ದೆಶಾಚ್ಯಾ ಹರ್‍ಯೆಕಾ ರಾಜ್ಯಾಂತ್ ರಾಜಕೀಯ್ ಪಾಡ್ತಿಚೆ ಮುಕೆಲಿ ಭರ್ವಸೊ ದೀವ್ನ್ ಜಿಕ್ಚೊ ವೇಳ್ ಆಸ್‌ಲ್ಲೊ ತೊ ಕಾಳ್ ಆಖೇರ್ ಜಾಲೊ ತಶೆಂ ದಿಸ್ತಾ. ಆತಾಂ ಕೇವಲ್ ಗ್ಯಾರಂಟಿ. ತುಮಿ ಕಾಂಯ್ಚ್ ಭಿಯೆಂವ್ಚಿ ಗರ್ಜ್ ನಾ. ಜೆಂ ಕಿತೆಂ ಸಾಂಗ್ತಾಂವ್ ತೆಂ ಅಧಿಕಾರ್ ಮೆಳ್ತಚ್ ಚೊವೀಸ್ ವೊರಾಂಭಿತರ್ ಜ್ಯಾರಿಯೆಕ್ ಹಾಡ್ತಾಂವ್ ತೆಂ ಖಂಡಿತ್ ಮ್ಹಣ್ ಕರ್ನಾಟಕಾಂಕ್ ಕೊಂಗ್ರೆಸ್ ಸರ್ಕಾರಾನ್ ಎಲಿಸಾಂವಾಪಯ್ಲೆಂ ೫ ಗ್ಯಾರಂಟಿ ಲೊಕಾಮುಕಾರ್ ದವರ್‌ಲ್ಲ್ಯೊ. ಗ್ಯಾರಂಟಿಚ್ಯಾ ನಾಂವಾನ್ ಸರ್ಕಾರ್ ಅಧಿಕಾರಾಕ್ ಆಯ್ಲಾ. ೧.ಅನ್ನಭಾಗ್ಯ, ೨.ಗೃಹಜ್ಯೋತಿ, ೩.ಗೃಹಲಕ್ಷ್ಮೀ, ೪.ಶಕ್ತಿ, ೫.ಯುವನಿಧಿ ಹ್ಯೊ ಪಾಂಚ್ ಗ್ಯಾರಂಟಿ ಜ್ಯಾರಿಯೆಕ್ ಹಾಡ್ಚ್ಯಾ ವಾವ್ರಾಂತ್ ಸರ್ಕಾರ್ ಮಗ್ನ್ ಜಾಲಾ. ಥೊಡ್ಯೊ ಎದೊಳ್ ಅಸ್ತಿತ್ವಾಕ್ ಆಯ್ಲ್ಯಾತ್ ಆನಿ ಥೊಡ್ಯೊ ಬಾಕಿ ಉರ್‍ಲ್ಯಾತ್. ಸಕ್ಕಡ್ ಸಂಪೂರ್ಣ್ ರಿತಿನ್ ಉಜ್ವಾಡಾಕ್ ಯೇಂವ್ಕ್ ಕಿತ್ಲೆ ಮ್ಹಯ್ನೆ ಲಾಗ್ತಿತ್ ಮ್ಹಣ್ ರಾಕೊನ್ ರಾವಜೆ.

ಗ್ಯಾರಂಟಿವಿಶಿಂ ಚಿಂತ್ತಾನಾ ಮತಿಕ್ ಯೆಂವ್ಚೆಂ ಸವಾಲ್ ರಾಜಕೀಯ್ ಮುಕೆಲ್ಯಾಂನಿ ದೆಶಾಂತ್ ತಶೆಂಚ್ ರಾಜ್ಯಾಂತ್ ದಿಂವ್ಚ್ಯೊ ಗ್ಯಾರಂಟಿ ಕಿತ್ಲೊ ತೇಂಪ್? ಏಕ್ ಸರ್ಕಾರ್ ಅಸ್ತಿತ್ವಾಕ್ ಯೆತಾನಾ ಗ್ಯಾರಂಟಿ ಅಸ್ತಿತ್ವಾಕ್ ಯೆತಾತ್ ಆನಿ ತೊ ಸರ್ಕಾರ್ ಪಡ್ತಾನಾ ಗ್ಯಾರಂಟಿ ಪಡ್ತಾತ್. ಏಕ್ ಪಾಡ್ತ್ ಅಸ್ತಿತ್ವಾಕ್ ಯೆತಾನಾ ಭುರ್ಗ್ಯಾಂಕ್ ಶಿಕೊಂವ್ಕ್ ಏಕ್ ವಿಶಯ್ ತರ್ ಆನ್ಯೇಕ್ ಪಾಡ್ತ್ ಜಿಕೊನ್ ಯೆತಾನಾ ನವ್ಯಾ ವಿಶಯಾಚೆ ದುಸ್ರೆಚ್ ಬೂಕ್. ಸರ್ಕಾರ್ ಬದ್ಲತಾನಾ ಬೂಕ್ ಬದ್ಲತಾತ್, ಯೋಜನಾಂ ಬಂದ್ ಪಡ್ತಾತ್. ಹರ್‍ಯೇಕ್ ಸಂಗತ್ ನವ್ಯಾನ್ ಸುರ್ವಾತ್ ಜಾತಾ. ಹರ್‍ಯೆಕಾ ಸರ್ಕಾರಾನ್ ಆಪ್ಣಾಚ್ಯಾ ಸ್ವಾರ್ಥಾಕ್ ಲಾಗೊನ್ ಕರ್‍ಚ್ಯಾ ಯೋಜನಾಂಮುಕಾಂತ್ರ್ ಲೊಕಾಕ್ ಕಿತೆಂ ತರೀ ಬರೆಪಣ್ ಜಾತಾ? ದಿಂವ್ಚ್ಯೊ ಗ್ಯಾರೆಂಟಿ ರಾಜ್ಯ್ ವಾ ದೇಶ್ ಅಭಿವೃದ್ದೆಕುಶಿನ್ ಚಮ್ಕೊಂಕ್ ಕಿತ್ಲ್ಯಾ ಮಾಪಾನ್ ಆಧಾರ್ ಜಾಯ್ತ್? ಹ್ಯಾ ಗ್ಯಾರಂಟಿಂಕ್ ವಾರೆಂಟಿ ನಾ ಮ್ಹಣ್ ಕಳಿತ್ ಆಸೊನೀ ಮೆಳ್ತಾ ವರೇಗ್ ಫಾಯ್ದೊ ಜೊಡ್ಯಾಂ ಮ್ಹಳ್ಳ್ಯಾ ಚಿಂತ್ಪಾನ್ ಜಿಯೆಂವ್ಚೊ ಲೋಕ್ ಜಾಯ್ತೊ ಆಸಾ.

77ವ್ಯಾ ವರ್‍ಸಾಕ್ ಭಾರತ್ ಪಾಂಯ್ ತೆಂಕುನ್ ಆಸಾ. ಬಹುಸಂಸ್ಕೃತಿಕ್ ಅನಿ ಸೆಕುಲರ್ ಜಾವ್ನ್ ಆಸ್‌ಲ್ಲ್ಯಾ ಆಮ್ಚ್ಯಾ ದೆಶಾಚಿ ಆವಸ್ಥಾ ಪಾಟ್ಲ್ಯಾ ಥೊಡ್ಯಾ ವರ್‍ಸಾಂಥಾವ್ನ್ ಭಿಗಡ್ಲ್ಯಾ. ತೋಂಡ್ ಉಗ್ತೆಂ ಕರುನ್ ಸತ್ ಉಲಯಿಲ್ಲ್ಯಾಂಕ್ ಪೂರಾ ಹ್ಯಾ ದೆಶಾಚ್ಯಾ ಸಂವಿಂಧಾನಿಕ್ ಸಂಸ್ಥ್ಯಾಚೊ ದುರಪಯೋಗ್ ಕರೊವ್ನ್, ಭೆಶ್ಟಾವ್ನ್ Anti Nationalist ಮ್ಹಣ್ ಬಿಲ್ಲೊ ದಿತಾತ್. ಬಿಜೆಪಿ ಸರ್ಕಾರ್ ಆಯಿಲ್ಲೊಚ್ ಕಾಶ್ಮೀರಾಂತ್ ಜಾಲ್ಲೊ ಗಲಾಟೊ ಹಿಂಸಾ ಆಮಿ ಜಾಣಾಂವ್. ಕಾಶ್ಮೀರಾಂತ್ ಆಸ್‌ಲ್ಲಿ ಹಿಂಸಾ ಆತಾಂ ಸಕ್ಲಾ ದೆಂವೊನ್ ಆಯ್ಲ್ಯಾ. ಕಾಶ್ಮೀರ್ ವಯ್ರ್ ಆಸಾ ತರ್ ಈಶಾನ್ಯ್ ಭಾರತಾಚ್ಯೆ ಗಡಿರ್ ಹಿಮಾಲಯಾ ಪರ್ವತಾಚ್ಯಾ ಮುಳಾಂತ್ ಸಕ್ಲಾ ಆಸಾ ಮಣಿಪುರ್. ಕಾಶ್ಮೀರಾಕುಶಿನ್ ಮಣಿಪುರ್‌ಯೀ ಘುಂವೊನ್ ಆಸ್ಲೆಬರಿ ದಿಸ್ತಾ. ಕೋಡ್ತ್, ಮೀಡಿಯಾ, ಇಲೆಕ್ಶನ್ ಕಮಿಶನ್ ಸಕ್ಕಡ್ ಎಕ್ಲ್ಯಾಚ್ಯೆ ಮುಟಿಭಿತರ್ ಆಸಾ. ಕಾಶ್ಮೀರಾಂತ್ ವಾಪಾರ್‌ಲ್ಲಿ ರೀತ್ ಮಣಿಪುರಾಕ್‌ಯೀ ವಾಪಾರ್‍ಲ್ಯಾ. ಇಂಟರ್‌ನೆಟ್ ಸವ್ಲತ್ಯೊ ಬಂದ್ ಜಾಲ್ಯಾತ್. ಹಿಂಸಾಚಾರ್ ಆನಿಕೀ ರಾವೊಂಕ್ ನಾ. ಹರ್‍ಯೇಕ್ ದೀಸ್ ಕಿತೆಂ ಜಾತಾಂ ತೆಂ ಆಯೊಂಕ್ ವಾ ಪಳೆಂವ್ಕ್ ಮೆಳನಾ. ಲ್ಹಾನ್ ಲ್ಹಾನ್ ಗಲಾಟೆ ಜಾವ್ನ್‌ಚ್ ಆಸಾತ್. ಉಜೊ ಪುರ್‍ತೊ ಪಾಲ್ವೊಂವ್ಕ್ ನಾ. ಒಡಿಸ್ಸಾ ರಯ್ಲ್ ಆವ್ಘಡ್ ಜಾಲ್ಲ್ಯಾ ಸುವಾತೆಕ್ ಭೆಟ್ ದಿಲ್ಲ್ಯಾ ಪ್ರಧಾನ್ ಮಂತ್ರಿಕ್ ಮಣಿಪುರಾಕ್ ಭೆಟ್ ದೀಂವ್ಕ್ ವೇಳ್ ಮೆಳೊಂಕ್ ನಾ. ಆಪ್ಲ್ಯಾ ‘ಮನ್ ಕೀ ಬಾತ್’ ಉಲೊವ್ಪಾಂತ್ ಗುಜ್ರಾತಾಂತ್ ಆಯಿಲ್ಲ್ಯಾ ಸೈಕ್ಲೋನಾವಿಶಿಂ ಉಲ್ಲೇಖ್ ಕೆಲಾ, ಪುಣ್ ಮಣಿಪುರಾಂತ್ ಜಾಂವ್ಚ್ಯಾ ಹಿಂಸಾವಿಶಿಂ ಮಾವ್ನ್ ಸಾಂಬಾಳ್ಳಾಂ. ಬಾಹ್ಯ್ ರಿತಿನ್ ದಾಕೊಂವ್ಚ್ಯಾಕ್ ಕೇಂದ್ರಾಥಾವ್ನ್ ಅಮಿತ್ ಶಾನ್ ಮಣಿಪುರಾಕ್ ವಚೊನ್ ತೀನ್ ಚಾರ್ ದೀಸ್ ರಾವೊನ್ ಸಮಾಲೋಚನ್ ಆಸಾ ಕೆಲ್ಯಾತ್. ತರೀ ಕಿತೆಂಚ್ ಬದ್ಲಾವಣ್ ಜಾಂವ್ಕ್ ನಾ. ಮಣಿಪುರ್ ರಾಜ್ಯಾಚಿ ಚರಿತ್ರಾ, ಸಂಸ್ಕೃತಿ, ಕೊನ್ಶಾಕ್ ಆಸಾ ಮಾತ್ರ್ ನ್ಹಯ್ ತೆಂ ರಾಜ್ಯ್‌ಚ್ ಸರ್ಕಾರಾನ್ ಕೊನ್ಶಾಕ್ ಲೊಟ್ಲಾ ಮ್ಹಳ್ಳ್ಯಾಕ್ ದುಬಾವ್ ನಾ. ಅಸಲ್ಯಾ ಗರ್ಜೆಚ್ಯಾ ಸಂಗ್ತಿಂಕ್ ಸರ್ಕಾರಾನ್ ಗುಮಾನ್ ದೀನಾಸ್ತಾನಾ ಬೆಪರ್ವಾ ದಾಕಯ್ಲಿ ತರ್ ವಾ ಸರ್ಕಾರ್ ಮಾವ್ನ್ ರಾವ್ಲೊ ತರ್ ದೇಶ್ ಅಭಿವೃದ್ಧಿ ಕುಶಿನ್ ಚಮ್ಕೊಂಕ್ ಕಶೆಂ ಸಾಧ್? ದೆಶಾಚ್ಯಾ ಪ್ರಧಾನ್ ಮಂತ್ರಿನ್ ಕಶ್ಟೊಂಚ್ಯಾ ಲೊಕಾಚಿ ಬಿರ್ಮತ್ ಪಾವನಾ ತರ್ ಹೆರಾಂನಿ ಕಿತೆಂ ಕರುಂಕ್ ಸಾಧ್? ಮಣಿಪುರಾಂತ್ ಘಡ್‌ಲ್ಲೆಬರಿ ಫಾಲ್ಯಾಂ ಹೆರ್ ರಾಜ್ಯಾಂತ್ ಘಡ್ಲೆಂ ತರ್ ಕಿತೆಂ ಪರಿಹಾರ್?

ದೆಶಾಂತ್ಲ್ಯಾ ಆಪುರ್ಬಾಯೆಚ್ಯಾ ವಿವಿಧ್ ಭಾಸ್, ಸಂಸ್ಕೃತಿ ಆನಿ ಧರ್ಮಿಕ್ ಆಚರಣಾಂಕ್ ಪ್ರೋತ್ಸಾಹ್ ದೀವ್ನ್ ವೆವಗ್ಳ್ಯಾ ಕಾಲೆತಿಚ್ಯಾ ಲೊಕಾಕ್ ಭಾವಾ-ಭಯ್ಣಿಂ ಮ್ಹಣ್ ಲೆಕ್ಚ್ಯಾಂತ್ ದೆಶಾಚಿ ಪ್ರಗತಿ ಜೊಡ್ಯೆತ್ ಶಿವಾಯ್ ಹೆರ್ ಸಂಗ್ತಿಂನಿ ಅಸಾಧ್. ವಿವಿಧತೆಂತ್ ಏಕತಾ ಆಸಾ. ಭಾರತಾಂತ್ ಎಕ್‌ಚ್ ಧರ್ಮ್ ಆನಿ ಎಕ್‌ಚ್ ಭಾಸ್ ಆಸಜೆ, ಎಕ್‌ಚ್ ಸಂಸ್ಕೃತೆಂತ್ ಹೊ ರಾಶ್ಟ್ರ್ ಫುಲೊನ್ ಯೇಜೆ ಮ್ಹಳ್ಳೆಂ ಚಿಂತಪ್ ನಿಜಾಯ್ಕಿ ಮಾರೆಕಾರ್. ವೆವೆಗ್ಳೆಪಣಾಂತ್ ಎಕ್ವಟ್ ರಾಕೊನ್ ವ್ಹರಿಜೆ. ಅಸಲೆಂ ಸಕಾರಾತ್ಮಕ್ ಚಿಂತಪ್ ದೆಶಾಚ್ಯಾ ಹರ್‍ಯೆಕಾ ವೆಕ್ತಿಥಂಯ್ ಉದೆವ್ನ್ ಯೇಂವ್ಕ್ ಜಾಯ್. ದೇಶ್ ಸಾಂಗಾತಾ ಉರಜೆ ತರ್ ದೇಶ್‌ಪ್ರೇಮ್ ಗರ್ಜೆಚೊ. ಮೋಗ್ ಆಸ್ಲ್ಯಾರ್ ಮಾತ್ರ್ ಬರೆಂ ಕರುಂಕ್ ಸಕ್ತಾಂವ್. ಮೊಸ್ರಾನ್, ಸ್ವಾರ್ಥಾನ್ ಪ್ರಗತಿ ಜಾಯ್ನಾ. ಹರ್‍ಯೆಕಾ ವರ್‍ಸಾ ಆಚರಣ್ ಕರ್‍ಚೊ ಸುಟ್ಕೆ-ಸಂಭ್ರಮ್ ಜಾಂವ್ಕ್ ಜಾಯ್ ಭದ್ರತೆಚೊ ಆನಿ ಅಭಿಮಾನಾಚೊ. ಲೊಕಾಚ್ಯಾ ಗರ್ಜಾಂಖಾತಿರ್ ಕಾಮ್ ಕರ್‍ಚಿ ಗಾದಿಯೆರ್ ಬಸ್‌ಲ್ಲ್ಯಾ ಸರ್ಕಾರಾಚಿ ಜವಾಬ್ದಾರಿ. ತಾಂಚಿ ಜವಾಬ್ದಾರಿ ಪಾಳಿನಾತ್ಲ್ಯಾ ವೆಳಾರ್ ಸವಾಲ್ ಕರ್‍ಚಿ ಜವಾಬ್ದಾರಿ ಮಾದ್ಯಮಾಂಚಿ ಆನಿ ಲೊಕಾಂಚಿ. ಸರ್ವಾಂನಿ ಆಪಾಪ್ಲಿ ಜವಾಬ್ದಾರಿ ಪಾಳ್ಳಿ ತರ್ ದೇಶ್ ಅಭಿವೃದ್ಧೆಕುಶಿನ್ ಚಮ್ಕೊಂಕ್ ಸಾಧ್. ನಾ ತರ್ ವರ್‍ಸಾನ್ ವರಸ್ ಬಾವ್ಟೊ ಉಬೊಂವ್ಚ್ಯೆ ರಿತಿಂತ್ ಸುಟ್ಕೆ-ಸಂಭ್ರಮ್ ಸಂಪ್ತೊಲೊ. ಹ್ಯಾ ವರ್‍ಸಾ 77ವೊ ಸುಟ್ಕೆ-ಸಂಭ್ರಮ್ ಆಚರಿತಾನಾ ಜಾನ್ ಎಫ್ ಕೆನೆಡಿಚಿಂ ಉತ್ರಾಂ ಪರತ್ ಉಗ್ಡಾಸಾಕ್ ಹಾಡ್ಯಾಂ. ‘ದೆಶಾನ್ ಮ್ಹಾಕಾ ಕಿತೆಂ ಕೆಲಾಂ ಮ್ಹಣ್ ವಿಚಾರ್‍ಚೆಂ ನಾಕಾ, ಹಾಂವೆಂ ದೆಶಾಖಾತಿರ್ ಕಿತೆಂ ಕೆಲಾಂ ಮ್ಹಳ್ಳೆಂ ಸವಾಲ್ ಆಮ್ಚ್ಯಾ ಮತಿಪಡ್ದ್ಯಾರ್ ಸದಾಂಚ್ ಆಸೊಂದಿ. ಸಮೇಸ್ತಾಂಕ್ ಮರಿಯೆಚ್ಯಾ ಸರ್ಗಿಂ ಘೆಣ್ಯಾಚೆ ಆನಿ ದೆಶಾಚ್ಯೆ ಸುಟ್ಕೆಚೆ ಉಲ್ಲಾಸ್ ಪಾಟಯ್ತಾಂ.

✍️ – ಬಾಪ್ ಐವನ್ ಸೊಜ್, ಕಾರ್ಮೆಲಿತ್