬಿಣಿನ್ ಸಾಂಗ್ಲಾಂ: ‘ಹಾಂವ್ ತುಕಾ ಭಾಗಿ ಕರ್‍ತೆಲಿಂ, ಪುಣ್ ಸಂಸಾರಾಂತ್ ನ್ಹಯ್, ಸರ್ಗಾರಾಜಾಂತ್.’” ಸ ವರ್‍ಸಾಂ ಪ್ರಾಯೆರ್ ತೆರೆಜ್ ಪಯ್ಲೆಪಾವ್ಟಿಂ ಕುಮ್ಸಾರ್ ಜಾಲಿ. ಕುಮ್ಸಾರ್ ಕೆಲ್ಲ್ಯಾ ಯಾಜಕಾನ್ ಮರಿಯೆಚಿ ಭಕ್ತಿ ಕರುಂಕ್ ಉಲೊ ದಿಲ್ಲೊ. ಹ್ಯಾ ವಿಶಿಂ ತೆರೆಜ್ ಬರಯ್ತಾ, “ಮರಿಯೆ ಮಾಯೆಥಂಯ್ ಮ್ಹಜೊ ಮೋಗ್ ದೊಡ್ತೊ ಕರುಂಕ್ ಹಾಂವೆಂ ಮ್ಹಾಕಾಚ್ ಭಾಸ್ ದಿಲಿ. ಚಡಾವತ್ ಭುರ್ಗಿಂ ತಾಂಚ್ಯಾ ಆವಯ್-ಬಾಪಯ್‌ಬರಿಚ್ ಆಸ್ತಾತ್. ಮರಿ ಮ್ಹಜಿ ಮಾಂಯ್, ಹಾಂವೆಂ ತಿಚೊ ಪಾಟ್ಲಾವ್ ಕರುಂಕ್ ಆಸಾ.” ತಿಚ್ಯಾ ಪಯ್ಲ್ಯಾ ಕುಮ್ಗಾರಾ ದಿಸಾ ಸರ್ವ್ ಭುರ್ಗ್ಯಾಂಚ್ಯೆ ತರ್ಫೆನ್ ಮರಿಯೆಕ್ ಸಮರ್ಪಣ್ ಕರ್‍ಚೆಂ ಮಾಗ್ಣೆಂ ತೆರೆಜಾನ್ ಕೆಲ್ಲೆಂ.

ತೆರೆಜಾಕ್ ಸಾಡೆಚಾರ್ ವರ್‍ಸಾಂ ಜಾತಾನಾ ತಿಚಿ ಆವಯ್ ಅಂತರ್‍ಲಿ. ತಿಚ್ಯಾ ಮರ್‍ಣಾ ಉಪ್ರಾಂತ್ ತೆರೆಜ್ ವಿವಿಧ್ ರಿತಿಂನಿ ಕಶ್ಟಾಲಿ. ತೆರೆಜ್ ಬೊವ್ ಸೂಕ್ಶಿಮ್ ಸ್ವಭಾವಾಚಿ ಜಾಲಿ. ಪರಿಣಾಮ್ ಪರ್ಕ್ಯಾಂಚಿಂ ಉತ್ರಾಂ ಮಾತ್ರ್ ನ್ಹಯ್, ನದರ್ ಸಯ್ತ್ ತಿಕಾ ರಡೊಂಕ್ ಕರ್‍ತಾಲಿ. ಶಿಕ್ಪಾಂತ್ ಬೊವ್ ಚುರುಕ್ ಆಸ್‌ಲ್ಲಿ ತರೀ, ಪಾಂಚ್ವ್ಯೆ ಕ್ಲಾಸಿಥಾವ್ನ್ ಹೆರಾಂ ಭುರ್ಗ್ಯಾಂಚಿ ಚಾಲ್/ಉಪದ್ರ್ ಸೊಸುಂಕ್ ಜಾಯ್ನಾಸ್ತಾನಾ ಇಸ್ಕೊಲಾಕ್ ವೆಚೆಂಚ್ ರಾವಯ್ಜೆ ಪಡ್ಲೆಂ! ಮತಿನ್ ಮಾತ್ರ್ ನ್ಹಯ್ ಕುಡಿನ್‌ಯೀ ಸಾರ್ಕಿ ಭಲಾಯ್ಕಿ ನಾ ಜಾಲಿ. ಧಾ ವರ್‍ಸಾಂ ಪ್ರಾಯೆರ್ ತೆರೆಜಾಚಿ ಪಿಡಾ ಇತ್ಲಿ ಗಡೀಸ್ ಜಾಲಿ ಕೀ, ದಾಕ್ತೆರ್ ಸಯ್ತ್ ಪಿಡೆಚೆಂ ಕಾರಣ್ ಸೊಧುನ್ ಕಾಡುಂಕ್ ಜಾಯ್ನಾಸ್ತಾಂ ಹಾತ್ ಉದಾರೆ ಕರಿಲಾಗ್ಲೆ. ತಿಚ್ಯಾ ಮಾವ್ಳ್ಯಾಪ್ರಕಾರ್ ತೆ ಸಯ್ತಾನಾಚೆ ಉಪದ್ರ್ ಜಾವ್ನಾಸ್ಲೆ. ತೆರೆಜಾಚ್ಯಾ ಬಾಪಾಯ್ನ್ ಪ್ಯಾರಿಸಾಂತ್ ಆಸ್‌ಲ್ಲ್ಯಾ ಜಯ್ತಾಚ್ಯೆ ರಾಣಿಯೆಚ್ಯಾ (Our Lady of Victories) ಪೂನ್‌ಶೆತಾಂತ್ ಮಿಸಾಂ ಭೆಟೊಂವ್ಕ್ ಲಾಯ್ಲಿಂ. ಪರಿಣಾಮ್ 1884ಚ್ಯಾ ಮೇ 13ವೆರ್ ತೆರೆಜಾಚ್ಯಾ ಕುಡಾಂತ್ ಆಸ್‌ಲ್ಲ್ಯೆ ಮರಿಯೆಚ್ಯೆ ಇಮಾಜೆನ್ ಏಕ್ ಸೊಭಿತ್ ಹಾಸೊ ದಿಲ್ಯೊ! (ಹ್ಯಾ ಇಮಾಜೆಕ್ ಹಾಸ್ಕುರಿ/ಅಮೃಕ್ಯಾ ಹಾಸ್ಯಾಂಚಿ ಮರಿ – Our Lady of Smiles ಮ್ಹಣ್‌ಚ್ ನಾಂವ್ ಪಡ್ಲೆಂ). ತ್ಯಾ ಘಡಿತಾ ಉಪ್ರಾಂತ್ ತೆರೆಜಾಕ್ ಹ್ಯೆ ಪಿಡೆ-ಶಿಡೆಥಾವ್ನ್ ಆನಿ ರಡ್ಕುರ್‍ಯಾ ಸ್ವಭಾವಾಥಾವ್ನ್ ಅಜ್ಯಾಪಿ ರಿತಿನ್ ಸುಟ್ಕಾ ಮೆಳ್ಳಿ.

ಮರಿಯೆಥಂಯ್ ತೆರೆಜಾಕ್ ಆಸ್‌ಲ್ಲೆಂ ಸ್ವಭಾವಿಕ್ ಭಕ್ತಿಪಣ್ ಕಾರ್ಮೆಲಿತ್ ಭಿತರ್‍ಲ್ಯಾ ಮಾದ್ರಿಂಚ್ಯಾ ಕೊವೆಂತಾಕ್ ರಿಗ್ಲ್ಯಾ ಉಪ್ರಾಂತ್ ಆನಿಕೀ ಚಡ್ಲೆಂ ಮ್ಹಣ್ಯೆತ್. ಕಿತ್ಯಾಕ್ ಕಾರ್ಮೆಲಿತ್ ಓಡ್ದ್ ಮರಿಯೆಕ್ ಸಮರ್ಪಿಲ್ಲಿ ಜಾವ್ನಾಸ್‌ಲ್ಲಿ ಮಾತ್ರ್ ನ್ಹಯ್, ತೆರೆಜಾಚ್ಯಾ ಧರ್ಮಿಕ್ ಜಿವಿತಾಚಿಂ ಪ್ರಮುಕ್ ಘಡಿತಾಂ ಮರಿಯೆಚ್ಯಾ ಫೆಸ್ತಾ ದಿಸಾಂನಿ ಜಾಲ್ಲಿಂ ಜಾವ್ನಾಸಾತ್: 1888, ಎಪ್ರಿಲ್ 9: ಕೊವೆಂತಾಕ್ ಪ್ರವೇಶ್ (ಮರಿಯೆಕ್ ಇಜ್ಬಿ ಹಾಡ್‌ಲ್ಲೆಂ ಫೆಸ್ತ್: ತ್ಯಾ ವರ್‍ಸಾ ತೆಂ ಫೆಸ್ತ್ ಭಾಗೆವಂತ್ ಹಫ್ತ್ಯಾಂತ್ ಆಯಿಲ್ಲೆಂ ದೆಕುನ್ ಫೆಸ್ತ್ ಎಪ್ರಿಲಾಚ್ಯೆ 9 ತಾರಿಕೆಕ್ ಮುಕಾರ್ ಘಾಲ್ಲೆಂ). 1890, ಸಪ್ಟೆಂಬರ್ 8: ಪ್ರೊಫೆಶನ್ (ಮರಿಯೆಚೆಂ ಜನನಾಚೆಂ ಫೆಸ್ತ್)

ಮರಿಯೆ ಮಾಯೆಸಂಗಿ ಆಪ್ಲಿ ಸಳಾವಳ್ ವಿವರುನ್ ಆಪ್ಲಿ ಭಯ್ಣ್ ಸೆಲಿನಾಕ್ ಬರಯಿಲ್ಲ್ಯಾ ಎಕಾ ಪತ್ರಾಂತ್ (1892, ಅಕ್ಟೋಬರ್ 19), ತೆರೆಜ್ ಬರಯ್ತಾ: “ಆಂಕ್ವಾರಿ ಮರಿಯೆ, ತುಜ್ಯಾಕೀ ಹಾಂವ್ ಚಡ್ ಭಾಗಿ ಮ್ಹಣ್ ಮ್ಹಾಕಾ ಭೊಗ್ತಾ: ಕಿತ್ಯಾಕ್ ಮ್ಹಜೊ ಮೋಗ್ ಕರ್‍ಚಿ ಆವಯ್ ಜಾವ್ನ್ ತುಂ ಆಸಾಯ್, ಪುಣ್ ತುವೆಂ ಕರ್‍ಚೆಬರಿ ಮೋಗ್ ಕರ್‍ಚಿ ಆವಯ್ ತುಕಾ ನಾ! ತುಂ ಜೆಜುಚಿ ಆವಯ್ ತೆಂ ಸತ್, ಪುಣ್ ಹ್ಯಾ ಜೆಜುಕ್ ಸಂಪೂರ್ಣ್ ಜಾವ್ನ್ ತುವೆಂ ಆಮ್ಕಾಂ ದಿಲಾಂಯ್… ಆನಿ ಖುರ್‍ಸಾರ್ ಥಾವ್ನ್ ಜೆಜುನ್ ತುಕಾ ಆಮ್ಚಿ ಆವಯ್ ಜಾವ್ನ್ ದಿಲ್ಯಾ. ಅಶೆಂ ತುಜ್ಯಾಕೀ ಆಮಿಂಚ್ ಚಡ್ ಗ್ರೇಸ್ತ್.” ಇಲ್ಲೆಶೆಂ ಉಪ್ರಾಂತ್ ತೆರೆಜ್ ಬರಯ್ತಾ. “ಹೆಂ ಸಗ್ಳೆಂ ಮ್ಹಜೆಂ ಸಾದೆಂ ಚಿಂತಪ್ ಪಳೆವ್ನ್ ಮರಿ ಹಾಸೊಂಕ್ ಆಸಾ; ಪುಣ್ ಹಾಂವೆಂ ಸಾಂಗ್ಚೆಂ ನಿಜಾಕೀ ಸತ್!” ಆನ್ಯೆಕಾ ಜಾಗ್ಯಾರ್ (ರೆಜಿಸ್ತ್ರೆಚೆರ್) ತೆರೆಜ್ ಬರಯ್ತಾ: “ಏ ಮರಿಯೇ, ಜರ್ ಹಾಂವ್ ಸರ್ಗಾಚಿ ರಾಣಿ ಜಾಲ್ಲಿಂ ಆನಿ ತುಂ ತೆರೆಜ್ ಜಾಲ್ಲಿಯ್ ತರ್, ತುಂ ಸರ್ಗಾಚಿ ರಾಣಿ ಜಾಂವ್ಚೆಖಾತಿರ್ ಹಾಂವ್ ತೆರೆಜ್ ಜಾಂವ್ಕ್ ಅತ್ರೆಗ್ತಿಂ!”

ಭಾಗೆವಂತ್ ಮರಿಯೆವಿಶ್ಯಾಂತ್ ತೆರೆಜಾಚಿ ಶಿಕೊವ್ಣ್: “ಮರಿಯೆಚೊ ಹಾಂವ್ ಕಿತ್ಯಾಕ್ ಮೋಗ್ ಕರ್‍ತಾಂ?” (Why doI love you, Mary) ಹೆಂ ಕವನ್ ತೆರೆಜ್ ಅಂತರ್‍ಚ್ಯಾ ಫಕತ್ ಚಾರ್ ಮ್ಹಯ್ನ್ಯಾಂ ಆದಿಂ ಬರಯಿಲ್ಲೆಂ. ‘ಹ್ಯಾ ಕವನಾಂತ್ ಮರಿಯೆವಿಶಿಂ ಶಿಕೊಂವ್ಚೆಂ ಸಗ್ಳೆಂ ಹಾಂವೆಂ ಸಾಂಗ್ಲಾಂ’ ಮ್ಹಣ್ತಾ ತೆರೆಜ್. ಹಾಂತುಂ ಪಂಚ್ವೀಸ್ ವೊಳಿ ಆಸೊನ್ ಮರಿಯೆವಿಶ್ಯಾಂತ್ ತೆರೆಜಾಚಿ ಸಗ್ಳಿ ಸಮ್ಜಣಿ ಆನಿ ಭಕ್ತ್ ವೆಕ್ತ್ ಕರ್‍ತಾ. ಹ್ಯಾ ಕವನಾಂತ್ ಮರಿ ಆಪ್ಣಾಕ್ ಕೋಣ್? ತಶೆಂಚ್ ತಿ ಏಕ್ ಭಾವಾಡ್ತಿ ಸ್ತ್ರೀ, ಕಶ್ಟಾಂಕ್ ಫುಡ್ ಕರುಂಕ್ ಆನಿ ಆಮ್ಚ್ಯಾ ಚಾಲ್ತ್ಯಾ ಜಿವಿತಾಂತ್ ಆದರ್ಶ್ ಮ್ಹಣ್ ಬೊವ್ ಖಡಕ್ಕ್ ಶಿಕೊವ್ಣ್ ದಿತಾ. ತೆರೆಜಾನ್ ಆಪ್ಲ್ಯಾ ಜಿವಿತಾಂತ್ ಮರಿಯೆ ಮಾಯೆಥಾವ್ನ್ ಜಾಯ್ತೆ ಉಪ್ಕಾರ್ ಜೋಡ್ನ್ ಘೆತ್‌ಲ್ಲೆ; ಪುಣ್ ತ್ಯಾ ಉಪ್ಕಾರಾಂವಿಶಿಂ ತಿ ಬಡಾಯ್ ಉಲಯ್ನಾಂ. ಬದ್ಲಾಕ್ ಮರಿ, ಆಮ್ಚಿ ಅತ್ಮೀಕ್ ಆವಯ್, ಮನ್ಶಾಂಕ್ ಸಹಜ್ ಜಾಲ್ಲಿ ಕಶ್ಟಾಂಚಿ ಆನಿ ಸಾದಿ ಜಿಣಿ ತಿ ಜಿಯೆಲಿ ಮ್ಹಣ್ ಶಿಕಯ್ತಾ. ಬೊವ್ಶಾ ಮರಿಯೆ ಮಾಯೆಥಾವ್ನ್ ಲಾನ್ಪಣಾರ್ ತಿಣೆಂ ಜೊಡ್‌ಲ್ಲ್ಯಾ ಉಪ್ಕಾರಾನ್ ಫುಡೆಂ ಕಶ್ಟಾಂಕ್ ಸಮರ್ಪಕ್ ರಿತಿನ್ ಫುಡ್ ಕರುಂಕ್ ತೆರೆಜಾಕ್ ಆಧಾರ್ ದಿಲೊ ಮ್ಹಣ್ಯೆತ್.

ತಿ ಅಂತರ್‍ಚ್ಯಾ ಎಕಾ ಮ್ಹಯ್ನ್ಯಾ ಆದಿಂ ಆಪ್ಲಿ ಭಯ್ಣ್ ಮದರ್ ಆಗ್ನೆಸಾಲಾಗಿಂ ಉಲೊವ್ನ್ ತಿ ಮ್ಹಣಾಲಿ, “ಯಾಜಕಾಂನಿ ಮರಿಯೆಚೆಂ ಅನುಕರಣ್ ಕರುಂಕ್ ಜಾಂವ್ಚ್ಯಾ ಶೆಗುಣಾಂವಿಶಿಂ ಶಿಕಯ್ಜೆ. (ಚಡಾವತ್ ಮರಿಯೆವಿಶ್ಯಾಂತ್ಲಿಂ ಸರ್ವ್ ಪುಸ್ತಕಾಂ, ಶೆರ್ಮಾಂವ್ ತಿಚ್ಯಾ ವರ್ತ್ಯಾಪಣಾವಿಶಿಂ ಆನಿ ವ್ಹಡ್ಪಣಾವಿಶಿಂ ವಿವರಿತಾಲಿಂ.) ತಿಚ್ಯಾ ವ್ಹಡ್ಪಣಾವಿಶಿಂ ಉಲೊಂವ್ಚೆಂ ಬರೆಂ, ಪುಣ್ ಕಶೆಂ ತಿಚೆಂ ಅನುಕರಣ್ ಕರ್‍ಚೆಂ ಮ್ಹಣ್ ಸಮ್ಜೊಂಚೆಂ ಚಡ್ ಗರ್ಜೆಚೆಂ. ತಿಚೆವಿಶಿಂ ಅಜ್ಯಾಪ್ ಪಾಂವ್ಚ್ಯಾಕ್ ತಿಚೆಂ ಅನುಕರಣ್ ಕರ್‍ಚೆಂ ತಿ ಚಡ್ ಪಸಂದ್ ಕರ್‍ತಾ. ತಿಚೆಂ ಜಿವಿತ್ ಬೊವ್ ಸಾದೆಂ! ಸರ್ಗಿಂ ವೆಚಿ ಅಶೀರ್ ವಾಟ್ ತಿಣೆಂ ದಿಸಾಶಿ ಕೆಲಿ, ಸದಾಂಚ್ ಲ್ಹಾನ್ವಿಕ್ ಶೆಗುಣ್ ತಿಣೆಂ ಅಭ್ಯಾಸ್ ಕೆಲೆ.” ತೆರೆಜ್ ಆಪ್ಣಾಕ್ ವಾ ಗರ್ಜೆವಂತಾಂಖಾತಿರ್ ಉಪ್ಕಾರ್ ಮಾಗ್ತಾನಾ, ತಿ ಸದಾಂಚ್ ಮರಿಯೆ ಮಾಯೆಕ್ ಆಪ್ಲಿ ವಿನೊವ್ಣಿ ಭೆಟಯ್ತಾಲಿ. ತಿ ಮ್ಹಣ್ತಾ, ದೆವಾಕ್ ಕಿತೆಂ ಮಾನ್ವತಾ ಮ್ಹಣ್ ಮರಿಯೆಕ್ ಕಳಿತ್ ಆಸ್ಚ್ಯಾಕ್ ಬರೆಂ ಹೆರ್ ಕೊಣಾಕ್‌ಚ್ ಕಳಿತ್ ನಾ. ಜರ್ ಮ್ಹಜಿ ವಿನೊವ್ಣಿ ದೆವಾಚ್ಯೆ ಖುಶೆಕ್ ಸರಿ ಜಾಲ್ಲಿ ತರ್ ಮರಿ ತಿ ವಿನೊವ್ಣಿ ದೆವಾಕ್ ಸಮರ್ಪಿತಾಲಿ, ನಾ ತರ್ ನಾ.

ಸಂಪ್ಣಿ: ವಾಂಜೆಲಾಚ್ಯೆ ಆನಿ ಪವಿತ್ರ್‌ಸಭೆಚ್ಯೆ ಶಿಕೊವ್ಣೆ ಪರ್ಮಾಣೆಂ ಮರಿ ಜಾವ್ನಾಸಾ ಜೆಜುಚಿ ಪಯ್ಲಿ ಆನಿ ಸಂಪೂರ್ಣ್ ಶಿಸ್. ತಿಚೆಂ ಸಾದೆಂ ಜಿವಿತ್ ಆಮಾ ಸಮೇಸ್ತಾಂಕ್ ಆದರ್ಶ್. ಮರಿಯೆಚೆಂ ಜಿವಿತ್ ವೈಭವೀಕೃತ್ ಕರ್‍ನ್ ವಯ್ರ್ ಆಕಾಸಾಕ್ ಉಬಾರ್‍ಚ್ಯಾ ಬದ್ಲಾಕ್ ಕಶೆಂ ತಿ ಕಶ್ಟಾಂ-ದುಕಾಂತ್ ದೆವಾಕ್ ವಿಶ್ವಾಸಿ ರಾವ್ಲಿ ಮ್ಹಣ್ ನಿಯಾಳ್ ಕರ್‍ನ್ ಆಮ್ಚೆಂ ಜಿವಿತ್‌ಯೀ ಭಾವಾಡ್ತಾಚ್ಯಾ ಉಜ್ವಾಡಾನ್ ಜಿಯೆಂವ್ಕ್ ಹರ್ ಪ್ರಯತ್ನ್ ಕೆಲ್ಯಾರ್ ಮರಿಯೆಚಿ ಖರಿ ಭಕ್ತ್ ಆಮಿ ಕರುಂಕ್ ಪಾವ್ತೆಲ್ಯಾಂವ್.

✍️ –ಫ್ರಾದ್ ದೀಪ್ ಫೆರ್ನಾಂಡಿಸ್, ಕಾರ್ಮೆಲಿತ್